Во 2-й день
Свята́го благове́рнаго и равноапо́стольнаго царя́ Бори́са, во свято́м Креще́нии Михаи́ла
А́ще восхо́щет предстоя́тель сотвори́ти бде́ние, на ма́лой вече́рни да пое́т стихи́ры и́же во святы́х отца́ на́шего Афана́сия Вели́каго.
НА ВЕЛИ́ЦЕЙ ВЕЧЕ́РНИ
Блаже́н муж: 1-й антифо́н.
На Го́споди, воззва́х: поста́вим стихо́в 8 и пое́м стихи́ры пра́здника пре́жде, та́же стихи́ры свята́го, глас 4. Подо́бен: Дал еси́ зна́мение:
Стра́шнаго Суда́ преще́нием/ устраши́л еси́, Го́споди,/ вели́каго в царе́х Бори́са,/ и́же у́бо и́долов возгнуша́ся,/ и служе́ние тем оста́ви,/ и к нога́м Твои́м пове́рже себе́ и лю́ди своя́./ Те́мже Твое́ человеколю́бное смотре́ние сла́вим,/ Иису́се Всеси́льне, Спа́се душ на́ших.
Константи́на ма́терию,/ Бори́са же сестро́ю огласи́в, Го́споди,/ дал еси́ ему́ вкуси́ти,/ я́ко Благ еси́ и прему́дрости глубина́,/ па́че не́же и́долов тьма и го́рькая сла́дость греха́./ Те́мже Твое́ человеколю́бное смотре́ние сла́вим,/ Иису́се Всеси́льне, Спа́се душ на́ших.
Я́коже ора́нней земли́ се́итва,/ по Креще́нии свято́м, Го́споди,/ посла́л еси́ царю́ Бори́су/ слове́нския учи́тели ве́ры,/ и́же просвети́ша лю́ди/ и в Правосла́вном благоче́стии утверди́ша./ Те́мже Твое́ человеколю́бное смотре́ние сла́вим,/ Иису́се Всеси́льне, Спа́се душ на́ших.
Сла́ва, глас 6:
Благове́рный царю́ Бори́се,/ пра́вды Бо́жия сниска́в,/ и ни́щия ми́лостию удово́лив,/ и равноапо́стольными дея́ньми просия́в,/ благода́ть обре́л еси́ я́сти от дре́ва живо́тнаго,/ его́же вкуси́в, испо́лнился еси́ Ду́ха/ и прия́л еси́ жизнь ве́чную/ и Небе́сную сла́ву./ Те́мже моли́ся Христу́ Бо́гу на́шему/ утверди́ти род твой Правосла́вием/ и спасти́ ду́ши на́ша.
И ны́не, пра́здника.
Вход. Проки́мен дне и чте́ния три.
Ца́рств тре́тиих чте́ние (глава́ 8):
Ста Соломо́н пред лице́м же́ртвенника Госпо́дня,/ пред всем собо́ром Изра́илевым,/ и, возде́в ру́це свои́ на не́бо, рече́:/ Го́споди Бо́же Изра́илев,/ несть Бог, я́коже Ты, на Небеси́ горе́ и на земли́ до́ле./ А́ще бо не́бо и не́бо небесе́ не довле́ют Тебе́,/ ка́ко дом сей, его́же созда́х И́мени Твоему́?/ Оба́че и при́зриши на моли́тву мою́,/ Го́споди Бо́же Изра́илев,/ услы́шати моле́ния и моли́тву,/ е́юже раб Твой мо́лится пред Тобо́ю к Тебе́ днесь./ Да бу́дут о́чи Твои́ отве́рсты на дом сей день и нощь,/ на ме́сто сие́, о не́мже глаго́лал еси́:/ бу́дет И́мя Мое́ та́мо, е́же услы́шати моли́тву,/ е́юже мо́лится раб Твой на ме́сте сем во дни и нощи́,/ и послу́шати мольбы́ раба́ Твоего́/ и люде́й Твои́х Изра́иля./ И ели́ка а́ще помо́лятся к Тебе́ на ме́сте сем,/ и Ты услы́шиши на ме́сте жили́ща Твоего́ на Небеси́,/ и сотвори́ши и ми́лостив бу́деши им.
Проро́чества Иса́иина чте́ние (главы́ 61, 62):
Да возра́дуется душа́ моя́ о Го́споде,/ облече́ бо мя в ри́зу спасе́ния/ и оде́ждою весе́лия оде́я мя;/ я́ко на жениха́, возложи́ на мя вене́ц/ и, я́ко неве́сту, украси́ мя красото́ю./ И, я́ко земля́, растя́щая цвет свой,/ и я́ко вертогра́д се́мена своя́ прозяба́ет,/ та́ко возрасти́т Госпо́дь пра́вду и весе́лие пред все́ми язы́ки./ Сио́на ра́ди не умолчу́/ и Иерусали́ма ра́ди не попущу́,/ до́ндеже изы́дет, я́ко свет, пра́вда моя́,/ спасе́ние мое́, я́ко свети́ло, разжже́тся./ И у́зрят язы́цы пра́вду твою́,/ и ца́рие сла́ву твою́,/ и прозову́т тя и́менем но́вым/ и́мже Госпо́дь наимену́ет е./ И бу́деши вене́ц добро́ты в руце́ Госпо́дни/ и диади́ма ца́рствия в руце́ Бо́га твоего́./ И не прозове́шися ктому́ оста́влен,/ и земля́ твоя́ ктому́ не нарече́тся пуста́:/ тебе́ бо прозове́тся во́ля моя́/ и земля́ твоя́ вселе́нная,/ я́ко благоволи́ Госпо́дь в тебе́, и земля́ твоя́ вку́пе насели́тся./ И я́коже живя́й ю́ноша с де́вою,/ та́ко поживу́т сы́нове твои́ с тобо́ю./ И бу́дет я́коже ра́дуется жени́х о неве́сте,/ та́ко возра́дуется Госпо́дь о тебе́.
