Составися сей акафист в земли Болгарстей, в прославление святых царственных страстотерпец российских, с любовию многою к многострадальному православному русскому народу, в лето от Воплощения Бога Слова 1999-ое, во славу Пресвятыя Троицы: Отца, и Сына, и Святаго Духа.
Кондак 1. Глас 8.
Д ержавнейшии заступницы яже на земли Церкве Христовы, яко избавльшеся от злых предстательством вашим, похвальная восписуем вам. Вы же, яко имущии неусыпное о любящих вас попечение, и за всех православных милосердое заступление, от всяких нас бед свободите, да всепраздненственне зовем вам: Радуйтеся, многострадальнии мученицы царственнии, державнии рода христианскаго покровителие.
Икос 1.
А нгели предстатели земли русстей, и всей Церкви Христове абие по смерти явистеся, рода Романова страстотерпцы чудодетельнии: скончавшу бо ся земных страданий тяжкому времени, изгнания и уничижений горькое в радость вечную вам претворися: о, несказанныя славы вашея на небесех! Обаче не оставите нас, отцев законопреступных строптивых чад, но умилосердите Бога о поющих вам пение сицевое:
Радуйтеся, порфироноснии страдальцы.
Радуйтеся, царей благоверных удобрение.
Радуйтеся, Царя Небеснаго вернии раби.
Радуйтеся, о верних рабех Царю Царей молящиися.
Радуйтеся, на небеси царствующии вечно.
Радуйтеся, на земли чтущих вас пред престолом страшнаго Царя поминающии.
Радуйтеся, багряное грехов кровьми убелившии.
Радуйтеся, смирением и уничижением Царство вечное купившии.
Радуйтеся, славою несказанною сияющии.
Радуйтеся, Ангелы досточестно ублажаемии.
Радуйтеся, светлостию немерцаемою просвещаемии.
Радуйтеся, красотою божественною наслаждающиися.
Радуйтеся, многострадальнии мученицы царственнии, державнии рода христианскаго покровителие.
Кондак 2.
В идя Царь самодержавный шатания языков и тщетныя людей Своих умышления, возскорбе зело печалию Своею. Обаче уведев, яко прииде Ему час преити к Небесному Царю царей, до конца возлюби чада Своя, распинающыя Его, и моляшеся о прощении им вся, зовый Богу: Аллилуиа.
Икос 2.
Р азумев Царствия Твоего земнаго скончание, не погубил еси упование Твое на Бога, О! многоскорбнейший Царю Николае, даже до конца веруя в любовь простых людей к Тебе. Ныне же мы, таковаго благочестивейшаго Государя, всем православным христианом в мiре покровителя и Отца милостивейшаго лишившеся, уразумехом кольми Бога нашего преогорчихом. О! прегрешения нашего бездны! Но не отрини нас, со слезами покаяния восписующих Ти сия:
Радуйся, державнейший Православныя Церкве на земли покровителю.
Радуйся, предъизящнейший Царю, всем по глаголу Христову служивый.
Радуйся, боготайный на земли Царя царей образе.
Радуйся, кротости и правды рачителю.
Радуйся, благочестивых российских царей украшение.
Радуйся, радуйся, благоверия прекрепкий блюстителю.
Радуйся, христолюбиваго воинства Твоего вселюбимый воеводо.
Радуйся, и последнейших людей Царствия Твоего милосердый печальниче.
Радуйся, милостивейший сирых и вдов защитителю.
Радуйся, матерей и детей всещедрый покровителю.
Радуйся, милостыни и помощи независтный подателю.
Радуйся, многих церквей и обителей святых строителю..
Радуйся, Царю наш сладчайший Николае, великий страстотерпче!
Кондак 3.
С ила искушений и скорбей не возможе ослабити любве Твоея к Богу и народу русскому, о, великоименитая Царице Александро! Паче бо изволила еси страдати с людьми Божиими, нежели обрести на земли чуждей временный покой: верою же не прияла еси избавление руками иноплеменник, да лучшее улучиши воскресение, поющи Богу: Аллилуиа.
Икос 3.
