Всесвята́я Тро́ице, Бо́же и Соде́телю всего́ ми́ра, поспеши́ и напра́ви се́рдце мое́, нача́ти с ра́зумом и конча́ти де́лы благи́ми богодухнове́нныя сия́ кни́ги, я́же Святы́й Дух усты́ Дави́довы отры́гну, и́хже ны́не хощу́ глаго́лати аз, недосто́йный, разуме́я же свое́ неве́жество, припа́дая молю́ся Ти, и е́же от Тебе́ по́мощи прося́: Го́споди, упра́ви ум мой и утверди́ се́рдце мое́, не о глаго́лании усте́н стужа́ти си, но о ра́зуме глаго́лемых весели́тися, и пригото́витися на творе́ние до́брых дел, я́же учу́ся, и глаго́лю: да до́брыми де́лы просвеще́н, на суди́щи десны́я Ти страны́ прича́стник бу́ду со все́ми избра́нными Твои́ми. И ны́не, Влады́ко, благослови́, да, воздохну́в от се́рдца, и язы́ком воспою́, глаго́ля си́це:
Прииди́те, поклони́мся Царе́ви на́шему Бо́гу. (Поклон)
Прииди́те, поклони́мся и припаде́м Христу́, Царе́ви на́шему Бо́гу. (Поклон)
Прииди́те, поклони́мся и припаде́м Самому́ Христу́, Царе́ви и Бо́гу на́шему. (Поклон)
1. Блажени непорочнии в путь, ходящии в законе Господни.
(Помяни, Господи, душу усопшего (-ей) раба Твоего (рабы Твоея).
2. Блажени испытающии свидения Его, всем сердцем взыщут Его,
(Помяни, Господи, душу усопшего (-ей) раба Твоего (рабы Твоея).
3. не делающии бо беззакония, в путех Его ходиша.
4. Ты заповедал еси заповеди Твоя сохранити зело.
5. Дабы исправилися путие мои, сохранити оправдания Твоя.
6. Тогда не постыжуся, внегда призрети ми на вся заповеди Твоя.
7. Исповемся Тебе в правости сердца, внегда научити ми ся судьбам правды Твоея.
8. Оправдания Твоя сохраню, не остави мене до зела.
9. В чесом исправит юнейший путь свой; внегда сохранити словеса Твоя.
10. Всем сердцем моим взысках Тебе, не отрини мене от заповедей Твоих.
11. В сердце моем скрых словеса Твоя, яко да не согрешу Тебе.
12. Благословен еси Господи: научи мя оправданием Твоим.
(Помяни, Господи, душу усопшего (-ей) раба Твоего (рабы Твоея).
13. Устнама моима возвестих вся судьбы уст Твоих..
14. На пути свидений Твоих насладихся, яко о всяком богатстве.
15. В заповедех Твоих поглумлюся, и уразумею пути Твоя.
16. Во оправданиих Твоих поучуся, не забуду словес Твоих.
17. Воздаждь рабу Твоему: живи мя, и сохраню словеса Твоя.
18. Открый очи мои, и уразумею чудеса от закона Твоего.
19. Пришлец аз есмь на земли: не скрый от мене заповеди Твоя.
20. Возлюби душа моя возжелати судьбы Твоя на всякое время..
21. Запретил еси гордым: прокляти уклоняющиися от заповедей Твоих.
22. Отыми от мене понос и уничижение, яко свидений Твоих взысках..
(Помяни, Господи, душу усопшего (-ей) раба Твоего (рабы Твоея).
23. Ибо седоша князи, и на мя клеветаху, раб же Твой глумляшеся во оправданиих Твоих:
24. Ибо свидения Твоя поучение мое есть, и совети мои оправдания Твоя..
25. Прильпе земли душа моя: живи мя по словеси Твоему.
(Помяни, Господи, душу усопшего (-ей) раба Твоего (рабы Твоея).
26. Пути моя возвестих, и услышал мя еси: научи мя оправданием Твоим:.
27. Путь оправданий Твоих вразуми ми, и поглумлюся в чудесех Твоих.
28. Воздрема душа моя от уныния: утверди мя в словесех Твоих.
29. Путь неправды отстави от мене, и законом Твоим помилуй мя.
(Помяни, Господи, душу усопшего (-ей) раба Твоего (рабы Твоея).
30. Путь истины изволих, и судьбы Твоя не забых.
31. Прилепихся свидением Твоим, Господи, не посрами мене..