Проро́чества Иса́иина чте́ние (гла́ва 60):
Свети́ся, свети́ся, Иерусали́ме,/ прии́де бо твой свет/ и сла́ва Госпо́дня на тебе́ возсия́!/ Се тьма покры́ет зе́млю и мрак на язы́ки,/ на тебе́ же яви́тся Госпо́дь и сла́ва Его́ на тебе́ у́зрится./ И по́йдут ца́рие све́том твои́м/ и язы́цы све́тлостию твое́ю./ Возведи́ о́крест о́чи твои́/ и виждь со́бранная ча́да твоя́./ Се приидо́ша вси сы́нове твои́ издале́ча,/ и дще́ри твоя́ на ра́мех во́змутся./ Тогда́ у́зриши, и возра́дуешися,/ и убои́шися, и ужа́снешися се́рдцем,/ я́ко приложи́тся к тебе́ бога́тство морско́е и язы́ков и люде́й./ И прии́дут к тебе́ стада́ вельблю́д,/ и покры́ют тя вельблю́ди, мадиа́мстии и гефа́рстии,/ вси от Савы́ прии́дут, нося́ще зла́то, и лива́н принесу́т,/ и ка́мень че́стен/ и спасе́ние Госпо́дне благовозвестя́т./ И вся о́вцы кида́рския соберу́тся тебе́,/ и о́вни навео́фстии прии́дут к тебе́,/ и вознесу́тся прия́тная на же́ртвенник Мой,/ и дом моли́твы Моея́ просла́вится./ Ки́и суть, и́же я́ко о́блацы летя́т/ и я́ко го́луби со птенцы́ ко Мне?/ Мене́ о́строви жда́ша и корабли́ фарси́йстии в пе́рвых, привести́ ча́да твоя́ издале́ча и сребро́ и зла́то их с ни́ми,/ и́мени ра́ди Госпо́дня свята́го и за е́же Свято́му Изра́илеву сла́вну бы́ти./ И сози́ждут сы́нове иноро́днии сте́ны твоя́,/ и ца́рие их предстоя́ти бу́дут тебе́:/ за гнев бо Мой порази́х тя и за ми́лость Мою́ возлюби́х тя./ И отве́рзутся врата́ твоя́ при́сно, день и нощь, и не затворя́тся,/ ввести́ к тебе́ си́лу язы́к и ца́ри их ведо́мыя./ Язы́цы бо и ца́рие, и́же не порабо́тают ти, поги́бнут,/ и язы́цы запусте́нием запусте́ют./ И сла́ва Лива́нова к тебе́ прии́дет кипари́сом, и пе́вгом, и ке́дром вку́пе,/ просла́вити ме́сто свято́е Мое́, и ме́сто ног Мои́х просла́влю./ И по́йдут к тебе́ боя́щеся,/ сы́нове смири́вших тя и раздражи́вших тя,/ и покло́нятся следо́м ног твои́х вси, прогне́вавшии тя,/ и нарече́шися град Госпо́день, Сио́н свята́го Изра́илева./ За сие́ я́ко был еси́ оста́влен и возненави́ден,/ и не бе помога́ющего ти./ И положу́ тя в ра́дость ве́чную, весе́лие родо́м родо́в./ И изссе́ши млеко́ язы́ков, и бога́тство царе́й сне́си,/ и уразуме́еши, я́ко Аз Госпо́дь, спаса́яй тя/ и избавля́яй тя, Бог Изра́илев.
На лити́и стихи́ры пра́здника и свята́го, глас 2:
Авраа́м – друг Бо́жий/ воздви́же ру́ку на сы́на своего́ единоро́днаго,/ во е́же закла́ти его́ Бо́га ра́ди во всесожже́ние/ благове́рный же Бори́с ве́ры ра́ди Бо́жия/ сы́на своего́ не пощаде́ перворо́днаго,/ на Христа́ безу́мием дерзну́вшаго./ Те́мже во всесожже́ние прине́с благоче́стие правосла́вное всего́ наро́да/ и покая́ние се́рдца своего́ с сокруше́нием,/ прия́т я Госпо́дь, я́ко благово́ние богоприя́тное,/ и вознесе́ его́ я́ко избра́ннаго от люде́й Свои́х.
Глас 4: Вели́кий в царе́х Константи́н/ мучи́теля победи́ си́лою Креста́/ и тем возлюби́ ве́ру Христо́ву./ Ты же, благове́рный царю́ Бори́се,/ утверди́в се́рдце твое́ в любви́ Христо́вой,/ си́лою кре́стною сокруши́л еси́ дерзнове́нную брань пога́ных вельмо́ж/ на пречи́стую ве́ру Бо́жию./ Те́мже тя, ублажа́юще, приле́жно мо́лим:/ моли́твами твои́ми сохраня́й оте́чество твое́/ и лю́ди твоя́ от наве́тов вра́жиих.
