Во 2-й день
И́же во святы́х отца́ на́шего Афана́сия, Патриа́рха Константинопо́льскаго, Лубе́нскаго чудотво́рца
НА МА́ЛОЙ ВЕЧЕ́РНИ
На Го́споди, воззва́х: стихи́ры, глас 1:
Наста́, Богоно́се, со́лнца светле́йший твой пра́здник,/ в не́мже ра́достию озаря́ются приходя́щий к тебе́ с ве́рою/ и благода́тию облагоуха́ются,/ здра́вие душ и теле́с прие́млюще,/ святи́телю Афана́сие,/ моли́твенниче о душа́х на́ших.
В зе́млю кро́тких ты всели́лся еси́, святи́телю,/ кро́ток и незло́бив быв в житии́ твое́м,/ весь укра́шен смиренному́дрием/ и све́том доброде́телей преоде́ян.
Зри́ши Бо́жия и а́нгельския све́тлости,/ со́нмы патриа́рх и му́ченик/ и ли́ки апо́стольския,/ моли́ у́бо с ни́ми Человеколю́бца/ оставле́ние грехо́в и жития́ исправле́ние/ дарова́ти нам, святи́телю, хва́лящим тя.
Све́тлостию твое́ю украси́л еси́ престо́л Царягра́да, святи́телю,/ в не́мже пожи́в, я́ко А́нгел,/ ста́до твое́ му́дре упа́сл еси́,/ во и́стинней ве́ре сие́ утверди́в.
Сла́ва, глас 4:
Изба́ви чту́щия тя, святи́телю Афана́сие,/ от грехо́вныя бу́ри,/ от бед и скорбе́й,/ к ти́хому приста́нищу приводя́/ благоприя́тными твои́ми моли́твами.
И ны́не, пра́здника или́ Богоро́дичен, глас то́йже:
Изба́ви нас от нужд на́ших,/ Ма́ти Христа́ Бо́га,/ ро́ждшая всех Творца́,/ да вси зове́м Ти:/ ра́дуйся, еди́но предста́тельство душ на́ших.
На стихо́вне стихи́ры, глас 2. Подо́бен: До́ме Евфра́фов:
Бо́жиим смотре́нием произбра́н быв,/ святи́тель показа́лся еси́,/ безкро́вныя же́ртвы Бо́гу принося́,/ поже́ршемуся нас ра́ди,/ о́тче святи́телю Афана́сие.
Стих: Честна́ пред Го́сподем/ смерть преподо́бных Его́.
Воплоще́нно Сло́во благовествова́л еси́/ и лю́ди от ра́бства греху́ спасл еси́,/ отгоня́я ага́рянская нече́стия,/ о́тче святи́телю Афана́сие,/ прему́дре и Богоно́се.
Стих: Что возда́м Го́сподеви о всех,/ я́же воздаде́ ми?
Гроб, иде́же пребыва́ет честно́е те́ло твое́,/ благово́ние источа́ет,/ я́ко рая́ Бо́жия цвет,/ благоуха́я ве́рныя,/ святи́телю пресла́вне и всече́стне Афана́сие.
Сла́ва, глас 8:
Христу́ яви́лся еси́ уго́дник,/ святи́телю Афана́сие,/ не преста́й моля́ся ко Го́споду,/ да изба́вится ста́до твое́/ от искуше́ний, и бед, и скорбе́й.
И ны́не, пра́здника или Богоро́дичен, глас то́йже:
Влады́чице, приими́ моли́твы раб Твои́х/ и изба́ви нас/ от вся́кия ну́жды и печа́ли.
Тропа́рь пи́сан на вели́цей вече́рни.
НА ВЕЛИ́ЦЕЙ ВЕЧЕ́РНИ
На Го́споди, воззва́х: стихи́ры, глас 6:
Освяще́н быв Боже́ственною благода́тию,/ Богоно́сец показа́лся еси́,/ пома́зание Бо́жие свято́е;/ све́тло входя́ вы́ну во Свята́я святы́х,/ богонача́льными светлостьми́ озаря́емь,/ Боже́ственных Та́ин причаща́яся,/ я́ко и́стинный святи́тель пресла́вен яви́лся еси́/ и ны́не со дерзнове́нием мо́лишися о душа́х на́ших.
Просвети́ся житие́ твое́ светлостьми́ доброде́телей твои́х,/ и́миже ве́рныя озари́л еси́/ и тьму злове́рия разгна́л еси́,/ те́мже и́стинное яви́лся еси́ светоза́рное со́лнце,/ святи́телю преблаже́нне Афана́сие,/ и ны́не всели́лся еси́, иде́же сия́ет Свет невече́рний./ Днесь светоно́сную па́мять твою́ че́стно соверша́юще, приснопа́мятне,/ любо́вию тя почита́ем.
Ум твой стремле́нием к Бо́гу просвети́в,/ све́тел яви́лся еси́, всесла́вне:/ в ме́ртвенней и тле́ннем телеси́, я́ко безпло́тен, пожи́в,/ притяжа́л еси́ безпло́тных све́тлости/ и, страсте́й вне быв,/ безстра́стием украси́лся еси́, Афана́сие,/ о́тче святи́телю прему́дре,/ све́тлый свети́льниче/ и моли́твенниче о чту́щих любо́вию па́мять твою́.
