АКАФИСТ святому мученику Василиску Команскому




Кондак 1

Избраннаго от Царя Небеснаго, добраго Христова страстотерпца и чудотворца Василиска, похвальными песньми почтим, яко христиан заступника, целомудрия блюстителя, страждущих утешителя. Той же, предстоя Престолу Святыя Троицы, молитвами своими от всяких болезней и напастей да сохранит нас, верою и любовию зовущих ему сице:
Радуйся, Василисче, святый мучениче и чудотворче предивный.

Икос 1

Архангели и ангели с любовию взираху на равноангельное житие твое, мучениче Василисче, ты бо пекийся о Господних, како угодити Господеви, постом и молитвою умерщвляя плоть свою день и нощь, сохранил еси тело свое в целомудрии. Мы же таковому житию твоему дивящеся, со умилением взываем тебе сице:
Радуйся, чистоту сердца и тела до конца сохранивый;
Pадуйся, душу свою за Христа положивый.
Радуйся, девственников похвало и упокоение;
Pадуйся, обличитель нарушителей целомудрия.
Радуйся, в бедах и скорбных обстояниих скорый помощниче;
Pадуйся, в болезнех и страданиих утешителю.
Радуйся, мучеников пречестных украшение;
Pадуйся, верных в скорбех укрепление.
Радуйся, светильниче благочестия;
Pадуйся, Церкве Христовой утверждение.
Радуйся, теплый ходатаю за нас у Царя Небеснаго;
Pадуйся, добрый наш к Богу молитвенниче.
Радуйся, Василисче, святый мучениче и чудотворче предивный.

Кондак 2

Видяще, яко христиане гоними суть, не убоястеся, святии мученицы Евтропие, Клеонике и Василисче, прещения нечестиваго гонителя, но в темнице, силою свыше укрепляеми, рекша друг ко другу: «Мужайтеся, укрепляйтеся в вере, да сподобимся всегда воспевати в чертозех небесных Христу Богу: Аллилуиа».

Икос 2

Имея в сердце своем твердую веру во Христа Бога, не убоялся еси, мучениче Василисче, гнева нечестиваго гонителя, но, презрев славу мира сего, исповедал еси себе христианина быти. Сего ради от него побои претерпев, яко злодей, в темницу всажден был еси. Таковому твоему дерзновению и мужеству дивящеся, глаголем ти сице:
Радуйся, исповедниче Христов преизрядный;
Pадуйся, Христа паче мира возлюбивый.
Радуйся, в заточении глад и наготу мужественно претерпевый;
Pадуйся, узы и темницу за Христа радостно приявый.
Радуйся, язвы Господа своего на теле своем носивый;
Pадуйся, душу свою за Него положивый.
Радуйся, яко от юности своея Бога возлюбил еси;
Pадуйся, яко в юном телеси мужескую крепость явил еси.
Радуйся, скорый помощниче всем за веру гонимым;
Pадуйся, скорбных обстояний скорый прогнителю.
Радуйся, Церкве Христовы защитниче;
Pадуйся, всех православных заступниче.
Радуйся, Василисче, святый мучениче и чудотворче предивный.

Кондак 3

Бурею помышлений сумнительных не поколебастеся святии мученицы Евтропие, Клеонике и Василисче, егда узнали есте повеление нечестиваго гонителя, хотяща отвратити вас от Христа. «Аще отречемся от Христа и к бездушным идолом обратимся: на вечныя муки осуждени будем Господом и явимся радование бесом», глаголали есте ему со дерзновением. Обаче, страхом Божиим водими и силою с выше укрепляеми, веру Христову в сердцах своих сохранили есте даже до злостраданий и уз темничных, вопиюще Христу Богу: Аллилуиа.

Икос 3

Боготечней звезде подобен был еси, святый мучениче Василисче, егда людие вси, видя твое твердое исповедание Христа и данную тебе от Бога крепость терпети мучения, вслед тебе поидоша и сами Христа исповедаша. Ты же, благодатию Божией укрепляемь, мужественно велия страдания претерпел еси и от веры во Христа никакоже отступил еси. Сего ради величаем тя сице:
Радуйся, исповедниче веры Христовой неустрашимый;
Pадуйся, воин Христов непобедимый.
Радуйся, искушений и соблазнов диавола избегнувый;
Pадуйся, его немощную дерзость терпением своим низложивый.
Радуйся, кровь свою за Христа пролияти желавый;
Pадуйся, душу свою за Христа положивый.
Радуйся, адаманте веры Христовой;
Pадуйся, столпе Церкве Божия.
Радуйся, верных наставниче;
Pадуйся, языческаго нечестия низложителю.
Радуйся, радование верных;
Pадуйся, посрамление нечестивых.
Радуйся, Василисче, святый мучениче и чудотворче предивный.

