Вöлi сэк меным квать год, и видзисö менö гортолiсь туйö. А аймамö да пöрисьжык сойез-воннэзö ветлылiсö уджавны.
Мамöлöн вöлi öктöма куим литр тöрик кашникын сметана и пуктöма посöдз джаджö. А сметанаыс сэтшöм чöскыт! Ме стрась радейтлi сiйö, да мамö етша сетавлiс.
Öтпыр быдöнныс мунiсö гортiсь турунавны, а менö тшöктiсö типпез сьöрын видзöтлыны, мед эз гусяв нiйö кайварыш. Но, котраси-кери, чукöртi типпесö посöдз одзас и шуа: вай, мыся, сметанасö невна сёйышта. Вайи скамья, сувтi сы вылö — ог судз. Чöв, мыся, часöт судзöта — и скамья вылас пуктi пес, сувтчи сы вылö и судзöтi эд! Но, сёйыштi пань-мöд да бöр местаас дозсö пуктi.
Котраси мымдакö, лыдди типпезöс, быдöнныс я нiя бабукаыс дын. А лыдсö сэк ме тöдi етша и лыдди асмозöн: сьöддэс нёля — быдöнныс; гöрддэс кватя — быдöнныс; чочкоммес вита — быдöнныс; а руд типоксö эг лыддьывлы: сiя öтнас вöлi.
Сёйны да юны нылö сетыштi, и бöра тöдвылам сметанаыс усис: ноко, мыся, сёйышта эшö пань-мöд. Уна я сысянь чинас? Мамö оз и казяв. Но, кайи скамья вылас да кокчуннез вылам нюжöтчи и кыски кашниксö джадж дорас, да мый и лоис — песыс кок увтсим бергöтчис, кашникыс кисим мезмис и шапка моз кышасис юр вылам. Сметанаыс чужöм кузям котöртö, синö-пельö пырö, посöдзас лэдзчö. Но и бура повзи, ог тöд, мый и керны. Кыскыштi юр вывсим кашниксö, видза киам, а ачым бакса-горза.
Сэтчö, кыдз нарошно, сьывны пондiсö. Этö ытшкисянсянь павжнайтны локтöны. Ой, мыся, öнi мамö мый шуас! А сэтчö кысянькö сьöд каньным локтiс, сметанасö лакны пондiс. Тыдалö, чöскыт эд: и юрсö оз лэбты. Но, ме и казялi сэк, мый висьтавны мамöлö — ыстiсьны каньыс вылö.
Пырö мамö посöдзас, а ме ыждала, видча. Сэсся репöтi каньсö — шлёпки лякöсь кинам, а сiя и уськöтчис посöдз ыбöсас. Но, мамö и казялiс, что каньыс сметанаöн мавтчöма. Локтiс ме дынö, любитö менö да юасьö, мыля горза. Ме и висьтася: мыся, горш каньыс пондiс сёйны дозсис сметанасö, а ме кыдз брыснитi, сiя и пöрöтiс кашниксö ме вылö.
Жалейтыштiс менö мамö, юрöс миссьöтiс да кутiс каньсö и давай шатёкон лöсйыны да шувлыны:
— То кыдзи гусясьлыны, то кыдзи горшавлыны! Кин сiдз керö, сылiсь кучиксö кульыштöны!
Вартлiс Сьöдусö, а зубытыс и меным вöлi.
Сэксянь ме пола гусьöн и öтöрас петны: мыся, эшö кымöрыс кыминьтчас юр вылам.
ОШСЯ ЫДЖЫТЖЫК, УРСЯ УЧÖТЖЫК (Бичирок, 1965)
Типпескöт августöдз ме пукалi гортын и öтiкö эг травит. Быдмыштiсö нiя, и сэк пондi ягöдавны да тшакьявны ветлыны.
Кайи öтпырись Карин саяс, Сенька вильса вылö. Сэтöн öсеккез пöлöн уна малина вöлi. Инми малина вылас и öктiся, нем йылiсь ог думайт. Вот и джын дозам ни öктi, а ачым öтiк тусь эшö эг сёй, сё видзся. Да и кытшöм сiя öктiсьöм, кöр öтiк тусь — дозö, а куимö — öмат?
