Кондак 1
Взбранное нам и дивное избавление даровася, образ Твой честный, Преблагословенная Дево Богородице; темже избавльшеся от злых явлением его и к нему взирающе, восписуем Ти раби Твой, благодарственная: но яко имущая державу непобедимую, от всяких нас бед свободи, да зовем Ти:
Радуйся, Радосте наша, избави нас от всякаго зла и утоли наша печали.
Икос l
Ангел множество и вся Небесная Воинства славят Тебе Царицу всех Богородицу, мы же, исполнившеся радости милостивным явлением нам образа Твоего святаго, Владычице, и к нему кланяющеся, милосердому Твоему к нам заступлению умиленная моления возсылаем, с любовию зовуще таковая:
Радуйся, Отца Безначальнаго благословение;
Радуйся, Сына Превечнаго вселение.
Радуйся, Духа Святаго пребывание;
Радуйся, Божественныя Троицы избрание.
Радуйся, яко Тебе вся Небесная Воинства яко Приснодеву величают;
Радуйся, яко Тебе вся колена земная Матерь Божию исповедуют.
Радуйся, яко Тобою вся вселенная веселия исполняется;
Радуйся, яко Тобою вся наша болезни исцеляются.
Радуйся, Радосте наша, избави нас от всякаго зла и утоли наша печали.
Кондак 2
Видят Тя, Богоизбранная Отроковице, вся Небесныя Силы предстоящую всегда Престолу Славы Небеснаго Царя и за христианы к Сыну и Богу молящуюся; мы же грешнии, на земли зряще Твою святую икону и к ней припадающе, Тебе радостно покланяемся, зовуще Богу: Аллилуиа.
Икос 2
Разум подаждь нам, Всеусердная Предстательнице наша, Небесная Царице, уста бо наша скверная како могут пети Твоему имени? Яко благих еси нам Ходатаица, и во всех потребных нам всесильная Помощнице, и со умилением зовем Ти сицевая:
Радуйся, во всяких нуждах и бедах нам помогающая;
Радуйся, во всяких немощех и скорбех утешающая.
Радуйся, Твоею помощию страсти наша потребляющая;
Радуйся, Твоею радостию печали наша утоляющая.
Радуйся, Твоим предстательством праведный гнев Божий отвращающая;
Радуйся, Твоим ходатайством грехов наших прощение испрошающая.
Радуйся, непрестанное нам веселие подавающая;
Радуйся, райския двери нам отверзающая.
Радуйся, Радосте наша, избави нас от всякаго зла и утоли наша печали
Кондак 3
Сила Вышняго осени Тя скоро заступати верно притекающих к Тебе и честному Твоему образу покланяющихся, единей бо токмо Тебе, Нетленней и Пречистей Богоматери, дадеся благодать всякое благое наше прошение исполняти, и во всяцем обстоянии помогати. Тем всяк возраст славословит Сына Твоего и Бога нашего, зовый: Аллилуиа.
Икос 3
Имеющи богатство милосердия неоскудное, всем концем земным простиравши руку помощи и подаеши болящим исцеление, страждущим ослабу, слепым прозрение и всем вся потребная даруеши. Мы же, Тебе благодаряще, сице вопием: Радуйся, милости сокровище многоценное отверзающая; радуйся, щедрот источники неоскудныя изливающая. Радуйся, преспеяние разума юным по- давающая; радуйся, премудрости просящих исполняющая.
Радуйся, праведных в райских селениих насаждающая;
Радуйся, неправед ных раны исцеляющая.
Радуйся, всех падших скоро ко благо дати возставляющая;
Радуйся, отчаянных в надежди будущих благ укрепляющая.
Радуйся, Радосте наша, избави нас от всякаго зла и утоли наша печали.
Кондак 4
Бурею многих бед одержимым всегда нам помогаеши, Небесная Царице, с верою прибегающим к Тебе и покланяющимся цельбоносней Твоей иконе, яко о первописанней иногда рекла есй: «С сим образом благодать Моя и сила». Темже и мы веруем, яко и ныне слышиши прошения призывающих имя Твое святое и Сыну Твоему зовущих: Аллилуиа.
Икос 4
Слыша Господь на Небеси Твоя о нас ходатайства, Избранная Палато Духа Святаго, исполняет Твоя прошения, мы же грешнии на земли, видевше святую Твою икону, яко светозарное солнце нам светящуюся, Тебе яко Божией Матери дерзаем глаголати:
Радуйся, Солнце мысленное нам являющая;
Радуйся, Светом немерцающим нас просвещающая.
Радуйся, умерщвленных нас грехами оживляющая;
Радуйся, неплодство наше к добродетелем разрешающая.
Радуйся, внезапу находящих на нас злых врагов скоро прогоняющая;
радуйся, верою имя Твое призывающих от нечаянныя смерти спасающая.
Радуйся, предстательство наше крепкое;
Радуйся, защищение наше всенадежное.
Радуйся, Радосте наша, избави нас от всякаго зла и утоли наша печали.
Кондак 5
Богосветлую звезду, честную Твою икону показала еси нам, Владычице мира, к нейже мы взирающе и верою сердечною молящеся, Тебе глаголем: Буди нам щит непобедимый и стена необоримая, вопиющим Богу: Аллилуиа.
