Благодарственное Страстей Христовых
Благодарственное Страстей Христовых воспоминание, и молитвенное размышление, паче иных молитв зело полезное, еже должно по вся пятки совершати.
Начало сице:
Благословен Бог наш: аще же инок, или мирянин: Молитвами святых отец наших: Тоже: Слава Тебе, Боже наш, слава Тебе. Царю Небесный: Трис-вятое По Отче наш: Господи помилуй, 12. Слава, и ныне: Приидите, поклонимся: трижды. Помилуй мя, Боже: Верую во Единого Бога Отца:
По сем глаголи стихи сия.
О коль сладки и коль красны шествия Твоя, Сыне Божий, сшедый с небес: иский бо заблудшее овча, человека согрешивша, многие безчисленные труды, многия сотворил еси путешествия. По сих же пришел еси на страсть и смерть вольную: о нихже, Содетелю и Искупителю мой, благодарение Ти от всего сердца моего возсылаю.
(Твори на всякий стих поклон).
За перваго Адама, согрешившаго в райском вертограде, ятый, и сильно связанный в Гефсиманском вертограде, вторый Адаме, Господи Иисусе Христе, Сыне Божий, слава Тебе, слава Тебе: свяжи мя любовию Твоею толь крепко, дабы паче избрал умрети, нежели когда коим грехом озлобити Твое незлобие и человеколюбие, молютися.
От вертограда веден чрез поток Кедрский, в пути же том поткнувыйся, и на землю падый, Господи Иисусе Христе, Сыне Божий, слава Тебе, слава Тебе: припадаю Ти ко пречистым стопам Твоим: от всякаго падения душу мою соблюди, молюся Ти.
От Анны до окаяннаго Каиафы архиереа веден, идеже по пречистым ланитам Твоим, яже суть красны, яко вертоград благовонных аромат, претерпел еси биения. Слава Тебе, слава Тебе: Господи Иисусе Христе, Сыне Божий, слава Тебе.
Такожде пред Каиафою, рукою железною, вооруженною, от неблагодарнаго Малха, емуже в вертограде усеченное от Петра ухо исцелил еси, толь тяжко в ланиту ударенный, Господи, яко изобразишася вся персты проклятыя руки оныя на пречистом лице Твоем, подвигошася же зубы Твои белы паче млека: ударение Твое во всем дворе архиерейском слышано бысть. Ты же абие на землю пад, из уст Своих пречистых, такожде и из носа много крови Божественный источил еси, Источниче жизни нашея, Господи Иисусе Христе, Сыне Божий, вопию Ти: слава Тебе, слава Тебе.
Пред тем же Каиафою, ложным и лжелюбным архиереем, ложная на Тя свидетельства слышавый, обаче яко агнец безгласен уст Своих не Отверзый, но молча вся претерпевый, Господи Иисусе Христе, Сыне Божий, слава Тебе, слава Тебе. Даруй мне молчание и терпение противных со усердием, от кого либо востаюших на мя, да не обретается лесть и ложь во устах моих, молюся Ти.
В поругание лице Свое пресвятое покровенно имый, по лицу ударен, таже, кто есть ударей Тя, вопрошен был еси, Господи Иисусе Христе, Сыне Божий, слава Тебе. Покрый прощением грехи моя, да не покрыет студ вечный лица моего, егда предстану лицу Твоему, егоже мя зрети и насыщатися сподоби, молюся Ти.
От несмысленнаго соборища иудейскаго и Каиафы, аки хульник, и законопреступник сказанный, повинен быти смерти, глубоко в нощь от жидов поруган и уничижен, многажды во дворе архиерейском ударен, таже и в темницу до утрия ввержен, Господи Иисусе Христе, слава Тебе, слава Тебе, Свете незаходимый: По отшествии моем от жития сего, душу мою от темницы геенския свободи, молюся Ти.
Утру бывшу снязан от жидов, и приведен к Понтийскому Пилату игемону, иже ни единыя в Тебе вины обрете, спасению нашему виновне, Господи Иисусе Христе, Сыне Божий, слава Тебе. Тако мя во всей жизни сей сохрани, да в час смерти моея ни единыя вины обрящет во мне враг и супостат души моея, молюся Ти.
