В изложении монаха Авдия Гречанина для келейного (домашнего) чтения
Ведомо буди! Перед началом всякого келейного (домашнего молитвенного чтения) правила и по окончании его кладётся седмипоклонный начал.
Бо́же, ми́лостив бу́ди мне гре́шному († с поклоном) [1] .
Бо́же, очи́сти мя гре́шнаго и поми́луй мя († с поклоном).
Созда́вый мя, Го́споди, поми́луй мя († с поклоном).
Без числа́ согреши́х, Го́споди, прости́ мя († с поклоном).
Влады́чице моя, Пресвята́я Богоро́дице, спаси́ мя гре́шнаго († с поклоном).
А́нгеле, храни́телю мой святы́й, от вся́кого зла сохрани́ мя († с поклоном).
Все́ святи́и, моли́те Бо́га о мне ((† с поклоном).
И молитву сию:
Бо́же, очи́сти мя гре́шнаго, я́ко николи́же бла́го сотвори́х пред Тобо́ю († и великий поклон) [2] , но изба́ви мя от лука́ваго, и да бу́дет во мне во́ля Твоя́ († и великий поклон), да неосужде́нно отве́рзу уста́ моя́ недосто́йная, и восхвалю́ и́мя Твое́ свято́е, Отца́, и Сы́на, и Свята́го Ду́ха, ны́не, и при́сно, и во ве́ки веко́в, ами́нь († и великий поклон).
Та́же, возже́гши свещу́, закади́в лада́н и осени́в себя́ Крестом, отло́жша все свои́ зе́мстии по́мыслы и дела́ со умиле́нием серде́чным глаголи сицева́я:
Во сла́ву Святы́я, Единосу́щныя и Нераздели́мыя Тро́ицы, Отца́, и Сы́на, и Свята́го Духа́, ами́нь (†)
Моли́твами Богоро́дицы и святы́х оте́ц на́ших, Го́споди Иису́се Христе́ Бо́же наш, поми́луй нас. Аминь (†).
Сла́ва Тебе́, Бо́же наш, сла́ва Тебе́ (†).
Молитва Святому Духу [3]
Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша (†).
Трисвятое [4]
Святы́й Бо́же, Святы́й Кре́пкий, Святы́й Безсме́ртный, поми́луй нас (3).
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь († и поклон).
Молитва Пресвятой Троице
(†) Пресвята́я Тро́ице, поми́луй нас; (†) Го́споди, очи́сти грехи́ на́ша; (†) Влады́ко, прости́ беззако́ния на́ша; (†) Святы́й, посети́ и исцели́ не́мощи на́ша, (†) и́мене Твоего́ ра́ди. (Поклон малый)
Го́споди, поми́луй (3).
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь († и поклон).
Молитва Господня
(†) О́тче наш, И́же еси́ на небесе́х Да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго. (Поклон малый)
Я́ко Твое́ есть Ца́рство и си́ла и сла́ва во веки. Аминь (†).
И тро́пари сея́ [5] :
Гла́с 4: Поми́луй нас, Го́споди, поми́луй нас; вся́каго бо отве́та недоуме́юще, сию́ Ти моли́тву я́ко Влады́це, гре́шнии прино́сим: поми́луй нас (†).
Сла́ва Отцу́ и Сы́ну и Свято́му Ду́ху.
Го́споди, поми́луй нас, на Тя бо упова́хом; не прогне́вайся на ны зело́, ниже́ помяни́ беззако́ний на́ших, но при́зри и ны́не я́ко благоутро́бен, и изба́ви ны от враг на́ших; Ты бо еси́ Бог наш, и мы лю́дие Твои́, вси дела́ руку́ Твое́ю, и и́мя Твое́ призыва́ем (†).
И ны́не и при́сно и во ве́ки веко́в. Ами́нь.
Богоро́дичен: Милосе́рдия две́ри отве́рзи нам, благослове́нная Богоро́дице, наде́ющиися на Тя да не поги́бнем, но да изба́вимся Тобо́ю от бед: Ты бо еси́ спасе́ние ро́да христиа́нскаго (†).
Го́споди, поми́луй (12).
И а́бие глаго́ли исповеда́ние ве́ры, си́речь:
Символ Веры
1 Ве́рую во еди́наго Бо́га Отца́ Вседержи́теля, Творца́ не́бу и земли́, ви́димым же всем и неви́димым (†).
2 И во еди́наго Го́спода Иису́са Христа́, Сы́на Бо́жия, Единоро́днаго, И́же от Отца́ рожде́ннаго пре́жде всех век (†).
3 Све́та от Све́та, Бо́га и́стинна от Бо́га и́стинна, рожде́нна, несотворе́нна, единосу́щна Отцу́, И́мже вся бы́ша (†).
