Песнь 1
Ирмо́с: Я́ко по су́ху, пешеше́ствовав Изра́иль/ по бе́здне стопа́ми,/гони́теля фарао́на ви́дя потопля́ема,/ Бо́гу, побе́дную песнь пои́м, вопияше.
Г ряди́те, благохва́льным язы́ком/ и всеси́льным пле́щуще ду́хом, из у стен нечи́стых/ глас Сло́ва – Предте́чу пе́сньми духо́вными, ве́рнии, просла́вим.
М и́рным устрое́нием утиша́ется/ и безме́рными мно́жествы Христо́ва Це́рковь благостоя́тельне упаса́ется,/ тебе́ ле́тнюю песнь вопию́щи, Предтече.
Ю́ же от Бо́га дару́емую я́ко сокро́вище нам неотъе́млемо/ Богоно́сную главу́ Предте́чеву, вси пе́сньми досто́йно, соше́дшеся, ве́рнии, почти́м.
Богоро́дичен: Т воего́ прие́мши Соде́теля,/ я́ко Сам восхоте́, из безсе́меннаго Твоего́ чре́ва па́че ума́ воплоща́ема, Чи́стая,/ тва́рей вои́стинну яви́лася еси́ Влады́чица.
Катава́сия: О тве́рзу уста́ моя́:
Песнь 3
Ирмо́с: Несть свят,/ я́коже Ты, Го́споди Бо́же мой,/ вознесы́й рог ве́рных Твои́х, Бла́же,/ и утверди́вый нас на ка́мени/ испове́дания Твоего́.
У тро́ба непло́дна прозябе́ние тя изнесе́ Боже́ственно,/ я́же от язы́к це́рковь, славна́ невестово́дца,/ Христу́, и́стинному Бо́гу и Жениху́, сию́ обруча́юща.
Т воего́ Боговеща́ннаго гла́са, Предте́че Иоа́нне,/ ни́же ме́чем удержа́ окая́нная прелюбоде́йца:/ Боже́ственную бо твою́ нам явля́вши главу́ от земли́.
Т оржеству́ющий све́тло, жела́ющ тя град учрежда́емь быва́ет,/ я́ко бога́тство обре́тш та́йное/ и исто́чник неоску́ден исцеле́ний, Предте́че, главу́ твою́.
|
|
Богоро́дичен: Б оже́ственнаго Рождества́ Твоего́, Чи́стая,/ вся́кий естества́ чин прехо́дит чу́до:/ Бо́га бо преесте́ственно зачала́ еси́ во чре́ве/ и, ро́ждши, пребывае́ши при́сно Де́ва.
Седа́лен, глас 8. Подо́бен: П овеле́нное та́йно:
Я́ ко в храни́лищи сокро́вище вло́жена Предте́чева глава́ храня́шеся,/ в водоно́се кры́ющася, глас Сло́ва;/ я́ко пшени́ца покрове́на, во глу́бине земли́ изцвете́,/ плодонося́щи Боже́ственную жизнь./ То́я вси почита́ем обрете́ние, Христа́ сла́вяще,/ пода́вшаго той благода́ть источи́ти исцеле́ния.
Сла́ва, и ны́не, Богоро́дичен:
П овеле́нное та́йно прие́м в ра́зуме,/ в кро́ве Ио́сифове тща́нием предста́ безпло́тный, глаго́ля Неискусобра́чней:/ приклони́вый схожде́нием Небеса́ вмеща́ется неизме́нно весь в Тя./ Его́же и ви́дя в ложесна́х Твои́х, прие́мша ра́бий зрак,/ ужаса́юся зва́ти Тебе́:/ ра́дуйся, Невесто́ Неневе́стная.
Песнь 4
Ирмо́с: Христо́с моя́ си́ла,/ Бог и Госпо́дь,/ че́стная Це́рковь,/ Боголе́пно пое́т, взыва́ющи,/ от смы́сла чиста́ о Го́споде пра́зднующи.
В е́тхаго был еси́ печа́ть, всебога́те, я́ве заве́та,/ и проро́ков коне́ц извести́л еси́,/ и чертогокраси́тель же Боже́ственный Но́ваго яви́лся еси́, Предте́че.
В ласяны́ми ру́бы обы́чно, Предте́че,/ честну́ю претерпе́л еси́ и сла́вную главу́ твою́ покры́ти ца́рскою багряни́цею,/ я́ко ри́зою, ра́дуяся.
|
|
Б оже́ственную главу́ твою́ отбеже́нием ни́щий и скита́яйся/ твои́ми Боже́ственными наставле́ньми,/ я́коже незави́стно бога́тство, Иоа́нне, пока́зует.
З аре́ю, Предте́че, Боже́ственнаго Ду́ха чту́щий тя град всегда́ моли́ уясни́ти/ и Боже́ственней па́мяти твое́й безплотным срадоватися.
Богоро́дичен: М е́ртва мя показа́ сада́ вкуше́ние,/ живо́тное же дре́во, из Тебе́ я́вльшееся, Пречи́стая, воздви́же/ и ра́йския пи́щи насле́дника мя сотвори́.
Песнь 5
Ирмо́с: Бо́жиим све́том Твои́м, Бла́же,/ у́тренюющих Ти ду́ши любо́вию озари́, молю́ся,/ Тя ве́дети, Сло́ве Бо́жий,/ и́стиннаго Бо́га,/ от мра́ка грехо́внаго взыва́юща.
Н е был еси́ трость, Крести́телю, искуси́тельны ми злополуче́ния ве́тры все́гда коле́блемь,/ столп же Боже́ственных люде́й непоколеби́м,/ си́лою бо Илиино́ю яви́лся еси́ и Ду́ха.