Слава, глас 5:
Царю́ царе́й присво́ився Креще́нием,/ благове́рный царю́ Бори́се,/ и лю́ди своя́ к Нему́ приве́д,/ возра́сл еси́ в му́жа соверше́нна благоче́стием/ и в ме́ру во́зраста, апо́столом ра́внаго:/ прии́м бо в страну́ твою́ слове́нских учи́телей сло́ва Бо́жия,/ утверди́л еси́ незы́блемо на земли́ Бо́лгарстей Правосла́вие;/ но и еще́ возжа́ждавшей души́ твое́й к Бо́гу Живо́му,/ оста́вил еси́ жезл ца́рствия,/ всели́лся еси́ в пусты́ню/ и пожи́л еси́ в преподо́бии и пра́вде;/ коне́ц же прии́м жития́ земна́го/ и на ве́чное преше́д блаже́нство,/ не забыва́еши ро́да своего́,/ моля́ся непреста́нно ко Господу/ о спасении душ наших.
И ны́не, пра́здника.
На стихо́вне стихи́ры, глас 2.
Подобен: Егда́ от Дре́ва:
Егда́ Бог восхоте́ род слове́нский извести́/ из тьмы идолобе́сия во свет спаси́тельный,/ тогда́ тя избра́ венцено́сна апо́стола/ и се́рдце твое́ разжже́ огне́м любве́ Своея́,/ во е́же, я́ко еле́нь на исто́чник живы́я воды́,/ тебе́ устреми́тися и, напи́вся благода́ти Креще́ния,/ всем лю́дем твои́м бы́ти просвеще́ния/ вина́ спаси́тельная.
Стих: Вознесо́х избра́ннаго от лю́дей Мои́х,/ обрето́х Дави́да, раба́ Моего́.
Егда́ на тя излия́ся благода́ть Христо́ва/ и ве́ра, я́ко квас, ца́рствия в тебе́ преумно́жися/ и любо́вь Бо́жия всю ду́шу твою́ плени́,/ тогда́, днем дела́ ца́рствия в багряни́це исправля́я,/ нощна́го часа́ в терпе́нии жа́ждал еси́,/ иде́же во вре́тищи пред лице́м Го́спода/ пове́ржен возсыла́ти моли́твы твоя́ в покая́нии/ о себе́ и лю́дех твои́х.
Стих: Сего́ ра́ди пома́за Тя, Бо́же, Бог Твой/ еле́ем ра́дости па́че прича́стник Твои́х.
Егда́ преложе́нием служе́ний Бог восхоте́/ из апо́стола венцено́сна в преподо́бнаго тя соде́яти,/ тогда́ боле́знь лю́тую на тя наведе́/ и стра́хом сме́рти ца́рство оста́вити,/ и́ночество же прия́ти тя наста́ви,/ иде́же посто́м и моли́твою насыща́яся,/ седмочи́сленным же в кни́гах посо́бствуя,/ преста́вился еси́ и от моще́й твои́х чудеса́ источи́л еси́.
Сла́ва, глас 2:
Арха́нгела Михаи́ла и́мя креще́нием восприи́м,/ благове́рный царю́ Бори́се,/ тезоиме́нно в брань вступи́л еси́ на зми́я дре́вняго/ и, победи́в его́ си́лою кре́стною,/ свободи́л еси́ мучи́тельства лю́ди своя́,/ но, и в пусты́ню всели́вся, а́нгельски пожи́л еси́/ и, сконча́в житие́, со А́нгелы всели́лся еси́./ Те́мже, я́ко иму́щаго дерзнове́ние ко Го́споду, мо́лим тя:/ сохраня́й род твой и Це́рковь/ от напа́стей чужда́го моли́твами твои́ми.
И ны́не, пра́здника.
На благослове́нии хле́бов тропа́рь свята́го, два́жды, и пра́здника, еди́ножды.
Тропа́рь, глас 6:
Испо́лнен стра́ха Бо́жия/ и Креще́нием святы́м просвеще́н,/ был еси́ жили́ще Свята́го Ду́ха,/ благове́рный царю́ Бори́се./ Утверди́в же ве́ру Правосла́вную на земли́ Бо́лгарстей/ и жезл ца́рствия оста́вив,/ всели́лся еси́ в пусты́ню,/ процве́л еси́ в по́двизех/ и обре́л еси́ благода́ть пред Го́сподем./ Ны́не же предстоя́ Престо́лу Всевы́шняго,/ моли́ дарова́ти нам, моля́щимся тебе́,/ спасе́ние душ на́ших.
НА У́ТРЕНИ
На Бог Госпо́дь: тропа́рь свята́го, два́жды. Сла́ва, и ны́не, пра́здника.
По 1-м стихосло́вии седа́лен, глас 3.
Подо́бен: Боже́ственныя ве́ры:
Боже́ственныя ве́ры испове́дание прие́м от Фо́тия светле́йшаго/ и наста́вився на ве́дение и дея́ние,/ совоздвиза́еши нас к благоче́стию дерзнове́нными твои́ми моли́твами./ Благове́рный царю́ Бори́се, Христа́ Бо́га моли́/ дарова́тися нам ве́лией ми́лости.
Сла́ва, и ны́не, пра́здника.
По 2-м стихосло́вии седа́лен, глас 6.
