СЛУЖБА ИЖЕ ВО СВЯТЫХ ОТЦАМ НАШИМ ПРЕПОДОБНЫМ
МЕ́СЯЦА НОЯБРЯ́ В 26-й ДЕНЬ
Слу́жба преподо́бных оте́ц на́ших Афана́сия и Феодо́сия, Черепове́цких чудотво́рцев
НА ВЕЛИ́ЦЕЙ ВЕЧЕ́РНИ
Блаже́н муж: 1-й антифо́н. На Го́споди, воззва́х: стихи́ры, глас 8.
Подо́бен: О, пресла́внаго чудесе́:
О, пресла́внаго чудесе́!/ Днесь лику́ют лю́дие,/ па́мять преподо́бных отце́в пра́зднующи,/ Афана́сия и Феодо́сия,/ посто́м, труда́ми и моли́твами Бо́гу угоди́вших,/ дар чудотворе́ния от Влады́ки всех прия́вших./ О, вели́цыи свети́льницы,/ любо́вию Христо́вой мир озаря́ющии,// путеводи́те ны к Ца́рствию Небе́сному.
Бу́ди благослове́на, земле́ Черепове́цкая,/ во оби́тели Воскресе́ния Христо́ва/ дво́ицу свяще́нную всему́ ми́ру яви́вшая,/ преподо́бных Афана́сия и Феодо́сия,/до́брый о́браз богоуго́дного жития́,/ досто́йных учени́к Се́ргия Вели́каго./ Ти́и бо ны́не Престо́лу Бо́жию вку́пе предстоя́ще,// мо́лятся о спасе́нии душ на́ших.
Послуша́ния усе́рднии подви́жницы,/ о́бразы кро́тости и смире́ния,/ во́лю свою́ Бо́гу покори́вшии,/ яви́сте ми́ру Бо́жию сла́ву./ Ны́не же с го́рними си́лами ра́дуетеся,/ отцы́ всехва́льнии./ Духо́вныя на́ша окорми́телие,/ мо́литеся о нас, ча́дех ва́ших, приле́жно// спасти́ся душа́м на́шим.
О, блаже́ннии отцы́ на́ша,/ Афана́сие и Феодо́сие,/ крест Христо́в на ра́мена взе́мшии,/ земно́е по́прище ско́рбнагожития́, славосло́вя Бо́га проше́д,/ ны́не на Небесе́х ра́достию жи́зни несконча́емыя со Христо́м наслажда́етеся./ Моли́теся ко Го́споду,// да от и́га страсте́й изба́вит нас.
Сла́ва, глас 6:
Прииди́те, ве́рнии,/ похва́льными словесы́ преподо́бных Афана́сия и Феодо́сия возсла́вим,/ дво́ицу свяще́нную,/ доброде́тельми, я́ко не́бо зве́здами, сия́ющую,/ любо́вию Христо́воювсех притека́ющих согрева́ющую./ О, чудотво́рцы ди́внии,/ засту́пницы усе́рднии,// моли́теся непреста́нно о душа́х на́ших.
И ны́не, Богоро́дичен Догма́тик, глас то́йже:
Кто Тебе́ не ублажи́т, Пресвята́я Де́во;/ кто ли не воспое́т Твоего́ Пречи́стаго Рождества́;/ безле́тно бо от Отца́ возсия́вый Сын Единоро́дный,/ То́йже от Тебе́, Чи́стыя, про́йде,/ неизрече́нно вопло́щься,/ естество́м Бог Сый,/ и естество́м быв Челове́к нас ра́ди;/ не во двою́ лицу́ разделя́емый,/ но во двою́ естеству́/ несли́тно познава́емый./ Того́ моли́, Чи́стая Всеблаже́нная,/ поми́ловатися душа́м на́шим.
Вход. Проки́мен дне. Чте́ния три.
Прему́дрости Соломо́новы чте́ние (глава́ 3):
Пра́ведных ду́ши в руце Бо́жией, и не прико́снется их му́ка/. Непщева́ни бы́ша во очесе́х безу́мных умре́ти, и вмени́ся озлобле́ние исхо́д их/. И е́же от нас ше́ствие сокруше́ние, они́ же суть в ми́ре/. И́бо пред лице́м челове́ческим а́ще и му́ку прии́мут, упова́ние их безсме́ртия испо́лнено/. И вма́ле нака́зани бы́вше, вели́кими благоде́тельствовани бу́дут/, я́ко Бог искуси́ я и обре́те их досто́йны Себе́/. Я́ко зла́то в горни́ле искуси́ их, и я́ко всеплодие же́ртвенное прия́т я/. И во вре́мя посеще́ния их возсия́ют и, я́ко и́скры по сте́блию, потеку́т/. Су́дят язы́ком и облада́ют людьми́, и воцари́тся Госпо́дь в них во ве́ки/. Наде́ющийся Нань разуме́ют и́стину и ве́рнии в любви́ пребу́дут Ему́/. Я́ко благода́ть и ми́лость в преподо́бных Его́, и посеще́ние во избра́нных Его́.