4 Нас ра́ди челове́к и на́шего ра́ди спасе́ния сше́дшаго с небе́с и воплоти́вшагося от Ду́ха Свя́та и Мари́и Де́вы и вочелове́чшася (†).
5 Распя́таго же за ны при Понти́йстем Пила́те, и страда́вша, и погребе́нна (†).
6 И воскре́сшаго в тре́тий день по Писа́нием (†).
7 И возше́дшаго на Небеса́, и седя́ща одесну́ю Отца́ (†).
8 И па́ки гряду́щаго со сла́вою суди́ти живы́м и ме́ртвым, Его́же Ца́рствию не бу́дет конца́ (†).
9 И в Ду́ха Свята́го, Го́спода, Животворя́щаго, И́же от Отца́ исходя́щаго, И́же со Отце́м и Сы́ном спокланя́ема и ссла́вима, глаго́лавшаго проро́ки (†).
10 Во еди́ну Святу́ю, Собо́рную и Апо́стольскую Це́рковь (†).
11 Испове́дую еди́но креще́ние во оставле́ние грехо́в (†).
12 Ча́ю воскресе́ния ме́ртвых, и жи́зни бу́дущаго ве́ка. Ами́нь (†).
И сти́хиры новому́чеников, глас 5. Подо́бен: Ра́дуйся…:
Ра́дуйтеся, новому́ченицы и испове́дницы Росси́йстии, / правосла́вных удобре́ние, / новозакла́ннии а́гнцы, / ве́ры побо́рницы и храни́телие, / хода́таи о нас к Бо́гу непосты́днии, / в ле́та после́дняя / страда́ньми подража́телие пе́рвым му́чеником яви́стеся, / терпе́ния столпи́ непоколеби́мии, / душа́м на́шим испроси́те ве́лию ми́лость (†).
Припе́в: Святи́и новому́ченицы и испове́дницы Росси́йстии, Це́ркве на́шея похвало́ и украше́ние, услы́шите моли́тву на́шу, моля́щих вы ся и моли́те Христа Бо́га о нас (†).
Ра́дуйтеся, страстоте́рпцы сла́внии, / стопа́м после́дующе дре́вних му́ченик, / ве́ры ра́ди подвиза́стеся тве́рдо / в лю́тая времена́ земли́ на́шея / и ны́не всех подвиза́ете к сла́ве и хвале́нию Бо́га, / укре́пльшаго ва́ше немощно́е естество́ / и обогати́вшаго вас дарова́ньми Ду́ха, / во спасе́ние душ на́ших (†).
Припе́в: Святи́и новому́ченицы и испове́дницы Росси́йстии, Це́ркве на́шея похвало́ и украше́ние, услы́шите моли́тву на́шу, моля́щих вы ся и моли́те Христа Бо́га о нас (†).
И́ны стихи́ры, гла́с и подо́бен то́йже. Творе́ние святи́теля Афана́сия Ковро́вскаго: Прииди́те, Небе́снии предста́телие на́ши, к нам, / ва́шего ча́ющим ми́лостивнаго посеще́ния, / и изба́вите озло́бленныя мучи́тельскими преще́нии / лю́таго неи́стовства неве́рных, / от ни́хже, я́ко пле́нницы и на́зи, гони́ми есмы́, / от ме́ста на ме́сто ча́сто преходя́ще / и заблужда́юще в верте́пех и гора́х. / Уще́дрите у́бо, прехва́льнии, / и да́руйте нам осла́бу, / утоли́те бу́рю / и угаси́те е́же на ны негодова́ние, / Бо́га моля́ще, / подаю́щаго ва́ми земли́ на́шей ве́лию ми́лость (†).
Припе́в: Святи́и новому́ченицы и испове́дницы Росси́йстии, Це́ркве на́шея похвало́ и украше́ние, услы́шите моли́тву на́шу, моля́щих вы ся и моли́те Христа Бо́га о нас (†).
И́ны стихи́ры новому́чеников, гла́с 6. Подо́бен: Все́ отло́жше…: Святи́телю о́тче Ти́хоне, / архипа́стырю многострада́льне, / ты в годи́ну лю́тых безбо́жных гоне́ний / ве́рная ча́да Це́ркве Росси́йския, / утеша́я, призыва́л еси́ / за Христа́ и ве́ру Правосла́вную му́жественне стоя́ти, / сам же, по вся дни умира́я за па́ству твою́, / испове́дник непоколеби́мый яви́лся еси́. / Сего́ ра́ди тя с любо́вию прославля́ем (†).
Припе́в: Святи́и новому́ченицы и испове́дницы Росси́йстии, Це́ркве на́шея похвало́ и украше́ние, услы́шите моли́тву на́шу, моля́щих вы ся и моли́те Христа Бо́га о нас (†).
