Последование молебного пения об Отечестве
Составлено епископом Афанасием (Сахаровым) в лагерях в 1941 году
(Чин совершения его мирянином)
[Составлено в августе 1941 года, во дни нашествия на Русскую землю немцев]7
ЗРИ: Все последования молебных пений в отсутствие священника может совершать каждый мирянин, опуская только нарочито священнические и диаконские возглашения и соответственно изменяя некоторые молитвословия, а все возгласы священнические: "Благословен Бог" и подобные заменяя одним возгласом: "Молитвами святых отец наших, Господи Иисусе Христе Боже наш, помилуй нас".
В качестве образца молебнаго пения, совершаемаго мирянином, дается настоящий чин.
Первее сотвори три поклона, глаголя:
Боже, очисти мя грешнаго (грешную) и помилуй мя. Поклон.
Создавый мя, Господи, и помилуй мя. Поклон.
Без числа согреших, Господи, помилуй и прости мя грешнаго (грешную). Поклон.
Посем начинай:
Молитвами святых отец наших, Господи Иисусе Христе, Боже наш, помилуй нас. Аминь. Поклон.
Слава Тебе, Боже наш, слава Тебе (крестное знамение без поклона).
Царю Небесный...
Святый Боже... Трижды с тремя поклонами.
Слава... И ныне... Пресвятая Троице... Поклон.
Господи, помилуй. Трижды.
Слава... И ныне...
Отче наш (крестное знамение без поклона) Иже еси на Небесех...
Молитвами святых отец наших... Поклон.
Господи, помилуй. 12 раз.
Слава... И ныне...
Приидите, поклонимся Цареви нашему Богу. Поклон.
Приидите, поклонимся и припадем Христу Цареви нашему Богу. Поклон.
Приидите, поклонимся и припадем Самому Христу Цареви и Богу нашему. Поклон.
Псалом 43:
В конец, сынов Кореовых, в разум, 43.
Боже, ушима нашима услышахом, и отцы наши возвестиша нам дело, еже соделал еси во днех их, во днех древних. Рука Твоя языки потреби, и насадил я еси, озлобил еси люди и изгнал еси я. Не бо мечем своим наследиша землю, и мышца их не спасе их, но десница Твоя, и мышца Твоя, и просвещение лица Твоего, яко благоволил еси в них. Ты еси Сам Царь мой и Бог мой, заповедаяй спасения Иаковля. О Тебе враги нашя избодем роги, и о имени Твоем уничижим востающыя на ны. Не на лук бо мой уповаю, и мечь мой не спасет мене. Спасл бо еси нас от стужающих нам, и ненавидящих нас посрамил еси. О Бозе похвалимся весь день и о имени Твоем исповемыся во век. Ныне же отринул еси и посрамил еси нас, и не изыдеши, Боже, в силах наших. Возвратил еси нас вспять при вразех наших, и ненавидящии нас расхищаху себе. Дал еси нас яко овцы, снеди, и во языцех разсеял ны еси. Отдал еси люди Твоя без цены, и не бе множество в восклицаниих наших. Положил еси нас поношение соседом нашым, подражнение и поругание сущым окрест нас. Положил еси нас в притчу во языцех, покиванию главы в людех. Весь день срам мой предо мною есть, и студ лица моего покры мя от гласа поношающаго и оклеветающаго, от лица вражия и изгонящаго. Сия вся приидоша на ны, и не забыхом Тебе, и не неправдовахом в завете Твоем. И не отступи вспять сердце наше, и уклонил еси стези нашя от пути Твоего. Яко смирил еси нас на месте озлобления, и прикры ны сень смертная. Аще забыхом имя Бога нашего и аще воздехом руки нашя к богу чуждему. Не Бог ли взыщет сих? Той бо весть тайная сердца. Зане Тебе ради умерщвляемся весь день, вменихомся яко овцы заколения. Востани, вскую спиши, Господи? Воскресни и не отрини до конца. Вскую лице Твое отвращаеши? Забываеши нищету нашу и скорбь нашу? Яко смирися в персть душа наша, прильпе земли утроба наша. Воскресни, Господи, помози нам и избави нас имене ради Твоего.
Псалом 73:
Разума Асафу, Псалом 73.
