Чин освящения новосооруженного Креста
Диа́кон: Б лагослови́, влады́ко.
Иере́й: Благослове́н Бог наш, всегда́, ны́не и при́сно и во ве́ки веко́в.
Хор: Ами́нь.
Духовенство С ла́ва Тебе́, Бо́же наш, сла́ва Тебе́.
Хор: Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.
Чтец: Т рисвято́е. П ресвята́я Тро́ице... О́ тче наш...
Иере́й: Я́ко Твое́ есть Ца́рство и си́ла и сла́ва Отца́ и Сы́на и Свята́го Ду́ха, ны́не и при́сно и во ве́ки веко́в.
Чтец: А ми́нь.
Г о́споди, поми́луй. (12 раз)
П рииди́те, поклони́мся Царе́ви на́шему Бо́гу.
П рииди́те, поклони́мся и припаде́м Христу́, Царе́ви на́шему Бо́гу.
П рииди́те, поклони́мся и припаде́м Самому́ Христу́, Царе́ви и Бо́гу на́шему.
Псало́м 103:
П омяни́, Го́споди, Дави́да и всю кро́тость eго́: я́ко кля́тся Го́сподеви, обеща́ся Бо́гу Иа́ковлю: а́ще вни́ду в селе́ние до́му моего́, или́ взы́ду на одр посте́ли моея́, а́ще дам сон очи́ма мои́ма и ве́ждома мои́ма дрема́ние, и поко́й скраниа́ма мои́ма, до́ндеже обря́щу ме́сто Го́сподеви, селе́ние Бо́гу Иа́ковлю. Се слы́шахом я́ во Евфра́фе, обрето́хом я́ в поля́х дубра́вы. Вни́дем в селе́ния Его́, поклони́мся на ме́сто, иде́же стоя́сте но́зе Его́. Воскресни́, Го́споди, в поко́й Твой, Ты и киво́т святы́ни Твоея́. Свяще́нницы Твои́ облеку́тся пра́вдою, и преподо́бнии Твои́ возра́дуются. Дави́да ра́ди раба́ Твоего́ не отврати́ лице́ пома́заннаго Твоего́. Кля́тся Госпо́дь Дави́ду и́стиною и не отве́ржется ея́: от плода́ чре́ва твоего́ посажду́ на престо́ле твое́м. А́ще сохраня́т сы́нове твои́ заве́т Мой, и свиде́ния Моя́ сия́, и́мже научу́ я́, и сы́нове их до ве́ка ся́дут на престо́ле твое́м. Я́ко избра́ Госпо́дь Сио́на, изво́ли и́ в жили́ще Себе́. Сей поко́й Мой во век ве́ка, зде вселю́ся, я́ко изво́лих и́. Лови́тву eго́ благословля́яй благословлю́, ни́щыя eго́ насы́щу хле́бы, свяще́нники eго́ облеку́ во спасе́ние, и преподо́бнии eго́ ра́достию возра́дуются. Та́мо возращу́ рог Дави́дови, угото́вах свети́льник пома́занному Моему́. Враги́ eго́ облеку́ студо́м, на не́мже процвете́т святы́ня Моя́.
Псало́м 59:
Б о́же, отри́нул ны еси́ и низложи́л еси́ нас, разгне́вался еси́, и уще́дрил еси́ нас. Стрясл еси́ зе́млю и смути́л еси́ ю́, исцели́ сокруше́ние ея́, я́ко подви́жеся. Показа́л еси́ лю́дем Твои́м жесто́кая, напои́л еси́ нас вино́м умиле́ния. Дал еси́ боя́щымся Тебе́ зна́мение, е́же убежа́ти от лица́ лу́ка. Я́ко да изба́вятся возлю́бленнии Твои́, спаси́ десни́цею Твое́ю и услы́ши мя. Бог возглаго́ла во святе́м Свое́м: возра́дуюся и разделю́ Сики́му, и юдо́ль жили́щ разме́рю. Мой есть Галаа́д, и Мой есть Манасси́й, и Ефре́м – кре́пость главы́ Моея́, Иу́да – царь Мой. Моа́в – коно́б упова́ния Моего́, на Идуме́ю простру́ сапо́г Мой, Мне иноплеме́нницы покори́шася. Кто введе́т мя во град огражде́ния? или́ кто наста́вит мя до Идуме́и? Не Ты ли, Бо́же, отри́нувый нас? И не изы́деши, Бо́же, в си́лах на́ших? Даждь нам по́мощь от ско́рби, и су́етно спасе́ние челове́ческо. О Бо́зе сотвори́м си́лу, и Той уничижи́т стужа́ющыя нам.
