Духовная грамота (вторая) великого князя Дмитрия Ивановича
Апреля – 16 мая 1389 г.
Во имя Отца и Сына и Святаго духа, се яз, грешный худый раб Божий Дмитрий Иванович, пишу грамоту душевную целым своим умом. Даю ряд сыном своим и свoей княгини.
Приказываю дети свои своей княгине. А вы, дети мои, живите заодин, а матери своее слушайте во всем.
А приказываю отчину свою Москву детем своим, князю Василью, князю Юрью, князю Андрею, князю Петру. А брат мой, князь Володимер, ведает свою треть, чем его благословил отец его, князь Андрей. А сына своего, князя Василья, благословляю на стариший путь в городе и в станех моего удела двою жеребьев половина, а трем сыном моим половина, и в пошлинах в городских половина. А тамга из двою моих жеребьев княгине моей половина, а сыном моим половина. А восмьничее мои два жеребья княгине моей. А на стариший путь сыну моему, князю Василью, Василцево сто и Добрятиньская борть с селом с Добрятиньским. А бортници в станех в городских, и конюший путь, и соколничий, и ловчий, тем сынове мои поделятся ровно. А численых людий моих двою жеребьев сыном моим по частем, а блюдут с одиного.
А се даю сыну своему, князю Василью, Коломну со всеми волостми, и с тамгою, и с мыты, и с бортью, и с селы, и сo всеми пошлинами. А волости Коломеньские: Мещерка, Раменка, Песочна, Брашева с селцем с Гвоздною и с Иванем, Гжеля, деревни Левичин, Скулнев, Маковець, Канев, Кочема, Комарев с берегом, Городна, Похряне, Усть-Мерьско. А из Московских сел даю сыну своему, князю Василью: Митин починок, Малаховское, Костянтиновское, Жырошкины деревни, Островское, Орининьское, Копотеньское, Хвостовское, у города луг Великий за рекою. А из Юрьевских сел даю сыну своему, князю Василью: своего прикупа Красное село с Елезаровским, с Проватовым, да село Василевское в Ростове.
А се даю сыну своему, князю Юрью, Звенигород со всеми волостми, и с тамгою, и с мыты, и с бортью, и с селы, и сo всеми пошлинами. А волости Звенигородские: Скирменово с Белми, Тростна, Негуча, Сурожык, Замошъская слобода, Юрьева слобода, Руза городок, Ростовци, Кремична, Фоминьское, Угож, Суходол с Ыстею, с Истервою, Вышегород, Плеснь, Дмитриева слободка. А из Московских сел даю сыну своему, князю Юрью: село Михалевское, да Домантовское, да луг Ходыньский. А из Юрьевских сел ему: прикупа моего село Кузмыдемъяньское, да Красного села починок за Везкою придал есм к Кузмыдемъяньскому, да село Богородицьское в Ростове.
А се даю сыну своему, князю Аньдрею, Можаеск со всеми волостми, и с тамгою, и с мыты, и с бортью, и с селы, и со всеми пошлинами, и с отьездными волостми. А волости Можаиские: Исмея, Числов, Боянь, Берестов, Поротва, Колоча, Тушков, Вышнее, Глиньское, Пневичи с Загорьем, Болонеск. А Коржань да Моишин холм придал есмь к Можаиску. А се волости отъездные: Верея, Рудь, Гордошевичи, Гремичи, Заберега, Сушов, да село Репиньское, да Ивановское Васильевича в Гремичах. А Колуга и Роща сыну же моему, князю Андрею. И чтo вытягал боярин мой Федор Андреевич на обчем рете Тов и Медынь у смолнян, а то сыну же моему, князю Андрею. А из Московских сел ему: Напрудьское село да Луциньское на Яузе с мелницею, Деуниньское, Хвостовьское в Перемышле, да луг Боровский, а другии противу Воскресенья. А из Юрьевских сел ему Олексиньское село на Пекше.