Па́стырю и́стинный, / священному́чениче Влади́мире, / егда́ беззако́ннии понужда́ху тя / Це́ркве Росси́йский отступи́ти, / ве́рен де́лом и сло́вом / святи́телю Ти́хону пребы́л еси́ / и я́ко свяще́нная же́ртва от Ки́ева, ма́тере гра́дов ру́сских, / Бо́гу прине́слся еси́, / моля́ся о убива́ющих тя. / Сего́ ра́ди тя усе́рдно прославля́ем (†).
Припе́в: Святи́и новому́ченицы и испове́дницы Росси́йстии, Це́ркве на́шея похвало́ и украше́ние, услы́шите моли́тву на́шу, моля́щих вы ся и моли́те Христа Бо́га о нас (†).
Священному́чениче Вениами́не, / Це́ркве Христо́вы и́стинный сы́не / и благостоя́ния ея́ усе́рдный ревни́телю, / проти́ву лжепа́стырей, тща́щихся расхи́тити ста́до твое́, / му́жественне стал еси́ / и, не убоя́вся преще́ний и лжесвиде́тельств мучи́телей, / обрати́л еси́ суд на главу́ суди́вших тя, / та́же сме́ртию твое́ю / Правосла́вие утверди́л еси́. / Сего́ ра́ди тя усе́рдно ублажа́ем (†).
Сла́ва Отцу́ и Сы́ну и Свято́му Ду́ху (†).
Новому́чеников, гла́с 5: Всевы́шний Влады́ко, / в Трои́це сла́вимый и поклоня́емый, / уще́дри ны благоприя́тными мольба́ми / но́вых му́ченик Твои́х, / пред мучи́тели дерзнове́нно испове́давших Тя / Еди́наго и́стиннаго Бо́га / и Твое́, Сы́не Бо́жий, / неизрече́нное от Ма́тере Де́вы / спаси́тельное воплоще́ние. (†).
И ны́не и при́сно и во ве́ки веко́в. Ами́нь.
Богоро́дичен догма́тик: В Чермне́м мо́ри / Неискусобра́чныя Неве́сты о́браз написа́ся иногда́: / та́мо Моисе́й, раздели́тель воды́, / зде же Гаврии́л, служи́тель чудесе́; / тогда́ глубину́ ше́ствова немо́кренно Изра́иль, / ны́не же Христа́ роди́ безсе́менно Де́ва; / мо́ре по проше́ствии Изра́илеве пребы́сть непрохо́дно, / Непоро́чная по рождестве́ Емману́илеве пребы́сть нетле́нна. / Сый и пре́жде Сый, / явле́йся я́ко Челове́к, / Бо́же, поми́луй нас (†).
Стихи́ры новому́чеников, гла́с 2. Творе́ние святи́теля Афана́сия Ковро́вскаго. Подо́бен: До́ме Евфра́фов…:
Земле́ Ру́сская, / гра́де святы́й, / украша́й твой дом, / в не́мже Боже́ственный / ве́лий сонм святы́х просла́ви (†).
Сти́х: Го́споди, Госпо́дь наш, / я́ко чу́дно и́мя Твое́ по всей земли́.
Це́рковь Ру́сская, / красу́йся и лику́й, / се бо ча́да твоя́ / Престо́лу Влады́чню / во сла́ве предстоя́т, ра́дующеся (†).
Сти́х: Святы́м, и́же суть на земли́ Его́, / удиви́ Госпо́дь вся хоте́ния Своя́ в них.
Собо́ре святы́х ру́сских, / по́лче Боже́ственный, / моли́теся ко Го́споду / о земно́м оте́честве ва́шем / и о почита́ющих вас любо́вию (†).
Сла́ва Отцу́ и Сы́ну и Свято́му Ду́ху (†).
Гла́с и подо́бен то́йже: Но́вый до́ме Евфра́фов, / уде́ле избра́нный, / Русь Свята́я, / храни́ ве́ру Правосла́вную, / в не́йже тебе́ утвержде́ние (†).
И ны́не и при́сно и во ве́ки веко́в. Ами́нь (†).
Богоро́дичен, гла́с 8. Подо́бен: О, пресла́внаго чудесе́…: О, пресла́внаго чудесе́! / Небесе́ и земли́ Цари́ца, / от святы́х сро́дников на́ших умоля́емая, / до ны́не зе́млю Ру́сскую покрыва́ет / и ли́ка Своего́ изображе́нии ми́лостивно обогаща́ет. / О Влады́чице Держа́вная! / Не преста́ни и на бу́дущее вре́мя / во утвержде́ние на Ру́си Правосла́вия / ми́лости и чудеса́ излива́ти до ве́ка. Ами́нь (†).
Та́же:
Святы́й Бо́же, Святы́й Кре́пкий, Святы́й Безсме́ртный, поми́луй нас (3).
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь († и поклон).