От Пилата веден ко юроду Ироду, иже аще Тя от многаго времени видети желаше, обаче юродив и нерадив сый, Тебе превечную и не созданную мудрость, несмысленна вменяя, уничижи, и поругався, облече Тя в ризу светлу: слава Тебе, Господи Иисусе Христе Боже мой, слава Тебе. От поругания невидимых враг соблюди, и в ризу нетления по смерти моей облецы мя, молюся Ти.
Ирод посрамленна возврати Тя паки к малодушному Пилату, к немуже веден сый, многая ударения и озлобления мене ради в том пути пострадавый: слава Тебе, Господи Иисусе Христе, Боже мой, слава Тебе: пути моя направи ко свету заповедей Твоих, молюся Ти.
От Пилати изведен сый, и к столпу приведен, идеже Сам ризы Своя с Себе снем, столп же обем самохотне, неповинный руками, и чистый сердцем, руце Свои пресвятыя к столпу в привязание приложил еси, хотя человеческое естество разрешити и свободити от рук вражиих: руками же свирепых воинов зело сильно связан, и к столпу привязан, терновыми розгами остистыми, остроузловатыми бичьми и узами железными таковатыми толь немилостивно бием, у столпа стоя, по пресвятом теле Своем приял еси ударения, и паки по техже язвах люте бием, раны претерпел еси, яко Божественное тело Твое от костей отбиено висяше, аки чермныя пухвы: кровь же животворящая преизобильно истекаше. Ты же от столпа разрешен, и зело от болезни разслаблен, пал еси на землю, и на земли в крови Своей валяяся, от толиких ран и болезней умрети по естеству принужден был еси: но Божество безстрастно пребысть, бытие всей твари даруя: слава Тебе, Господи Иисусе Христе, Боже мой, слава Тебе. Тех ради безценных и всецелебных язв Твоих, вся грехи моя прости, и от уязвления вражия даже до скончания моего сохрани мя, молюся Ти.
По толиких язвах и мучительствах, кровию Своею токмо, весь наг сый, одеян. Наг же сый, яко от рождения, от всех поругаем, с велиим студом пред всеми ризы Своя, особь далече от Себе поверженныя, едва жив, собирая, и трясыйся от болезни и мраза, зима бо бяше, солнце и огнь в согреяние земнородным создавыи, Господи Иисусе Христе, Сыне Божий, слава Тебе, слава Тебе, сердце мое студеное на добродетель согрей теплотою пресвятаго Твоего сошедшаго во огни Духа, молюся Ти.
О столп каменный смертоносне, о землю же к смерти ударен: слава Тебе, Господи Иисусе Христе, Сыне Божий, слава Тебе: столп крепости от лица вражия буди ми, молюся Ти.
Ногами ударен, за власы главные и за браду торган и влачим, Господи Иисусе Христе, Сыне Божий, слава Тебе, слава Тебе: зубы геенскаго змия да не ята будет душа моя, в крове Твоем сохрани мя, молюся Ти.
Скверныма рукама богоубийственнаго рода жидовскаго оружием и дрекольми даже до поткновения ударен в ноги и голени. За власы же, яже о пресвятой выи Твоей быша, от земли был еси поднесен, превозносимый Неба и земли Царю: Господи Иисусе Христе, Сыне Божий, вопию Ти: слава Тебе, слава Тебе, слава Тебе. Возвыси и вознеси ум мой, да всегда небесная помышляю и творю благоутробием Твоего человеколюбия, егоже ради страждеши.
От терноваго венца тысящу избодений претерпевый, тогда же капли Божественныя и безценныя крови из главы Твоея источивый: венец терновый возлагаем и низлагаем бяше на пречистую главу Твою, главо Церкви прекрасная: слава Тебе, Господи Иисусе Христе, Сыне Божий, слава Тебе.
По терновом венце, во главу тростиями и палицами от всея крепости ударенный, и тем Твою честную главу глубочайше пронзоша терновыми остии, от нихже остия в мозгу Твоем унзоша. Аз же унзен острым душеборных страстей тернием, тем вопию Ти: слава Тебе, Господи Иисусе Христе, Сыне Божий, слава Тебе.