А се даю сыну своему, князю Петру, Дмитров со всеми волостми, и с селы, и со всеми пошлинами, и с тамгою, и с мыты, и с бортью. А се Дмитровские волости: Вышегород, Берендеева слобода, Лутосна с отъездцем, Инобаш. А из Московских волостий князю Петру: Мушкова гора, Ижво, Раменка, слободка княжа Иванова, Вори, Корзенево, Рогож, Загарье, Вохна, Селна, Гуслеця, Шерна городок. А из Московских сел князю Петру: Новое село, Сулишин погост. А из Юрьевских сел ему прикупа моего село Богородицьское на Богоне.
А се даю сыну своему, князю Ивану: Раменеице с бортники и что к нему потягло, да Зверковское село с Сохоньским починком, чтo отошло ото князя от Володимера. А Сохна сыну же моему, князю Ивану. А в том уделе волен сын мой, князь Иван, который брат до него будет добр, тому даст.
А се благословляю сына своего, князя Василья, своею отчиною, великим княженьем.
А сына своего благословляю, князя Юрья, своего деда куплею, Галичем, со всеми волостми, и с селы, и со всеми пошлинами, и с теми селы, которые тягли к Костроме, Микульское и Борисовское.
А сына своего, князя Андрея, благословляю куплею же деда своего, Белымозером, со всеми волостми, и Вольским с Шаготью, и Милолюбский ез, и с слободками, что были детий моих.
А сына своего, князя Петра, благословляю куплею же своего деда, Углечим полем, и что к нему потягло, да Тошною и Сямою.
А се даю своей княгине из великого княженья у сына у своего, у князя у Василья, из Переяславля Юлку, а из Костромы Иледам с Комелою, а у князя у Юрья из Галича Соль, у князя у Андрея из Белаозеря Вольское с Шаготью и Милолюбский ез. А из Володимерских сел княгине моей Ондреевьское село, а из Переяславских сел Доброе село, и что к ним потягло. А из удела сына своего, княжа Васильева: Канев, Песочну, а из сел Малиньское село, Лысцево. А из княжа удела из Юрьева: Юрьева слобода, Суходол с Ыетею, с Ыстервою, да село Ондреевское, да Каменьское. А изo княжа удела из Андреева: Верея, да Числов, да село Луциньское на Яузе с мелницею. А из княжа удела из Петрова: Ижво да Сяма. А что есм дал своей княгине из удела сына своего, княжа Васильева и изо княжа из Юрьева, изо княжа из Андреева, изо княжа из Петрова, волости и села, а что Бог розмыслит о моей княгине, и те волости и села во чьем удел, то тому и есть.
А се даю своей княгине: свой примысл Скирменовскую слободку с Шепковым, Смоляные с Митяевским починком и с бортью, с Вышегородскими бортники, Кропивну с бортники с Кропивеньскими и с Исменьскими, и с Гордошевскими, и с Рудьскими, Желескова слободка с бортью, с Ывановым селом с Хороброва, Исконьская слободка, Кузовская слободка, и что княгини моее прикуп, и что к ней потянуло, тo моей княгине. А по которая места слободьские волостели судили те слободы при мне, и княгини моее волостели судят по та же места, как было при мне. А что княгини моее купля Лохно, то ее и есть. А на Коломне мой примысл Самоилецев починок с деревнями, Савельевский починок, Микульское село, Бабышево, Ослебятевское, а то княгини моей. А что ее село Репеньское и прикуп, то ее и есть. А из Московских сел даю своей княгине: Семциньское село с Ходыньскою мелницею, да Остафьевское село, да Илмовьское. А из Юрьевских сел даю ей: куплю свою Петровское село, да Фроловское, да Елох. А Холхол и Заячков, то моей княгине. А что ми дала княгини Федосья Суду на Белеозере, да Колашну, и Слободку, и что благословила княгиню мою Городком да Волочком, та места ведает княгиня Федосья до своего живота, а по ее животе то княгине моей. А теми своими примыслы всеми благословляю княгиню свою, а в тех примыслех волна моя княгини, сыну ли которому даст, по души ли даст. А дети мои в то не вступаются.
А которые деревни отоимал был князь Володимер от Лыткиньского села княгини моее к Берендееве слободе, а те деревни потянут к Лыткиньскому селу моее княгини.
А по грехом, которого сына моего Бог отъимет, и княгини моя поделит того уделом сынов моих. Которому что даст, тo тому и есть, а дети мои из ее воли не вымутся.