Подо́бен: А́нгельския предъиди́те си́лы:
А́нгельское воприи́м и́мя,/ а́нгельски пожи́л еси́ в ца́рстве и в пусты́ни,/ те́мже тя Бог возвы́си в уго́дника Своего́ изря́днаго,/ апо́столом ра́внаго и соприча́стника преподо́бным и пра́ведным,/ и нас подвиза́ет тебе́ ра́ди вопи́ти Ему́:/ Бо́же наш, сла́ва Тебе́.
Сла́ва, и ны́не, пра́здника.
По полиеле́и седа́лен, глас 8.
Подо́бен: Прему́дрость и Сло́во:
Прему́дрости Боже́ственныя взыска́в приле́жно,/ обре́л еси́ ю во врате́х Це́ркве Христо́вы Правосла́вныя./ Те́мже Ри́ма отврати́лся еси́,/ и прия́л еси́ гони́мых учи́телей благоче́стия я́зыка слове́нскаго разу́мнаго,/ и напои́л еси́ жа́ждущую зе́млю душ люде́й твои́х вода́ми жи́зни ве́чныя./ Благове́рный царю́ Бори́се, моли́ Христа́ Бо́га/ утверди́ти нас на незы́блемом сем основа́нии/ и прегреше́ний оставле́ние дарова́ти чту́щим любо́вию честну́ю па́мять твою́.
Сла́ва, и ны́не, пра́здника.
Та́же степе́нна, 1-й антифо́н 4-го гла́са. Проки́мен, глас 4: Вознесо́х избра́ннаго от люде́й Мои́х,/ обрето́х Дави́да, раба́ Моего́. Стих: Сего́ ра́ди пома́за Тя, Бо́же, Бог Твой еле́ем ра́дости па́че прича́стник Твои́х. Вся́кое дыха́ние: Ева́нгелие от Иоа́нна, зача́ло 35.
По 50-м псалме́ стихи́ра, глас 6:
Тобо́ю испо́лнися прорече́ние сро́дника твоего́,/ му́ченика кня́зя Енраво́ты Боя́на,/ я́ко на земли́ Бо́лгарстей умно́житися и́мать ве́ра Христо́ва,/ и зна́мение Креста́ водрузи́тся,/ и хра́ми Бо́гу и́стинному воздви́гнутся,/ в ни́хже иере́и честни́и/ приноси́ти и́мут же́ртвы хвале́ния и испове́дания/ Животворя́щей Тро́ице./ Те́мже ны́не, сосвиде́тельствующе сим и Бо́га благодаря́ще,/ тя ублажа́ем, благове́рный царю́ Бори́се,/ я́ко сосу́да избра́ннаго суде́б Боже́ственных.
Кано́н пра́здника и свята́го, его́же краегране́сие: Ца́рство оста́вив, Бори́с Ца́рство получи́. Глас 8.
Песнь 1
Ирмо́с: Во́ду проше́д, я́ко су́шу,/ и еги́петскаго зла избежа́в,/ изра́ильтянин вопия́ше:/ Изба́вителю и Бо́гу на́шему пои́м.
Припе́в: Святы́й благове́рный царю́ Бори́се, моли́ Бо́га о нас.
Ца́рским путе́м неукло́нно ше́ствуя из Еги́пта идолослуже́ния/ к Чермно́му мо́рю Креще́ния с наро́дом свои́м,/ благода́рственно с ве́рою воспе́л еси́ Изба́вителю и Бо́гу на́шему.
А́ще и фараони́тское противле́ние пога́ных вельмо́ж путь твой хотя́ше препя́ти/ и в ра́бство бесо́в верну́ти вме́сто свобо́ды во Христе́,/ но ты, ше́ствуя побе́дне, воспе́л еси́ Изба́вителю и Бо́гу на́шему.
Ра́зумом непоколе́блемым устреми́лся еси́, святы́й царю́,/ к но́вому зако́ну благоче́стия, Бо́гом да́нному,/ авраа́мски вся непреподо́бная же́ртвуя/ и с умиле́нием воспева́я Изба́вителю и Бо́гу на́шему.
Богоро́дичен: Свобожде́ние на́ше Рождество́м Твои́м/ прови́де в купине́ неопали́мой вели́кий Моисе́й, Чи́стая,/ и нас, изба́вленных, наста́ви непреста́нно пе́ти с ра́достию Изба́вителю и Бо́гу на́шему.
Песнь 3
Ирмо́с: Небе́снаго кру́га Верхотво́рче, Го́споди,/ и Це́ркве Зижди́телю,/ Ты мене́ утверди́ в любви́ Твое́й,/ жела́ний кра́ю, ве́рных утвержде́ние,/ Еди́не Человеколю́бче.
Тве́рдый тя ка́мень ве́ры прия́т на основа́нии,/ те́мже врата́ а́дова воста́нием не поколеба́, утвержде́ннаго в Го́споде се́рдца твоего́,/ и вознесе́ся рог твой на враги́ твоя́.
Высо́кая глаго́лющии на Бо́га падо́шася,/ ты же, со смире́нием богоуго́дным и си́лою Креста́ победи́в,/ вознесе́н был во отца́ всего́ наро́да твоего́ и в сы́на Отца́ Небе́снаго.
Обетова́нных благ лю́бящим Бо́га жела́я,/ вся я́ко уме́ты вмени́л еси́/ и по́двиг вели́кий равноапо́стола подъя́л еси́,/ со все́ми боря́ся, до́ндеже вконе́ц победи́в, Бо́гу угоди́л еси́.