Кондак 4

Бурею ярости вознегодова мучитель ваш, святии мученицы Евтропие, Клеонике и Василисче, егда не возможе вас отвратити от веры во Христа, и повеле вас нагих привязати к древу и возливати на вас кипящую смолу. Вы же, силою Божиею отвязавше руце своя, взявше сосуды со смолою у воинов, сами возливасте ю друг на друга. Смола же кипящая, аки вода, стекаше с телес ваших, достигаше мучителей и опаляше их смертельно. Мы же, дивящеся чудеси таковому, воспеваем благодарственную песнь Богу: Аллилуиа.

Икос 4

Ветия многовещаннии не возмогут по достоянию восхвалити подвиги и страдания твоя, всехвальный мучениче Василисче. Сам Господь, призрев на страдания твоя, с сонмом святых Ангелов и со святым сродником твоим Феодором Тироном явися ти. Мы же, со страхом дивящеся сему явлению, во умилении приносим ти похвалы сия:
Радуйся, похвало христиан доброзрачная;
Pадуйся, веру, надежду и любовь до конца сохранивый.
Радуйся, яко тобою имя Христово прославляется;
Pадуйся, яко дивен Бог во святых своих тобою является.
Радуйся, яко Сам Господь призре на страдания твоя;
Pадуйся, яко Сам Христос со Ангелы Своими явися ти.
Радуйся, нетления венец восприявый;
Pадуйся, крест Христов с терпением понесший.
Радуйся, Ангелов сожителю;
Pадуйся, Серафимов собеседниче.
Радуйся, страстотерпче, адаманта твердейший;
Pадуйся, щите веры Христовой железа крепльший.
Радуйся, Василисче, святый мучениче и чудотворче предивный.

Кондак 5

Безумный же мучитель не уразуме Бога чудодеющаго, повеле иным воином строгати телеса ваша железными когтьми и возливати на раны ваша горчицу и соль, со оцтом смешанныя. Вы же с радостию приясте и сие мучение, восклицающе: «Кто нас разлучит от любве Божиея: скорбь или теснота, или гонение, или глад, или нагота, или беда или меч? Ни смерть, ни жизнь, ни иная какая тварь не может отлучити нас от любве Божиея во Христе Иисусе, Господе нашем!». Ему же всегда немолчными усты поем: Аллилуиа.

Икос 5

Имеяй выну пред очесы своими Христа, невинно страдавшаго, биеннаго, поруганнаго, распятаго и кровь Свою святую за нас грешных пролиявшаго, ты, святый мучениче Василисче, подражая ему своими страданьми, радостию велиею радовался еси, вопия: «Тебе ради, Господи умервщляют мя всякий день, вменихся бо яко овча на заколение». За таковое твое мужественное терпение, непоколебимую веру и неугасающую любовь ко Господу, мы, немощнии и грешнии, дерзаем недостойными усты своими глаголати ти сицевая:
Радуйся, мучениче, в терпении непоколебимый бывый;
Pадуйся, вольным Христовым страстем подражатель явльшийся.
Радуйся, яко за Христа многообразныя смерти готов был еси;
Pадуйся, яко в жертву самаго себе Богу принесл еси.
Радуйся, яко во страданиих своих, яко агнец незлобив был еси;
Pадуйся, яко голубь кроткий за творивших ти напасти моливый.
Радуйся, воине Христов непобедимый;
Pадуйся, Единосущныя Троицы служителю.
Радуйся, мучеников удобрение;
Pадуйся, праведных украшение.
Радуйся, благовоние Духа Святаго;
Pадуйся, мироварнице благоуханная.
Радуйся, Василисче, святый мучениче и чудотворче предивный.

Кондак 6

Возсиявше подвигом своим всем людем Амасийским, святии Евтропие и Клеонике, претерпели есте крестная страдания. «Что добро, или что красно, но еже жити братии в купе». — восклицал еси ты, мучениче Василисче, егда уведел еси, яко мучитель разлучает тя от друзей твоих. Ты же умолял еси его, да и тя умертвит вкупе с ними, да неразлучно в триедином союзе предстанете пред Престолом Святыя Троицы. Обаче злонравный епарх не исполни твоея воли, ты же, покоряяся Промыслу Божию, со смирением рекл еси: «Не моя воля, а Твоя, Господи, да будет». И в темнице, аки в чертозе краснем, ликуя, пел еси хвалебную песнь Богу: Аллилуиа.