Пра́отцу Иа́кову, изше́дшему в Харра́н, подража́я/ изше́л еси́, святи́телю, от восто́ка в Росси́йскую страну́,/ да стя́жеши обнища́вшим святы́м место́м благопотре́бная;/ те́мже, ви́дя любо́вь твою́ ко святы́ни,/ освяти́ тя Госпо́дь нетле́нием телесе́ твоего́/ и да́ром чудотворе́ний обогати́./ Ны́не у́бо прославля́ем тя, с ве́рою вопию́ще:/ ра́дуйся, о́тче, просвеще́ние душ на́ших.
Сла́ва, глас то́йже:
Возсия́ днесь пресве́тлая па́мять твоя́,/ пресла́вне Афана́сие,/ созыва́ющи многочи́сленное по́стник сосло́вие,/ и и́ноков ликостоя́ния,/ и ве́рных люде́й собра́ния/ к похвале́нию в Тро́ице покланя́емаго Еди́наго Бо́га на́шего./ Ны́не, притека́ющее ко свяще́нней ра́це моще́й твои́х,/ исцеле́ния да́ры оби́льно прие́млем/ и тебе́ венча́вшаго Христа́ прославля́ем,/ Спа́са душ на́ших.
И ны́не, пра́здника или Богоро́дичен:
Кто Тебе́ не ублажи́т, Пресвята́я Де́во? / Кто ли не воспое́т Твоего́ Пречи́стаго Рождества́? / Безле́тно бо от Отца́ Возсия́вый Сын Единоро́дный, / То́йже от Тебе́, Чи́стыя, про́йде, / неизрече́нно вопло́щься, / естество́м Бог сый, / и естество́м быв Челове́к нас ра́ди, / не во двою́ лицу́ Разделя́емый, / но во Двою́ Естеству́ несли́тно Познава́емый. / Того́ моли́, Чи́стая, Всеблаже́нная, / поми́ловатися душа́м на́шим.
Вход. Проки́мен дне. И чте́ния 3 святи́тельская.
При́тчей чте́ние (главы́ 10 и 8):
Па́мять пра́веднаго с похвала́ми,/ и благослове́ние Госпо́дне на главе́ его́./ Блаже́н челове́к, и́же обре́те прему́дрость,/ и сме́ртен, и́же уве́де ра́зум./ Лу́чше бо сию́ купова́ти, не́жели зла́та и сребра́ сокро́вища./ Честне́йшая же есть ка́мений многоце́нных,/ все же честно́е недосто́йно ея́ есть./ Долгота́ бо дней и ле́та живота́ в десни́це ея́,/ в шу́йце же ея́ бога́тство и сла́ва,/ от уст ея́ исхо́дит пра́вда,/ зако́н же и ми́лость на язы́це но́сит./ Послу́шайте у́бо мене́, о ча́да!/ честна́я бо реку́,/ и блаже́н челове́к, и́же пути́ моя́ сохрани́т, исхо́ди бо мои́ исхо́ди живота́/ и уготовля́ется хоте́ние от Го́спода./ Сего́ ра́ди молю́ вас/ и предлагаю́ мой глас сыново́м челове́ческим,/ я́ко аз, прему́дрость, устро́их сове́т,/ и ра́зум, и смысл аз призва́х./ Мой сове́т и утвержде́ние,/ мой ра́зум, моя́ же кре́пость./ Аз мене́ лю́бящия люблю́,/ и́щущии же мене́ обря́щут благода́ть./ Разуме́йте убо, незло́бивии, кова́рство,/ ненака́заннии же, прилага́йте сердца́./ Послу́шайте мене́ и па́ки,/ честна́я бо реку́, и отве́рзу от усте́н пра́вая,/ я́ко и́стине поучи́тся горта́нь мой,/ ме́рзки же предо мно́ю устны́ лжи́выя./ С пра́вдою вси глаго́лы уст мои́х,/ ничто́же в них стро́потно, ниже́ развраще́нно./ Вся пра́ва суть разумева́ющим/ и про́ста обрета́ющим ра́зум./ Науча́ю бо вас и́стине,/ да бу́дет о Го́споде наде́жда ва́ша,/ и испо́лнитеся Ду́ха.
При́тчей чте́ние (главы́ 10 и 11):
Уста́ пра́веднаго ка́плют прему́дрость,/ язы́к же непра́веднаго поги́бнет./ Устне́ муже́й пра́ведных ка́плют благода́ти,/ уста́ же нечести́вых развраща́ются./ Ме́рила льсти́вая ме́рзость пред Го́сподем,/ вес же пра́веден прия́тен Ему́./ Иде́же а́ще вни́дет досажде́ние, та́мо и безче́стие,/ уста́ же смире́нных поуча́ются прему́дрости./ Соверше́ние пра́вых наста́вит их,/ и поползнове́ние отрица́ющихся упасе́т их./ Не по́льзуют име́ния в день я́рости,/ пра́вда же изба́вит от сме́рти./ У́мер пра́ведный, оста́ви раска́яние,/ нару́чна же быва́ет и посмея́тельна нечести́вых па́губа./ Пра́вда непоро́чнаго исправля́ет пути́,/ в нече́стие же па́дает непра́вда./ Пра́вда муже́й пра́вых изба́вит их,/ безсове́тием же пленя́ются беззако́ннии./ Сконча́вшуся му́жу пра́ведну,/ не поги́бнет наде́жда,/ похвала́ же нечести́вых поги́бнет./ Пра́ведник от ло́ва убе́гнет,/ в него́же ме́сто предае́тся нечести́вый./ Во усте́х нечести́вых сеть гра́жданом,/ чу́вство же пра́ведных благоспе́шное./ Во благи́х пра́ведных испра́вится град,/ и в поги́бели нечести́вых ра́дование./ Во благослове́нии пра́вых возвы́сится град,/ усты́ же нечести́вых раскопа́ется./ Руга́ется гра́жданом лише́нный ра́зума,/ муж же му́дрый безмо́лвие во́дит.