(†) Пресвята́я Тро́ице, поми́луй нас; (†) Го́споди, очи́сти грехи́ на́ша; (†) Влады́ко, прости́ беззако́ния на́ша; (†) Святы́й, посети́ и исцели́ не́мощи на́ша, и́мене Твоего́ ра́ди. (Поклон малый)
Го́споди, поми́луй (3).
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь († и поклон).
(†) О́тче наш, И́же еси́ на небесе́х Да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго. (Поклон малый)
Я́ко Твое́ есть Ца́рство и си́ла и сла́ва во веки. Аминь (†).
Го́споди, поми́луй (12).
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь († и поклон).
Прииди́те, поклони́мся Царе́ви на́шему Бо́гу. (Поклон)
Прииди́те, поклони́мся и припаде́м Христу́, Царе́ви на́шему Бо́гу. (Поклон)
Прииди́те, поклони́мся и припаде́м Самому́ Христу́, Царе́ви и Бо́гу на́шему. (Поклон)
Псалом 142
Псало́м Дави́ду, егда́ гоня́ше его́ Авессало́м, сы́н его́
1 Го́споди, услы́ши моли́тву мою́, внуши́ моле́ние мое́ во и́стине Твое́й, услы́ши мя в пра́вде Твое́й 2 и не вни́ди в суд с рабо́м Твои́м, я́ко не оправди́тся пред Тобо́ю всяк живы́й. 3 Яко погна́ враг ду́шу мою, смири́л есть в зе́млю живо́т мой, посади́л мя есть в те́мных, я́ко ме́ртвыя ве́ка. 4 И уны́ во мне дух мой, во мне смяте́ся се́рдце мое́. 5 Помяну́х дни дре́вния, поучи́хся во всех де́лех Твои́х, в творе́ниих руку́ Твое́ю поуча́хся. 6 Возде́х к Тебе́ ру́це мои́, душа́ моя́, я́ко земля́ безво́дная Тебе́. 7 Ско́ро услы́ши мя, Го́споди, исчезе́ дух мой, не отврати́ лица́ Твоего́ от мене́, и уподо́блюся низходя́щым в ров. 8 Слы́шану сотвори́ мне зау́тра ми́лость Твою, я́ко на Тя упова́х. Скажи́ мне, Го́споди, путь во́ньже пойду́, я́ко к Тебе́ взях ду́шу мою́. 9 Изми́ мя от враг мои́х, Го́споди, к Тебе́ прибего́х. 10 Научи́ мя твори́ти во́лю Твою́, я́ко Ты еси́ Бог мой. Дух Твой Благи́й наста́вит мя на зе́млю пра́ву. 11 И́мене Твоего́ ра́ди, Го́споди, живи́ши мя, пра́вдою Твое́ю изведе́ши от пе́чали ду́шу мою́. 12 И ми́лостию Твое́ю потреби́ши враги́ моя́ и погуби́ши вся стужа́ющыя души́ мое́й, я́ко аз раб Твой есмь.
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь († и поклон).
Аллилу́иа, аллилу́иа, аллилу́иа, сла́ва Тебе́, Бо́же (†)!
Го́споди, поми́луй (†).
Бог Госпо́дь…
Бог Госпо́дь, и яви́ся нам, благослове́н Гряды́й во И́мя Госпо́дне.
Припе́в: Бог Госпо́дь, и яви́ся нам, благослове́н Гряды́й во И́мя Госпо́дне.
Сти́х 1: Испове́дайтеся Го́сподеви, я́ко благ, я́ко в век ми́лость Его́.
Припе́в: Бог Госпо́дь, и яви́ся нам, благослове́н Гряды́й во И́мя Госпо́дне.
Сти́х 2: Обыше́дше обыдо́ша мя, и И́менем Госпо́дним противля́хся им.
Припе́в: Бог Госпо́дь, и яви́ся нам, благослове́н Гряды́й во И́мя Госпо́дне.
Сти́х 3: Не умру́, но жив бу́ду, и пове́м дела́Госпо́дня.
Припе́в: Бог Госпо́дь, и яви́ся нам, благослове́н Гряды́й во И́мя Госпо́дне.
Сти́х 4: Ка́мень, Его́же небрего́ша зи́ждущии, Сей бы́сть во главу́ у́гла, от Го́спода бысть Сей, и есть ди́вен во очесе́х на́ших.
Припе́в: Бог Госпо́дь, и яви́ся нам, благослове́н Гряды́й во И́мя Госпо́дне.
