Калыклэсь ваньмон дырзэ пайдаё кутон вылысь, шулдыръяськон интыос Финляндиын усьтиськылыны кутскизы XX даурлэн нырысети жыныяз. Соку бадзым тиражъёсын потылизы дунтэм книгаос, тумошо-серемес гожъямъёс, учкисез, кылзисез ас палазы кыскон понна вожвылъяськизы нырысети кинофильмъёс но грампластинкаос. 20-ти аръёслэн пумазы Финляндиын 200-лэсь уно кинотеатръёс лыдъясько ни вал. 1929 арын финнъёс миллионлэсь уно грампластинкаос басьтиллям. Та аръёсы ик, радио ужаны кутскемен, грампластинкаосы гожтэмъёс но выль ансамбльёслэн "улэп гуръёссы" шаерлэн портэм сэрегъёсаз волмизы.
Кыкетиез дунне ож (мировой война) мынон дыръёсы но борысьгес культура тужгес пушйиз, калык полы волмиз. Сьор кунъёсысь фильмъёс но джаз пластинкаос вазенгес ке но вуизы, 1940-ти аръёслэн пумазы гинэ калыке паськыт волмизы. 1940-ти аръёсы кунгож сьорысь поп-культураен вуэм эстрада гуръёс полын свинг эктон но вал. Финляндиысь эстрада палэнысь "тулкымъёсыз" шодылиз ке но, аслэсьтыз финн сямзэ оз ышты.
Палэнысь культуралэсь финляндие пычамзэ возьматэ кока-колалэн, 1952 арын Хельсинкиын ортчем Олимпийской шудонъёс дыръя, шаере вуэмез. Нош коня ке дыр ортчыса, финн егитьёс но покчиос тодматскизы "Дональд чож-пиен", "Микки-Маусэн" но Америкаысь мукет комиксъёсын.
Война бере куашкатэм хозяйствоез выльдонэн чош сьорлось культуралы "осъёс" но волак усьтиськизы. Егитьёс шумпотыса пумитазы рок-н-роллэз. Озьы ке но, со кутсконэз гинэ вылэм. 1980—1990-ти аръёсы кунгож сьорысь вуэм культура ньылиз, шуыны луоз, финн калыклэн сямъёсыныз герзаськемзэ.
Финн шаерысь культура палэнысь вуэменыз пачкатэмын ке но вал, чылкак со оз пыдесъяськы. Ваньзэ чидаса, шаерысь эстрада, эсьма, вашкала крестьян культуралэсь вуныны кутскись аспортэмлыкьёссэ но утьыны быгатиз. Таин чош ик вашкала финн калык культура туала дырлэн куронъёсызъя выльдиськылиз. Сое умой возьматэ Каустиненысь национальной музыкая фестиваль, кытчы крезьгурчиосты кылзыны гужемлы быдэ трос калык люкаськылэ.
Литературая тодон-валанэз эскерон (кар)
Класс
1. а). Эпической жанръёсын кылсуред (образ) кылдытон понна кыче амалъёсты писатель уже кутэ?
б). Кедра Митрей кыче амал пыр Дангырез суредам?
2. а). Сётэм кылбуръёслэсь авторъёссэс шедьтэ но герзалэ.
Ашальчи Оки «Кык сяськаос»
Кузебай Герд «Сяськаос, сяськаос»
М. Петров «Нюлэскы ветлыкум»
Ф. Васильев «Ошмес синмын дунне шоры учке музъем…»
М. Покчи-Петров «Вандэмо»
Н. Байтеряков «Сяськаяськись льомпу»
б). Та кылбурчиос полысь кудиз шаермылэн уйпал сэрегаз вордиськиз?
3. Ф. Васильевлэн «Меми, малы-о киосыд сюрмылэмын?..» кылбурезлы анализ лэсьты.
Юрттись юанъёс:
1). Кин куспын кылбырын вераськон мынэ?
2). Кычеен суредамын соослэн кусыпъёссы?
3). Кыче валтись мылкыд кылбурын кузёяське?
4). Кычеен син азяды кылбурысь удмурт нылкышно пуксе?
5). Кыче чеберлыко амалъёсты автор уже кутэ, сое суредан понна?
6). Эшшо мар та кылбур пумысен верамед луэ на?
Меми,
Малы-о киосыд сюрмылэмын?
Куинь муртлэсь ужзэ
Огнад быдэсъяменыд-а?
Меми,
Малы-о пыдъёсыд ко жадемын ни?
Нылпиедлы
Шудбур утчаса ветлэменыд-а?
Меми,
Малы-о тыбырыд но губырскемын?
Нылпиосыд вадьсысь
Инбамез воземеныд-а?
Меми,
Малы-о лябземын ни кумымед?
Аслэсьтыд ымтырдэ
Нылпиедлы сётъяменыд-а?
Меми,
Малы-о бамъёсыд гожмамын мур чуръёсын?
Нылпиед сярысь
Уй-нунал сюлмаськеменыд-а?
Меми,
Малы-о синъёсыд гинэ чик бездымтэ?
Нылпиосыдлэсь шудзэс
Кемагес адземед потэменыд-а?
— Таче юанъёс сюлэмад вордисько ни ке, пие,
тыныд валэктыны кулэ овол ни, дыр,—шуиз меми.
Валэктонъёс
1. а). Авторлэн дунъетэз (характерисатикаез), огез геройлэн мукетыз сярысь верамез, монолог, пуш малпанъёс (монолог), инкуазь пыр, вылтусэз суредан (портрет), корка пушез (интерьерез) возьматон, портэм детальёс.
б). Портрет.
2. а). Ашальчи Оки «Нюлэскы ветлыкум»
Кузебай Герд «Сяськаяськись льомпу»
М. Петров «Вандэмо»
Ф. Васильев «Ошмес синмын дунне шоры учке музъем…»
М. Покчи-Петров «Кык сяськаос»
Н. Байтеряков «Сяськаос, сяськаос…»
б). Ф. Васильев.
2. Кылбурын анай но солэн пиез куспазы верасько. Удмурт нылкышно татын вань шуг-секытъёсты вормыны дась, пумтэм чидась, вордэм нылпиосыз понна нуналлы быдэ сюлмсаськись адямиен возьматэмын. Пиез вала, малы со дырызлэсь вазь пересьмиз, сётскиз. Анайлэн но пиезлэн кусыпъёссы мур гажанэн. Яратонэн но валанэн тырмемын. Удмурт нылкышноез суредан понна, автор метафораез уже кутэ: нылпиос вадьсысь инбамез возён – анайлэн нылпиоссэ шугадзонъёслэсь утемез-сайямез.
Класс
1. а). Мар со «деталь»? Кыче солэн кулэлыкез но зечлыкез чеберлыко гожтосын (произведениын)?
б). Г. Красильниковлэн «Пыртос» веросэзлэн оглюкетысьтыз детальзэ шедьты но солэсь пуштроссэ валэкты.
Коркан чалмыт луиз: со куспын ваньмыз кылизы: Аркашлэн кырымаз мар ке но каллен гинэ шатрак кариз. Кырымзэ усьтиз – сьод чилясь бубылилэн бурдъёсыз пырдиллям. Аркаш со пырыосыз сэргы пазьгиз, Зина ачиз номыр вазьыса оз вуы.
Текстысь куд-ог секыт кылъёс но кыл сочетаниос:
Кылизы – услышали
Кырымаз – в кулаке
Шатрак кариз – хрустнуло
Чилясь – блестящий
Бурдъёс – крылья
Пыры – осколок
Пазьгиз – рассыпал, бросил.
2. Кыче произведениысь та люкет? Кин солэн авторез? Кин но мар сярысь татын маде?
Та сылон интыям мертизы. Пыд улам из кылле, выжыосме пыдло лэземе уг луы. Татчы пуктэм беразы, туж кема виси, чушни сямен, тол шорын шонаськыса сыли. Эшъёсы кудиз висем беразы будыны одъязы, кудиз пинал дыръязы ик куасьмыса быризы. Мае гинэ мон татын улытозям ой адзылы? Ваньзэ вераны кутски ке, дас ар чоже дугдылытэк вераны тырмоз.
