Песнь 1.
Ирмос [7]: Яко по суху пешешествовав Израиль по бездне стопами, гонителя фараона видя потопляема, Богу победную песнь поим вопияше.
Припев: Пресвятая богородице, спаси нас (поклон) [8].
Неоскудну благодать имущи яко Божественную, Мати Безневестная, к Тебе прибегающих не презри, от бед и скорбей присно спасающи.
Припев: Пресвятая богородице, спаси нас
Се время наста моего уныния, востани Пречистая Владычице, и помощи даждь ми руку: Ты бо мир Божественнаго веселия исполнила еси.
Припев:
Слава:
Державный твой покров, Богородительнице, яко Заступница сущи, даждь ми вскоре напастьми одержиму, и невредна от сих сохрани мя.
И ныне:
Души моей смерть притекает, искушения же ненавидящих, яко аспиды обыдоша погубити мя: но сама мя Богородице, спаси.
Песнь 3.
Ирмос: Разширишася на враги моя уста моя, яко утвердися о Господе сердце мое.
Припев:
Умерщвленную душу мою прегрешеньми, Живот яко рождшая Богородице оживи.
Припев:
От всякаго искушения соблюди, к Тебе прибегающих Богородице, упование наше.
Слава:
От востающих на мя напастей горько, спаси мя Мати Господа моего Пренепорочная.
И ныне:
Яже мирови спасение подающи Божественным Рождеством Твоим, от бед мя премени.
Песнь 4.
Ирмос: Услыша пророк пришествие Твое Господи, и убояся, яко хощеши от Девы родитися, и человеком явитися: и глаголаше: услышах слух Твой, и убояхся: слава силе Твоей Господи.
Припев:
Изнеможе нищетою крепость души моея, Богородительнице, и лютое на мя омрачение нападе, от прегрешений имущее наход: призри яко светоносный облак Божий: и просвети мя, молюся.
Припев:
Бури зол моих, и смущение прегрешений, преложи в тишину спасения, яко сущи пристанище, Всенепорочная: рыкающе ищут мя, яко львове пожрети, пагубы тех избави мя, молюся.
Слава:
В нощи и во дни, на земли же и в мори, и на всяком месте, спасение твердо сущи, Богородице покрове непобедимый, спасай мя: по Бозе бо на Тя воистинну христиане уповаем.
И ныне:
От великих и различных прегрешений же и напастей, всегда спасаеши мя: темже яко рождшую Тя Господа молю, и к Тебе прибегаю, непобедимей помощи скорбящим: от бед изведи мольбами Твоими.
Песнь 5.
Ирмос: Свет возсияй миру христе, просвети сердце мое от нощи Тебе зовуща, и спаси мя.
Припев:
Спасения Тя покров славим, Слова Мати, Всенепорочная, навет не боящеся человеческих.
Припев:
Имуще Тя стену необориму, искушений же и печали востания избавляемся, Пречистая.
Слава:
Изми мя от злых человек языка, Чистая: якоже бо бритва изострися, погубити иский душу мою горько.
И ныне:
Прилежно Ти припадаю, моляся: яко Мати Зиждителя моего, одержащих мя бед свободи.
Песнь 6.
Ирмос: Китом пожрен греховным, вопию тебе Христе, яко пророка из истления мя свободи.
Припев:
Горести вкус прием, Божественныя сладости отчуждихся Пречистая. темже вопию ти: даруй ми помощь.
Припев:
Омрачение страстей, раба мя тли содела: темже свет рождшая, свободи мя Владычице.
Слава:
Согласно Тебе и верно исповедаюся, Пречистая, и пожру ти жертву, Тобою избавлься скорби.
И ныне:
Отверзошася на мя неправды уста, Владычице: темже мя яко Заступница, сих вскоре свободи.
Господи, помилуй. (Трижды)
Слава, и ныне:
Кондак [9], глас 6: Предстательство христиан непостыдное, ходатайство ко Творцу непреложное, не презри грешных молений гласы: но предвари яко Благая на помощь нас, верно зовущих Ти: ускори на молитву, и потщися на умоление предстательствующи присно Богородице, чтущих Тя.
Песнь 7.
Ирмос: Росодательну убо пещь содела Ангел преподобным отроком, халдеи же опаляющее веление Божие мучителя увеща вопити: благословен еси Боже отец наших.
Припев:
Искушения души моея, юже тучнии юнцы ныне обыдоша, Пресвятая Дево, Сама мя сих свободи.
Припев:
Защищающи тощно, в беде сущих и в печали, радость Богородице, подаеши всегда.
Слава:
Побеждена мя всего отчаянием дел и печали, огради мя Дево, яко покров всем нерушимый.
И ныне:
Предстательством Твоим избавляемся бед и скорбей, и обретаем богатство велие неистощаемо.
Песнь 8.
Ирмос: Из пламене преподобным росу источил еси, и праведнаго жертву водою попалил еси: вся бо твориши Христе, токмо еже хотети, Тя превозносим во вся веки.
Припев:
От человеческих снедаюся озлоблений, и молюся Богородице, избави мя суетнаго совета их.
Припев:
Победихся в печалех искушении моими, и молюся Владычице, от сих мя спаси невредима.
Слава:
Спаси мя Чистая, от человека льстива, и языка, и уст, и мучительства, и всякия нужды.
И ныне:
Иже нравом прельщаем есмь, без ответа сый, к Богородице зову: всяческих мя избави зол.
Песнь 9.
Ирмос: Еже радуйся от Ангела приимшая, и рождшая Создателя Своего, Дево, спаси Тя величающия.
Припев: Пресвятая богородице, спаси нас (поклон)