Катавасия: Не послужиша твари богомудрии паче Создавшего, но огненное прещение мужески поправше, радовахуся поюще: препетый отцев Господь и Бог, благословен еси.
Песнь 8:
Ирмос: Из пламене преподобным росу источил еси, и праведнаго жертву водою попалил еси: вся бо твориши, Христе, токмо еже хотети, Тя превозносим во вся веки.
Слава Господи, Святому Воскреснию Твоему.
Иудейския древле пророкоубийцы люди, богоубийцы зависть ныне содела, Тебе на Крест вознесшия, Слове Божий: Егоже превозносим во вся веки.
Слава Господи, Святому Воскреснию Твоему.
Небеснаго круга не оставил еси, и во ад сошед, всего совоздвигл еси лежащаго во гноищи, Христе, человека, Тя превозносяща во вся веки.
Пресвятая Богородица, спаси нас.
От света Светодавца Слова зачала еси, и рождши неизреченно Сего, прославилася еси: Дух бо в Тя, Отроковице, Божий вселися. Темже Тя поем во вся веки.
Ин канон:
Слава, Господи, Кресту Твоему Честному и Воскресению.
Ужасеся всяк слух, како Вышний волею прииде на землю, адову крепость разрушити Крестом и погребением, и вся воздвигнути звати: отроцы благословите, священницы воспойте, людие превозносите во вся веки.
Слава, Господи, Кресту Твоему Честному и Воскресению.
Преста адово мучительство, и царство уничижися прочее, на Кресте бо на земли водрузився, иже над всеми Бог, сего могутство низложи. Егоже отроцы благословите, священницы воспойте, людие превозносите во вся веки.
Пресвятая Богородица, спаси нас.
О неизреченнаго Твоего Христе человеколюбия, и неизглаголанных благъ! Мене бо видя погибающа во адове темнице, страсти претерпевый избавил еси. темже Тя благословим всех Владыку, и превозносим во вся веки.
Ин канон:
Пресвятая Богородица, спаси нас.
Позлащеною ризою якоже царицу Сын Твой просветив зарею духа, Тебе одесную Себе постави Пречистая: Егоже превозносим во вся веки.
Пресвятая Богородица, спаси нас.
Иже хотением единым мир водрузивый, от пречистыя Твоея утробы плоть вземлет, свыше сию наздати хотя: егоже превозносим во вся веки.
Благословим Отца и Сына и Святаго Духа, Господа.
Счетанием слова ко мне человеку, Божественное жилище была еси, Пречистая, просиявши яве девства светлостию: темже Тя поем во вся веки.
И ныне:
Златозарный Тя свещник предвообрази, приемшую несказанно свет неприступный, разумом Своим озаряющ всяческая. Темже Тя поем, Чистая, во веки.
Хвалим, благословим, покланяемся Господеви, поюще и превозносяще во вся веки (поклон).
Катавасия: Отроки благочестивыя в пещи Рождество Богородичо спасло есть: тогда убо образуемое, ныне же действуемое, вселенную всю воздвизает пети Тебе: Господа пойте дела, и превозносите Его во вся веки.
Песнь Пресвятыя Богородицы
Величит душа Моя Господа, и возрадовася дух Мой о Бозе Спасе Моем.
Честнейшую Херувим, и Славнейшую без сравнения Серафим, без истления Бога Слова Рождшую, сущую Богородицу Тя величаем. (Поклон)
Яко призре на смирение рабы Своея, се бо отныне ублажат Мя вси роди.
Честнейшую Херувим, и Славнейшую без сравнения Серафим, без истления Бога Слова Рождшую, сущую Богородицу Тя величаем. (Поклон)
Яко сотвори Мне величие Сильный, и свято имя Его, и милость Его в роды родов боящимся Его.
Честнейшую Херувим, и Славнейшую без сравнения Серафим, без истления Бога Слова Рождшую, сущую Богородицу Тя величаем. (Поклон)
Сотвори державу мышцею Своею, расточи гордыя мыслию сердца их.
Честнейшую Херувим, и Славнейшую без сравнения Серафим, без истления Бога Слова Рождшую, сущую Богородицу Тя величаем. (Поклон)
Низложи сильныя со престол, и вознесе смиренныя; алчущия исполни благ, и богатящиеся отпусти тщи.
Честнейшую Херувим, и Славнейшую без сравнения Серафим, без истления Бога Слова Рождшую, сущую Богородицу Тя величаем. (Поклон)
Восприят Израиля отрока Своего, помянути милости, якоже глагола ко отцем нашим, Аврааму и семени его, даже до века.
Честнейшую Херувим, и Славнейшую без сравнения Серафим, без истления Бога Слова Рождшую, сущую Богородицу Тя величаем. (Поклон)
Таже, поем песнь богородицы: Величит душа моя
господа: С припевом: честнейшую херувим:
Песнь 9:
Ирмос: Бога человеком не возможно видети, на Негоже не смеют чини Ангельстии взирати: Тобою же, Всечистая, явися человеком Слово воплощенно, Егоже величающе, с небесными вои Тя ублажаем.
Слава Господи, Святому Воскреснию Твоему.
Страстей непричастен Ты пребыл еси, Слове Божий, плотию приобщився страстем: но решиши от страстей человека, страстем быв страсть, Спасе наш: Един бо еси Безстрастен, и Всесилен.
Слава Господи, Святому Воскреснию Твоему.
Тлю смертную прием, тления соблюл еси тело Твое невкусно, Твоя же животворящая и Божественная, Владыко, душа, во аде не оставлена бысть: но якоже от сна воскрес, нас совоздвигл еси.