И́ же Божество́ отмета́яй, и умаля́я сла́ву от Тебе́ кре́щшагося Христа́,/ и Боже́ственную благода́ть твою́ утаева́я,/ пра́ведно от огра́д Боже́ственных возбраня́емь есть.
О тверзл еси́ незави́стнаго Боже́ственнаго исто́чника дверь/ пою́щим тя любо́вию, сла́вный Предте́че,/ Боже́ственныя благода́ти источа́ющия во́ды и струй исцеле́ний, всех веселя́щия.
Богоро́дичен: Нося́щи добро́ту мы́сленную красне́йшия души́ Твоея́,/ неве́ста Бо́жия была́ еси́,/ запеча́тствованна де́вством, Чи́стая, и заре́ю чистоты́ мир просвеща́ющи.
|
|
Песнь 6
Ирмо́с: Жите́йское мо́ре,/ воздвиза́емое зря/ напа́стей бу́рею,/ к ти́хому приста́нищу Твоему́ прите́к, вопию́ Ти:/ возведи́ от тли живо́т мой,/ Многоми́лостиве.
П роро́ка тя рече́ И́стина – Христо́с, и проро́ков превы́шша,/ Крести́теля же и Предте́чу Жи́зни:/ Того́ бо узре́л еси́, Его́же зако́н и проро́цы провозвести́ша.
Н е терпя́ше кры́тися чуде́с исто́чник, сокро́вище благода́ти,/ сла́вная глава́ твоя́, Крести́телю, проро́че и Предте́че,/ но, я́вльшися, пролива́ет исцеле́ний исто́чники.
В себога́тно похвале́ние, и украше́ние све́тло,/ и щит спаси́телен христолю́бный сей/ и благосла́вный предлага́ет град твой,/ честну́ю и Боже́ственную твою́ главу́, Предте́че.
Богоро́дичен: В ели́кий прописа́ во проро́цех Моисе́й Тя, киво́т, и трапе́зу, и све́щник,/ и ста́мну обра́зне, назна́менуя воплоще́ние,/ е́же из Тебе́, Вы́шняго, Ма́ти Де́во.
Конда́к, глас 6. Подо́бен: В ы́шних ища́:
П роро́че Бо́жий и Предте́че благода́ти,/ главу́ твою́, я́ко ши́пок свяще́ннейший, от земли́ обре́тше,/ исцеле́ния всегда́ прие́млем,/ и́бо па́ки, я́коже пре́жде, в ми́ре проповедуеши покая́ние.
И́кос:
О т Го́спода свиде́тельство прие́м, Иоа́нне, па́че всех челове́к вы́шший был еси́,/ отону́дуже похвалы́ пе́сней принести́ тебе́ ужаса́юся,/ но, любо́вию понужде́н, песнь нача́ти дерзну́х./ Те́мже да не унедосто́иши споспе́шник мне бы́ти, всехва́льне,/ да возмогу́ венча́ти твой верх, святы́й требога́те,/ и́бо ты в ми́ре пропове́дуеши покая́ние.
Песнь 7
Ирмо́с: Р осода́тельну у́бо пещь/ соде́ла А́нгел/ преподо́бным отроко́м,/ халде́и же опаля́ющее/ веле́ние Бо́жие мучи́теля увеща́ вопи́ти:/ благослове́н еси́, Бо́же оте́ц на́ших.
Д е́вы прозябе́ние, тя па́че всех рече́ в рожде́нных жена́ми,/ я́ко бо безпло́тен и равноа́нгелен на земли́ Тому́ пожи́л еси́, вопия́:/ благослове́н еси́, Бо́же оте́ц на́ших.
В о утро́бе де́вственней Все́льшася позна́л еси́ из непло́дна чре́ва/ и, употреби́в ма́терня, Предте́че, гла́са, игра́я взыва́л еси́ Ему́:/ благослове́н еси́, Бо́же оте́ц на́ших.
О т пусты́ни, Пресвяты́м Ду́хом науче́н, яви́лся еси́,/ я́коже у́тро светоно́сно,/ А́́нгел Све́та, нас науча́я вопи́ти:/ благослове́н еси́, Бо́же оте́ц на́ших.
У блажи́ся я́ко вои́стинну во граде́х сей ны́не, приснопа́мятне,/ стяжа́вый тя град сокро́вище, Предте́че Христо́в./ Те́мже, пра́зднуя, вопие́т:/ благослове́н еси́, Бо́же оте́ц на́ших.
Богоро́дичен: Т обо́ю, Ма́ти Де́во, Свет возсия́ всей вселе́нней све́тлый,/ Ты бо Зижди́теля всех родила́ еси́, Бо́га:/ у Него́же испроси́, Пречи́стая, нам низпосла́ти ве́рным ве́лию ми́лость.
Песнь 8
Ирмо́с: Из пла́мене преподо́бным ро́су источи́л еси́/ и пра́веднаго же́ртву водо́ю попали́л еси́:/ вся бо твори́ши, Христе́, то́кмо е́же хоте́ти./ Тя превозно́сим во вся ве́ки.
П о́слан бысть вопию́щаго глас – Предте́ча запусте́вшим сердца́м,/ Сы́на Бо́жия ве́ру благочести́вую водружа́яй, су́щаго Бо́га,/ Его́же превозно́сим во вся ве́ки.
У гото́вите, глаго́лет и ны́не Предте́ча, Госпо́дню стезю́:/ Сей бо святы́ни ра́ди, прише́д, со Отце́м и Ду́хом/ в на́ша сердца́ всели́тся во ве́ки.