А даст ми Бог сына, и княгини моя поделит его, возмя по части у болшие его братьи.
А у которого сына моего убудет отчины, чем есм его благословил, и княгини моя поделит сынов моих из их уделов. А вы, дети мои, матери слушайте.
А по грехом, отъимет Бог сына моего, князя Василья, а хто будет под тем сын мой, ино тому сыну моему княж Васильев удел, а того уделом поделит их моя княгини. А вы, дети мои, слушайте своее матери, что кому даст, то тому и есть.
А коли детем моим взяти дань на своей отчине, чем есм их благословил, и сын мой, князь Василей, возмет с своего удела с Коломны и со всех Коломеньских волостий триста руб. и сорок и два руб., и княгини моя даст ему в то серебро с Песочны 50 руб. без 3-х, а с Канева дватцять руб. и два руб. А князь Юрьи возмет с Звенигорода и сo всех с Звенигородских волостий двесте руб. и семдесят руб. и два руб., и княгини моя даст ему в то серебро с Юрьевы слободы пятьдесят руб., а с Суходола полпятадесять руб., а с Смоляных 9 руб., а с Скирменовские слободки 9 руб. А князь Андрей возмет с Можаиска и со всех волостий Можаиских сто руб. и семдесят руб. без трех, а с отъездных мест семдесят руб. без дву, и княгини моя даст ему в то серебро дватцять руб. и полтретья руб. с Вереи, а с Числова полосма руб., а с Заячкова дватцять руб. и два, с Холхла десять руб., с Желесковы 9 руб., с Исконьские слободки полсема руб., с Кропивны полсема руб. А князь Петр возмет с своего удела сто руб. и одиннатцять, и княгини моя даст ему в то серебро с Ижва тритцять руб. А князь Иван даст князю Василью с Сохны пять руб., а с Раменеиця даст князю Петру пять руб. А то возмут в тысячю руб., а будет бoле или менши, ино по тому розочту.
А переменит Бог Орду, дети мои не имут давати выхода в Орду, и который сын мой возмет дань на своем уделе, то тому и есть. А что есм подавал своей княгине волости и села из уделов детий своих, и свой примысл, и слободы, и села, и Холхол, и Заячков, а с тех волостий, и с слобод, и с сел что возмет княгини моя, то ей и есть. А дети мои в то не вступаются.
А из тех волостий, и слобод, и сел, что есм вымал у детий своих из уделов, а подавал княгине своей, а кому будет жалоба сиротам на волостели, и тем людем учинит исправу княгини моя. А дети мои в то не вступаются.
А что есм дал сыну своему, князю Андрею, Заберегу, за тo дети мои вси дают оброк святому Спасу пятьнатцять руб. на год на Спасов день.
А се благословляю детий своих. Сыну моему старишему, князю Василью: икона Парамшина дела, чепь золота, что ми дала княгини Василиса, пояс золот велики с каменьем без ремени, пояс золот с ременем Макарова дела, бармы, шапка золота.
А сыну моему, князю Юрью: пояс золот новый с каменьем с жомчюгом без ремени, пояс золот Шышкина дела, вотола сажена.
А сыну моему, князю Андрею: снасть золота, пояс золот старый новгородский.
А сыну моему, князю Петру: пояс золот с каменьем пегий, пояс золот с калитою да с тузлуки, да наплечки, да алам.
А сыну моему, князю Ивану: пояс золот татаур, да два ковша золоты по две гривенки.
А что ся останет золото, или серебро, или иное что но есть, то все моей княгине.
А что ся останет стад моих, тем моя княгини поделится с моими детми по частем.
А хто будет моих казначеев, или хтo будет моих дьяков прибыток мой от мене ведал, или посельских, или тиунов, или хто женился у тех, те все не надобе моей княгине и моим детем.
А приказал есм свои дети своей княгине. А вы, дети мои, слушайте своее матери во всем, из ее воли не выступайтеся ни в чем. А который сын мой не имет слушати свое матери, а будет не в ее воли, на том не будет моего благословенья.
А дети мои молодшая, братья княжы Васильевы, чтите и слушайте своего брата старишего, князя Василья, в мое место, своего отця. А сын мой, князь Василий, держит своего брата, князя Юрья, и свою братью молодшюю в братьстве, без обиды.
