Отроки благочести́выя в пещи́ / рождество́ Богоро́дичо спасло́ е́сть: / тогда́ у́бо образу́емое, / ны́не же де́йствуемое, / вселе́нную всю́ воздвиза́ет пе́ти Тебе́: / Го́спода по́йте, дела́, // и превозноси́те его́ во вся́ ве́ки.
Пе́снь 9
Припев: Велича́й, душе́ моя́, / от земли́ на Не́бо честно́е преставле́ние Бо́жия Ма́тере.
Или: А́нгели, успе́ние Пречи́стыя ви́девше, удиви́шася, / ка́ко Де́ва восхо́дит от земли́ на Не́бо
Ирмо́с:
Побежда́ются естества́ уста́вы / в Тебе́, Де́во Чи́стая: / де́вствует бо рождество́, / и живо́т предобруча́ет сме́рть: / по рождестве́ Де́ва, и по сме́рти жива́, / спаса́еши при́сно, // Богоро́дице, насле́дие твое́.
Припев 1: Ро́ди вси́, блажи́м Тя́, / еди́ну Богоро́дицу.
Дивля́хуся а́нгельския си́лы, / в Сио́не смотря́юще своего́ Влады́ку, / ма́тернюю ду́шу рука́ми нося́щаго: / пречи́сто бо Ро́ждшей, сыноле́пно провозглаша́ше: // гряди́, Чи́стая, с Сы́ном и Богом просла́влена бу́ди.
Припев 1: Ро́ди вси́, блажи́м Тя́, / еди́ну Богоро́дицу.
Прииди́те в Сио́н, / на Боже́ственную и ту́чную го́ру жива́го Бо́га, / возра́дуемся, Богоро́дицу зря́ще: / к зело́ бо лу́чшей и Боже́ственней се́ни, / я́ко Ма́терь сию́ // во свята́я святы́х Христо́с преста́ви.
Припев 2: Велича́й, душе́ моя́, / от земли́ на Не́бо честно́е преставле́ние Бо́жия Ма́тере.
Прииди́те, ве́рнии, / ко гро́бу присту́пим Бо́жия Ма́тере, / и обы́мем сердцы́ и устна́ми, / очесы́ и лице́м чи́сто прикаса́ющеся, / и почерпа́юще исцеле́ний незави́стныя да́ры //от исто́чника приснотеку́щаго.
Припев 2: Велича́й, душе́ моя́, / от земли́ на Не́бо честно́е преставле́ние Бо́жия Ма́тере.
Приими́ от на́с пе́снь исхо́дную, / Ма́ти жива́го Бо́га, / и светоно́сною Твое́ю и Боже́ственною нас осени́ благода́тию, / христолю́бным лю́дем ми́р, / оставле́ние грехов пою́щим, // и душа́м спасе́ние подаю́щи.
Припев и катавасия:
А́нгели, успе́ние Пречи́стыя ви́девше, удиви́шася, / ка́ко Де́ва восхо́дит от земли́ на Не́бо.
Вся́к земноро́дный / да взыгра́ется, Ду́хом просвеща́емь, / да торжеству́ет же безпло́тных умо́в естество́, / почита́ющее свяще́нное преставле́ние Богома́тере, / и да вопие́т: / ра́дуйся, всеблаже́нная Богоро́дице, // Чи́стая Присноде́во.
Светилен:
От земли́ на Небеса́ преста́вльшися, / Твоего́ насле́дия, Чи́стая, не оста́ви: / ро́ди Христиа́нстии утверди́, / язы́ки укроти́, // и проле́й ми́р в концы́ ми́ра.
На Хвалитех стихиры на 4, глас 2:
Две́ри Небе́сныя, возми́теся, / зря́ще две́рь Вы́шняго, / иду́щу к вы́шним, еди́ну Богома́терь.
Вси́ Небе́снии / воспо́йте ли́цы, и́бо Де́ва Ма́ти / преста́вися пресла́вно / от земли́ к Небе́сным.
Прииди́те, земноро́днии, / соста́вим ли́к, / исхо́дное пою́ще / на преставле́ние Богоро́дицы дне́сь.
Земля́ у́бо Твои́м погребе́нием / благослови́ся, Де́во: / возду́х же восхожде́нием / освяти́ся стра́нным, / зако́ном уме́рши естества́.
Сла́ва, и ны́не, гла́с то́йже. Самогла́сен:
Воспо́йте, лю́дие Ма́тери Бо́га на́шего, воспо́йте: / дне́сь бо всесве́тлую ду́шу Свою́ / в пречи́стыя дла́ни Иже из Нея́ вопло́щшагося без се́мене, предае́т: / Его́же и мо́лит непреста́нно, // дарова́ти вселе́нней ми́р и ве́лию ми́лость.
