Всем святым в земле Крымской просиявшим
К избранным угодникам всего Крыма притецем,/ яко благоуханному цветнику сада Иисусова/ от гор Крымских в Вертоград Небесный вознесенным./ Воспоим немерцающих светильников и бисер многоцветный,/ иже обретеся у гор Херсонеса и Сурожа, / у подножия Мангупа и Медведь-горы/ восхвалим подражателей Архангелом и небесных человеков/ почтим преподобных и святителей/ и лик мучеников возвеличим велегласно глаголюще: /слава прославльшему вы,/ слава Венчавшему вы, // слава в бедах Предстателя нам вы показавшему.
Кондак, гл.1
Стезею горною и тенистою шествуя, /юже возлюби наш Спаситель Христос и Его угодницы, / в подвизе поста и молитвы в Крыму потрудившися отцы пустынножители и матери боголюбивыя/ небесных врат достигоша./ Научите нас гор е имети сердца,// да внидем и мы в радость вечную со всеми святыми.
Служба всем святым, в земли Тавричестей просиявшим
На Велицей Вечерни
На господи, воззвах: стихиры на 8, глас 6-й:
Еже радуйся/Церковь Небесная и земная,/ празднующи соборную память/ святых покровителей и угодников Божиих, / в Таврии просиявших. /Днесь да возрадуются горы и удолия,/ да взыграет море восхваляюще Господа,// Даровавшаго нам сих заступников.
Святых и всехвальных апостолов Андрея Первозванного и Симона Зилота/в песнословиих превознесем,/ яко родоначальников и основателей Таврическия и Всероссийския Церкве / ихже Господь послаша в нашу землю,// яко первых Своих благовестников.
На Бога паче всего надеющеся,/ непозыблемым в вере сташа/ яко гора Сион, тако и ты, равноапостольне Клименте со ученики Корнилием и Фивом, / мужески претерпеша заточение в Херсонесе,// идеже мирови явишася, яко добрыя исповедницы Христовы.
|
|
О, веселие духовное, о, радосте святолепная /днесь приидоша в сердца пасомых и клира, / вострубим о великих словенских учителех,/ святых братиех Кирилле и Мефодии, / Богомудрых проповедницех закона Евангельскаго на брезех Таврии// и насадителех Православия.
Первопрестольниче и светильниче Всероссийский, / митрополите и чудотворче Михаиле, / приими наши сыновния похвалы./ Ты, Промыслу Божию содействующу,/ приплыша из Византии в Херсонес/ во еже просветити князя Владимира Крещением./ Паки восхваляем чудеса Божии,/яко и оттоле и вся Русь крестишася// и святою во веки наименовашеся.
Ины стихиры, глас 2-й:
Бог возведе в гору святыни Своея вас,/ святыя безсребреницы Космо и Дамиане./ От нечестиваго царя бегая,/ вы привиташа у горы Чатыр-Даг/ и тамо место подвигов ваших/ дивно прославися явлением целебнаго источника// и возграждением святыя обители.
Яко огнезрачныя Херувимы,/ вы предсташа пред Престолом Святыя Троицы,/ триста осмь страстотерпцев Христовых/ вкупе с царицею Гаафою,/ сожженныя в Готфии на церковной молитве/ и в Гурзуфе почивающая./ Молитесь о пастве, яко храмины душ ваших просветишася// Божественным сиянием.
Насажденныя в Дому Господни,/ во Дворех Бога нашего процветшия во веки/ яко кедры Ливанския и благоуханный сельныя крины/ вы, пречестныя отцы пустынницы/ насельницы гор и расселин Таврии/ яко птицы небесныя/ на крилех молитвы воспаряще к Богу/ Сице научите и нас возноситися к Нему молитвенно/ яко вы взыдоша на гору Господню и сташа на месте святем Его// Богосиянныя подвижницы.
|
|
Слава: и ныне: Богородичен: Глас тойже: Воспоим велелепую похвалу всим преславным апостолам и благовестникам Христовым, / преосвященным архипастырям, / победоносным мученикам, преподобным и Богоносным отцам и женам/ и всим праведникам Богокраснаго Собора Таврических святых, / иже наш край обогатиша святынею, / а днесь вкупе с Царицею Небесною молятся о преспеянии клира и паствы// и о спасении душ наших.
Вход. Прокимен дне. И чтения:
СОБОРНАГО ПОСЛАНИЯ ПЕТРОВА ЧТЕНИЕ
Братие, благословен Бог и Отец Господа нашего Иисуса Христа, Иже по мнозей Своей милости порождей нас во упование живо воскресением Иисус Христовым от мертвых, в наследие нетленно, и нескверно, и неувядаемо, соблюдено на небесех вас ради. Иже силою Божиею соблюдени верою, во спасение готовое явитися во время последнее. О немже радуйтеся, мало ныне, аще лепо есть: прискорбни бывше в различных напастех. Да искушение вашея веры, многочестнейше злата гибнуща, огнем же искушена, обрящется в похвалу и честь и славу, во откровение Иисус Христове. Егоже не видевше любите: и на Него же ныне не зряще, верующе же, радуетеся радостию неизглаголанную и прославленною, приемлюще кончину вере вашей, спасение душам.