Прему́дрости Соломо́ни чте́ние (глава́ 4):
Пра́ведник а́ще пости́гнет сконча́тися, в поко́и бу́дет./ Ста́рость бо честна́ не многоле́тна,/ ниже́ в числе́ лет исчита́ется./ Седи́на же есть му́дрость челове́ком,/ и во́зраст ста́рости житие́ нескве́рное./ Благоуго́ден Бо́гов и быв, возлю́блен бысть/ и живы́й посреде́ гре́шник преста́влен бысть,/ восхище́н бысть, да не зло́ба измени́т ра́зума его́/ или́ лесть прельсти́т ду́шу его́./ Раче́ние бо зло́бы помрача́ет до́брая/ и паре́ние по́хоти пременя́ет ум незло́бив./ Сконча́вся вма́ле, испо́лни ле́та до́лга,/ уго́дна бо бе Го́сподеви душа́ его́,/ сего́ ра́ди потща́ся от среды́ лука́вствия./ Лю́дие же ви́девше, и не разуме́вше,/ ниже́ поло́жше в помышле́нии таково́е,/ я́ко благода́ть и ми́лость в преподо́бных Его́,/ и посеще́ние во избра́нных Его́.
На лити́и стихи́ры, глас 1:
Безсме́ртию быв тезоимени́т,/ в ве́ре тве́рдей житие́ твое́ проше́д,/ блаже́ннаго безсме́ртия прича́стник яви́лся еси́,/ о́тче святи́телю Афана́сие,/ ны́не Христо́ви предстоя́,/ помина́й нас, почита́ющих тя.
Очи́стив от вся́кия скве́рны ду́шу и те́ло,/ святи́телю Афана́сие,/ храм досто́ин Бо́гу показа́лся еси́/ и Тро́ицы жили́ще яви́лся еси́,/ священнотаи́нниче и моли́твенниче о душа́х на́ших.
С Вы́шними ли́ки я́ко святи́тель/ и я́ко Бо́жий служи́тель предстоя́,/ о нас приле́жно моли́ся,/ спасти́ся душа́м на́шим, свя́те,/ моли́твами твои́ми.
Сла́ва, глас 4:
Сла́ву твою́ воспе́ти по досто́инству невозмо́жно есть:/ чудеса́ бо мно́га соверша́еши/ и исцеле́ния незави́стно источа́еши/ с ве́рою приходя́щим к тебе́, Афана́сие, Росси́йская похвало́./ Те́мже я́ко уго́дника Бо́жия вси тя велича́ем.
И ны́не, пра́здника или́ Богоро́дичен:
При́зри на моле́ния Твои́х раб, Всенепоро́чная,/ утоля́ющи лю́тая на ны воста́ния,/ вся́кия ско́рби нас изменя́ющи:/ Тя бо Еди́ну, тве́рдое и изве́стное утвержде́ние, и́мамы/ и Твое́ предста́тельство стяжа́хом,/ да не постыди́мся, Влады́чице,/ Тя призыва́ющий./ Потщи́ся на умоле́ние Тебе́ ве́рно вопию́щих:/ ра́дуйся, Влады́чице,/ всех по́моще, ра́досте и покро́ве,/ и спасе́ние душ на́ших.
На стихо́вне стихи́ры, глас 8:
Святи́телю Афана́сие,/ разу́мнаго света́ заре́,/ церко́вное свети́ло, святи́тельская похвало́,/ монаше́скаго по́стнаго жития́ честно́е пра́вило,/ ты яви́лся еси́ нам засту́пник пред Го́сподем,/ свобожда́я от бед и скорбе́й ду́ши на́ша.
Стих: Честна́ пред Го́сподем/ смерть преподо́бных Его́.
Святи́телю Афана́сие,/ вели́кую власть от Бо́га прие́м,/ мно́жество лука́вых бесо́в моли́твою твое́ю отгоня́еши/ и в лю́тых обстоя́ниих заступа́еши вся,/ с ве́рою к тебе́ притека́ющия.
Стих: Что возда́м Го́сподеви о всех,/ я́же воздаде́ ми?
Святи́теля вели́каго Афана́сия/ ка́ко досто́йно воспое́м,/ свети́льника всесве́тлаго,/ освеща́ющаго нас и Боже́ственный ра́зум подаю́щаго,/ та́ин Богосло́вия испове́дателя?/ Те́мже согла́сно возопии́м:/ ра́дуйся, о́тче отце́в Афана́сие.
Сла́ва, глас то́йже:
Ты еси́ па́стырь до́брый и учи́тель му́дрый,/ святи́телю Афана́сие:/ тобою́ Бог украси ́ Це́рковь Свою́,/ и те́ло твое́, девятоле́тно в земли́ сокрове́нное,/ нетле́нно яви́ лю́дем Свои́м./ Те́мже, всегда́ похваля́юще тя, вопие́м:/ не преста́й моля́ся о чту́щих па́мять твою́,/ дарова́ти оставле́ние грехо́в и спасе́ние душа́м на́шим.
И ны́не, пра́здника или́ Богоро́дичен: Безневе́стная Де́во, / Я́же Бо́га неизрече́нно заче́нши пло́тию, / Ма́ти Бо́га Вы́шняго, / Твои́х рабо́в мольбы́ приими́, Всенепоро́чная, / всем подаю́щи очище́ние прегреше́ний: / ны́не на́ша моле́ния прие́млющи, / моли́ спасти́ся всем нам.
