Рочалыштам.
Öти нывбабалысь юалöны: «А кымын тэныд арöс?»
“Семьдесят нёль»,-вочавидзö чуклöмса нывбаба.
Ош кыйöм
Кык чуклöмса дядьö мунасны вöрö ош кыйны. Зэв ыджыд сплöшнöй вырубка вылын ош гуыс вöлöма, сöмын полкилометра ылнаын öтка пипу сулалöма. Мужичöйяс оштö гусьыс лэптасны: первой Иваныд кыкысь лыяс, ошкыд петö гусьыс, сэсся Сашкаыд лыяс öтиысь дай мöдысь, а ошкыд век петö. Ружьеяс шыблалiсны, öта-мöдсö панъялiгтырйи, йöткасьöмöн, скачöн котöртасны öтка пипу дорад. Бура ылö котöртасны да гöгöровоасны, мый ошкыд оз вöтчы. Бергöдчасны, а ошкыд, вöлöм, гу дорас и усьöма.
Сёрнитöны челядь.
Öти велöдчысь гижö дневникö: «Лыддьыны мойд «Шыр да гад». (М-да, олiсны-вылiсны Шыр да гад. Гадыс пыр гадитiс.)
Гижö дневникö аслыс пасйöд: «В понидельник фоткаться, в сапогах.» (Буретш öти лунö вöлi локтö фотограф, и ывла вылын лоас котралöм,и артмöма гижöдас теш.)
***
Садйын кагалысь юалöны:
-Тэ радейтан öрехъяс?
-Да.
-А кутшöмöс?
-Грековнöйöс.
***
Мама гладит маленькую дочку, приговаривая: «Душа ты моя!»
А ребёнок и отвечает: «Я не душ, я доча».
***
Спрашивают в саду у ребёнка:
-А чем ты можешь маму огорчить?
-Накормить горчицей.
***
Сиктса садйын пажнайтiгöн нёль арöса кага оз кöсйы сёйны пуöм чипан яй. Сылы шуöны, мед видлас, а сiйö вочавидзö: «Ме чувствуйта, мый сiйö невкушнöй!»
***
Водзтi совхозад уджöдiсны ичöтысянь, вöвъяс вылын вöлi кыскалам юръястö. Нарошнö росдодь вöлi вöчасны вöлыдлы, и ми, детинкаяс, ямщичайтам. Ещö панъясям, кодi медуна юр кыскас. А зорöд чöвтысьыс Симён Степан дядь вöлi. Пельнас сьöкыдкодь вöлi Степан дядьыд. Вöлыслöн домасяныс кыткö торксьöма, и Степан дядь пырис росдодь костад лöсьöдны, копыртчис. А вöлыс кöбыла вöлi, кутiс кудзасьны. Степан дядь öтарö чышкысьö: «Уф! Пöсявны пö кутi!» А сэсся и гöгöрвоис, мый сы вылö кöбылаыд кудзалö, да кыдзи чорыда матьыштiс и лöскöбтiс вöлыдлы. Ме öдва вöв вылад öшйи- скачöн вöлыд öдöбтiс да.
Утка вылö кыйсьöм.
Ветлiсны кык ёрт утка кыйны. Öтикыслы ёнджыка асывсяньыс мойвиис: лыйис öти утка. Ловъякодь на вöлi, да кöясö гартыштiс и сюйис нопъяс. Пажынöдз ветлiсны, но сэсся немтор эз сюр. Пуксисны пажнайтны. Пестiсны бипур, кöсйисны тшай пуöдны. Ноптö другыд восьтiс, а сэтысь утка жбыр лэбзис, сымда и аддзылiсны. Бöр ловзьöма кыйöм уткаыд.
Кыдзи утка кыйны.
Гаражын сёрнитöны.
- Лэбигас пö ме некыдз ог вермы веськавны ружьеысь, кор уткаяс стаяöн лэбöны.
Мыйнö пö он, лыян пö да ружье стволнас эсыдз гудыр-гадыркеран ещö, и анькытш моз и киссясны.
***
Орчча посёлокса вöрпунктын начальникöн вöлöма öтик синма мужичöй. Вреднöйкодь вöлöма, да йöз оз ёна вöлi радейтны. Öтчыд код юра уджалыськöд паныдасьöмны, и код мортыд и шуас сiйöс камбалаöн. Мöдыс заявленье гижас и пуксьöдас 15 сутки вылö чижовкаö. Пукалас мужикыд, петас да аскинас и паныдалас начальниктö. Мужикыд и шуас, тöда пö эськö, кутшöм чери, да ог висьтав.Батьö миян вöлi любитö хоккей видзöдны, кор вöлi мунö кутшöмкö чемпионат. Финскöй командаас вöлi ворсысь Лаабратан. А батьö пельнас сьöкыдкодь вöлi да кылöма: «О, тайöяслöн пö два брата ворсöны!» А оркестрса дирижёрсö вöлi шуö: “Режиссёр пö”.
***
Коркö вöлi Межадорын фермер Коробейник. А Иван ёрт кодкöдкö сёрниö воöма да абу вермöма вспомнитны овсö, да и шуöма: Воробейчик пö.
***
Мам на висьтасьлiс. Видзöпырöм праздник пö вöлi, Ключын да Гаддьын ыджыд гаж. Мамöй ключса, и сэнi олiс сылöн кык чой, Ульö тьöтка да Öгаш тьöтка. Батьыд пö зэв мичаа пасьтасис: сьöд ной костюм, еджыд дöрöм, ботинкиа. Кайла пö праздничайтны. А зэв кос, бус лыбö-гожöмыс вöлi жар. Öтик ва гуран и вöлi Микуль керка бокас, Ключ туй вылас. Аски асывнас пö петi кöзаясöс лэдзны да аддза: пукалö Сергей батьыд потшöс вылас, юр вывсяньыс кок улöдзыс няйт и шуö: «Варук, тайö нö мый мекöд лосьöма?!» Öти ва гуран и вöлi да сэтöн, тыдалö, и суналöма праздничайтiгас батьööй.