Богородичен: Оби́лие благода́тей Бо́жиих излия́ся на род челове́ческий стра́нным рождество́м Твои́м, Пречи́стая,/ низведе́ бо во ад Рожде́нный Тобо́ю кня́зя ми́ра сего́/ и нас вла́сти его́ свободи́.
Конда́к и и́кос пра́здника.
Седа́лен свята́го, глас 2.
Подо́бен: Милосе́рдия две́ри:
Милосе́рдие щедро́т Бо́жиих излия́ся на зе́млю Бо́лгарскую Креще́нием,/ я́коже дождь на руно́,/ и́же не возврати́ся тощ, до́ндеже напои́ вся./ Те́мже прозябо́ша се́мена ца́рствия/ и принесо́ша плодоноше́ние в Вы́шнюю жи́тницу,/ водя́щу, я́коже оте́ц, де́ти своя́ благове́рному царю́ Бори́су,/ крести́вшему себе́ и лю́ди своя́.
Сла́ва, и ны́не, пра́здника.
Песнь 4
Ирмос: Услы́шах, Го́споди,/ смотре́ния Твоего́ та́инство,/ разуме́х дела́ Твоя́/ и просла́вих Твое́ Божество́.
Слу́ха Госпо́дня услы́шав, ко спасе́нию всех зову́щаго,/ и́го подъя́л еси́ Христо́во, крести́вся нелицеме́рно,/ и совмести́л еси́ ца́рская с благоче́стием,/ днем в багряни́це, но́щию же во вре́тищи Бо́гу моля́ся.
Твоя́ доброде́тель во всю зе́млю изы́де Бо́лгарскую/ и во о́браз всем лю́дем твои́м тя возвы́си,/ те́мже с любо́вию вла́сти твое́й повинова́хуся не то́кмо за гнев, но и за со́весть.
А́може грех нече́стия умно́жися,/ преизбы́точествова благода́ть по апо́стольскому глаго́лу/ и возсия́ по Креще́нии богобоязли́вая душа́ твоя́ све́том/ от ю́га прише́дшаго Со́лнца пра́вды, Христа́ Бо́га на́шего.
Богородичен: Внегда́ прибли́жися ле́то благоволе́ния Бо́жия,/ прия́ла еси́ от Арха́нгела, Пречи́стая, благове́щение ра́дости,/ я́ко хо́щет Тобо́ю Бог роди́тися во свет язы́ком и сла́ву Изра́иля.
Песнь 5
Ирмос: У ́ тренююще, вопие ́ м Ти:/ Го ́ споди, спаси ́ ны,/ Ты бо еси́ Бог наш,/ ра ́ зве Тебе ́, ино ́ го не ве ́ мы.
Исполня́я вся до́лжная,/ во е́же све́ту пове́лений Божи́их возсия́ти новокреще́нным лю́дем,/ прия́л еси́ в зе́млю твою́ учи́телей слове́нских и уще́дрил еси́ я,/ в де́ле апо́стольства им посо́бствуя.
Во О́хрид град Кли́мента посла́в с Нау́мом,/ в Пресла́ве же Иоа́нна Екза́рха име́я с Константи́ном, и Фео́дора Ду́кса, и Хра́бра,/ процве́л еси́ в сло́ве, я́ко фи́никс,/ и, я́ко кедр лива́нский, умно́жился еси́.
Бога́тно удобри́в ду́ши люде́й твои́х слове́нскою кни́гою/ и напои́в жа́ждущих благода́тию сло́ва,/ тогда́ пра́вде научи́шася живу́щии на земли́ Бо́лгарстей/ и вконе́ц преста́ нече́стие и́дольское.
Богородичен: О́гнь Тобо́ю супоста́ты пояде́, Пречи́стая,/ родила́ бо еси́ еди́наго Христа́ Спа́са на́шего,/ нас от ра́бства свободи́вшаго и Жизнь нам сме́ртию Свое́ю пода́вшаго.
Песнь 6
Ирмо́с: Моли ́ тву пролию ́ ко Го ́ споду/ и Тому ́ возвещу ́ печа ́ ли моя ́ ,/ я ́ ко зол душа ́ моя ́ испо ́ лнися/ и живо ́ т мой а ́ ду прибли ́ жися,/ и молю ́ ся, я ́ ко Ио ́ на:/ от тли, Бо ́ же, возведи ́ мя.
Рим затме́нный оста́вив,/ к восто́ку светле́йшаго Правосла́вия обрати́лся еси́/ и, Фо́тия Патриа́рха свята́го оглаше́ние прии́м,/ ка́ко подоба́ет в дому́ Бо́жий жи́ти, уве́дел еси́.
И́стину о Це́ркви Бо́лгарстей утверди́ти жела́я,/ к Собо́ру Константинопо́льскому обрати́лся еси́,/ отону́дуже архиепи́скопа получи́в,/ основа́ние кре́пкое автокефа́лии во времена́ ве́чная положи́л еси́.
Сей день вои́стинну сотвори́ Госпо́дь,/ в о́ньже ты вся твоя́ прекра́сне соде́лал еси́,/ благове́рный царю́ Бори́се,/ те́мже возра́доватися нам подоба́ет Го́сподеви,/ па́мять твою́ пра́зднующе.
Богородичен: Цари́це Небе́сная, Де́во Пресвята́я,/ я́ко иму́щи ве́лие дерзнове́ние к Сы́ну Твоему́,/ свободи́ ны предста́тельством Твои́м от звере́й преиспо́дних/ и, я́ко проро́ка Ио́ну, спаси́ ны.
