По прехождении же неколикихъ летъ преставления святаго благочестивии людие, приходящии к честному гробу преподобнаго Галактиона и видяще от него бывающая чюдеса различная многа, во единъ же день тогда собрашася от мала и до велика, и начаша глаголати к себе: «Воистинну намъ есть сей блаженный на пользу, от Бога посланъ есть и все намъ истину изрекъ, и неизглаголанную к намъ любовь показа, и повеле намъ заступницы Нашея Богородицы храмъ воздвигнути. Мы же// его оскорбихомъ, и не послушахомъ, и отвратихомся от него. Ныне же како приступимъ и припадемъ к нему и что воздадимъ ему за благая его деяния?» И возвестиша о семъ великому господину Варлааму архиепископу. Архиепископъ же, собравъ благоговейныхъ людей истинныхъ и правоверныхъ, и известно о нихъ испытавъ о его истинномъ житии по Бозе, и уведавъ, повеле написати житие преподобнаго отца Галактиона, и, совещавъ с народы, благословивъ, и повеле имъ во обители храмъ древянъ воздвигнути во имя Пресвятыя Богородицы, честнаго и славнаго Ея Знамения, иже в Великом Нове граде. И повеле братство собрати, во еже збысться по проречению святаго// отца.
Но о пречестнейший отче, любезная и священная главо, преподобне Галактионе, назирай свыше милостивно и молися владыце всехъ милостивому Богу, всехъ благъ подателю в наблюдении державы благовернаго и благочестиваго всероссийскаго царя и государя имярек, да подастъ ему многолетное здравие, святыя христианския веры в снабдение и утвержение и сохранитъ царьство от всехъ сопротивныхъ враговъ цело и неврежденно всегда, в тишине же и умирении мира. Но, о пастырю добрый, истинный строителю винограда Христова, отцемъ слава и преподобнымъ сопричастниче и праведнымъ, мнишескаго жития совершителю, и ныне на небеси предстоя святей// Троице со всеми святыми, молим тя убо: «О блаженне, помолися о граде нашемъ Вологде и о обители своей и иже ныне в ней Богомъ храненное стадо сохрани, яко чадолюбивый отецъ и мене многогрешнаго и непотребнаго, списавшаго твое житие возимети в памяти, и помолися Христу Богу, да исторгнетъ мя изъ устъ злообразного диявола и наставитъ мя на путь покаяния, и прииметъ мя кающагося, яко человеколюбецъ. Ты же, отче нашъ любезный, не презри насъ всехъ, чтущихъ пресвятую память твою, и сохрани насъ, и соблюди от всехъ видимыхъ и невидимыхъ враговъ. и прииди посреди насъ невидимо, моления, Богови возсылаемая, приими, и при//неси сия за всехъ насъ Творцу и Избавителю нашему Святей Троице покланяемому истинному Богу Нашему, яко да Твоими молитвами нашимъ согрешениемъ оставление получимъ благодатию Господа Нашего Иисуса Христа, с Ним же Отцу слава, со Святымъ Духомъ ныне, и присно, и во веки вековъ. Аминь.
Чюдо первое.
С Вологды с посаду игрешскаго монастыря вотчины села Дюдикова человекъ некий именемъ Иоаннъ званиемъ воевода имяше дщерь свою девицу именемъ Анну. Больна бысть чернымъ недугомъ и по обещанию приведена бысть во обитель совершити молебная Спасу, и Пречистей Богородице, и преподобному Галактиону молебная, и взяша з гро//ба святаго перси и ис кладезя его воды, и даша ей пити, и абие бысть здрава.
Чюдо второе.
Илиинскаго монастыря старецъ Касиянъ имеяше у себе внуку именемъ Гликерию и бысть больна вельми. И даша ей персти з гробы и святыя воды ис кладезя пити, и абие бысть здрава.
Чюдо третие.
Некий дияконъ Гавриилъ замочьникъ бысть боленъ тяжкимъ недугомъ, безперстанно у него кости ломило во дни и в нощи, и онъ моляся блаженному Галактиону, и то взятъ перси з гроба, и ис кладезя воды испи, и абие бысть здравъ.
Чюдо четвертое.
Илиинскаго же монастыря старецъ Трифонъ боленъ бысть!!!! вою и положи обещание Пречистей Богоородице и преподобному Галактиону и прииде во обитель, моляся Спасу и Пречистей Богородице и святому и целовал святыя иконы и принесе с собою яблонцы и посади в монастыри и абие бысть здравъ.
Чюдо пятое.
Иный старецъ именемъ Аврамий прииде во обитель, и бысть болен очима вельми немало время и поживе во обители десять дней и приходя, припадая ко святымъ иконамъ и моля и в помщь призывая преподобнаго Галактиона и абие здравие получи и сие поведа, яко «егда бывшу ми во обители Пресвятыя Богородицы, видевъ от святаго бывающия многа чюдеса// приемлющимъ людемъ, иже с верою приходящимъ.
Чюдо шестое.
Иный человекъ града Вологды именемъ Никита Ияковлевъ сынъ бысть боленъ немало время и прииде во обитель и моляся Спасу, и Пречистей Богородице, и преподобному Галактиону и абие здравие получи.