***
Важ Чуклöмса дворас вöлi зэв ыджыд быч, лёк, да шуöмны яй вылö карö лэччöдны. А машина вылö сöвтны мöдöдасны стройбригада. Бычтö кольчаöдыс вöдилööн крукыштасны кык мужик, петкöдасны дворсьыс. Бычыд найöс кутас новлöдлыны асьнысö. А Спира Öльöксан кайöма машина кабина йылас да горзö сэсянь: «Вайö, вайö татчö бычсö!» Бычыд став вöдилаястö чегъялас, кысь нин кутны сы ыджда тушатö! Кыдзкö сэсся тай сöвтöмны.
***
Пырö лавкаö мужичöй да шуö вузасьысьлы: «Миян татысь Васильöй ньöблiс двухлитрöвöй полтарашка». Вузасьысь чуймöмöн видзöдö ньöбасьысь вылö и мöвпалö: «Мый сэтшöмыс «двухлитрöвöй полтарашкаыс»?!»
***
Магазинö пырö пескöн вузасьысь, роч мужичöй.
- Дрова возим, вам не надо дров?- юалö олöма коми нывбабалысь.
-Куда мне? Мне три трактор додь привезли.
-А что это такое?- эз гöгöрво да юасьö мужичöй.
-Как я тебе объясню? Три трактор додь!
-Хотя бы слово «додь» объясни,-оз бурмы да водзö юасьö пес вöчысь.
***
Ягад, пес кералiгас, Мишка кералöма коксö. Ёртыс матыстчас да жалитö сiйöс: «Ой-ой-ой, Мишка, кутшöма, кöнкö, доймис!» А сапöгыс кералысьыдлöн дзик выль на вöлöм. Мишка бöрдiгтырйи и шуö: «Да, чорту эськö кокыд да, выль сапöгыс жаль!»
***
Öтик шоперлысь мырддисны правосö. А гортад колö аслад машинаöн ветлыны, и пуксьöдас ассьыс гöтырсö руль саяс. Легкöвöй машинаыд мунö чожа, туй вылас ыджыд лесовоз вöтöдасны. Нывбабаыд шöйöвошас: «Лёша, мыйнö сэсся öнi колö водзö вöчны?» А мöдыс и шуыштас: «Тувкы мышсяньыс, мед öдйöджык мунас».
***
Тöвнас мöдлапöлысь турун вöлi петкöдöны. Ю вомöныс кынтысьöмны. Медводдзаöн турун тыра додьнад ДТ-54 кутöма вуджны, руль саяс Иван. Велöдöмны водзвыв морттö: тракторыд кö пö кутас вöйны, öдзöссö восьсöн кут, мед слöйман чеччыштны. Шöрöдзыс кымын нин воис, и йиыд трактор улас жугалiс. Сiйö бузгысис ваас и давай бузiкайтчыны-варччыны мöдарö. Петiс йи вылад да видзöдö: а тракторыд кыр йылас нин кайö, ачыс?! Сэсся неылö жö мунiс, пуас зурасис да кусiс.
***
Куйвам!
Зэв нин важöн вöлi тайö тешкодьторйыс. Куим ичöт на детинка лэччисны вадорö загорайтны, куйлöны шондi водзын, бокъяссö пöжöны. Ютi пурйöн кывтöны мужичöйяс и юалöны челядьлысь: «Мыйнö тi сэнi вöчанныд?» А чукля кывъя Иваныд («л» шыыс оз на артмы
вöлi) и шыасис: «Куйвам!»
А дядьöясыд сэтшöма скöрмисны, тайкö пур вывсьыс оз чеччыштны: «Час ми тiянлы петкöдлам «Куй вам»!». Детинаяс сöмын и удитiсны котöрöн пышйыны загорайтанiнсьыд.
Дона юр.
Öти мужичöйöс шпанаяс грабитöмны, вöлöма киас зарни чунькытш, а вомас зарниысь жö пинь. Чунькытшыд эз шед чунь вывсьыс, да керыштöмны чуньсö. Норасьö пö йöзыслы, со вот чуньтöг коли. «А мыйланö пö милициясö эн горöд»,- юалöны йöзыс. «Да, горöда жö вед, мед юрöс дай тшöтш керыштiсны али мый!»
Тешитчисны.
Армияын миномётнöй батареяын служитi. Коркö медводдза стрельбаяс вылö мунiм пустыня Гобиö. А расчётас том мортыс ме вöлi öтнам, витыс во джынйöн унджык нин служитiсны. Командир расчёта ефрейтор Слободян перекур дырйи сетiс меным ведра да тшöктiс ветлыны и корны комвзвод Петуховлысь «клиренс». Но ме и мунi. Петуховыд менö вöтлiс: «Я пö им и тебе сейчас дам «клиренсу»!» Бöрас тöдмалi, мый клиренснас шусьö миномётлöн оськостса судтаыс.
***
Урок вылын:
Велöдысь: «Сочиын тшöтш быдмö бамбук».
Велöдчысь: «Тi сёйлiнныд?»
Садса челядьлöн сёрни-басни.
«Тiян каньыд пырис, зашёл, да ме сiйöс вöтлi. Ме сiйöс выгонитi, а сiйö наглöй, оз пет. Е-хать, ме сiйöс вöтлi!»
Эн нерсьы дай!
Видзöпырöм дырйи Ключын бать-мам вöлi праздничайтöны. Бать гажмыштас да любитö вöлi öтикöс да мöдöс смешитны. Сэсся аслыс увечьеыд вöлi ёнакодь сюрö. Мамö Семан рöдысь вöлi, а Иван дядь Рöман рöдысь. Öтлаын пызан саяд пукаласны, батьö гажмас да кутас тешитчыны: «Семан пö семдö, Рöман рöмдö.»А ичöтдырйиыс пö ыджыдавлö вöлöм Иваныс мам вылас: «Якая ванад кö пö он верд, ог и ёв!» Батьö и водзö нерö:«Иван, миянöс кö якая ванад оз вердны, ог и сёвö!» Иван дядьыд скöрмас дай майдöгалас нерсьысь Сергей дядьтö.
***
Велöдысь: «Кутшöм пемöсъяс олöны степын?»
Велöдчысь: «Кушканчик».
Рыт али асыв?
Öти мужичöй юсьöма. Гöтырыс петас рытнас идрасьны, а юыштöм верöсыс тай коляс водны лöсьöдчан. Пырас нывбаба идрасянiнсьыс, а верöсыс öшинь занавес восьтöма, пач ломзьöдöма, дiпвидзö диван вылын. «Мыйнö лоин? Вой нин вед!»- шыасис гöтырыс. «Кöкъямыс час асыв абу öмöй?!»- шайпаймунiс пöкмеллявывсьыс верöсыс.
***
Увар Öльöк овлöма коркö. Мунö, вöлöм, кытчöкö аслас могъясöн да аддзö: öзим вылас зэв уна ыж пырöма. Мунас да висьтасьö бригадирлы: «Эстöн пö öзим вылад сё ыж пырöма,- сэсся содтыштö,- Кутшöм пö сё, биямать, нелямын!» (Мужичöй чайтiс нелямын лыдсö ыджыдджыкöн сёысь.)
***
Шурик да Витя кайöны вöлöма пастукавны, кыкнанныс зэв ыджыд нопъяöсь. А вöрас налöн жö öти ёрт вотiс öмидз туй бокас. Да мед оз вотны сылысь сиксö, мöвпыштас найöс повзьöдны. Заводитас ош моз марзыны. Кык ёртыд ёна повзясны. Шурикыд ноптö шыбитас да каяс пу вылö. а Витяыд ыджыд нопнас сы вомöн на вылöджык каяс.
***
Чуклöмса тьöща роч зятьыскöд каколь лэптöны. Зэрмис, да тьöщаыд и рочалö: «Не будем картошку больше поднимать, не будем мочиться!»
***
Öти чуклöмса велöдчысь пыралiс лавкаö ньöбасьны. Прöдукта списокыс кольöма лавкаас, грамотейлöн сэнi гижöма: «Хлеб, чай, йайцо 10 штук».
Пятилетнего ребёнка спрашивают: «Покажи, где правая рука, нога, левое ухо». Ребёнок ошибается и показывает правое ухо. Его исправляют, а малыш обиженно говорит: «Зачем спрашиваешь, если сама знаешь!»
***
Тётя жалуется подруге: «Бляха, кожа на пальце лопнула, так больно!» А стоящий рядом пятилетний племянник громко её исправляет: «Нельзя ругаться, надо говорить: «Простите!»»
***
Челядь ворсöны индеецъясысь, и быдöн бöрйö аслыс выль ним. Öти детина и шуö: «А ме лоа храбрöй геопардöн!»
Олöм олысь.
Куим арöса Леналöн батьыс локтiс вöрысь, вайис кыйдöс, кык сьöла кöсйö кольны мамыслы гöснеч пыдди. А ичöт нылыс аддзö, мый батьыс сетö лэбачьяссö бабыслы да шуö: «Тайöс вед гортад колö нямны!» Вот и олöм олысьыд: ичöт, а ассьыс гöгöрвоö нин.Гаражад уджалiгад быдсяма тешкодьторыс овлö.
***
Öтчыд Öльöксан дядь вöлöм сваритö кутшöмкö часть. Биыс друг кусiс. «Но, пока биыс абу, муна кузнечаас наждакалышта боксö.» (А наждакыс бисянь жö уджалiс.)
Меж меж и эм.
Ключын на олiгöн тайö серамбанаторйыс вöлiс мамкöд, Семан Васька Варуккöд. Сеньö Öгрöкöд пö вöлi локтам турун пуктанiнсянь, Дiнтöмсянь. Кежавлiм корся вундавны, да Öгрö киас нуис коса пурт. А Ключ понас зэв люкасьысь кöза меж вöлi Петыр Васькалöн. Ме пö тöда да межтö аддзöм бöрын котöрöн пыри зорöд йöрö. А Öгрöыд зэв баквал: «Но, вач вед тэшмöм тошка межысь ог на жö пов.» Пельяссö шыньгöдöмöн межыд сы вылö и локтö. Öгрöыд кватитiс сiйöс сюрöдыс, ныр-вомас коса пурт воропнас сöвтiс да сöвтiс межыдлы, стегнитiс сюрöдыс межтö кырöмас. Ачыс рушку чургöдöмöн мöдöдчис водзö. Межыд эз дыр думайт, петiс канавасьыд да öддзöдчöмöн кыдз тай сетöбтас- люкыштас мышсяньыс Öгрöтö нюкляас, сiдзи Öгрöыд и суныштiс увлань юрöн. Ыджыд матьöн чеччис бабаыд да бара виис да виис межтö коса пуртнад. И сiдзжö шыбитiс. А межыд оз сетчы, всё равнö люкалö. Эз вермы некыдз пöкöритны Öгрöыд межтö, сэсся котöрöн жö ме дiнö пырис зорöд йöрад. «Вот пö пеж гагыд, куимысь пö шыбитлi,»- норасис нывбаба, а аслас пöсьыс киссьö.
***
Сизимӧд класса велӧдчысь ошйысьӧ мамыслы:
- Мама, ме талун котралӧмысь босьтi коймӧд места!
- Став школа письыс?
- Куим котӧртысь письыс...
***
Квайт арöса нывкалысь юалöны:
- Вокыд висьö на?
- Да.
- Температураыс эм?
- Эм.
- Кымын?
Нывка зэв сюся вочавидзö: «27 либö 28»…
***
Иван ичӧт дырйиыс зэв дӧтлив вӧлi. Ывлаын вӧлi ворсӧ, мудзтӧдзыс нин ворсiс, сэсся пуксис кильчӧбокса потшӧс вылӧ. Пукалӧ, шутлялӧ, кутшӧмсюрӧ думъяс думайтӧ. А гортас мамыс пуктiс вина вийӧдны да кильчӧсӧ ывласяньыс поречалiс, а ветлiс карта пырыс, пес-ва пыртны, кор ковмас. Видзӧдӧ Иваныд: участкӧвӧй кутшӧмкӧ мужичӧйкӧд локтӧ. Видзӧдлiсны: кильчӧыд пореча. Кӧсйисны нин мунны бӧр: абу пӧ некод гортас. А Иваныд, ичӧт мортыд, эз тӧлкуйт да шуӧ: «Миян вед оз кильчӧтiыд ветлыны, карта пыр». Пырисны карта пырыд и суисны мамсӧ вина вӧчанiнад. И штрапитiсны.