Прему́дрости Соломо́новы чте́ние (гла́вы 5, 6):
Пра́ведницы во ве́ки живу́т, и в Го́споде мзда их, и попече́ние их у Вы́шняго/. Сего́ ра́ди прии́мут Ца́рствие благоле́пия и вене́ц доброты́ от руки́ Госпо́дни,/ зане́ десни́цею покры́ет я и мы́шцею защити́т их/. Прии́мет всеору́жие рве́ние Свое́ и вооружи́т тварь в месть враго́м/. Облече́тся в броня́ пра́вды и возложи́т шлем, суд нелицеме́рен/. Прии́мет щит непобеди́мый, преподо́бие/. Поостри́т же напра́сный гнев во ору́жие/; спобо́рет же с ним мир на безу́мныя/. По́йдут праволу́чныя стре́лы мо́лниины/ и, я́ко от благокру́гла лу́ка облако́в, на наме́рение полетя́т/. И от каменоме́тныя я́рости испо́лнь паду́т гра́ды/, вознегоду́ет на них вода́ морска́я, ре́ки же пото́пят я на́гло/. Сопроти́в ста́нет им дух си́лы, и, я́ко вихо́р, разве́ет их/, и опустоши́т всю зе́млю беззако́ние, и злоде́йство преврати́т престо́лы си́льных/. Слы́шите у́бо, ца́рие, и разуме́йте, навы́кните, судии́ конце́в земли́/. Внуши́те, держа́щии́ мно́жества и гордя́щиися о наро́дех язы́ков/, я́ко дана́ есть от Го́спода держа́ва вам и си́ла от Вы́шняго.
Прему́дрости Соломо́новы чте́ние (глава 4):
Пра́ведник, аще пости́гнет сконча́тися, в поко́и бу́дет/. Ста́рость бо честна́ не многоде́тна, ниже́ в числе́ лет исчита́ется/. Седи́на же есть му́дрость челове́ком, и во́зраст ста́рости житие́ нескве́рное/. Благоуг о́ден Бо́гови быв, возлю́блен бысть, и живы́й посреде́ гре́шник преста́влен бысть/. Восхище́н бысть, да не зло́ба изме́нит ра́зума его́, или́ лесть прельсти́т ду́шу его́/. Раче́ние бо зло́бы помрача́ет до́брая, и паре́ние по́хоти пременя́ет ум незло́бив/. Сконча́вся вма́ле, испо́лни ле́та до́лга. Уго́дна бо бе Го́сподеви душа́ его́, сего́ ра́ди потща́ся от среды́ лука́вствия/. Лю́дие же ви́девше и не разуме́вше, ниже́ поло́жше в помышле́нии таково́е/. Я́ко благода́ть и ми́лость в преподо́бных Его́/ и посеще́ние во избра́нных Его́.
На литии́ стихи́ры, глас 3:
Яви́ нам Бог, ди́вный во святы́х Свои́х,/ свети́льников ве́ры, подви́жников благоче́стия,/ преподо́бных Афана́сия и Феодо́сия,/ ди́вных чудотво́рцев Черепове́цких,// неуста́нно моля́щихся о душа́х на́ших.
Равноа́нгельное житие́ на земли́ пожи́в,/ да́ра чудотворе́ния от Бо́га сподо́билися есте́./ Благода́тию Пресвята́го Ду́ха озаря́емии, /мно́ги ду́ши скорбя́щияуте́шили есте́,/ мно́ги лю́ди на стезю́ спасе́ния наста́вили есте́,// путеводи́те и нас, всечестни́и отцы́, ко Христу́.
Преподо́бных Черепове́цких торжество́ пра́зднуя,/ братолю́бием почти́м честну́ю па́мять отце́в всехва́льных,/ отри́нем горды́ню и невоздержа́ние,/ облече́мся в ри́зу смире́ния и кро́тости,/ очи́стим сердца́ покая́нием,/ да прича́стницы Ца́рствия Небе́снаго// моли́твами отце́в блаже́нных бы́ти вси сподо́бимся.
Сла́ва, глас 8:
Всечестну́ю па́мять ва́шу преподо́бнии отцы́ пра́зднующи,/ славосло́вим и благодари́м Всеблаго́го Бо́га,/ дарова́вшего нам таковы́х ско́рых засту́пников и те́плых уте́шителей,// преблаже́ннии.
И ны́не, Богоро́дичен, глас 8:
Безневе́стная Де́во,/ я́же Бо́га неизрече́нно заче́нши пло́тию,/ Ма́ти Бо́га Вы́шняго, / Твои́х рабо́в мольбы́ приими́, Всенепоро́чная,/ всем подаю́щи очище́ние прегреше́ний,/ ны́не на́ша моле́ния прие́млющи,/ моли́ спасти́ся всем нам.
На стихо́вне стихи́ры, глас 8:
Богому́дрии Афана́сие и Феодо́сие,/ сла́ву ми́ра сего́ презре́ли есте́,/ неукло́нно ше́ствуя во след Христу́,/ с горы́ земны́я на го́ру небе́сную удо́бь востекли́ есте́./ И ны́не на небесех водворя́яся,// нас во оби́тели Святы́я Тро́ицы путеводи́те.
Стих: Честна́ пред Го́сподем/ смерть преподо́бных Его́.
Промышле́нием Бо́жиим води́мии,/ преподо́бнии Афана́сие и Феодо́сие, / в зе́млю Черепове́цкую пресели́стеся,/ ра́дование лю́дем в ней живу́щим яви́сте,/ путе́м Христо́вым ше́ствовати поуча́я// всех с ве́рою к вам притека́ющих.
Стих: Восхва́лятся преподо́бнии во сла́ве// и возра́дуются на ло́жах свои́х.
Прииди́те, лю́дие,/ днесь преподо́бных благоче́стно восхва́лим,/ ве́рных учени́к Христо́вых,/ и́го Его́ на ра́мена взе́мших,/ по́двиги и страда́ния ра́ди любве́ ко Го́споду поне́сших./ К ни́мже соумиле́нием возопии́м:/ помина́йте нас, отцы́ блаже́ннии,// да моли́твами ва́шими спасе́м ду́ши на́ша.