Вскую, Боже, отринул еси до конца? Разгневася ярость Твоя на овцы пажити Твоея? Помяни сонм Твой, егоже стяжал еси исперва, избавил еси жезлом достояния Твоего, гора Сион сия, в нейже вселился еси. Воздвигни руце Твои на гордыни их в конец, елика лукавнова враг во святем Твоем. И восхвалишася ненавидящии Тя посреде праздника Твоего, положиша знамения свея, знамения, и не познаша, яко во исходе превыше, яко в дубраве древяне секирами разсекоша. Двери его вкупе: сечивом и оскордом разрушиша и. Возжгоша огнем святило Твое, на земли оскверниша жилище имене Твоего. Реша в сердце своем южики их вкупе: приидите и отставим вся праздники Божия от земли. Знамения их не видехом: несть ктому пророка, и нас не познает ктому. Доколе, Боже, поносит враг? Раздражит противный имя Твое до конца? Вскую отвращаеши руку Твою и десницу Твою от среды недра Твоего в конец? Бог же Царь наш прежде века содела спасение посреде земли. Ты утвердил еси силою Твоею море, Ты стерл еси главы змиев в воде, Ты сокрушил еси главу змиеву, дал еси того брашно людем Ефиопским. Ты расторгл еси источники и потоки, Ты изсушил еси реки Ифамския. Твой есть день, и Твоя есть нощь: Ты совершил еси зарю и солнце. Ты сотворил еси вся пределы земли, жатву и весну Ты создал еси я. Помяни сия, враг поноси Господеви, и людие безумнии раздражиша имя Твое. Не предаждь зверем душу, исповедающуся Тебе, душ убогих Твоих не забуди до конца. Призри на завет Твой, яко исполнишася помраченнии земли домов беззаконий. Да не возвратится смиренный посрамлен, нищ и убог восхвалита имя Твое. Востани, Боже, суди прю Твою, помяни поношение Твое, еже от безумнаго весь день. Не забуди гласа молитвенник Твоих, гордыня ненавидящих Тя взыде выну.
Вскую, Боже отринул:
Псалом 78: Псалом Асафу, 78.
Боже, приидоша языцы в достояние Твое, оскверниша храм святый Твой, положиша Иерусалим яко овощное хранилище, положиша трупия раб Твоих брашно птицам небесным, плоти преподобных Твоих зверем земным. Пролияша кровь их яко воду окрест Иерусалима, и не бе погребаяй. Быхом поношение соседом нашым, подражнение и поругание сущым окрест нас. Доколе, Господи, прогневаешися до конца? Разжжется яко огнь рвение Твое? Пролей гнев Твой на языки не знающыя Тебе, и на царствия, яже имене Твоего не призваша, яко поядоша Иакова, и место его опустошиша. Не помяни наших беззаконий первых: скоро да предварят ны щедроты Твоя, Господи, яко обнищахом зело. Помози нам, Боже, Спасителю наш, славы ради имене Твоего, Господи, избави ны, и очисти грехи нашя имене ради Твоего. Да не когда рекут языцы, где есть Бог их? И да увестся во языцех пред очима нашима отмщение крове раб Твоих пролитыя. Да внидет пред Тя воздыхание окованных, по величию мышцы Твоея снабди сыны умерщвленных. Воздаждь соседом нашым седмерицею в недро их поношение их, имже поносиша Тя, Господи. Мы же, людие Твои и овцы пажити Твоея, исповемыся Тебе, Боже, во век, в род и род возвестим хвалу Твою.
Слава, и ныне: Аллилуиа (трижды).
Ектения великая.
Миром Господу помолимся:
О свышнем мире:
О мире всего мира:
О святых храмах, с верою, благоговением и страхом Божиим входящих в них, и о всех, вне храмов воздыхающих, Господу помолимся.
О великом Господине:
О стране нашей:
О еже помиловать Церковь православно-российскую, утвердить, укрепить, разширить, умирить и непоколебиму адовыми вратами во веки сохранить сию, Господу помолимся.
О еже все ереси, расколы, разделения и отступления вскоре упразднить и всех отступльших паки во ограду Церкви Православной возвратить, Господу помолимся.
О еже все козни отступников веры и врагов Церкви Святой разорить, православных же пастырей и верных мирян безпечальными сохранить, Господу помолимся.
О еже сохранить от растления души православных, наипаче юношей, дев, отроков, младенцев наших, оградить их от злых влияний и сохранить для Церкви Святой, Господу помолимся.
О еже помиловати рабов Своих, прежде прилежавших Святой Церкви, ныне же охладевших к ней, помянуть их прежнюю ревность, услышать слезы и воздыхания их близких, скорбящих об их отпадении, и паки возвратить их на путь веры и на служение Церкви, Господу помолимся.
О всех и в равнодушии к вере хранящих доброе расположение сердца и добро творящих, еже и их, яко Корнилия сотника, привлечь ко Святой Церкви, Господу помолимся.
О еже все языки словенския утвердить в православии и единомыслии и от всякаго иновернаго и иноязычнаго засилия оградить, Господу помолимся.
О избавитися нам:
Заступи, спаси:
Пресвятую, Пречистую:
Возглас: Яко подобает Тебе:
Бог Господь, глас 8:
Тропарь, глас 8:
С вышних призираяй, убогих приемляй, посети нас, беды и скорби грехов ради наших терпящих, Владыко Всемилостиве, молитвами Богородицы и всех Святых Русских даруй земле нашей велию милость. (Дважды).
Слава: Ин тропарь, глас 4-й:
Иерусалима Вышняго граждан, от земли нашей возсиявших, и Богу во всяком чине и всяким подвигом угодивших, придите, воспоим вернии! О, всеблаженнии земли Русской заступницы, молитеся ко Господу, да помилует сию от гнева Своего, исцеляя сокрушение ея, и верных людей Своих утешит.