***
Ӧти коми дядьӧлысь рочӧн юалӧны, кымын килограмм сійӧ веситӧ. А мӧдыс и рочалӧ: «До армии был 57 килограммов, после армии 64. А сейчас ещё не вешался».
Мужская логика.
Внучок приносит бабушке фотографию с изображением себя и её. Бабушка, глядя на фото, говорит внуку в надежде услышать комплимент: «Что это ты мне принёс? Вот красивый мальчик стоит, а это рядом какая-то старая бабка!» А внучок и отвечает: «Ты на себя в зеркало- то посмотри!» (Комплимента не дождалась.)
Повзьӧдiс
Менам мамӧ дыр кад чöж уджавлiс войся стöрӧжӧн совхоз гаражын. Сэки трактор-машинаыд уна вӧлi, стӧрӧжыд быть вӧлi колӧ. Карысь воӧм ӧтруб тыра машинаясыд вой кежлас ректытӧгыс и кольлiсны сэнi. Мастерскӧй лӧстас бать вӧлi вӧчӧма гуся узьланiн, сэнi войсӧ вӧлi и коллялӧны. Вылiсяньыд ставыс вӧлi тыдалӧ, кодi мунӧ-локтӧ, пырӧ-петӧ. Зэв бура стӧрӧжитлiс, сэтшӧмӧсь тай война кад прӧйдитлӧм важ йӧзыд вӧлiсны. Ватӧ вылас кыскавлiсны, кымын ва гоз вӧлi колӧ вайны ыджыд водогрейка бӧчкаӧ. Гараж гӧгӧрсьыс аслыс турун пуктывлiс. Ӧти гожӧмӧ вӧлi матайтчӧма сельпоса вӧлӧн. Быд рыт пӧ велалiс гаражӧ локны, быглясьӧ, талялӧ турунсӧ. Вӧтла пӧ, и бара на локтас. Сельпоыслӧн еджыд вӧв вӧлi, сы вылын кыскалiсны пекарняысь магазинас нянь да ва. Кутшӧм-некутшӧм кӧзяйство кутлiс сэки сельпоыд. Сэсся думыштiс мам повзьӧдны вӧвсӧ, гашкӧ, ӧвсяс. Гортсьыс зэв кузь тулуп вольпасьӧ шебрас вылӧ вайлiс. Пасьталiс сiйӧ тулупсӧ гугӧн. Вевдор навес бокас сувтiс и кыйӧдчӧ, кор вӧлыд локтас. Аддзис, локтӧма вӧлыд, зэв мичаа йирсьӧ, матынкодь, метра комын сайын кымын. Друг навес сайсьыс кыдзи мамӧй уськӧдчис, нёль кокасьӧмӧн. Вӧлыд бок вылас сiдзи и бруткысис-усис. Ачым пӧ повзи, кулi пӧ, тыдалӧ, вӧлыд. Эз, другӧ, звирк чеччис и гӧра паныдыс скачӧн, сувтлас, шкоркнитас и водзӧ скачӧн. Сы бӧрын пӧ сэсся эз нин волы, спокой лои. Ошъясыд пӧ сiдзи повзьӧдӧмӧн гырысь скӧттӧ вӧлӧм и джагӧдӧны. Повзьӧмйывсьыс вӧв-мӧскыд бок вылас усьӧны.
***
Свадьба вылын жӧник да невесталы нуӧдӧны ордйысьӧм, коді ӧдйӧджык лыддяс кӧрт деньгаӧн сьӧмсӧ. Кад мӧдӧдчис, гозъя босьтчисны уджӧ. Аддзам, мый жӧник торйӧдӧ ӧти сикас деньгасӧ чукӧрӧ, и невеста тшӧтш мыйкӧ ноксьӧ. Кад помасьӧм бӧрын невеста шуис, мый сылӧн сизимдас вит шайт да дас квайт ур. А жӧник деньга лыд висьталӧм пыдди шуис: «Ме сӧмын на сортируйті!» (Со мужичӧйлӧн подувлуныс! Рочӧн кӧ: «Мужская основательность»)
***
Мам рынок вывті ветлӧдліс, ёна уна ньӧбасис, пакет лыд содіс кыскавмӧн. Сьӧкыд наӧн ноксьыны. Звӧнитіс пиыслы: «Вася, волы рынок дорас, пакетъясӧс тэныд ректа... Кытчӧ машинатӧ сувтӧдан?... «Ён» магазин дорас?... Но, час локта!» Телепон трубка кусӧдіс и юалӧ орччӧн сулалысь ёртыслысь: «А кӧні нӧ сійӧ «Ёныс»?»
***
Ош пö вöлöма пакöститчö. Кöдзöмаöсь зöр и кайöмаöсь ая-пиа оштö кыйны. Пу вылас вöчасны джадж и каясны сэтчö кыйöдчыны. Öтиыс ружьеа, мöдыс чер босьтас. Войнас пукалöны, гусьöника варовитöны. Видзöдöны, ошкыд вуджрасьны кутiс. Батьыс лыяс, да ошкыд повзьöмлаыс джаджъяс кутас кайны. Батьыс вашкöдö пиыслы: «Сöт пö лапаас ошкыслы?!» Пиыд сöтас да лапа пыддиыс веськалас джадж домалан гезъяс, джаджйыд орö. Турки-тарки усясны ош сорнад. А ошкыд повзьöма да поноситiгтырйи пышйöма ягас.
***
Лера чойсö квайт арöса «рочмöм» Даша велöдö: «Кор ичöт Егорыд оз сёй, сiйöс тётя Ленаыд обманитö. Тэ тожö обманайт!»
«Ог ю!!!»
Лавкаын ньöбасис öти нывбаба. Дерт, босьтiс кык водка штоп. И петiгас паныдасис мужичöйкöд. Сiйö тыдалö öдзыс «водкаасьöма» жö, код на. Нывбабаыд коркö карын овлiс да видзаасис дядьöыдкöд карса модаöн: «Адью!» (до свиданньö пö фрунцуз ногöн).
А дядьöыд шуис: «Кыдзи ог ю?! Юа!» «Адью, мися!»- гöгöрвоöдiс бабаыд и петiс. Но гöгöрвоис ли эз мужичöйыд?!
Эн кö удит пуксьыны, ачыд мун!