Конда́к, глас 8.
Подо́бен: Взбра́нной Воево́де:
Взбра́нный воево́до Бо́га Вы́шняго,/ си́лою Креста́ победи́вый воста́ние тьмы/ и насади́вый благоче́стие на земли́ твое́й,/ име́яй же дерзнове́ние ко Го́споду,/ сохраня́й моли́твами твои́ми достоя́ние твое́, да зове́м ти:/ ра́дуйся, равноапо́стольне царю́ Бори́се,/ крести́телю земли́ Бо́лгарския.
И́кос:
Возсия́вшу в Вифлее́ме Со́лнцу пра́вды/ и дне́ви светле́йшему наста́вшу на земли́,/ лю́дие бо́лгарстии, я́коже де́лателие о́нии,/ седя́ху во тьме се́ни сме́ртныя и пра́здни де́лания спаси́тельнаго./ Но обре́т я Госпо́дь ми́лостию Про́мысла Своего́ в час девя́тый,/ избра́ царя́ Бори́са в приста́вника Своего́,/ и́мже введе́ я в виногра́д Це́ркве Своея́ две́рию Креще́ния/ и возмезди́ ра́вным с пе́рвыми де́латели воздая́нием./ Те́мже, Его́ благодаря́ще, тому́ вопие́м:/ ра́дуйся, равноапо́стольне царю́ Бори́се, крести́телю земли́ Бо́лгарския.
Песнь 7
Ирмос: О́троцы евре́йстии в пещи́/ попра́ша пла́мень дерзнове́нно/ и на ро́су огнь преложи́ша, вопию́ще;/ благослове́н еси́, Го́споди Бо́же, во ве́ки.
Апо́стольски ве́ру насажда́я,/ хра́мы и́стинному Бо́гу воздви́гл еси́ на земли́ твое́й,/ иде́же иере́ом честны́м сло́во пропове́дати и та́инства соверша́ти взыва́ющим:/ благослове́н еси́, Го́споди Бо́же, во ве́ки.
Ра́дость ве́лию даде́ ти Бог,/ внегда́ в Тивериопо́ли мо́щи святы́х пятна́десяти му́чеников из-под спу́да откры́шася,/ и зна́мения сотвори́ша ся, и в Брега́льницу пренесо́ша, всем лю́дем, взыва́ющим:/ благослове́н еси́, Го́споди Бо́же, во ве́ки.
С бытие́ ви́дя твои́х вожделе́ний, я́ко благоче́стие насади́ся труды́ твои́ми,/ Це́рковь украси́ся со́нмом свяще́нства самовла́стнаго,/ сло́во слове́нское освяти́ся Богослуже́нием,/ Бо́га преи́скренне благодари́л еси́, взыва́я:/ благослове́н еси́, Го́споди Бо́же, во ве́ки.
Богородичен: Твоея́ ми́лости не отста́ви от нас, Богоро́дице,/ возлю́бленнаго Ти ра́ди царя́ Бори́са,/ и́же Сы́на Твоего́ и Тя́ в болга́рех просла́ви, зову́щих:/ благослове́н еси́, Го́споди Бо́же, во ве́ки.
Песнь 8
Ирмос: Седмери ́ цею пещь/ халде ́ йский мучи ́ тель/ богочести ́ вым неи ́ стовно разжже ́ ,/ си ́ лою же лу ́ чшею спасе ́ ны, сия ́ ви ́ дев,/ Творцу ́ и Изба ́ вителю вопия ́ ше:/ о ́ троцы, благослови ́ те,/ свяще ́ нницы, воспо ́ йте,/ лю ́ дие, превозноси ́ те во вся ве ́ ки.
В боле́знь лю́тую впад и се́рдцем горя́ Бо́гу лу́чше угоди́ти,/ ца́рства отре́клся еси́ и, во и́ноческий о́браз оде́явся,/ непреста́нною моли́твою превозноси́л еси́ Христа́ во ве́ки.
Оби́тель воздви́г великому́ченику Пантелеи́мону,/ в ней всели́лся еси́ и, седмочи́слен ным посо́бствуя,/ с про́чиими в кни́гах неуста́но потруди́лся еси́,/ превознося́ Христа́ во ве́ки.
Преспе́яние ду́ха ти дарова́ препросла́вленный Госпо́дь,/ и был еси́ о́браз по́двига Христо́ва,/ наставля́я люде́й твои́х дея́нием па́че, не́жели сло́вом,/ и превознося́ Христа́ во ве́ки.
Богородичен: О́блаче пресве́тлый, ороша́яй огнь и прохлажда́яй пла́мень,/ ороси́ мя благода́тию и прохлади́ разже́ннаго грехо́м,/ во е́же благода́рственно превозноси́ти Сы́на Твоего́ во ве́ки.
Песнь 9
Ирмос: Ужасе ́ ся о сем Не ́ бо/ и земли ́ удиви ́ шася концы ́ ,/ я ́ ко Бог яви ́ ся челове ́ ком пло ́ тски/ и чре ́ во Твое ́ бысть простра ́ ннейшее Небе ́ с/ Тем Тя, Богоро ́ дицу,/ А ́ нгелов и челове ́ к чинонача ́ лия велича ́ ют.
Люде́й твои́х наста́вив на путь спасе́ния и де́ло твое́ соверши́в,/ кончи́ну блаже́нную прия́л еси́ земна́го жития́/ и, в Ца́рство преше́д Небе́сное,/ мо́лишися непреста́нно о всех нас.