Вдруг öсек сайсяняс шарк токо кинкö лэбтiсис — ошся ыджытжык мыгöрнас. Ме бöрöн-бöрöн, да чужйиси и гатш-гатш пöри. А дозöс ылö эд шнитi-шупки, чисто ягöдöс кисьтi.
Ачым думайта: «Вот уськöтчас öнi ме вылö и сёяс менö». Куни синнэзöс, медбы не адззыны, кыдз пондас сёйны. Но сiя, ошся ыджытжыкыс, оз сёй менö, и ме осьтi синнэзöс. Адзза: киссьöм малинаöс зверь сёйö, но не сiя ни, а мöдiк — урся учöтжык. Но, ме тэись, мыся, ог пов! Чеччи, босьтi кöс бедь, а зверьыс скокйыштiс-чеччöвтiс öсек саяс и бöра ошся ыджытжыкö пöртчис — спинаыс öсек сайсяняс тыдалö — бусöй да сьöд виззя. То эд, мыся, кытшöм чудо! И давай пöльтны гортö, некытшöм малина оз ков! Рытнас мамö вундансянь локтiс, юасьö:
— Ноко вай малинатö сёйыштам. Натьтö, уна эд вайин?
А ме и шуа:
— Ой, маму, öтiк тусь эг вай.
— Мыля инö?
— Повзьöтiс менö сэтчин зверь.
— Кытшöм сэтшöм зверь?
— Ошся ыджытжык, урся учöтжык... Вот кытшöм! И висьтаси быдöс, кыдз вöлi.
Мамö серöмтчыштiс да и шуö:
— Сiя жö бурундук сэтшöмыс, учöтик зверёк.
— А мыля инö öсекысся вылынжык?
— Этö повзьöмсяняс син одзат ыждö. Сiя пуксис öсек вылас, а тэ шуин, что öсек саяс сiя сулалiс.
ВÖР ЧЕРИ (Бичирок, 1967)
Нёльгодся Митю öтпыр туримолявны мунiс и туримоль туйö адззис чериэз: нiя жагöника виклясисö сiсь колода гöгöр неылын шорок дынсянь. «Мыля нiя му вылöт уялöны? — думыш керис Митю. — А-а, тöда мыля: нылö ваас кöдзыт лоис, вот и петiсö косас».
И ягöдалiсь лоис черикыйисьöн: öтiкö кутiс, мöдiкö, а куимöтыс пырис сiсь колода увтö. Но, абу нем! Разис-жугдiс зоночка сiсь пусö и эшö унажык сэтчинiсь адззис — джын туисокас лоис. «Вот, — думайтö, — бабö ошкас вöлись. Ашын черинянь керам нето виöн жаритам да гöссесö вердам».
Дыр эшö кошшисис, но сэсся некинöс эз адззы и мунiс гортас. А гöссес эмöсь ни, рытсяняс жö локтöмась — Парась тётка да Öрин баб. Нiя пызан сайын пукалöны да черинянь сёйöны.
Митю шувк-павк пырыштiс керкуö, торс сувтöтiс туисоксö лабичö, радöн висьталiс:
— Бабу, бабу! Ме вöрсис чериэз куталi!
— Кысь инö, сокол?
— Шор дорись, бабу. Видзöт-ко мымда.
Осьтiс бабыс туисоксö, нёджжöвтiс пытшкас и — шлёп только пуксис джоджас да синнэсö барöтiс.
Чепöссисö сы дынö Парась тётка да Öрин баб, пуксьöтiсö лабичö.
Митю судзöтiс черинянись чери, вильöтiс сiйö да баитiс:
— Чöскыт чериыс. Этö тöн тятюö сэтчинiсь жö, натьтö, куталiс.
Видзöтiсö гöстяэс туисокас, кватитiсö паськöмоккезнысö и — не спасибо не прощай — уськöтчисö öтöрас.
— А мыля нiя пышшисö? — юасьö Митю. — Разь полöны нiя чериэслiсь?
— Нiя... нiя не че...чериэз, а дзö...дзöдзыввез, — мыкталöмöн висьталiс баб и чапкис туиссö осьта öшынöт öтöрö. Сэтчö котöртiсö курöггез да пондiсö мырддясьны Митю «чериöн».