Егда же преподобный Галактион исполнися благодати и Духа Святаго, и бысть ему откровено о святых Божиих церквах, и о градех, и людех. Тогда расковався от чепи, и изыде ис келии своея во оковех, и прииде в земскую палату, и нача со многим умилением глаголати людем и простирая им слово, еже к пользе душевной, рече: «О правовернии людие, Господь Бог посла на нас праведный свой гнев, и воздвиже язык польский и ли//(л. 8)товских людеи за наше великое согрешение. Вы же утвердите себе к воздержанию и молитве во всякое дело благое». И вскоре повеле им единодневно храм воздвигнути на месте своем трудолюбном во имя Пресвятыя Владычицы Нашея Богородицы и Приснодевы Марии честнаго и славнаго Ея Знамения, еже в Великом Нове граде: «Истинною верою и теплыми слезами и со усердием припадем к Нему, и покаемся с чистою совестию, и утвердим себе от сопротивных зверей лютых. Тако глаголет божественное писание: “Трезвитеся и бодствуйте, зане супостат ваш, яко лев рыкая, ища кого поглотити” (1 Петра 5:8), ему же сопротивитеся твердо и едино мыслите, восприимите в души ваши еже//(л. 8 об.) соблюсти чистоту душевную и телесную и всех скверных похотей и дел уклонитеся и отлучитеся. Аще тако сотворите, госпожа Наша Пречистая Богородица имать умолити Сына Своего и Бога Нашего, и подаст нам помощь, и град наш защитит, и избавит нас от нашествия иноязычных и от нахождения ратных людей». И тогда нача глаголати некто именит челоек, зовом Нечай Щелкунов, бесовским наветом и смыслом подстрекаем, пред народом рече: «Той старец вселися на месте том, и себе ради умысли тако, и восхоте творити пустынное строение, дабы поставили храм». И рече ко святому: «Отче, недалече от тебе храм святых великомученик Флора и//(л. 9) Лавра и святыя великомученицы Екатерины. И ты тамо ходи и молися. Аще мы тебе на твоем месте поставим храм, а ты умреши, а храм твой запустеет, и ты токмо тем миру тщету и убыток сотвориши». Святый же, со гневом тому человеку отвещав, рече: «Аз не о себе пекуся, но о святых Божиих церквах, и о граде нашем, и о вас, православных християнех, дабы вы напрасно не погибнули душами своими. А иного ты, человече, не веси, что по сем времени на моем месте имать Бог прославити святое свое имя, и обитель сограждена, и братство собрано, и храмы Божия вельми украшены будут, славно и честно жилище будет, и прославится имя Божие в род и род,//(л. 9 об.) а ваш храм Живоначалныя Троицы в дом твой от тех польских и литовских людей от нахождения разорен будет и былием порастет. И о после того от рода твоего никто же жити будет в нем». И в то время прииде преподобный на место, идеже храм преподобнаго отца нашего Димитрия, Прилуцкаго чюдотворца. И рече: «Сей святый великий чюдотворец Димитрий у Спаса милости просит о граде нашем. Ныне же сего прогневали, зане соделали у святилища торговыя хижи и торг учинили. И о сем ведите, вернии, что сей храм прежде разорен будет, и потом что содеется, вы узрите». И бысть во граде и людех печаль и мятежь велик//(л. 10) о том, яко хощет быти сия гибель и скорбь великая вскоре. Они же начаша ко преподобному прибегати в пустыню и вопрошати святаго всякий себе на имя. Тогда же святый отвещав коемуждо со слезами и поведа пророчески овым спасеным быти, иным же посеченым.
И Божиим попущением тогда вскоре приидоша иновернии на град Вологду, и прежде всего зажгоша церьковь святаго Димитрия, и потом зажгоша храм Живоначальныя Троицы его, Щелканова, строения, и дом его, и град его разориша, и людей посекоша, и избиша, овых же в плен с собою взяша. Тогда же збысться пророчество святаго по словеси его. Града же того людие во утеснении велицем быша и раз//(л. 10 об.)бегошася камо кому годе. Тогда же дщи того святаго виде ту скорбь належащую, и на бежание устремися, и не веде, где главу свою подклонити (Мф 8:20; Лк 9:58), вскочив в келию святаго отца своего. Видев же убо сие сатана, иже искони ненавидяй добра роду человеческу же, разсвирипев зело, еже в таковых скорбех нанести на святаго пагубу велику, и наусти тех злодеев и человекоубииц, яко к сему старцу прибеже жена, он же хранит ея.
Тогда же они окаяннии, устремившеся и скочивше в келию его, яко зверие дивии. Дщи же блаженнаго, видевши их, убежа от них. Они же яша преподобнаго жива в веригах и начаша его бити неща//(л. 11)дно и за чепь влачити по земли, укоризны понося на него, и мечи сечаху. И сице убо стражда преподобный и блаженный, яко твердый камень, утвержден верою, терпя в сицевых страстех и бедах, бием и влачим, не уны, но со благодарением терпя, и абие с некия храмины древом удариша его по главе, и оставиша его «еле жива суща» (Ср. Лк 10:30), и отидоша окаяннии от него. Блаженый же просветися, «яко злато, в пещи искушено» (Притчи 17:3), и прославися, труждаяся, и живот скончевая, и «воздвиже руце свои на небо» (3 Ц 8:22), глаголя: «Господи Иисусе Христе, сыне Божий, приими душу мою с миром и избави ея от воздушных мытарств, да не предана будет миродержцу тьмы века сего» и быв//(л. 11 об.) жив три дни, и преставися, и тако святую свою душу с молитвою Господеви предаде в лето 7121-е (1613) месяца сентября в 24 день.
Людие же благочестивии, вся устроивше к погребению, псалмы воспеваху и со свещами и со благоуханным фимиамом препроводивше, и погребоша честное, и многоцелебное, и святое тело его в доме его, идеже трудолюбно потрудися. Святая же и непорочная его душа в небесных обителех с лики святых престолу содетеля всех Бога предстоя, Его же измлада возлюби, от Него же и возмездие приемлет трудов своих, непрестанно Божия славы наслаждаяся. Нам же всем верным молящимся и с верою приходящим к чюдотво//(л. 12)рней раце мощей его, подает, источающи исцеления различная и чюдеса многа, даже и до сего дне.