ПРЕМУДРОСТИ СОЛОМОНОВЫЧТЕНИЕ
Праведницы во веки живут, и в Господе мзда их и попечение их у Вышняго. Сего ради приимут царствие благолепия, и венец доброты от руки Господни, зане десницею покрыет я, и мышцею защитит их. Приимет всеоружие рвение свое, и вооружит тварь в месть врагом. Облечется в броню правды, и возложит шлем, суд нелицемерен. Приимет щит непобедимый преподобие. Поострит же напрасный гнев во оружие: споборет же с ним мир на безумныя. Пойдут праволучныя стрелы молниины, и яко от благокругла лука облаков, на намерение полетят. И от каменометныя ярости исполнь падут грады, вознегодует на них вода морская, реки же потопят я нагло. Сопротив станет им дух силы и яко вихор развеет их, и опустошит всю землю беззаконие, и злодейство превратит престолы сильных. Слышите убо, царие, и разумейте, навыкните, судии концев земли. Внушите, держащии множества и гордящиеся о народех языков, яко дана есть от Господа держава вам и сила от Вышняго.
|
|
ЦАРСТВ ТРЕТИИХ ЧТЕНИЕ
Ста Соломон пред лицем жертвенника Господня, пред всем собором Израилевым. И, возвед руце свои на небо, и рече: Господи Боже Израилев, несть Бог, якоже Ты, на небеси гор е и на земли доле. Аще бо и небо и небо небесе не довлеют Тебе, како дом сей, егоже создах имени Твоему? Обаче и призриши на молитву мою, Господи Боже Израилев, услышати моления и молитву, еюже раб Твой молится пред Тобою к Тебе днесь. Да будут очи Твои отверсты на дом сей день и нощь, на месте сие, о немже глоголал еси: будет имя Мое тамо, еже услышати молитву, еюже молится раб Твой на месте сем. И послушати мольбы раба Твоего и людей Твоих, Израиля. И елика аще помолится к Тебе на месте сем, и Ты услышиши на месте жилища Твоего на небеси, и сотвориши, и милостив будеши им.
Стихира храма, таже СТИХИРЫна литии, глас 4-й:
Архиерей Великий и Первосвященник Христос/ послаша Свет Свой и Истину Свою / ученикам, апостолам и всем избранникам, / в Таврии просиявшим, / их укрепиша и наставиша// и введоша во святую Гору Свою.
Горы окрест святителей и исповедников Христовых/ Климента и Мартина, Инкерманских чудотворцев и их Богом данныя паствы,/ но не оставиша Господь Свое прелюбезное стадо и пастырей, / пречудно в пустыни их препиташа/ целебный источник из камени изведоша// и всим дароваше Свою богатую милость.
Радуйтеся, праведнии, о Господе, / правым подобает похвала и венцы нетленныя, / любосмиренныя отшельницы Таврическия. / Ублажаем ваши деннонощныя подвиги, / почитаем пресветлое житие./ Похваляем и безмездное врачевство недугов,/ святии безсребреницы Космо и Дамиане,/ яже вы низпосылаете доселе// предивныя угодницы Христовы.
Мнози скорби праведницы претерпеша, / и от всех их избавиша Господь, / яко страстотерпцы Его, в Таврии почитаемыя,/ присно под сень Креста притекаше, / врагам и мучителям противляшеся,// не боящеся тех коварства, ни ловительства.
Слава: и ныне: Богородичен: глас 3-й: Днесь притецем, людие, к тихому и доброму пристанищу, / Боголюбивей Матери Царя Превечнаго,/ даровавшей земли Тавричестей двадесять чудотворных Ея икон. / Освященному Собору святых мольбы возсылающе,/ благодарим Тя, Дево всепетая, и паки воспеваем// Твое вседержавное окормление и предстательство.
На благословении хлебов — тропарь Собору Таврических святых,
глас 4-й (Дважды):
Днесь Христоименитыя чада церковныя светло празднуют/ осеняемыя вашим, святыя угодницы Божия, пришествием, / и к вашему взирающе пречестному образу умильно глаголем,/ воспевающе бисер многоценный,/ обретенный у гор Херсонеса и Сурожа,/ у подножия Мангупа и Медведь-горы/ ублажим земных Ангелов и небесных человеков/ величающе Живоначальную Троицу:/ слава Прославльшему вы,/ слава Венчавшему вы, //слава ходатаи нам вы Показавшему.
Слава: и ныне: Богородичен: Еже от века утаенное:
Стихиры на стиховне, глас 2-й:
Великая звезда, от запада востекшая к востоку,/ ты еси, муж апостольский, святителю Клименте,/ учениче первоверховнаго Петра,/ ты по кончине являше дивное чудо отшествия воды у мыса Херсонеса,/ показуя пасомым на дне моря твоя многоцелебныя мощи. / Яви нам, святче Божий, твою милость, / да и мы, хладныя к вере, к Богу прилепимся, // и волны страстей от нас отступят.
Воистинну пути Господни неисповедимы, / предивно и призвание князя Владимира к подвигам апостольским, / иже десницею Всевышняго укреплен,/ идольскую прелесть отринул еси/ и в Херсонесе святым Крещением просветися, // светом познания Христова Таврию и всю землю Русскую озарил еси.
Велиции исповедницы Христовы,/ седьмочисленныя святителие Херсонесския:/ Василие, Ефреме, Евгение, Елпидие, Агафодоре, Еферие, Капитоне,/ вы в краю нашем Христа проповедаша,/ за Него и пострадаша./ Молитеся о пастве, да вашим заступлением обрящем силу и крепость // и на супостаты победу и одоление.
Паче песка морскаго и звезд небесных множае/ бысть ваши труды и добродетели, / отцы пустыннолюбцы, прехвальныя черноризцы/ вы, молвы житейския бегая, / Крест Христов на рамена возложиша, / блага вечныя унаследоваша. // Молитеся, богоносныя отцы, о процветании Церкви Таврическия.
Слава: и ныне: Богородичен: глас 8-й: Яко лествицу высокую, досязающую до небесе, / и яко Гору Тучную, Еюже к Богу восходим, / имеяше Тя, Царице Небесная/ вси святии земли Таврическия. / О, Дево преблаженная,/ молися со всем Освященным Собором, / да подаст нам Всемилостивый Спас / Свою велию милость.
На утрени
На Бог Господь: Тропарь Собора Таврических святых (дважды) Слава: и ныне: Богородичен:
По первом стихословии — седалъны, глас 1-й:
От гор и пещер Таврических вы в Горний Сион взыдоша,/ достоблаженныя угодницы Христовы, / сего ради празднество соборныя вашея памяти совершающе, / вкупе с вами преисполняемся неземнаго торжества // и Божественнаго хваления.
Слава: Священнейшую вашу память благочестно сотворяюще,/ Христолюбивыя подвижницы и насельницы райских Чертогов,/ молим вас:/ у Бога нам испросите мир и тишину, //отечеству — благоденствие, клиру и пастве — велию милость.
И ныне: Богородичен: Небесной Госпоже и Деве Марии/ днесь принесем преиспещренную песнь, /юже молитвенно возносим Ей, / вкупе с великоименитым Собором праведников// и сынов Отца Небеснаго.
По втором стихословии — седалъны, глас 7-й:
Разум приимше от Бога превыспренный, / преподобныя отцы Таврии, / ея пламенныя исповедницы и презельныя постницы, / неустанныя молебницы о душах наших. / Вы красная мира сего в уметы вмениша, // миром душевным обогатишася на веки.
Слава: Благих и верных рабов Своих, страстоносцев, / в краю нашем прославленных, / чрез лютыя страдания Господь призваша к Житию вечному, / величающе их подвиги, // паки под кров молитв их притекаем.
И ныне: Богородичен: глас тойже: Госпоже мира горняго и земнаго, Дево воспетая, / днесь вси чада Твоя возвеселишася и возрадовашеся, / зряще сие торжество небесныя и дольния Церквей. // Паки яви нам Твое заступление и утешение.
Полиелей. Таже величание: Величаем вас, / святии вси, в Тавриде просиявшия,/ и чтим святую память вашу,/ вы бо молите о нас// Христа Бога нашего. Псалом избранный: Услышите сия, вси языцы:
По малой ектении — седальны: глас 5-й:
Яко солнце полуденное, / пресветло нам возсия Богокрасный Собор угодников и чудотворцев Христовых, / в Таврии прославленных, / они для нас явишася всенадежным ветрилом веры, // во еже от обуревания грехов спастися.
Слава: Церковнаго неба вы есте звезды присносияющия и Богосветлыя, / озарающия нам путь в нощи неведения и маловерия, преподобныя отцы и достохвальныя пустынницы, / в Таврии от века прославленныя, / в е домыя и сокровенныя,// озарите души наши светом любве и Боговедения.
И ныне: Богородичен: глас тойже: Смиренномудрием осиянных/ долготерпением исполненных, / любовию просвещенных в согреянных, / святителей Христовых воспоим, / ублажим и полцы мучеников/
почтим и лик преподобнический, / сии угодницы возлюбиша Господа и Его Пречистую Матерь, / Ейже хвалы и благодарения по силе приносим.
Степенна. От юности моея:
Прокимен, глас 4-й: Во всю землю изыде вещание их, и в концы вселенныя глаголы их. Стих: Небеса поведают славу Божию:
Евангелие: От Луки, зачало 24-е.
Слава: Молитвами всех святых, в Таврии просиявших, Милостиве:
И ныне: Молитвами Богородицы, Милостиве, очисти:
По 50-м псалме — стихира, глас 6-й:
Единое на потребу имущи попечение, / апостоли и святителие, царие и царицы,/ князие и княгини, мученицы и преподобныя/ вы в добродетелях преуспеша,/ молитвами окрылишася,/ терпением украсишася,/ в земли Тавричестей просияша/ и оттоле к Горним Селениям удоб востекоша, /идеже с небожителями и безплотными утешаетеся, // наши духовныя стражие и покровителие.