Псало́м 98:
Г оспо́дь воцари́ся, да гне́ваются лю́дие: седя́й на Херуви́мех, да подви́жится земля́. Госпо́дь в Сио́не вели́к, и высо́к есть над все́ми людьми́. Да испове́дятся и́мени Твоему́ вели́кому, я́ко стра́шно и свя́то есть. И честь Царе́ва суд лю́бит: Ты угото́вал еси́ правоты́, суд и пра́вду во Иа́кове Ты сотвори́л еси́. Возноси́те Го́спода Бо́га на́шего, и покланя́йтеся подно́жию но́гу Его́, я́ко свя́то есть. Моисе́й и Ааро́н во иере́ех Его́, и Саму́ил в призыва́ющих и́мя Его́: призыва́ху Го́спода, и Той послу́шаше их. В столпе́ о́блачне глаго́лаше к ним: я́ко храня́ху свиде́ния Его́ и повеле́ния Его́, я́же даде́ им. Го́споди Бо́же наш, Ты послу́шал еси́ их: Бо́же, ты ми́лостив быва́л еси́ им, и мща́я на вся начина́ния их. Возноси́те Го́спода Бо́га на́шего, и покланя́йтеся в горе́ святе́й Его́, я́ко свят Госпо́дь Бог наш.
Сла́ва Отцу́, и Сы́ну, и Свято́му Ду́ху и ны́не, и при́сно, и во ве́ки веко́в, ами́нь.
А ллилу́ия, аллилуия, аллилуия, слава Тебе, Боже. (Три́жды)
Тропа́рь Креста́, глас 1:
Хор: С паси́, Го́споди, лю́ди Твоя́/ и благослови́ достоя́ние Твое́,/ побе́ды на сопроти́вныя да́руя// и Твое́ сохраня́я Кресто́м Твои́м жи́тельство.
Слава Отцу и Сыну и Святому Духу
Конда́к Креста́, глас 4:
В ознесы́йся на Крест во́лею,/ тезоимени́тому Твоему́ но́вому жи́тельству/ щедро́ты Твоя́ да́руй, Христе́ Бо́же,/ возвесели́ нас си́лою Твое́ю,/ побе́ды дая́ нам на супоста́ты,/ посо́бие иму́щим Твое́ ору́жие ми́ра// непобеди́мую побе́ду.
И ныне и присно и во веки веков. Аминь.
Ж ивотворя́щий Кре́ст Твоея́ бла́гости, / егоже дарова́л еси нам недосто́йным, Го́споди, / Тебе́ прино́сим в моли́тву, / Спаси́ ве́рныя люди Богоро́дицы ради, о нас Тебе моля́щияся, // Еди́не Человеколю́бче.
Тропарь, глас 6:
П осли́ Благода́ть Твою́, Жизнода́вче, / и Крест сей освяти́, / и всем лю́дем Твои́м яви его // бы́ти по́мощь и утвержде́ние. (ТРИЖДЫ).
Диакон: Г о́споду помо́лимся.
Хор: Го́споди, поми́луй.
Иере́й: Г о́споди Бо́же Сла́вы, О́тче Вседержи́телю, Бо́же Савао́ф, и́же дре́вом живота́ посреде́ рая́ су́щаго, прообрази́л еси́ Животво́рный Кре́ст Единоро́дгаго Сы́на Твоего́: и вме́сто дре́ва преслуша́ния, его́же вку́сом вселука́вый зми́й пра́отцы на́ша, и с ни́ми весь род челове́ческий из рая́ изгна́, и в сме́рть привлече́, зна́мение о́наго Живоно́сного Крета́, на не́мже возлю́ленный Тво́й Сы́н пригвожде́н быв у́мре, и сме́трию сме́рть умертви́, и всю си́лу диа́волю упраздни́, и живо́т мíру дарова́, Це́ркви Свое́й ору́жие непобеди́мое, освяще́ние же и покро́в держа́вен, и ве́ре утвержде́ние, и о всех диа́вольских ко́зней изба́ву, и кре́пкое спасе́ния упова́ние, и живота́ получе́ния непосты́дную наде́жду дарова́л еси́. Те́мже мы раби́ Твои́, толи́кия Благода́ти Твоея́ ту́не сподо́бльшеся, благода́рни су́ще, сла́ву и благодаре́ние и смире́нное поклоне́ние прино́сим Твоему́ Вели́честву, и мо́лимся уми́льно, я́ко да ми́лостивно при́зриши на Зна́мение сие́ Кре́стное, е́же ве́рнии раби́ Твои́ от усе́рдия и тве́рдыя ве́ры и любве́, и́же к Тебе́, сооружи́ша, в зна́мение побе́ды Сы́на Твоего́, Го́спода на́шего Иису́са Христа́, свобо́ды же и избавле́ния на́шего: и низпосли́ на не́ Небе́сное Твое́ благослове́ние, и благослови́ и освяти́ е, и испо́лни си́лы и благослове́ния о́наго дре́ва, на не́мже пригвожде́но бы́сть Пречи́стое те́ло Го́спода на́шего Иису́са Христа́ Единоро́днаго Сы́на Твоего́, и́мже си́ла диа́воля попра́ся, и земни́и свобо́ду улучи́хом, и живота́ сподо́бихомся. Е́й, мо́лим Тя, Влады́ко Пресвяты́й, Святы́х ради Страсте́й, и Святы́я Кро́ве излия́ния, и животво́рныя сме́рти Единоро́днаго Сы́на Твоего́, Го́спода на́шего Иису́са Христа́, юже сове́том Тебе́ Бо́га Отца́ Безнача́льнаго, и Пресвята́го Твоего́ Ду́ха во́лею, спасе́ния на́шего ра́ди на Дре́ве Кре́стном претерпе́, и те́ми Дре́во Кре́стное, еже иногда́ согреша́ющим и злотво́рным ка́знь бя́ше, благослове́нно, свя́то, животода́тельно же, и изба́ву согреша́ющим бы́ти сотвори́, еже в мольбу́ Ти прино́сим: посли́ ны́не Благода́ть Пресвята́го Твоего́ Ду́ха, на Зна́мение сие́ Кре́стное. И благослови́ и освяти́ е, и да́ждь ему́ бы́ти зна́мением стра́шным и кре́пким на вя враги́ видимыя́ и неви́димыя, прогна́ние же и отраже́ние всех ко́зней, наве́тов же и прило́гов диа́вольских: лю́дем же Твои́м да буде́т покро́в держа́вен, ве́ре утвержде́ние, надежде́ подкрепле́ние, во бране́х побе́да, и во всех доброде́телех преспе́яние, и все́м пред сим Зна́мением Тебе́ кла́няющимся и мольбы́ принося́щим моли́твен послу́шатель, и все яже ко спасе́нию проше́ний бога́тый пода́тель бу́ди. И я́коже Кресто́м мíр от грехо́внаго осужде́ния свободи́л еси́: си́це рабо́в Твои́х, сие́ Кре́стное Зна́мение Тебе́ от души́ ве́рно принося́щих, си́лою Креста́ воблю́бленнаго Сы́на Твоего́, всегда́ победители́ бы́ти греха́ яви́, и вся́ земна́я и небе́сная Твоя́ блага́я им да́руй, и Кресто́м всегда́ к благо́му всех ве́рных наставля́я, к восприя́тию небе́снаго венца́ приведи́. Ты бо еси́ освяще́ния исто́чник, и все́х благи́х бога́тый пода́тель, и Тебе́ сла́ву возсыла́ем, со Единоро́дным Твои́м Сы́ном, и с Пресвяты́м и Благи́м и Животворя́щим Твои́м Ду́хом, ны́не и при́сно, и во ве́ки веко́в.
Хор: Ами́нь.
Иере́й: Мир всем.
Хор: И ду́хови твоему́.
Диа́кон: Главы́ ва́ша Го́сподеви приклони́те.
Хор: Тебе́, Го́споди.
Священник, преклонившись, молится тайно:
Иере́й Б о́же и О́тче Го́пода на́шего Иису́са Христа́, я́же Кресто́м Его́ диа́вола победи́в и сме́рть умертви́в, ро́д челове́ческий от ле́сти и мучи́тельсва е́го свободи́л еси́: при́зри ны́не на моли́тву на́шу и на Зна́мение сие Кре́стное, в сла́ву Тебе́ Бо́га Отца́ и Единосу́щнаго Твоего́ Сы́на и соесте́свеннаго Твоего́ Ду́ха, и в воспомина́ние о́ныя бы́вшия пресла́вныя над диа́волом, сме́рте же и а́да побе́ды, и на́шего избавле́ния сооруже́нное, Ду́хом Твои́м Святы́м, в окропле́нии воды́ сея́ свяще́нныя благослови́ и освяти́. И изле́й на не Благослове́ние Твое́ Свято́е и си́лу, ю́же окропле́ние кро́ве и пригвожде́нием те́ла Возлю́бленнаго Сы́на Твоего́ о́но преблагослове́нное Дре́во стяжа́ло е́сть: и тому́ пода́ждь, во е́же бы́ти ве́рным лю́дем Твои́м в сте́ну и покро́в, и в сто́лп кре́пости от лица́ вра́жия, во отгна́ние же вся́каго зла́ сопроти́внаго, и во исцеле́ние душе́вных, и теле́сных неду́гов, в во еже услы́шанным бы́ти мольба́м и моле́ниям все́х ве́рно пре́д сим Зна́мением моля́щих Ти ся.