Текстысь куд-ог секыт кылъёс но кыл сочетаниос:
Мерттизы – посадили
Пыдло лэземе уг луы – не в силах пустить глубоко
Пуктэм беразы – после того, как посадили
Шонаськыса – шатаясь
Куасьмыса быризы – высохли
Чоже – в течение
Дугдылытэк – без остановки
3. Ф. Васильевлэн «Кызьпуын пузкаръёс, пузкаръёс…» кылбурезлы анализ лэсьтиы.
Юрттись юанъёс:
1). Кыче писпуос ваче пумт кылбурын пуктэмын?
2). Маин соос ог-огзылэсь портэмесь?
3). Кыче чеберлыко амалъёсты автор уже кутэ, ньылпуэз суредан понна?
4). Кыче синмын, мылкыдын автор ньылпу шоры уче?
5). Мае вераны тыршем кылбурчи та писпуос пыр, тынад чакламедъя?
6). Эшшо мар та кылбур пумысен тынад верамед луэ на?
Кызьпуын — пузкаръёс, пузкаръёс...
Жадисьтэм бурдоос чаш потто.
Забыльтйсь но чирдись куараос
Чукысен акшанозь жингырто.
Нош возаз вонс-.ньылпу кунырскем,
Пересь мурт кадь учке мозмыса.
Вайёсыз но солэн — каръёстэм,
Уг, уг пукы бурдо чипсыса.
Лысъёсыз но солэн небытэсь,
Вайёсыз но солэн туж чемесь.
Нош малы-о меда папаос
Весь уг лэсьто татчы пузкаръёс?!
Лэзиськем киоссэ шонаса
Кайгыре-кайгыре вож ньылпу.
Вожъяськон мылкыдыз потыса,
Шайтан кар ни вордэм со ньылпу.
Кызьпулэн матазгес льцшлвуз,
Вож ньылпу шонаське, шонаське...
Кызьпуысь куаръёсты учкыкуз,
Нылпитэм кышномурт кадь адске.
Валэктон
1. а). Деталь – текстысь чыры-пыры, но мур пуштросо тодмет, кудиз героез мургес усьтыны юрттэ, солэсь характеристиказэ узырмытэ.
б). Та оглюкетын Г. Красильников «сьод чилясь бубыли» деталез уже кутэм. Со – Максимлэсь чигем улонзэ, сюлэмзэ усьтись тодмет, ненег, чылкыт сюлэмез вось карон.
2. Та оглюкет Кедра Митрейлэн «Сурсву» веросысьтыз. Кызьпу аслан вераназ (исповедяз) ортчем улонэз, адемъёсыз, возаз ортчем учыръёс сярысь маде.
3. Та кыльурын ваче пумит пуктэмын кызьпу но ньылпу. Кызьпуын пузкаръёс вань, со котырти котьку тылобурдоос лобало, вайёс вылаз гуръёссэс чирдо. Нош ньылпуэ папаос уг каръясько. Пузкаръёс интые отчы шайтан кар кылдэм. Ньылпуэз суредан понна, автор олицетворениез («кунырскем», «учке мозмыса», «киоссэ шонаса», «кайгыре, кайгыре», «вордэм», «лыктыкуз»), чошатонэз («пересь мурт кадь», «нылпитэм кышномурт кадь»), метафораез («лэзиськем киоссэ шонаса») уже кутэ. Озьы со ньылпуэз улэп макеез выллем суреда, жаля сое. Та писпуос пыр автор возьматэ:
1). Кызьпу Кылдысинлэн писпуэз, дунсьолыктэм (святой) писпу. Со дыре ик со Дунне Писпу (Мировое Древо) сярысь мифе вуттэ. Нош ньылпу Шайтанлэн (Кереметлэн) писпуэз.
2). Та писпуос сямъёссыя кык портэм адямиосты шараяло.
Класс
1. Калыке кылос (фольклор) но чеберлыко литература. Мар соосты огазея но портэм каре?