На помазание стихира, глас 3:
Слава и ныне:
Прииди́те, празднолю́бных собо́р, / прииди́те и ли́к соста́вим, / прииди́те, венча́ем пе́сньми це́рковь, / упокое́нием ковче́га Бо́жия. / Дне́сь бо Не́бо простира́ет не́дра, / прие́мля Ро́ждшую все́ми Невмести́маго: / и земля́ исто́чник жи́зни отдаю́щи благослове́ние, / украша́ется благоле́пием. / Ангели ли́к составля́ют со апо́столы, / ужа́сно взира́юще, от живота́ в живо́т преставля́ему, / ро́ждшую Нача́льника жи́зни. / Вси́ поклони́мся Ей, моля́щеся: / сро́днаго присвое́ния не забу́ди, Влады́чице, // ве́рно пра́зднующих всесвято́е Твое́ успе́ние.
На Литургии поем Антифоны.
АНТИФОН 1.
ВЕ́ЛИЙ ГОСПОДЬ И ХВАЛЕН ЗЕЛО, / ВО ГРАДЕ БОГА НАШЕГО, В ГОРЕ СВЯТЕЙ ЕГО. – Молитвами Богородицы, Спасе, спаси нас.
ПРЕСЛАВНАЯ ГЛАГОЛАШАСЯ О ТЕБЕ, ГРАДЕ БОЖИЙ, / БОГ ПОСРЕДЕ́ ЕГО, И НЕ ПОДВИ́ЖИТСЯ. – Молитвами Богородицы, Спасе, спаси нас.
БОГ В МЕСТЕ СВЯТЕ́М СВОЕМ, / И В ХРАМЕ ЕГО ВСЯКИЙ ГЛАГОЛЕТ СЛАВУ. – Молитвами Богородицы, Спасе, спаси нас.
ДОМУ ТВОЕМУ ПОДОБАЕТ СВЯТЫНЯ, / ГОСПОДИ, В ДОЛГОТУ ДНИЙ. – Молитвами Богородицы, Спасе, спаси нас.
СЛАВА: И НЫНЕ: – Молитвами Богородицы, Спасе, спаси нас.
АНТИФОН 2.
СЛЫШИ, ДЩИ, И ВИЖДЬ, / И ПРИКЛОНИ УХО ТВОЕ. – Спаси ны, Сыне Божий, молитвами Богородицы, поющия Ти: аллилуия.
ПРЕДСТА́ ЦАРИЦА ОДЕСНУЮ ТЕБЕ, / В РИЗАХ ПОЗЛАЩЕННЫХ ОДЕ́ЯНА, ПРЕИСПЕЩРЕ́НА. – Спаси ны, Сыне Божий, молитвами Богородицы, поющия Ти: аллилуия.
ЛИЦУ ТВОЕМУ ПОМОЛЯТСЯ / БОГАТИИ ЛЮ́ДСТИИ. – Спаси ны, Сыне Божий, молитвами Богородицы, поющия Ти: аллилуия.
ПОМЯНУ ИМЯ ТВОЕ / ВО ВСЯКОМ РОДЕ И РОДЕ. – Спаси ны, Сыне Божий, молитвами Богородицы, поющия Ти: аллилуия.
СЛАВА И НЫНЕ: ЕДИНОРОДНЫЙ СЫНЕ:
АНТИФОН 3.
ВОСКЛИКНИТЕ ГОСПОДЕВИ ВСЯ ЗЕМЛЯ, ПОЙТЕ ЖЕ ИМЕНИ ЕГО, ДАДИТЕ СЛАВУ ХВАЛЕ ЕГО. – В рождестве́ де́вство сохрани́ла еси́, / во успе́нии ми́ра не оста́вила еси́, Богоро́дице, / преста́вилася еси́ к животу́, Ма́ти су́щи Живота́: // и моли́твами Твои́ми избавля́еши от сме́рти ду́ши на́ша.
ИСПОВЕДАЙТЕСЯ ЕМУ, ХВАЛИТЕ ИМЯ ЕГО, ВО ГРАДЕ ГОСПОДА СИЛ, ВО ГРАДЕ БОГА НАШЕГО. – В рождестве девство сохранила еси:
ОСВЯТИЛ ЕСТЬ СЕЛЕНИЕ СВОЕ ВЫШНИЙ, СВЯТЫНЯ И ВЕЛИКОЛЕПИЕ ВО СВЯТИЛЕ ЕГО. – В рождестве девство сохранила еси:
ВОСКРЕСНИ, ГОСПОДИ, В ПОКОЙ ТВОЙ, ТЫИ КИВОТ СВЯТЫНИ ТВОЕЯ. – В рождестве девство сохранила еси: