По прехождении же неколиких лет преставления святаго благочестивии людие, приходящии к честному гробу преподобнаго Галактиона и видяще от него бывающая чюдеса различная многа, во един же день тогда собрашася от мала и до велика, и начаша глаголати к себе: «Воистинну нам есть сей блаженный на пользу, от Бога послан есть и все нам истину изрек, и неизглаголанную к нам любовь показа, и повеле нам заступницы Нашея Богородицы храм воздвигнути. Мы же//(л. 12 об.) его оскорбихом, и не послушахом, и отвратихомся от него. Ныне же како приступим и припадем к нему и что воздадим ему за благая его деяния?» И возвестиша о сем великому господину Варлааму архиепископу. Архиепископ же, собрав благоговейных людей истинных и правоверных, и известно о них испытав о его истинном житии по Бозе, и уведав, повеле написати житие преподобнаго отца Галактиона, и, совещав с народы, благословив, и повеле им во обители храм древян воздвигнути во имя Пресвятыя Богородицы, честнаго и славнаго Ея Знамения, иже в Великом Нове граде. И повеле братство собрати, во еже збысться по проречению святаго//(л. 13) отца.
Но о пречестнейший отче, любезная и священная главо, преподобне Галактионе, назирай свыше милостивно и молися владыце всех милостивому Богу, всех благ подателю в наблюдении державы благовернаго и благочестиваго всероссийскаго царя и государя имярек, да подаст ему многолетное здравие, святыя христианския веры в снабдение и утвержение и сохранит царьство от всех сопротивных врагов цело и неврежденно всегда, в тишине же и умирении мира. Но, о пастырю добрый, истинный строителю винограда Христова, отцем слава и преподобным сопричастниче и праведным, мнишескаго жития совершителю, и ныне на небеси предстоя святей//(л. 13 об.) Троице со всеми святыми, молим тя убо: «О блаженне, помолися о граде нашем Вологде и о обители своей и иже ныне в ней Богом храненное стадо сохрани, яко чадолюбивый отец, и мене многогрешнаго и непотребнаго, списавшаго твое житие возимети в памяти, и помолися Христу Богу, да исторгнет мя из уст злообразного диявола, и наставит мя на путь покаяния, и приимет мя кающагося, яко человеколюбец. Ты же, отче наш любезный, не презри нас всех, чтущих пресвятую память твою, и сохрани нас, и соблюди от всех видимых и невидимых врагов, и прииди посреди нас невидимо, моления, Богови возсылаемая, приими, и при//(л. 14)неси сия за всех нас Творцу и Избавителю нашему Святей Троице покланяемому истинному Богу Нашему, яко да Твоими молитвами нашим согрешением оставление получим благодатию Господа Нашего Иисуса Христа, с Ним же Отцу слава, со Святым Духом ныне, и присно, и во веки веков. Аминь.
Чюдо первое.
С Вологды с посаду игрешскаго монастыря вотчины села Дюдикова человек некий именем Иоанн званием воевода имяше дщерь свою девицу именем Анну. Больна бысть черным недугом и по обещанию приведена бысть во обитель совершити молебная Спасу, и Пречистей Богородице, и преподобному Галактиону молебная, и взяша з гро//(л. 14 об.)ба святаго перси и ис кладезя его воды, и даша ей пити, и абие бысть здрава.
Чюдо второе.
Илиинскаго монастыря старец Касиян имеяше у себе внуку именем Гликерию, и бысть больна вельми. И даша ей персти з гробы и святыя воды ис кладезя пити, и абие бысть здрава.
Чюдо третие.
Некий диякон Гавриил замочьник бысть болен тяжким недугом, безперстанно у него кости ломило во дни и в нощи, и он моляся блаженному Галактиону, и то взят перси з гроба, и ис кладезя воды испи, и абие бысть здрав.
Чюдо четвертое.
Илиинскаго же монастыря старец//(л. 15) Трифон болен бысть зельно главою, и положи обещание Пречистей Богоородице и преподобному Галактиону, и прииде во обитель, моляся Спасу, и Пречистей Богородице, и святому, и целовал святыя иконы, и принесе с собою яблонцы, и посади в монастыри, и абие бысть здрав.
Чюдо пятое.
Иный старец именем Аврамий прииде во обитель, и бысть болен очима вельми немало время, и поживе во обители десять дней и приходя, припадая ко святым иконам, и моля, и в помощь призывая преподобнаго Галактиона. И абие здравие получи, и сие поведа, яко «егда бывшу ми во обители Пресвятыя Богородицы, видев от святаго бывающия многа чюдеса//(л. 15 об.) приемлющим людем, иже с верою приходящим».
Чюдо шестое.
Иный человек града Вологды именем Никита Ияковлев сын бысть болен немало время, и прииде во обитель и моляся Спасу, и Пречистей Богородице, и преподобному Галактиону, и абие здравие получи.
Чюдо седмое.
И паки прославляя Господь Бог своего угодника, сотвори ино чюдо преславно, некто человек именем Филимон, Филиппов сын, Кандиловскаго монастыря дворник, зовом Какорев, сице сам о себе поведа: «Бывшу ми в недузе велице разслабленну всем телом, и руками, и ногами шесть лет, нимало могуща вос//(л. 16)клонитися, и егда мя како обратят тако и лежа. И ради пищи сын мой постави мне у грацких врат каменных на мосту кущу з затвором. И во 140–м году (1632) июля в 1 день в нощи против пятка за полчаса до Софейскаго звону возбудився от сна своего и видев у кущи моей затвор разтворен и глас глаголющь: «Разслабленный, возлязи». И аз возлег в кущи моей, и абие вторицею возглагола: «Разслабленный, востани». И аз востав и прекрестих лице свое рукою своею, и видев в возглавии своем стоящь образ Пречистыя Богородицы, и слыша глас третицею глаголющь: «Разслабленный, востани, и иди во обитель святыя Богоородицы Знамения и преподобнаго Галактиона//(л. 16 об.), и сотвори молебная, и поведай верным, да спасутся». И от того часа рукама, и ногама, и телом здрав бысть.
Чюдо осмое.
Иный человек Владышине слободы именем Евфимий зовом Самаучкин, имея дщерь именем Елену. И бысть во иступлении ума. Отец же ея с мужем ея приведоша во обитель и, сотворше о ней молебная Пресвятей Богородице и преподобному Галактиону, и взем перси з гроба святаго и ис кладезя воды испив, и бысть здрава, яко николиже пострада.
Чюдо девятое.
Иногда же паки умножившуся дождю многу, града же Вологды людие благовернии приидоша ко//(л. 17) архиепископу Маркеллу его, да идет со кресты и с честными иконами во обитель Пресвятыя Богородицы и преподобнаго Галактиона и молит Господа Бога и Пречистую Богородицу о ведре. Архиепископ же тщательно иде со кресты и с честными иконами во обитель Пресвятыя Богородицы, и молебное благодарение сотвориша, и бысть Божие благодеяние, ведро вольное. Архиепископ же, воздав хвалу Богу, и Пречистой Богородицы, и угоднику их преподобному Галактиону, и того ради архиепископ Маркел со освященным собором устави во обитель ходити со кресты и с честными иконами, и у Бога милости просити о дожди и о ведре. И абие, видяще всегда милость Божию, воздающе благодарение Богу, и Пречистей//(л. 17 об.) Богородице, и угоднику их преподобному Галактиону чюдотворцу.
Чюдо десятое.
Некий человек именем Илия художеством иконописец нанесе хулу на преподобнаго Галактиона, и называя его грешна человека, и зело понося его. Того ради Бог, не терпя раба своего поносима и поругаема, от`я у него язык на много время. И зело болезнуя, и в перси своя бияше, и лежа часа три и больши и языкомь никако же глаголати, и домашнии его чающе, уже ему конец приближися. И призваша отца его духовнаго от храма Власия Севастийскаго священника Марка. Отец же его духовный нача его вопрошати, како//(л. 18) ему приключися болезнь. Той же ничтоже може вещати, токмо бияше в перси руками, и жена его и дети поведаша о сем отцу его духовному, како ему приключися она нестерпимая болезнь и како своим малоумием худу возлагая и поноси преподобнаго отца Галактиона. И о сем отец его духовный за сие нача его возбраняти и словом его смиряти, и глаголаше ему: «Видиши ли, безумне, како Бог прославляет угодников своих?» И наказав его, и повеле ему обещание положити идти во обитель Пресвятыя Богородицы, и милости просити у Бога, и пред гробом его плакати о своем согрешении. Той же человек прииде в чювство,//(л. 18 об.) а языком своим не могий проглаголати и мысля во уме своем смирение и о своем согрешении каяся, глаголя: «О заступнице рода христианскаго, мати Христа Бога Нашего, помози мне грешному и сподоби мя видети гроб блаженнаго Галактиона и прощение от него получити». И паки плакася о своем согрешении, и прииде во обитель и, сотворше о нем молебная Спасу, и Пречистей Богородице, и преподобному Галактиону, и абие совершенное здравие получи, и поведав сие сотворшееся о нем всей братии, вси же видяще таковое чюдо, прославиша Бога, и Пречистую Богородицу, и их угодника преподобнаго Галактиона чюдотворца, елико Господь наш Иисус//(л. 19) Христос преславно при животе и по преставлении своего угодника чюдесы прославляет, иже с верою призывающим в молитве его.
Чюдо первое на десять.