С лу́хом у́бо гла́су Роди́телеву, очи́ма же Боже́ственнаго Ду́ха зре́нию,/ вся́чески же осяза́нием Иоа́нн Предте́ча, на Тебе́ ру́ку положи́вый, Христе́,/ Богоно́сец быва́ет.
И з чре́ва освяти́ся Боже́ственным Ду́хом/ и проро́к яви́ся, во чре́ве носи́м,/ ны́не же наслажде́ние и́же в не́дрех тя иму́щему гра́ду показа́ся, проро́че.
Богоро́дичен: З латоза́рный Тя све́щник предъизобрази́,/ при́емшую неизрече́нно Свет Непристу́пный,/ позна́нием Того́ озаря́ющ вся́ческая,/ Его́же превозно́сим во вся ве́ки.
Песнь 9
Ирмо́с: Бо́га/челове́ком невозмо́жно ви́дети,/на Него́же не сме́ют чи́ни А́нгельстии взира́ти;/ Тобо́ю же, Всечи́стая, яви́ся челове́ком/ Сло́во воплоще́нно,/ егоже велича́юще,/ с Небе́сными во́и Тя ублажа́ем.
Я́ ве исполне́ния десяти́цы, Предте́че, за́поведей ты храни́тель кре́пок быв,/ прили́чие от Христа́ почте́н был еси́ дарова́ний десяти́цею./ Те́мже тя, Ду́ха таи́нника и дру́га Сло́ву, веду́ще, ублажа́ем.
Х ристо́в проро́к же и апо́стол, А́́нгел же и Предте́ча,/ Боже́ственнаго воплоще́ния Крести́тель,/ и свяще́нник, и му́ченик ве́рен,/ пропове́дник же су́щим во а́де ты был еси́,/ и де́вствующим пра́вило, и пусты́ни прозябе́ние.
Д уши́ неве́рие облича́ется священноде́йственныя руки́ умерщвле́нныя чудесе́м,/ прозя́бший же па́ки ве́ре и твое́й я́влыпейся главе́, блаже́нне,/ поже́ртая длань обновля́ется.
Т вое́, явле́ние провозвеща́юще зри́телю,/ возвеща́ху А́нгельстии чи́ни нело́жно,/ Гаврии́ла подо́бящеся Боже́ственному благове́щению,/ е́же пре́жде Рождества́ твоего́ свяще́нный 3аха́рия прие́млет.
Богоро́дичен: С трасте́й исцеле́ния да почерпа́ем, в сла́вный храм Предте́чев притека́юще:/ в той бо прихо́дят А́нгельстии ли́цы,/ ду́си же пра́ведных всех,/ Влады́чица с Крести́телем Иоа́нном, исцеле́ния подава́юще.
Свети́лен. Подо́бен: У ченико́м:
С ветоявле́нная возсия́ честна́я твоя́ глава́ от незаходи́мых недр земны́х, Предте́че Иоа́нне,/ свети́льниче Све́та невеще́ственнаго,/ ея́же обре́тение любо́вию соверша́юще, мо́лим тя/ лю́тых обрести́ разреше́ние и вре́мя удо́бне соверши́ти воздержа́ния/ моли́твами твои́ми, всехва́льне, Крести́телю Спа́сов.
Сла́ва, и ны́не, Богоро́дичен:
У теша́ется, Всечи́стая, ве́рных Богому́дрое собра́ние слу́жащее/ и ве́рно воспева́ющее Тя, Богоро́дицу и́стинно./ Те́мже моли́твами Твои́ми поста́ тече́ние даждь нам соверши́ти Боголе́пно,/ и Кресту́ Честно́му поклони́тися, и страсте́м спаси́те́льным Сы́на и Бо́га Твоего́.
На хвали́тех стихи́ры на 4, глас 4.
Подо́бен: Д ал еси́ зна́мение:
О тве́рзе преддве́рия воздержа́ния/ всечестна́я глава́ твоя́, всехва́льне,/ и пи́щу предложи́ сладча́йшую всем Боже́ственных дарова́ний,/ и́хже причаща́ющеся ве́рно,/ поста́ те́рпкое услажда́ем,/ и ве́рою восхваля́ем тя,/ и вопие́м Христу́ Бо́гу:/ Иису́се Всеси́льне, Спа́се душ на́ших.
М и́ра, я́коже во́ды,/ глава́ иска́пающи Предте́чева приснотеку́щая/ и, на трапе́зе днесь возло́жшися та́йней и Боже́ственней,/ благоуха́ет мы́сленне,/ и го́ресть отгоня́ет скорбе́й,/ и весе́лия вся исполня́ет любо́вию зову́щия:/ Иису́се Всеси́льне, Спа́се душ на́ших.
П осече́ гла́ва твоя́, я́коже меч остре́йший,/ главы́ беззако́ннующих враг/ и исцеле́ния источи́ в благозако́нии су́щим всем/ Боже́ственных дарова́ний./ И сего́ ра́ди тя ве́рно восхваля́ем,/ дру́га и Предте́чу, Иоа́нне, Зижди́телева,/ и вопие́м Ему́ приле́жно:/ Иису́се Всеси́льне, Спа́се душ на́ших.
Сла́ва, глас 6:
В сечестну́ю главу́ Крести́теля Твоего́, Го́споди,/ я́вльшуюся днесь от земли́,/ со гла́сом хвале́ния прие́мшии ве́рно,/ в моли́тву, Человеколю́бче, гре́шнии раби́ Твои́ приводя́ще, мо́лимся,/ Тоя́ ра́ди улучи́ти в день Суда́ от Тебе́ очище́ние и ве́лию ми́лость.