Наругание от жидов, аки цареви данную трость приемый в десницу Твою, одесную Бога и Отца седяй, Господи Иисусе Христе, Сыне Божий, слава Тебе, слава Тебе: тростию тою заглади рукописание неизчетных согрешений моих, да стану одесную во славе Твоей, и прославлю Тя во веки.
Пястьми по Божественном теле во уста и между очи, Его же очи, яко пламень огненный, ударенный Господи, по пресвятой же выи Твоей ударен, выю мою преклони, молюся Ти, укрепи мя в поклонение Тебе, нас ради преклоншему небеса и сошедшему: Господи Иисусе Христе, Сыне Божий, слава Тебе: от славы Твоея небесныя не отрини мене.
Во главу и перси ударения приемый, приими мое ныне главы преклонение и усердное в перси биение, якоже иногда мытарево приял еси: укрепи же мя от Твоея пресвятыя десницы, да ударение и всяку печаль, и тяготу временную благодарно понесу: вся бо Ты, елика хощеши, на пользу строиши. Слава Тебе, Господи Иисусе Христе, Сыне Божий, слава Тебе: славы Твоея Божественныя удостой мя, молюся Ти.
За нос с поруганием, и зельным мучением, за уши терзан, и люте уязвлен, от ногу до главы несть целости, ниже образа доброты имый, терновый венец нося, в багряницу поругания одеян, второе к Пилату приведен, иже видев Тя в неисцельных язвах и болезнех, удивися толь безчеловечному иудейскому суровству, и рече о Тебе: Сей Человек толь немилостивно избиен, достоин есть прочее милосердия от иудей, они же, распни, вопияху нань: вопию Ти и аз, Слове Божий: слава Тебе, Господи Иисусе Христе, Сыне Божий, слава Тебе; терние грехов истреби от земли сердца моего окамененнаго, да плод принесу Ти благодарения.
Воду из камене и ветры от сокровищ Своих изводяй, приведен был еси к неразсудному Пилату, иже седе на судищи, и Тебе, на херувимех седящаго и судящаго живым и мертвым, осуди на смерть неповиннаго. Слава Тебе, Господи Иисусе Христе, Сыне Божий, слава Тебе, Боже мой: даждь ми всегда память имети смертную, и готову быти на суд Твой праведный и страшный, на немже не осуди мя по делом моим, но спаси мя по милости Твоей, молюся Ти.
Егда Пилат возгласи на Тя смертное изречение, неизреченныя жизни Подателю: тогда жиды, немилосердием связанные, связавше руце Твои, и на выю Твою пресвятую возложиша крест, и, аки злодея, между двема разбойники ведоша на смерть: со беззаконными вмененный, неизменный Господи Иисусе Христе, Сыне Божий, слава Тебе: от злодейства невидимаго татя, подкопывающа различными искушении храмину души моея, во дни и в нощи сохрани мя, яко зеницу ока, да не окраден буду сокровища вечных благ, яже уготовал еси любящим Тя, молюся Ти.
Еще же, милости бездно, немилостивый род еврейский возложи на Тя крест зело тяжкий, его же на Себе Сам несый, пал еси на землю, тогда же и ударения смертоносная приял еси: благоприятне Господи Иисусе Христе, Сыне Божий, слава Тебе, слава Тебе: тех ради Твоих чудес, крестом падения вражия сохрани мя, молюся Ти.
Приведен был еси на Голгофскую гору, горних сил и Властей Владыка, Сам риз Своих извлекаем волею, болезнь претерпел еси: егда бо хитон Твой сняша, тогда вся язвы растерзая и раздирая, болезнь Твою обновляли: обновивый естество человеческое, молюся Ти: ветхие струпы души моея беззаконных страстей, прилепшие ей, отъемши, приими мя вопиюща: неизреченный во страдании Твоем Господи Иисусе Христе, Сыне Божий, слава Тебе, слава Тебе, долготерпеливе Владыко!