Канон на 8, глас 6-й, егоже краегранесие:
ВСЕМ УГОДНИКАМ БОЖИИМ ЗЕМЛИ ТАВРИЧЕСКИЯ БЛАГОДАРСТВЕННОЕ ПРИНОСИМ ПЕНИЕ
Песнь 1
Ирмос: Волною морскою Скрывшаго древле гонителя мучителя под землею скрыша спасенных отроцы: но мы, яко отроковицы, Господеви поим, славно бо прославися.
Припев: Вси святии земли Таврическия, молите Бога о нас.
Всехвальныя апостоли Андрее Первозванный и Симоне Зилоте, / благовестницы Таврии, святителю Аполлинарие Равеннский, проповедниче Скифии, / трудами вашими мрак удолий просветишася, тьма язычества отгнашеся, / насадишася и утвердишася Православие.
Сеть апостольския твоея ловитвы бысть воистинну крепка/ преславне и Богоглаголиве святителю Клименте с ученики твоими Корнилием и Фивом. / Ты от нечестивых в Риме пострадаша и в Инкерманския каменоломни сослан бысть, / идеже мнози пещерныя храмы устроиша/ и правую веру утвердиша.
Еже с небесе Духа Святаго со апостолы приявшия и к их лику Церковию причтенныя, / святыя царие Константине и Елено. / Вы сею благодатию чудодействуя дивно, капища в Таврии разориша. / Крест Христов тамо водрузиша и утвердиша жертвенницы Ведомому Богу./ Благословите сие песнопение, /прехвальныя угодницы Спасовы.
Мысленных волков от паствы вы далече отгнаша, равноапостольныя святителие Асхолие Солунский и Никито Ромесианский, первоучителие Готфии и Скифии. / Молитеся прилежно о просвещении паствы и спасении душ наших.
Угодницы Христовы, святыя равноапостольныя братие Кирилле и Мефодие, / вы Закон Божий возвещаше в Хазарии и Таврии, / в Фульсте языце/ близ Сурожа/ вами пресечеся поклонение дубу, / в Херсонесе вы обретоша мощи святаго Климента, / дивнаго во святых угодника.
Горняя сташа ты мудрствовати, а не земная, / святая равноапостольная княгине Ольго, / егда ты чрез Таврию притече в Царьград, / идеже крестишася, / защитительнице и покровительнице Земли Русския/ и ея велегласная благовестница.
Огласишася поморие Таврическое священным пением и молитвословием/ егда великий князь Владимир соделашеся избранным сосудом Святаго Духа / и, просветишася чрез святое Крещение,/ приим многую святыню во граде Херсонесе, / к горам Киева притекоша.
Слава: и ныне: Богородичен: Дево Безневестная/ всех Царице и Богородице Дево/ Ты благоволила явити/ Свой первописанный образ Иерусалимский новопросвещенней Таврии. Сия икона пречудно просияша исцеленьми не точию в пределах Херсонеса, но и в велицем граде Киеве, а последже и в Новеграде.
Катавасия по Уставу.
Песнь 3
Ирмос: Прежде век от Отца Рожденному нетленно Сыну и в последняя от Девы, воплощенно безсеменно, Христу Богу возопиим: вознесый рог наш, Свят еси, Господи.
Небеснаго Града прилежно взыскуя и словесное стадо Христово добре пасоша, / вы, иерарси Господни, Евангеличе и неведомый святителю, Томитанския и Скифския, /Домне и Кадме Босфоро-Киммерийская/ пречестныя отцы Перваго Вселенскаго Собора,/ утвердившия догматы веры в краю нашем.
Изрядныя и предобрыя архипастырие Христовы, / неустанныя сеятели Слова Божия на нивах сердечных, / святителие Феофиле Босфорский, Вретанионе Скифский, Еферие вторый Херсонесский, Генфолие Готфский, бодренныя проповедницы, / достохвальныя просветителие, / молитеся о пастве, / да не оскудеет в ней дух кротости и братолюбия.
Камнями веры твердейшими вы воистинну сташа, / Скифския святителие Спасовы Геронтие и Феотиме первый, Иоанне Златоусте с учеником Унилою Скифским, / Церкви предстателие, ея неусыпныя учителие, догматов церковных хранителие/ и еретических плевел искоренителие.
Ангелы во плоти и человецы небесныя вы есте, / архипастырие Богоразумныя Тимофее, Павлине/ Скифския Церкве предстоятелие, / и Анатолие, Патриарше Цареградский. / Вы с кротостию окормляше паству, от волков мысленных ю соблюдаше, / сего ради явишася не токмо духовныя стражие, / но и всея Таврии сокровище/ и нетленное украшение.
Молитвенников наших достоблаженных, / святителей Лонгина и Александра Херсонесских, / Евдоксия Босфорскаго, Валентиниана Скифскаго, / прехвальных иерархов Христовых / днесь восхвалити подобает, иже злочестие еретическое посецая, / на Вселенских Соборах Православие утвердиша.
Беды мнози и злострадания от неверных вы подъяша/ архипастырие Стефане Херсонесский, Мартине Исповедниче, Инкерманский чудотворче, / неведомый затворниче Сосфенский, подвижниче Херсонесский и Хазарский, / Стефане Исповедниче, Сурожский. / Молитеся о пастве, да и мы скорбей и напастей избегнем.