И ны́не, Богоро́дичен:
Б лаголюби́вый Бо́же и Спа́се,/ рабы́ Твоя́ спаса́й от вся́каго обстоя́ния лю́таго/ моли́твами Предте́чи Твоего́ и всех святы́х/ и Ма́тере Твое́й мольба́ми.
Славосло́вие вели́кое и отпу́ст.
НА ЛИТУРГИ́И
Блаже́нны от кано́на, пе́сни 3-я и 6-я. Проки́мен, глас 7: Возвесели́тся пра́ведник о Го́споде/ и упова́ет на Него́. Стих: Услы́ши, Бо́же, глас мой,/ внегда́ моли́ти ми ся к Тебе́. Апо́стол к Коринфяном, зача́ло 176. Аллилу́йя, глас 4: Пра́ведник, я́ко фи́никс, процвете́т, я́ко кедр, и́же в Лива́не, умно́жится. Стих: И́стина от земли́ возсия,/ и пра́вда с Небесе приниче. Ева́нгелие от Матфе́я, зача́ло 40. Прича́стен: В па́мять ве́чную бу́дет пра́ведник, от слуха зла не убоится.
Подоба́ет ведати, я́ко аще случи́тся обрете́ние честныя гла́вы Иоа́нна Предте́чи в неде́лю мясопу́стную и́ли сыропу́стную (начина́ется бо с среды́ мясопустныя неде́ли и восхо́дит до вто́рника 4-я неде́ли Великаго поста́):
На ма́лой вече́рни в суббо́ту стихи́ры воскреси́м 4, и Богоро́дичен гла́са. На стихо́вне стихи́ра воскре́сна еди́на: и Предте́чи стихо́вна. По Ны́не отпуща́еши: тропа́рь воскре́сен: Сла́ва, Предте́чи: И ны́не, Богоро́дичен воскресен. Ектения ма́лая, и отпуст.
На велицей вече́рни, на Го́споди, воззва́х: стихи́ры воскре́сны 3, и Трио́ди 4, и Предте́чи 3. Сла́ва, Трио́ди: И ны́не, Богоро́дичен 1-й гла́са. (Аще ли неде́ля сыропу́ст ная, и пое́м стихи́ры воскре́сны 3, и восто́чен, Анато́лиев, еди́н: и Трио́ди 3, и Предте́чи 3. Сла́ва, Трио́ди: И ны́не, Богоро́дичен 1-й гла́са). На ли́тии стихи́ра хра́ма и Трио́ди хвалитны, два стиха́. Аще неде́ля мясопу́стная, 1-й стих, глас 6: Помышля́ю день он: 2-й, глас то́йже: О, каковый час тогда́ и день. (Аще ли неде́ля сыропу́стная: Глаго́лем Трио́ди такожде в ли́тии два стиха́ хвалитны: 1-й стих, глас 5: Увы́ мне, Ада́м рыда́нием возопи́: 2-й, глас то́йже: По́прище доброде́телей отверзеся). Сла́ва, Предте́чи, глас 6: Сокро́вище Боже́ственных даро́в. И ны́не, Трио́ди, пи́сан на ли́тии Славник. На стихо́вне стихи́ры воскре́сны; Сла́ва, Предте́чи, глас 2: Я́коже Боже́ственных: И ны́не, Трио́ди. На благослове́нии хлебо́в тропа́рь, Богоро́дице Де́во: три́жды. И чте́ние в посланиих Апо́стольских.
На у́трени, на Бог Госпо́дь: тропа́рь воскре́сен, два́жды. Сла́ва, Предте́чи: И ны́не, Богоро́дичен 1-й, в то́йже глас. По кафи́змах седальны воскре́сны с Богоро́дичны их и чте́ние во Ева́нгелии толко́вом. Таже Хвали́те И́мя Госпо́дне: и Исповедайтеся Господеви: Глаго́лем же и 3-й псало́м: На ре́ках Вавило́нских: со аллилуиею. Таже пое́м псало́м и́збранный Предте́чи. И тропари́: А́нгельский собо́р. И седальны о́ба, по еди́ножды. Сла́ва, по полиелеи седа́лен: И ны́не, Богоро́дичен и чте́ние Предте́чи. Степе́нна, и проки́мен гла́са. Вся́кое дыха́ние: Ева́нгелие воскре́сно. Воскресе́ние Христо́во: Кано́н воскре́сен со ирмосо́м на 4; и Трио́ди на 6: и Предте́чи на 4. Катава́сия Трио́ди. (Аще неде́ля сыропу́стная: Кано́н воскре́сен со ирмосо́м на 4, и Богоро́дицы на 2, и Трио́ди на 4, и Предте́чи на 4. Катава́сия Трио́ди.) По 3-й пе́сни конда́к Предте́чи, и и́кос, и седа́лен его́, два́жды. Сла́ва, и ны́не, Трио́ди. И чте́ние Предте́чи. По 6-й пе́сни конда́к Трио́ди, и и́кос, и синаксарий. На 9-й пе́сни пое́м Честне́йшую: Свети́лен воскре́сен: Сла́ва, Предте́чи. И ны́не, Трио́ди. На хвалитех стихи́ры воскре́сны, 4: и святаго со Сла́вным, 4: с припе́вы его́. И по стихи́рах святаго глаго́лем: Воскре́сни, Го́споди Бо́же мой: И пое́м стихи́ру самогласну Трио́ди, глас 8: Даниил проро́к: Сла́ва, глас 1: Предочистим себе́, братие: И ны́не: Преблагословенна еси́. (Аще неде́ля сыропу́стная: Глаго́лем такожде припе́в: Воскре́сни, Го́споди Бо́же мой: И пое́м стихи́ру самогласну Трио́ди, глас 6: Ада́м из ра́я: Сла́ва, глас то́йже: Приспе вре́мя: И ны́не, Преблагослове́нна еси́ Славосло́вие вели́кое. По Трисвятом тропа́рь воскре́сен, ектени́й и отпуст. И исхождение обы́чное в притво́р. Сла́ва, и ны́не, стихи́ра ева́нгельская и час 1-й.