Чюдо седмое.
И паки прославляя Господь Богъ своего угодника, сотвори ино чюдо перславно, некто человекъ именемъ Филимонъ Филипповъ сынъ, кандиловскаго монастыря дворникъ, зовомъ Какоревъ, сице самъ о себе поведа: «Бывшу ми в недузе велице разслабленну всем теломъ, и руками, и ногами шесть летъ, нимало могуща вос//клонитися. И егда мя!!!, тако и лежа и ради пищи сынъ мой постави мне у грацкихъ вратъ каменныхъ на мосту кущу з затворомъ и во 140–мъ году июля в 1 день в нощи противъ пятка за полъ часа до софейскаго звону возбудився от сна своего и видевъ у кущи моей затворъ разтворенъ и гласъ глаголющь: «Разслабленный, возлязи». И азъ возлегъ в кущи моей, и абие вторицею возглагола: «Разслабленный, востани». И азъ воставъ и прекрестихъ лице свое рукою своею, и видевъ в возглавии своемъ стоящь образъ Пречистыя Богородицы и слыша гласъ третицею глаголющь: «Разслабленный, востани и иди во обитель святыя Богоородицы Знамения и преподобнаго Галактиона// и сотвори молебная, и поведай вернымъ, да спасутся». И от того часа рукама, и ногама, и теломъ здравъ бысть.
Чюдо осмое.
Иный человекъ Владышине слободы именемъ Евфимий зовомъ самаучкинъ, имея дщерь именемъ Елену. И бысть во иступлении ума. Отецъ же ея съ мужемъ ея приведоша во обитель и сотворше о ней молебная Пресвятей Богородице и преподобному Галактиону, и вземъ перси з гроба святаго и ис кладезя воды испивъ, и бысть здрава, яко николиже пострада.
Чюдо девятое.
Иногда же паки умножившуся дождю многу, града же Вологды людие благовернии приидоша ко// архиепископу Маркеллу его, да идетъ со кресты и с честными иконами во обитель Пресвятыя Богородицы и преподобнаго Галактиона и молитъ Господа Бога и Пречистую Богородицу о ведре. Архиепископъ же тщательно иде со кресты и с честными иконами во обитель Пресвятыя Богородицы и молебное благодарение сотвориша, и бысть Божие благодеяние ведро вольное. Архиепископъ же, воздавъ хвалу Богу, и Пречистой Богородицы, и угоднику ихъ преподобному Галактиону. И того ради архепископъ Маркелъ со освященнымъ соборомъ устави во обитель ходити со кресты и с честными иконами, и у Бога милости просити о дожди и о ведре. И абие видяще всегда милость Божию, воздающе благодарение Богу и Пречистей Богородице и угоднику ихъ преподобному Галактиону чюдотворцу.
Чюдо десятое.
Некий человекъ именемъ Илия художествомъ иконописецъ нанесе хулу на преподобнаго Галактиона и называя его грешна человека и зело понося его, того ради Богъ, не терпя раба своего поносима и поругаема, отя у него языкъ на много время. И зело болезнуя, и в перси своя бияше и лежа часа три и больши и языкомь никако же глаголати, и домашнии его, чающе уже ему конецъ приближися. И призваша отца его духовнаго от храма Власия Севастийскаго священника Марка. Отецъ же его духовный нача его вопрошати, како// ему приключися болезнь!!! Ничтоже може вещати, токмо бияше в перси руками, и жена его, и дети поведаша о семъ отцу его духовному, како ему приключися она нестерпимая болезнь и како своимъ малоумиемъ худу возлагая и поноси преподобнаго отца Галактиона. И о семъ отецъ его духовный за сие нача его возбраняти и словомъ его смиряти и глаголаше ему: «Видиши ли, безумне, како Богъ прославляетъ угодниковъ своихъ?» И наказавъ его, и повеле ему обещание положити идти во обитель Пресвятыя Богородицы и милости просити у Бога и предъ гробомъ его плакати о своемъ согрешении. Той же человекъ прииде въ чювство,// а языкомъ своимъ не могий проглаголати и мысля во уме своемъ!!! и о своемъ согрешении каяся, глаголя: «О заступнице рода христианскаго, мати Христа Бога Нашего, помози мне грешному и сподоби мя видети гробъ блаженнаго Галактиона и прощение от него получити». И паки плакася о своемъ согрешении и прииде во обитель и, сотворше о немъ молебная Спасу, и Пречистей Богородице, и преподобному Галактиону, и абие совершенное здравие получи, и поведавъ сие сотворшееся о немъ всей братии, вси же видяще таковое чюдо, прославиша Бога, и Пречистую Богородицу, и ихъ угодника преподобнаго Галактиона чюдотворца, елико Господь нашоъ Иисусъ Христосъ преславно!!! по преставлении своего угодника чюдесы прославляетъ, иже с верою призывающимъ в молитве его.
Чюдо первое на десять.
