Запрещение первое.
Го́споду помо́лимся.
Лик: Го́споди, поми́луй.
Запреща́ет тебе́, диа́воле, Госпо́дь прише́дый в мiр и всели́выйся в челове́цех, да разруши́т твое́ мучи́тельство, и челове́ки и́змет, и́же на дре́ве сопроти́вныя си́лы победи́, со́лнцу поме́ркшу, и земли́ поколеба́вшейся, и гробо́м отверза́ющимся, и телесе́м святы́х востаю́щим: и́же разруши́ сме́ртию смерть, и упраздни́ иму́щаго держа́ву сме́рти, си́есть тебе́, диа́вола. Запреща́ю тебе́ Бо́гом, показа́вшим дре́во живота́, и уста́вившим Херуви́мы, и пла́менное ору́жие обраща́ющееся стрещи́ то, запреще́н бу́ди. О́ным у́бо тебе́ запреща́ю, ходи́вшим я́ко по су́ху на плещу́ морску́ю, и запрети́вшим бу́ри ве́тров: Его́же зре́ние суши́т бе́здны, и преще́ние растаява́ет го́ры: Той бо и ны́не запреща́ет тебе́ на́ми. Убо́йся, изы́ди, и отступи́ от созда́ния сего́, и да не возврати́шися, ниже́ утаи́шися в нем, ниже́ да сря́щеши его́, или́ де́йстуеши, ни в нощи́, ни во дни, или́ в часе́, или́ во полу́дни: но отыди́ во свой та́ртар, да́же до угото́ваннаго вели́каго дне су́днаго. Убо́йся Бо́га седя́щаго на Херуви́мех, и призира́ющаго бе́здны, Его́же трепе́щут А́нгели, Арха́нгели, Престо́ли, Госпо́дства, Нача́ла, Вла́сти, Си́лы, многоочи́тии Херуви́ми, и шестокрила́тии Серафи́ми: Его́же трепе́щут не́бо и земля́, мо́ре, и вся, я́же в них. Изы́ди и отступи́ от запеча́таннаго новоизбра́ннаго во́ина Христа́ Бо́га на́шего: о́нем бо Тебе́ запреща́ю, ходя́щим на крилу́ ве́тренню, творя́щим А́нгелы Своя́ огнь паля́щ, изы́ди и отступи́ от созда́ния сего́ со все́ю си́лою и а́нгелы твои́ми.
|
|
Возглас: Я́ко просла́вися и́мя Отца́ и Сы́на и Свята́го Ду́ха, ны́не и при́сно и во ве́ки веко́в.
Лик: Ами́нь.
Запрещение второе.
Го́споду помо́лимся.
Лик: Го́споди, поми́луй.
Бог святы́й, стра́шный и сла́вный во всех де́лех и кре́пости Свое́й, непостижи́мый и неизсле́димый сый, Той предопредели́вый тебе́, диа́воле, ве́чныя му́ки томле́ние, на́ми, недосто́йными Его́ рабы́, повелева́ет тебе́ и всей споспе́шней твое́й си́ле, отступи́ти от новозапеча́таннаго [или от новозапеча́танныя] и́менем Го́спода на́шего Иису́са Христа́, и́стиннаго Бо́га на́шего. Запреща́ю тебе́ у́бо вселука́вому, и нечи́стому, и скве́рному, и омерзе́нному, и чужде́му ду́ху, си́лою Иису́са Христа́, вся́кую власть иму́щаго на небеси́ и на земли́, ре́кшаго глухо́му и немо́му де́мону: изы́ди от челове́ка, и да не ктому́ вни́деши в него́. Отступи́, позна́й твою́ су́етную си́лу, ниже́ на свиния́х власть иму́щую: помяни́ повеле́вшаго тебе́ по твоему́ проше́нию во ста́до свино́е вни́ти. Убо́йся Бо́га, Его́же повеле́нием земля́ на вода́х утверди́ся, созда́вшаго не́бо, и поста́вльшаго го́ры ста́вилом, и удо́лия ме́рилом, и поло́жшаго песо́к мо́рю преде́л, и в воде́ зе́льней стезю́ тве́рдую, прикаса́ющагося гора́м, и дымя́тся, одева́ющагося све́том я́ко ри́зою, просте́ршаго не́бо я́ко ко́жу, покрыва́ющаго вода́ми превы́спренняя Своя́, основа́ющаго зе́млю на утвержде́нии ея́, не преклони́тся во век ве́ка: призыва́ющаго во́ду морску́ю, и пролива́ющаго ю́ на лице́ всея́ земли́. Изы́ди и отступи́ от и́же ко свято́му Просвеще́нию гото́вящагося. Запреща́ю тебе́ спаси́тельным страда́нием Го́спода на́шего Иису́са Христа́, и честны́м Его́ Те́лом и Кро́вию, и прише́ствием Его́ стра́шным: прии́дет бо и не закосни́т судя́й всей земли́, и тебе́ и споспе́шную твою́ си́лу уму́чит в гее́нне о́гненней, преда́вый во тьму кроме́шную, иде́же червь неусыпа́емый и огнь неугаса́емый.