Отцы чадолюбивыя и сирот милостивыя питателие, / немощей наших скорыя и безмездныя врачевателие / и вселенныя учителие и святителие, / Стефане Новый Сурожский, Никито Готфский и Андрее Босфорский, / Седьмаго Вселенскаго Собора предстателие, / и Филарете Сурожский, / вы златословесными ученьми зело просветиша и обогатиша паству.
Слава: и ныне: Богородичен: Живоносный Источник благодати Ты еси, Дево, / источающая во всяком роде и роде токи исцелений, / даровавшая великомученику Никите, Готфскому и Таврическому, / Свой образ, именуемый Новоникитский, / егоже на персех он с любовию носиша. / Научи и нас сему Боголюбию, о, Дево Всепетая.
Седален Собора Таврических святых, глас 3-й:
Заповеди Господни свято соблюдая и богомыслием просвещаяся/ вси угодницы и чудотворцы Божии земли Таврическия, / вы душевредныя лености бегая, яко сетей велиаровых, / на врагов невидимых силою Креста ополчашеся, / и за сие возвеселишася вы пред лицем Ангелов радостию безконечною.
Слава: и ныне: Богородичен: Царице Небесной присно возсылая славословие во дни и в нощи/ святии воздержницы и пустынницы края Таврическаго, / вы велию благодать от Нея стяжаша, / молящеся пред созвездием Ея чудотворных икон, / и жало смерти вас не одолеша, / и возрадовашеся дух ваш, зряще Селения вечныя.
Песнь 4
Ирмос: На Кресте Твое Божественное истощание провидя, Аввакуме, ужасеся, вопияше: Ты сильных пресекл еси державу, Блаже, приобщаяся сущим во аде, яко всесилен.
Избранницы Божии, велегласныя благовестницы и служителие Святыя Троицы, / Богоблаженныя святителие, Иоанне Исповедниче Готфский, / Георгие Исповедниче Митиленский и Херсонесский, / Георгие вторый Херсонесский, / Фотие Патриарше Цареградский и Таврический/ паки величати не престанем вас, / яко память ваша незабвенна пред Богом.
Изрядных иерархов днесь воспоим:/ святителя Полиевкта Цареградскаго, / крестителя святыя Ольги, / первосвятителя Михаила Киевскаго, Иоакима Корсунянина, благовестника Новгородскаго, Николая Тмутараканскаго, / великих просветителей Руси и Таврическия Церкви похвалу и доброту.
Моисею подобящеся, / вы святителие и архиереи Божии, Савво Сурожский, Леонтие Цареградский и Таврический, Василие Сурожский и Алексие, митрополите Московский, / вы на гору чистоты и безстрастия взыдоша, / преобильныя благодатныя дары восприяша, / весь край наш светом Христовым просветиша.
Зряще ангельския светлости, апостолов велелепие, / лик патриархов и сонмы мучеников, / преосвященныя святителие Варсонофие Тверский, Амвросие и Никифоре, Таврическия, Григорие пятый патриарше Цареградский, / молите со всеми святыми Человеколюбца Христа, / во еже даровати нам отпущение грехов.
Ед и ницу несозданную, Божие Слово, / богословили вы есте, святителие земли Таврическия, / Треми Лицы разделяему, непресекому и неслиянну. / Молитеся архипастырие Христовы Онисифоре, Иннокентие, Поликарпе и Серафиме о правоверной пастве.
Многосветлыя звезды на небе церковнем вы есте, / святителие Божии Димитрие и Никаноре Таврическия, Иосифе Владикавказский, Ермогене Таврический, / да вашим молитвенным покровом соблюдаемыя, / приступим мы ко Христу и причастницы Жизни вечныя будем.
Лозы доброплодныя в Вертограде Христовом явишася вы,/ иерарси Господни Борисе и Флавиане, сподвижницы святаго равноапостольнаго Николая Японскаго, Иустине Уфимский. / Величаем вас, яко вы есте пречестныя отрасли Церкви Таврическия, ея молитвенницы и покровителие.
Слава: и ныне: Богородичен: Икона Твоя, Госпоже Пречистая, / именуемая Панагия-Бахчисарайская, / издревле просияша, яко цельбоносная святыня, на велицей скале, / идеже явишася источник и обитель основашеся. К образу сему притекше не токмо верныя, но и агаряне. Пред иконою сею молящеся, / неослабно уповаем на Твоя неоскудныя и богатыя милости.
Песнь 5
Ирмос: Союзом любве связуеми, апостоли, Владычествующему всеми себе Христу возложше, красны ноги очищаху, благовествующе всем мир.
Таин Божественных благовестницы вы есте, / правоверныя царие Иустиниане и Феодоро, Цареградския и Скифския, Ирино Хазарская, / вы святую Церковь укрепиша в краю нашем/ и силою веры стяжали еси богомудрие, / сего ради просветишася души ваша.