Л юбве Христовы образ предлагаеши нам, о, Царице Александро многострадальная! Дивно Твое Бога истиннаго возлюбление, дивно Промыслу Божию послушание, дивно терпение тихое и кроткое страдальчество! Темже процвела еси яко белоснежный крин, в муках сладчайшее свое благовоние испустивый, и в скорбех изряднейшее доброты своея благозрачие показавый: о, богомудрия души Твоея! О, целомудрия красоты и нравов благородствия! Приими и от нас, недостойных хваление сицевое:
Радуйся, новая Девворо, матернее заступление о роде христианстем имущая.
Радуйся, новая Руф, яко людие русстии — людие Твои, и Бог православных — Бог Твой.
Радуйся, новая Иудиф, прибегающих к покрову молитв Твоих защищающая.
Радуйся, новая Есфирь, исполнение Церкве ходатайствы Твоими от пагубы сохраняющая.
Радуйся, добродетельми прекрасными сияющая.
Радуйся, яко светлый облак нас от бед покрывающая.
Радуйся, Царице наша, и по смерти нас не оставляющая.
Радуйся, мати наша, паче прежде о чадех Твоих пекущаяся.
Радуйся, лозо, сладкий плод нам возрастившая.
Радуйся, пять мучеников царственных нам в заступление родившая.
Радуйся, Софие новая, смертию от возлюбленных Супруга и чад Твоих неразлученная.
Радуйся, Александре древней крепкомудренно уподобившаяся.
Радуйся, Александро многострадальная, честнейшая Царице земли русския!
Кондак 4.
Б урею страданий и скорбей не подвижеся сердце Твое, кротчайший Царевичу Алексие: от матерних бо пелен страданию обрученный, даже до последняго дне земнаго жития Твоего ярем Христов всеблагодушно носил еси, безропотно Промыслу Божию повинуяся, и всех нас, волнами страданий обуреваемых, во уповании и смирении Богу пети научая: Аллилуиа!
Икос 4.
С лухи мятежными и страшных мук приближением не возмутися тихое Твое на Бога упование, Отроче царственный, ибо сладчайшаго Спаса Иисуса любы сердце Твое озаряше: свеща горящая житие Твое на земли бысть, юже и лютейшая страдания угасити не возмогоша: сего ради добродетелей Твоих озареньми освещаемся и пети Тебе подвизаемся благоговением сицевая:
Радуйся, прекрасная любве Христовы свеще.
Радуйся, непорочныя девства доброты хранение.
Радуйся, за враги кротко молитися нас научаяй.
Радуйся, христианских добродетелей сияние нам излучаяй.
Радуйся, от пелен болезни плоти безропотно терпевый.
Радуйся, тем болезни нашя и недуги исцеляти благодать приемый.
Радуйся, целомудренною чистотою издетска просиявый.
Радуйся, и нас от скверны мiра сего сохраняяй.
Радуйся, милосердия Божия нам испрошаяй.
Радуйся, святыню девства любити научаяй.
Радуйся, Исааком древле прообразованному Христу сообразне.
Радуйся, Царевичу Угличьскому Димитрию смертию подобне.
Радуйся, многострадальне Царевичу Алексие, отроком покровителю и страждущым утешителю!
Кондак 5.
Б огожренныя агницы дщери царевы явишася, от безбожных гонителей Церкве Христовы жертву благовонну Цареви царей принесшеся, и светильники своя елеем девства, милосердия, кротости и боголюбия до конца светящыяся соблюдше, свету невечернему Солнцу Христу во веки радуются и поют Ему песнь богокрасную: Аллилуиа!
Икос 5.
В идящи, о, святая Царевно Ольго, страдания родителей царственных Твоих и разорение зрящи любимаго Отечествия Твоего, не восхотела еси посягнути за князя иноплеменна, нетерпящи разлучения от возлюбленнаго дому Твоего, паче же хотящи сораспятися Христу, яко невеста непорочная Небеснаго Жениха. О, любве непреложныя сердца Твоего! Темже и нас не разлучайся предстательствующи присно о поющих Ти сице:
Радуйся, голубице, белостию девства блистающая.