На благослове́нии хле́бов тропа́рь, глас 8:
Прему́дростию уче́ний твои́х ца́рствующий град просвети́в,/ тьму неве́дения ерети́ческаго разгна́л еси́, преблаже́нне;/ твое́ благослове́ние земли́ Росси́йстей прине́сл еси́,/ о́тче наш, святи́телю Афана́сие,/ иде́же сконча́в тече́ние твое́,/ на кри́лех чистоты́ возлете́л еси́ в Небе́сное Ца́рство./ Моли́ Христа́ Бо́га непреста́нно о душа́х на́ших.
Сла́ва, и ны́не, пра́здника или́ Богоро́дичен.
НА У́ТРЕНИ
На Бог Госпо́дь: тропа́рь пра́здника два́жды. Сла́ва, свята́го. И ны́не, пра́здника или Богоро́дичен.
По 1-м стихосло́вии седа́лен, глас 1:
Служи́тель быв Христу́, Влады́це вся́ческих,/ просвети́л еси́ лю́ди све́том Христо́вым/ к разуме́нию Боже́ственных писа́ний наста́вил еси́, святи́телю,/ те́мже пропове́дника тя и́стины в си имену́ем,/ па́стыря и моли́твенника о душа́х на́ших.
Сла́ва, и ны́не, Богоро́дичен:
Безневе́стная Чи́стая Бого́родице Де́во,/ Еди́на Предста́тельнице ве́рных и покро́ве,/ от бед, и скорбе́й, и лю́тых обстоя́ний изба́ви всех, на Тя упова́ние иму́щих, Отрокови́це,/ и ду́ши на́ша спаси́ Твои́м заступле́нием.
По 2-м стихосло́вии седа́лен, глас 4:
От ю́ности взем крест твой, неукло́нно Христу́ после́довал еси́,/ вся́кое плотско́е мудрова́ние возненави́дев,/ те́мже благода́ть святи́тельства восприи́м,/ Це́рковь Христо́ву па́стырскими доброде́тельми украси́л еси́,/ о́тче Афана́сие Богому́дре.
Сла́ва, и ны́не, Богоро́дичен:
Де́во Всенепоро́чная, Пресу́щнаго Бо́га ро́ждшая,/ со святи́телем Того́ непреста́нно моли́/ оставле́ние прегреше́ний и исправле́ние жития́ да́ти нам,/ ве́рою и любо́вию пою́щим Тя, Еди́на Всепе́тая.
Велича́ние и псало́м избра́нный святи́телю.
По полиеле́и седа́лен, глас 8:
Стра́сти плотски́я победи́в,/ святи́тель яви́лся еси́ Богоно́сен/ и па́ству твою́ пресла́вно упа́сл еси́, Афана́сие,/ Креще́нием же мно́гия лю́ди просвети́в,/ научи́л еси́ их сла́вити Еди́наго Бо́га в Трие́х Ипоста́сех,/ и ны́не, по кончи́не твое́й, источа́еши исцеле́ния с ве́рою приходя́щим к ра́це моще́й твои́х./ Моли́ у́бо Христа́ Бо́га оставле́ние согреше́ний дарова́ти/ чту́щим любо́вию святу́ю па́мять твою́.
Сла́ва, и ны́не, пра́здника или́ Богоро́дичен:
Небе́сную дверь и ковче́г,/ всесвяту́ю го́ру, све́тлый о́блак воспои́м,/ неопали́мую купину́, слове́сный рай, Е́вино свобожде́ние,/ вселе́нныя всея́ вели́кое сокро́вище,/ я́ко спасе́ние в нем соде́лася ми́ру и оставле́ние дре́вних согреше́ний./ Те́мже и вопие́м Ей:/ моли́ Христа́ Бо́га прегреше́ний оставле́ние дарова́ти/ благоче́стно покланя́ющимся пресвято́му рождеству́ Твоему́.
Степе́нна, 1-й антифо́н 4-го гла́са. Проки́мен, глас 7: Честна́ пред Го́сподем/ смерть преподо́бных Его́. Стих: Что возда́м Го́сподеви о всех, я́же воздаде́ ми? Вся́кое дыха́ние: Ева́нгелие от Иоа́нна, зача́ло 36.
По 50-м псалме́ стихи́ра, глас 6:
Насле́дниче Бо́жий,/ соприча́стниче Христо́в,/ служи́телю Госпо́день, свя́те Афана́сие,/ доброде́тели твоя́ я́вны бы́ша во о́бразе твое́м:/ спросия́ бо седи́не ра́зум,/ свидете́льствоваше све́тлость лица́ твоего́ о душе́внем незло́бии,/ сло́во бла́гостное и ми́рное изве́ствоваше о твое́й кро́тости,/ жизнь твоя́ сла́вна бысть,/ во успе́нии же твое́м со святы́ми всели́лся еси́./ Моли́ Христа́ Бо́га о душа́х на́ших.
Кано́н пра́здника со ирмосо́м на 6 и святи́теля на 8.
Кано́н святи́теля, глас 8.
Песнь 1
Ирмос: Во́ду проше́д, я́ко су́шу,/ и еги́петскаго зла избежа́в,/ изра́ильтянин вопия́ше:/ Изба́вителю и Бо́гу на́шему пои́м.
Безсме́ртию быв тезоимени́т,/ в ве́ре тве́рдей житие́ твое́ проше́д,/ блаже́ннаго безсме́ртия прича́стник яви́лся еси́, о́тче святи́телю Афана́сие,/ ны́не Христо́ви предстоя́, помина́й нас, почита́ющих тя.