А хто моих бояр имет служити моей княгине, тех бояр, дети мои, блюдите с одиного.
А хто сю грамоту мою порушит, судит ему Бог, а не будет на нем милости Божий, ни моего благословенья ни в сии век, ни в будущий.
А писал есм сю грамоту перед своими отци: перед игуменом перед Сергием, перед игуменом перед Савастьяном.
А тутo были бояре наши: Дмитрий Михайлович, Тимофей Васильевич, Иван Родивонович, Семен Васильевич, Иван Федорович, Олександр Андреевич, Федор Андреевич, Федор Андреевич, Иван Федорович, Иван Андреевич.
А писал Внук.
На лицевой стороне грамоты привешена серебряная позолоченая печать великого князя Дмитрия Ивановича.
Духовная грамота великого князя Василия II Васильевича
Мая 1461 г. – 27 марта 1462 г.
Основной текст
Во имя святыя и живоначалные Троици, Отца и Сына и Святаго Духа, и пo благословленью отца нашего Феодосиа, митрополита всея Руси, се яз, многогрешный худый раб Божий Василий, при своем животе, в своем смысле, пишу сю грамоту душевную. Даю ряд своим детям и своей княгине.
Приказываю свои дети своей княгине. А вы, мои дети, живите заодин, а матери своей слушайте во всем, в мое место, своего отца.
А сына своего старейшего Ивана благословляю своею отчиною, великим княженьем. А даю ему треть в Москве и с путми, с моими жеребьи, чем мя благословил отец мой, и Добрятинским селом с бортью, и Василцовым стом, и числеными людми, и ординци, и Коломною с волостьми, и с путми, и с селы, и со всеми пошлинами, Володимерем с волостми, и с путми, и с селы, и со всеми пошлинами, Переяславлем с волостми, и с путми, и с селы, и со всеми пошлинами, Кострома с волостьми, и с путми, и с селы, и со всеми пошлинами, Галич с волостьми, и с путми, и с селы, и с Солью, и со всеми пошлинами, Устюг с волостьми, и с путми, и с селы, и сo всеми пошлинами. Да даю своему сыну Ивану землю Вятьскую. Да даю ему Суздаль с волостьми, и с путми, и с селы, и со всеми пошлинами, да Новгород Нижний со всеми пошлинами, и с волостьми, и с путми, и с селы, Муромом с волостьми, и с путми, и с селы, и со всеми пошлинами, Юрьевом, и с Великою Солью, и со всеми пошлинами. Да даю своему сыну Ивану Боровеск со всеми волостьми, и с путми, и с селы, и со всеми пошлинами, как было за князем за Васильем, и Суходол с-Ыстьею, и с-Ыстервою, и с Красным селом, да Колугу, и с Олексиным, и с волостми, и с путми, и с селы, и со всеми пошлинами, как было за князем за Иваном за можайским. А из Московских сел даю своему сыну Ивану село Островское, и с Орининским, и с Костянтиновским, и с Молаховским, и с деревнями, и что к тем селом потягло, да село Красное над Великим прудом у города, и с дворы с городскими, что к нему потягло, да луг болшей, у города по реце по Москве.
