В 28-й день
Преподо́бнаго отца́ на́шего Ники́ты, епи́скопа Халкидо́нскаго
НА ВЕЧЕ́РНИ
Стихи́ры преподо́бнаго Ники́ты, глас 4. Подо́бен: Я́ко до́бля:
Авраа́ма страннолю́бное/ и Исаа́ка боголю́бное,/ Иа́кова нехи́тростное подража́в,/ терпе́ние изобрази́л еси́ И́ова Авситиди́йскаго,/ и кро́тость Дави́дову,/ и Моисе́ово незло́бие,/ пома́занием святы́м,/ я́коже Ааро́н дре́вле,/ пома́зан, святи́телю Богоно́се,/ чудотво́рче свяще́нне.
Мно́гое беззло́бие твое́/ зло́бу прогна́ де́монскую/ благода́тию Боже́ственнаго Ду́ха,/ спострада́нием твои́м возвесели́в Бо́га,/ Его́же возжела́л еси́,/ моли́тв прилежа́нием просвети́ся дух твой./ Те́мже прия́л еси́ чуде́с благода́ть/ цели́ти неду́ги, Ники́то,/ благоче́стно притека́ющим к тебе́.
Сро́дством связа́еми,/ зако́ны удержа́сте Свята́го Ду́ха, свяще́нницы,/ и, стопа́м после́дующе бы́вше па́стыря Богому́драго,/ облиста́вшаго лучи́ пресла́вных исцеле́ний,/ украси́стеся подо́бными ви́ды исцеле́ний,/ пресла́вный Ники́то со Игна́тием Богому́дрым.
Стихи́ры Богоро́дицы, глас и подо́бен то́йже:
Осужде́ния изба́ви, Пресвята́я Богоневе́сто,/ и лю́тых прегреше́ний/ смире́нную мою́ ду́шу,/ и сме́рти измени́ моли́твами Твои́ми,/ и да́руй оправда́ние получи́ти в день испыта́ния,/ е́же получи́ша святы́х собо́ри,/ покая́нием очище́на мя пре́жде конца́ покажи ́/ и сле́зными излия́нии.
Ту́чами Ду́ха, Пресвята́го, Пречи́стая,/ мою́ мысль ороси́,/ Я́же ка́плю ро́ждшая, Христа́,/ неисче́тно безме́рная беззако́ния челове́ков щедро́тами измы́вшую;/ изсуши́ исто́чник страсте́й мои́х/ и пото́ка мя сподо́би пи́щи живы́я/ при́сно моли́твами Твои́ми.
Покая́ния изря́дное и спаси́тельное врачевство́,/ Я́же Бо́га ро́ждшая, Спа́са моего́,/ и слез то́ки, и часа́ по́мысл, гро́знаго и стра́шнаго,/ и Суда́ неумы́тнаго/ Ты ми да́руй избежа́ти моли́твами Твои́ми, о Де́во!/ муче́ния тре́петнаго/ и Боже́ственную улучи́ти благода́ть.
Сла́ва, и ны́не, Богоро́дичен:
Тьма́ми, Пречи́стая, обеща́хся/ покая́ние сотвори́ти о мои́х согреше́ниих,/ но не оставля́ет мя люби́мый зол мои́х обы́чай./ Сего́ ра́ди Тебе́ вопию́ и припа́даю, моля́ся:/ Ты мя, Влады́чице, изми́ такова́го мучи́тельства,/ наставля́ющи мя к лу́чшим/ и спасе́ния близ су́щим.
Крестобогоро́дичен:
На Кресте́ Тя я́ко узре́ пригвожде́на, Го́споди,/ А́гница и Ма́ти Твоя́ дивля́шеся/ и, что́ виде́ние сие́, – взыва́ше, – Сы́не возжеле́нне?/ сия́ Ти неве́рный собо́р воздаде́, беззако́нный,/ и́же мно́гих Твои́х чуде́с наслади́выйся./ Но сла́ва неизглаго́ланному соше́ствию Твоему́, Влады́ко.
Тропа́рь, глас 4:
Пра́вило ве́ры и о́браз кро́тости,/ воздержа́ния учи́теля/ яви́ тя ста́ду твоему́,/ Я́же веще́й и́стина./ Сего́ ра́ди стяжа́л еси́ смире́нием высо́кая,/ нището́ю бога́тая,/ о́тче Ники́то,/ моли́ Христа́ Бо́га/ спасти́ся душа́м на́шим.
Кано́н, глас 4.
Песнь 1
Ирмо́с: Мо́ря чермну́ю пучи́ну/ невла́жными стопа́ми/ дре́вний пешеше́ствовав Изра́иль,/ крестообра́зныма Моисе́овыма рука́ма/ Амали́кову си́лу в пусты́ни победи́л есть.