И ныне, Богородичен, глас той же:
К Заступнице страны нашей Приснодеве Богородице притецем, и к первописанной иконе Ея ныне припадем, с верою зовуще из глубины души: О, Мати Божия, спаси землю Русскую, исцели сокрушение ея, и верных людей утеши.
Псалом 136: На реках Вавилонских:
Канон, глас 6,
на немже припевы:
Песнь 1.
Ирмос: Волною морскою скрывшаго древле, гонителя мучителя, под землею скрыша спасенных отроцы: но мы яко отроковицы, Господеви поим, славно бо прославися.
Припев: Милостиве Господи, по молитвам святых Твоих помилуй землю Русскую.
Господи Боже мой, помози ми смиренно воспети славу новомучеников и исповедников российских, имже за тяжкия страдания любовию отверзл еси двери небесныя.
Припев: Милостиве Господи, по молитвам святых Твоих помилуй землю Русскую
Господи Боже наш, славу сию мучеником от века бывшим даровавый, яко мощи их сеются во храмех обновления нашего ради, подаждь славу сию и страстотерпцем новым, аще и неведома суть места погребения их.
Припев: Мати Божия, спаси землю Русскую
Царства земнаго лишенный, Царю же Небесному и в бедствиях своих до конца верный, молися ему, святый царю мучениче Николае, еже не лишитися и нам утешения благодатнаго в бедах наших.
Припев: Мати Божия, спаси землю Русскую
От руки священномученика Владимира древянный посох первопрестольника святителя Петра приемый, взыщи мя, овцу заблудшую, горохищную, о святый патриарше и отче наш Тихоне, обличителю сынов противления.
Слава, и ныне
Богородичен: Во успении Твоем мира не оставила еси, Владычице! Не оставила еси и страну Российскую, но благоволила еси прияти хвалу от новых святых страстотерпцев.
Песнь 3
Ирмос: Тебе на водах повесившаго всю землю неодержимо, тварь видевши на лобнем висима, ужасом многим содрогашеся, несть свят, разве Тебе, Господи, взывающи.
Припев: Милостиве Господи, по молитвам святых Твоих помилуй землю Русскую.
Кую дань слова принесем вам, вернии свидетелие слова, доблии страстотерпцы и пастыре, вменившийся, яко овцы заколения.
Припев: Милостиве Господи, по молитвам святых Твоих помилуй землю Русскую.
Тебе, о Владимире, первосвятителю Церкве Российския, соименне святому просветителю Руси, подобаше предначати славное поприще борения и страданий. Преводиши ты боговенчанный полк страстотерпцев, и да воздается ти первый венец похвалы.
Припев: Мати Божия, спаси землю Русскую
Посреде ополчения добляго зрим и тя, священная главо, первосвятителю града святаго Петра, святителю Вениамине, возлюбленный паствою твоею, якоже Иаковом тезоименитый ти древлий патриарх.
Припев: Мати Божия, спаси землю Русскую
Первый в чине пресвитерстем новомучеников ты явился еси, Иоанне пресвитере, во Америце прежде престолу Божию предстоявый. Яко лютых безбожник в Царском Селе обличителя, венча тя Господь венцем мученическим, якоже и другаго Иоанна восторгоименнаго, в слове и в мужестве пред мучители дивнаго, с ними же, вси священномученицы нови, заступите нас.
Слава, и ныне
Богородичен: Премилосердая Мати, Пречистая Дево, споболевшая Сыну и Спасу Своему, вемы тя Утешительницу чадолюбиву: и оставльшимся во стране Российстей и в разсеянии сущим рабом Твоим.
По 3 песни катавасия:
По молитвам святых Твоих, Милостиве, избави от бед и обстояний землю Русскую, яко мы усердно к Тебе прибегаем, к Милостивому Избавителю и Владыце нашему.
Спаси от бед и обстояний землю Русскую, Персвятая Богородице Дево, яко мы вси по Бозе к Тебе прибегаем, яко к нерушимей стене и заступлению.
Ектения сугубая.
Помилуй нас, Боже:
Еще молимся о стране нашей Православной.
На неложное слово Твое: «просите, и дастся вам» уповающе, к Тебе, Господу Богу нашему прибегаем и просим помощи Твоей, ищем спасения Твоего, толцем в двери милосердия Твоего: даруй нам блага Твоя, Отче Небесный, и не отрини прошения нашего, его же с воплем крепким и стенанием сердечным дерзаем приносити Тебе: пощади, пощади, Господи, Отечество наше Русскую землю и весь народ наш человеколюбно и скоро помилуй.
