По 50-м псалме стихира, глас 6.

На Господи воззвах, глас 5.

 

Ра́дуйся, архиере́ев пра́вило, / Це́ркве непоколеби́мое утвержде́ние, / сла́во правосла́вных, / чуде́с исто́чниче, / любве́ струя́ неистощи́мая, / свети́льниче многосве́тлый, / Ду́ха орга́не, у́ме Боже́ственный, / кро́ткий и незло́бивый, / и́же простото́ю и́стинною украша́емь, / челове́че Небе́сный, земны́й Ангеле, / виногра́да де́лателю, / Христо́в дру́же и́скренний, // Того́ моли́ пода́ти тебе́ чту́щим ве́лию ми́лость.

 

Кро́ток и насле́дник земли́ ты́ кро́тких, / вои́стинну показа́лся еси́, Спиридо́не, / отце́в сла́во, / и́же жи́лами му́дрых и просты́х твои́х слове́с Боже́ственною благода́тию, / врага́ вселука́ваго и пребезу́мнаго Ария удави́л еси́ / и, веле́ние Боже́ственное все́м уясни́в, ве́рным показа́л еси́, / и спаси́тельное возвы́сив ду́хом, / вся́ же правосла́вныя просвети́в ясне́йше, / Еди́но сла́вити Сло́во, / я́ко вои́стинну Единосу́щное Отцу́ Пребезнача́льному, // подаю́щее ми́ру ве́лию ми́лость.

 

Стра́сти умертви́в плотски́я, / ме́ртвыя благода́тию Бо́жиею возста́вил еси́, / и змию́ в зла́то претвори́л еси́, / и реки́ стремле́ние моли́твою твое́ю, о́тче, обузда́л еси́; / но́щию же царю́ я́влься бе́дствующему, / сего́ исцели́л еси́ к се́рдцу приближе́нием, / Го́споду тя́ пресла́вно прославля́ющу. / Те́мже велегла́сно твою́ па́мять почита́ем, / и моще́й Боже́ственную и свяще́нную ра́ку чти́м, // из нея́же истека́ет врачева́ний Боже́ственная струя́ и ве́лия ми́лость.

 

Слава, глас 1:

 

Преподо́бне о́тче, блаже́нне Спиридо́не му́дре, / ме́ртвую, я́коже жи́ву, вопроси́л еси́ любве́ ра́ди Бо́жия; / змию́ же преложи́л еси́ в зла́то нището́ю обдержи́мому, / тече́ние же удержа́л еси́ реки́, сострада́тельствовав лю́дем; / царю́ же предста́л еси́ вра́ч промышле́нием Бо́жиим; / ме́ртвыя же па́ки возста́вил еси́, я́ко Того́ учени́к, / и ве́ру уясни́л еси́ посреде́ отце́в мно́гих. / Вся́ у́бо моги́й во укрепля́ющем тя Христе́, // Того́ и ны́не моли́ спасти́ся душа́м на́шим.

 

 

На стихо́вне.

 

Сла́ва, гла́с 2:

 

Святи́телей Боже́ственный сосу́д, / о́тче преподо́бне Спиридо́не му́дре, / ты́ доброде́тельми показа́лся еси́: / сего́ ра́ди Це́ркве предста́тель бы́в, / ересенача́льники изгна́л еси́ / и Ариево хуле́ние собо́рне на зе́млю низложи́л. / Те́мже, чудоде́йствуя де́лом и сло́вом, // Спа́са моли́ спасти́ся душа́м на́шим.

 

 

Тропа́рь, гла́с 1:

 

Собо́ра Пе́рваго показа́лся еси́ побо́рник и чудотво́рец, / Богоно́се Спиридо́не, о́тче на́ш. / те́мже ме́ртву ты́ во гро́бе возгласи́в, / и змию́ в зла́то претвори́л еси́: / и внегда́ пе́ти тебе́ святы́я моли́твы, / Ангелы, сослужа́щия тебе́, име́л еси́, свяще́ннейший. / Сла́ва Да́вшему тебе́ кре́пость, / сла́ва Венча́вшему тя́, // сла́ва Де́йствующему тобо́ю все́м исцеле́ния.

 

 

Конда́к, глас 2.

 

 

Любо́вию Христо́вою уязви́вся свяще́ннейший, / у́м впери́в заре́ю Ду́ха / де́тельным виде́нием твои́м дея́ние обре́л еси́, Богоприя́тне, / же́ртвенник Боже́ственный бы́в, // прося́ все́м Боже́ственнаго сия́ния.

 

 

На стиховне утрени.

 

Сла́ва, гла́с 4:

 

Преподо́бне о́тче, святи́телю прехва́льне, / апо́стольскаго уче́ния бы́в испо́лнен, / и Боже́ственнаго Ду́ха жили́ще / доброде́тельнаго ра́ди жи́тельства показа́вся, / церко́вныя во́лки уче́ньми отгна́л еси́, / и Правосла́вных ве́ру уясни́л еси́, / сто́лп яви́лся еси́ благоче́стия и побо́рник. / Те́мже и чудоде́йствуя в конце́х, / змию́ в зла́то преложи́л еси́, / и ме́ртвую к вопроше́нию воздви́гл еси́, / но, о отце́в досточу́дне и учи́телей собесе́дниче! // Спа́су моли́ся спасти́ ду́ши на́ша.

 

Минея общая. Святителю единому.