Сла́ва, глас 4:
Святе́й Тро́ице до́бре потруди́вшеся,/ мно́ги ча́да в ре́вностнем служе́нии Бо́гу воспита́сте,/ в оби́тели Воскресе́ния Христо́ва/ а́лчущих равноа́нгельного жития́ собра́сте,/ вся́ку ду́шу Еди́ному Бо́гу рабо́тати научи́ли есте́./ Ны́не и нас свои́ми благомо́щными моли́твами вразуми́те,/ в ве́ре и благоче́стии утверди́те,/ отцы́ блаже́ннии,/ помози́те ле́ность па́губную с серде́ц на́ших отрясти́// и путе́м Христо́вым неуста́нно ше́ствовати.
И ны́не, Богоро́дичен, глас то́йже:
При́зри на моле́ния Твои́х раб, Всенепоро́чная,/ утоля́ющи лю́тая на ны возста́ния,/ вся́кия ско́рби нас изменя́ющи./ Тя бо, Еди́ну, тве́рдое и изве́стное утвержде́ние и́мамы,/ и Твое́ предста́тельство стяжа́хом./ Да не постыди́мся, Влады́чице, Тя призыва́ющии,/ потщи́ся на умоле́ние Тебе́ ве́рно вопию́щих:/ ра́дуйся, Влады́чице,/ всех по́моще, ра́досте и покро́ве,/ и спасе́ние душ на́ших.
Тропа́рь, глас 5:
Я́ко всехва́льнии ученицы́/ вели́каго покрови́теля и заступни́ка земли́ Ру́сския,/ Богоно́снии отцы́ на́ша Афана́сие и Феодо́сие,/ от ю́ности ва́шея крест Христо́в на ра́мена взе́мшии,/ усе́рдно Тому́ после́довали есте́/ и до́бре потруди́лися в Се́ргиевой оби́тели./ Отону́дуже Бо́жиим изволе́нием прибы́вша,/ благоче́стно во гра́де на́шем Череповце́ подвиза́лися есте́,/ и оби́тель Воскресе́ния Христо́ва устро́иша,/ моли́твою и трудо́м Бо́гу угоди́вше,/ от Него́ вене́ц сла́вы небе́сной прия́ли есте́,/ и ны́не святы́ми свои́ми телесы́/ в собо́рнем хра́ме под спу́дом почива́юще,/ ду́хом же вку́пе с преподо́бным Се́ргием/ у Престо́ла Всевы́шняго предстоя́,/ о нас моли́теся приле́жно/ изба́витися нам от всех бед и скорбе́й/ и спасти́ся душа́м на́шим.
Богородичен, глас 5:
Ра́дуйся, две́ре Госпо́дня непроходи́мая;/ ра́дуйся, стено́ и покро́ве притека́ющих к Тебе́;/ ра́дуйся, необурева́емое приста́нище и Неискусобра́чная,/ ро́ждшая пло́тию Творца́ Твоего́ и Бо́га,/ моля́щи не оскудева́й о воспева́ющих/ и кла́няющихся Рождеству́ Твоему́.
НА У́ТРЕНИ
На Бог Госпо́дь: тропа́рь преподо́бным, два́жды.
Сла́ва, и ны́не, Богоро́дичен.
По 1-м стихосло́вии седа́лен, глас 1:
Всем се́рдцем Христа́ возлюби́ли есте,/ преподо́бнии, вся земна́я презре́в,/ да Го́спода еди́наго приобря́щут,/ и Ему еди́ному послу́жат./ Тех моли́твами, Человеколю́бче Влады́ко всех,/ любве́ Твоея́ сердца́ на́ша испо́лни// и спаси́ нас, я́ко Милосе́рд.
Сла́ва, и ны́не, Богоро́дичен:
Богоблагода́тная, Бо́га родила́ еси́,/ де́вство неруши́мо сохрани́,/ Спа́са ми́ру яви́ла еси́,/ Де́во Благослове́нная./ Те́мже пе́сньми немо́лчными Тя восхваля́ем,/ и про́сим, я́ко на́шу Ма́ти и Засту́пницу,/ от всех бед лю́ди Своя́ огради́,// моли́твами уго́дник Твои́х, преподо́бных Афана́сия и Феодо́сия.
По 2-м стихосло́вии седа́лен, глас 2:
Любве́ доброде́тель яви́сте, отцы́ всехва́льнии,/ во оби́тели Воскресе́ния Христо́ва бо на всяк день,/ всех, и́щущих сове́та и по́мощи, благоду́шно срета́ли есте́,/ скорбя́щих утеша́ли есте́,/ а́лчущих пита́ли есте́,// я́ко и́стиннии ученицы́ Христо́вы.
Сла́ва, и ны́не, Богоро́дичен, глас то́йже:
О, Пренепоро́чная Де́во,/ Благослове́нная Богоро́дице,/ моли́ Ро́ждшагося от Тебе́ Сы́на,/ Христа́ Бо́га, Спа́са на́шего,/ со преподо́бными отцы́ Афана́сием и Феодо́сием,// спасти́ся душа́м на́шим.
Велича́ние
Ублажа́ем вас, преподо́бнии отцы́ на́ши Афана́сие и Феодо́сие, и чтим святу́ю па́мять ва́шу, наста́вницы мона́хов, и собесе́дницы а́нгелов.
Псалом избранный: Терпя́ потерпе́х Го́спода.