Первозданных прародителей наших за нарушение заповеди Твоей райскаго блаженства, едемской красоты и сладости лишившихся, посем пред вратами рая рыдавших, обетованием о Спасителе утешивый, умилосердися, Долготерпеливе, и о много согрешившем народе Русском, достойно за многия беззакония, за нарушения всех Твоих заповедей оскудением красоты церковной, лишением благодатной сладости Святых Таинств, гладом слышания Слова Твоего и иными скорбями наказуемом; утеши и его надеждою скораго избавления от всех бед, его обышедших, и тако пощади, пощади, Господи, Отечество наше Русскую землю и весь народ наш человеколюбно и скоро помилуй.
Яко же пред потопом, развратися многое множество русских людей, сташа плотию и духа несть в них; но человеколюбия ради Твоего и по молитвам Богоматери и святых, пощади, пощади, Господи, Отечество наше Русскую землю, и не точию праведных, якоже Ноя, но и весь народ наш, огнем скорбей и страданий, яко водами потопными омыв и покаянными слезами убелив, человеколюбно и скоро помилуй.
Аврааму праотцу обещавый пощадити и зело согрешившие Содом и Гоморру ради немногаго числа праведников, ради сущих и ныне в народе нашем сокровенных рабов Твоих пощади, пощади, Господи, Отечество наше Русскую землю и весь народ наш человеколюбно и скоро помилуй.
Езекиины слезы, Манассиино и Ниневитян покаяние и Давидово исповедание приемый и скоро тех помиловавый, услыши, Многомилостиве, моление рабов Твоих, о своих согрешениях и о согрешениях народа Русскаго слезы проливающих и покаянные вопли их вменив яко покаяние всего народа нашего, пощади, пощади, Господи, Отечество наше Русскую землю и весь народ наш человеколюбно и скоро помилуй.
Иеремии, о разорении Сиона рыдавшему, подражающе, ревнители православия рыдают о разорении храмов и обителей, о осквернении святынь. Услыши, Милосерде, стенания их, возврати пленение наше, возврати нам уцелевшия еще святыни и тако пощади, пощади, Господи, Отечество наше Русскую землю и весь народ наш человеколюбно и скоро помилуй.
Якоже древле евреи в Вавилоне, тако и мы, обесивше безмолвные органы, рыдаем о разорении Сионов наших, паче же о разорении храма души народа нашего, о его развращении, озлоблении, падении. Но, Милостиве, без Твоей помощи мы и помыслить что доброе не можем. Тем же Ты Сам подвигни всех Русских людей и архипастырей и пастырей, и монахов, и мирян, и во власти сущих и подвластных, и мужей, и жен, и старцев, и юных, припасть к Тебе с покаянными слезами и положить начало исправления. И тако пощади, пощади, Господи, Отечество наше Русскую землю и весь народ наш человеколюбно и скоро помилуй.
Не точию Петра, отвержение свое горько оплакавшаго, на степени верховнаго апостола возставивый и разбойника, мал глас испустившаго, во едином часе рая сподобивый, но и о распинателях Твоих моливыйся, и Павла гонителя и хульника к Себе призвавый и сосудом избранным Твоим соделавый, помилуй, Человеколюбче, всех Русских людей, не точию кающихся о своих согрешениях, но и сих, иже о покаянии не помышляют, иже враждуют на Тя и в злобе своей утверждаются, призови и их всех к Себе. И тако пощади, пощади, Господи, Отечество наше Русскую землю и весь народ наш, и добрых и злых, сих в добре укрепив, оных от зла к добру обратив, человеколюбно и скоро помилуй.
Возглас: Яко Милостив
Седален, глас 6:
Подобен: Еже о нас исполнив:
Отцам нашим милости обильно Источавший, и Отечество наше Святую Русь дивно Хранивший, не отлучайся, Пастырю добрый, и от нас, скорбящих и бедствующих, но неотступен буди с нами, всегда вопия любящим Тя: Аз есмь с вами, и никтоже на вас.
Песнь 4
Ирмос: На Кресте Твое Божественное истощание провидя Аввакум, ужасся, вопияше: Ты сильных пресекл еси державу, Блаже, приобщаяся сущим во аде, яко Всесилен.
Припев: Милостиве Господи, по молитвам святых Твоих помилуй землю Русскую.
Оскверненная делы безбожник земля кроплением кровей ваших паки благословляется. Воды же морския и речныя телеса потопляемых святых, яко священие, влагаемое в тыя, восприяша.
Припев: Милостиве Господи, по молитвам святых Твоих помилуй землю Русскую.
Ермогену Московскому тезоимените, светильниче Тобольский священномучениче новый, все житие твое, яко пламень, егоже река Тура никакоже угаси. Потопляем бо возшел еси ко Господу твоему, бием же по устнама до конца немолчно молился еси, молишися же и ныне за ны.
Припев: Мати Божия, спаси землю Русскую
Страшно есть слышимое о мучениих святаго архипастыря Пермскаго Андроника, иже не бояся мук, повеле клятву изрещи на безбожную власть. Святитель же Черниговский Василий со иными посланными от Всероссийскаго Собора уведети о убиении андрониковом, тогда с ними пострада, вкупе же вси Господу предстоят.