 

 

На Господи воззвах, глас 6:

 

Весь освяще́н богоно́сец показа́ся, / пома́зание Бо́жие Свято́е, / Святы́м Ду́хом обложе́н: / и све́тло входя́ вы́ну во Свята́я Святы́х, / Богонача́льными светлостьми́ озаря́емь, / благода́ти причаща́яся Святы́х Та́ин, / я́ко и́стинный святи́тель пресла́вен, // со дерзнове́нием моля́ся о душа́х на́ших.

 

Просвети́ся житие́ твое́ доброде́тельными светлостьми́, / ве́рныя просвети́л еси́, / и ле́сти тьму́ разгна́л еси́, / и́стинное бо яви́лся еси́ светоза́рное со́лнце, / святи́телю преблаже́нне Спиридо́не, / и ны́не всели́лся еси́, / иде́же сия́ет Све́т Невече́рний, / и сын дне Благода́тию Ду́ха Свята́го быв. / Те́мже твою́ Боже́ственную па́мять и светоно́сную / че́стно соверша́юще приснопа́мятне, // любо́вию почита́ем.

 

Ум тво́й манове́нием е́же к Бо́гу, богому́дре, / ве́рою удобря́емь, / све́тел яви́ся всесла́вне, / в ме́ртвеннем те́ле и тле́ннем, / прему́дре нетле́нию поучи́вся, / притяжа́л еси́ Безпло́тных све́тлости, / и страсте́й вне быв, безстра́стием украша́яся, / Спиридо́не, о́тче святи́телю прему́дре, / све́тлый свети́льниче и моли́твенниче // о чту́щих любо́вию па́мять твою́.

 

 

На стиховне, глас 8.

 

 

Святи́телю Спиридо́не, / разу́мнаго Све́та заре́, / Церко́вное свети́ло, святи́тельская красото́, / и́ноческаго по́стнаго жития́ и́стовое пра́вило: / нам же засту́пник яви́лся еси́, // свобожда́я от губи́теля врага́ ду́шы на́ша.

 

 

Стих: Честна́ пред Го́сподем / сме́рть преподо́бных Его́.

 

Святи́телю Спиридо́не, / вели́кую вла́сть от Бо́га прия́л еси́, / мно́жество лука́вых бесо́в моли́твою твое́ю отгна́л еси́, // и си́х озлобле́ния от все́х ве́рою к тебе́ притека́ющих.

 

 

Стих: Что возда́м Го́сподеви о все́х, / я́же воздаде́ ми.

 

Святи́теля вели́каго Спиридо́на / ка́ко досто́йно воспое́м, / честна́го ума́, Богоза́рного Све́та, / освеща́ющаго нас, и Боже́ственный ра́зум подаю́щаго, / та́ин глуби́нных испове́дателя, согла́сно вси рце́м: // ра́дуйся о́тче отце́в Спиридо́не.

 

 

Величание святителю.

 

 

Велича́ем тя / святи́телю о́тче Спиридо́не, / и чтем святу́ю па́мять твою́, / ты бо мо́лиши о нас // Христа́ Бо́га на́шего.

 

Стих: Услышите сия вси языцы….

 

Стих:

 

 

Стих:

 

 

Прокимен.

 

Уста́ моя́ возглаго́лют прему́дрость, / и поуче́ние се́рдца моего́ ра́зум.

 

Сла́ва: Моли́твами святи́теля Спиридо́на:

 

И ны́не: Моли́твами Богоро́дицы:

 

Поми́луй мя Бо́же:

 

 

По 50-м псалме стихира, глас 6.

 

Святи́телей Боже́ственный сосу́д, / о́тче преподо́бне Спиридо́не му́дре, / ты́ доброде́тельми показа́лся еси́: / сего́ ра́ди Це́ркве предста́тель бы́в, / ересенача́льники изгна́л еси́ / и Ариево хуле́ние собо́рне на зе́млю низложи́л. / Те́мже, чудоде́йствуя де́лом и сло́вом, / Спа́са моли́ спасти́ся душа́м на́шим.

 

На хвалитех, глас 8.

 

 

Преподо́бне о́тче Спиридо́не, / ты возше́д на ле́ствицу Боже́ственнаго ра́зума, / и к Бо́гу приближа́яся, всыне́ния дар прии́м, / исцеля́еши неду́ги неисце́льныя, / и отго́ниши ду́хи нечи́стыя: / тем твою́ па́мять пра́зднуем, / ра́достию се́рдца, Христа́ велича́юще, // возвели́чившаго Своего́ уго́дника.

 

 

Отче чу́дный Спиридо́не, / световиде́нием ума́ чи́сто облиста́емь, / страсте́й успи́л еси́ многоволне́нное мо́ре. / И безстра́стием лета́я, чи́стыми кри́лы дости́гл еси́, / иде́же добро́та неизрече́нна и недомы́сленна, // о нас всегда́ моля́ хва́лящих тя.

 

 

Отче отце́в Спиридо́не, / свяще́нства пра́вило, / целому́дрия о́браз, мона́шествующих кре́пость, / Це́ркве утвержде́ние, / любве́ свети́льник, престо́л чу́вства, / исто́чник чуде́с и язы́к огнедохнове́нный: / уста́ сладкоглаго́лива, / сосу́д Боже́ственнаго Ду́ха, // и разу́мный был еси рай богоблаже́нне.