32. Путь заповедей Твоих текох, егда расширил еси сердце мое.
33. Законоположи мне, Господи, путь оправданий Твоих и взыщу и выну.
34. Вразуми мя, и испытаю закон Твой, и сохраню и всем сердцем моим.
35. Настави мя на стезю заповедей Твоих, яко тую восхотех.
36. Приклони сердце мое во свидения Твоя, а не в лихоимство..
37. Отврати очи мои, еже не видети суеты, в пути Твоем живи мя.
(Помяни, Господи, душу усопшего (-ей) раба Твоего (рабы Твоея).
38. Постави рабу Твоему слово Твое в страх Твой.
39. Отыми поношение мое, еже непщевах: яко судьбы Твоя благи.
40. Се возжелах заповеди Твоя, в правде Твоей живи мя.
41. И да приидет на мя милость Твоя Господи, спасение Твое по словеси Твоему.
42. И отвещаю поношающим ми слово: яко уповах на словеса Твоя.
43. И не отыми от уст моих словесе истинна до зела, яко на судьбы Твоя уповах.
44. И сохраню закон Твой выну, в век и в век века..
45. И хождах в широте, яко заповеди Твоя взысках.
46. И глаголах о свидениих Твоих пред цари, и не стыдяхся:
47. И поучахся в заповедех Твоих, яже возлюбих зело:
48. И воздвигох руце мои к заповедем Твоим, яже возлюбих, и глумляхся во оправданиих Твоих.
49. Помяни словеса Твоя рабу Твоему, ихже упование дал ми еси.
50. То мя утеши во смирении моем, яко слово Твое живи мя.
51. Гордии законопреступоваху до зела: от закона же Твоего не уклонихся.
52. Помянух судьбы Твоя от века, Господи, и утешихся.
53. Печаль прият мя от грешник, оставляющих закон Твой.
54. Пета бяху мне оправдания Твоя, на месте пришельствия моего.
55. Помянух в нощи Имя Твое, Господи, и сохраних закон Твой.
56. Сей бысть мне, яко оправданий Твоих взысках.
57. Часть моя еси, Господи, рех сохранити закон Твой.
58. Помолихся лицу Твоему всем сердцем моим: помилуй мя по словеси Твоему.
(Помяни, Господи, душу усопшего (-ей) раба Твоего (рабы Твоея).
59. Помыслих пути Твоя, и возвратих нозе мои во свидения Твоя.
60. Уготовихся и не смутихся сохранити заповеди Твоя.
61. Ужя грешник обязашася мне, и закона Твоего не забых.
62. Полунощи востах исповедатися Тебе о судьбах правды Твоея.
63. Причастник аз есмь всем боящимся Тебе, и хранящим заповеди Твоя.
64. Милости Твоея, Господи, исполнь земля: оправданием Твоим научи мя.
65. Благость сотворил еси с рабом Твоим, Господи, по словеси Твоему.
66. Благости, и наказанию и разуму научи мя, яко заповедем Твоим веровах. (Помяни, Господи, душу усопшего (-ей) раба Твоего (рабы Твоея).
67. Прежде даже не смирити ми ся, аз прегреших: сего ради слово Твое сохраних.
68. Благ еси Ты, Господи, и благостию Твоею научи мя оправданием Твоим.
69. Умножися на мя неправда гордых, аз же всем сердцем моим испытаю заповеди Твоя.
70. Усырися яко млеко сердце их, аз же закону Твоему поучихся.
71. Благо мне, яко смирил мя еси, яко да научуся оправданием Твоим.
72. Благ мне закон уст Твоих, паче тысящ злата и сребра.
(Помяни, Господи, душу усопшего (-ей) раба Твоего (рабы Твоея).
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
Аллилу́иа, аллилу́иа, аллилу́иа, сла́ва Тебе́, Бо́же. (Трижды)
Го́споди, поми́луй. (Трижды)
Сла́ва Отцу́ и Сы́ну и Свято́му Ду́ху.
МОЛИТВА ЗА УСОПШЕГО
Помяни́, Го́споди, Бо́же наш, в ве́ре и наде́жди живота́ ве́чнаго преста́вльшагося раба́ Твоего́, бра́та на́шего (имярек), и я́ко Благ и Человеколю́бец отпуща́яй грехи́ и потребля́яй непра́вды, осла́би, оста́ви и прости́ вся́ во́льная его́ согреше́ния и нево́льная, изба́ви его́ ве́чная му́ки и огня́ гее́нскаго и да́руй ему́ прича́стие и наслажде́ние ве́чных Твои́х благи́х, угото́ванных лю́бящим Тя: а́ще бо и согреши́, но не отступи́ от Тебе́, и несумне́нно во Отца́ и Сы́на и Свята́го Ду́ха, Бо́га Тя в Тро́ице сла́вимаго ве́рова, и Еди́ницу в Тро́ице и Тро́ицу во Еди́нстве, правосла́вно да́же до после́дняго своего́ издыха́ния испове́да. Те́мже ми́лостив тому́ бу́ди, и ве́ру, я́же в Тя вме́сто дел вмени́, и со святы́ми Твои́ми, я́ко Щедр, упоко́й: несть бо челове́ка, и́же поживе́т и не согреши́т. Но Ты Еди́н еси́ кроме́ вся́каго греха́, и пра́вда Твоя́, пра́вда во ве́ки, и Ты еси́ Еди́н Бог ми́лостей и щедро́т, и человеколю́бия, и Тебе́ сла́ву возсыла́ем, Отцу́ и Сы́ну и Свято́му Ду́ху, ны́не и при́сно и во ве́ки веко́в. Ами́нь.
И ны́не и при́сно и во ве́ки веко́в. Ами́нь
73. Руце Твои сотвористе мя, и создасте мя: вразуми мя, и научуся заповедем Твоим.
(Помяни, Господи, душу усопшего (-ей) раба Твоего (рабы Твоея).
74. Боящиися Тебе узрят мя и возвеселятся, яко на словеса Твоя уповах.
75. Разумех Господи, яко правда судьбы Твоя, и воистинну смирил мя еси.
76. Буди же милость Твоя, да утешит мя по словеси Твоему рабу Твоему.
77. Да приидут мне щедроты Твоя, и жив буду, яко закон Твой поучение мое есть.
78. Да постыдятся гордии, яко неправедно беззаконноваша на мя, аз же поглумлюся в заповедех Твоих.
79. Да обратят мя боящиися Тебе, и ведящии свидения Твоя.
80. Буди сердце мое непорочно во оправданиих Твоих, яко да не постыжуся.
81. Исчезает во спасение Твое душа моя, на словеса Твоя уповах.
82. Исчезоша очи мои в слово Твое, глаголюще: когда утешиши мя?
83. Зане бых яко мех на слане: оправданий Твоих не забых.
84. Колико есть дней раба Твоего; когда сотвориши ми от гонящих мя суд;
85. Поведаша мне законопреступницы глумления, но не яко закон Твой, Господи.
86. Вся заповеди Твоя истина: неправедно погнаша мя, помози ми.
87. Вмале не скончаша мене на земли: аз же не оставих заповедей Твоих.
88. По милости Твоей живи мя, и сохраню свидения уст Твоих.
(Помяни, Господи, душу усопшего (-ей) раба Твоего (рабы Твоея).
89. Во век, Господи, слово Твое пребывает на Небеси.
90. В род и род истина Твоя. Основал еси землю, и пребывает.
91. Учинением Твоим пребывает день, яко всяческая работна Тебе.
92. Яко аще бы не закон Твой поучение мое был, тогда убо погибл бых во смирении моем.
93. Во век не забуду оправданий Твоих, яко в них оживил мя еси.
(92 и 93 стих читать три раза)
(Помяни, Господи, душу усопшего (-ей) раба Твоего (рабы Твоея).
(СРЕДА)
94. Твой есмь аз, спаси мя, яко оправданий Твоих взысках.
Упокой, Господи, душу усопшего (-ей) раба Твоего (рабы Твоея).
95. Мене ждаша грешницы погубити мя, свидения Твоя разумех.
96. Всякия кончины видех конец, широка заповедь Твоя зело.
97. Коль возлюбих закон Твой, Господи, весь день поучение мое есть.
98. Паче враг моих умудрил мя еси заповедию Твоею, яко в век моя есть.
99. Паче всех учащих мя разумех, яко свидения Твоя поучение мое есть.
100. Паче старец разумех, яко заповеди Твоя взысках.
101. От всякаго пути лукава возбраних ногам моим, яко да сохраню словеса Твоя.
102. От судеб Твоих не уклонихся, яко Ты законоположил ми еси.
103. Коль сладка гортани моему словеса Твоя, паче меда устом моим.
104. От заповедей Твоих разумех, сего ради возненавидех всяк путь неправды..