Та́же тропа́рь, гла́с 4 (2):
Днесь ра́достно лику́ет Це́рковь Ру́сская, / прославля́ющи новому́ченики и испове́дники своя́: / святи́тели и иере́и, / ца́рственныя страстоте́рпцы, / благове́рныя кня́зи и княги́ни, / преподо́бныя му́жи и жены́ / и вся правосла́вныя христиа́ны, / во дни гоне́ния безбо́жнаго / жизнь свою́ за ве́ру во Христа́ положи́вшия / и кровьми́ и́стину соблю́дшия. / Тех предста́тельством, долготерпели́ве Го́споди, / страну́ на́шу в Правосла́вии сохрани́ // до сконча́ния ве́ка (†).
И́н тропа́рь, гла́с то́йже: Цве́ти Россíйскаго лу́га духо́внаго / в годи́ну лю́тых гоне́ний ди́вно процве́тшии / новому́ченицы и испове́дницы безчи́сленнии: / святи́телие, ца́рственнии страстоте́рпцы и па́стырие, / мона́си и мирстíи, му́жие, жены́ же и де́ти, / до́брый пло́д в терпе́нии Христу́ прине́сшии, / моли́теся Ему́, я́ко насади́телю ва́шему, / да изба́вит лю́ди Своя́ от безбо́жных и злы́х, / да утвержда́ется же Це́рковь Ру́сская / кровьми́ и страда́нии ва́шими // во спасе́ние ду́ш на́ших (†).
Сла́ва Отцу́ и Сы́ну и Свято́му Ду́ху.
Конда́к, гла́с 3 (1) [6] : Днесь новому́ченицы Росси́йстии / в ри́зах бе́лых предстоя́т А́гнцу Бо́жию / и со А́нгелы пе́снь побе́дную воспева́ют Бо́гу: / благослове́ние, и сла́ва, и прему́дрость, / и хвала́, и честь, / и си́ла, и кре́пость / на́шему Бо́гу // во ве́ки веко́в. Ами́нь (†).
И ны́не и при́сно и во ве́ки веко́в. Ами́нь.
Богоро́дичен: Е́же от ве́ка утае́ное / и А́нгелом несве́домое та́инство, / Тобо́ю, Богоро́дице, су́щим на земли́ яви́ся Бог, / в несли́тном соедине́нии воплоща́ем / и, Крест во́лею нас ра́ди восприи́м, / и́мже воскреси́в первозда́ннаго, / спасе́ от сме́рти ду́ши на́ша (†).
Го́споди, поми́луй (12).
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь († и поклон).
Прииди́те, поклони́мся Царе́ви на́шему Бо́гу. (Поклон)
Прииди́те, поклони́мся и припаде́м Христу́, Царе́ви на́шему Бо́гу. (Поклон)
Прииди́те, поклони́мся и припаде́м Самому́ Христу́, Царе́ви и Бо́гу на́шему. (Поклон)
Псалом 50
¹ В коне́ц, псало́м Дави́ду, внегда́ вни́ти к нему́ Нафа́ну проро́ку, ² егда́ вни́де к Вирсави́и, жене́ Ури́еве
⁴ Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. ⁴ Наипа́че омы́й мя от беззако́ния моего́, и от греха́ моего́ очи́сти мя. ⁵ Яко беззако́ние мое́ аз зна́ю и грех мой предо мно́ю есть вы́ну. ⁶ Тебе́ Еди́ному согреши́х, и лука́вое пред Тобо́ю сотвори́х, я́ко да оправди́шися во словесе́х Твои́х и победи́ши, внегда́ суди́ти Ти. ⁷ Се бо в беззако́ниих зача́т есмь, и во гресе́х роди́ мя ма́ти моя́. ⁸ Се бо и́стину возлюби́л еси́, безве́стная и та́йная прему́дрости Твоея́ яви́л ми еси́. ⁹ Окропи́ши мя иссо́пом, и очи́щуся, омы́еши мя, и па́че сне́га убелю́ся. ¹⁰ Слу́ху моему́ да́си ра́дость и весе́лие, возра́дуются ко́сти смире́нныя. ¹¹ Отврати́ лице́ Твое́ от грех мои́х, и вся беззако́ния моя́ очи́сти. ¹² Се́рдце чи́сто сози́жди во мне, Бо́же, и дух прав обнови́ во утро́бе мое́й. ¹³ Не отве́ржи мене́ от лица́ Твоего́, и Ду́ха Твоего́ Свята́го не отыми́ от мене́. ¹⁴ Возда́ждь ми ра́дость спасе́ния Твоего́, и Ду́хом Влады́чним утверди́ мя. ¹⁵ Научу́ беззако́нныя путе́м Твои́м, и нечести́вии к Тебе́ обратя́тся. ¹⁶ Изба́ви мя от крове́й, Бо́же, Бо́же спасе́ния моего́, возра́дуется язы́к мой пра́вде Твоей. ¹⁷ Го́споди, устне́ мои́ отве́рзеши, и уста́ моя́ возвестя́т хвалу́ Твою́. ¹⁸ Яко а́ще бы восхоте́л еси́ же́ртвы, дал бых у́бо, всесожже́ния не благоволи́ши. ¹⁹ Же́ртва Бо́гу дух сокруше́н, се́рдце сокруше́нно и смире́нно Бог не уничижи́т. ²⁰ Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. ²¹ тогда́ благоволи́ши же́ртву пра́вды, возноше́ние и всесожега́емая: тогда́ возложа́т на олта́рь Твой тельцы́.
