КАНОН РАЗРЕШИТЕЛЬНЫЙ
Ко Спасу Иисусу Христу и Пресвятей Богородице
От Архиерея чтомый над женой, истребившей чада своя во чреве
КАНОН РАЗРЕШИТЕЛЬНЫЙ
Ко Спасу Иисусу Христу и Пресвятей Богородице
От Архиерея чтомый над женой, истребившей чада своя во чреве
Глас 8
Песнь первая
Ирмос: Истребившему в мори мучительство фараоне, и Израиля сушею наставльшему, поим Христу, яко прославися во веки.
Припев: Окропиши мя иссопом, и очищуся; омыеши мя, и паче снега убелюся.
Творче мой и Господи поспеши и направи сердце мое к покаянию, да всяко и аз немощная спасуся.
Припев: Окропиши мя иссопом, и очищуся; омыеши мя, и паче снега убелюся.
Неможение души моея веси, Христе, погубих бо ю, умершвляя исчадия чрева своего.
Слава Отцу и Сыну и Святому Духу.
Убийца бых и превзыдох Ирода окаяннаго буйством, жена сущи зверское показа яже на дети своя.
И ныне и присно и во веки веков. Аминь.
Дево Чистая, не отврати лица Твоего от скверны моея. Язву мою зриши, покаяние веси, воздыхание слышиши.
Песнь третья
Ирмос: Утверди наш ум и сердца, небеса словом утверждей, во еже пети и славити Тя, во спасение душ наших.
Припев: Окропиши мя иссопом, и очищуся; омыеши мя, и паче снега убелюся.
Зверя быв лютейши истребляя младенцы своя, ныне же в себе быв яко Рахиль плачуся горце.
Припев: Окропиши мя иссопом, и очищуся; омыеши мя, и паче снега убелюся.
Чада моя окровавленныя, света Божияго незревшия, крещением Христовым непросвещенныя, мною без жалости убиенныя: простите мя непотребную матерь вашу.
Слава:
Почто убило нас жено? Не сотворихом бо отнюдь зла на земли. Ныне покайся со слезами.
И ныне:
Пресвятая Дево, любве небесныя лучу, просвети душу мою светом покаяния.
Песнь четвертая
Ирмос: Услышах, Господи, смотрения Твоего таинство, разумех дела Твоя, и прославих Твое Божество.
Припев: Окропиши мя иссопом, и очищуся; омыеши мя, и паче снега убелюся.
Телесы своими поверзаеми в гной и смрад: кому бо повемы страсти наша, кого призовем ко рыданию, аще не матерей наших.
Припев: Окропиши мя иссопом, и очищуся; омыеши мя, и паче снега убелюся.
Увы мне, яко Иезавель превзыдох окаянством и с Иродиадою сравняхся в убийстве. Не смею же взирати и на небо, но токмо молюся мыторевыми словесы.
Слава:
Велика на небесех Троица Отче и Сыне и Душе Святый, на земли же долу мала: отец, мати и чада.
И ныне:
Дево Пресвятая, помози ми грешней, поревновати во истеннем покаянии и всяко спастися.
Песнь пятая
Ирмос: От нощи неведения Боговидения день, во свете лица Твоего, Христе, да возсияет ко утру хваление Твое в сердцах наших.
Припев: Окропиши мя иссопом, и очищуся; омыеши мя, и паче снега убелюся.
Отец мой и мати моя погубиша мене невиннаго младенца, но Ты, Господи, восприми мя, окрестив в пучине благости Твоея.
Припев: Окропиши мя иссопом, и очищуся; омыеши мя, и паче снега убелюся.
Не млеко, но горечь подах аз омерзенная чаду своему, не объятия, но клещи, да расторгнутся уды его, не пелены, но хлад смертный, не умиление, но мучение велия, о горе матери детоубийце.
Слава:
О, Пресвятая Троице, во Единице неслитно познаваемая, возми от мене бремя детоубийства; да не отрыгеши на мя гнев Твой.
И ныне:
Пречистая, Чистая Дево Богородице Марие, да буду и аз младенец убитый материю своею, в сонме чад Твоих по благодати.
Песнь шестая
Ирмос: Ризу мне подаждь светлу, одеяйся светом яко ризою, Многомилостиве Христе Боже наш.
Припев: Окропиши мя иссопом, и очищуся; омыеши мя, и паче снега убелюся.
Леностию греховную отягчихся аз отчаянная и убийства достигох. Поревновав скотом несмысленным и уподобихся им пожирающим чада своя.
Припев: Окропиши мя иссопом, и очищуся; омыеши мя, и паче снега убелюся.