На часех тропа́рь воскре́сен: Сла́ва, Предте́чи. И ны́не, Богоро́дичен часо́в. По О́тче наш: конда́к Трио́ди и Предте́чи, пременяюще, глаго́лем.
На Литурги́и: Блаже́нны гла́са, на 4: и Трио́ди песнь 3-я, на 4: и Предте́чи 6-я, на 4. По вхо́де тропа́рь воскре́сен и Предте́чи. Сла́ва, конда́к его́: И ны́не, Трио́ди. Проки́мен, Апо́стол, Ева́нгелие и прича́стен пре́жде дне, и Предте́чи.
Аще ли случи́тся обрете́ние честныя главы́ Иоа́нна Предте́чи в суббо́ту мясопу́стную:
Пое́тся пра́здник Предтечев весь, пре́жде в пято́к мясопу́стный непреме́нно.
Аще ли случи́тся обрете́ние честныя главы́ Иоа́нна Предте́чи в понеде́льник и́ли во вто́рник сырныя неде́ли:
В ве́чер пое́м Блаже́н муж: 1-й антифо́н. В прочия же дни седми́цы сырныя глаго́лется кафи́зма рядова́я. На Господи, воззва́х: стихи́ры Предте́чи, на 6. Сла́ва, Предте́чи. И ны́не, Богоро́дичен воскре́сен, в то́йже глас. Проки́мен дне и паремии Предте́чи. На стихо́вне Трио́ди самогласен дне два́жды: и мученичен. Сла́ва, Предте́чи: И ны́не, Богородичен: Тропа́рь Предте́чи: Сла́ва, и ны́не, Богоро́дичен воскре́сен, и ектения.
На у́трени, на Бог Госпо́дь: тропа́рь Предте́чи, два́жды. Сла́ва, и ны́не, Богоро́дичен. И обычныя кафи́змы. По 1-й кафи́зме седа́лен Трио́ди и чте́ние дне. По 2-й кафи́зме седальны Предте́чи о́ба: и чте́ние Предте́чи. Полиелей и седа́лен Предте́чи, два́жды, и Богоро́дичен его́, и чте́ние Предте́чи. Степе́нна, 1-й антифо́н 4-го гла́са. Проки́мен Предте́чи, Вся́кое дыха́ние: Ева́нгелие Предте́чи. Таже псало́м 50. Стихи́ра Предте́чи. Кано́н Богоро́дицы со ирмосо́м на 6: и Предте́чи на 8. Катава́сия: Отве́рзу уста́ моя́: А идеже трипеснец, и пое́м кано́н Предте́чи со ирмосо́м на 6, и Трио́ди на 8. По 3-й пе́сни седа́лен Предте́чи, два́жды. Сла́ва, и ны́не, Богоро́дичен. И чте́ние Предте́чи. По 6-й пе́сни конда́к Предте́чи, и и́кос, и проло́г. По 9-й пе́сни свети́лен Предте́чи два́жды. Сла́ва, и ны́не, Богоро́дичен его́. На хвалитех стихи́ры Предте́чи на 4. Сла́ва, Предте́чи, И ны́не, Богоро́дичен. На стихо́вне Трио́ди самогласен дне два́жды, и мученичен. Сла́ва, Предте́чи: Я́же первее на блю́де: И ны́не, Богоро́дичен.
И про́чая обы́чная, и отпуст. И час 1-й, тропа́рь Предте́чи и по трисвятом конда́к его́. Такожде и на про́чих часех.
На Литурги́и: Блаже́нны Предте́чи, пе́сни 3-я и 6-я. Проки́мен, Апо́стол, аллилу́йя, Ева́нгелие и прича́стен дне и Предте́чи.
Аще ли случи́тся обрете́ние честныя главы́ Иоа́нна Предте́чи в среду́ сырныя седми́цы, и пое́м слу́жбу всю Предте́чи ве́чер и у́тро во вто́рник сырныя неде́ли.
Аще же в пято́к, и пое́м слу́жбу его́ в четверто́к.
Аще случи́тся обрете́ние честныя главы́ в четверто́к сы́рный:
И в сре́ду на часех, по О́слаби, оста́ви: и по поклонех быва́ет звон по обы́чаю, и абие глаго́лем: Прии́дите, покло́нимся: три́жды, и псало́м обы́чный, и ектения, и стихи́ры по предпи́санному. По вхо́де, проки́мен, паремии дне. И по сих проки́мен: Да упова́ет Изра́иль на Господа́. Таже пареми́й святаго 3. Посем, Сподо́би, Го́споди: На стихо́вне Трио́ди самогласен дне два́жды: и мученичен. Сла́ва, Предте́чи: И ны́не, Богоро́дичен. По Ны́не отпуща́еши: трисвятое по О́тче наш: тропа́рь Предте́чи: Сла́ва, и ны́не, Богоро́дичен воскре́сен, и ектения: Поми́луй нас, Бо́же: и 3 покло́ны великия. Посем моли́тва: Всесвята́я Тро́ице: и Буди́ и́мя Госпо́дне, три́жды: с покло́ны, и псало́м 33. Таже Досто́йно есть: и отпуст, и вхо́дим в тра́пезу, и разреша́ем на сыр и я́йца.
Аще ли случи́тся обрете́ние честныя главы́ Иоа́нна Предте́чи в суббо́ту сыропу́стную:
В пято́к вечера́ пое́м, Блаже́н муж: 1-й антифо́н. На Го́споди, воззва́х: стихи́ры Предте́чи: подо́бны 3; и отцев 3. Сла́ва, Предте́чи: И ны́не, Богоро́дичен 1-й гла́са. Вход. Проки́мен дне, и пареми́я: и по ней проки́мен, глас 6. Да упова́ет Изра́иль на Господа́. Таже пареми́й Предте́чи. Сподоби, Го́споди, в ве́чер сей: и ектения: Испо́лним вече́рнюю моли́тву: На стихо́вне Трио́ди самогласен дне два́жды, и мученичен. Таже припе́в: Возвесели́тся праведник: и пое́м стихи́ру Предте́чи самогласну, глас 6: Я́же первее на блю́де: Сла́ва, отцев, глас 8: Мона́хов мно́жества: И ны́не, Богоро́дичен, в то́йже глас. Тропа́рь Предте́чи: Сла́ва, отцев: И ны́не, Богоро́дичен: Е́же от века́ утаеное: посем ектения: Поми́луй нас, Бо́же: и 3 великия покло́ны. Таже, Всесвята́я Тро́ице: и Буди́ и́мя Госпо́дне: три́жды. И псало́м 33: Благословлю́ Господа́: и отпуст. И в тра́пезе разреша́ем на сыр и яйца́.
На повече́рии пое́м кано́н усо́пших в притво́ре, Окто́иха гла́са, и́ли Богоро́дичен. По Достойне, и по трисвятом конда́к Предте́чи: Сла́ва, и ны́не, Трио́ди отцев.
На у́трени на Бог Госпо́дь: тропа́рь Предте́чи два́жды. Сла́ва, отцев: И ны́не, Богоро́дичен 1-й. По кафи́змах седа́лен отцев, и Богоро́дичен их, и чте́ние отцев. Поли́е́лей, и седальны Предте́чи, вси по еди́ножды. Сла́ва, по полиелеи седа́лен: И ны́не, Богоро́дичен. И чте́ние Предтечи. Степе́нна, 1-й антифо́н 4-го гла́са. Проки́мен, Вся́кое дыха́ние: и Ева́нгелие Предте́чи. Псало́м 50. Стихи́ра Предте́чи. Кано́н Предте́чи со ирмосо́м на 6: и отцев на 8. Катава́сия, ирмо́с Трио́ди. Стихословим же и 2-ю песнь Трио́ди: во псалти́ри же пе́сни той не глаго́лем. По 3-й пе́сни конда́к Предте́чи, и и́кос, и седа́лен его́: Сла́ва, отцев: И ны́не, Богоро́дичен. И чте́ние Предте́чи. По 6-й пе́сни конда́к отцев, и и́кос, и синаксарий. По 9-й пе́сни свети́лен Предте́чи: Сла́ва, отцев: И ны́не, Богоро́дичен. На хвалитех стихи́ры Предте́чи 3, и отцев, 3: Сла́ва, отцев, И ны́не, Богоро́дичен. Славосло́вие вели́кое, тропа́рь Предтечи: Сла́ва, отцев: И ны́не, Богоро́дичен. И исхождение в притво́р, и час 1-й.
На часех тропа́рь Предте́чи: Сла́ва, отцев: И ны́не, Богоро́дичен часо́в. По О́тче наш: Конда́к Предте́чи, и отцев, пременяюще, глаго́лем.
На Литурги́и: Блаже́нны Предте́чи, песнь 3-я, на 4: и отцев 6-я на 4. По вхо́де тропа́рь хра́ма и Предте́чи, и отцев. Таже конда́к хра́ма, и Предте́чи. Сла́ва, отцев: И ны́не, хра́ма Богоро́дицы, и́ли Предста́тельство христиа́н: Проки́мен, Апо́стол, аллилу́йя, Ева́нгелие, и прича́стен, пре́жде Предте́чи, и пото́м отцев. Ряд же Апо́стол, и Ева́нгелие, чтем под зача́ло.
Аще ли случи́тся обрете́ние честныя главы́ Предтечевы понеде́льник 1-я неде́ли посто́в:
Слу́жба вся Предте́чи пое́тся в неде́лю сы́рную.
Аще ли случи́тся обрете́ние честныя главы́ Предтечевы в кий лю́бо день 1-я неде́ли посто́в:
И пое́тся слу́жба его́ в неде́лю сыропу́стную и́ли в суббо́ту 1-я неде́ли посто́в.
Аще ли случи́тся обрете́ние честныя главы́ Предтечевы в суббо́ту 1-я неде́ли посто́в:
В пяток ве́чера кафи́зма рядова́я: на Го́споди, воззва́х: стихи́ры на 10: и пое́м самогласен дне два́жды: и Предте́чи стихи́ры на 4: и Феодора на 4. Сла́ва, Феодора: И ны́не, Богоро́дичен 1-й гла́са. Вход. Проки́мен: И чте́ния дне, и Предте́чи 3. И по Да испра́вится моли́тва моя́: 3 покло́ны великия: и про́чее преждеосвященных. По заамвонной моли́тве, пое́м кано́н святаго Феодора над коливом, я́коже указася в 40-це на ряду: и отпуст.