И кано́ны новому́чеников. Их два. Ирмосы́ пе́рваго кано́на по два́щи. Ирмосы́ втора́го кано́на не глаго́лем
Кано́н новому́чеников
Гла́с 6 [7] :
Песнь 1
Ирмо́с: Волно́ю морско́ю / Скры́вшаго дре́вле / гони́теля мучи́теля — / под земле́ю скры́ша спасе́нных о́троцы; / но мы, я́ко отрокови́цы, / Го́сподеви пои́м, сла́вно бо просла́вися.
Припе́в: Святи́и новому́ченицы и испове́дницы Росси́йстии, Це́ркве на́шея похвало́ и украше́ние, услы́шите ны́, моля́щихся ва́м, и мо́лите Бо́га о на́с (†).
Го́споди Бо́же мо́й, / помози́ ми́ смире́нно воспе́ти сла́ву новому́чеников и испове́дников росси́йских, / и́мже за тя́жкия страда́ния любо́вию отве́рзл еси́ две́ри небе́сныя.
Припе́в: Святи́и новому́ченицы и испове́дницы Росси́йстии, Це́ркве на́шея похвало́ и украше́ние, услы́шите ны́, моля́щихся ва́м, и мо́лите Бо́га о на́с (†).
Го́споди Бо́же на́ш, / сла́ву сию́ му́чеником от ве́ка бы́вшим дарова́вый, / я́ко мо́щи и́х се́ются во хра́мех обновле́ния на́шего ра́ди, / пода́ждь сла́ву сию́ и страстоте́рпцем но́вым, / а́ще и неве́дома су́ть ме́ста погребе́ния и́х.
Припе́в: Святи́и новому́ченицы и испове́дницы Росси́йстии, Це́ркве на́шея похвало́ и украше́ние, услы́шите ны́, моля́щихся ва́м, и мо́лите Бо́га о на́с (†).
Ца́рства земна́го лише́нный, / Царю́ же Небе́сному и в бе́дствиях свои́х до конца́ ве́рный, / моли́ся Ему́, / святы́й царю́ му́чениче Нико́лае, / е́же не лиши́тися и на́м утеше́ния / благода́тнаго в бе́да́х на́ших.
Припе́в: Святи́и новому́ченицы и испове́дницы Росси́йстии, Це́ркве на́шея похвало́ и украше́ние, услы́шите ны́, моля́щихся ва́м, и мо́лите Бо́га о на́с (†).
От руки́ священному́ченика Влади́мира древя́нный по́сох / первопресто́льника святи́теля Петра́ прие́мый, / взыщи́ мя́, / овцу́ заблу́дшую, / горохи́щную, / о святы́й патриа́рше и о́тче на́ш Ти́хоне, / обличи́телю сыно́в противле́ния.
Припе́в: Пресвята́я Госпоже́ Богоро́дице, услы́ши моли́тву ра́б Свои́х, моля́щих Ти́ ся́ и спаси́ нас (†).
Богоро́дичен: Во успе́нии Твое́м ми́ра не оста́вила еси́, Влады́чице! / Не оста́вила еси́ и страну́ Росси́йскую, / но благоволи́ла еси́ прия́ти хвалу́ / от но́вых святы́х страстоте́рпцев.
Кано́н новому́чеников ино́й
Гла́с 6 [8] :
Песнь 1
Ирмо́с: Се́ченное сече́тся / мо́ре Че́рмное, / волнопита́емая же изсуша́ется глубина́, / та́яжде ку́пно безору́жным бы́вши проходи́ма / и всеору́жным гроб. / Песнь же богокра́сная воспева́шеся: / сла́вно просла́вися Христо́с, Бог наш.
Припе́в: Святи́и новому́ченицы и испове́дницы Росси́йстии, Це́ркве на́шея похвало́ и украше́ние, услы́шите ны́, моля́щихся ва́м, и мо́лите Бо́га о на́с (†).
Го́споди, Бо́же наш, при́сно прославля́яй вся святы́я, / ны́не и нас, недосто́йных, сподо́би сыно́вне просла́вити святы́х сро́дников на́ших, / новому́чеников и испове́дников Росси́йских.
Припе́в: Святи́и новому́ченицы и испове́дницы Росси́йстии, Це́ркве на́шея похвало́ и украше́ние, услы́шите ны́, моля́щихся ва́м, и мо́лите Бо́га о на́с (†).