105. Светильник ногама моима закон Твой, и свет стезям моим.
106. Кляхся и поставих сохранити судьбы правды Твоея.
107. Смирихся до зела, Господи, живи мя по словеси Твоему.
Упокой, Господи, душу усопшего (-ей) раба Твоего (рабы Твоея).
108. Вольная уст моих благоволи же, Господи, и судьбам Твоим научи мя.
109. Душа моя в руку Твоею выну, и закона Твоего не забых.
110. Положиша грешницы сеть мне, и от заповедей Твоих не заблудих.
111. Наследовах свидения Твоя во век, яко радование сердца моего суть.
112. Приклоних сердце мое сотворити оправдания Твоя в век за воздаяние.
113. Законопреступныя возненавидех, закон же Твой возлюбих.
114. Помощник мой и Заступник мой еси Ты, на словеса Твоя уповах.
Упокой, Господи, душу усопшего (-ей) раба Твоего (рабы Твоея).
115. Уклонитеся от мене лукавнующии, и испытаю заповеди Бога моего.
116. Заступи мя по словеси Твоему, и буду жить; не посрами мене в надежде моей.
117. Помози ми, и спасуся, и поучуся во оправданиих Твоих выну.
118. Уничижил еси вся отступающия от оправданий Твоих, яко неправедно помышление их.
119. Преступающия непщевах вся грешныя земли, сего ради возлюбих свидения Твоя.
120. Пригвозди страху Твоему плоти моя, от судеб бо Твоих убояхся.
121. Сотворих суд и правду, не предаждь мене обидящим мя.
Упокой, Господи, душу усопшего (-ей) раба Твоего (рабы Твоея).
122. Восприими раба Твоего во благо, да не оклеветают мене гордии.
123. Очи мои исчезосте во спасение Твое, и в слово правды Твоея.
124. Сотвори с рабом Твоим по милости Твоей, и оправданием Твоим научи мя.
125. Раб Твой есмь аз: вразуми мя, и увем свидения Твоя.
126. Время сотворити Господеви: разориша закон Твой.
127. Сего ради возлюбих заповеди Твоя паче злата и топазия.
128. Сего ради ко всем заповедем Твоим направляхся, всяк путь неправды возненавидех.
129. Дивна свидения Твоя, сего ради испыта я душа моя.
130. Явление словес Твоих просвещает и вразумляет младенцы.
131. Уста моя отверзох, и привлекох дух, яко заповедей Твоих желах.
Упокой, Господи, душу усопшего (-ей) раба Твоего (рабы Твоея).
СЛАВА
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
Аллилу́иа, аллилу́иа, аллилу́иа, сла́ва Тебе́, Бо́же. (Трижды)
Го́споди, поми́луй. (Трижды)
Сла́ва Отцу́ и Сы́ну и Свято́му Ду́ху.
МОЛИТВА ЗА УСОПШЕГО
Помяни́, Го́споди, Бо́же наш, в ве́ре и наде́жди живота́ ве́чнаго преста́вльшагося раба́ Твоего́, бра́та на́шего (имярек), и я́ко Благ и Человеколю́бец отпуща́яй грехи́ и потребля́яй непра́вды, осла́би, оста́ви и прости́ вся́ во́льная его́ согреше́ния и нево́льная, изба́ви его́ ве́чная му́ки и огня́ гее́нскаго и да́руй ему́ прича́стие и наслажде́ние ве́чных Твои́х благи́х, угото́ванных лю́бящим Тя: а́ще бо и согреши́, но не отступи́ от Тебе́, и несумне́нно во Отца́ и Сы́на и Свята́го Ду́ха, Бо́га Тя в Тро́ице сла́вимаго ве́рова, и Еди́ницу в Тро́ице и Тро́ицу во Еди́нстве, правосла́вно да́же до после́дняго своего́ издыха́ния испове́да. Те́мже ми́лостив тому́ бу́ди, и ве́ру, я́же в Тя вме́сто дел вмени́, и со святы́ми Твои́ми, я́ко Щедр, упоко́й: несть бо челове́ка, и́же поживе́т и не согреши́т. Но Ты Еди́н еси́ кроме́ вся́каго греха́, и пра́вда Твоя́, пра́вда во ве́ки, и Ты еси́ Еди́н Бог ми́лостей и щедро́т, и человеколю́бия, и Тебе́ сла́ву возсыла́ем, Отцу́ и Сы́ну и Свято́му Ду́ху, ны́не и при́сно и во ве́ки веко́в. Ами́нь.