Боже́ственными светоли́тии, преподо́бне, облиста́н, светови́ден был еси́;/ ве́рно светоно́сное твое́ успе́ние творя́щия просвети́,/ страсте́й мглу отъе́мля.
Яви́лся еси́ светови́дными дея́нии, све́та испо́лнен,/ су́щия в нощи́ лю́тыя просвеща́я и к све́ту Небе́сному наставля́я Ду́хом,/ о́тче Ники́то свяще́нне.
Чуде́с облиста́еши дарова́ния/ приступа́ющим всегда́ свяще́нней твое́й ра́це,/ вме́сто трудо́в и боле́зней твои́х от Бо́га воздая́ние сие́, преблаже́нне, прие́м.
Богоро́дичен: Без се́мене О́тчею во́лею от Боже́ственнаго Ду́ха Бо́жия зачала́ еси́ Сы́на/ и пло́тию родила́ еси́ из Отца́ без ма́тере,/ нас же ра́ди из Тебе́ без отца́ бы́вша.
Песнь 3
Ирмо́с: Весели́тся о Тебе́ Це́рковь Твоя́, Христе́, зову́щи:/ Ты моя́ кре́пость, Го́споди,/ и прибе́жище, и утвержде́ние.
Возне́слся еси́, смири́вся Христа́ ра́ди,/ и бровь, преподо́бне, мы́сленнаго зми́я Ду́хом в зе́млю смири́л еси́.
Вели́ких от Бо́га сподо́бився даро́в,/ вели́к свяще́нник был еси́, о́тче святи́телю Богоприя́тне.
Беззло́бием твою́ жизнь, я́коже младе́нец, соверша́я,/ погуби́л еси́ враго́в, преподо́бне, всю зло́бу благода́тию.
Богоро́дичен: Еди́ну в жена́х благослове́нную Богоро́дицу,/ я́ко Бо́жие селе́ние преблаголе́пно, вси ра́достию просла́вим.
Седа́лен, глас 4. Подо́бен: Ско́ро предвари́:
От младе́нства взем твой крест,/ благоче́стно Христу́ после́довал еси́,/ увяди́в плотско́е воздержа́нием мудрова́ние,/ те́мже на святи́тельств седа́лищи, Ники́то, возне́сл еси́ Влады́ку,/ зна́меньми разли́чными твою́ украси́вша ра́ку, Богоблаже́нне.
Сла́ва, и ны́не, пра́здника или́ Богоро́дичен:
Чи́стая, Всенепоро́чная и Неискусому́жная,/ Я́же еди́на Безле́тнаго Сы́на и Сло́ва Бо́жия в ле́то ро́ждши,/ Сего́ со святы́ми и честны́ми патриа́рхи, и му́ченики, и проро́ки, и преподо́бными моли́/ дарова́ти нам очище́ние и ве́лию ми́лость.
Крестобогоро́дичен:
На Кресте́ Тя возвы́шена я́ко узре́ Пречи́стая Ма́ти Твоя́, Сло́ве Бо́жий,/ ма́терски рыда́ющи, веща́ше:/ что́ но́вое и стра́нное сие́ чу́до, Сы́не Мой?/ Ка́ко, Жизнь всех, вкуша́еши сме́рти,/ оживи́ти ме́ртвыя хотя́, я́ко Милосе́рд?
Песнь 4
Ирмо́с: Вознесе́на Тя ви́девши Це́рковь на Кресте́,/ Со́лнце пра́ведное,/ ста в чи́не свое́м,/ досто́йно взыва́ющи:/ сла́ва си́ле Твое́й, Го́споди.
Всено́щными бде́нии и вседне́вными, о́тче Богому́дре, стоя́нии,/ пло́ти движе́ния вся увяди́л еси́ и, ра́дуяся, взыва́л еси́:/ сла́ва си́ле Твое́й, Го́споди.
Повину́л еси́ непоко́рное пло́ти твоея́ душе́вными си́лами, Богому́дре,/ прия́л еси́ благода́ть, всеблаже́нне, отгоня́ти ду́хи и очища́ти неду́ги.
Си́лою Боже́ственною укрепля́емь, святи́телю,/ де́монския полки́ победи́л еси́ вся,/ побе́ды, я́ко тезоимени́т, вене́ц чуде́с от Венцеда́вца насле́дил еси́.
Богоро́дичен: Украси́лася еси́ духо́вными красота́ми,/ Отцу́ Собезнача́льнаго Сло́ва заче́нши и пло́тию ро́ждши, Де́во Всенепоро́чная,/ Его́же о ми́ре моли́.