Плюновением Своим иногда давый свет видети слепорожденному, по пресветлом лице Твоем от жидов прежде распятия мерзким плюновением обезчещен, честнейший всех Ангельских чинов, Господи Иисусе Христе, Сыне Божий, слава Тебе, слава Тебе: укрепи мя во омерзение всегдашнее, и во оплевание всех вражиих сетей, искушений же и вожделений плотских, молюся Ти.
Егда Тя людие лютии иудейстии на Голгофу приведоша, крест на землю положиша, дабы на нем распяли Тя, простираяй небо, яко кожу, абие Сам непреложне положитися на кресте восхотел еси: но зверообразнии мучители, единодушно устремившеся на Тя, повергоша Тя на крест, и толь немилостивно ко кресту руце и нозе Твои пресвятии святым гвоздием пригвоздиша, яко вся жилы и составы Твоя терзахуся. И тогда збыстя реченное о Тебе пророком Давидом: Исчетоша вся кости моя: болезнь же оная лютейшая и тягчайшая Тебе бяше паче всех страданий Твоих, ею же души моея всю болезнь исцели, молюся Ти и вопию: слава Тебе, слава Тебе, Господи Иисусе Христе, Сыне Божий, преславных ради пречистых и животворных страданий Твоих, спаси мя, многомилостиве и человеколюбче Владыко!
Прокаженныя очищаяй, пречисте, краснейший паче всех сынов человеческих добротою, Сам аки прокажен был еси от мерзкаго осквернения плевотинами, яже на кресте протяжен, лежа на земли, по различных тела Божественнаго частех приял еси. Слава Тебе, Господи Иисусе Христе, Боже мой, слава Тебе: душу мою прокаженную от несказанных скверн греховных очисти, и спаси мя, молюся Ти.
Воздыхания сердечная прежде крестной смерти испустивый, слезныя капли при животворящих Твоих страстех и кровныя капли излиявый, излей на мя милосердие Твое, и даруй ми сердечныя о гресех моих воздыхания: подаждь грехом очистительныя слезы, паче слезами и Кровию Твоею пречистою очисти и омый душу мою, да пою: Слава Тебе, Господи Иисусе Христе, Боже мой, вся сия мене ради претерпевый, слава Тебе.
На кресте весь наг воздвижен, точию пречистыя чресла Своя имый покровенна покрывалом, между двема разбойникома обешенный, желчи и оцта вкусивый, пресладкий мой Иисусе, слава Тебе, слава Тебе: от горести греха, и пакостей вражиих, сохрани мя, молюся Ти.
Души и тела моего Творче, всею душею и чувствиями на всем теле мене ради пострадавый: на осязании, всея плоти биения и уязвления: на вкушении, оцта с желчию напоение: на обонянии, во узилищи от трупов, на Голгофской горе смрада тяготу: на слышании, лжесвидетельства, поругания и хуления: на видении, горьких слез излитие, и болезненное воззрение ко пречистой Матери Своей, под крестом стоящей и люте сердце Свое терзающей. Слава Тебе, Господи Иисусе Христе, Боже мой, слава Тебе: вся елика душевными и телесными чувствы согреших, прости ми окаянному, честнаго ради страдания Твоего спасительнаго.
Безсмертия Источниче, умерый в час девятый, по смерти моей даждь ми тамо жити, идеже хвалят Тя и поют девять чинов Ангельских, молюся Ти ныне: силою путешествий всех, деяний и трудов Твоих, яже на земли жив мало вышше над три лета и тридесять, безлетне, едине от Троицы, Господи Иисусе Христе, нас ради подъял еси, приими от мене недостойнаго и сквернаго, яко жертву непорочную, Твоих пречистых страданий тридесять и трикратное воспоминание, помянув Твою на крестном олтаре о всем мире принесенную жертву: приими всесвятыя Девы Матере Твоея, и возлюбленнаго друга и ученика Твоего Иоанна Богослова, и святыя равноапостольныя Марии Магдалины, и прочих кресту Твоему предстоящих приносимыя о нас Тебе молитвы. Ты бо еси истина, и по истине всем спастися хощеши, и Тебе от всех подобает слава, честь, хвала и поклонение, ныне и присно, и во веки веков, аминь.