Икос 6

Хотяй от матере своея получити благословение на страдания ради Христа, ты, мучениче Василисче, упросил еси стража темничнаго, да отпустит тя на некия дни в дом отца твоего. Злонравный же епарх, егда уведе сие, повеле воином связати тя железными узами, а нозе твои обути в сапоги медныя со вбитыми в них гвоздьми. Ты же, укрепляемый силою Божиею, истекая кровию, тридневен путь от дома своего мужественно протекл еси. Мы же, дивящеся твоему пачеестественному терпению, восхваляюще подвиги твоя, великий мучениче Василисче, зовем тебе сице:
Радуйся, яко шествием своим уподобился еси Христу, шедшему на гору Голгофскую;
Pадуйся, яко, связанный узами железными претерпел еси поругание Христово.
Радуйся, яко, нося тяжесть сапог медных, уподобился еси Христу, несшему Крест Свой;
Pадуйся, яко, пролияв кровь свою, подобен был еси Христу, кровию Своею обагрившему стогны Иерусалима.
Радуйся, яко сия страдании терпел ради Христа, за нас пострадавшаго;
Pадуйся, яко терпением своим победил еси диавола.
Радуйся, христианскаго рода украшение;
Pадуйся, всех христиан упование.
Радуйся, заступниче сирых;
Pадуйся, плачущих утешителю.
Радуйся, в бедах сущих заступниче;
Pадуйся, в болезнех сущих целителю.
Радуйся, Василисче, святый мучениче и чудотворче предивный.

Кондак 7

Хотяще усугубити твоя страдания, воини привязаша тя, мучениче Василисче, к дубу, да зной и жажду терпиши. Ты же воззвал еси к Богу тако: «Господи, посети мя, яко посетил еси Иосифа в темнице, и Даниила в рове со львы, и триех отроков в пещи Вавилонстей». И услыша Господь молитву твою. И бысть глас с небесе и велие земли тясение. Воини же в страсе бежаша из дому и увидеша, яко сапоги твои медныя Божиим велением распадошася, и нозе твои исцелеша, и источник воды из камене явися, и сухое древо израсти листвие свое, им же от зноя покры тя Господь. Вси же зрящии чудо сие устрашишася зело и прославиша Бога чудодеющаго, поюще Ему: Аллилуиа.

Икос 7

Дивное терпение твое в страданиих и непоколебимую веру видя Господь и услышав твою мольбу, дарова тебе, мучениче Василисче, исцеление, ибо Сам рече: «яко вся, елико просите во имя Мое, то сотворю вам». И яви Господь силу свою и сотвори чудо тебе ради, дабы видящие прославили Отца Небеснаго. Мы же, дивящеся таковому твоему дерзновению ко Господу, глаголем ти сицевая: Радуйся, терпением своим милость Господа улучивый;
Pадуйся, яко, привязанный ко древу подражал еси Христу, от воин привязаннаго к столпу бичевания.
Радуйся, яко Господь, услышав молитву твою, призре на страдания твоя и исцели раны твоя;
Pадуйся, яко Он, любя праведники Своя, повеле сухому древу произрастити листвие свое.
Радуйся, яко за любовь твою к Нему источи воду из камене, еже утолити жажду твою;
Pадуйся, яко Его повелением исцелеша раны твоя.
Радуйся, смиренномудрием своим врага низложивый;
Pадуйся, терпением своим диавола победивый.
Радуйся, Царствие Небесное стяжавый;
Pадуйся, в дому Отца Небеснаго обитель себе сотворивый.
Радуйся, Духа Святаго сотаинниче;
Pадуйся, Святыя Троицы проповедниче.
Радуйся, Василисче, святый мучениче и чудотворче предивный.

Кондак 8

Видеша сия велия чудесы, тебе ради Богом явленная по молитве твоей, предивный мучениче Василисче, людие команстии просиша тя, да научиши их познанию Бога истиннаго. Ты же, отверз уста своя, поучая еси их веровати в Троицу Единосущную и Нераздельную, да купно с тобою воспоют и они чудодеющему Богу хвалебную песнь: Аллилуиа.