Агнцу безлетному Христу вы зело поревновали есте, / благоверныя князие и исповедницы Христовы, Аскольде и Дяре Киевския, / исповедниче Глебе, сродниче святыя Ольги, в Скифии пострадавый, Владимире Новгородский и Херсонесский, Романе Тмутараканский, / вы полцы неверных победиша, / и Ангелы немолчно славославят подвиги и труды ваши.
Верныя и благия рабы, вшедшия в радость с Господом, вы есте, / благоверныя князие Феодоре Трапезундский, Мстиславе Киевский, Феодоре Ярославский вкупе с Мариею, / для блага земли Таврическия вы зело потрудишася, / сего ради и предстоит е днесь в сонме избранников.
Равноангельное житие ваше похваляем, / ублажаем и праведное служение ближним/ за сие вы удостоишася и предстояния пред Богом, / правоверне Стефане Феодосийский, Григорие Мангупский, Иоанне Острожский и Таврический, Исаие воеводо Мангупский.
Иноческих полков пречестное украшение вы есте, / благоверныя князие Феодоре Острожский и Константине Мангупский, Константине Острожский и Перекопский, Василие Острожский, Феодоро, царице инокиня Сурожская, / пресветлыя сосуды, елеем молитвы исполненныя / и в наших душах негасимый светильник веры возжигающия.
Чада, Отцом Небесным возлюбленныя и желаемыя, / явишася пред Ним вы, / преподобныя отцы, пресвитеры Авдие и Евтихие, просветители Готфии, Иоанне-Кассиане, Новый Богослове Херсонесский, Тимофее и Феостирикте Балаклавския, Кирилле Готфский, Давиде Босфорский.
Еже о пастве исполнив смотрение, / Богоносныя отцы Лонгине Готфский, Петре Скифский, Афанасие и Кирилле, Цареградския и Таврическия, Николае Исповедниче Студийский, Иосифе Песнописче Херсонесский,/ Григорие, пресвитере Киевский, наставниче святыя Ольги, / вы преселишася от земли к небесем, / отонюдуже низпослите мир пастве Таврии.
Слава: и ныне: Богородичен: Святая икона Твоя, Богородице Дево, / по воле Твоей написанная апостолом Христовым Лукою / и наименованная Корсунскою, / прибыша из Царьграда в Херсонес / при Крещении святаго Владимира, / поморие Тавриды освятиша и паству возвеселиша.
Песнь 6
Ирмос: Зверю бездны предается пророк Иона, глубине морской, прообразуя Твое, Слове, тридневное востание. Тем и взываше: из глубины преисподния возведи живот мой, Благоутробне.
Крестным путем шествуя/ и молитвами облагоухавшия путыни и удолия Таврикии/ вы подвигами иноческаго жития укрепиша паству/ и души своя, яко жертву чисту, / Богови принесоша, / преподобныя отцы Лампаде Отшельниче, Никоне Тмутараканский, Никоне Сухий, Таврический, Несторе Печерский, Памво Боголюбивый, Евстафие старший, Евстафие младший вкупе с Феодосией/ и Аполонице благоговейный, Херсонесския подвижницы Божии.
Истину Христову житием непорочным и ангелоподобным проповедуя, / в скорбех с Божиим Сыном сораспинаяся, / Богоносныя отцы, неведомый по имени, в Инкермане чудотворениями просиявший, / Иоанне старче Балаклавский и Оптинский, /
Андрее исповедниче Каирский и Таврический,/ Лаврентие Прозорливый, Антоние Постниче Феодосийский, / научите нас Господу благоугождати.
Яко немеркнущия светильницы, / десницею Божией на тверди небесной возженныя, / явишася вы, преподобныя отцы, / души за ближних полагавшия, / Вонифатие Херсонский, Макарие Алуштинский, Иоанне Керченский, Павле Симферопольский, Стефане и Исаакие Таврическия.
Богодарованныя Божии праведницы,/ Феодоро Цареградская, Анфуса Хазарская и Параскево, отшельнице Сурожская, / вы Ангелом в житии поревноваша, / от Бога венцы нетленныя восприяша, /сего ради вас в сонме Таврических святых ублажаем.
Ластовица сладкогласная, в пустыне Инкерманской восхвалявшая Творца, / святая мученице Флавия-Домитилла, / ученице святаго Климента, / доблии страдальцы Инно, Пинно, Риммо, /сподвижницы апостола Андрея, / нетленное богатство града Алушты, / обогатите души наши / сокровищем веры и благочестия.
Агнцы непорочныя за веру от агарян избиенныя, / четыредесяте отроков Зуйских, / вы души просветиша страданьми добротворными/ и обручишася Жениху Небесному, / в Чертозех светловидных удобь вселилися еси/ предивныя избранницы Божии и пламенныя свещи девства./ Молитеся о пасомых, ублажающих вас во веки.
Грядущаго града Иерусалима взыскуя, / вы, святыя страстоносцы, великомучениче Меркурие Скифский, / Савво Стратилате с седмьюдесятью воины, / бессребреницы Космо и Дамиане Таврическия, мучения претерпеша за Христа. / Темже притекающе к вам, / недугов исцеления приемлем.