Песнь хвале́бную прино́сим ти, святи́телю, в прославле́ние па́мяти твоея́,/ а́ще и не довле́ет ум наш по достоя́нию благохвали́ти тя,/ но ты сам помози́ нам почива́ющею на тебе́ неоску́дною благода́тию.
Очи́стив от вся́кия скве́рны ду́шу и те́ло, святи́телю Афана́сие,/ храм досто́ин Бо́гу показа́лся еси́/ и Тро́ицы жили́ще яви́лся еси́,/ священнотаи́нниче пребога́те.
Богоро́дичен: Храм освяще́н и ле́потою благоукраше́н воздви́же уго́дник Бо́жий Афана́сий/ во сла́ву Твою́ и честь, Пречи́стая Влады́чице,/ те́мже не преста́й моля́щися со святи́телем Христу́ Бо́гу о душа́х на́ших.
Песнь 3
Ирмо́с: Небе́снаго кру́га Верхотво́рче, Го́споди,/ и Це́ркве Зижди́телю,/ Ты мене́ утверди́ в любви́ Твое́й,/ жела́ний кра́ю, ве́рных утвержде́ние,/ Еди́не Человеколю́бче.
Све́том благода́ти вои́стинну просия́л еси́, святи́телю Афана́сие,/ и был еси́ священноде́латель Ева́нгелия Христо́ва.
Благода́тными словесы́ твои́ми напая́ема па́ства твоя́,/ го́рькости ересе́й отрица́ется.
До́бре упа́сл еси́ ста́до Влады́ки твоего́, о́тче Афана́сие,/ те́мже во оби́тели Небе́сныя всели́лся еси.
Богоро́дичен: Даждь нам по́мощь моли́твами Твои́ми,/ прило́ги отгоня́ющи лю́тых обстоя́ний, Де́во Всепе́тая.
Седа́лен, глас 4:
В пра́вей ве́ре Це́рковь Христо́ву упа́сл еси́, святи́телю Афана́сие,/ и ерети́чества исто́ргл еси́ го́рькия пле́велы./ Те́мже в Вы́шних черто́зех водворя́ешися, блаже́нне.
Сла́ва, и ны́не, Богоро́дичен:
Сло́во О́тчее, Христа́ Бо́га на́шего,/ от Тебе́ воплоти́вшагося, позна́хом, Богоро́дице Де́во,/ Еди́на Чи́стая, Еди́на Благослове́нная,/ тем, непреста́нно Тя воспева́юще, велича́ем.
Песнь 4
Ирмо́с: Услы́шах, Го́споди,/ смотре́ния Твоего́ та́инство,/ разуме́х дела́ Твоя́/ и просла́вих Твое́ Божество́.
Уста ́ богодухно́венная стяжа́в, святи́телю Афана́сие,/ обличи́л еси́ злы́я нра́вы лука́вых челове́к/ и, сконча́вся в непра́ведней изгна́нии, при Фаво́ре Мга́рстем,/ оста́вил еси́ нам, недосто́йным, честно́е те́ло твое́, точа́щее чудеса́.
Блаже́н яви́лся еси́,/ изгна́н пра́вды ра́ди, за́вистию злонра́вных челове́к,/ и нас посети́л еси́ твои́м благослове́нием./ Те́мже ны́не от всех почита́ешися свяще́нными пе́сньми,/ му́дре святи́телю Афана́сие.
Пе́рвее был еси́ архиере́й нача́льнаго гра́да Кри́тскаго,/ та́же, по взя́тии того́ от ага́рян, Патриа́рх Константи́ню гра́ду поста́влен был еси́,/ иде́же богодухнове́нными уче́нии ста́до твое́ напая́л еси́,/ блаже́нне святи́телю Афана́сие.
Богоро́дичен: Тя, Блаже́нную, Еди́ну избра́нную и непоро́чную обре́т,/ воплоща́ется Пребоже́ственное Сло́во, Богора́дованная.
Песнь 5
Ирмо́с: Просвети́ нас повеле́нии Твои́ми, Го́споди,/ и мы́шцею Твое́ю высо́кою/ Твой мир подаждь нам,/ Человеколю́бче.
Безсме́ртен по и́мени досто́йно наре́клся еси́, о́тче наш святи́телю Афана́сие,/ зане́, житие́ твое́ чи́сте соверши́в, во Христа́ обле́клся еси́,/ те́мже Царь Сла́вы и Бог ве́чный избра́ тя в жили́ще Себе́.
Изба́ви чту́щия тя, святи́телю Афана́сие,/ от грехо́вныя бу́ри, от бед и скорбе́й,/ к ти́хому приста́нищу приводя́ богоприя́тными твои́ми моли́твами.
До́брый па́стырь ста́да Христо́ва яви́лся еси́, уго́дниче святи́телю Афана́сие,/ не преста́й моля́ся ко Го́споду,/ да спасе́т ду́ши на́ша.
Богоро́дичен: Досто́йно Тя сла́вят святи́тельстии собо́ри и вси преподо́бных ли́цы:/ Зижди́теля бо всех, Бо́жие Сло́во, на руку́ Твое́ю носи́ла еси́.
Песнь 6
Ирмо́с: Моли́тву пролию́ ко Го́споду/ и Тому́ возвещу́ печа́ли моя́,/ я́ко зол душа́ моя́ испо́лнися/ и живо́т мой а́ду прибли́жися,/ и молю́ся, яко Ио́на:/ от тли, Бо́же, возведи́ мя.