А идеже несть преждеосвященных: Ве́чера на Го́споди, воззва́х: стихи́ры Предте́чи, 3, и Феодора, 3. Сла́ва, Феодора: И ны́не, Богоро́дичен 1-й гла́са прешедшаго, без вхо́да. Проки́мен, и чте́ние дне, и Предте́чи. На стихо́вне Трио́ди самогласен дне два́жды, и мученичеи. Таже припе́в: Возвесели́тся пра́ведник: и пое́м стихи́ру мученика, глас 2: Боже́ственных даро́в: пи́сана в стихи́рах. Сла́ва, Предте́чи, глас 6: Сокро́вище Боже́ственных: И ны́не, Богоро́дице, Ты еси́ лоза́: по Ны́не отпущаеши: тропа́рь Предте́чи: Сла́ва, му́ченика: И ны́не, Богоро́дичен: Вся па́че смы́сла: ектени́й, и 3 покло́ны великия. И пое́м кано́н святаго Феодора над коливом и отпуст по обы́чаю.
Повече́рие пое́м вели́кое, на немже пое́м кано́н усо́пших Мине́и рядовый. Тропари́ же по 1-м трисвятом глаго́лем обо́их святы́х, а на после́днем трисвятом конда́к Предте́чи.
На у́трени, на Бог Госпо́дь: тропа́рь Предте́чи два́жды: Сла́ва, Феодора: И ны́не. Богоро́дичен: Вся па́че: По 1-й кафи́зме седальны Предте́чи о́ба: Сла́ва, и ны́не, Богородичен: и чте́ние Предте́чи. По 2-й кафи́зме седален Феодора. Сла́ва, и ны́не, Богоро́дичен: и чте́ние Предте́чи и́ли Феодора. Полиелей, и седа́лен Предте́чи два́жды: Сла́ва, и ны́не, Богоро́дичен: и чте́ние Предте́чи. Степе́нна, 1-й антифо́н 4-го гла́са. Проки́мен, Вся́кое дыха́ние: Ева́нгелие Предте́чи. Псало́м 50. Стихи́ра Предте́чи. Кано́н Предте́чи со ирмосо́м на 6: и Феодора о́ба кано́на на 8. Катава́сия, Отве́рзу уста́ моя́: Пе́сни же седмую и осмую глаго́лем напреди в пято́к. По 3-й пе́сни конда́к и и́кос, и седа́лен Предте́чи: Сла́ва, Феодора: И ны́не, Богоро́дичен: и чте́ние о свято́м Феодоре. По 6-й пе́сни конда́к Феодора, и и́кос. И чтем проло́г и синаксарий. По 9-й пе́сни свети́лен Предте чи: Сла́ва, Феодора: И ны́не, Богоро́дичен. На хвалитех стихи́ры Предте́чи, подо́бны 3 и Феодора, подо́бны 3. Таже, припе́в: Возвесели́тся пра́ведник: и пое́м самогласну стихи́ру Предте́чи, глас 6: Всечестную главу́: Сла́ва, Феодора: И ны́не, Богоро́дице, Ты еси́ лоза́: Славосло́вие вели́кое: тропа́рь Предте́чи: Сла́ва, Феодора: И ны́не, Богоро́дичен. Ектени́й, и отпуст, и обы́чное исхождение в притво́р, и час 1-й.
На часех тропа́рь Предте́чи. Сла́ва, Феодора: И ны́не, Богоро́дичен часо́в. Кондаки́ же глаго́лем пременяюще.
На Литурги́и: Блаже́нны Предте́чи, песнь 3-я, на 4, и Феодора песнь 6-я, на 4. По вхо́де тропа́рь Предте́чи, и Феодора, и конда́к его́: Сла́ва, Предте́чи: И ны́не, Богородицы хра́ма, и́ли Предста́тельство христиа́н: Проки́мен, аллилу́йя, и прича́стен Предте́чи, и Феодора еди́н. Апо́стол же и Ева́нгелие пре́жде суббо́ты, и Феодора под зача́ло. Таже, Предте́чи.
Аще ли случи́тся обрете́ние че́стный главы́ Иоа́нна Предте́чи в 1-ю неде́лю посто́в:
И пое́тся слу́жба его́, я́коже ука́зано в неде́лю 3-ю посто́в, кро́ме поклоне́ния Креста́, точию на ли́тии. Сла́ва, Предтечи, пи́сана на Го́споди, воззва́х: И ны́не, Трио́ди. На стихо́вне, Сла́ва, Предте́чи: И ны́не, Трио́ди. На Бог Госпо́дь: тропа́рь воскре́сен, два́жды. Сла́ва, Предте́чи: И ны́не, Пречи́стому Твоему́ о́бразу: Катава́сия Трио́ди.
Аще ли случи́тся обрете́ние честныя главы́ Предте́чи в понеде́льник 2-я, и́ли 3-я, и́ли 4-я неде́ли посто́в:
В неде́лю ве́чера пое́м Блаже́н муж: 1-й антифо́н. На Го́споди, воззва́х: стихи́ры на 10: Трио́ди дне на 4, повторяюще 1-ю: и Предте́чи, на 6: Сла́ва, Предте́чи: И ны́не, Богоро́дичен 1-й. Вход: Проки́мен вели́кий Трио́ди, и чте́ния Предте́чи 3. Таже, Сподоби, Го́споди, в ве́чер сей: и Испо́лним вече́рнюю: На стихо́вне Трио́ди самогласен дне два́жды, и мученичен: Сла́ва, Предте́чи: и Ны́не, Богородичен по гла́су, воскре́сен. И по О́тче наш: тропа́рь Предте́чи: Сла́ва, и ны́не, Богоро́дичен воскре́сен: ектени́й: Поми́луй нас, Бо́же: и покло́ны 3 великия, и отпуст.
