Священник: Вонмем. Мир всем.
Лик: И духови твоему.
Священник: Премудрость Прокимен,глас 3:
Пойте Богу нашему, пойте, / пойте Цареви нашему, пойте.
Стих: Вси языцы восплещите руками, воскликните Богу гласом радования.
Аллилуиа, глас 6: Вознесох избраннаго от людей моих.
Стих: Ибо рука Моя заступит его, и мышца Моя укрепит его.
Священник: Господу помолимся.
Лик: Господи, помилуй.
Священник: Яко свят еси, Боже наш, и во святых почиваеши, и Тебе славу возсылаем, Отцу, и Сыну, и Святому Духу, ныне и присно, и во веки веков.
Лик: Аминь.
И посем возглашает Священник: И о сподобитися нам слышанию святаго Евангелия Господа Бога молим.
Лик: Господи, помилуй, трижды.
Священник: Премудрость, прости, услышим святаго Евангелия.
Священник: Мир всем.
Лик: И духови твоему.
Священник: От Иоанна святаго Еванглия чтение. 10:1–9.
Лик: Слава Тебе, Господи, слава Тебе.
Священник: Вонмем.
Священник: чтет Еванглие
Лик: Слава Тебе, Господи, слава Тебе.
По сем канон или запевы вместо канона: 7, 8, 9 песни.
Священник: Иисусе Сладчайший спаси нас
Лик: Иисусе Сладчайший спаси нас
Священник: Пресвятая Богородице спаси нас
Лик: Пресвятая Богородице спаси нас
Священник: Святый равноапостольный великий княже Владимире, моли Бога о нас
Лик: Святый равноапостольный великий княже Владимире, моли Бога о нас.
По 9-й песни:
Священник: Слава Отцу и Сыну и Святому Духу
Лик: И ныне и присно и во веки веков аминь.
Достойно есть
Достойно есть яко воистинну / блажити Тя, Богородицу, / Присноблаженную и Пренепорочную / и Матерь Бога нашего. / Честнейшую Херувим / и славнейшую без сравнения Серафим, / без истления Бога Слова рождшую, / сущую Богородицу Тя величаем.
Таже чтец: Трисвятое. Пресвятая Троице: Отче наш:
Священник возглас: Яко Твое есть Царство:
Лик: Аминь
Тропарь святому равноапостольному князю Владимиру, гл.4:
Уподобился еси купцу, ищущему добраго бисера, славнодержавный Владимире, на высоте стола сидя матере градов, Богоспасаемого Киева: испытуя же и посылая к Царскому граду уведити православную веру, обрел еси безценный бисер - Христа, избравшего тя, яко второго Павла, и оттрясшего слепоту во святей купели, душевную вкупе и телесную. Темже празднуем твое успение, людие твои суще, моли спастися державы твоея Российския начальником и множеству владомых.
Священник глаголет сугубую ектению:
Помилуй нас, Боже, по велицей милости Твоей, молим Ти ся, услыши и помилуй.
Лик: Господи, помилуй, трижды.
И прочия…
Священник возглас: Яко милостив и человеколюбец Бог еси, и Тебе славу возсылаем, Отцу, и Сыну, и Святому Духу, ныне и присно, и во веки веков.
Лик: Аминь.
Священник: Ко святому равноапостольному, великому князю Владимиру, со умилением душ и сердец наших помолимся.
Лик: Святый равноапостольный великий княже Владимире, моли Бога о нас. нас.
Молитва
О великий угодниче Божий, богоизбранный и богопрославленный, равноапостольный княже Владимире! Ты отринул еси зловерие и нечестие языческое, уверовал еси во Единаго Истиннаго Триипостаснаго Бога и, восприяв Святое Крещение, просветил еси светом Божественныя веры и благочестия всю страну Русскую. Славяще убо и благодаряще Премилосердаго Творца и Спасителя нашего, славим, благодарим и тя, просветителю наш и отче, яко тобою познахом спасительную веру Христову и крестихомся во Имя Пресвятыя и Пребожественныя Троицы: тою верою избавихомся от праведнаго осуждения Божия, вечнаго рабства диаволя и адова мучительства: тою верою восприяхом благодать всыновления Богу и надежду наследования Небеснаго блаженства. Ты еси первый вождь наш к Начальнику и Совершителю нашего вечнаго спасения Господу Иисусу Христу; ты еси теплый молитвенник и ходатай о стране Русской, о воинстве и о всех людех. Не может язык наш изобразити величие и высоту благодеяний, тобою излиянных на землю нашу, отцев и праотцев наших и на нас, недостойных. О всеблагий отче и просветителю наш! Призри на немощи наша и умоли премилосердаго Царя Небеснаго, да не прогневается на ны зело, яко по немощем нашим по вся дни согрешаем, да не погубит нас со беззаконьми нашими, но да помилует и спасет нас, по милости Своей, да всадит в сердце наше спасительный страх Свой, да просветит Своею благодатию ум наш, во еже разумети нам пути Господни, оставити стези нечестия и заблуждений, тщатися же во стезях спасения и истины, неуклоннаго исполнения заповедей Божиих и уставов Святыя Церкве. Моли, благосерде, Человеколюбца Господа, да пробавит нам великую милость Свою, да избавит нас от нашествия иноплеменных, от внутренних нестроений, мятежей и раздоров, от глада, смертоносных болезней и от всякаго зла, да подаст нам благорастворение воздуха и плодоносие земли, да даст пастырем ревность о спасении пасомых, всем же людем споспешение о еже усердно службы своя исправляти, любовь между собою и единомыслие имети, на благо же Отечества и Святыя Церкве верне подвизатися, да возсияет свет спасительныя веры в стране нашей во всех концех ея, да упразднятся вся ереси и расколы, да тако поживше в мире на земли, сподобимся с тобою вечнаго блаженства, хваляще и превозносяще Бога во веки веков. Аминь.
Молитва вторая
О великий угодниче Божий, равноапостольный княже Владимире! Призри на немощи наши и умоли Премилосердаго Царя Небеснаго, да не прогневается на ны зело и да не погубит нас со беззаконьми нашими, но да помилует и спасет нас по милости Своей, да всадит в сердца наша покаяние и спасительный страх Божий, да просветит Своею благодатию ум наш, во еже оставити нам стези нечестия и на путь спасения обратитися, неуклонно же заповеди Божия творити и уставы Святыя Церкве соблюдати. Моли, благосерде, Человеколюбца Бога, да явит нам великую милость Свою: да избавит нас от смертоносных болезней и от всякаго зла, да сохранит и спасет рабов Божиих (имена) от всех козней и наветов вражиих и да все мы сподобимся с тобою вечнаго блаженства, хваляще и превозносяще Бога во веки веков.
Лик: Аминь.
Священник: Премудрость. Пресвятая Богородице, спаси нас.
Лик: Честнейшую Херувим / и славнейшую без сравнения Серафим, / без истления Бога Слова рождшую, / сущую Богородицу, Тя величаем.
Священник: Слава Тебе, Христе Боже, упование наше, слава Тебе.
Лик: Слава, и ныне: Господи, помилуй, трижды. Благослови.
Священник отпуст:
В неделю: Воскресый из мертвых, Христос, истинный Бог наш, молитвами Пречистыя Своея Матере, святых славных и всехвальных Апостол, (и святаго, егоже есть храм, и святаго, егоже есть день), святых и праведных богоотец Иоакима и Анны, и всех святых, помилует и спасет нас, яко Благ и Человеколюбец.
Лик: Аминь.
Величание равноапостольному князю Владимиру:
Величаем тя, святый равноапостольный княже Владимире, и чтем святую память твою, идолы поправшаго и всю Российскую землю святым крещением просветившаго.