Слава: и ныне: Богородичен: Образу Твоему многоцелебному, / Госпоже и Дево, / издревле явленному в Херсонесе, / князем Ольгердом в Вильно принесенному, / вси вернии поклоняются/ и мольбы приносят. Приими и ныне прошения наша, / Вседержавная Царице, / яко Тя воспеваем.
Кондак Собору Таврических святых, глас 3-й:
Стезями тернистыми и горними шествуя,/ имиже взыдоша от земли к Небесем, / святии апостоли, иерарси, царие и князие,/ девственницы и праведницы земли Таврическия, / в подвизех пастырства, исповедничества и мученичества просиявшия, / в е домыя и сокровенныя,/ вы благочестно Небесных вершин и врат Райских достигоша./ Молитеся о пастве, во еже и нам гор е имети сердца // и внити в радость со всеми вами.
Икос:
Днесь Таврическая Церковь вкупе с Небесною/ прославляет всечестную память Богосветлаго Собора, / в краю нашем прославленных угодников./ Трудами апостолов Андрея и Симона насажденная/ усердием святаго Климента и его учеников утвержденная,/ преудобренная подвигами прочих иерархов и отшельников,/ преукрашенная кровьми мучеников, / святая Церковь в Таврии, / яко крин процветоша, породиша водою и Духом святаго Владимира Великаго/ и сонмы угодников Божиих. Сего ради, вкупе со всеми небесными силами воспеваем сию песнь хвалебную: / Радуйся, Боговенчанный Соборе святых Таврии, / радуйся, предивный цветниче Иисусов.Радуйтеся вси святии, добрыя делателие Вертограда Христова, / на земли Тавричестей и на Небесех просиявшия.
Песнь 7
Ирмос: Неизреченное чудо: в пещи Избавивый отроки из пламене во гробе мертв, бездыханен полагается во спасение нас, поющих: Избавителю Боже, благословен еси.
Доблии мученицы Христовы, /Орентие, Фарнакие, Еросе, Фирмосе, Фирмине, Кириаче и Лонгине Скифския/Онисифоре и Порфирие Инкерманския/мучителей не убояшеся, друг ко другу рече: /злодеев не убоимся, /не уныем и временных мук. /Сим бо отверзеся рай, и Ангелы им венцы простроша, воспевающе: /Избавителю Боже, благословен еси.
Аще и обагришася кровьми страданий ризы и телеса ваши, святыя великомученицы Георгие Победоносче и Никито Готфский, / велиции покровителие Таврии, / но огнь мучений росою благодати оросишася и, яко ратоборцы Господни, вы венцы от Него восприяша, со безплотными вкупе в веселии глаголюще: /Избавителю Боже, благословен еси.
Река пламени и огня вас не смутиша, /святыя мученицы, в Готфии на церковней молитве пострадавшия, вси триста осмь страдальцев к Богу возопиша, и Он восприял вас в Кровы света и прохлады, / а телеса ваша в Гурзуф принесены бысть, / идеже вернии, к ним притекающе, исцеление приемлют и ко Врачу Небесному вопиют: Избавителю Боже, благословен еси.
Свирепства гонителей не убояшеся/ и в пламени мучений не сгораемыя/ святый страдальче Ерминингельде Готфский/ и два неведомых страдальца воина Ески-Керменския, вы души своя в Пренебесный Жертвенник принесоша, идеже Подвигоположнику Христу возгласиша: /Избавителю Боже, благословен еси.
Таврическия Церкве столпы непоколебимыя,/ мученицы и исповедницы Святыя Троицы, / Павле и Иоанне Таврическия, / Евстафие, отроче Феодосийский, / вы лесть агарянскую отринуша. /во броня веры облекостеся и, чудо спасения вечнаго улучающе, прославляюще Всемогущаго Бога: / Избавителю Боже, благословен еси.
Вы чашу горьких мук на поле брани испиша, сто тысящ воинов — защитников Православия, / противу агарянских полчищ восташа, /души праведныя за ближних положиша/ в Севастополе, Инкермане, Бахчисарае, Керчи, Евпатории и на реце Альме./ Молитеся, Царя Небеснаго слузи, да козней и ополчений вражиих избегнем, во еже вкупе с вами Воеводе Небесному воспевати:/ Избавителю Боже, благословен еси.
Егда вы с пламенною ревностию благовестиша в Таврии Божество Истинное, / святыя священномученицы Василие, Ефреме, Капитоне, Евгение, Еферие, Елпидие и Агафодоре Херсонесския, / тогда и враг невидимый не дремаша/ но наустиша злочестивыя предати вас мукам. Но и в пещи искушений злато веры вашея возблисташа, и купно к Единому Утешителю возопиша: / Избавителю Боже, благословен еси.
Слава и ныне: Богородичен: Невесто Неневестная, икона Твоя, нарицаемая Минская, / из Херсонеса святым Владимиром Великим в Киев принесена бысть / и тамо в Лавре просияша, / по агарянском разорении образ сей предивно, вверх по Днепру, приплыша в Минск, / идеже прославишася паки токами чудес и исцелений, / а вернии славословяще Господа: /Избавителю Боже, благословен еси.
Песнь 8
Ирмос: За законы отеческия блаженнии в Вавилоне юноши, предбедствующе, царюющаго оплеваша повеление безумное и, совокуплени, имже не сваришеся огнем, Державствующему достойную воспеваху песнь: Господа пойте, дела, и превозносите во вся веки.
Небеснаго Воеводы предоблий ратниче ты еси, / священномучениче Филие, святителю Томитанский и Скифский, / ты всего себе Владыце принесл еси и сего ради исшел еси противу рати демонов/ и долготерпением препобедиша их. / Темже, на небеси, яко победоносец предстоиши, вопиюще: / Господа пойте, дела, и превозносите во вся веки.
Ежелетнюю твою память совершающе, / священномучениче Никифоре Феодосийский, / с любовию похваляем подвиг твой, / яко ты, Божественному Крестоносцу подражая, / на древе за Него от агарян повешен бысть. Уповаем, яко молитвами твоими / души наши убелятся и просветятся, да вкупе с тобою не престанем воспевати Богови: Господа пойте, дела, и превозносите во вся веки.
Подвижницы Христовы многострадальныя, / священномученицы Давиде и Данииле Феодосийския, / вы страданьми неверных просветиша, / правоверие утвердиша, / да паства, молитвами вашими ограждаема от напастей и прилогов вражиих, / Всемилостивому Спасу вопиет: / Господа пойте, дела, и превозносите во вся веки.
Ревнуя о просвещении и спасении Таврическия паствы, / ты, святителю Моисее Феодосийский, / уподобишася древнему Моисею, / и, яко добрый архипастырь, душу за пасомых положиша, / за веру пострадаша. / Молися Пастыреначальнику Христу, / да и мы вечных мук избавимся, / с тобою возглашая: / Господа пойте, дела, и превозносите во вся веки.
Игумена Парфения, / священномученика Кизильташского и Сурожского, / днесь ублажим, / яко он краснейшим прозябением добродетелей в Дому Божии процвел еси, / за Христа от агарян пострадаша, / и днесь нашу молитву Ему принесет, / яко благовонное кадило, / во еже и нам тепле восхваляти Святую Троицу:// Господа пойте,дела, и превозносите во вся веки.
Наследницы Чертогов Божественных, / светильницы Триипостаснаго Бога, / вы, Епиктете и Серапионе, пресвитеры и Астионе иноче, / преподобномученицы Скифския, / ангельски на земли подвизашеся, / темже и за Христа пострадаша/. Сего ради и со Ангелы срадовашеся дух ваш,/ егда вы Творца славословите: / Господа пойте,дела, и превозносите во вся веки.
Слава: и ныне: Богородичен: Образ Твой, Владычице, зовемый София, Премудрость Божия, / издревле просияше в Херсонесе и Суроже, врагов уловляя и верных от клятвы свобождая. Молися, Дево, яко Милосердая Царице, нас невредимых сохрани, Имя Твое боголепно славящих и вопиющих: / Господа пойте,дела, и превозносите во вся веки.
Песнь 9
Ирмос: Странствия Владычня и Безсмертныя Трапезы на Горнем месте высокими умы, вернии, приидите, насладимся, вошедша Слова, от Слова научившеся, Егоже величаем.
Святых четыредесять дев-постниц вкупе с их учителем диаконом Аммуном ублажим, / яко сии преподобномученицы за Христа добльственно пострадаша в Скифии, / Ангелов преудивиша, верных укрепиша, / Церковь возвеселиша и благоукрасиша.
Иже Крестом ограждаеми, врагу противляшеся, / святыя мученицы Сапсале пресвитере и Савво благоговейный, / Вы идольское приношение отвергоша, / земныя блага во уметы вмениша./ Сам Жизнодавец исцели ваши язвы и раны, / да низп о слите исцеление недугов наших, / преславнии Готфская подвижницы.
Мужески за Христа пострадавше, / преподобномучениче Евстратие Киево-Печерский, / от жидов в Херсонесе на кресте распят был еси,/ и на подвиг исповедничества воспламениша пятьдесят сподвижников и соплеменников твоих/ и с ними мзду вечную восприял еси.
Постническим житием, яко златотканною ризою украшенный, чашу страданий от неверных испивый, / ты образ Спасова пастыря мирови явил еси/ и всякия добродетели исправил еси, / неведомый пресвитере Сурожский, / темже дарова Господь нетленным мощем твоим токи чудес и нсцелений.
Елеем милостиваго жития твоего исцели наша недуги/ уврачуй страсти, Ангеломудрый Пахомие, / преподобномучениче Таврический, / от зловерия агарянскаго пострадавый. / Темже и безсмертныя Трапезы вкушаеши/ и паству пленения греховнаго свобождаеши, / предивный святче Господень.
Невечерним Светом осияваемая, / от ликов Ангельских ублажаемая, / преподобномученице Параскево, / агнице Христова смиреннейшая, / града Феодосии украшение и покрове, Горняго Сиона насельнице и благ вечных наследнице.
Иноческих полков первостоятельнице/ угоднице Спасова избраннейшая, / преподобномученице Анастасие, / града Бахчисарая утверждение и ограждение незыблемо,/ ты подвиги страданий за Христа, яко фимиам благовонный, / к алтарю Небесному принесла еси.