А сына своего Юрья благословляю третью в Москве княжею Володимеровскою, с сыном свoим с Ондреем по половинам, а держати по годом. Да Юрью же сыну придаю год в Москве княжь Костянтиновской Дмитреевича. Да сыну же своему Юрью даю Дмитров со всеми волостьми, и с путми, и с селы, и со всеми пошлинами, и с Замосковскими волостьми, и со всем с тем, как было за князем за Петром. Да ему же даю Юлку и с Юлотцькими бортники, и что к Юлке потягло, да Серебожь, да Бускутово, да Рожественое, и со всем с тем, что к тем волостем потягло. Да даю сыну же своему Юрью Можаеск с волостьми, и с путми, и с селы, и со всеми пошлинами, и с Медынью, и что к Медыни потягло, да Серпохов, да Хотунь сo всеми пошлинами. А чем его благословила моя мати, великая княгини Софья, его баба, и в душевной ему в своей написала, Семчинским селцом у Москвы, и с дворы с городскими, и с Самсоновым лугом, да Кжелею, да и своим прикупом селцом Воробьевским, и с Семеновским, и с деревнями, да на Похре селом Мячковым, и с Фаустовским, и с Лодыгиным, и с Федоровым Левонтьева, и с Тяжыным, и с рыболовлими деревнями, а из Коломеньских сел Велина, Кривцово, Бронниче, Чевырево, Марчюково, да Рожек, да починок у Щелина озера, а из Юрьевских сел Турабьевские села все, да Кучка, да Деревенка, да Шадрино, ино то его и есть. Да к тем селом к Турабьевским придал есмь ему свое село Шипиловское со всем. А на Костроме дала ему его баба село Качаловское, да Ушаковское, да Святое село, а на Вологде Масленские села, да Янгосарские, да Говоровские села, и что к ним потягло, ино то его и есть. А восхочет мой сын Иван у своего брата у Юрья выменити Коломеньские села, и сын мой Юрьи те села ему променит, а Иван сын выменит у своего брата те села, а егo не изобидит.
А сына своего Ондрея благословляю, даю ему с старешим его братом с Юрьем треть в Москве княжу Володимерову по половинам а держали по годом. Да даю ему Углече со всеми волостьми, и с путми и с селы, и со всеми пошлинами, и с Устюжною, и с Рожаловым и с Велетовым, и с Кистьмою, и со всем с тем, как было за князем за Дмитреем за Шемякою. Да даю ему Бежытцки Верх, и с волостьми и с путми, и с селы и со всеми пошлинами, да Звенигород с волостми и с путми, и с селы, и со всеми пошлинами, а у Москвы село Сущевъское и с дворы с городскими, что к нему потягли. А чем его благословила баба его Вышелесом, ино то его и есть.
А сына своего Бориса благословляю в Москве столом княжим Ивановым можайского, да в городе на посаде дворы около святого Егорья, каменые церкви, Марьиньские Федоровы. Да даю ему Ржеву с волостьми, и с путми, и с селы, и с бортью, и сo всеми пошлинами. Да даю ему Волок с волостьми, и с путми, и с селы, и со всеми пошлинами, да Рузу с волостьми, и с путми, и с селы, и с пошлинами. А что его благословила моя мати, великая княгини Софья, а его баба, на Волоце Белеутовскими селы, Спасским селом и с деревнями, да на Издетемле Окорокавскими селы, ино то ему и есть. А что ему дала Марья Федорова Голтяева на Коломне села Проскурниковские да Веденьские и с деревнями, и на Городне деревня и на Москве за Похрою Розсудовские села, Зверевское, и Борановское, и иные селца, и с деревнями, и с пустошми, и в Володимере Симизинские села, и Лазарьское, и Котязино, и что к тем селом потягло, как было за Марьею, да у города у Володимеря Евнутьевское село, да на Костроме на Волзе Нижняя слобода со всеми деревнями, да Базеевское, да Мануиловское и с деревнями, да на Вологде Турандаевское, да Понизовное, да Кобылинские села, да Горка, да на Шоме деревни, да у Москвы село Шарапово с деревнями, да Лошаково с деревнями, да луг на реце на Москве под Крутицею, да в Берендееве село Ростовцовское с деревнями, да в Кинеле Суровцово, да Тимофеевское, да Микульское, ино тo его и есть. Да что ему дала Марья же двор свой внутри города на Москве, ино то его и есть.
А сына своего Андрея Меншого благословляю в Москве годом княжим Петровым Дмитреевича, да у Москвы село Таниньское со всем, да Ясеневское со всем, да Раменеицо со всем. Да даю ему Вологду, и с Кубеною, и с Заозерьем, со всем, и что к Вологде, и к Кубене, и к Заозерью потягло, и с пошлинами, да Иледам с Обнорою, и с Комелою, и с Волочком, да Авнегу, да Шиленгу, да Пельшму, да Бохтюгу, да Ухтюшку, да Сяму, и Отводное с Перфушковскими селы, да Тошну, да Янгосар, и со всем, что к тем волостем потягло.
