Зал мучко В.А. Осиповын ныжыл семже йонга.
Пайрем касыш погынышо калыклан пайрем кумылым полекла.
Проектор гоч слайдым да видеом ончыкташ ямдылыме.
Вÿдышö: Поро кас, пагалыме Пöртанур калык, поро кас лийже, теле уреман,
шошо кумылан, кас вашлиймашке погынышо шерге уна-влак. А тидлан амалжат уло. Таче Пöртанур тÿвыра пöртын унаже – самодеятельный композитор, талантан музыкант Вячеслав Андреевич Осипов. Совынам шокшын-шокшын пералтен, сценыш эрташ ÿжына.
Вÿдышö: Мутат уке, районын поянлыкше, моторлыкшо нерген шуко ойлаш лиеш. Но тудын биографийыштыже тÿҥ верым айдеме налын шога. Мемнан Волжский район наукылан, литературылан, искусствылан, культурылан моткоч шуко талантан еным полеклен. Теве Пöртанур ялыште гына мыняр лÿмлö еҥ кундемнам чапландара: филологий наука доктор Л.П, Грузов, тале драматург, Марий Эл Республикын калык писательже Миклай Рыбаков, Марий Элысе тÿвыран сулло пашаеҥже, шке жапыште мемнан клубыштат пашам ыштыше А.В.Селин.
Эше ик гана ушештарем: тачысе унана – самодеятельный композитор В.А.Осипов. Тудым Марий Эл республикыште вел огыл, а ордыж кундемыштат палат да пагалат. Кугешнен да куанен палемден кодынем: Вячеслав Андреевич чылаже калыклан 300 утла мурым пöлеклен. Тудын возымо икмыняр мурым мемнан тÿвыра пöрт пеленсе «Ший эҥер» лÿман ансамбльат мура. А кызыт муро – «Мландылан ший салам».
(Пöртанур тÿвыра пöрт пеленсе «Ший эҥер» ансамбль мура)
Вÿдышö: Вячеслав Андреевич изи годсек мурылан шÿман кушкын. Кумшо класс деч вара Йошкар-Оласе школ-интернатыш баян дене шокташ тунемаш ачаже Андрей Иванович наҥгаен. Ты музыкальный школ деч вара эше кум училищым тунем пытарен. Тÿрлö профессийым налын, но утларакше садак муро шÿм-чонжым тарватен. Шке жапыштыже Моркиял клубышто художественный руководительлан пашам ыштен. Школышко музыкым туныкташ куснен, паша коклаштак Йошкар-Оласе колледж культурым, вара Маргосуниверситетын Сымыктыш ден искусство факультетыштезаочношинчымашым поген.Школышто пашам ыштымыж годым йоча-влакланат шуко мурым возен.
Тыге 2005 ийыште «Ӱшане, авай» («Верь, мама») сборник савыкталтын. Тиддеч вара «Вашке кушнем», «Шогалза теат пырля», «Шыже кумыл», «У ий кумыл», «Ава кумыл», «Шошо кумыл» да эше икмыняр муросборникым чумырен. Кызыт чылаже 11 йоча муро мультимедиа сборникше уло.
Мемнан тÿвыра пöрт пелен «Детство» йоча ансамбль пашам ышта. Йоча-влак Вячеслав Андреевичын икмыняр мурыжым куанен мурат: «Шочмо мланде», «Шочмо муро», «Лач тыге ме илена», «Бабушкины руки», «Пайрем кумыл», а теве «Шыргыжалын колтена» мурыжым видеопроектор гоч ончаш темлена.
«Шыргыжалын колтена» муро.
Вÿдышö: А ынде мутым Вячеслав Андреевичлан пуэна. Тек шке вияҥ толмо корныж дене шке палдара, а ме, йодышым ямдылен, шып гына колыштына,
(В.А. Осипов творчествыж дене кÿчыкын палдара)
Вÿдышö: Пеш кугу тау, Вячеслав Андреевич, радам дене, ласкан виктарен пуымыланда. Тендан каласкалыме гоч шуко уым да оҥайым пален налына. Ончаш толшо калык лÿм дене таум каласем да тыге манам: таза, пиалан да кужу ÿмыран лийза. Тек муроаланда умбакыжат пеледалт шога.
Вÿдышö: Кажне еҥ илалше але самырык, пöрье я ÿдрамаш, мурым йöрата. Иктылан шÿлыкан муро келша гын, весылан – весела муро. А кумшо еҥын кумылжым кажне муро савырен кертеш. Мыят тендан мурыдам йöратен мурем да таче ончаш толшо калыклан «Вашлийнам мые тыйым» мурым пöлеклынем. Скрипка дене Лариса Петрова шокта, виолончель партийым мый келыштарем. Мутшо -- Ираида Васильеван.
(«Вашлийнам мые тыйым». Пöртанур тÿвыра пöртым вуйлатыше Любовь Лебедева мура)
Вÿдышö: Вячеслав Андреевич Осиповын творчествыжым калык пала да пагала. Тудын мурыжым тыглай еҥат, лÿмлö артист-влакат куанен мурат. Нунын радамыште Татьяна Денисова, Геннадий Петухов, Роза Искакова, Эльвира Токташева, Лариса Сидоркина, Надежда Васканова, Володя Матвеев, Валерий Петров, Эдуард Тимофеев, Алевтина Иванова, Иван Смирнов, Наталья Глазырина, Инна Килеева, Галина Якушева, Евгений Иванов, Сергей Голомидов, Снежана Орлова, Татьяна Михайлова, Ирина Аликаева, Раисия Исанбаева, Пошкырт велнысе «Сорта» ансамбль да молат. «Кок пушеҥге» мурыда мыйынат шÿм-чоненым тарватыш, мураш таратыш. Ала таче, Вячеслав Андреевич, коктын муралтен колтена ыле?
(«Кок пушенге». Мутшо Людмила Дмитриева ден Вячеслав Осиповын, семже В.А. Осиповын. Любовь Лебедева ден Вячеслав Осипов мурат)
Вÿдышö: Пытартыш жапыште Марий радио дене чÿчкыдынрак Нина Агританован мурымыжым колтат. Артист-влакат уке-уке да ты мурым йоҥгалтарат, но Нинан мурымыжо вес семын йоҥга. Тудын йÿкшö калык гыч лекше, калыклан лишыл, яндарын да шыман шокта. Вет ты поянлыкым айдемылан пÿртÿс пöлекла. А тудын дене моштен пайдаланыше еҥ кумылым нöлта, весынат шÿм-чонжым тарвата. Колыштса да аклыза.
«Йолташем дене коктын» Нина Агританова мура. (Видеопроектор гоч видеороликым ончыкташ)
Вÿдышö: Тиде муро шотышто ала шке шонымашыжым да акшым Вячеслав Андреевичат кÿчыкын почын пуа?
(В.А. Осипов мутланымашке ушна)
Вÿдышö: Пöртанур кундемыште пашам йöратыше калык ила. Паша кокла гычак культур пöртышкат толаш жапым муэш. А таче «Ший энер» ансамбльын участникышт В.А. Осиповын такмак-влакшым йоҥгалтарат.
Такмак – влак. Пöртанур тÿвыра полатын «Ший энер» ансамбльже мура)
Вÿдышö: Тенийсе 2022-шо ий рушлаже «Год культурного наследия» маналтеш гын, марлаже «Тÿвыран поянлыкшылан пöлеклалтше ий» семын эрташ тÿҥалеш. Калык йÿлам, калык мурым, калык творчествым арален, жаплен да шарнен толаш манын, эн ончычак самырык тукымым шÿмаҥден, кумылаҥден шогышаш улына. Калык йÿлам аклыше, жаплыше еҥ веле поро чонан, илышлан куаныше лиеш. Юмылан тау, кеч пытартыш жапыште марий улмына дене кугешнаш, марий йылмынам пагалаш йöн утларак лектын шога. Вет шкенам шке пагалена гын веле рушыжат, суасшат мемнам пагалаш да аклаш тÿҥалыт.
Мутшо Ираида Степанован, сэмжэ Вячеслав Осиповын
(«Тый муралте маньыч да» Нина Агританова мура. (Видеопроектор гоч видеороликым ончыкташ)
Вÿдышö: А ынде мутым Вячеслав Андреевичлан пуэна. Мом шона тенийысе Идалык шотышто, марий муро, марий йылме, самырык тукым шотышто.
(В.А. Осипов поро тыланымашым каласа)
Вÿдышö: Тау чылалан, поро пошкудем-влаклан, уна-шамычлан, «Ший эҥер» ансамбльын участникыштлан! Тек марий муро кажне суртышто йоҥга! Тек марий йылме кажнын чонышто ила! Тек поро кумыл тÿням волгалтара! Тек кажне еҥ пиалан да таза лиеш! Вес гана вашлиймешке, чеверын!!!
Муро – влак.
1. «Мландылан ший салам». (Пöртанур тÿвыра пöртын «Ший энер» ансамбльже мура).
2. «Шыргыжалын колтена» мурым Пöртанур тÿвыра пöртын йоча ансамбльже видеопроектор гоч палдара.
3. Вашлийнам мые тыйым». (Пöртанур тÿвыра пöртын вуйлатышыже Любовь Лебедева мура).
4. «Кок пушеҥге». Мутшо Людмила Дмитриева ден Вячеслав Осиповын, семже В.Осиповын. (Любовь Лебедева ден Вячеслав Осипов мурат).
5. «Йолташем дене коктын» Нина Агританова мура. (Видеопроекторыште видеороликым ончыктат).
Такмак – влак.
(Пöртанур тÿвыра полатын «Ший энер» ансамбльже мура).
7. «Тый муралте маньыч да» Нина Агританова мура. (Видеопроекторыште видеороликым ончыктат).
8. «Эх, илашат сай». (Пöртанур тÿвыра пöртын «Ший энер» ансамбльже мура).