Оби́тель сию́, с ве́рою почита́ющую тя, святи́телю Афана́сие,/ храни́ от находя́щих искуше́ний, лю́тых обстоя́ний и вся́ких скорбе́й,/ непреста́нно моля́ся ко Влады́це Христу́ о ста́де твое́м.
Ты и по сме́рти, я́ко жив сый, чудоде́йствуеши,/ да́руя немощны́м исцеле́ния Боже́ственною благода́тию,/ рече́ бо Госпо́дь:/ прославля́ющия Мя просла́влю.
Напа́стей о́блацы покры́ша ны, и теле́сныя боле́зни умно́жишася./ К тебе́ прибега́ем и тебе́ призыва́ем, святи́телю Афана́сие:/ потщи́ся на по́мощь, ускори́ на моли́твы,/ от бед и ско́рбных обстоя́ний нас избавля́я.
Богоро́дичен: Очи́стив свое́ се́рдце, Авраа́м, пра́отец Твой, Чи́стая Де́во,/ прия́т обеща́ние от Бо́га:/ благослови́тися о се́мени его́ всем язы́ком./ Тобо́ю исполне́ние обетова́ния прие́млем днесь.
Конда́к, глас 8:
О всесвяте́йший па́стырю и учи́телю вселе́нныя,/ преблаже́нне о́тче наш святи́телю Афана́сие!/ К ра́це моще́й твои́х припа́дающе, усе́рдно мо́лим тя:/ приими́ от убо́гих душ на́ших любо́вию приноси́мая тебе́ моле́ния/ и, я́ко име́я дерзнове́ние у Престо́ла Влады́чня,/ испроси́ моли́твами твои́ми чту́щим тя/ со А́нгелы и все́ми святы́ми/ непреста́нно Пресвяте́й Тро́ице воспева́ти: аллилу́ия.
Икос:
Ле́ностию окая́нный аз во глубину́ греха́ впадо́х,/ но, я́ко па́стырь добр, воздви́гни мя, святе́йший о́тче,/ и стра́сти угаси́, зле му́чащия мя,/ я́ко да, воста́в, чи́сте воспою́ твое́ светоно́сное торжество́,/ и́мже Влады́ка вселе́нныя просла́ви тя досто́йно, я́ко раба́ верне́йша,/ учи́теля прему́дра, соверши́теля Та́ин Бо́жиих и блюсти́теля за́поведей,/ я́же до́бре сохрани́л еси́,/ пома́зание свято́е, Афана́сие прему́дре./ Того́ при́сно моли́,/ да да́рует чту́щим тя со А́нгелы и все́ми святы́ми/ непреста́нно Пресвяте́й Тро́ице воспева́ти: аллилу́ия.
Песнь 7
Ирмо́с: О́троцы евре́йстии в пещи́/ попра́ша пла́мень дерзнове́нно/ и на ро́су огнь преложи́ша, вопию́ще:/ благослове́н еси́, Го́споди Бо́же, во ве́ки.
Во глубину́ зол впадо́х, страстьми́ погружа́емь,/ и ко врато́м а́да прибли́жихся, грехми́ побежда́емь./ Спаси́ мя моли́твами твои́ми, Богоблаже́нне, и воздви́гни, пою́ща:/ благослове́н Бог отце́в на́ших.
Вся́ких лю́тых неду́гов врач всеизря́ден яви́лся еси́, о́тче Афана́сие./ Исцели́ у́бо не́мощь души́ моея́/ и сподо́би во умиле́нии се́рдца взыва́ти:/ отце́в на́ших Бо́же, благослове́н еси́.
Ди́вный во святы́х Свои́х,/ просла́ви Госпо́дь и в земли́ Росси́йстей уго́дника Своего́, преблаже́ннаго святи́теля Афана́сия,/ па́стыря до́браго и моли́твенника о душа́х на́ших.
Богоро́дичен: Всесла́вная всех Цари́це,/ мольба́ми святи́теля Афана́сия сохрани́ невреди́мы от вся́каго зла́го обстоя́ния лю́ди Твоя́,/ всегда́ Тя моля́щия, я́ко Предста́тельницу ми́рови.
Песнь 8
Ирмо́с: Седмери́цею пещь/ халде́йский мучи́тель/ Богочести́вым неи́стовно разжже́,/ си́лою же лу́чшею спасе́ны, сия́ ви́дев,/ Творцу́ и Изба́вителю вопия́ше:/ о́троцы, благослови́те,/ свяще́нницы, воспо́йте,/ лю́дие, превозноси́те во вся ве́ки.
Бога́тство уче́ний твои́х неску́дно расточа́л еси́, святи́телю Афана́сие,/ и́мже обогати́ся ум а́лчущих словесе́ твоего́./ Изгна́н же быв непра́ведно от престо́ла Царягра́да,/ к ве́рным лю́дем Росси́йския земли́ прише́л еси́/ и в Фаво́ре Мга́рстем блаже́нныя кончи́ны сподобля́ешися./ Те́мже вопие́м:/ благослови́те, дела́ Госпо́дня, Го́спода,/ по́йте и превозноси́те Его́ во ве́ки.
Яко ве́сна, яви́лся еси́, блаже́нне,/ та́инственными цве́ты даро́в Боже́ственных благоуха́я,/ разреша́я от напа́стей и скорбе́й ве́рная ча́да твоя́, к тебе́ притека́ющая и Бо́гу вопию́щая:/ благослови́те, дела́ Госпо́дня, Го́спода,/ по́йте и превозноси́те Его́ во ве́ки.
Я́ко лоза́ многопло́дная, доброде́телей плоды́ израща́ющая,/ яви́шася словеса́ твоя́, благода́ти испо́лненная:/ прише́д бо ко ага́ряном, мольбу́ о лю́дех твои́х прине́сл еси́./ Ти́и же, ви́девше тя, умили́шася/ и, моле́ния ра́ди твоего́, преста́ша убива́ти кри́тския лю́ди, вопию́щий:/ благослови́те, дела́ Госпо́дня, Го́спода,/ по́йте и превозноси́те Его́ во ве́ки.
Богородичен: Вы́шний Престо́ле, Де́во Богоневе́сто,/ до́лу лежа́щее естество́ на́ше к Небеси́ возво́диши,/ те́мже Тя вси по до́лгу сла́вим.
Песнь 9
Ирмос: Ужасе́ся о сем Не́бо,/ и земли́ удиви́шася концы́,/ я́ко Бог яви́ся челове́ком пло́тски/ и чре́во Твое́ бысть простра́ннейшее Небе́с/ Тем Тя, Богоро́дицу,/ А́нгелов и челове́к чинонача́лия велича́ют.
Днесь све́тло красу́ется свята́я па́мять твоя́,/ и ты, святи́телю Афана́сие, я́ко со́лнце, блиста́еши, ве́рных озаря́я,/ во Мга́рстей же оби́тели мно́зи, приходя́щий к тебе́ с ве́рою, прие́млют исцеле́ния./ Те́мже тя велича́ем.
Соше́дшеся днесь, досто́йно хва́лим тя, святи́телю Афана́сие,/ и моще́й твои́х чтим ра́ку,/ прося́ще пода́ти нам моли́твами твои́ми от страсте́й избавле́ние,/ боле́зней исцеле́ние, грехо́в оставле́ние, от напа́стей свобожде́ние,/ и я́ко уго́дника Бо́жия вси тя велича́ем.
Сла́ву твою́ воспе́ти по досто́инству невозмо́жно есть:/ чудеса́ бо мно́га соверша́вши/ и исцеле́ния незави́стно источа́еши/ с ве́рою приходя́щим к тебе́, Афана́сие, Росси́йская похвало́./ Те́мже я́ко уго́дника Бо́жия вси тя велича́ем.
Богородичен: Ты еси́, Богоро́дице, ору́жие на́ше и стена́,/ Ты еси́ заступле́ние к Тебе́ прибега́ющих,/ Тя ны́не на моли́тву подвиза́ем,/ да изба́вимся от враг на́ших.
Свети́лен:
Све́тло пра́зднуется днесь церко́вное торжество́,/ в прославле́ние жития́ и чуде́с твои́х, святи́телю о́тче Афана́сие,/ ты же, предстоя́ во све́те сла́вы лицу́ Бо́жию,/ помяни́ нас, чту́щих святу́ю па́мять твою́.
Сла́ва, и ны́не, Богоро́дичен:
По Бо́зе на Тя, Пречи́стая, упова́ние возлага́ем:/ не пре́зри нас в лю́тых ско́рбех и напа́стех,/ но Твои́ми мольба́ми ко Христу́, Сы́ну Твоему́,/ невреди́мы да́же до конца́ нас сохрани́.
На хвали́тех стихи́ры, глас 8:
Святи́телю о́тче Афана́сие,/ возше́д на высоту́ безстра́стия,/ Бо́гови приобщи́лся еси́/ и от Того́ дар чудотворе́ний прии́м,/ неду́ги исцеля́вши и от бесо́в свобожда́еши;/ тем в ра́дости се́рдца па́мять твою́ пра́зднуем,/ Христа́ прославля́юще,/ Его́же непреста́нно моли́ о душа́х на́ших.
О́тче чу́дный Афана́сие,/ све́тлостию ума́ твоего́ облиста́емь,/ укроти́л еси́ многобу́рное мо́ре страсте́й/ и, возлете́в на чи́стых кри́лех безстра́стия,/ дости́гл еси́ в Небе́сныя селе́ния,/ иде́же добро́та неизрече́нная и пе́ние А́нгелов непрестаю́щее,/ моли́ся та́мо о всех,/ ве́рою и любо́вию чту́щих тя.
О́тче отце́в Афана́сие,/ в житии́ твое́м ты был еси́ свяще́нства пра́вило,/ целому́дрия о́браз,/ любве́ свети́льник,/ прему́дрости наста́вник,/ Це́ркве утвержде́ние,/ сосу́д Боже́ственнаго Ду́ха,/ те́мже и по преставле́нии твое́м/ исто́чник чуде́с яви́лся еси́, Богоблаже́нне.
Слава, глас 6:
Святи́телю преблаже́нне,/ па́стырю до́брый,/ Началопа́стыря – Христа́ – учениче́,/ положи́вый ду́шу твою́ за о́вцы твоя́,/ ты и ны́не, всехва́льне о́тче Афана́сие,/ моли́твами твои́ми мир ми́рови испроси́/ и душа́м на́шим ве́лию ми́лость.
И ны́не, пра́здника или́ Богоро́дичен, глас то́йже:
Богоро́дице, Ты еси́ лоза́ и́стинная,/ возрасти́вшая нам Плод живота́,/ Тебе́ мо́лимся:/ моли́ся, Влады́чице, со святы́ми апо́столы/ поми́ловати ду́ши на́ша.
Славосло́вие вели́кое. И отпу́ст.