Припев: Мати Божия, спаси землю Русскую
Святителя Иосифа древле от разинцев убиеннаго прославивый, архипастырь Митрофан жестоко нощию умерщвляется. Тогда же и соепископ его Леонтий пострада. Тако единем светом Царствия Небеснаго сии трие священномученицы Астраханстии озаришася.
Слава, и ныне
Богородичен: О, коль мнози святыя иконы ныне руками безбожных отъяты от верных, но не исторгнется образ благия Утешительницы из сердец молящихся, свободы лишенных исповедников святыя веры.
Песнь 5
Ирмос: Богоявления Твоего, Христе, к нам милостивно бывшаго, Исаиа свет видев невечерний, из нощи утреневав взываше: воскреснут мертвии, и востанут сущии во гробех, и вси земнороднии возрадуются.
Припев: Милостиве Господи, по молитвам святых Твоих помилуй землю Русскую.
Петре и Кирилле, исповедницы велицыи и непреклоннии, нравом различнии, но едини в вере и твердости духа, аще и сослани бысте, обаче всю правду церковную удержали есте, ныне же, яко наследницы Царства Небеснаго, молите Бога о еже сохранитися и нам в правде сей.
Припев: Милостиве Господи, по молитвам святых Твоих помилуй землю Русскую.
Агафангеле, ангеле Ярославльския церкве, радуйся со други своими. Отложение бо ваше от собратий, в правде церковней не устоявших, радость ангелом бысть. Не восхотели есте покорити себе нечестию: сего ради и изыдосте, на скорбь и лишения, крест свой носяще.
Припев: Мати Божия, спаси землю Русскую
Арсение, великаго Новаграда славо, едине от столпов Собора Всероссийскаго, прискорбна бе привременно душа твоя, в темнице ти сушу, но просия вскоре победно вера твоя, побеждающая вся искушения: и явился еси до конца непреклонен.
Припев: Мати Божия, спаси землю Русскую
Дамаскиново житие да умилит вся чтущия. Како бе и на островех Соловецких, и в Казахстане и во стране Сибирской, восходя к Голгофе своей. Како мразом сибирским томим, при брезе реки неимущему иерею верхнюю рясу свою отдаде. Сам же в стуже зимней на плоту Богу дух предаде, един от тех, ихже мир весь недостоин бе.
Слава, и ныне
Богородичен: Наставнице святителей твердых, Пречистая Дево, настави нас мыслити и глаголати, и деяти точию правая, ревнующе не пожалевшим себе исповедником.
Песнь 6
Ирмос: Ят бысть, но не удержан в персех китовых Иона: Твой бо образ нося, страдавшаго, и погребению давшагося, яко от чертога от зверя изыде: приглашаше же кустодии, хранящии суетная и ложная, милость сию оставили есте.
Припев: Милостиве Господи, по молитвам святых Твоих помилуй землю Русскую.
Едема сладчайшаго наследницы показастеся, новомученицы земли Русския: блажени есте, како от плача вашего утешистеся на небесй: возжадали есте правды, еяже насыщаетеся изобильно в Царствии Небеснем.
Припев: Милостиве Господи, по молитвам святых Твоих помилуй землю Русскую.
Дщери царевы с материю святою в заточении суровем утешение себе от писаний святых отец почерпаху и тако Христу уневестившася. Алексий же отрок, брат их, рукама царя мученика внесен бысть тамо, идеже сии царственнии с четверицею сострадальцев убиени бывше, яко жертвы одушевленнии за род наш Богу предсташа.
Припев: Мати Божия, спаси землю Русскую
Шахта гроб бысть, в ней же Елисавета преподобномученица сконча царственный путь свой с Варварою о Господе сестрою и с прочими шестию. Таможде княгиня страстотерпцу князю Иоанну рану обяза. О святии Алапаевстии мученицы осмочисленнии, уврачуйте ныне раны душ наших.
Припев: Мати Божия, спаси землю Русскую
В страшныя дни сии пострадавшии во стране нашей Российстей угодницы Божии, знаменитии и неведомии, монаси, инокини, мужи и жены со чада, укрепите ны молитвами вашими, еже исправляти нам пути наша пред Господем, поминающе подвиг ваш.
Слава, и ныне
Богородичен: Множицею избавися от бед и зол род наш, молящимся людем пред Твоими, о Богомати, святыми иконами, совокупи и ныне, Владычице, вся моления наша о избавлении от лютейшия беды, предстательством Твоим.
По 6 песни катавасия и ектения малая.
Возглас: Ты бо еси Царь мира:
Кондак, глас 6:
Подобен: Предстательство христиан:
Предстательства ради Пречистой Богоматери, ходатайства ради святых сродников наших, не презри грешных молений гласы, но предвари, яко Благий, на помощь к нам, из глубины сердечной взывающим: помилуй, помилуй, помилуй нас, Господи.
Прокимен, глас 6: Господи, воздвигни силу Твою и прииди и спаси нас.
Стих: Пасый Израиля, вонми, наставляяй яко овча Иосифа.
Евангелие от Матфея, зачало 20 от полу (VII, 7-11):
Слава Тебе, Господи, слава Тебе (крестное знамение без поклона).
Рече Господь: просите и дастся вам, ищите и обрящете, толцыте и отверзется вам. Всяк бо просяй приемлет, и ищай обретает, и толкущему отверзется. Или, кто есть от вас человек, егоже аще воспросит сын его хлеба, еда камень подаст ему, или аще рыбы просит, еда змию подаст ему? Аще убо вы лукави суще, умеете даяния блага даяти чадам вашим, кольми паче Отец ваш Небесный даст блага просящим у Него.
Слава Тебе, Господи, слава Тебе. Поклон.
Слава Отцу и Сыну и Святому Духу.
Отче, Слове и Душе, Троица Святая, очисти множество согрешений народа русскаго. Поклон.
И ныне и присно и во веки веков. Аминь.
Молитвами Богородицы и святых, Милостиве, очисти множество согрешений народа русскаго. Поклон.
Помилуй мя, Боже, по велицей милости Твоей и по множеству щедрот Твоих, очисти беззаконие мое. Поклон.
Стихира, глас 6-й:
Не ввери нас человеческому предстательству, Владыко наш Господи, скорби бо велики обдержат нас. Терпеть уже не можем нашедших на нас обстояний. Помощи на земле не имамы, или к кому от человек прибегнем, всегда и от всех оскорбляемы, и утешения не имамы, кроме Тебе, Владыка наш, Господи, и Пречистой Богоматери и святых. Темже, яко щедрый, Господи, умилосердись о людях Твоих, яко долготерпелив, примирися и помилуй нас. Поклон.
Посем глаголи молитву сию10:
Спаси, Боже, людей Твоих и благослови достояние Твое, посети милостию и щедротами Твоими землю Русскую, утверди в ней веру истинную; расшири, умножи, умири и непоколебиму и адовыми вратами во веки сохрани Церковь Святую; умудри архипастырей и пастырей наших право править слово Твоея истины, разори и вскоре испраздни всякое разделение и ересей востание; соблюди в мире паству православную; возвыси ревнителей веры отеческой и низпосли на нас и на всех верных людей Твоих милости Твои богатыя, молитвами Всепречистой Владычицы нашей Богородицы и Приснодевы Марии; силою Честнаго и Животворящаго Креста (крестное знамение без поклона) и честныя и многоцелебныя Ризы Своея; предстательством честных Небесных Сил Безплотных; честнаго и славнаго пророка и Предтечи Крестителя Иоанна; святаго славнаго и всехвальнаго апостола Андрея Первозваннаго и прочих святых славных и всехвальных апостолов; святаго великомученика и победоносца Георгия; святыя великомученицы Варвары; иже во святых отцев наших и вселенских учителей и святителей Василия Великаго, Григория Богослова и Иоанна Златоустаго; иже во святых отца нашего Николая архиепископа Мирликийскаго чудотворца; святых равноапостольных Мефодия и Кирилла, учителей Словенских; святых равноапостолов Русских: благовернаго великаго князя Владимира и благоверной великой княгини Ольги; иже во святых отцев наших и всея России чудотворцев Михаила, митрополита Киевскаго, Петра, Алексия, Ионы, Филиппа и священномученика Ермогена, святителей Московских; Никиты и Иоанна Новгородских; Леонтия и Димитрия Ростовских; Стефана Великопермскаго; Гурия и Варсонофия Казанских; Митрофана и Тихона Воронежских; Иннокентия Иркутскаго; Питирима Тамбовскаго; и Иосифа убиеннаго, Астраханскаго, чудотворцев; святых благоверных князей и страстотерпцев Бориса и Глеба; преподобнаго и благовернаго великаго князя Александра Невскаго; и преподобных и богоносных отец наших Антония и Феодосия и прочих чудотворцев Киево-Печерских; Сергия и Никона Радонежских; Антония Римлянина и Варлаама Хутынскаго Новгородских; Сергия и Германа Валаамских; Зосимы и Савватия Соловецких; Димитрия Прилуцкаго и Дионисия Глушицкаго, Вологодских; Макария Унженскаго, Евфимия Суздальскаго, Никиты столпника Переславскаго, Авраамия Ростовскаго, Макария Калязинскаго, Ефрема Новоторжскаго, Авраамия Смоленскаго, Иова Почаевскаго и Серафима Саровскаго; святаго русскаго, в тот день празднуемаго, и всех святых, в земле Русской просиявших; святых славных и добропобедных мучеников, преподобных и богоносных отец наших, святых и праведных Богоотец наших Иоакима и Анны; святаго вселенскаго, в тот день празднуемаго; и всех святых, молим Тя, Многомилостиве Господи, услыши нас грешных, молящихся Тебе, и помилуй нас.
Господи, помилуй. 12 раз.
Молитвами святых отец наших, Господи Иисусе Христе, Боже наш, помилуй нас. Аминь. Поклон.
Песнь 7
Ирмос: Неизреченное чудо, в пещи избавивый преподобныя отроки из пламене, во гробе мертв бездыханен полагается, во спасение нас поющих: Избавителю Боже, благословен еси.
Припев: Милостиве Господи, по молитвам святых Твоих помилуй землю Русскую.
Страданьми вашими Церковь Русская славится, мученицы новии, сродницы наши чина и сословия всякаго, за Христа от безбожных убиеннии, во спасение нас поющих: Избавителю Боже, благословен еси.
Припев: Милостиве Господи, по молитвам святых Твоих помилуй землю Русскую.
Оружие крест и щит веру во Христа, страдания же и смерть прияли есте, во спасение нас поющих: Избавителю Боже, благословен еси.
Припев: Мати Божия, спаси землю Русскую
Злобу слуг сатанинских, сожженную совесть имущих, обличи сожигаемый сими святитель Иоанн Рижский, такожде и повешеннии: святитель Воронежский Тихон, и пресвитер Симферопольский Алексий и прочие зверонравне умученнии. Тебе же, о Господи, сии в Царстве Твоем светлем взывают: Избавителю Боже, благословен еси.
Припев: Мати Божия, спаси землю Русскую
Страстотерпцы младенцы убиенныя, яко птицы чистыя в гнезда небесныя приемлет Господь, непрестанно в раи воспевающия: Избавителю Боже, благословен еси.
Слава, и ныне
Богородичен: Избавительнице людей Твоих присная, умоли Сына и Бога Твоего паки избавити дом Твой от лютейшия всех прежде бывших беды, да со умилением возглаголем Ему, спасеннии Тобою: Избавителю Боже, благословен еси.
Песнь 8
Ирмос: Ужаснися бояйся небо, и да подвижатся основания земли: се бо в мертвецех вменяется в вышних Живый, и во гроб мал странноприемлется. Егоже отроцы благословите, священницы воспойте, людие превозносите во вся веки.
Припев: Милостиве Господи, по молитвам святых Твоих помилуй землю Русскую.
Испрасте ризы ваша кровьми своими, убелисте же их кровию Агнца, за человеки закланнаго, Егоже отроцы благословите, священницы воспойте, людие превозносите во вся веки.
Припев: Милостиве Господи, по молитвам святых Твоих помилуй землю Русскую.
Ублажим святителя Иосифа Петроградскаго, непорочности Церкве тайныя ревнителя, в прогнании ложе свое между свиниями нечистыми имевшаго, и слышим его нам в слух сердца глаголюща: страданьми своими и верностию превозносите Христа во вся веки.
Припев: Мати Божия, спаси землю Русскую
Славны и в житии и в кончине своей святители Серафим Угличский и Максим Серпуховский, он же и врач, на тайное епископство благословенный. Многотрудно есть служение Церкве гонимыя, егоже и совершивше сии, предсташа Христу Богу, моляще его о стаде своем, славяще же Его присно во веки.
Припев: Мати Божия, спаси землю Русскую
Небесныя хвалы личе неусыпный, новомученицы добропобеднии земли Русския, ныне присно причащаетеся Агнца присноживотнаго, за Негоже от безбожных убиени бысте, Егоже отроцы благословите, священницы воспойте, людие превозносите во вся веки.
Слава, и ныне
Богородичен: Пресвятая Владычице, спаси, свободи и поныне страждушия рабы Твоя, даруй им терпение и крепость. В Тебе полагаем надежду всю, блажим Тя присно и превозносим Сына Твоего и Бога во веки.
Песнь 9
Ирмос: Не рыдай мене, Мати, зрящи во гробе, Егоже во чреве без Семене зачала еси Сына: востану бо и прославлюся и вознесу со славою, непрестанно яко Бог, верою и любовию Тя величающия.
Припев: Милостиве Господи, по молитвам святых Твоих помилуй землю Русскую.
О новии страстотерпцы, иже подвиг противу злобы безбожных подъяша, веру Христову яко щит пред учении мира сего держаще и нам образ терпения и злострадания достойно являюще.
Припев: Милостиве Господи, по молитвам святых Твоих помилуй землю Русскую.
О твердости и мужества полка мученик Христовых, за Христа убиенных! Тии Церковь православную украсиша и в стране своей крови своя, яко семя веры, даша. Купно со всеми святыми достойно да почтутся.
Припев: Мати Божия, спаси землю Русскую
Слышим вси, како чудная Лидия, в страданиих, аще и плачущи, твердая, на сострадание Кирилла подвиже, иже и бысть ей щит, меч же мучителем зверствовавшим. И спасе Христос Кирилла купелию крове его. Сия поведавый Церкви Алексий и сам пострада. Молитвами сих триех, Боже, помилуй нас.
Припев: Мати Божия, спаси землю Русскую
О святии, ихже зде помянухом, и множайшее множество неведомых! Простите убожество словес сих, да напишутся еще похвалы, вам подобающия. Исчислити вас невозможно есть. Всех же молитвами, да приимут чтущия вас от Господа и Владыки живота нашего благодать и велию милость.