Мунö сикт кузя кык дядьö, ёнакодь найöс тöлалö. Öтиыс муртса эз во гортöдзыс, турбыльтчис-усис. Аслас туй вежысь петiс усьöмыдлöн суседкаыс, стöч тачкаöн локтö (тыдалö, кытчöкö öтрубла лавкаö мöдöдчöма). Аддзис усьöм суседтö да ылысянь и равзö, а ачыс зэв гора сералö: «Локта, локта, Вова, нуа гортöдзыд!» Воваыд радысла чеччис, вочаасис тачкаа мортыдкöд, кöсйис пуксьыны да-й пöрис…мöдар бокас. Тадзи и колис куйлыны. А суседка водзö гандалитiс-мунiс. Сэсся тачкаа йöзыд эз прöйдитны, нуны некодлы.
Отсалiс.
Куим детина нуö спортплощадка вылö столб. Кык ичöтджык тушааыс сувтöмны доръясас, а медкузьыс шöрас. Налöн нёльöд ёртыс отсалöм пыдди мачасьö. Шöрас нуысьыслы, медкузьысыслы, и шуö: «Игорян, коктö нюгыльтышт, кокньыдджык лоö керсö нуны!» Мöдыс крукыльтчис кык пельö и водзö пошкö- нуö, но кокньыдджыка нин.
***
Ныв юасьӧ батьыслысь сылӧн ёрт йылысь: «Сэсся телепоннад ӧта-мӧдыдкӧд звӧнитчанныд он?» А бать и вочавидзӧ:
«А дыр нин эг звӧнитлы, куим…лун кымын». А ми чайтім, шуас куим тӧлысь.
***
Код мужик висьтасьӧ: «Муна-муна, раз и туйыс сувтіс, сідзи сувтсӧн и лои узьны!»
***
Кык мужичӧй пызан саяс пуксисны сёйны. Ӧтиыс паньыштiс дай шуӧ: «Ме, навернӧ, ог нин сёй». А мӧдыс паньыштiс и шуö: «Навернӧ, солавны колӧ.» «Но, тэ кӧ солалан, ме панясьышта на.»
***
Ичöт кагаöс нуисны садйö, ёна на гажтöмсьö гортсаясысь, бöрдö. Кагульничаяс висьтасьöны сы йылысь анекдотын моз. Пуксисны группанас лыддьыны мойд: «Олiсны-вылiсны дед да баб.» А ичöт нывка вом вежыньтiс и бöрддзис гажтöмлаыс: «Баба-а-а! Деда-а-а!» А мукöд дзолюк, кодлöн эмöсь дед-бабъяс, тшöтш заводитiсны бöрдны, а кодлöн абу, бать-мамысь гажтöмсьöмла содтiсны бöрдысь лыдсö. Вöлi мойд лыддьöм, а лоис нораа сьылöм.
***
Менам дядь ёна радейтö чери кыйны. Öтчыд чукöртчö сiйö вадорö. Водз асывсянь кык час чöж чери сёян пуис, анькытша рок, быд пöлöс чери кыян снасть лöсьöдiс, аслыс пажынтор босьтiс, пасьтасис-мольöдчис. И тадзи асывбыд, пажын кад нин кутiс матыстчыны. Со быттьö и ставыс, босьтiс нопсö да петiс дядь. Здук мысти котöрöн бöр пырö: «Ой, вугыр шатьöй вунöма!»
Вай тöдмасям!
Ӧти чуклӧмса дядьӧ юыштӧма нин, и тӧдмасьӧ ичӧт детинакӧд: «Дёма, тэнӧ кыдзи шуӧны?» Быттьӧ ачыс оз тӧд.
Суседъяс
Сиктад ми, челядь, унаӧн быдмим. Сусед костад уна зык-шумыд сэсся челядь пондаыд вӧлі. Сідзи жӧ скӧт вӧсна зыкыд вӧвліс. Менам мамлӧн скӧтыд пыр вӧлі вердаса, мӧс кӧть порсь, кӧть кӧза. А суседлӧн порсьыс пыр вӧлі жебиник. Тулыснад, кор лэдзасян, да порсьясыд ӧтлаасьӧны, пыр первой косясьӧны. Сэсся тӧдмасьӧны да ӧтсӧвети олӧны, быд сикас скӧтлӧн тадзи. Миян порсьыд вӧлі пуркӧдӧ суседыдлысь порсьтӧ, сусед семьянас петасны мездысьны. Мамлӧн сэтчӧ серамыд: «Эн мездысьӧй! Энӧй, асьныс найӧ ладитасны.» «Он кӧ вед велӧд, оз жӧ порсьыд ви. Кай пӧ сельсӧветад норась,»-шуасьö cуседка. Бара и сельсӧветад мам вылӧ норасясны, порсьӧс вед порсьнас вийӧдӧ.
А ӧкмыс кӧ?
Мужикыс кӧнкӧ ёртъясыскӧд чорыда даръясьӧма. Лавка дорсянь сійӧс гӧтырыс нуӧдӧ гортас: «Миша, Миша, мунам гортад, винаыд гортад дас суля эм.» А Мишкаыд воча и шуӧ: «Но мунам, а лыддя кӧ, да ӧкмыс суля?!»
***
Öти мужик пö и шуö: «А менам гöтырöй дзикöдз нин надоедитiс, окота пö выльöс видлыны». Но сэсся кутшöмкö рытö пестерасяс да мунас дöва баба дорö. Вöлi ар. Вöзйысяс, вöзйысяс, но оз восьтыны. Локны кутас гортас, да юалöны: «Иван, тшак вотны али мый ветлiн? Да, ветлi, но тшакыс эз сюр». (Томова Земфира Семёновналöн письмöысь)
***
Гозъя суртталöны. Гöтырыс гусьöник: «Чего купиш-шь?»
Верöсыс: «Руд тулуп!»
***
Вӧрын ӧтлаын батьӧкӧд уджавлісны Изӧлӧн кык вок, туша-мыгӧрнас ичӧтӧсь. Вежон чӧж нин пӧ кодалӧны. Батьлы висьтасьӧны:
-Недель нин вед кутитам.
-Мыйнӧ юанныд?- юалӧ батьӧй.
-Мамӧй воліс, шкалик водка вайис, сійӧс и юам.