НА ЛИТУРГИ́И
Блаже́нны пра́здника и свята́го песнь 6-я. Проки́мен, глас 7: Честна́ пред Го́сподем/ смерть преподо́бных Его́. Стих: Что возда́м Го́сподеви о всех, я́же воздаде́ ми? Апо́стол ко Евре́ем, зача́ло 351. Ева́нгелие от Иоа́нна, зача́ло 36, или 35 от полу́. Прича́стен: В па́мять ве́чную:
Моли́тва
О святи́телю Христо́в, уго́дниче Бо́жий Афана́сие! Веле́нием Бо́жиим жре́бий служе́ния святи́тельскаго восприи́м и крест Христо́в на ра́мена своя́ возложи́в, был еси́ па́стырь до́брый, свети́льник всесве́тлый, столп непоколеби́мый, Це́ркве служи́тель ве́рный, иера́рхов нача́льник, Правосла́вия защи́тник, нече́стия искорени́тель, сего́ ра́ди и водвори́лся еси́ в дому́ Го́спода твоего́. Тебе́ у́бо про́сим: моли́ся о нас, с ве́рою и любо́вию притека́ющих к честны́м и многоцеле́бным моще́м твои́м, не отри́ни прося́щих у тебе́ по́мощи в ско́рбех и боле́знех. Моли́твою твое́ю предста́ни ко Всевы́шнему Влады́це, исхода́тайствуй я́же на по́льзу душ и теле́с на́ших и отве́рзи нам две́ри милосе́рдия Бо́жия. Хода́тайством твои́м сохрани́ Це́рковь Святу́ю тве́рду и непоколеби́му от наве́т вра́жиих. Моли́ Го́спода и Влады́ку, да ти́хое и безмо́лвное житие́ поживе́м во вся́ком благоче́стии и чистоте́. Соблюди́ храм сей, в не́мже всели́лся еси́, от вся́ких бед и напа́стей и от всех враг ви́димых и неви́димых, и, я́коже в жи́зни кри́тския лю́ди от непра́веднаго ага́рянскаго убие́ния изба́вил еси́, та́ко и ны́не на Небесе́х непреста́нно моли́ся ко Го́споду изба́витися нам от вся́каго зла́го обстоя́ния. Пода́ждь ру́ку по́мощи и всем правосла́вным христиа́ном, притека́ющим к честны́м и нетле́нным моще́м твои́м и в моли́твах свои́х тя призыва́ющим. Ускори́ на моли́тву и потщи́ся на по́мощь, и́миже ве́си судьба́ми, да вси, безприкла́дное Бо́жие милосе́рдие ви́дяще и ча́емую по́мощь получи́вше, сла́вят пода́вшаго тебе́ си́лу и сла́ву О́тца и Сы́на и Свята́го Ду́ха, во Еди́нем Существе́ сла́вимаго Бо́га, ны́не, и при́сно, и во ве́ки веко́в. Ами́нь.
И́на моли́тва
О вели́кий и ди́вный святи́телю Христо́в Афана́сие Богому́дре, свети́льниче Це́ркве вселе́нския, Лубе́нский и всея́ Росси́и чудотво́рче и покрови́телю! Ты, от ю́ности вся жите́йская оста́вль, к Бо́гу любо́вию и духо́вным благоразу́мием наставля́емь, увещава́л еси́ вся челове́ки, глаго́ля: что нам бога́тство, что нам зла́то, сла́ва и могу́тство? – ды́мове, расходя́щиися по возду́ху: вся та исче́знут, вся та понесе́т ветр! Многорачи́тельно же в бу́дущем ве́це да бу́дет нам бога́тство. Та́ко поуча́я, сам щедр, благосе́рд, кро́ток, смире́н и всем благопристу́пен был еси́. Те́мже и во успе́нии твое́м Всеблаги́й Госпо́дь тмочи́сленными чудесы́ озари́ и просла́ви нетле́нныя мо́щи твоя́. Име́я у́бо ко Го́споду дерзнове́ние, заступи́ и спаси́ твои́м хода́тайством всю храни́мую тобо́ю зе́млю Росси́йскую и град сей, в не́мже святы́ми моща́ми твои́ми почива́ти благоизво́лил еси́. Моли́ Христа́ Бо́га, да отпу́стятся всем нам согреше́ния на́ша во́льная и нево́льная, да изба́вимся от всех враг ви́димых и неви́димых, от вся́ких бед и скорбе́й и вся́ких неду́гов. Моли́, да ми́лостив бу́дет всем нам Госпо́дь, и зде, и в бу́дущем ве́це, и преста́вльшияся от нас отцы́ и бра́тию, ма́тери и се́стры и ча́да на́ша, в ли́ки святы́х вчини́в, в ме́сте све́тлее упоко́ит, да, предстоя́ще и покланя́ющеся ра́це моще́й твои́х, и́мамы тя неусыпа́ющаго моли́твенника и предста́теля о нас ко Го́споду и благода́рне с любо́вию велича́ем просла́вльшаго и послу́шающаго тя, в Тро́ице сла́вимаго Бо́га, Отца́ и Сы́на и Свята́го Ду́ха, ны́не, и при́сно, и во ве́ки веко́в. Ами́нь.
Святитель Афанасий III Пателарий, Патриарх Константинопольский, Лубенский чудотворец
Святитель Афанасий III Пателарий, Патриарх Константинопольский, Лубенский чудотворец родился в 1597 году в небольшом городе Ревимне (или Ретимне) на острове Крите. Он происходил из знатного греческого рода Пателариев, бывшем в родстве с византийской императорской династией Палеологов. Кроме богатства и знатности происхождения Пателарии отличались незаурядными умственными дарованиями, о чем сохранились свидетельства народных песен. Отец святителя Афанасия Григорий Пателарии был выдающимся ученым, философом и публицистом. Мирское имя свя