В лето 7161–е сентября во 8 день въ праздникъ Рожества Пресвятыя Богородицы в вечеръ о после вечерни в трапезе поведа Галактионовы пустыни живущимъ старцемъ: казначею старцу Ефрему и всей братии прохожей человекъ именемъ Стефанъ Савинъ сынъ Пестелининныхъ родомъ Каргополецъ посацкой человекъ о преподобнемъ отце Галактионе сице: «Живущу же, рече, отцу моему Саве въ царьствующемъ граде Москве пятьнадесять летъ, промышляющу и кормящуся рукоделиемъ своимъ// красильнымъ, и волею Божиею во 153-мъ году случися быти на Москве пожару велику и отца моего дворъ и весь животъ погоре до конца и изволи отецъ мой сехати на житие после того великаго пожжения со всемъ домомъ своимъ в Каргополь к своимъ сродичамъ. И едущимъ намъ в Каргополь и бывшимъ на Вологде, стоящимъ же на посаде в Кропанцове дворе близъ суща Галактионовы пустыни и внезапу случися брату моему Стефанову родному Иову быти в болезни тяжкой. Братъ же мой еще яко сый девяти летъ точию болезнь его обдержаше зело и отецъ мой болезни его ради не могий ехати в путное// шествие, ожидая его!!! и продолжилъ время немало быти на Вологде и брату моему Иову вельми немогущу огненною болезнию. Отецъ же мой Сава страха ради смертнаго сентября в 5 день повеле призвати священника и брата моего болящаго исповедавшу и причастившу святымъ Христовымъ тайнамъ, братъ же мой от великия болезни вельми изнемогати нача и не могий глаголати ничесоже весь день той и по прешествию того дни к вечеру, яко быти часу второму нощи и отцу моему Саве и матери приседящимъ со огнемъ у брата моего болящаго чающимъ его уже умерша, зане несть дыхания. Отцу же моему жалеющу по сыне// своемъ и по моемъ брате и по своемъ и по моемъ брате и плачущуся вельми, и молящуся Господу Богу и Пречистей Его Богоматери, и преподобному Галактиону, и просящу ему помощи и изцеления сыну своему. Бе бо слышалъ отецъ мой о преподобнемъ отце Галактионе Чюдотворце и прежде того дни в вечеру у вечерни у знамения Пресвятыя Богородицы в Галактионове пустыни и самъ былъ пустыни и самъ былъ у чюдотворцова гроба и у честныхъ мощей его!!!!! // руками своими!!! главы и до ногу и дыхания не чующи немало, но бяше весь студенъ, яко мертвъ. Мати же моя просящи кадильницы и фимиама, да покадятъ, яко уже умерша и видящимъ отцу моему и матери, яко малъ часъ и внезапу братъ мой болящий Иовъ нача самъ воставати на руки своя и рече отцу моему и матери: «Дайте ми ясти хлебъ с солию». Отецъ же мой и мати даша ему ясти хлеба с солию и начаша брата моего вопрошати, глаголюще: «Како боля бысть яко мертвъ». Братъ же мой Иовъ нача отцу своему и матери сказывати: «Яко мне спящу, рече, прииде ко мне человекъ старъ въ ризахъ иноческихъ и прият// мя рукою своею за выю мою и рече мне: «Время уже тебе обмогатися, востани да яждь». Да той же человекъ, подимаючи мя, рече: «Поиди в Галактионову пустыню и приложися к чюдотворнымъ мощемъ его» И от того Иовъ братъ мой здравъ бысть от болезни тоя благодатию Христовою молитвами Пречистыя Богоматери и святаго отца Галактиона чюдотворца, той же Стефанъ наутрие сентября в 14 день опосле утренняго пения паки прииде в Галактионову пустыню з братомъ своимъ Иовомъ прежде болящимъ чюдотворцу Галактиону панахиду пети и у чюдотворнаго гроба его помолитися. Мы же иноцы, живущии в Галактионове пустыни// того болящаго Иова... Онъ же намъ такоже поведа, яко же братъ его Стефанъ ни в чемъ не разньствующе. И быша они в часовни у чюдотворцова гроба, славяще и благодаряще Бога, и Пречистую Его Богоматерь Пресвятую Богородицу и преподобнаго отца Галактиона чюдотворца, милости прося и прощения и даша они от имений своихъ на панахиду. Сами же вельми скорбяще, яко не сподобилися в то время панахиды отпети надъ чюдотворнымъ гробомъ. Бе бо уже на пути и извощики у нихъ наяты и чрезъ урокъ ожидающе игумена. Бе бо в то время по некоему случаю игумену во обители не прилучившуся, бывшу ему некоея ради потребы за че//тыре поприща от обители место, зовомое на церьковномъ. Они же, чающе его долгаго закоснения игуменова, пойдоша в домъ свой, славяще и благодаряще Бога и преподобнаго отца Галактиона Чюдотворца. Мы же иноцы, живущии в Галактионове пустыни казначей старецъ Ефремъ з братиею сия от того Стефана и брата его Иова видевше и слышавше написахомъ в кратце на пользу слышащимъ и памяти ради в прочия роды по насъ будущимъ. Богу нашему слава ныне, и присно, и во веки вековъ. Аминь.