М оли́твами ро́ждшия Тя, Христе́,/ му́ченик Твои́х, и апо́стол, и проро́к, и святи́телей,/ преподо́бных, и пра́ведных, и всех святы́х,// усо́пшия рабы́ Твоя́ упоко́й.
Тропа́рь, глас 2:
А по́столи, му́ченицы и проро́цы,/ святи́телие, преподо́бнии и пра́веднии,/ до́бре по́двиг соверши́вшии и ве́ру соблю́дшии,/ дерзнове́ние иму́ще ко Спа́су,/ о нас Того́, я́ко Бла́га, моли́те// спасти́ся, мо́лимся, душа́м на́шим.
Сла́ва Отцу́ и Сы́ну и Свято́му Ду́ху.
Тропа́рь, глас 2:
П омяни́, Го́споди, я́ко Благ, рабы́ Твоя́,/ и ели́ка в житии́ согреши́ша, прости́:/ никто́же бо безгре́шен, то́кмо Ты,// моги́й и преста́вленным да́ти поко́й.
И ны́не и при́сно и во ве́ки веко́в. Ами́нь.
Богоро́дичен, глас 2:
М а́ти Свята́я Неизрече́ннаго Све́та,/ а́нгельскими Тя пе́сньми почита́юще,// благоче́стно велича́ем.
Кано́н в хра́ме свято́го:
Песнь 1. Кано́н вмч. Арте́мия, глас 2:
Во глубине́ постла́ иногда́/ фараони́тское всево́инство преоруже́нная си́ла;/ вопло́щшееся же Сло́во всезло́бный грех потреби́ло есть,/ препросла́вленный Госпо́дь,// сла́вно бо просла́вися.
Песнь 3
Процвела́ есть пусты́ня, я́ко крин, Го́споди,/ язы́ческая неплодя́щая це́рковь,/ прише́ствием Твои́м,// в не́йже утверди́ся мое́ се́рдце.
Катава́сия, глас 2:
Непло́дствовавший мой ум,/ плодоно́сен, Бо́же, покажи́ ми,/ Де́лателю до́брых, Насади́телю благи́х,// благоутро́бием Твои́м.
Песнь 4
Прише́л еси от Девы не хода́тай, ни Ангел,/ но Сам, Господи, воплощся,/ и спасл еси всего мя человека,/ тем зову Ти:// слава силе Твоей, Господи.
Песнь 5
Хода́тай Бо́гу и челове́ком был еси́, Христе́ Бо́же,/ Тобо́ю бо, Влады́ко, к Светонача́льнику, Отцу́ Твоему́,/ от но́щи неве́дения// приведе́ние и́мамы.
Песнь 6
В бе́здне грехо́вней валя́яся,/ неизсле́дную милосе́рдия Твоего́ призыва́ю бе́здну:// от тли Бо́же, мя возведи́.
Катава́сия, глас 2:
Во глубине́ грехо́вней содержи́мь есмь, Спа́се,/ и в пучи́не жите́йстей обурева́емь:/ но я́коже Ио́ну от зве́ря,// и мене́ от страсте́й возведи́, и спаси́ мя.
Песнь 7
Богопроти́вное веле́ние беззако́ннующаго мучи́теля/ высо́к пла́мень вознесло́ есть;/ Христо́с же простре́ Богочести́вым отроко́м ро́су духо́вную,// Сый благослове́н и препросла́влен.
Песнь 8
Пещь иногда́ о́гненная в Вавило́не де́йства разделя́ше,/ Бо́жиим веле́нием халде́и опаля́ющая,/ ве́рныя же ороша́ющая, пою́щия:// благослови́те вся дела́ Госпо́дня, Го́спода.
Катава́сия, глас 2:
Хва́лим, благослови́м,/ покланя́емся Го́сподеви,// пою́ще и превознося́ще во вся ве́ки.
В купине́ Моисе́ю Де́вы чу́до,/ на Сина́йстей горе́ прообрази́вшаго иногда́,/ по́йте, благослови́те,// и превозноси́те во вся ве́ки.
Диакон: Б огоро́дицу и Ма́терь Све́та в пе́снех возвели́чим.
Песнь Пресвято́й Богоро́дицы:
В ели́чит душа́ Моя́ Го́спода,/ и возра́довася дух Мой о Бо́зе Спа́се Мое́м.