Кровьми́ ва́шими, священному́ченицы, я́ко в Чермне́м мо́ри, потопи́ли есте́ безбо́жныя мучи́тели, / Це́рковь же Ру́сская, ва́ми крася́щися, / похвалы́ побе́дныя, я́ко земля́ обетова́нная ме́д и млеко́, вам источа́ет.
Припе́в: Сла́ва Отцу́ и Сы́ну и Свято́му Ду́ху (†).
Егда́ даде́ся вам благода́ть не то́чию во Христа́ ве́ровати, / но и по Нем страда́ти, / немо́кренно пучи́ну кро́вных мук проидо́сте, святи́и му́ченицы, / ве́рным сыново́м росси́йским о́браз я́вльше, / и со дерзнове́нным испове́данием во врата́ Небе́сная внидо́сте.
Припе́в: И ны́не и при́сно и во ве́ки веко́в. Ами́нь (†).
Богоро́дичен: Приими́ песнь хвале́бную, от недосто́йных уст возноси́мую, / препросла́вленная Ма́ти Бо́жия.
Катава́сия: Изба́вите от бе́д ны, моля́щихся ва́м, святи́и новому́ченицы и испове́дницы Росси́йстии, Це́ркве на́шея похвало́ и украше́ние, я́ко вси́ по Бо́зе к ва́м прибега́ем, вы́ бо мо́лите за на́с Христа́ Бо́га на́шего († и покло́н).
Пе́снь 3
Ирмо́с: Тебе́, на вода́х / пове́сившаго всю зе́млю неодержи́мо, / тварь, ви́девши на ло́бнем ви́сима, / у́жасом мно́гим содрога́шеся, / несть свят, / ра́зве Тебе́, Го́с поди, взыва́ющи.
Припе́в: Святи́и новому́ченицы и испове́дницы Росси́йстии, Це́ркве на́шея похвало́ и украше́ние, услы́шите ны́, моля́щихся ва́м, и мо́лите Бо́га о на́с (†).
Ку́ю да́нь сло́ва принесе́м ва́м, / ве́рнии свиде́телие сло́ва, / до́блии страстоте́рпцы и па́стыре, / вме́ни́вшиися, я́ко о́вцы заколе́ния.
Припе́в: Святи́и новому́ченицы и испове́дницы Росси́йстии, Це́ркве на́шея похвало́ и украше́ние, услы́шите ны́, моля́щихся ва́м, и мо́лите Бо́га о на́с (†).
Тебе́, о Влади́мире, / первосвяти́телю дре́влия Ки́евския Це́ркве, / соиме́нне свято́му просвети́телю Руси́, / подоба́ше преднача́ти сла́вное по́прище боре́ния и страда́ний. / Прево́диши ты́ боговенча́нный по́лк страстоте́рпцев, / и да возда́стся ти́ пе́рвый вене́ц похвалы́.
Припе́в: Святи́и новому́ченицы и испове́дницы Росси́йстии, Це́ркве на́шея похвало́ и украше́ние, услы́шите ны́, моля́щихся ва́м, и мо́лите Бо́га о на́с (†).
Посреде́ ополче́ния до́бляго зри́м и тя́, / свяще́нная главо́, / первосвяти́телю гра́да свята́го Петра́, / святи́телю Вениами́не, / возлю́бленный па́ствою твое́ю, / я́коже Иа́ковом тезоимени́тый / ти́ дре́влий патриа́рх.
Припе́в: Святи́и новому́ченицы и испове́дницы Росси́йстии, Це́ркве на́шея похвало́ и украше́ние, услы́шите ны́, моля́щихся ва́м, и мо́лите Бо́га о на́с (†).
Пе́рвый в чи́не пресви́терстем / новому́чеников ты́ яви́лся еси́, / Иоа́нне пресви́тере, / во Аме́рице пре́жде престо́лу Бо́жию предстоя́вый. / Яко лю́тых безбо́жник в Ца́рском Селе́ обличи́теля, / венча́ тя́ Госпо́дь венце́м му́ченическим, / я́коже и друга́го Иоа́нна восторгоиме́ннаго, / в сло́ве и в му́жестве пре́д мучи́тели ди́внаго, / с ни́ми же, вси́ священному́ченицы но́вии, / заступи́те на́с.
Припе́в: Пресвята́я Госпоже́ Богоро́дице, услы́ши моли́тву ра́б Свои́х, моля́щих Ти́ ся́ и спаси́ нас (†).
Богоро́дичен: Премилосе́рдая Ма́ти, / Пречи́стая Де́во, / споболе́вшая Сы́ну и Спа́су Своему́, / ве́мы тя́ Уте́шительницу чадолюби́ву: / и оста́вльшимся во стране́ Росси́йстей / и в разсе́янии су́щим рабо́м Твои́м.