Икос 8

Уверовавше в Бога истиннаго по словеси твоему, святый мучениче Василисче, вси людие команстии, просиша тя крестити их во имя Святыя Троицы. Вои же со старейшиною своим, раскаявшеся в жестокости своей, просиша у тебе прощения. Ты же, подражая незлобию своего Учителя, всем вся простил еси. Мы же, дивяся незлобию твоему, со умилением зовем ти:
Радуйся, яко твоими молитвами, мнози люди обратишася к вере во Христа;
Pадуйся, яко проповедию своею уподобился еси святым апостолом.
Радуйся, яко просветил еси мужеством своим люди заблуждшия;
Pадуйся, яко, ревностию своею о славе Божией всех научаеши возвещати имя Христово.
Радуйся, яко незлобием своим увещаваеши нас прощати врагов своих;
Pадуйся, яко безропотным терпением своим наставляеши нас терпети вся страдания наша.
Радуйся, светильниче благочестия;
Pадуйся, обличитель нечестия.
Радуйся, наставниче истиннаго богопочитания;
Pадуйся, идольския прелести низложителю.
Радуйся, гонителей вразумителю;
Радуйся, поборниче веры во Христа неустрашимый.
Радуйся, Василисче, святый мучениче и чудотворче предивный.

Кондак 9

Всякое дыхание хвалит Творца своего, и ты, благодаря Господа за Его великую милость к тебе, святый мучениче Василисче, рекл еси усты своими: «Господи Иисусе! Киими словесы воспою Тя аз многогрешный»? И не токмо людие, но и скоти безсловеснии благоговеюще пред твоим смирением, славный мучениче Василисче, падоша на колена своя пред тобою, прославляюще сим тя, великаго угодника Божия, неустанно поющаго Богу: Аллилуиа.

Икос 9

Благодать творити чудеса приял еси от Бога, славный мучениче Василисче, тебе бо рече Сам Господь: «Не бойся, Аз есмь с тобою во вся веки». Ты же, надеяся на всемогущую силу Божию, многия сотворил еси чудеса людем команстим. И ныне повсюду молитвами твоими хромии ходят, слепии прозирают, глусии слышат, беснии исцелевают. Мы же тебе яко дивному чудотворцу зовем сицевая:
Радуйся, яко тебе дадеся власть от Бога целити недуги душевныя и телесныя;
Pадуйся, яко именем твоим беси исчезают.
Радуйся, яко молитвами твоими разслабленнии восстают;
Pадуйся, яко, памятию твоею прокаженнии очищаются.
Радуйся, яко молитвою твоею всякия неисцельныя болезни исцелевают;
Pадуйся, яко и ныне в водах источника твоего мнози, с верою в нем омывающиися, приемлют исцеления.
Радуйся, исцелений благодатных источниче;
Pадуйся, врачу душ и телес.
Радуйся, о нас к Богу непрестанный молитвенниче;
Pадуйся, скорый заступниче наш и наставниче.
Радуйся, Духа Святаго священное жилище;
Pадуйся, благодати Христовой славное вместилище.
Радуйся, Василисче, святый мучениче и чудотворче предивный.

Кондак 10

Спасти хотяй от идолослужения людей команских, ослепленных неведением, егда богопротивный правитель Агриппа повеле привести тя в идольское капище, да жертву тамо принесеши: силою Божиею идолов сокрушил еси и идольское капище молитвою твоею попалил еси. Видя же чудо сие, нечестивый гонитель разъярися зело и повеле усекнути мечем твою святую главу. Ты же, прияв весть сию, радостно воспел еси Богу: Аллилуиа.

Икос 10

Страшное видение видеша людие, бывшии на месте усечения главы твоея, славный мучениче Василисче, яко небеса отверзошася и множество святых Ангел явишася прияти душу твою. И егда она несена бысть ангелы на небо, Сам Господь наш Иисус Христос явися срести тя тамо приветствии сими: «Приди, добрый и верный рабе мой Василисче, вниди в Царствие Мое, идеже пребывают вси раби Мои, пострадавший Мене ради». Мы же, радостно совершающе память твою, вопием сице:
Радуйся, подвигом своим Богу угодивый;
Pадуйся, сего ради от Него прославленный.
Радуйся, жизнь свою за Христа положивый;
Pадуйся, кровь свою за Христа пролиявый.
Радуйся, мечем за Христа усеченный;
Pадуйся, венцем мученическим от Него украшенный.
Радуйся, верным рабом от Христа именованный;
Pадуйся, яко сего ради предстоиши у престола Святыя Троицы.
Радуйся, исповедниче веры во Христа неустрашимый;
Pадуйся, воине Христов непобедимый.
Радуйся, яко молитвами твоими спасение улучити чаем;
Pадуйся, яко молишися о всех чтущих память твою.
Радуйся, Василисче, святый мучениче и чудотворче предивный.