1. Терпя́, потерпе́х Го́спода, и внят ми, и услы́ша моли́тву мою́.
2. Поста́ви на ка́мени но́зе мои́, и испра́ви стопы́ моя́.
3. Се удали́хся бе́гая, и водвори́хся в пусты́ни.
По полиеле́и седа́лен, глас 1:
Дво́ицу свяще́нную, достоблаже́нных Афана́сия и Феодо́сия,/ пе́сненными венцы́ укра́сим, боголю́бцы,/ ти́и бо ве́ру правосла́вную в челове́цех утвержда́ют,/ люде́й спасе́ние улуча́ти поуча́ют./ Их моли́твами, Человеколю́бче Спа́се,// да́руй нам вся, я́же ко спасе́нию поле́зная.
Сла́ва, и ны́не, Богоро́дичен, глас то́йже:
Упова́ние христиа́н, Пресвята́я Де́во,/ Бо́га, Его́же родила́ еси́, па́че ума́ и сло́ва,/ непреста́нно моли́ с Вы́шними си́лами и со преподо́бными Афана́сием и Феодо́сием/ да́ти оставле́ние согреше́ний на́ших// и исправле́ние жития́ ве́рою и любо́вию при́сно Тя сла́вящим.
Степе́нна, 1-й антифо́н 4-го гла́са.
Проки́мен, глас 4: Честна́ пред Го́сподем / смерть преподо́бных Его́.
Стих: Что возда́м Го́сподеви о всех, я́же воздаде́ ми?
Вся́кое дыха́ние: Ева́нгелие от Матфе́я, зача́ло 43.
По 50-м псалме стихи́ра, глас 6:
Прииди́те, вси ве́рнии,/ Афана́сия и Феодо́сия восхва́лим,/ сии́ бо в ли́це преподо́бных/ предстоя́ Престо́лу Пресвяты́я Тро́ицы,/ приле́жно мо́лятся/ о спасе́нии душ на́ших.
Кано́н преподо́бным Афана́сию и Феодо́сию Черепове́цким.
Кано́н, его́же краегране́сие: О, Афана́сие и Феодо́сие, моли́те Бо́га о нас.
Глас 6.
Песнь 1.
Ирмо́с: Я́ко по су́ху пешеше́ствовав Изра́иль, по бе́здне стопа́ми, гони́теля фарао́на ви́дя потопля́ема, Бо́гу побе́дную пе́снь пои́м, вопия́ше.
Припев: Преподо́бнии отцы́ на́ша Афана́сие и Феодо́сие, моли́те Бо́га о нас.
О, Влады́ко Вседержи́телю, отве́рзи на́ша недосто́йная уста́ и помози́ вле́поту воспе́ти по́двиги блаже́нных отце́в на́ших Афана́сия и Феодо́сия ны́не со а́нгелы моля́щихся Тебе́ изба́вити нас от вся́каго зла и спасти́ ду́ши на́ша.
Преподо́бнии отцы́ на́ша Афана́сие и Феодо́сие, моли́те Бо́га о нас.
А́нгельское житие́ на земли́ пожи́в, посто́м, труда́ми и моли́твами душепа́губныя стра́сти умертви́в, с горы́ земны́я на го́ру небе́сную взошли́ есте́, отцы́ преподо́бнии.
Сла́ва Отцу́ и Сы́ну, и Свято́му Ду́ху.
Фарао́на мы́сленнаго погуби́в, под води́тельством Христа́ мо́ре страсте́й проше́д, ти́хаго приста́нища дости́гли есте́, отцы́ преподо́бнии.
И ны́не, и при́сно и во ве́ки веко́в. Ами́нь.
А́нгели на небеси́ непреста́нно сла́вят Тя, Всеблага́я Влады́чице, челове́цы же на земли́ пе́сньми ублажа́я, к милосе́рдию Твоему́ припа́дают, и из глубины́ серде́ц вопию́т: Богоро́дице Де́во, сердца́ на́ша озло́бленныя очи́сти, да ве́рою и любо́вию велича́ем Тя.
Песнь 3
Ирмо́с: Не́сть свя́т, я́коже Ты́, Го́споди Бо́же мо́й, вознесы́й ро́г ве́рных Твои́х, Бла́же, и утверди́вый на́с на ка́мени испове́дания Твоего́.
Преподо́бнии отцы́ на́ша Афана́сие и Феодо́сие, моли́те Бо́га о нас.
Но́ву песнь Вседержи́телю воспои́м, лю́дие, ди́вно просла́вльшему богоно́сных отце́в на́ших Афана́сия и Феодо́сия, и с ве́рою и любо́вью Ему́ поклони́мся, да поми́лует и спасе́т нас, гре́шных, тех моли́твами.
Преподо́бнии отцы́ на́ша Афана́сие и Феодо́сие, моли́те Бо́га о нас.
А́ще и лю́ти бы́ша вра́жия ополче́ния, в годи́ну сму́тную оби́тель Воскресе́ния Христо́ва разори́вшии, и́ноков мече́м посе́кшии, вся кни́ги о вас огню́ преда́вшии, но сим сла́вы ва́шей не ума́лившии, ибо «па́мять пра́ведника пребу́дет благослове́нна».
Сла́ва Отцу́ и Сы́ну, и Свято́му Ду́ху.
Смире́нием и любо́вию зло и кова́рство ми́ра сего́ победи́ли есте́, благода́ть от Бо́га прия́ли есте́, е́же отгоня́ти неду́ги и содева́ти чудеса́, отцы́ всехва́льнии.
И ны́не, и при́сно и во ве́ки веко́в. Ами́нь.