Икос 5
Силы Небесныя, видевше на руку Твоею Создавшаго Своима рукама человеки, Владыку разумеша Его: мы же грешнии на земли зряще Тебе, Пречистую Матерь Его, на иконе Твоей любезно руце Свои к нам простирающую, к Тебе умильно зовем:
Радуйся, на руку Твоею Огнь Божественный неопально держащая, Имже грехи наша попаляются;
Радуйся, на руку Твоею Света Неприкосновеннаго носящая, Имже души наша просвещаются.
Радуйся, врагов наших видимых и невидимых побеждающая;
Радуйся, любовь и милосердие к нам являющая.
Радуйся, руце Твои в поручение о нас к Богу простирающая;
Радуйся, вход в Царствие Небесное нам отверзающая
Радуйся, яко Твоим предстательством всяких благ наслаждаемся;
Радуйся, яко Тобою вся во благих желания наша исполняются.
Радуйся, Радосте наша, избави нас от всякаго зла и утоли наша печали.
Кондак 6
Проповедницы Богоноснии Апостоли, по Вознесении Господни, в освящении храма Твоего обретше образ Твой, Владычице, невидимою рукою на стене изображенный, рожденному от Тебе Богу воспеша: Аллилуиа.
Икос 6
Просияла еси премудростию от Истиннаго Солнца Правды, Богоизбранная Отроковице, и лучею истиннаго богора- зумия освещаеши всех верою исповеда- ющих Тя истинную Матерь Божию бы- ти и вопиющих Ти сице:
Радуйся, всех на Небеси славою Твоею осиявающая;
Радуйся, всем на земли начало спасения устрояющая.
Радуйся, ковчеже, от потопа смертнаго нас сохраняющий;
Радуйся, ключу, райская селения нам отверзающий.
Радуйся, всякия болезни человеческия исцеляющая;
Радуйся, и неплодным женам утробы разверзающая.
Радуйся, благодати познание туне источающая;
Радуйся, тем всякий чин и возраст довольно услаждающая.
Радуйся, Радосте наша, избави нас от всякаго зла и утоли наша печали.
Кондак 7
Хотя долготерпеливый Всеведец Господь явити Своего человеколюбия и щедрот бездну, избра Тебе Свою Матерь и милости к нам неисчерпаемый Источник, да аще кто праведным судом Божиим осуждение приимет, обаче Твоим всемощным заступлением сохранен будет и Сыну Твоему и Богу нашему велегласно воззовет:Аллилуиа.
Икос 7
Дивна показал еси дела Твоя чрез Пречи- стую Матерь Твою, Господи, и дивну даровал еси нам Ея икону, паче лучей солнечных просвещающу яко Самую зрящих Богородицу, и верою сердечною и любовию душевною вопиющих таковая: Радуйся, явлением Твоея иконы вся юди просвещающая;радуйся, тем новое знамение благодати в Церкви являющая.
Радуйся, скоро в бедах и печалех нас утешающая;
Радуйся, желаемых благ всегда нас наслаждающая.
Радуйся, иконою Твоею, яко столпом огненным, мрак греха отгоняющая;
Радуйся, тою, яко облаком, пламень страстный угашающая.
Радуйся, вретище скорби нашея растерзающая;
Радуйся, вечною радостию нас одевающая.
Радуйся, Радосте наша, избави нас от всякаго зла и утоли наша печали.
Кондак 8
Странно и преславно в Церкви явльшуюся святую Твою икону Ангели воспеша, Апостоли прославиша,святители поклонишася, мы же грешнии припадающе ожидаем Твоея великия и богатыя милости, с любовию вопиюще Богу: Аллилуиа.
Икос 8
Всеми вышними и нижними владычествуяй Господь, видев Тя Матерь Свою всегда предстоящу Ему и со умилением приносящу моление о нас грешных, обеща исполнити вся прошения Твоя. Мы же грешнии, надеющеся на Твоя матерния о нас молитвы, благодарственная Тебе приносим сице:
Радуйся, с Сыном Твоим и Богом вечно сцарствующая;
Радуйся, к Нему всегда о нас моления приносящая.
Радуйся, примирение наше с Богом содевающая;
Радуйся, Бога и человеки соединяющая.
Радуйся, спасение человеческое устрояющая;
Радуйся, прародительскую греха клятву разрушающая.
Радуйся, смертное наше естество безсмертием просвещающая;
Радуйся, жестокость сердца нашего милосердием умягчающая.
Радуйся, Радосте наша, избави нас от всякаго зла и утоли наша печали.
Кондак 9
Все естество ангельское похвальныя песни приносит Тебе, Божией Матери и Заступнице всех припадающих Тебе и просящих Твоея помощи, яко предстательством Твоим праведных веселиши, грешных заступавши и от бед избавляеши, и печали утоляеши, и молишися о всех верою зовущих Богу: Аллилуиа.