***
Ичӧтик коми детинка велӧдчӧ рочасьны. Ӧшинь пырыс аддзис катшаясӧс да шуӧ: «Катши-раки сукарики кукарики».
Ошкӧд паныдасьӧм.
Тулыс нин вӧлі. Лымйыс кызсӧ сылӧма нин, кытсюрӧ ягас да войбан гӧра бокъясас ичӧтика кольыштӧма. Муні ягас прӧста вӧр-васӧ видзӧдлӧм ради. Туруныс эз на вежӧд, сӧмын епетош моз сулаліс важыс. Ключ грездсянь километра куим кымын ылнаын петі Чичишорйыв пашняса видз вылӧ. Шарссьӧда муна, и друг син водзті мӧлснитіс гӧрд мӧс. Ещӧ мӧвпышті, мыйла нӧ совхозыс сэтшӧм водз мӧсъяссӧ лэдзалӧмны, йирныс нинӧм на да. Водзӧ муна и кылі чушнитӧм шы. Бергӧдчи да юрси сувтіс: кыккокйыв сулаліс сы ыджда гӧрд гӧна ош. Видзӧда: мӧд дай коймӧд, дай нёльӧд. Мый вӧчны? Думӧ сӧмын воис:прӧпадьті… Медводдза ыджыд ошкыс мамыс, тыдалӧ, аслыс мыйкӧ мургиктыр чуш-чаш кок дорӧдз волас и кань моз кокӧд лапанас быттьӧ кӧсйӧ крукыштны, ӧтчыд да мӧдысь. Син улӧ уси ичӧтик кыдз пу, сойысь, гашкӧ, кызджык.Ачым ог тӧд, кыдзи ме сы вылӧ кайи. Кайныд кайи, а кыдзыд ме сорӧн нюгыльтчӧ муланьыс. Ошъясыд менӧ увдорсяньыс чеччалӧмӧн судзӧдӧны. Ме сэтчӧ дзикӧдз йӧйми. Бур, мый орччӧн коз пу сулаліс. Коз увъясад кутчысьӧмӧн бӧр веськӧдчи кыдз пунад. А ошъясыд нёльӧн тёпкысисны-пуксисны менам пу улад и видзӧдӧны. Со пӧ кутшӧм прӧмыс миянлы веськаліс, час пажнайтам. Ме час пукала, мӧд, коймӧд. Ки-кок изӧймитны кутіс. Ошъясыд век оз мунны. Караулӧн куті горзыны, гашкӧ, кодъяскӧ кыласны да мездасны менӧ.Но некод эз лок. Сэсся коркӧ- некоркӧ мунісны жӧ. Ме котӧрӧн лэччи да Ключланьыд. А мышкын кыла: «Рук-рук!» Ошъясыд бӧрысь вӧтчӧны. Дзик грездӧдзыд колльӧдісны. Сиктӧдзыд вои нин да аддза, Ӧкуль Марья бокса видз вылас рукйысьӧны нин. Бӧрас вит мужик ружьеясӧн ветлім, да ошъясыдлӧн дук ни слук. Но мужикъясыд куснясьӧмӧн сералісны, кыдзи аддзисны сійӧ кыдз путӧ, кӧні ме мездыси. Кыдз пуыс дзик са сьӧд вӧлі, резина сапӧгнад ставсӧ менам сьӧдӧдчӧма, буксуйтігтырйи пӧвзьӧмйывсьыд пу вылад кайигӧн. Асьныссӧ, сералысьяссӧ, эськӧ менам местаӧ вайӧдлыны, мый и вӧчисны? Со татшӧм вӧвлӧмтор лоис менам олӧмын
***
Ичöт Сашукöс мамыс чуксалiс Шурикöн. Мöдыс дöзмöмöн шуис: «Ме абу Шурик, ме Ӧшан!» (Ӧльӧксан кывйыс оз на вӧлі артмы).
***
Мам-бать ньӧбисны выль пань видзанін. Нылукыс ошйысьӧ тӧдсаыслы: «Миян выль пань доз, шусьӧ панница».
***
Пиыс тӧлысь-мӧд карын олӧм бӧрын локтіс гортас, рочалӧ. Мый он юав, коми кыв оз сет. Батьыс скӧрмис: «Перъя пӧ коми кывтӧ ме тэнсьыд». Ломтас пывсян. Батя-пиа мунасны пывсьыны. Бать ӧтарӧ койыштӧ и койыштӧ. Пиыс шуӧ: «Батя, хватит». «Перъя пӧ ме тэнсьыд коми кывтӧ,»- мӧвпалӧ батьыс и оз сетчы. Жарыс сымда, мый пиыс джоджас нин водас. А батьыс койыштӧ и койыштӧ. Джоджас куйлӧмӧн нин пиыс шуас: «Батьӧ, сэсся тырмас!» «Тӧдан жӧ, вӧлӧм, коми кывтӧ, пиук!»
***
Миян сиктын ӧти мужичӧйӧс нимтӧны Нюрсовӧн, сылӧн семьяыс овліс нюрын. Мунас сійӧ служитны армияӧ, веськалас танкӧвӧй ротаӧ. Сэні вӧлі Заболотный ова салдат. «Ме эськӧ болотнӧй жӧ, да ог висьтав».
Борьба за чистоту
Маленького Витю зовут в баню: «Давай пойдём в баню мыться, а то совсем грязный». «Да, негрязный я. Просто чёрный такой».
Бабушка хочет постирать бельё и просит пятилетнего внука сменить футболку: «Давай, Илья, переоденемся». «Да, я её ещё мало ношу, она не успела испачкаться». (Прошло уже 4 дня с его приезда).
***
Сизим арöса нывка зэв омöля сёйö шыдсö школаас, и велöдысь сылы шуö: «Шыдтö он сёй, сiдзкö ёна юмовтортö радейтан. А кодi юмовтö уна сёйö, водз пöрысьмö». Сэки нывка эз вош да юалiс олöма нывбабалысь: «А мый, тэ уна сакартö сёйин?»
Больничаö мунас öтик мужичöй, вöлöм рочнад оз бура сёрнит. Войтöв пö ёна коксö кыскалö. Врачыд роч вöлöма да мужичöйыд сылы и висьтасьö аслас висьöм йывсьыс: «Северный ветер ноги тянет».