Ублажа́ем тя, равноапо́стола земли́ Бо́лгарския,/ Креще́нием святы́м и пи́смены слове́нскими/ вве́дшаго люде́й твои́х во свет ве́ры Христо́вы/ и моля́щагося непреста́нно о всех нас.
Челове́ческим сло́вом тя просла́вихом, а́нгельских похва́л досто́йнаго,/ но, снизходя́, приими́ любо́вь се́рдца на́шего/ и бу́ди нам хода́тай ко Го́споду,/ моля́ся непреста́нно о всех нас.
Богоро́дичен: Избра́нная от всех родо́в, Богоневе́сто,/ низложи́ си́льныя в го́рдости серде́ц их и вознеси́ смире́нныя,/ а́лчущия испо́лни вся́ческих благ и богатя́щияся отпусти́ тщи,/ вся бо мо́жеши, ели́ка хо́щеши, Всепе́тая.
Свети́лен, глас 2.
Подо́бен: Жены́, услы́шите:
Сро́днаго нам апо́стола, благове́рнаго Бори́са,/ пе́сньми почти́м вси, бра́тие,/ нас Креще́нием Бо́гу соедини́вшаго, и в Правосла́вии наста́вльшаго,/ и путь спасе́ния нам соде́лавшаго,/ и́мже сам пе́рвый проше́д, всех ве́рных нас возво́дит в Ца́рствие Небе́сное.
Сла́ва, и ны́не, пра́здника.
На хвали́тех стихи́ры пра́здника 3 и свята́го 3, глас 8.
Подо́бен: О, пресла́внаго чудесе́:
Благове́рный царю́ Бори́се,/ страну́ твою́ ви́дев Бо́лгарскую,/ я́коже ко́злище среди́ Христо́вых ове́ц,/ вожделе́л еси́ ю возроди́ти./ Те́мже Креще́нием святы́м просвети́в,/ в сонм ввел еси́ окре́стных благочести́вый/ и, сло́вом Ева́нгелия наказа́в,/ к нога́м приве́л еси́ Спа́са Христа́,/ Его́же моли́ спасти́ и просвети́ти ду́ши на́ша.
Благове́рный царю́ Бори́се,/ Па́влову вняв наказа́нию,/ я́ко в Це́ркви хощу́ пять слове́с разу́мных глаго́лати,/ во е́же ины́х послу́шающих по́льзовати,/ усе́рдно поиска́в, обре́л еси́ наро́ду своему́ учи́телей/ и, со вся́кою че́стию к себе́ приве́д,/ вручи́л еси́ им де́ло апо́стольства Спа́са Христа́,/ Его́же моли́ спасти́ и просвети́ти ду́ши на́ша.
Благове́рный царю́ Бори́се,/ я́ко Соломо́н, суету́ мирску́ю испыта́в/ и ски́птры ца́рствия оста́вив,/ и́ноческий о́браз на ся восприя́л еси́/ и, в пусты́ни Пресла́встей подвиза́вся,/ процве́л еси́ преподо́бием и пра́вдою,/ отону́дуже на ве́чное преше́д блаже́нство,/ от моще́й чудесы́ Христа́ просла́вил еси́,/ Его́же моли́ спасти́ и просвети́ти ду́ши на́ша.
Сла́ва, глас 8:
Прииди́те, бо́лгарская мно́жества,/ соше́дшеся днесь, благове́рнаго царя́ Бори́са/ пе́сненными похвала́ми ублажи́м, глаго́люще:/ ра́дуйся, и́же трудо́м апо́стольским наро́ды ко Христу́ приведы́й/ и ца́рство земно́е на сниска́ние Небе́снаго употреби́вый./ Ра́дуйся, и́же сло́ва Бо́жия разу́мной про́поведи посо́бствовавый/ и ца́рству фаво́рское безмо́лвие,/ я́коже первоверхо́вный предпочты́й./ Ра́дуйся, равноапо́стольне царю́ Бори́се,/ от земны́я сла́вы незави́стно к Небе́сней преше́дый,/ о нас моля́ся непреста́нно, спасти́ся душа́м на́шим.
И ны́не, пра́здника.
Вели́кое славосло́вие и отпу́ст.
НА ЛИТУРГИ́И
Блаже́нны пра́здника, песнь рядова́я и свята́го 6-я. Проки́мен, глас 8: Во всю зе́млю изы́де веща́ние их/ и в концы́ вселе́нныя глаго́лы их. Стих: Небеса́ пове́дают сла́ву Бо́жию, творе́ние же руку́ Его́ возвеща́ет твердь. Апо́стол в Дея́ниих, зача́ло 49. Аллилу́ия, глас 1: Вознесо́х избра́ннаго от люде́й Мои́х, обрето́х Дави́да, раба́ Моего́. Стих: Го́споди, си́лою Твое́ю возвесели́тся царь. Ева́нгелие от Иоа́нна, зача́ло 35. Прича́стен: Во всю зе́млю изы́де веща́ние их:
А́ще Па́сха Христо́ва 22-го ма́рта, па́мять благове́рнаго царя́ Бори́са в пято́к Неде́ли о слепо́м. А́ще ли же Па́сха Христо́ва 25-го апре́ля, па́мять благове́рнаго царя́ Бори́са в неде́лю Фомину́. Ве́стно бу́ди: а́ще случи́тся па́мять свята́го царя́ Бори́са в неде́лю Фомину́, или Мироно́сиц, или́ Разсла́бленнаго, или Самаряны́ни, или́ Слепа́го, или́ в сре́ду Преполове́ния, или́ в сре́ду пред Возне́сением, внегда́ отдае́тся Па́сха, или́ в четверто́к Вознесе́ния, слу́жбу его́ пе́ти подоба́ет по те́мже глава́м, я́коже апо́столу Иоа́нну Богосло́ву, ма́я ме́сяца в 8-й день.
Моли́тва
О вели́кий уго́дниче Христо́в, благове́рный царю́ Бори́се, бо́лгарскаго ро́да крести́телю и всех нас пред Бо́гом предста́телю. И́же, нече́стие отри́нув язы́ческое и, во Еди́наго И́стиннаго Бо́га ве́ровав, Боже́ственное Креще́ние восприя́л еси́ и све́том благоче́стия просвети́л еси́ всю зе́млю бо́лгарскую; по сих же тле́нный вене́ц земна́го ца́рства оста́вив, безмо́лвное житие́ возлюби́л еси́ и подъя́л еси́ труды́ вели́кия, во е́же по́двигом и́ночества Правосла́вие на земли́ твое́й утверди́ти, бде́нными моли́твами благоутро́бие Небе́снаго Царя́ преклоня́я к новокреще́нным лю́дем. К тебе́ у́бо ны́не, я́коже ча́да ко отцу́, усе́рдно прибега́ем, гре́шнии и недосто́йнии, и в сокруше́нии се́рдца уми́льно глаго́лем: при́зри ми́лостивно с Небе́сных высо́т на моле́ние на́ше и твои́ми к Бо́гу моли́твами утверди́ нас незы́блемо в ве́ре Правосла́вней. Соблюди́ оте́чество твое́ и лю́ди от вся́каго зла́го обстоя́ния, прося́ нам у Го́спода Бо́га на́шего всех, я́же ко вре́менней и ве́чней жи́зни, благопотре́бных благи́х, я́ко да благоче́стно пожи́вше в ве́це сем, сподо́бимся и ра́йския жи́зни наслади́тися, иде́же вку́пе с тобо́ю и все́ми святы́ми просла́вим Отца́, и Сы́на, и Свята́го Ду́ха во ве́ки веко́в. Ами́нь.
Святой благоверный и равноапостольный царь Борис, во святом Крещении Михаил
Святой благоверный и равноапостольный царь Борис, во святом Крещении Михаил. Равноапостольный подвиг его был предсказан ему дядей, святым Бонном. Первые годы правления царя Бориса склады вались неудачно. Болгарам приходи лось часто воевать с соседними народами, страну посещали голод и мор, и в 860 году Болгария находилась в бедственном состоянии. Царь Борис видел спасение страны, пребывавшей в язычестве, в просвещении ее верой Христовой. Во время одной из войн болгар с греками был взят в плен именитый византийский придворный Феодор Куфара, ранее принявший иноческий постриг. Он был первым человеком, посеявшим семе на Евангельские в душе болгарского царя. Во время похода греки взяли в плен малолетнюю сестру царя Бориса, Она была воспитана при дворе византийского императора в Православной вере. Когда скончался император Феофил, царь Борис решил воспользоваться благоприятным случаем, чтобы отомстить грекам за предыдущие поражения. Однако вдова императора, Феодора, проявила мужество и послала вестника к болгарскому царю с предупреждением, что она сама будет защищать империю. Царь Борис предпочел мирный союз. В знак примирения состоялся обмен пленными. Феодора Куфару отдали в обмен на болгарскую царевну. Она еще более расположила брата к христианской вере. Несколько позже в Болгарию был послан святитель Мефодий, просветивший вместе со своим братом Кириллом славян светом Христовой веры. Святитель Мефодий совершил Крещение царя Бориса, его семейства и многих бояр. Болгары-язычники, узнав об этом, хотели умертвить царя Бориса, но их за говор был разрушен новокрещенным царем, а болгарский народ, лишенный мятежных вождей, добровольно принял Крещение. Между Византией и Болгарией был заключен мир, основанный на единстве веры, который не нарушался до конца правления благоверного царя. Большое участие в духовном утверждении болгарского народа принял греческий патриарх Фотий. В 867 году в Болгарию были посланы латинские проповедники от римского папы. С тех пор в течение трех лет в Болгарии царил раздор. Состоявшийся в 869 году Собор в Константинополе положил конец распре. 3 марта 870 года Болгария окончательно присоединилась к Восточной Церкви, и Православие в ней еще более утвердилось. В Болгарии прославились святые подвижники: святители Горазд (память 27 июля) и Климент Охридский (память 27 июля). Благоверный царь Борис украшал страну храмами и способствовал распространению благочестия, впоследствии в Болгарии была учреждена патриаршая кафедра. На склоне лет святой царь Борис удалился в монастырь, оставив престол сыновьям Владимиру и Симеону. Находясь в монастыре, благоверный царь узнал о том, что правивший после него Владимир стал на путь отступничества от христианства. Сокрушаясь о происшедшем, святой Борис вновь облачился в царские одежды, наказал непокорного сына и, лишив его зрения, посадил в темницу. Поручив правление младшему сыну Симеону, благоверный царь Борис возвратился в монастырь. Лишь однажды он вышел из него для отражения нашествия венгров. Преставился святой благоверный царь Борис, в святом Крещении Михаил, 2 мая 907 года.