Где нежнейший состав мой младенческий, из негоже наднебесный художник состави мя, очи неоткрывшиеся заидоша, язык неглаголавый умолче, вся моя уды люте испровергахуся материю моею и с калом смесишася.
Слава:
Триипостасный Боже, помилуй мя, отроча малое, да узрю свет Христов просвещающий всех, не своею бо волею отшед мира сего странствия.
И ныне:
Богородительнице Чистая, да не будет мне поноса, и уничижения в Царствии Сына Твоего – убиенный младенец вопиет сице.
Кондак: Из млада неведевше Христа, ни дома Божия, ни таинств, ни писаний Божественных; в возрасте брачнем скотски смесишеся блудодеяний был жилище, и наконец блудодеяние убийством раствори и дети своя уби; жестосердствующе прилежно жено окаянная.
Икос: С ниневитяне, и с Давидом приношу Ти песнь, Милосердный Иисусе. Иже блудницу не осудивый, не осуди мене во огонь, иже смоковницу непосекий, даждь и мне время, да добрыми делы просвещенна не забуду бо оный евангельский глас: покайтеся, приближися Царствие Божее.
Песнь седьмая
Ирмос: В начале землю основавый, и небеса словом утвердимый, благословен еси во веки, Господи Боже отец наших.
Припев: Окропиши мя иссопом, и очищуся; омыеши мя, и паче снега убелюся.
Прокляти сосцы недоящия и непитавшия, напитай, Спасе, убиеныя во чреве младенцы благодатию Твоею.
Припев: Окропиши мя иссопом, и очищуся; омыеши мя, и паче снега убелюся.
Помилуй, Иисусе, мя, окаянную жену, согреших паче блудницы, одебелевшее бо сердце помажи елеом милосердия Твоего.
Слава:
Прекрасная весно отрочество моего, куда удалися, жития моего мера почто истрясеся, увы мне младенцу забвенному.
И ныне:
Оружие пройде душу Твою, Богоблагодатная, зряще Сына Своего обещаннаго со злодеи, приими убо ныне покаянный плач жен притекающих к Тебе.
Песнь восьмая
Ирмос: Безначальнаго Царя славы Его же трепещут небесныя силы пойте священницы, людие превозносите во вся веки.
Припев: Окропиши мя иссопом, и очищуся; омыеши мя, и паче снега убелюся.
Несть греха, иже милосердие Божее не прощает, да убо не отчаемся и достигнем спасения.
Припев: Окропиши мя иссопом, и очищуся; омыеши мя, и паче снега убелюся.
Всяк согреши и аз паче всех, очисти, Господи, скверну души моея и помилуй мя.
Благословим Отца и Сына и Святаго Духа Господа.
Троице Святая, со дерзновением вопию Ти, всади в мя корень благих Твоих и исцели душу мою, яко согреших Тебе.
И ныне:
Христа Бога Нашего Мати воззри на мя, смрадную жену, благослови творите делы благи во искупление злодейств моих и жестосердия.
Хвалим, благословим, поклоняемся Господеви, поюще и превозносяще во вся веки.
Песнь девятая
Ирмос: Проявленное на горе законоположнику во огни и купине рождество Присно Девы, в наше верных спасение песнми немолчными величаем.
Припев: Окропиши мя иссопом, и очищуся; омыеши мя, и паче снега убелюся.
Чрез архиерейство Божее возможно прощение злосмрадия чадоубийства при покаянии не лицемернем и сердечнем.
Припев: Окропиши мя иссопом, и очищуся; омыеши мя, и паче снега убелюся.
Ничтоже превосходит Бога моего благоутробие и милосердие, крайние чисте бо кающиеся Он очищает и светлит и прощает, и света творит причастники.
Слава:
Верую, Спасе, яко можеши исцелите греховныя язвы души моея и возставити мя поникшую долу, воздвигнути руину сердца моего. Верую, Господи, помози моему неверию.
И ныне:
Матерь Света честнейши еси херувимови серафимов и всея твари, не остави и не забуди мя, убогаго отрочища, в беззакониих бо зачахся, но излиется и на мя закон любве Сына Твоего; и почию выну в мире простив родители моя да всяко спасутся.
Светилен: Во свети Лица Твоего, Христе Спасе, в радость и Божественный чертог славы Твоея совнидем чрез разрешение беззаконий волею и рукою архиерейскою. Притецыте же грешныя жены, убившия чад во утробе, прощение ваше зде предстоит и совершенно очищает.
Молитва от архиереа чтомая
Господь и Бог аш Иисус Христос благодатию и щедротами Своего человеколюбия да простит ти (имярек) детоубийца вся согрешения твоя, и аз, недостойный Архиерей, властию Его мне даною, прощаю и разрешаю тя от всех грехов твоих во имя Отца и Сына и Святаго Духа. Аминь.