Исто́чник исцеле́ний, Ма́ти Бо́жия Пречи́стая, сердца́ на́ша себялюби́выя уврачу́й, горды́ню низложи́, да Тя просла́вим во вся ве́ки.
Ектения.
Седа́лен, глас 2.
О, дво́ице богоблаже́нная, преподо́бнии Афана́сие и Феодо́сие, от ю́ности ва́шея крест Христо́в на ра́мена взе́мшии, и усе́рдно за Ним после́довавшии, Пресвято́й Тро́ице до́бре потруди́лися есте́, Чере́повскую па́ству пресла́вно упасли́ есте́, любо́вь оте́ческую всем притека́ющим явля́я. Не преста́йте, ди́внии чудотво́рцы, хода́тайствовати о нас, ве́рою чту́щих па́мять ва́шу.
Сла́ва Отцу́ и Сы́ну, и Свято́му Ду́ху, и ны́не и при́сно и во ве́ки веко́в. Ами́нь.
Богоро́дичен: «О, Пречи́стая Богоро́дице Де́во, Покро́ва Твоего́ не отыми́ от нас, но бу́ди нам Ма́ти и Засту́пнице», - усе́рдно мо́лят Тя уго́дницы Христа́, Сы́на Твоего́, преподобный Афанасий купно с Феодосием, Чере́повские чудотво́рцы, и́хже моли́твами поми́луй и спаси́ нас.
Песнь 4
Ирмо́с: Христо́с моя́ си́ла, Бо́г и Госпо́дь, честна́я Це́рковь боголе́пно пое́т, взыва́ющи от смы́сла чи́ста, о Го́споде пра́зднующи.
Преподо́бнии отцы́ на́ша Афана́сие и Феодо́сие, моли́те Бо́га о нас.
Егда́ в Чере́повсиоби́тель Святы́я Тро́ицы и Воскресе́ния Христо́ва основа́ли есте́, терпе́нием и упова́нием на Бо́га вся ско́рби побежда́я, тогда́ ми́ру сла́ву Бо́жию яви́ли есте́, преди́внии чудотво́рцы.
Преподо́бнии отцы́ на́ша Афана́сие и Феодо́сие, моли́те Бо́га о нас.
Из гнезда́ а́ввы Се́ргия, я́ко два птенца́ возлете́в, на брега́х Шексны́ себе́ но́вое приста́нище обрето́сте, мно́зи ду́ши ко Христу́ привели́ есте́, отцы́ богому́дрии, во вся дни славосло́вя Всеблаго́го Бо́га.
Сла́ва Отцу́ и Сы́ну, и Свято́му Ду́ху.
Фаво́р яви нам свет Преображе́ния Госпо́дня, и то́йже свет возсия́ с горы́ о́гненней, егда́, на ме́лкое ме́сто впа́дша, взыва́ ко Влады́це всех оте́ц наш Феодо́сий, досточу́дный.
И ны́не, и при́сно и во ве́ки веко́в. Ами́нь.
Емману́ила яви́лася еси, Ма́ти, Де́во Чи́стая, Всеми́лостивая христиа́н Помо́щнице, Того́ умоли́ в день Стра́шнаго Суда́ всех нас Ца́рствия Небе́снаго сподо́бити.
Пе́снь 5.
Ирмо́с: Бо́жиим све́том Твои́м, Бла́же, у́тренюющих Ти́ ду́ши любо́вию озари́, молю́ся, Тя́ ве́дети, Сло́ве Бо́жий, и́стиннаго Бо́га, от мра́ка грехо́внаго взыва́юща.
Преподо́бнии отцы́ на́ша Афана́сие и Феодо́сие, моли́те Бо́га о нас.
О Христе́ укрепля́емии, вся се́ти лука́ваго меча́ми поста́ и моли́твы посекли́ есте́, преблаже́ннии, Бо́гу Еди́ному во вся дни служа́ и о Воскресе́нии Христа́ ликовствуя.
Преподо́бнии отцы́ на́ша Афана́сие и Феодо́сие, моли́те Бо́га о нас.
Духо́вныя жи́зни лю́дем земли́ Чере́повской учи́тельми до́брыми бы́ли есте́, всех притека́ющих к вам в ве́ре правосла́вней утвержда́я. Умно́жите ве́ру и в нас, ча́дех ва́ших, да сла́вим Христа́ во ве́ки.
Сла́ва Отцу́ и Сы́ну, и Свято́му Ду́ху.
Отве́рз вам две́ри ра́йския Христо́с, всели́л есть о́бщников Свои́х страсте́й во оби́тели небе́сныя. Ему́же ны́не предстоя́щи, блаже́ннаго Ца́рствия прича́стницы, нас не оста́вите моли́твами свои́ми.
И ны́не, и при́сно и во ве́ки веко́в. Ами́нь.
Сло́во О́тчее, Спа́са на́шего, из Тебе́, Де́во Чи́стая, воплоти́вшагося, позна́в, и Тебе́ Хода́таицу и те́плую Засту́пницу на́шу ве́дая, мо́лим Тя, я́ко Ми́лостивую Ма́ти: не попусти́ ча́дом твои́м поги́бнути, и спаси́ ду́ши на́ша.
Пе́снь 6.
Ирмо́с: Жите́йское мо́ре, воздвиза́емое зря́ напа́стей бу́рею, к ти́хому приста́нищу Твоему́ прите́к, вопию́ Ти́: возведи́ от тли́ живо́т мо́й, Многоми́лостиве.
Преподо́бнии отцы́ на́ша Афана́сие и Феодо́сие, моли́те Бо́га о нас.
И́га Христо́ва бла́гость позна́в, бре́мя Его́ с любо́вию нося́, смире́ние и кро́тость стяжа́ли есте́, отцы́ преподо́бнии. Ны́не же в ра́дость Го́спода своего́ вшед, све́том боже́ственныя сла́вы наслажда́етеся, избра́нии уго́дницы Бо́жии.
Преподо́бнии отцы́ на́ша Афана́сие и Феодо́сие, моли́те Бо́га о нас.
Ева́нгелию своя́ сердца́ покори́в, вся сла́вная ми́ра сего́ в прах вмени́в, про́тиву страсте́й, я́ко супроти́в враг Христо́вых, му́жественно подвиза́лися есте́, венце́в небе́сных сподо́бистеся, отцы́ пресла́внии.
Сла́ва Отцу́ и Сы́ну, и Свято́му Ду́ху.
Моли́твы Иису́совой усе́рднии де́лателие, равноа́нгельнаго жития́ ревни́телие, пусты́ню соде́лавшии в храм Бо́гу, та́ко и нам покая́нием очиститися помози́те, да ца́рствует Госпо́дь в сердца́х на́ших.
И ны́не, и при́сно и во ве́ки веко́в. Ами́нь.
От уз страсте́й, Влады́чице, нас свободи́, и го́рдых помышле́ний, отчужда́ющих от Бо́га, изба́ви, да ве́рою и любо́вию ублажа́ем Тя.
Ектения.
Конда́к, глас 3.
Несть брань на́ша к пло́ти и кро́ве, но к духово́м зло́бы поднебе́сным, си́це апо́стольски взыва́ли есте́, преподо́бнии, темже от ми́ра су́етнаго укло́ньшеся, в пусты́ни пожи́ли есте́, и А́нгелом соревни́тели яви́стеся и де́монския ополче́ния препобеди́сте. Си́це и ны́не по нам поборите, огражда́юще ны от наве́тов и ко́зней бесо́вских, да и мы, собра́вшеся в па́мяти ва́шей, помина́юще по́двиги ва́ша, умиле́нно воззове́м: я́ко предста́телие те́плии, от бед изба́вите нас, Афана́сие и Феодо́сие пречу́днии.
И́кос.
Иму́ще еди́но токмораче́ние, е́же Христу́ Бо́гу угоди́ти, ве́рно и усе́рдно Ему́ служи́ти, Афана́сие и Феодо́сие, на зов Госпо́день ра́достно во оби́тель Святы́я Тро́ицы притекли́ есте́, и та́мо от рук а́ввы Се́ргия постриже́ние прия́вши, на стезю́ мона́шескаго жития́ вступи́ли есте́. До́бре же Го́сподеви послужи́вши, венце́в небе́сных сподо́билися есте́. Ны́не же ко спасе́нию упра́вите и нас, с любо́вью пою́щих вам:
Ра́дуйтеся, непреста́нно пред лице́м Святы́я Тро́ицы предстоя́щии.
Ра́дуйтеся, о́бразом своего́ жития́ умы́ на́ша к го́рнему ми́ру возводя́щии.
Ра́дуйтеся, су́етную му́дрость ве́ка сего́ посрамля́ющии.
Ра́дуйтеся, ослепле́нных мра́ком греха́ на путь пра́вый наставля́ющии.
Ра́дуйтеся, собесе́дницы молча́ния взыску́ющих.
Ра́дуйтеся, ли́ры, веселя́щии сердца́ тоску́ющих.
Ра́дуйтеся, чи́стые исто́чницы, душ на́ших исцеле́ние.
Ра́дуйтеся, си́лы Бо́жией ди́вное явле́ние.
Ра́дуйтеся, преподо́бнии Афана́сие и Феодо́сие, усе́рднии моли́твенницы на́ша и пресла́внии чудотво́рцы.
Пе́снь 7.
Ирмо́с: Росода́тельну у́бо пе́щь соде́ла А́́нгел преподо́бным отроко́м, халде́и же опаля́ющее веле́ние Бо́жие, мучи́теля увеща́ вопи́ти: благослове́н еси́, Бо́же оте́ц на́ших.
Преподо́бнии отцы́ на́ша Афана́сие и Феодо́сие, моли́те Бо́га о нас.
Любо́вь друг ко дру́гу, есть сво́йство и́стинных ученико́в Христо́вых, рече́ апо́стол Иоа́нн. Чрез ва́ше заступле́ние и по́мощь зрим в вас ея́ негаси́мый пла́мень, вели́цыи свети́льницы, Ду́ха Свята́го испо́лненнии.
Преподо́бнии отцы́ на́ша Афана́сие и Феодо́сие, моли́те Бо́га о нас.
Изра́иль пешеше́ствовав мо́ре Чермно́е, спасе́н был от фарао́на колесни́ц, егда́ Моисе́й, кре́ст начерта́в жезло́м, пучи́ну пресече́. Сим кресто́м вооружи́вшись, одержа́ли есте́ побе́ду над лука́вым зми́ем, отцы́ святи́и.
Сла́ва Отцу́ и Сы́ну и Свято́му Ду́ху.
Тави́фой но́вой бысть земля́ Чере́повская, воскреше́нная к жи́зни но́вой отца́ми богому́дрыми, ибо кто во Христе́, сей нова́ тварь есть. Та́ко ки́йждо во оби́тель Воскресе́ния Христо́ва ко преподо́бным притека́ющий, воскре́се для ве́чнаго с Бо́гом пребыва́ния.
И ны́не, и при́сно и во ве́ки веко́в. Ами́нь.
Е́вы преслуша́нием в мир смерть вошла́ есть, Свои́м же послуша́нием Де́во Чи́стая принесе́ пото́мкам Ада́ма живо́т. Тя заступле́ние те́плое обре́тше, вопие́м приле́жно: Пресвята́я Богоро́дице, поми́луй и спаси́ нас.
Пе́снь 8.
Ирмо́с: Из пла́мене преподо́бным ро́су источи́л еси́ и пра́веднаго же́ртву водо́ю попали́л еси́: вся́ бо твори́ши, Христе́, то́кмо е́же хоте́ти. Тя́ превозно́сим во вся́ ве́ки.
Преподо́бнии отцы́ на́ша Афана́сие и Феодо́сие, моли́те Бо́га о нас.
Блаже́нство обрели́ есте́ еще́ зде, на земли́ су́ще, отцы́ богому́дрии, нищету́ свою́ духо́вную позна́в, своего́ ра́зума отве́ргшись, на Еди́ного Бо́га во всем полага́яся, и́бо «блаже́ни вси, упова́ющие на Него́».
Преподо́бнии отцы́ на́ша Афана́сие и Феодо́сие, моли́те Бо́га о нас.
О́браз жития́ богоуго́дного яви́ли есте́ всем, преподо́бнии, всегда́ пра́вду Бо́жию творя́. Утверди́те и на́ши малове́рныя сердца́ на ка́мени за́поведей Христо́вых.
Сла́ва Отцу́ и Сы́ну и Свято́му Ду́ху.
Гаваони́тская ли ски́ния даде́ прему́дрость Соломо́нови? Денноно́щныя ли труды́ и моли́твы излия́ на преподо́бных Афана́сия и Феодо́сия дар чудотворе́ния? Се, Бог просла́ви свои́х уго́дников, я́ко рече́ Дави́д: «Бог благословля́ет пра́ведника, и благоволе́нием, я́ко щито́м, объе́млет его́».
И ны́не, и при́сно и во ве́ки веко́в. Ами́нь.
А́нгельское пе́ние подоба́ше Ти, Ма́ти Бо́жия, Спа́са бо родила́ еси́, Всенепоро́чная. Мы же, что Ти принесе́м, в грехо́вней бе́здне валя́яся? Сми́луйся, Влады́чице, и моли́ Сы́на Твоего́, Христа́ Бо́га на́шего, исправле́ние жития́ нам дарова́ти, и спасти́ ду́ши на́ша.
Пе́снь 9.
Ирмо́с: Бо́га челове́ком невозмо́жно ви́дети, на Него́же не сме́ют чи́ни А́нгельстии взира́ти; Тобо́ю же, Всечи́стая, яви́ся челове́ком Сло́во Воплоще́нно, Его́же велича́юще, с небе́сными во́и Тя́ ублажа́ем.
Преподо́бнии отцы́ на́ша Афана́сие и Феодо́сие, моли́те Бо́га о нас.
Отцы́ преподо́бнии, ди́внии чудотво́рцы, своя́ моли́твы те́плии, я́ко кади́ло благоуха́нное, вознеси́те ко Го́споду о всех, чту́щих святу́ю па́мять ва́шу, и свои́м оте́ческим заступле́нием от вся́ких бед и скорбе́й огради́те всех, с ве́рою к вам прибега́ющих.
Преподо́бнии отцы́ на́ша Афана́сие и Феодо́сие, моли́те Бо́га о нас.
Не откры́ша не́дра земна́я сокро́вище моще́й ва́ших, под спу́дом в собо́рнем хра́ме почива́ющих, оба́че вы моли́твами свои́ми нас вразумля́ете, на стезю́ спасе́ния наставля́я, да и мы небе́снаго весе́лия прича́стницы бу́дем.
Сла́ва Отцу́ и Сы́ну и Свято́му Ду́ху.
Адама́нты христиа́нския ве́ры, столпи́ непоколеби́мии Це́ркви Ру́сския, мо́лим вас, све́точи на́ша, ча́дам свои́м помози́те тве́рдо в правосла́вной ве́ре стоя́ти, сердца́ от страсте́й очища́ти, подражательми себе́ соде́лайте всех, ве́рою ва́с ублажа́ющих.
И ны́не, и при́сно и во ве́ки веко́в. Ами́нь.
Спа́са и Влады́ку всех ро́ждшая, Пречи́стая Богоро́дице Де́во, спасе́ния Хода́таица нам яви́лася еси́; тем же мо́лим Тя: испроси́ у Сы́на Своего́, Христа́ Бо́га, спасе́ние душа́м на́шим.
Свети́лен, глас 1:
Днесь све́тло ра́дуется Це́рковь Ру́сская,/ почита́юще пречестну́ю па́мять ва́шу,/ Афана́сие и Феодо́сие блаже́ннии,/ ми́ру о́браз ве́ры и благоче́стия показа́вшии./ О вели́цыи свети́льницы, Ду́ха Свята́го испо́лненнии,/ омраче́нныя мглой грехо́в ду́ши на́ши просвети́те,/ ше́ствовати путе́м Христо́вым помози́те,// да ва́шими моли́твами спасе́м ду́ши на́ша.
Сла́ва, и ны́не, Богоро́дичен, глас 1:
Тя, Хода́таицу на́шего спасе́ния,/ воспева́ем Богоро́дице, Дево Пречи́стая,/ Сы́на Бо́жия, Христа́ Бо́га на́шего/ пло́тию безсе́менно рождшая,/ Того́ моли́, Всеблаже́нная Влады́чице,// поми́ловатися душа́м на́шим.
На хвали́тех стихи́ры, глас 6:
Доброде́телей свети́льницы неугаси́мии,/ о́бразы и́стиннаго покая́ния,/ кро́тости и смиренному́дрия до́брии учи́телие,/ земли́ Черепове́цкия украше́ние и сла́во,/ ны́не ра́йским житие́м наслажда́яся,/ отцы́ богому́дрии,// не преста́йте моли́тися о спасе́нии душ на́ших.
Приспе́ днесь всечестны́й пра́здник Це́ркви Ру́сския,/ па́мять преподо́бных Афана́сия и Феодо́сия./ Прииди́те, лю́дие, све́тло торжеству́ем,/ и отце́в богому́дрых пе́сньми почти́м:/ ра́дуйтеся, Бо́га от все́я души́ возлюби́вшии,/ ра́дуйтеся, Христа́ ра́ди всем себе́ порабо́тившии,// ра́дуйтеся, усе́рднии моли́твенницы на́ша и пресла́внии чудотво́рцы.
Попече́ния вся о земно́м отложше,/ крест Христо́в на ра́мена взе́мши,/ усе́рдно Тому́ после́довали есте́./ Посто́м, труда́ми и моли́твами Бо́гу угоди́вше,/ венце́в сла́вы Небе́сней сподо́бистеся./ Сего́ ра́ди моли́теся, отцы́ всехва́льнии,// и нам прича́стником Ца́рствия Бо́жия бы́ти.
Кро́тости и воздержа́ния при́снии рачи́телие,/ пла́меня любве́ ко Го́споду в сердца́х неусы́пнии храни́телие,/ духо́внии ко́рмчии, от потопле́ния в мо́ре страсте́й нас избавля́ете,/ к ти́хому приста́нищу нас наставля́ете,// моляся непреста́нно о душа́х на́ших.
Слава, глас 8:
Прииди́те, благоче́стия ревни́телие,/ пе́сньми восхва́лим честну́ю дво́ицу,/ отце́в на́ших Афана́сия и Феодо́сия,/ первонача́льников оби́тели Воскресе́ния Христо́ва,/ ско́рых засту́пников оби́женым и те́плых уте́шителей уныва́ющим./ Свои́ми моли́твами спосо́бствуйте чти́ти вас/ не то́кмо сло́вом, но труда́м ва́шим после́дованием,// отцы́ богому́дрии.
И ны́не, Богоро́дичен:
Влады́чице, приими́ моли́твы раб Твои́х/ и изба́ви нас/ от вся́кия ну́жды и печа́ли.
Славословие великое. Ектении и отпуст.
НА ЛИТУРГИ́И
Блаже́нны от кано́на пе́сни 3-я и 6-я.
Проки́мен, глас 7: Честна́ пред Го́сподем / смерть преподо́бных Его́.
Стих: Что возда́м Го́сподеви о всех, я́же воздаде́ ми?
Апо́стол к Гала́том, зача́ло 213.
Аллилуия, глас 6: Блаже́н муж, боя́йся Го́спода, в за́поведех Его́ восхо́щет зело́.
Стих: Си́льно на земли́ бу́дет се́мя его́.
Ева́нгелие от Луки́, зача́ло 24.
Прича́стен: В па́мять ве́чную бу́дет пра́ведник, от слу́ха зла не убои́тся.
МОЛИ́ТВЫ
преподо́бным Афана́сию и Феодо́сию Черепове́цким
Моли́тва пе́рвая преподо́бным Афана́сию и Феодо́сию Черепове́цким
О, богоблаже́нная дво́ице, вели́цыи и пресла́внии чудотво́рцы, преподо́бнии отцы́ на́ша Афана́сие и Феодо́сие! О, го́рлицы пустыннолю́бныя, возлете́вшия от гнезда́ вели́кого а́ввы земли́ Ру́сския, преподо́бнаго и богоно́снаго отца́ на́шего Се́ргия! Се ны́не мы, гре́шнии, собра́ннии в день земна́го ва́шего торжества́, лобыза́юще о́браз ваш честны́й, усе́рдно мо́лим вас, я́ко те́плых предста́телей на́ших пред Го́сподем: во мно́гих ско́рбех и искуше́ниих терпе́ние ве́лие показа́вшия, да́руйте нам, немощны́м, кре́пость во обстоя́ниих жития́ на́шего; усе́рдне по́двиги ва́ша земна́я соверши́вшия, укрепи́те на́ша си́лы, во е́же не то́чию словесы́, но и де́лы за́поведи Ева́нгельския соблюсти́; сердца́ ва́ша горе́ возноси́вшия ко Го́споду, сотвори́те ны не нае́мники бы́ти, но пои́стине ча́ды Бо́жиими, в любве́ пребыва́ющими ко Отцу́ Небе́сному. Па́стыри на́ша наста́вите усе́рдными бы́ти в хране́нии ста́да Госпо́дня, ни еди́ныя же овцы́ слове́сныя погуби́ти, но вся прите́кшия ко Христу́, Первопа́стырю на́шему, до́бре пасти́ и ко Ца́рствию Небе́сному упра́вити. Прави́телей на́ших в зако́не Бо́жии утверди́те, тружда́ющимся испроси́те утеше́ние и кре́пость, да прии́мут от де́лания рук свои́х не то́кмо поле́зная к жи́зни сей вре́менней, но и возмо́гут ле́пту свою́ Бо́гови принести́. Ю́ныя уцелому́дрите, ста́рыя