АВГУСТА
Служба святой равноапоcтольной
Марие Магдалине:
НА ВЕЧЕРНИ
На Господи, воззвах: стихиры святыя, глас 8.
Миро со слезами носящи,/ Магдалини Марие,/ Божественнаго гроба достигши,/ и славы Ангела узрела еси, / возвещающаго Животодавца Божественное востание/ и всех избавление./ Темже единонадесятим возвестити потщалася еси,/ радостно глаголющи:/ взыграйте, Христос востал есть.
Служащи, прехвальная,/ нас ради по нам бывшему Христу Богу/ и непрестанными сиянии/ душу и мысль разжегши, / свет была еси. / Егоже видевши, на Кресте висяща, / странное видение,- глаголала еси, слезящи, / како Жизнь смерть вольную/ ныне приемлет?
Память твою священную совершаем,/ учившаяся у Христа / и Того повеления / проповедавшая, всеславная,/ душам на избавление,/ и мощей твоих раку, Марие, верою облобызаем,/ источающую благодать неоскудную и просвещение/ любовию притекающим, Богоблаженная.
«И ныне» – догматик воскресный, глас 6:
Кто Тебе не ублажит, Пресвятая Дево; / кто ли не воспоет Твоего Пречистаго Рождества; / безлетно бо от Отца возсиявый Сын Единородный, / Тойже от Тебе, Чистыя, пройде, / неизреченно воплощься, / естеством Бог Сый, / и естеством быв Человек нас ради; / не во двою лицу разделяемый, / но во двою естеству / неслитно познаваемый. / Того моли, Чистая Всеблаженная, / помиловатися душам нашим.
На литии стихиры Триоди, глас 1:
Мироносицы жены, ко гробу что приидосте; / что ищете живаго в мертвых? / Воскресе Господь, дерзайте, вопиет Ангел.
Со страхом приидоша жены на гроб, / ароматы тело Твое помазати тщащияся: / и сие не обретше, / недоумевахуся друга ко друзей, не ведуще Воскресения. / Но предста им Ангел, и рече: / воскресе Христос, / даруяй нам велию милость.
|
|
Приидоша на гроб Магдалина, / и другая Мария ищуще Господа, / и Ангела видеша яко молнию / седяща на камени, и глаголюща им: / что ищете живаго с мертвыми; / воскресе, якоже рече: / в Галилеи Его обрящете. / К Нему же возопиим: / воскресый из мертвых, Господи слава Тебе.
Слава, глас 6: Проси Иосиф тело Иисусово, / и положи е в новом своем гробе: / подобаше бо Ему из гроба, / яко от чертога проити. / Сокрушивый державу смерти, / и отверзый врата райская человеком, / Господи слава Тебе.
И ныне, Богородичен, глас тойже: Творец и Избавитель мой, Пречистая, / Христос Господь из Твоих ложесн прошед, / в мя оболкийся, / первыя клятвы Адама свободи. / Темже Ти, Всечистая, / яко Божии Матери же и Деве, / воистинну вопием немолчно: / радуйся ангельски, радуйся, Владычице, / предстательство и покрове, / и спасение душ наших.
На стиховне стихиры преподобной жене, глас 1:
Слaвы отцев воистинну возжелaвши, / слaву нетленную возлюбила еси, / темже отстyпльши слaдких, / тело твое болезнем всем отдала еси, Марие, и ныне болезней приeмлеши возмeздие, со Христом царствующи.
Тропарь равноап. Марии Магдалины, глас 1:
Христу, нас ради от Девы рождшемуся,/ честная Магдалино Марие, последовала еси,/ Того оправдания и законы хранящи./ Темже днесь всесвятую твою память празднующе,/ грехов разрешение// молитвами твоими приемлем (дважды).
Тропарь Богородице, глас 4:
Богородице Дево, радуйся, Благодатная Марие, Господь с Тобою; благословена Ты в женах и благословен Плод чрева Твоего, яко Спаса родила еси душ наших.
|
|
НА УТРЕНЕ
На «Бог Господь» – тропарь равноапостольной, глас 1-й (дважды). «Слава, и ныне» – Богородичен воскресный, глас тот же: «Гавриилу вещавшу Тебе, Дево …».
Тропарь равноап.Марии Магдалины, глас 1:
Христу, нас ради от Девы рождшемуся,/ честная Магдалино Марие, последовала еси,/ Того оправдания и законы хранящи./ Темже днесь всесвятую твою память празднующе,/ грехов разрешение// молитвами твоими приемлем (дважды).
Богородичен отпустительный, глас 1:
Гавриилу вещавшу Тебе, Дево, радуйся, / со гласом воплощашеся всех Владыка, / в Тебе, святем кивоте, / якоже рече праведный Давид; / явилася еси ширшая Небес, / поносивши Зиждителя Твоего. / Слава Всельшемуся в Тя, / слава Прошедшему из Тебе, / слава Свободившему нас Рождеством Твоим.
Величание:
Величаем тя, / мироносице святая равноапостольная Марие Магдалино, / и чтим болезни и труды твоя, / имиже трудилася еси / во благовестии Христове
Псалом избранный (святительский):
Услышите сия вси языцы, внушите вси, живущии по вселенней.