|
|
Я́ко держа́ва Христа́ Бо́га на́шего, со Отце́м, и Святы́м Ду́хом, ны́не и при́сно и во ве́ки веко́в.
Лик: Ами́нь.
Запрещение третие.
Го́споду помо́лимся.
Лик: Го́споди, поми́луй.
Го́споди Савао́ф, Бо́же Изра́илев, исцеля́яй вся́кий неду́г, и вся́кую я́зю, при́зри на раба́ Твоего́ [или на рабу́ Твою́], взыщи́, испыту́й и отжени́ от него́ вся де́йства диа́воля, запрети́ нечи́стым духо́м, и изжени́ я́, и очи́сти дела́ руку́ Твое́ю, и о́строе Твое́ употреби́вый де́йство, сокруши́ сатану́ под но́зе его́ вско́ре, и даждь ему́ побе́ды на него́ и на нечи́стыя его́ ду́хи: я́ко да от Тебе́ ми́лость получи́в, сподо́бится безсме́ртных и небе́сных Твои́х Та́ин, и сла́ву Тебе́ возсле́т, Отцу́ и Сы́ну и Свято́му Ду́ху, ны́не и при́сно и во ве́ки веко́в, ами́нь.
|
|
Молитва четвертая.
Го́споду помо́лимся.
Лик: Го́споди, поми́луй.
Сый, Влады́ко Го́споди, сотвори́вый челове́ка по о́бразу Твоему́ и по подо́бию, и да́вый ему́ власть жи́зни ве́чныя, та́же отпа́дша грехо́м не презре́вый, но устро́ивый вочелове́чением Христа́ Твоего́ спасе́ние мiра: Сам и созда́ние Твое́ сие́ изба́вль от рабо́ты вра́жия, приими́ в Ца́рство Твое́ Пренебе́сное. Отве́рзи его́ [или ея́] о́чи мы́сленныя, во е́же озаря́ти в нем просвеще́нию Ева́нгелия Твоего́. Сопрязи́ животу́ его́ А́нгела све́тла, избавля́юща его́ от вся́каго наве́та сопротиволежа́щаго, от сре́тения лука́ваго, от де́мона полу́деннаго, и от мечта́ний лука́вых.
И дует священник на уста его, на чело, и на перси, глаголя:
Изжени́ из него́ [или из нея́] вся́каго лука́ваго и нечи́стаго ду́ха, сокры́таго и гнездя́щагося в се́рдце его́.
И глаголет сие трижды.
Ду́ха прелести, ду́ха лука́вства, ду́ха идолослуже́ния и вся́каго лихои́мства: ду́ха лжи и вся́кия нечистоты́, де́йствуемыя по науче́нию диа́волю. И сотвори́ его́ овча́ слове́сное свята́го ста́да Христа́ Твоего́: уд че́стен Це́ркве Твоея́, сы́на и насле́дника [или дщерь и насле́дницу] Ца́рствия Твоего́: да по за́поведем Твои́м жи́тельствовав и сохрани́в печа́ть неруши́мую, и соблю́д ри́зу нескве́рную, получи́т блаже́нства святы́х во Ца́рствии Твое́м.
Возгласно: Благода́тию и щедро́тами, и человеколю́бием Единоро́днаго Сы́на Твоего́, с ни́мже благослове́н еси́ с Пресвяты́м, и Благи́м, и Животворя́щим Твои́м Ду́хом, ны́не и при́сно и во ве́ки веко́в.