Возгла́с: Ты бо еси́ Бог ми́лости, и щедро́т, и человеколю́бия, и Тебе́ сла́ву возсыла́ем со Единоро́дным Твои́м Сы́ном, и с Пресвяты́м, и Благи́м, и Животворя́щим Твои́м Ду́хом, ны́не, и при́сно, и во ве́ки веко́в.
Хор: Ами́нь.
Иерей же кропит Священною водою, глаголя:
Иере́й О свяща́ется Кре́стное сие Зна́мение Благода́тию Пресвята́го Ду́ха, окропле́нием Воды́ сея́ Свяще́нныя, во и́мя Отца́, и Сы́на, и Свята́го Ду́ха, ами́нь. (Трижды).
Стихиры, Глас 2:
Хор: К ре́ст Храни́тель все́й вселе́нней, / Кре́ст красота́ церко́вная: / Кре́ст царе́м держа́ва: / Кре́ст ве́рным утвержде́ние: // Кре́ст а́нгелом сла́ва, и бесо́м я́зва.
Глас 4:
Сла́ва Отцу́ и Сы́ну и Свято́му Ду́ху и ныне и присно и во веки веков. Аминь.
О Тебе́, Треблаже́нне и Жизнода́вче Кре́сте,/ лю́дие пита́еми спра́зднуют: с безпло́тными ли́ки, / чин архиере́йский благогове́йно пое́т: / мно́жество же и́ночествующих и по́стников покланя́ется, // Христа́ же на Тебе́ распе́ншагося вси́ прославля́ем.
Хор: К ресту́ Твоему́ покланя́емся Влады́ко,/ и свято́е Воскресе́ние Твое́ сла́вим.
(трижды, после каждого раза земной поклон)
Можно обиходным распевом, а можно вот так:
Стихира, Глас 2:
Хор: П рииди́те ве́рнии, / Креста́ си́ле поклони́мся: // дре́во бо в раи́ сме́рть прозябе́, / сие же жи́знь процвете́, / безгре́шна иму́щее пригвожде́нна на себе́ Го́спода, / от него́же вси язы́цы нетле́ние объе́млюще, зове́м: / Кресто́м сме́рть упраздни́вый, / и нас от пре́лести и мучи́тельства диа́воля свободи́вый, // Го́споди сла́ва Тебе́.
Диа́кон: П рему́дрость.
Хор: [Высокопреосвященнейший владыко,] Благослови́.
Иере́й: Сый благослове́н Христо́с Бог наш, всегда́, ны́не и при́сно и во ве́ки веко́в.
Хор: Ами́нь. Утверди́, Бо́же, святу́ю правосла́вную ве́ру, правосла́вных христиа́н во век ве́ка.
Иере́й: Пресвята́я Богоро́дице, спаси́ нас.
Хор: Честне́йшую Херуви́м и Сла́внейшую без сравне́ния Серафи́м, без истле́ния Бо́га Сло́ва ро́ждшую, су́щую Богоро́дицу, Тя велича́ем.
Иере́й: Сла́ва Тебе́, Христе́ Бо́же, Упова́ние на́ше, сла́ва Тебе́.
Хор: Сла́ва, и ны́не. Го́споди, поми́луй. (Трижды) [Высокопреосвященнейший владыко,] Благослови́.
Отпу́ст:
Иере́й: И́же на дре́ве Крестно́м спасе́ния на́шего ра́ди распны́йся, и сме́рть подъя́ти изво́ливый, и тридне́вно из ме́ртвых воскресы́й: Христо́с, и́стинный Бог наш, моли́твами пречи́стыя Своея́ Ма́тере, си́лою честна́го и животворя́щаго Креста́, и всех ради святы́х свои́х, поми́лует и спасе́т нас, я́ко Благ и Человеколю́бец.
Многоле́тие:
Хор: В ели́каго Господи́на и Отца́ на́шего Кири́лла,/ Святе́йшаго Патри́арха Моско́вского и всея́ Руси́,/ и Господи́на на́шего Высокопреосвяще́ннейшаго Климента,/ митрополита Калужского и Боровского,/ богохрани́мую страну́ на́шу Росси́йскую,/ настоя́теля, бра́тию и прихо́жан свята́го хра́ма сего́ и вся правосла́вныя христи́аны,// Го́споди, сохрани́ их на мно́гая ле́та.
Ис полла эти деспота!
Тропа́рь Креста́, глас 1:
Хор: С паси́, Го́споди, лю́ди Твоя́/ и благослови́ достоя́ние Твое́,/ побе́ды на сопроти́вныя да́руя// и Твое́ сохраня́я Кресто́м Твои́м жи́тельство.