Уста моя возглаголют премудрость, и поучение сердца моего разум.
Приидите, чада, послушайте мене, страху Господню научу вас.
Благовестих правду в церкви велицей.
Истину Твою и спасение Твое рех.
Повем Имя Твое братии моей, посреде церкве воспою Тя.
Услышати ми глас хвалы Твоея и поведати вся чудеса Твоя.
Господи, возлюбих благолепие дому Твоего, и место селения славы Твоея.
Возненавидех церковь лукавнующих, и с нечестивыми не сяду.
Яко сохраних пути Господни, и нечествовах от Бога моего.
Уста праведнаго поучатся премудрости, и язык его возглаголет суд.
|
|
Правда Его пребывает в век века.
Священницы Твои облекутся правдою, и преподобнии Твои возрадуются.
Блажени живущии в дому Твоем, в веки веков восхвалят Тя.
Прокимен , глас 4:
Дивен Бог во святых Своих, / Бог Израилев.
Всякое дыхание, да хвалит Господа.
По 50-м псалме, глас 6:
Слава: Молитвами святой равноапостольной Марии Магдалины Милостиве, очисти / множества согрешений наших.
И ныне: Молитвами Богородицы, / Милостиве, очисти / множества согрешений наших.
Помилуй мя, Боже, / по велицей милости Твоей / и по множеству щедрот Твоих / очисти беззаконие мое.
Стихира, глас 6 («Слава» с «Господи воззвах»):
Первее видевши Божественное воскресение,/ Марие Магдалини,/ Перваго благих Виновника,/ наше благосердно естество обожившаго, / первая и благовестница явилася еси,/ вопиющи апостолом:/ печаль отложивше,/ благодушие восприимите/ и приидите, узрите Христа воскресшаго/ и миру подающаго велию милость.
Канон.
После 9-й песни: светилен равноап. Марии Магдалины: Солнце незаходимое, отроковице… (дважды).
На хвалитехстихиры преподобной жене, глас 4:
Плоти играния / постными подвиги, / души любочeстно покорила еси, / и Христу последовала еси, / и посреде постницъ вселилася еси всеговейно, Марие Магдалино, / угашaющи распаления сластные, Божественными тyчами слeзъ, / зельнейшее желaние / к зиждителю возжигaющи.
Свящeнное жилище / во многих пользу Богу воздвигла еси, / бывши хрaм Святаго Духа всемyдрая, / чистотою душeвною, / и путеводствила еси дyшы к полeзнымъ подвигомъ постнымъ, / и принесла еси сие якоже вено спасeны, о Марие Магдалино, владычице: / с нимиже верою тя почитaемъ.
И ныне, глас 8:
Волею обнищавшему нищетою моею / премногим благоутробием Христу Богу,/ Магдалина Мария, яко ученица верно послуживши,/ на Древе простерта и во гробе затворена видевши,/ вопияше, слезы точащи:/ что странное видение?/ Иже мертвыя Животворяй, како мертв вменяется?/ Кия миры принесу Изменившему мя смрада демонскаго? / Кия слезы пролию от слез Изменившему мою праматерь?/ Но, о всяческих Царю!/ Якоже вертограда хранитель явился еси,/ росою Твоих глагол вар отъемлеши, рек к ней: / к Моим братиям шедши, / благовещения радость возопий, / восхожду бо ко Отцу и Богу Моему и Богу вашему, / яко да подам мирови велию милость.
По Трисвятом – тропарь равноапостольной, глас 1-й, «Слава, и ныне» – Богородичен воскресный, глас тот же: «Гавриилу вещавшу Тебе, Дево …».
Тропарь равноап/ Марии Магдалины, глас 1:
Христу, нас ради от Девы рождшемуся,/ честная Магдалино Марие, последовала еси,/ Того оправдания и законы хранящи./ Темже днесь всесвятую твою память празднующе,/ грехов разрешение// молитвами твоими приемлем.
Богородичен отпустительный, глас 1:
Гавриилу вещавшу Тебе, Дево, радуйся, / со гласом воплощашеся всех Владыка, / в Тебе, святем кивоте, / якоже рече праведный Давид; / явилася еси ширшая Небес, / поносивши Зиждителя Твоего. / Слава Всельшемуся в Тя, / слава Прошедшему из Тебе, / слава Свободившему нас Рождеством Твоим.
На Литургии
По входе – тропари и кондаки:
В храме святого – тропарь равноапостольной, «Слава»- кондак равноапостольной, «И ныне» – «Предстательство христиан…».
Тропарь равноапостольной Марии Магдалины, глас 1:
Христу, нас ради от Девы рождшемуся,/ честная Магдалино Марие, последовала еси,/ Того оправдания и законы хранящи./ Темже днесь всесвятую твою память празднующе,/ грехов разрешение// молитвами твоими приемлем.
Кондак равноапостольной Марии Магдалины, глас 3:
Слава Отцу и Сыну и Святому Духу.
Предстоящи, преславная, у Креста Спасова со иными многими,/ и Матери Господни состраждущи, и слезы точащи,/ сие в похвалу приношаше, глаголющи:/ что сие есть странное чудо?/ Содержай всю тварь пострадати изволи.// Слава державе Твоей.