Пермская Епархия
Пермской Митрополии РПЦ
Храм во имя святого апостола Андрея Первозванного
Г. Пермь
ТРОПАРИ ВОСКРЕСНОГО МОЛЕБНА
По благословению настоятеля храма,
Протоиерея Александра (Толокнова)
Тропарь благодарственный Спасителю, глас № 4
Благодарни суще недостойнии раби Твои, Господи, / о Твоих великих благодеяниих на нас бывших, / славяще Тя хвалим, благословим, благодарим, поем и величаем Твое благоутробие, / и рабски любовию вопием Ти: // Благодетелю Спасе наш, слава Тебе.
Тропарь иконе Богородицы «Всех скорбящих Радосте», глас № 2
Всех скорбящих Радосте / и обидимых Заступнице, / и алчущих Питательнице, / странных Утешение, / обуреваемых Пристанище, / больных посещение, / немощных Покров и Заступнице, / Жезле старости, / Мати Бога Вышняго Ты еси Пречистая: // потщися, молимся, спастися рабом Твоим.
Тропарь Архистратигу Божьему Михаилу и прочим Небесным силам бесплотным, глас 4
Небесных воинств Архистратизи, / молим вас присно мы недостойнии, / да вашими молитвами оградите нас / кровом крил невещественныя вашея славы; / сохраняюще нас припадающих прилежно и вопиющих: / от бед избавите нас, // яко чиноначальницы вышних сил.
Тропарь апостолу Андрею Первозванному, глас 2
Яко апостолов первозванный / и верховнаго сущий брат, / Владыце всех, Андрее, молися, / мир вселенней даровати // и душам нашим велию милость.
Тропарь святителю Николаю, архиепископу Мир Ликийских, Чудотворцу, глас 4
Правило веры и образ кротости, / воздержания учителя / яви тя стаду твоему, / яже вещей истина: / сего ради стяжал еси смирением высокая, / нищетою богатая, / отче священноначальниче Николае / моли Христа Бога // спастися душам нашим.
Тропарь святителю Спиридону, епископу Тримифунтскому чудотворцу, глас 1
Собора Перваго показался еси поборник и чудотворец, / Богоносе Спиридоне, отче наш. / Темже мертву ты во гробе возгласив, / и змию в злато претворил еси, / и внегда пети тебе святыя молитвы / ангелы, сослужащия тебе, имел еси, священнейший. / Слава Давшему тебе крепость, / Слава Венчавшему тя, // Слава Действующему тобою всем исцеления.
Тропарь святителю Стефану, епископу Великопермскому, глас 4
Божественным желанием, от юного возраста, / Стефане премудре, разжегся, / ярем Христов взял еси / и людей оляденевшая древле неверием сердца, / Божественное семя в них сеяв, / евангельски духовно породил еси. / Темже преславную твою память почитающе, молим тя: / моли, Егоже проповедал еси, // да спасет души наша.
Тропарь священномученику Киприану и мученице Иустине, глас 4
И нравом причастник, / и престолом наместник апостолом быв, / деяние обрел еси, богодухновенне, / в видения восход: / сего ради, слово истины исправляя, / и веры ради пострадал еси даже до крове, / священномучениче Киприане, / моли Христа Бога // спастися душам нашим.
Тропарь великомученику Пантелеимону Целителю, глас 3
Страстотерпче святый и целебниче Пантелеимоне, / моли Милостиваго Бога, / да прегрешений оставление // подаст душам нашим.
Тропарь преподобному Сергию, игумену Радонежскому, глас 4
Иже добродетелей подвижник, / яко истинный воин Христа Бога, / на страсти вельми подвизался еси в жизни временней, / в пениих, бдениих же и пощениих образ быв твоим учеником; / темже и вселися в тя Пресвятый Дух, / Егоже действием светло украшен еси. / Но яко имея дерзновение ко Святей Троице, / поминай стадо, еже собрал еси, мудре, / и не забуди, якоже обещался еси / посещая чад твоих, // Сергие преподобне, отче наш.
Тропарь преподобному Серафиму Саровскому чудотворцу, глас 4
От юности Христа возлюбил еси, блаженне, / и Тому Единому работати пламенне вожделев, / непрестанною молитвою и трудом в пустыни подвизался еси, / умиленным же сердцем любовь Христову стяжав, / избранник возлюблен Божия Матере явился еси. / Сего ради вопием ти: // спасай нас молитвами твоими, Серафиме преподобне, отче наш.
Тропарь преподобному Трифону, архимандриту Вятскому и Пермскому, глас 4
Яко светозарная звезда, / Воссияв от востока до запада, / просветил еси всю землю Пермскую светом Христова Евангелия, / и в ней святыя обители создал, / в них же собрал еси иночествующих множество. / Всех наставляя на путь спасения, / был еси ангелом собеседник и человеком наставник, / Трифоне преподобне, // моли Христа Бога спастися душам нашим.
Тропарь блаженной Ксении Петербургской, глас 7
Нищету Христову возлюбивши, / безсмертныя трапезы ныне наслаждаешися, / безумием мниным безумие мира обличивши, / смирением крестным силу Божию восприяла еси. / Сего ради дар чудодейственныя помощи стяжавшая, / Ксение блаженная, // моли Христа Бога избавитися нам от всякого зла покаянием.