Полунощницу же пое́м по обы́чаю, с кафи́змою и тропари́ обы́чными. По Честне́йшую: 3 покло́ны великия.
На у́трени, на Бог Госпо́дь: тропа́рь Предте́чи два́жды: Сла́ва, и ны́не, Богоро́дичен. По 1-й и по 2-й кафи́змах глаго́лем седальны Трио́ди: ектени́й же не глаго́лются. И чте́ние во Ефреме. По 3-й кафи́зме глаго́лет иере́й ектению малу́ю, и седальны Предте́чи о́ба, и чте́ние Предте́чи. Полиелей, и седа́лен Предте́чи два́жды: Сла́ва, и ны́не, Богоро́дичен: и чте́ние Предте́чи. Степе́нна, 1-й антифо́н 4-го гла́са. Проки́мен, и Ева́нгелие Предте́чи. Таже, псало́м 50. Стихи́ра Предте́чи. Кано́н Предте́чи со ирмосо́м на 8. Катава́сия, Отве́рзу уста́ моя́: А идеже трипеснец: и пое́м кано́н Предте́чи со ирмосо́м на 6: и трипеснец на 8. Катава́сия Трио́ди. По 3-й пе́сни седа́лен Предте́чи два жды: Сла́ва, и ны́не, Богоро́дичен, и чте́ние Предте́чи. По 6-й пе́сни конда́к, и и́кос, и проло́г. Свети́лен Предте́чи, два́жды. Сла́ва, и ны́не, Богоро́дичен. На хвалитех стихи́ры Предте́чи, на 4: Сла́ва, Предте́чи: И ны́не, Богоро́дичен его́. Таже настоя́тель и́ли чтец глаго́лет: Сла́ва Тебе́, показа́вшему нам свет. Посем ектения, Испо́лним утреннюю: Таже, на стихо́вне Трио́ди самогласен дне два́жды, и мученичен, Сла́ва, Предте́чи: И ны́не, Богоро́дичен. Посем Бла́го есть: глаго́лем еди́ножды. По О́тче наш: тропа́рь Предте́чи. Сла́ва, и ны́не, Богоро́дичен воскре́сен. Ектения, Поми́луй нас, Бо́же, и 3 покло́ны великия, без отпуста, и час 1-й.
На часех, тропа́рь глаго́лем Предте́чи: и по трисвятом конда́к его́. И наконе́ц 3 покло́ны великия. И по поклонех, трисвятаго не глаго́лем, но глаго́лем: Христе́, Све́те: и отпуст. Часы́ же тре́тий, шестый и девя́тый пое́м с кафи́змами, в подо́бное их вре́мя, со чте́нием. На 6-м ча́се чтется пареми́я дне, по чи́ну ея. Моли́твы же великаго Васи́лия по часех глаго́лем непреме́нно, е́же есть: Владыко Бо́же О́тче: и Бо́же и Го́споди сил: и Владыко Го́споди Иису́се Христе́: Егда́ же пое́м полиелей, на часех в кампан не ударя́ем. По кафи́зме аллилу́йя, три́жды. Таже, Го́споди, поми́луй: три́жды. И чтец глаго́лет: Сла́ва, тропа́рь Предтечи: И ны́не, Богоро́дичен часо́в. По О́тче наш: конда́к
Предте́чи. По Честне́йшую: 3 покло́ны великия. По 9-м ча́се Блаже́нны глаго́лем поскору без пе́ния. По Ослаби, остави: конда́к хра́ма: Сла́ва, Предте́чи: И ны́не, хра́ма Богородицы. Аще ли несть хра́ма Богоро́дицы, И ны́не, Предста́тельство христиа́н: посем, Го́споди, поми́луй, 40. Сла́ва, и ны́не, Честне́йшую Херуви́м: и 3 покло́ны великия. Таже, мо́литва: Всесвята́я Тро́ице: и обы́чный отпуст. И начина́ем вече́рню по обы́чаю. Настоя́тель и́ли чтец глаго́лет: Приидите, покло́нимся: три́жды. И пое́м вече́рню с поклоны, по чи́ну по́стному. По обы́чной кафи́зме, на Го́споди, воззва́х: стихи́ры на 10: Трио́ди самогласен дне два́жды, и мученичен: и подо́бны Трио́ди 3: и Предте́чи 4. Сла́ва, Предте́чи, И ны́не, Богоро́дичен: по гла́су обы́чны. Аще ли к среде́ и́ли пятку́, глаго́лем Крестобогородичен, по гла́су Славника. Вход со Ева́нгелием. Све́те ти́хий: Проки́мен, и чте́ние дне. Да испра́вится моли́тва моя́: и 3 покло́ны великия. Ектени́й малыя не глаго́лем. Проки́мен, Апо́стол, аллилу́йя, Ева́нгелие и прича́стен Предте́чи. Литурги́я преждеосвященная, по обы́чаю. На отпусте иере́й поми́нает пре́жде празднуемаго святаго, пото́м наставшаго. Святаго же, прилучившагося на ря́ду, кано́н пое́м на у́трени по чи́ну: стихи́ры же его́, и́же пи́саны на вече́рни на Го́споди, воззва́х: глаго́лем их на хвалитех.