2. а). Кыче удмурт калык кырзанъёсты тодиськод?
б). Кыче мылкыдын чемысь удмурт калык кырзанъёс пачылмемын?
в). Маин матын Ашальчи Окилэн кылбуръёсыз удмурт калык кырзанлы? Кыче кылбуръёсыз кырзанлы пормизы?
3. «Из но му но пилиське но…» калык кырзанлы анализ лэсьты.
Юрттись юанъёс:
1). Кыче мылкыд кырзанын кузёяське?
2). Кыче дыр (вакыт) ваозьматэмын?
3). Кыче ваче пумит пуктонъёс (оппозициос) син азе пуксё?
4). Мае герзало Кам шу но туриос?
5). Мар огазея текстысь вань нимъёсты?
6). Кытчы ваньмыз кошке?
7). Удмурт калыклэсь кыче дунне шоры учконзэ (философизэ) та кырзан усьтэ?
8). Эшшо мар та кылбур пумысен тынад верамед луэ на?
Из но му но пилиське но,
Адямилы чидано.
Сьодо-сьодо пилемъёс но
Васько, васько Кам кузя.
Гужем ортчиз, сизьыл вуиз,
Туриос но лобзизы.
Ой, мемие, ой, дядие,
Ми но озьы ик кошком.
Валэктонъёс
1. Огазеясез:
1). Ялан кутиськись чеберлыко амалъёс.
2). Одиг кадь жанръёслэн пумиськемзы (авторен гожтэм выжыкыл, выжыкыл-поэма, кырзан).
Портэмлыкъёссы:
1). Калыкын кылдэм произведениосты ымысь ыме верало, чеберлыко произведениосты гожто.
2). Ымысь ыме вераса пормем произведениосты калык кылдытэ, соослэн авторзы овол, нош котькуд чеберлыко произведениезнимаз автор гожтэ.
3). Фольклор произведениос ялан воштисько: верась мурт текстэз ас мылкыдызъя но быгатэмезъя тупатъя, кыче ке люкетсэ куштэ, мукет интызэ будэтыса вера (вариативность). Нош литературной произведениез авторез гинэ воштыны быгыатэ.
2. а). «Лымы тодьы», «Ялыке», «Из но му но пилиське но…», «Кыткы, дядяй…», «Та турынэз турнаны…» но мукет.
б). Жож, жалян, куректон, опкелён мылкыдъёс.
в). Ашальчи Окилэн кырзанлы пормем кылбуръёсаз жож, мозмон мылкыдъёс кузёясько. Лирической героезлэсь мылкыдзэ суредан, яркытэсь кылсуредъёс кылдытон понна калык кырзанъёсын ялан пумиськись чеберлыко амалъёсты кутэ. Творчествояз бадзым инты басьтэ психологической параллелизм амал. Калыкын тужгес но тодмо «Нюлэскы ветлыкум», «Сюрес дурын», «Лулы мынам», «Кык гожтэт» кырзанлы пормем кылбуръёсыз.
3. Кырзанын жож мылкыд кузёяське. Та улонысь кошконэдлэсь вуонзэ валан. Кылбурын портэм пуштросо дыръёс полэстисько:
– Сизьыл (туриос лобзизы, собере мечак верамын – «сизьы вуиз»).
– Акшанлы матын дыр.
– Весяк бызись дыр (вечное время). Цикличность. Вань дыръёс (ортчем – али – вуоно)огинэ вуо. Мар вал азьло, выльысь берытскоз.
– Пересьмон дыр.
Кам шур, туриос кык (тапал но сопал) дуннеосты герзало.
«Из», «му», «адями», «пилемъёс», «Кам», «гужем», «сизьыл», «туриос», «мемие», «дядие», «ми» нимъёсты кошкон валатон герза. Ваньмыз соос сопал дуннее кошко.
Текстын кузёяське оптимистической (жизнеутверждающей) пессимизм: мон валасько, та улонэз зеч уд кары ни шуыса, но улыны, чиданы одно кулэ. Удмурт калыклэсь дунне шоры таче учконзэ (философизэ) шарая та кырзан.