Кондак 11

Пением возвеличаша память твою, мучениче Василисче, людие команстии и упросиша воина, да отдаст он им тело твое за мзду великую. В нощи же тя погребающе, возжелаша утолити жажду свою, и не бе оксрест воды им испити, но по молитве твоей, из камене яви им Господь источник воды чудодейственныя. Ныне же вси приемлющие с верою воду сию, улучающе исцеления, Богу поют: Аллилуиа.

Икос 11

Новую показа благодать Человеколюбец Господь, егда благоволи прославити тя, мучениче Василисче, чудесы на месте, идеже бе погребено тело твое. Земля, идеже бяху сокрыты мощи твоя, во едину нощь израсти злаки хлебныя. Мучитель же твой Агриппа, пораженный лютою болезнию, к твоему заступлению обратився, приложи землю, кровию твоею орошенную, и прият исцеление своим неизцельным ранам. Его повелением обретено бысть тело твое, и над гробом твоим храм воздвигнут во имя твое. Мы же таковому о имени твоем промышлению Божию радующеся, вопием ти сице:
Радуйся, вместилище благодати Божия;
Pадуйся, чудотворче предивный.
Радуйся, притекающим к тебе скорую помощь подающий;
Pадуйся, душевных и телесных недугов целителю.
Радуйся, в скорбех и напастех пребывающим скорый заступниче;
Pадуйся, заблудших на путь истинный приводящий.
Радуйся, правило веры и кротости;
Pадуйся, учителю благочестия.
Радуйся, мучеников украшение;
Pадуйся, страстотерпцев велия славо.
Радуйся, избранниче Божий;
Pадуйся, Духа Святаго собеседниче.
Радуйся, Василисче, святый мучениче и чудотворче предивный.

Кондак 12

Егда нечестивии агаряне землю команскую покориша, храм во имя твое разориша и мощи твоя забвению предаша, Человеколюбец Господь благоволи паки прославити тя, святый мучениче Василисче. Свещею, горящею в нощи верху горы показа Он место, идеже бе сокрыто тело твое. Обаче егда раскопаша то место, оттуду паки и паки изыде облако, яко пламень горящий. И познаша вси людие команстии, яко Господь не благоволит, да тело твое паки на поругание богопротивным обретено будет. Мы же, дивящеся таковому благоволению Божию к тебе, святый мучениче Василисче, со умилением поем Богу: Аллилуиа.

Икос 12

Пение похвальное приносим ти, святый мучениче Христов Василисче, ты бо еси стена и прибежище непоколебимое всем с верою к тебе прибегающим. Во храме твоем обрете тихое пристанище великий святитель Христов Иоанн Златоуст. Егда в дивном видении Ты бо явился еси ему возвещая, яко вскоре на Небеси имать с тобою вкупе предстояти у Престола Святыя Троицы. Имуще убо таковаго пред Богом ходатая и заступника, радующеся, ублажаем тя похвалами сими:
Радуйся, скорый помощниче всем чтущим память твою;
Pадуйся, яко на месте, идеже тело твое пребывает, многая и дивная чудеса нам являеши.
Радуйся, о нас пред Богом ходатай всесильный;
Pадуйся, утешителю скорбящих.
Радуйся, молитвенниче пред Богом о нас всехвальный;
Pадуйся, Святыя Троицы о нас умилостивителю.
Радуйся, Единаго Истиннаго Бога проповедниче;
Pадуйся, Пресвятыя Троицы верный служителю.
Радуйся, дивный недугов целителю;
Pадуйся, душ наших верный хранителю.
Радуйся, гордых смирителю;
Pадуйся, кротких веселие.
Радуйся, Василисче, святый мучениче и чудотворче предивный.

Кондак 13

О, святии угодницы Христовы, мученицы Евтропие, Клеонике и Василисче. Приимите сие хвалебное пение, вам приносимое, и благоприятным вашим ходатайством к Богу избавите нас от всяких зол и болезней, злых обстояний и вечных мучений и Небеснаго Владыку умолите, да и мы сподобимся в небесных селениих купно с вами воспевати всесильному Богу: Аллилуиа.

Этот кондак читается трижды, затем икос 1-й и кондак 1-й



Поделиться:




Поиск по сайту

©2015-2024 poisk-ru.ru
Все права принадлежать их авторам. Данный сайт не претендует на авторства, а предоставляет бесплатное использование.
Дата создания страницы: 2020-07-11 Нарушение авторских прав и Нарушение персональных данных


Поиск по сайту: