Фонд Ундольского 310 № 296
(л. 1) Месяца сентября в 24 день житие и жизнь и отчасти чюдес сказание преподобнаго отца нашего Галактиона Вологоцкаго, новаго чюдотворца.
Что убо похвала благоверию и что ино утвержение, разве еже ведати и внимати милосердию Божию и милости Его, юже изливает на боящихся его и соблюдающих заповеди его, – святых своих, и праведных, и преподобных рабех, иже словесы, и делы, и мыслию во Святую Троицу праве без порока верующе, в телеси вещне безтелесный чин показующе и просвещен всегда смысл имуще, вся усердно молвы оставльше любве ради Божия и царь//(л. 1 об.)ствия ради будущаго, вонь же вси человецы от егда наздани быша, но не вси его получают, понеже не вси Его словеси, яко же рече Господь, вмещают (Ин 8:37). Понеже и се достоит рещи, понеже не вси и жития своего конец совершают благ, его же долготерпением ожидает добрыи наш подвигоположник Владыка Христос, живота нашего Господь. Но иже явленным благолюбием и чистотою устроит путь свой, и море жития сего без потопления преидет, и мысленнаго Аммалика потопит, не собою же себя надеющеся, кто кончати возможет, но верою несуменною всесильнаго призывая Бога, во глубину смиреномудрия мытарьски себе снося и неугасаемую любве// (л. 2) теплоту ко Христу соблюдая.
Вельми убо полезно божественных мужей жития написовати и венцы им похвальныя и сплетати, и успешно есть! Не яко они таковая требующе, но яко Богу хотящу прославити своя угодники, понеже сих духовная красота, в ней же праздницы сотворяются в памяти святых, веселят сердца верных и души освящают. Вся убо сия человеколюбцу Богу на пользу нам же творящи, душевное спасение. Изрядных бо мужей жития обыкоша присне ради бывающия пользы, нам же ныне напоследок, вонь же кончина век достиже, наипаче нужно есть сие и удобно.
И се ныне приспе светлый новый праздник предивныя и честныя //(л. 2 об.) памяти преподобнаго отца нашего Галактиона, о его же житии понудихся написати во славу Сына Божия, избравшаго своего раба и целити ему даровавшаго душевныя и телесныя страсти. И о ухищрении словес пекущеся, но святаго сего призывающе к Богу на молитву, простыми писмены написах боголюбивым и богонравным людем на послушание и на пользу, да уведено будет всем о святем и приснопамятнем муже: како, и откуду, и в кая времена таковый светильник родися и како возсия, и о пребывании во множестве мира и во мнишестве.
Сей преподобный отец наш Галактион, рождение имея в царьствующем великом нове граде Москве//(л. 3) в царьство благовернаго царя и великаго князя Иоанна Васильевича всея Руссии. Отец же его болярин князь Иоанн Иоанновичь Бельской, наречено бысть во святом крещении имя его Гавриил, и Божиим повелением возложи благоверныи царь и великий князь Иоанн Васильевичь на отца сего блаженнаго гнев и повеле его предати смертной казни. Сего же юношу сродницы, ближнии приятели и добродеи скрыша возрастом седмилетна суща и везоша его в Старичь град, и пребысть тамо он предоблий юноша немного время, утаяся родством своим от всех человек, и никому же о том поведа: Божия благодать храняше его. Сей святый юноша из//(л. 3 об.)млада упражняшеся, и божественных писаний сладостно послушаше, и поучашеся в них.