Радуйся, Царевно, багряницею кровей красующаяся.
Радуйся, свеще благонравия богатносветлая.
Радуйся, невесто Христа светлопозлащенная.
Радуйся, равноапостольныя Ольги целомудрию поревновавшая.
Радуйся, богославных княгинь рода христианскаго благочестию подражавшая.
Радуйся, святым царицам христианским равноревностне пожившая.
Радуйся, кротостию и чистотою Богоматере другиня бывшая.
Радуйся, в ризу страданий за Христа позлащенную одеянная.
Радуйся, к Богу и Царице Небесней колесницею мучительныя смерти приведенная.
Радуйся, скорое Твое нам заступление в бедах подавающая.
Радуйся, за страждущее Отечество наше в молитвах с Богородицею неусыпающая.
Радуйся, всехвальная мученице Царевно Ольго, агнице Христова многострадальная!
Кондак 6.
П роповедницы преизряднии любве Христовы, о, девицы царственнии, явистеся, долготерпением и прекрепким вашым в скорбех упованием на Бога: сего ради величаем добродетели и исправления, имиже яко сребро седмерицею очищенно блистаетеся, и покланяющеся вам, радостно поем Богу: Аллилуиа!
Икос 6.
В озсияла еси в земли российстей яко пресветлая звезда, о, доброхвальная Татиано! Милосердым бо и смиренным Твоим служением больным, плененным, страждущым и в язвах лютых умирающым Христу Богу угодила еси: о, сострадания Твоего! Темже даруй и нам недостойным добродетели сими обогатитися, да поем Тебе таковая:
Радуйся, страждущым светлая радосте.
Радуйся, больным безсребренная целительнице.
Радуйся, плачущым тихое прибежище.
Радуйся, умирающым милосердия Божия ходатаице.
Радуйся, белостию добрых дел блистающая.
Радуйся, кротостию добрых нравов сияющая.
Радуйся, красотою девства Ангелы веселящая.
Радуйся, чистотою сердца Бога зрящая.
Радуйся, досадительства неверных людей долготерпевшая.
Радуйся, смертию за Христа добродетелей богатство запечатлевшая.
Радуйся, скоротлимаго рубища земнаго жития совлекшая.
Радуйся, в златопорфирныя ризы небеснаго жития облекшаяся.
Радуйся, доброхвальная мученице Царевно Татиано, тихое пристанище скорбящым!
Кондак 7.
Х отении божественными просвещаемы, вся скорби и лишения смиренно претерпели есте, девомученицы царственнии, юную плоть духу порабощающе, желания вся земная любовию ко Христу умерщвляюще, Егоже ныне невестолепно песнословите: Аллилуиа!
Икос 7.
Н овыя жизни чающе, лучши нынешныя прелестныя, боголюбезнии царевны Марие и Анастасие, во изгнании и уничижении утесняеми, яко сребро искушено седмерицею озарястеся Духа утешеньми, и всею душею к Богу устремлястеся, молитвами многими, благоговейным в храмах Царю Небесному предстоянием и недвижным на Спасителя Христа упованием. Обновите убо и сердца поющих вам песнь похвальную сице:
Радуйтеся, диадимою безсмертия от Царя славы венчаннии.
Радуйтеся, красотою несказанною от Христа на небесех почтеннии.
Радуйтеся, чистотою девства Духу Божественному уневестившиися.
Радуйтеся, добротою душевною в Царствии Христове сияющии.
Радуйтеся, царственною лепотою вашею Церковь Христову украшающии.
Радуйтеся, голубицы белыя, в олтари Господни на крилу мук возлетевшии.
Радуйтеся, незлобием детским лукавствие темных умов посрамившии.
Радуйтеся, терпением крепким сети невидимых враг разтерзавшии.
Радуйтеся, смирением желчь супостатов ваших в сладость духовную преложившии.
Радуйтеся, простотою оцет злобы нектар жизни вечныя соделавшии.
Радуйтеся, крестом уничижений Царство славы приобретшии.
Радуйтеся, смертию мучительною жизнь прерадостную снискавшии.
Радуйтеся, царевни многострадальнии Марие и Анастасие, чистии невесты Христовы!
Кондак 8.
С транни во Отечестве вашем, еже на земли, изгнаны правды ради, слугами сатанины ненавидимы, во узилищи томимы, оскорбляеми и онеправдованы зрим вас, о, краснодушнии мученицы царственнии! Но аще и слезами чистыми о людех прельщенных плакасте, и о погибели страны российския горьце сетовасте, обаче веровасте до конца, яко приидет светоносный день, воньже вся отечествия православных единеми усты и единем сердцем воспоют о вас песнь Богу: Аллилуиа!
Икос 8.
В ся вселенная да ликовствует в нарочитый день праздника вашего, о, краснолепнейший личе царственных страстотерпец! Вся земля да приклонит колена пред несказанном величии страдания вашего, вси храмы православнии да возвышают сладкогласными трезвоны седмосветлое просияние славы вашея, вси вернии да поют вам во умилении хваления таковая:
Радуйтеся, земли русския всевожделеннии предстателие.
Радуйтеся, всем православным всещедрии заступницы.
Радуйтеся, святыя Церкве нашея всесветлая радосте.
Радуйтеся, всех любящих вас всечуднии покровителие.
Радуйтеся, всем уничиженным утешение.
Радуйтеся, всем озлобленным пристанище.
Радуйтеся, всем смятенным умирение.
Радуйтеся, всем колеблемым утверждение.
Радуйтеся, всем смиренным радование.
Радуйтеся, всем боголюбным празднование.
Радуйтеся, всем кротким озарение.
Радуйтеся, всем любобезмолвным умиление.
Радуйтеся, многострадальнии мученицы царственнии, державнии рода христианскаго покровителие!
Кондак 9.
В ся страдания ваша недостойны к славе, явленней в вас на небесех: за оставление — богоприятие, за поругания — прославление, за желчь и оцет — сладость вечную, за крест — венец, за муки — рай, от Бога праведне прияли есте, о превозлюбленнии! Мы же, тепле на заступление ваше надеющеся в веце сем и по смерти нашея, немолчно поем о вас Богу: Аллилуиа!
Икос 9.
В етии суемудреннии николиже уразумеют величие славы и светлость праздника вашего! Царя бо православнаго своего отвергшеся, и суету мiра сего возлюбльше, иссохнут яко ветви безплодныя, лишены крепостнаго заступления вашего: мы же паче возлюбим вас и к вашему многомощному ходатайству прибегающе, возхвалим вы сице:
Радуйтеся, агнцы ради Агнца Христа убиеннии.
Радуйтеся, ангели, крилома молений чтущыя вас осеняющии.
Радуйтеся, незлобия и всепрощения образ нам явившии.
Радуйтеся, любве к Богу, Отечествию и дому своему всем правило бывшии.
Радуйтеся, глумления народа вашего с кротостию претерпевшии.
Радуйтеся, смирением углие злобы враг ваших угасившии.
Радуйтеся, непамятозлобия вашего ради Христу всыновившиися.
Радуйтеся, за враги молившеся, невидимаго супостата посрамившии.
Радуйтеся, добротворцев удобрение.
Радуйтеся, милосердия светлая зерцала.
Радуйтеся, благочестивых царей и цариц красование.
Радуйтеся, многострадальнаго рода нашего упование.
Радуйтеся, многострадальнии мученицы царственнии, державнии рода христианскаго покровителие!
Кондак 10.
С пастися всем к вам прибегающым Творца и Зиждителя и Бога нашего умоляйте, яко не в силе Господь, но в правде: вы бо есте сокровище наше истинное, со всеми святыми Церкве нашея, вы есте радост наша и утешение, и немолчное Троице Святей пение о вас возсылаем, зовуще: Аллилуиа!
Икос 10.
С тена нерушимая и оплот Церкве истинныя бысть иногда самодержавнейший Царь православный: но отъяся от среды держай и беззаконие покры удел Пречистыя Богоматере, и пролияся кровь яко вода по всей стране российстей: но избави ны, Господи, и очисти грехи нашя, молитв ради всех страстотерпец новых, наипаче же Царственных мученик дома Романова, слышащих благоуветливо от нас пения сия:
Радуйтеся, купнодушнии страдальцы, вседомовне душы вашя за Христа положшии.