А княгине своей даю Ростов и со всем, что к нему потягло, и с селы своими, до ее живота. А князи ростовские что ведали при мне, при великом князи, ини по тому и держат и при моей княгине, а княгини моя у них в то не вступается. А возмет Бог мою княгиню, и княгини моя даст Ростов моему сыну Юрью, а oн держит по тому же, как держала его мати, что князи ведали свое, ине по тому ж держат. А что ее купля городок Романов княжо Михайлово Деева, и княжых Лвовых детей, и княже Давыдово Засекина, и Усть-Шокстны, что собе купила у князя у Семена и у князя у Василья у Шохонских, ино то ее и есть, в то ся дети мои у нее не вступают. А что были волости Заволские и по реце по Шокстне, княжы Ивановы можайского, и села его и езы, и те есмь все волости, и села, и деревни тех сел, и езы дал есмь своей княгине, и с Петровскими селы Костянтиновича, да Усть-Углы со всем и сь езы. Да даю своей княгине Нерехту с варницами и со всеми пошлинами. А из Московских сел даю своей княгине Напрудское у города, и с дворы с городскими, что к нему потягло, да мелницю Ходыньскую с лугом с Ходынским, да опосле княгинина живота Василисина, Ногатиньское моей княгини, и с дворы, и со всем, что к нему потягло, да Новинки. Да даю своей княгине Озерецьские села и с деревнями, да Михалевское и с деревнями, да Олешню и с деревнями. А чтo есмь у своее княгини взял село Селивановское в Медушах да дал к святой Троице, и яз в то место даю своей княгине села свои Лужские и Павшинское, да деревни Петровские Костянтинова на Истре. А из удела сына своего Иванова, из Коломны, даю своей княгине волостей Городок, Брашову, и с сельцом и с Гвоздною и с-Ыванем, да Усть-Мерску, да Песочну, да Малинские села. Да даю своей княгине село Серкизовское и с Мезынкою, и со всеми селци и с деревнями, да село Высокое и с деревнями и с бортью, да село Шкинь и с деревнями, и с Федоровским селцом Степанова сына, и с Свербеевским, с куплею своею, да село Лысцовское и с деревнями, да Бабышово у города у Коломны, что ей дала моя мати, великая княгини, и с дворы с городскими, что к нему потягло, да село Чюхистово, что ей дал Михайло Федорович Сабуров, со всем, что к нему потягло. А в Переславле даю своей княгине село Рюминское с дворы с городскими, да Маринину слободу, да село Доброе и с дворы с городскими, которые дворы тянули к путнику. А в Юрьеве даю своей княгине село Фроловское с Елхом, да Красное село, да Курчево, да Елци, да Варварино, да Кузмедемьянское, да Голенищово, да Добрыньское, да Волъстиново, да Сорогошино, да Петровские Костянтинова, Матфеищово, да Ворогово, и с иными селци. А в Суздале даю своей княгине Шокшов да Давыдовское. А на Костроме даю ей Михайловские села Даниловы со всем, что к ним потяглo. А что ей дал Михайло Сабуров Колдомские села, ино то ее и есть. А на Устюзе даю своей княгине к ее купле к Левонтьевскому, да к Пятницскому, да к Вондокурье свои села, село Мошемское и с деревнями и с присельи, да Дымкову сторону и с деревнями и с присельи. А у сына своего у Ондрея у Болшого из удела даю своей княгине Елду, да Кадку, да Василково с деревнями. А у сына своего у Бориса из удела даю своей княгине Издетемлю, да Июдину слободу, да Ядрово, да во Ржеве село Ондреевское. А у сына своего у Андрея у Меншово даю своей княгине из его удела Иледам с Комелою и с Обнорою. А возмет Бог мою княгиню, а у которого сына в уделе волости и села, что есмь ей подавал, ино тому то и есть, опроче ее купель. А что ее купли, Романов городок, и Шокстна, и иные волости и села, в которых городех ни буди, в том воля моя княгини, опосле своего живота которому своему сыну восхочет дати, ина тому даст.
А чтo моя тамга московская, и яз даю своему сыну Ивану треть тамги и со всеми пошлинами, а другую треть, княжу Володимерову, сыну своему Юрью да Ондрею Болшому по половинам, а третью треть даю сыну своему Борису да Ондрею Меншому по половинам. А ис тех изо всех трех третей дал есмь своей княгине половину тамги и всех пошлин до ее живота, а по ее животе ина отдаст им их жеребьи по сей духовной грамоте, как им написано.
Да даю своей княгине из Новагорода из Нижнего половину пошлин своих всех, как было за моею матерью, за великою княгинею, да и села, которые были за моею матерью, за великою княгинею, и со всеми пошлинами, и что к ним потягло, и с Соколовским селом, и с Керженцом. А из Мурома даю своей княгине селцо Муромское да Шатур, и в то дети мои не вступаются.
А как пoчнут дети мои жити по своим уделом, и моя княгини, и мой сын Иван, и мой сын Юрьи, и мои дети пошлют писцев, да уделы свои писци их опишут по крестному целованью, да по тому письму и обложат по сохам и по людем, да по тому окладу моя княгини и мои дети и в выход учнут давати сыну моему Ивану с своих уделов. А переменит Бог Орду, и моя княгини и мои дети возмут дань собе с своих уделов, а сын мой Иван в то не вступается.
А где есмь ни подавал своей княгине волости и села в уделех детей своих, во чьем ни буди, и те волости и села данью и судом потянут к моей княгине, а дети мои в то не вступаются. А волостелей своих, и поселских, и тиунов, и ключников, и доводшиков судит моя княгини.
А которые есмь детем свои села подавал во чьем уделе ни буди, ино того и суд над теми селы, кому дано.
А кoму буду давал своим князем, и бояром, и детем боярьским свои села в жалованье, или хотя и в куплю кому дал, ино те мои села моим детем, во чьем уделе будет, ино тому то и есть.
А по грехом, у которого у моего сына вотчины отоимется, и княгини моя уимет у своих сынов изь их уделов, да тому вотчину исполнит, а дети мои из ее воли не вымутся.
А сына своего Ивана благословляю крест Петров чюдотворцов, да крест золот Парамшиньской, да шапка, да бармы, да сердоличная коробка, да пояс золот болшой с каменьем.
А сына своего Юрья благословляю икона Филафеевская да крест золот, что мя благословила моя мати, великая княгини, да пояс золот на червьчате ремени.
А сына своего Андрея Болшово - крест золот, княж Дмитреевской Меншего, с чепечкою.
А сына своего Бориса благословляю крест золот, что мя благословила моя мати, великая княгини, коли есмь шoл к своей отчине, к Великому Новугороду.
А сына своего Андрея Меншого благословляю икона золота на изумруте.
А приказываю свою княгиню, и своего сына Ивана, и Юрья, и свои меншие дети брату своему, королю польскому и великому князю литовскому Казимиру, по докончалной нашей грамоте, на бозе и на нем, на моем брате, как ся учнет печаловати моею княгинею, и моим сыном Иваном, и моими детми.
А дети свои приказал есмь своей княгине. А вы, дети мои, слушайте своее матери во всем, и из ее воли не выступайте ни в чем. А который сын мой не имет слушати своее матери, а будет не в ее воле, на том не буди моего благословленья.
А вы, дети мои, чтите и слушайте своего брата старейшого Ивана в мое место, своего отца. А сын мой Иван держит своего брата Юрья и свою братью меншую в братстве, без обиды.
А хто моих бояр имет служити моей княгине, а живут в уделех детей моих, и тех бояр дети мoи блюдут с одинова.
А хто будет моих казначеев, или хто моих дьяков прибыток мой от мене ведали, или поселских, или тиунов, или хто женился у тех, ино те все не надобны моей княгине и моим детем.
А хто сю мою грамоту переступит, ино по Еуангильскому словеси, хто преслушается отца и матери, и заповеди их не хранит, смертью да умрет.
А у духовные сидели: отец мой духовный, архимандрит спасьский Трифон, да симановский архимандрит Афонасей, да мои бояре, князь Иван Юрьевич, да Иван Иванович, да Василей Иванович, да Федор Васильевич.
А грамоту сю писал дьяк мoй Василей Беда.
Внизу подпись: Смиреный Феодосий, архиепископ всея Русии.
На лицевой стороне грамоты следы от прикрепления двух печатей: великого князя Василия Васильевича и митрополита Феодосия.