Богородичеи: О Всепетая Мати! Аще и разорися от злых великая церковь Твоя Печерская, в ней же священномученик Владимир приблизившуся дни убиения его, со многим умилением акафист чтый, Тебе моляшеся, но не оскудеет во век к людем кающимся милость Твоя. Радуйся, Обрадованная, во Успении Твоем нас не оставляющая!
По 9-й песне за Достойно:
О Пресветлое Облаче, Мати Божия, нас побеждающих победи державною Твоею и всесильною десницею, и сущим в скорбях предстани, обидимых заступи и грехи разреши молитвенников Твоих, елико бо хощеши и можеши. Поклон по дню.
Святый Боже... Трижды с тремя поклонами.
Слава, и ныне.
Пресвятая Троице... Поклон.
Господи, помилуй. Трижды.
Слава, и ныне.
Отче наш (крестное знамение без поклона) Иже еси на Небесех...
Молитвами святых отец наших, Господи Иисусе Христе, Боже наш, помилуй нас. Поклон.
ТРОПАРЬ, глас 4-й:
Скоро предвари, прежде даже не поработимся врагам хулящим нас и претящим нам, Христе Боже наш. Погуби Крестом Твоим борющих, да уразумеют, как может православных вера молитвами Богородицы и святых, Едине Человеколюбче. Поклон.
Посем глаголи сие моление:
Сохрани, Господи, великий царствующий град Москву, все грады и селения Русския, и всю землю нашу от глада, губительства, землетрясения, потопа, огня, меча, нашествия иноплеменников и междоусобныя брани, и милостив, и благоуветлив буди к нам, Благий и Человеколюбче, Боже наш, отврати всякий гнев, на нас движимый, и избави нас от належащаго и праведнаго Своего прещения и помилуй нас.
Господи, помилуй. 40 раз. Три поклона.
Молитвами святых отец наших, Господи Иисусе Христе, Боже наш, помилуй нас. Аминь. Поклон.
Паки и паки, со умилением сердечным колена душ и телес наших преклоньше, Господу помолимся.
[Зри: В воскресные и другие праздничные дни, когда отменяются коленопреклонения, глаголи: Паки и паки со умилением Господу помолимся] 11
Господи, помилуй. Трижды.
Преклонив колена со умилением чти молитву сию12:
Согрешихом, беззаконовахом, неправдовахом пред Тобою, Господи Боже наш; не сохранихом заповедей Твоих, не соблюдохом повелений Твоих, но возжелахом ходити в волях сердец наших. Не хранили мы первой любви к Тебе, Жениху душ наших, нашему Владыце и Благодетелю, к Матери нашей Церкви Православной и Ея уставам, ко Отечеству нашему, Святой Руси и его святыням, к памяти отцев наших и благочестивым обычаям и заветам предков. Не к Тебе, Востоку Светлому, но к темному западу с вожделением устремляли мы взоры наши. Темже, имже согрешихом, сим и наказуемся. В праведном гневе Твоем на несохранивших верности, на хромавших на оба колена, Ты с запада навел еси иноплеменников на Отечество наше. Лютая война, посем нестроения внутренния, смуты и раздоры церковныя причиняли неисчислимыя бедствия и страдания народу русскому. За беззакония наши небо заключилось и земля не давала плодов; Ты гладом, жаждою и мором поражал еси нас; напоследок же паки попустил еси приити во Отечество наше иноплеменникам, буиим и зверонравным, пришедшим с злобными замыслами – поработить и истребить народ русский, уничтожить государство Российское. Но Долготерпеливый и в гневе, Человеколюбивый и в наказании, Ты не попустил исполниться злым намерениям их и не отдал на конечное разорение и уничтожение землю, собранную воедино и устроенную молитвами, слезами и потом, трудами и подвигами благочестивых предков наших и святых мужей и жен от рода нашего. Проникшие вглубь страны нашей, враги наши со стыдом обратились вспять и сами богопораженною язвою трупиями – достойно падоша. Но от незалеченных еще ран военных и доселе страждут многия из народа русскаго. Непрекращающееся же во всем мире бряцание оружием и ожидание новых ужасов военных в трепет повергает всех. Зело умножаются стужающие нам, мнози возстают на нас, мнози глаголют: "Несть спасения Святой Руси, несть спасения Православному народу русскому в Бозе его". Но, о Многомилостиве, не до конца гневайся на нас! Помилуй землю Русскую, пощади русский народ! Призови его к покаянию, якоже древле Ниневитян. Бывшими бедствиями и скорбями омой нас от беззаконий наших, очисти от грехов наших, возгрей сердца наши верою в Тя, окрили их надеждою на Тя, распали их любовию к Тебе. Умножь в нас веру, помоги нашему неверию. Скоро до предварят нас щедроты Твои, Господи, яко обнищахом зело. Помози нам, Боже, Спасителю наш, славы ради имени Твоего, да не когда рекут языци: "Где есть Бог их?", и да увестся во языцех пред очами нашим