***
Первӧй классын велӧдчысь Даша локтӧ школаысь да мамыслы ошйысьӧ: «Ми талун велӧдім сказочникӧс. А тӧдан, кыдзи сійӧс шуӧны? Газ Кристиан Андерсен!»
***
Мамӧй водзті пыр вӧлі ньӧблӧ томатнӧй сок трёхлитрӧвӧй бутыльӧн. Ӧтчыд бара ньӧбис да лыддис: «Сук (украинечьяс кыв вылӧ вуджӧдӧмны сок кывтӧ) Но!-шензис мамӧй,-Пыр ньӧблі да кизьӧр вӧвліс, а тайӧ сук пӧ».
***
Тесть дорас олісны ныв гозъяыс. Коркӧ сёйӧм йылысь сёрниӧ воисны, да тестьыс зятьыслы и шуӧ: «Ме, зон, шыдсьыд тшӧгтӧ ог сёй!» Ӧтчыд пуксясны сёйны. Тестьыс ӧтарӧ шыдсьыс паньыштӧ и паньыштӧ пуӧм тшӧгсӧ. Зятьыд и висьталӧ: «Тесть, тэ шуан, мый тшӧгсӧ он сёй, а пыр на сiйöс панялан». «Но-о! Тайӧ мый тшӧг, а ме пыр на каколь пыдди сёя?!»
***
Öтчыд мойвиис аслам машинаӧн ӧти туй кост гозъяӧс нуыштны. Мужичӧйыс зэв серамбана да варов мортӧн вӧлӧма. Со и висьтасьӧ меным: «Ӧтчыд ёна юӧм бӧрын тайкӧ эг кув, сэтшӧма кынӧмӧй висьӧ, орӧдӧ. Кусняся-тупляся, крукыльтчи кӧлачӧн да ойза. Друг думышті, а кула кӧ, крукыльтчӧмнас и турала, а кыдзи гуаласны менӧ. Гортъяс ог тӧр воднысӧ. Веськӧдчи. Кула кӧ, тадзтӧ ладнӧджык лоӧ. А сэсся и дойыс эновтіс менӧ. Бурді». Куснясьӧмӧн сералі ме сы вылын. (Сергей Öльӧксан)
***
Даша виччысьӧ петны гуляйтны Никита ёртсӧ, а сійӧ оз лок.
-Никитаыд, кӧнкӧ, пывсьӧ,-шуис Даша.
-Кытысь тӧдан?- юалісны сылысь.
-Сылӧн ичӧт вокыс, нимыс тигрлӧн кодь тай, пывсянысь локтіс,- вочавидзис нывка.
-Лёваыс?
-Да!
***
Тшупсьысь дядьӧ вӧлӧм шулӧма: «Йӧзыслысь тшупсьӧмсӧ видзӧдӧмысь бурджык сітасьӧм видзӧдны».
«Мыйла нӧ?»-юалӧны сылысь. «А синмад чагйыс оз лэбзьы!»
***
Водзтi Коми муад горчицатӧ абу на тӧдлӧмны. Ӧтчыд коми йӧзыд горчицатӧ вӧчӧмны, пуксьӧмны да нянь вылӧ мавтӧмӧн кутiсны сёйны. Пӧчӧыс Синтӧм Ӧксинь вӧлӧма, юалӧ: «Мыйнӧ сёянныд?»
«Выя нянь»,-шуасны сылы. «Но, меным тшӧтш вай мавтӧ, кызджыка и мавтӧ». Сетасны сылы, а сійӧ ыджыда и курччас. «Тайӧ би да!»-швыркнитас зэв ылӧ «выя» няньтӧ.
Армияӧ мунтӧдз прӧйдитам медкомиссия. Ӧти кабинетын, «ухо-горло-нос», пельтӧ видлалӧны. Пуксьӧдӧны джек вылӧ, мышсяньыд врачыс вашкӧдӧмӧн висьталӧ, а тэ сы бӧрся повторяйтан. Ме пукси джек вылад, врачыд и шуӧ: «Повторяй за мной». Ме сы бӧрся: «Повторяй за мной». Врачыдкӧд сэсся семдім серамнас.
***
Мамыс, тыдалö, пӧжасьӧма асывводзсяньыс, а пиыс ыждалӧ: «Сотӧмыд няньсӧ!» «Чӧл! Аслад тай гӧтырыд пӧжасис,»- шуӧ мамыс. «Но, сотчӧм кӧть тай, а кӧрыс эськӧ чӧскыд да!»
***
Том гозъя пӧ олӧны. Накӧд тшӧтш энька мамыс оліс. Том гӧтырыс зэв ёна вӧлӧм кӧзяитӧ верӧс вылын, а мамыслы оз кажитчы. Пыр вӧлӧм шуӧ: «Ме нин виччыся, кор менам Ӧльӧксан вылын гӧтырыс верзьӧмӧн кутас ветлыны».
***
Колян нэмса 60-ӧд воясын Чуклӧмса школаын. Велӧдысь тшӧктӧ лӧсьӧдны предложение Москва кывйӧн. Степан и лӧсьӧдас: «Самолёт вывсянь Москва шӧрӧ шыбитісны сю мешӧк».
***
Поштальон вайис öти олöма нывбабалы пенсия. Сылы колö вöлі пуктыны кырымпас и талунъя луныслысь числöсö. Нывбабаыд и юалö поштальоныдлысь: «Кутшöм нö талун луныс нин?»
Поштальоныд и шуис: «Талун Петыр лун».
Пенсия босьтысьыд кырымасьöма и гижöма талунъя лунтö: «Петыр лун!»
***
Бать корö сизим арöса нывсö: «Лок меным спинаöс гыжъялышт».
А ныв и вочавидзö: «А ме пиньöс весалі нин». (Тыдалö, пиньнас кöсйис гыжъялыштны.)
***
Мам элясьö тавося кöдзыд июльса поводдя вылö: «Кор нин шондöдас?»
А дас нёль арöса ныв и юалö: «А тэныд мый вылö нин шоныдыс?»
Диалог о начальнике…
-Где он сейчас учится?
-Да, где-то учится на начальника.
-А разве есть такая профессия? Я тоже хочу учиться на начальника.
-Да, на управленца. У него же не было такого образования.