И ны́не и при́сно и во ве́ки веко́в. Ами́нь
132. Призри на мя и помилуй мя, по суду любящих имя Твое.
Упокой, Господи, душу усопшего (-ей) раба Твоего (рабы Твоея).
133. Стопы моя направи по словеси Твоему, и да не обладает мною всякое беззаконие.
Упокой, Господи, душу усопшего (-ей) раба Твоего (рабы Твоея).
134. Избави мя от клеветы человеческия, и сохраню заповеди Твоя.
135. Лице Твое просвети на раба Твоего, и научи мя оправданием Твоим.
136. Исходища водная изведосте очи мои, понеже не сохраних закона Твоего.
137. Праведен еси, Господи, и прави суди Твои.
138. Заповедал еси правду свидения Твоя и истину зело.
139. Истаяла мя есть ревность Твоя, яко забыша словеса Твоя врази мои.
140. Разжжено слово Твое зело, и раб Твой возлюби е.
141. Юнейший аз есмь и уничижен, оправданий Твоих не забых.
142. Правда Твоя правда во век, и закон Твой истина.
Упокой, Господи, душу усопшего (-ей) раба Твоего (рабы Твоея).
143. Скорби и нужды обретоша мя, заповеди Твоя поучение мое.
144. Правда свидения Твоя в век, вразуми мя, и жив буду.
145. Воззвах всем сердцем моим, услыши мя, Господи, оправдания Твоя взыщу.
146. Воззвах Ти, спаси мя, и сохраню свидения Твоя.
147. Предварих в безгодии и воззвах, на словеса Твоя уповах.
148. Предваристе очи мои ко утру, поучитися словесем Твоим.
149. Глас мой услыши, Господи, по милости Твоей: по судьбе Твоей живи мя.
150. Приближишася гонящии мя беззаконием, от закона же Твоего удалишася.
151. Близ еси Ты, Господи, и вси путие Твои истина.
152. Исперва познах от свидений Твоих, яко в век основал я еси.
153. Виждь смирение мое и изми мя, яко закона Твоего не забых.
Упокой, Господи, душу усопшего (-ей) раба Твоего (рабы Твоея).
154. Суди суд мой и избави мя, словесе ради Твоего живи мя.
155. Далече от грешник спасение, яко оправданий Твоих не взыскаша.
156. Щедроты Твоя многи, Господи, по судьбе Твоей живи мя.
157. Мнози изгонящии мя и стужающии ми, от свидений Твоих не уклонихся.
158. Видех неразумевающия и истаях, яко словес Твоих не сохраниша.
159. Виждь, яко заповеди Твоя возлюбих, Господи, по милости Твоей живи мя.
Упокой, Господи, душу усопшего (-ей) раба Твоего (рабы Твоея).
160. Начало словес Твоих истина, и во век вся судьбы правды Твоея.
161. Князи погнаша мя туне, и от словес Твоих убояся сердце мое.
162. Возрадуюся аз о словесех Твоих, яко обретаяй корысть многу.
163. Неправду возненавидех и омерзих, закон же Твой возлюбих.
Упокой, Господи, душу усопшего (-ей) раба Твоего (рабы Твоея).
164. Седмерицею днем хвалих Тя о судьбах правды Твоея.
165. Мир мног любящим закон Твой, и несть им соблазна.
166. Чаях спасения Твоего, Господи, и заповеди Твоя возлюбих.
167. Сохрани душа моя свидения Твоя и возлюби я зело.
168. Сохраних заповеди Твоя и свидения Твоя, яко вси путие мои пред Тобою, Господи.
169. Да приближится моление мое пред Тя, Господи, по словеси Твоему вразуми мя.
170. Да внидет прошение мое пред Тя, Господи, по словеси Твоему избави мя.
Упокой, Господи, душу усопшего (-ей) раба Твоего (рабы Твоея).
171. Отрыгнут устне мои пение, егда научиши мя оправданием Твоим.
172. Провещает язык мой слово Твое, яко вся заповеди Твоя правда.
173. Да будет рука Твоя еже спасти мя, яко заповеди Твоя изволих.
174. Возжелах спасение Твое, Господи, и закон Твой поучение мое есть
175. Жива будет душа моя и восхвалит Тя, и судьбы Твоя помогут мне.
176. Заблудих, яко овча погибшее, взыщи раба Твоего, яко заповедей Твоих не забых.
(стих 175 и 176 читать трижды)