Радуйтеся, светильницы всесветлии земли российския.
Радуйтеся, правдою божественною сияющии.
Радуйтеся, добродетельми изрядными блистающии.
Радуйтеся, Православия благоревностнии на земли хранителие.
Радуйтеся, Церкве Христовы державнии покровителие.
Радуйтеся, благолепие дому Божия возлюбившии.
Радуйтеся, тем в место селения славы Божия водворившиися.
Радуйтеся, образ истинный супружества христианскаго явившии.
Радуйтеся, любовию божественною в конец солнцезрачно озарившиися.
Радуйтеся, на подвиг страданий небоязненно шествовавшии.
Радуйтеся, в мире душевнем даже до убиения вашего Господа терпевшии.
Радуйтеся, многострадальнии мученицы царственнии, державнии рода христианскаго покровителие!
Кондак 11.
П ения благодарственная Богу во вся дни заточения вашего приносили есте от сердец кротких и смиренных: Ты же, Царице богохвальная Александро, непрестанное о научении детей своих Закону Божию попечение имела еси, и паче инех Бога за вся благодарила еси, верующи, яко по нощи мятежней паки возсияет солнце правды и озарится земля светом истины: мы же, вере вашей дивящеся, в покаянии зовем Богу: Аллилуиа!
Икос 11.
З везд светлейшии и солнца яснейшии светила земли российстей явистеся, и всех православных возлюбленнейший Царь и Царица, дражайшии по Бозе и Богородице заступницы, вседомовне просиявшии и седморичным светолитием сердца веселящии поющих вам радощами таковая:
Радуйтеся, рая прекраснаго жителие светозарнии.
Радуйтеся, Небеснаго Царствия украшения царственнии.
Радуйтеся, земнаго Отечествия вашего сокровище дражайшее.
Радуйтеся, во мраце влающымся нам озарение светлейшее.
Радуйтеся, сердец наших утешение теплое.
Радуйтеся, умов наших просвещение ясное.
Радуйтеся, душ наших умирение пресладкое.
Радуйтеся, и телес наших покровение многонадеждное.
Радуйся, Царю Николае, и по смерти отеческое о нас имеяй попечение.
Радуйся, Царице Александро, матернее за дети нашя с Богородицею являющая заступление.
Радуйся, Царевичу Алексие, от болезни и пагубы младенцы и отроки соблюдаяй.
Радуйтеся, царевни Ольго, Татиано, Марие и Анастасие, от душетленных зол юныя сохраняющии.
Радуйтеся, многострадальнии мученицы царственнии, державнии рода христианскаго покровителие!
Кондак 12.
Б лагодать чудодейственную от Бога приемше, даже прежде прославления вашего на земли многая верным чудеса явисте, верою и любовию к вам прибегающым. Сего ради тщанием усердным к вам припадаем, и иконе вашей, яко самым вам сущым любовию кланяемся, чающе заступления вашего и в сем, и в будущем веце, ибо что вожделеннейше нам, паче еже вкупе с Царем благочестивейшем и Царицею вселюбимою Небесному пети Царю во вся веки благодарно: Аллилуиа!
Икос 12.
П оюще многая чудеса и заступления вашя, не вемы како возможем по достоянию изрещи вся нам дарованная вашим предстательством, о, богославнии и царственнии нам заступницы! Обаче приимите и от нас приносимыя вам венцы хвалений сия:
Радуйтеся, сущым в бедах скорыи избавителие.
Радуйтеся, сущым в скорбех радости подателие.
Радуйтеся, страждущым православным странам заступницы.
Радуйтеся, гонимых Христа ради известнии хранителие.
Радуйтеся, к вам прибегающым покрове, ширший облака.
Радуйтеся, любовию чтущих вас многосветлое веселие.
Радуйтеся, земли русския сокровище неотъятное.
Радуйтеся, Церкве Православныя красото священнолепная.