В разговор вмешивается третий:
-А зачем же мы тогда его выбрали начальствовать?
***
Öти олöма мужичöй юасьö:
-Мыйнö öні Лидия Логиноваыс сьылö оз нин? Мыйкö тай рöд ог кывлы.
-Сьылö. А кытысь тэ кылан, тэнад радио ни телевизор абу. Кöсъян, мед горт дорöдзыд кыліс.
***
Семья пукалö пызан сайын пажнайтö. Верöсыс шыасьö гöтыр дорас юалöмöн: «Шырся ог?»
Гöтырыс вочавидзö: «Кöсъян кö, шырсьы, он кö, эн».
Верöс век оз тöд, мый вöчны: «Но, висьталöй, шырся али ог?Ог кö шырсьы, мый лоас?»
Сёрниö сюйсьö ыджыдджык пиыс да зэв лабутнöя шуö: «Мый лоас: тöвнас шапкатöгыд кутан ветлыны».
Клубö локтіс бöрйысьны öти мужичöй. Пыригас шуйгавылын öшалö рöмпöштан. Висьтасьö комиссияын пукалысьяслы: «Пыри, видзöда: морт сулалö, нюжöді киöс чолöмасьны, а вöлöм ачым».
***
Кык арöса Егор мамыскöд гуляйтöны асфальт туй вывті. Аддзисны паськыда куйлысь мöс сіт. Мамыс юалö: «Егор, а коді какалöма татчö?»
«Егорка»,-вочавидзö ичöт морт.
***
Локтіс энька мамыс пи семья дорас. Ветлöма пув вотны да висьталö: «Колö ветлыны вöрад вотчынытö, пувйыс этша, лыда. Воті нёль ведра. Öтисö тіянлы вайи».
***
Куим арöса Даша нывкаöс гожöм кежлö вайисны карысь сиктса баб дорас гöститны. Дзикöдз матайтчыліс сыöн бабыс, кыдзи петас нучкаыс ывла вылö гуляйтны, пыр кытчöкö пышъяс. Сэсся ветлöдлö баб сикт кузяыс да корсьö пышйöмаöс. Мöвпыштіс олöма нывбаба гезйöн домавны Дашуксö: öти помнас асьсö, а мöднас кывзысьтöм нучкасö. Сідзи гез вылын вежон кык кымын гуляйтісны баба-нучкаа. Коркö öтчыд видзöдö öшинь пыр нывбаба и аддзö: петіс Дашук йöрö гуляйтны, домаліс коскас öти гез помсö и муніс. Дзикöдз велалöма!
***
Öти семьяын олісны пöль, пöч да нёль арöса нук. Дедöыс ёнакодь юис. Пыр юис да юис. Öтчыд ичöт нукыдлöн, тыдалö, гыркйыс тырис, да и шуис пöльыдлы: «Кутан кö юньы, ме тенö бабулякöд дзагöда!»
***
Вит арöса детинка пырö гортас, исалö сынöдсö и юалö: «Мый, папаыд локтіс?» Мамыс шайпаймунöмöн вочавидзö: «Кытысь босьтін сійöс?» Друг рöмпöштан водзын бергалысь куим арöса ичöт чоюкыс гусьöник шуыштiс: «Тайö ме сурттышті!»
Четырёхлетняя внучка ругается на дедушку: «И зачем я тебя такого противного родила?»
***
Папа говорит по-русски, мама по-коми, ребёнок часто смешивал слова из двух языков. Отвечая на вопрос папы маленький мальчик говорит: «Но, не можита!»
***
Чеччö асывнас öти чуклöмса дядьö, ичöтик тушаа, косіник, лыясыс гирвидзöны. Сувтіс рöмпöштан водзö, нюжöдчис, силач моз кулакъяссö чабыртіс да шуис: «Кодöскö со тöрыт клубас вырубиті ли эг?!»
***
Клубын репетируйтöны выль вося мойд, медым петкöдлыны выль во локтан войö, декабр 31-öд лунö. А öти артистка и шуö: «Ог ме эшты 31-нас выступайтнытö, сымда уджыс: пызан лöсьöдны, пывсьыны. Колö концертсö 30 декабр луннас петкöдлыны. Сэки менам кадыс лоас унджык!»
***
Öкмысöд класса велöдчысь видлалö ассьыс дневниксö да шогпырысь гораа мöвпалö: «Математикаыс некор абу медводдза урокнас, либö коймöдöн, либö нёльöдöн. А кыдзи сэсся велöдчан? Локтан да медводдза урок вылад эн на садьмы, мöднас садьман- уджалыштан, коймöд вылас кынöмыд нин сюмалö, сёйны кöсйысьö, нёльöд вылас, сёйöм бöрад, бара нин унмыд локтö, витöднас уджалыштан, а квайтöд да сизимöд урокъяс вылад гортад нин кыскö. Кутшöм сэсся вермас лоны бура велöдчöм!
***
Кык арöса детинка мамыслы водзас пуксис и видлалö кинас сылысь синкымъяссö: «Тайö вед абу ус?»
***
Папа двухлетнего мальчика, услышав музыку по телевизору, начал пританцовывать. Чтобы вовлечь сына в свой танец, сказал ему: “Ну-ка, Егор, танцуй!» “Сам танцуй!»-сказал в ответ, как отрезал, сыночек.
***
Беременная девушка пришла в гости в семью, где растёт шестилетний ребёнок. Он очень внимательно, поглаживая, осматривал её живот, выспрашивая, как ребёнок там ест, дышит. На что ему отвечали, что у тёти Насти всё продумано: еда и воздух идёт к ребёночку через трубочку. Но мальчик всё равно удивлённо продолжал её осматривать, а потом сказал: «Ну-ка, рот открой!» (Видимо, всё волшебную трубочку искал.)
***
Бать миян хоккей ёна радейтліс видзöдны, торйöн нин чемпионат мунöм. Миян вöлі финскöй командакöд ворсöны. Налöн вöлі Лаабратан ова ворсысь. Батьö эз гöгöрво да шуö: «О, талун финъясыдлöн два брата ворсöны».
***
Чуклöмад вöвлöма Рогов поп, горш. Видзьясыс Чуклöмад медбуръясыс, батракыд уна ж&ou