Честне́йшую Херуви́м/ и Сла́внейшую без сравне́ния Серафи́м,/ без истле́ния Бо́га Сло́ва ро́ждшую,/ су́щую Богоро́дицу, Тя велича́ем.
Я́ ко призре́ на смире́ние рабы́ Своея́,/ се бо от ны́не ублажа́т Мя вси ро́ди.
Честне́йшую...
Я́ ко сотвори́ Мне вели́чие Си́льный,/ и свя́то И́мя Его́, и ми́лость Его́ в ро́ды родо́в боя́щимся Его́.
Честне́йшую...
С отвори́ держа́ву мы́шцею Свое́ю,/ расточи́ го́рдыя мы́слию се́рдца их.
Честне́йшую...
Н изложи́ си́льныя со престо́л, и вознесе́ смире́нныя;/ а́лчущия испо́лни благ, и богатя́щияся отпусти́ тщи.
Честне́йшую...
В осприя́т Изра́иля о́трока Своего́, помяну́ти ми́лости,/ я́коже глаго́ла ко отце́м на́шим, Авраа́му и се́мени его́, да́же до ве́ка. Честне́йшую...
Песнь 9
Безнача́льна Роди́теля Сын, Бог и Госпо́дь,/ вопло́щься от Де́вы, нам яви́ся,/ омраче́нная просвети́ти, собра́ти расточе́нная,// тем Всепе́тую Богоро́дицу велича́ем.
Катава́сия, глас 2:
Преесте́ственно пло́тию Заче́ншую во чре́ве,/ от Отца́ безле́тно предвозсия́вшее Сло́во,// в пе́снех немо́лчных велича́ем ве́рнии.
Досто́йно есть:
Д осто́йно есть я́ко вои́стинну/ блажи́ти Тя, Богоро́дицу,/ Присноблаже́нную и Пренепоро́чную/ и Ма́терь Бо́га на́шего./ Честне́йшую Херуви́м/ и сла́внейшую без сравне́ния Серафи́м,/ без истле́ния Бо́га Сло́ва ро́ждшую,// су́щую Богоро́дицу, Тя велича́ем.
Стихи́ры из Окто́иха, глас 2:
Стих: Хвали́те Его́ на си́лах Его́,/ хвали́те Его́ по мно́жеству вели́чествия Его́.
П о Христе́ пострада́вше да́же до сме́рти,/ о страстоте́рпцы му́ченицы,/ ду́ши у́бо и́мате на небесе́х в руце́ Бо́жией,/ и по ми́ру всему́ почита́еми суть мо́щи ва́ша./ Святи́телие покланя́ются,/ и лю́дие вси, ра́дующеся, согла́сно вопие́м:// сон че́стен пред Го́сподем смерть преподо́бных Его́.
И ны́не и при́сно и во ве́ки веко́в. Ами́нь.
П рииди́те, Ма́терь Све́та пе́сньми немо́лчными вси просла́вим,/ Та бо роди́ спасе́ние на́ше:/ и ра́дуйся! принесе́м, я́ко еди́ной ро́ждшей всех нача́льнейшаго,/ И́же пре́жде век Бо́га./ Ра́дуйся, Я́же Е́ву ро́ждшую па́ки назда́вшая,// ра́дуйся, Пречи́стая Де́во Неискусобра́чная.
Стихи́ры на стихо́вне. Стихи́ры окто́иха, глас 2, подо́бен: «Егда́ от дре́ва Тя…»:
С тремле́ние сме́ртное и тлю Твое́ю живоно́сною сме́ртию низложи́л еси́, Влады́ко:/ всем же источи́л еси́ живо́т ве́чный,/ и земны́м уме́ршим воста́ние дарова́./ Те́мже мо́лимся Тебе́, Спа́се:/ и́же ве́рою к Тебе́ преста́вльшияся упоко́й,// и нетле́нней Твое́й сла́ве сих сподо́би, Человеколю́бче.
Богоро́дичен, глас 6:
И ны́не и при́сно и во ве́ки веко́в. Ами́нь.
Б о́га, из Тебе́ воплоти́вшагося,/ разуме́хом, Богоро́дице Де́во.// Того́ моли́ о спасе́нии душ на́ших.