Дру́гий кано́н
Ирмо́с: Госпо́дь Сый всех и Зижди́тель Бог, / созда́нное, Безстра́стный, обнища́в, Себе́ соедини́, / и Па́сха, за я́же хотя́ше умре́ти, / Сам, Сый, Себе́ предпожре́: / яди́те, вопия́, Те́ло Мое́ / и ве́рою утверди́теся.
Припе́в: Святи́и новому́ченицы и испове́дницы Росси́йстии, Це́ркве на́шея похвало́ и украше́ние, услы́шите ны́, моля́щихся ва́м, и мо́лите Бо́га о на́с (†).
Егда́ бу́ря нече́стия на Це́рковь Ру́сскую воздви́жеся, / вы, святи́и новому́ченицы, страда́ньми ва́шими со тща́нием укроти́сте ю / и по́двиги ва́шими Правосла́вие утверди́сте.
Припе́в: Святи́и новому́ченицы и испове́дницы Росси́йстии, Це́ркве на́шея похвало́ и украше́ние, услы́шите ны́, моля́щихся ва́м, и мо́лите Бо́га о на́с (†).
Му́ки ве́лия за Це́рковь Христо́ву претерпе́сте, святи́и новому́ченицы, / моли́те утверди́тися ей незы́блемей и непоколеби́мей до сконча́ния ве́ка.
Припе́в: Сла́ва Отцу́ и Сы́ну и Свято́му Ду́ху (†).
Страда́ньми и испове́данием Христа́, святи́и сро́дницы на́ши, / вше́дше в Небе́сная селе́ния, я́ко дре́вле Изра́иль в зе́млю обетова́нную, / оте́чество ва́ше земно́е, Русь Святу́ю, в любви́ сохраня́йте моли́твами ва́шими.
Припе́в: И ны́не и при́сно и во ве́ки веко́в. Ами́нь (†).
Богоро́дичен: Небе́сных круго́в вы́шшая / и сла́вою Боже́ственною преукраше́нная, Де́во Ма́ти Бо́жия, / спаси́ ду́ши на́ша.
Катава́сия: Изба́вите от бе́д ны, моля́щихся ва́м, святи́и новому́ченицы и испове́дницы Росси́йстии, Це́ркве на́шея похвало́ и украше́ние, я́ко вси́ по Бо́зе к ва́м прибега́ем, вы́ бо мо́лите за на́с Христа́ Бо́га на́шего († и покло́н).
И стихира сия:
Моли́те Бо́га обо́ мне (или о нас), святи́и новому́ченицы и испове́дницы Росси́йстии, я́ко аз (или мы) усе́рдно к ва́м прибега́ю (или прибега́ем), ско́рым помо́щником и моли́твенником о душе́ мое́й (или душа́х наши́х) (†).
Го́споди, поми́луй (3).
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь († и поклон).
Конда́к, гла́с 8:
Но́вии страстоте́рпцы Росси́йстии, / испове́днически по́прище земно́е прете́кшии, / страда́ньми дерзнове́ние прии́мшии, / моли́теся Христу́, ва́с укрепи́вшему, / да и мы́, егда́ на́йдет на ны́ испыта́ния ча́с, / му́жества да́р Бо́жий восприи́мем. / Образ бо есте́ лобыза́ющим по́двиг ва́ш, / я́ко ни ско́рбь, ни теснота́, ни сме́рть / от любве́ Бо́жия разлучи́ти ва́с не возмого́ша.
Икос:
Егда́ начина́хуся дни́е о́гненнаго искуше́ния Це́ркве Росси́йския и не благоволи́ Госпо́дь прия́ти от на́с всесожже́ния и же́ртвы, тогда́ мно́зи архиере́е и свяще́нницы не приложи́шася пло́ти и кро́ви, но уразуме́вше во́лю Госпо́дню, са́ми себе́ принесо́ша, я́ко непоро́чное заколе́ние. И всле́д Первосвяще́нника ве́чнаго и Хода́тая Но́ваго Заве́та внидо́ша си́и во святи́лище с кро́вию свое́ю, да очи́стятся греси́ людсти́и. Сла́вни су́ть имена́ ва́ша, му́жественнии страстоте́рпцы, о́браз бо на́м есте́, лобыза́ющим по́двиг ва́ш, я́ко ни ско́рбь, ни теснота́, ни сме́рть от любве́ Бо́жия разлучи́ти ва́с не возмого́ша.
Ин конда́к, глас 3. Подо́бен: Де́ва днесь…: Днесь новому́ченицы Росси́йстии / в ри́зах бе́лых предстоя́т А́гнцу Бо́жию / и со А́нгелы песнь побе́дную воспева́ют Бо́гу: / благослове́ние, и сла́ва, и прему́дрость, / и хвала́, и честь, / и си́ла, и кре́пость / на́шему Бо́гу / во ве́ки веко&