Икос 9
Ветии многовещаннии, яко рыбы безгласныя, недоумеют хвалити славный, Владычице, иконы Твоея праздник, ниже от скверных устен наших приносимыя Ти похвалы довольны суть. Обаче неисчетная благодеяния, иконою Твоею нам являемая, видевше, душею и сердцем радующеся, Тебе глаголем:
Радуйся, Хлебом Жизни нас от глада избавляющая;
Радуйся, безсмертием нас от смерти соблюдающая.
Радуйся, росою молитв Твоих от огня нас восхищающая;
Радуйся, сильным предстательством Твоим от бед нас защищающая.
Радуйся, от междоусобныя брани истинным миром нас ограждающая;
Радуйся, от смертоносныя раны прибегающих к Тебе исцеляющая.
Радуйся, от меча силою Твоею нас охраняющая; радуйся, от нашествия иноплеменник нас спасающая.
Радуйся, Радосте наша, избави нас от всякаго зла и утоли наша печали.
Кондак 10
Спасти хотя род человеческий от прелести вражия, Человеколюбец Господь Тебе Матерь Свою дарова земным на помощь, глаголя: Сынове человечестии, се Мати Моя Покров и Прибежище вам да будет, печальным Утешение, скорбящим Радование, обидимым Заступница, да всех из глубины греховныя воздвигнет, Мне вопиющих: Аллилуиа.
Икос 10
Царю Небесный, — тако молит за ны всегда Небесная Царица, — приими вся каго человека, славящаго Тя и призывающаго Имя Твое, и прославляющих Мя Имене Твоего ради, и не отрини их от лица Твоего, но благоволи о них и приими от них всякое моление, и всех от бед избави, зовущих Мне сицевая: Радуйся, отчаянных Надеждо, печали утоляющая; радуйся, скорбящих Упование, благодатию осиявающая.
Радуйся, нашу скверну Твоею чистотою очищающая;
Радуйся, брение наше тленное в нетление обращающая.
Радуйся, неможение наше в силу претворяющая;
радуйся, вся наша болезни душевныя и телесныя исцеляющая.
Радуйся, нашедший на нас облак страстей скоро разгоняющая;
Радуйся, сильным Твоим прошением вся полезная нам дарующая.
Радуйся, Радосте наша, избави нас от всякаго зла и утоли наша печали.
Кондак 11
Пение всеумиленное приими от нас, Небесная Царице, и молитву, приносимую Тебе, Дево Богородице, услыши: к Тебе бо в напастех, скорбех и печалех прибегаем и пред Тобою в бедах наших слезы проливаем и молим: Утоли наша печали и приими сию жертву раб Твоих, зовущих Богу: Аллилуиа.
Икос 11
Светоприемная Свеще Истиннаго Света сущим на земли явльшися, Богомати, души просвещавши чтущих Твоея иконы явление и к разуму Божественному наставляеши поющих Ти сицевая: Радуйся, Свеще неугасимая Огня не- вещественнаго, нас просвещающая; радуйся, Заре незаходимаго Света Боже- ственнаго, нас озаряющая.
Радуйся, Солнце Правды нам облистающая;
Радуйся, Источник жизни райския нам источающая.
Радуйся, всем родом, Тя Матерь Божию почитающим и Богородицу именующим непрестанно помогающая;
Радуйся, осенением святыя Твоея коны злых духов мечтания от нас прогоняющая.
Радуйся, Тя на помощь призывающих и Имя Твое славящих спасающая;
Радуйся, уповающим на Тя живота непостыдный конец дарующая.
Радуйся, Радосте наша, избави нас от всякаго зла и утоли наша печали.
Кондак 12
Благодать Божественную испроси нам у Небеснаго Владыки Сына Твоего и Бога и простри нам руку помощи, и молитвами Твоими утоли наша печали, умири нашу жизнь и приими нас в вечныя кровы, Покровительнице наша, да о Тебе радующеся, зовем Христу Богу: Аллилуиа.
Икос 12
Поюще Тя, державную Помощницу, хвалим Тя и, молящеся Тебе со умилением, веруем, яко испросиши благая временная и вечная всем воспевающим Ти таковая: Радуйся, молитвами Твоими весь мир спасающая; радуйся, ходатайством Твоим вся люди заступающая.
Радуйся, благочестивых в вере соблюдающая;
радуйся, нас грешных ко спасению наставляющая
Радуйся, Царствие Небесное у Сына Твоего нам присно испрошающая;
радуйся, врагов державы православныя от нас и ныне отметающая.
Радуйся, в печалех бедствующим скоро помогающая;
радуйся, всем верным безконечную жизнь дарующая.
Радуйся, Радосте наша, избави нас от всякаго зла и утоли наша печали.
Кондак 13
О Всепетая Мати, рождшая всех святых Святейшее Слово, нынешнее приемши приношение, утоли наша печали и избави нас от всяких напастей и скорбей и гря- дущия изми муки, и сподоби нас рабов Твоих в вечных селениих водворитися, зовущих Богу: Аллилуиа.
(Этот, кондак читается трижды, затем икос 1 и кондак 1)
Источник - сайт Храма в честь иконы Божией Матери “В скорбех и печалех Утешение” города Слободской Кировской области https://uteshenie.cerkov.ru/akafist/