Песнь 5
Ирмо́с: Ты, Го́споди, мой Свет,/ в мир прише́л еси́,/ Свет Святы́й, обраща́яй из мра́чна неве́дения/ ве́рою воспева́ющия Тя.
Кро́тостию я́ве души́ украша́емь,/ всели́лся еси́, святи́телю, в зе́млю кро́тких, блаже́н быв.
Струя́ми, о́тче, напои́вся дарова́ний Ду́ха,/ целе́ния жела́ющим источа́еши, Ники́то Богому́дре свяще́нне.
Житие́ твое́, све́том доброде́телей сия́я,/ я́коже многоце́ннаго у́тварию, чуде́с благода́тию, всеблаже́нне, украси́ся.
Богоро́дичен: Тя ору́жие непобеди́мое на враги́ предлага́ем,/ Тя утвержде́ние и наде́жду на́шего спасе́ния, Богоневе́сто, стяжа́хом.
Песнь 6
Ирмо́с: Пожру́ Ти со гла́сом хвале́ния, Го́споди,/ Це́рковь вопие́т Ти,/ от бесо́вския кро́ве очи́щшися/ ра́ди ми́лости от ребр Твои́х/ исте́кшею Кро́вию.
Свеща́ светоза́рная тро́ичная возсия́ла есть,/ со Игна́тием Ники́та, свяще́нное самобра́тство,/ и подаю́т исцеле́ния ве́рным, све́тло блиста́юще.
Друг дру́гу по пло́ти му́дрии сро́дствующе,/ и́стиннаго по Духу́ сро́дства ны́не сподо́бистася, единонра́вно,/ и Бо́гу благоуго́дно пожи́вша.
Губи́тельныя отбе́г ересе́й ти́ны честны́м поклоне́нием Христо́вы ико́ны,/ е́же по о́бразу спасл еси́, святи́телю Ники́то Богоприя́тне.
Богоро́дичен: Дверь, е́юже про́йде еди́н Вы́шний,/ покая́ния ми две́ри и вхо́ды отве́рзи спасе́ния,/ от вся́каго мя соблюда́ющи вре́да, Всенепоро́чная.
Конда́к, глас 8. Подо́бен: Возбра́нной:
Све́тлостию дел твои́х просия́л еси́, преподо́бне,/ апо́стольскаго престо́ла насле́дник был еси́, Ники́то,/ и, я́ко со́лнце, облиста́л еси́ твое́й па́стве, о́тче,/ вся Боже́ственных уче́ний непо́лнь./ Те́мже зове́м ти:/ ра́дуйся, Халкидо́ну удобре́ние.
Песнь 7
Ирмо́с: В пещи́ авраа́мстии о́троцы перси́дстей,/ любо́вию благоче́стия па́че,/ не́жели пла́менем, опаля́еми, взыва́ху:/ благослове́н еси́ в хра́ме сла́вы Твоея́, Го́споди.
Со святи́тели водворя́ешися вои́стинну, о́тче му́дре,/ сия́ния мы́сленнаго исполня́емь,/ и нас озари́, взыва́ющия:/ благослове́н еси́ в хра́ме сла́вы Твоея́, Го́споди.
Я́ко пастыренача́льник, я́ко Бо́жий предста́тель непоро́чен,/ Сему́ чи́сты же́ртвы, све́тло воспева́я, прине́сл еси́:/ благослове́н еси́ в хра́ме сла́вы Твоея́, Го́споди.
Па́стырь показа́лся еси́,/ слове́сною, Ники́то, цевни́цею ста́до слове́сное к па́жити и́стинных уче́ний призыва́я,/ благослове́н еси́, – вопия́, – в хра́ме сла́вы Твоея́, Го́споди.
Испове́данием житие́ украси́в, о́тче,/ целе́ний благода́ть и́стинную от Ду́ха прия́л еси́,/ благослове́н еси́, Бо́же мой, – вопия́, – в хра́ме сла́вы Твоея́, Го́споди.
Богоро́дичен: Да обожи́т челове́чество яви́ся Челове́к, Отрокови́це,/ из чре́ва Твоего́ плоть Изба́витель заимова́в хоте́нием./ Благослове́нна Ты в жена́х, Пренепоро́чная Влады́чице.
Песнь 8
Ирмо́с: Ру́це распросте́р, Дании́л/ львов зия́ния в ро́ве затче́,/ о́гненную же си́лу угаси́ша,/ доброде́телию препоя́савшеся,/ благоче́стия рачи́тели о́троцы, взыва́юще:/ благослови́те, вся дела́ Госпо́дня, Го́спода.
Вели́ких трудо́в воздая́ния я́ве прии́м: свет неизглаго́ланный,/ жизнь безсме́ртную, преподо́бне, и черто́г неразори́мый,/ Венцеда́вцу твоему́ Христу́ вопие́ши, ра́дуяся:/ благослови́те, вся дела́ Госпо́дня, Го́спода.
Ми́лостию ми́лости ища́, ни́щия удово́лил еси́,/ убо́гия напита́л еси́, наги́я оде́ял еси́,/ сла́вы себе́ оде́жду притворя́я,/ мона́шествующих о́браз, Ники́то, был еси́, вопию́щих:/ благослови́те, вся дела́ Госпо́дня, Го́спода.
Це́рковь быв прекра́сна Боже́ственнаго Ду́ха ума́ чистото́ю,/ отгоня́еши ду́хи лука́вствия и неду́ги очища́еши,/ приходя́щим к тебе́ и вопию́щим:/ благослови́те, вся дела́ Госпо́дня, Го́спода.
Моги́й вся о Христе́, и ны́не ясне́йши и чисте́йши Бо́гу соединя́яся,/ предста́ни, его́же стяжа́л еси́, ста́ду, преподо́бне,/ творя́щему твое́ ве́рно Боже́ственное успе́ние и вопию́щу:/ благослови́те, вся дела́ Госпо́дня, Го́спода.
Богоро́дичен: Все́лься во Твое́ чре́во, Христо́с,/ вся́ческих Госпо́дь, я́коже изво́ли,/ святе́йшу Тя показа́ А́нгел, Ма́ти Де́во,/ освяще́ние и просвеще́ние нам дарова́, вопию́щим:/ благослови́те, вся дела́ Госпо́дня, Го́спода.
Песнь 9
Ирмо́с: Ка́мень нерукосе́чный/ от несеко́мыя горы́, Тебе́, Де́во,/ краеуго́льный отсече́ся,/ Христо́с, совокупи́вый разстоя́щаяся естества́,/ тем, веселя́щеся, Тя, Богоро́дице, велича́ем.
Свещенноле́пно после́дуя твоему́ тезоимени́тому и Боже́ственному,/ сего́ сподо́бился еси́ о́бразом, Ники́то, о́тче Богоблаже́нне,/ и заре́ю Ду́ха благода́тною обогати́лся еси́, Богодохнове́нне.
Яви́стеся, Тро́йескою благода́тию обога́щшеся, Богоно́сцы,/ ра́вно от нея́ прие́мше исцеле́ний Боже́ственное де́йство/ и чи́сто пожи́вше и богоуго́дно, досточу́днии.
Днесь па́мять твоя́, о́тче, па́че со́лнца блиста́ет сия́нием доброде́телей,/ чудесы́ вселе́нную озаря́ющи и ве́рныя уясня́ющи/ священнотаи́нниче всече́стне.
Я́коже денносве́тлыя зве́зды, о́тче Ники́то,/ со священноде́йственным Игна́тием я́вльшеся,/ вся у́бо просвети́те, благочести́вии и блаже́ннии,/ восхваля́ющия вас всегда́.
Богоро́дичен: Све́та жили́ще яви́лася еси́,/ от Отца́ пре́жде денни́цы Сло́ву возсия́вшаго,/ Отрокови́це Де́во, еди́на Богора́дованная,/ и ве́рныя просве́щшаго, и преподо́бныя венча́вшаго.
Преподобный Никита Исповедник
Преподобный Никита Исповедник жил во второй половине VIII века. За свою святую и добродетельную жизнь он был возведен в сан епископа Халкидонского. Святитель Никита отличался милосердием, всегда помогал нищим, принимал в своем доме странников, заботился о сиротах и вдовах, заступался за обижаемых. В царствование иконоборца Льва Армянина (813–820) святитель Никита мужественно обличал иконоборческую ересь и убеждал своих пасомых благоговейно поклоняться святым иконам Господа Иисуса Христа, Божией Матери и угодников Божиих. За свое исповедничество святитель перенес много страданий от нечестивого императора и его единомышленников-иконоборцев, был подвергнут мучениям и отправлен в ссылку. После смерти императора святой Никита возвратился на святительскую кафедру.
Скончался святой Никита Исповедник в начале IX века. У мощей, которые находились в Халкидоне, совершались чудесные исцеления и другие различные знамения. «Знаменьми различными твою украсивша раку, богоблаженне, целение желающим источавши», – свидетельствует об этом богослужебный текст. В каноне службы святителю, написанном константинопольским пресвитером и песнописцем Иосифом, прославляется также брат святителя Никиты? святой Игнатий.