И по некоем времени, Богом наставлен, втай отиде из Старича от града, и прииде в богоспасаемый град Вологду, и на посаде поживе у некоего усмаря, и учися того художества. И усмарь бысть изряден, и от того себе пищу приобреташе, и у церкви пребываше святых великомученик Флора и Лавра в воздержании всяцем, и всех пристрастий мирских и многоплетенных сетей гнушаяся, с радостию великою и веселием славя и хваля Бога. И егда достиже возраста, сочтася законному браку, поят себе жену от простых//(л. 4) людей и поживе с нею, и бысть има детище женский пол, и приключися жене его умрети. Он же остася з детищем, и воскорми ея, и положив на ся обещание, да угодит Господеви, и возложи на тело свое вериги железныя, и Божие дарование содеяся на нем, яко Господу годе, апостолом святый написа: «Егоже любит Господь, и наказует. Биет же сына, его же приемлет» (Евр 12:6), всячески о нашем спасении многоразлично промышляет Господь. Тако и сему блаженному Гавриилу попущает в телесный недуг впасти лют зело и язвитися скорчением жил устрояет, поеже глаголет евангелист: «Елико убо внешний наш человек изнемогает,//(л. 4 об.) толико внутренний обновляется» (2 Кор 4:16). Такожде в злато есть глаголет наводимая от Бога человеком скорбь, и болезнь исходатайствует венцы в будущем веце и отраду дает вечныя муки, и псаломник глаголет: «Многи скорби праведным и от всех их избавит я Господь» (Пс 33:20), и паки: «Близ Господь сокрушенных сердцем и смиренныя духом спасет» (Пс 33:19). И паки: «Близ Господь всем призывающим его истинною, волю боящихся его сотворит и молитвы их услышит, и спасет их» (Пс 144:18-19). Тако содетель наш милостивый Бог, строя человеческий род, «хотя всем спастися и в разум истинны приити» (1 Тим 2:4), вложи сему блаженному Гавриилу//(л. 5) помышление благое в сердце его, како бы спастися и уединитися мира, и в помышление дело бысть.
Разсмотрив, и уразуме мира сего многомятежное житие и суету, еже есть временна и безвестна бываема, подобна сени преходящи, яко преходит мир сей. И, упросив у градских людей мало земли и места на селение себе близ посаду на Содиме реце, и вселися ту. Постави себе келиицу малу и затворися внутрь, токмо оставив дверцы едины, идеже пищи себе мало приимаше. И прииде ему Божия любы и рачение, и припаде ко всемилостивому Богу и глагола: «Призри на мя и помилуй мя, виждь смирение мое и труд мой и отпусти вся грехи//(л. 5 об.) моя» (Пс 24:16,18) и остризает власы главы своея, вкупе и долу влекущая мудрования отверг и ангельскому образу сочетается. И бысть имя его Галактион, и нача славити человеколюбца Бога, яко сподобил есть Господь такова чина, и нача трудитися великими труды на том месте, сапоги шия. А что взимаше от трудов, и то разделяше на три части: первую часть даваше церьквам Божиим, вторую – нищим, третиею же сам питаше.
И ископа езеро невелико окрест келии своея, и всади рыбы, и древия насадив на том островке, и обрете водныи источник, и кладязь ископа. Во дни в трудех, а в нощи без сна пребываше и сонную леность весьма отрясая, и благодарныя//(л. 6) молитвы и песни возсылаше к Богу. Просвети же ся помысл его благодатию Божиею, и преспеваше в добром житии воздержанием многим, постом и молитвами, от человек уединяяся, славу же мира уничижав, и смирение, и целомудрие, и любовь прилежно держа, тем радость и веселие притяжа. И приковася чепию железною, утверженною в келии своей, и покрову, просто рещи потолоку, и не исхождаше никамо. И егда хотяше по нужди почивати, то на ребрах никогда же возлежаше, но на колени преклоняяся и от чепи держашеся, почиваше, ядый хлеб сух и воды в меру пия, и то во уреченное время, и не даяше себе покоя день и нощь.
Граждане же и вси, слышавше его житие//(л. 6 об), прихождаху и пользу приимаху и благословения просяще от него. Даде бо ся ему слово премудрости и разума утешения (1 Кор 12:8), и бе о нем слышася добрая словеса, якоже светла светильника. Сицево же бе тщание преподобнаго Галактиона. И ничтоже имяше у себе, токмо едину ризу власяну и опаницу, в ней же вкушаше, и рогозиницу малу, на нейже стояше, и во всем стяжа любовь равну, николи же богата паче убога почте, ниже князя, честь княжения держаще, но всех вкупе равно любя и чтяше. Не взираше бо на лица человеком, не прещаше никому жестокостию, но «бе слово его растворено» (Колос 4:6) любовию и сладостию. Кто убо слыша его ответ и не насыщашеся//(л. 7) от сладости словес его или кто зря лице, не веселяшеся?! По вся дни в лета иночества своего возревнова имети правила иноческа со всяцем тщанием, многу же и велику любовь душевнаго ради прилежания имяше к Богу.