Радуйтеся, небосветлии звезды, светом заступлений нас облиставающии.
Радуйтеся, неботочнии реки, водою благодати нас напояющии.
Радуйтеся, нелюбовных нас любви научающии.
Радуйтеся, малодушных нас упованием на Бога обогащающии.
Радуйтеся, иссохшая сердца наша умилением умащающии.
Радуйтеся, омраченныя очи душевныя верою просвещающии.
Радуйтеся, многострадальнии мученицы царственнии, державнии рода христианскаго покровителие!
Кондак 13.
О, всеизряднии мученицы царственнии, радосте, упование и славо наша! Приимите малое хваление сие, всем сердцем от нас недостойных вам приносимое, и испросите всем верою и любовию вас чтущым милости и покровения от всех бед и зол, избавления от глада, потопа, труса, меча, междоусобныя брани и напрасныя смерти, и будущих мук избавитися нам Господа умолите, да во вся веки с вами поем Творцу и Богу нашему: Аллилуиа, аллилуиа, аллилуиа!
Кондак сей глаголем 3-жды, и паки Икос 1. И поем Кондак 1: Державнейшии заступницы.
Молитва:
О, Богославнии великомученицы царственнии, державнейшии заступницы Православныя Церкве: се ныне Церковь Христова прославляет подвиг страстоношения вашего, се ныне духовным светолитием вселенная просвещается свыше, и небо веселие в сердца любящих вас таинственно кропит: обаче аще и светлым облаком ходатайства вашего осеняема, земля наша беззаконьми содрогается и лютым растлением трепещет. Сего ради к вашему заступлению со слезами покаяния прибегаем, исповедующе, яко вельми согрешихом и Бога преблагаго преогорчихом грехи многими, отступихом от Небеснаго Царя, множицею щедрившаго народ наш, возвышавшаго рог благоверных князей и благочестивых царей наших, избавлявшаго нас от толиких бед и упования нашего николиже посрамлявшаго. Обаче и к Тебе подобает нам припасти, о, сладчайший и многострадальнейший Царю русский Николае! Се бо зриши плач и стенание наше: умоли Бога да простит неверность нашу закону Его, и приимет люди согрешившыя во объятия Своя. Ты бо еси отец и утешитель нам и по смерти, слава наша, и крепость, и надежда! Припадаем и Тебе, Царице и мати страждущым всем, великоименитая Александро: простри Твои руце к Богоматери, единей Радости скорбящих, и с Нею моли Царя царей о помиловании нашем. О, Царевичу Алексие! Кротчайший агнче царственный! Не смеем воззрети на лик Твой блудныма очима нашима, токмо простираем мысленне руце к Тебе, просяще небеснаго твоего заступления: сохрани всех нас от страшныя пагубы, мiр сей объявшыя, остеняя прибегающих к Тебе от навет сопротивныя злобы и козней видимых и невидимых врагов наших. О, треблаженнии девомученицы рода царскаго! Озареньми небесными просветите сердца наша, да не ослепит нас век сей прелестный к погибели вечней. О, преславнии страстотерпцы царственнии! Даруйте всем любовию теплою к вам прибегающии смирение, целомудрие и любовь к Богу и человеком, обогащайте нас терпением и на Бога упованием крепким в скорбех и бедах; в страданиих же умащайте сердца наша кроткою надеждею и тишиною вашего покровения, яко да ничтоже нас устрашит, ниже смутит, но да поведуем и чадам нашым славу вашу, юже от Бога достойно восприяли есте. Испросите нам у Бога дух покаяния и сокрушения о гресех наших, просветите ослепшыя сродники наша, от Веры праотеческия отступившыя, соблюдите нас и чада наша от суеты и злых обычаев мiра сего, от растлителей душ и телес, от заблуждений и ересей, от болезней и нечаянныя смерти. Предстаните нам, недостойным, в час кончины нашея, и избавите нас от лютых приражений темных демонов, и приведите к Страшному Судию в светлей одежде добре покаявшихся грешников, в надежде о помиловании и вечном спасении, яко да ничтоже разлучит ны от Христа Бога и от вас во веки веков. Амин!