В лето 7161–е (1652) сентября во 8 день в праздник Рожества Пресвятыя Богородицы в вечер о после вечерни в трапезе поведа Галактионовы пустыни живущим старцем: казначею старцу Ефрему и всей братии прохожей человек именем Стефан, Савин сын Пестелининных родом, Каргополец, посацкой человек о преподобнем отце Галактионе сице: «Живущу же, рече, отцу моему Саве в царьствующем граде Москве пятьнадесять лет, промышляющу и кормящуся рукоделием своим//(л. 19 об.) красильным, и волею Божиею во 153-м (1645) году случися быти на Москве пожару велику, и отца моего двор и весь живот погоре до конца. И изволи отец мой с`ехати на житие после того великаго пожжения со всем домом своим в Каргополь к своим сродичам. И едущим нам в Каргополь и бывшим на Вологде, стоящим же на посаде в Кропанцове дворе близ суща Галактионовы пустыни. И внезапу случися брату моему, Стефанову, родному Иову быти в болезни тяжкой. Брат же мой еще яко сый девяти лет точию. болезнь его обдержаше зело. и отец мой болезни его ради не могий ехати в путное//(л. 20) шествие, ожидая его здравия, и продолжил время немало быти на Вологде. И брату моему Иову вельми немогущу огненною болезнию, отец же мой Сава страха ради смертнаго сентября в 5 день повеле призвати священника, и брата моего болящаго исповедавшу и причастившу святым Христовым тайнам, брат же мой от великия болезни вельми изнемогати нача, и не могий глаголати ничесоже, весь день той и по прешествию того дни к вечеру, яко быти часу второму нощи, и отцу моему Саве и матери приседящим со огнем у брата моего болящаго, чающим его уже умерша, зане несть дыхания. Отцу же моему жалеющу по сыне// (л. 20 об.) своем и по моем брате и по своем и по моем брате и плачущуся вельми, и молящуся Господу Богу, и Пречистей Его Богоматери, и преподобному Галактиону, и просящу ему помощи и изцеления сыну своему. Бе бо слышал отец мой о преподобнем отце Галактионе Чюдотворце. И прежде того дни в вечеру у вечерни у знамения Пресвятыя Богородицы в Галактионове пустыни и сам был у чюдотворцова гроба и у честных мощей его прощался и милости просил. Мати же моя такожде от жалости сердечныя по сыне своем плачющися и зрящи на болящаго и от очию своею слезы испущающи многи. И тогда, видящи мати моя того брата моего уже умерша, нача вельми плакати и//(л. 21) руками своими обимати того от главы и до ногу и дыхания не чующи немало, но бяше весь студен, яко мертв. Мати же моя просящи кадильницы и фимиама, да покадят, яко уже умерша, и видящим отцу моему и матери, яко мал час и внезапу брат мой болящий Иов нача сам воставати на руки своя и рече отцу моему и матери: “Дайте ми ясти хлеб с солию”. Отец же мой и мати даша ему ясти хлеба с солию и начаша брата моего вопрошати, глаголюще: “Како боля бысть яко мертв?” Брат же мой Иов нача отцу своему и матери сказывати: “Яко мне спящу, рече, прииде ко мне человек стар в ризах иноческих, и прият//(л. 21 об.) мя рукою своею за выю мою, и рече мне: “Время уже тебе обмогатися, востани да яждь”. Да той же человек, подимаючи мя, рече: “Поиди в Галактионову пустыню и приложися к чюдотворным мощем его”. И от того Иов брат мой здрав бысть от болезни тоя благодатию Христовою, молитвами Пречистыя Богоматери и святаго отца Галактиона чюдотворца. Той же Стефан наутрие сентября в 14 день опосле утренняго пения паки прииде в Галактионову пустыню з братом своим Иовом прежде болящим чюдотворцу Галактиону панахиду пети и у чюдотворнаго гроба его помолитися. Мы же иноцы, живущии в Галактионове пустыни,//(л. 22) того болящаго Иова вопрошахом. Он же нам такоже поведа, яко же брат его Стефан ни в чем не разньствующе. И быша они в часовни у чюдотворцова гроба, славяще и благодаряще Бога, и Пречистую Его Богоматерь Пресвятую Богородицу, и преподобнаго отца Галактиона чюдотворца, милости прося и прощения, и даша они от имений своих на панахиду. Сами же вельми скорбяще, яко не сподобилися в то время панахиды отпети над чюдотворным гробом. Бе бо уже на пути и извощики у них наяты, и чрез урок ожидающе игумена. Бе бо в то время по некоему случаю игумену во обители не прилучившуся, бывшу ему некоея ради потребы за че//(л. 22 об.)тыре поприща от обители место, зовомое нацерьковном. Они же, чающе его долгаго закоснения игуменова, пойдоша в дом свой, славяще и благодаряще Бога и преподобнаго отца Галактиона Чюдотворца. Мы же иноцы, живущии в Галактионове пустыни: казначей старец Ефрем з братиею сия от того Стефана и брата его Иова видевше и слышавше, написахом в кратце на пользу слышащим и памяти ради в прочия роды по нас будущим. Богу нашему слава ныне, и присно, и во веки веком. Аминь.