Лик: Ами́нь.
И совлечену и отрешену крещаемому, обращает его священник на запад, горе руце имуща, и глаголет:
Отрица́еши ли ся сатаны́, и всех дел его́, и всех а́нгел его́, и всего́ служе́ния его́, и всея́ горды́ни его́?
И отвещает оглашенный, или восприемник его, аще есть крещаемый варвар, или отроча, и глаголет:
Отрица́юся.
Паки священник глаголет второе:
Отрица́еши ли ся сатаны́, и всех дел его́, и всех а́нгел его́, и всего́ служе́ния его́, и всея́ горды́ни его́?
И отвещает: Отрица́юся.
Паки священник глаголет третие:
Отрица́еши ли ся сатаны́, и всех дел его́, и всех а́нгел его́, и всего́ служе́ния его́, и всея́ горды́ни его́?
И отвещает: Отрица́юся.
Вопрошает паки священник крещаемаго:
Отре́клся ли [или отрекла́ся ли] еси́ сатаны́?
И отвещает оглашенный, или восприемник его:
Отреко́хся.
Паки вопрошает священник:
Отре́клся ли еси́ сатаны́?
И отвещает: Отреко́хся.
Паки вопрошает священник третие:
Отре́клся ли еси́ сатаны́?
И отвещает: Отреко́хся.
Таже глаголет священник:
И ду́ни, и плю́ни на него́.
И сие сотворшу, обращает его священник к востоку, доле руце имуща, и глаголет ему священник:
Сочетава́еши ли ся Христу́?
И отвещает оглашенный, или восприемник, глаголя:
Сочетава́юся.
Паки священник глаголет второе:
Сочетава́еши ли ся Христу́?
Отвещает второе: Сочетава́юся.
Паки священник глаголет третие:
Сочетава́еши ли ся Христу́?
Отвещает третие: Сочетава́юся.
Таже паки глаголет ему священник:
Сочета́лся ли [или сочета́лася ли] еси́ Христу́?
И отвещает: Сочета́хся.
И паки глаголет: И ве́руеши ли Ему́?
И глаголет: Ве́рую Ему́, я́ко Царю́ и Бо́гу.
И глаголет:
Ве́рую во еди́наго Бо́га Отца́ Вседержи́теля, Творца́ не́бу и земли́, ви́димым же всем и неви́димым. И во еди́наго Го́спода Иису́са Христа́, Сы́на Бо́жия, Единоро́днаго, И́же от Отца́ рожде́ннаго пре́жде всех век. Све́та от Све́та, Бо́га и́стинна от Бо́га и́стинна, рожде́нна, несотворе́нна, единосу́щна Отцу́, И́мже вся бы́ша. Нас ра́ди челове́к и на́шего ра́ди спасе́ния сше́дшаго с небе́с и воплоти́вшагося от Ду́ха Свя́та и Мари́и Де́вы и вочелове́чшася. Распя́таго же за ны при Понти́йстем Пила́те, и страда́вша, и погребе́нна. И воскре́сшаго в тре́тий день по Писа́нием. И возше́дшаго на небеса́, и седя́ща одесну́ю Отца́. И па́ки гряду́щаго со сла́вою суди́ти живы́м и ме́ртвым, Его́же Ца́рствию не бу́дет конца́. И в Ду́ха Свята́го, Го́спода, Животворя́щаго, И́же от Отца́ исходя́щаго, И́же со Отце́м и Сы́ном спокланя́ема и ссла́вима, глаго́лавшаго проро́ки. Во еди́ну Святу́ю, Собо́рную и Апо́стольскую Це́рковь. Испове́дую еди́но креще́ние во оставле́ние грехо́в. Ча́ю воскресе́ния ме́ртвых, и жи́зни бу́дущаго ве́ка. Ами́нь.
И егда исполнит святый Символ, и глаголет паки к нему:
Сочета́лся ли [или сочета́лася ли] еси́ Христу́?
И отвещает: Сочета́хся.
И паки глаголет: И ве́руеши ли Ему́?
И глаголет: Ве́рую Ему́, я́ко Царю́ и Бо́гу.
И глаголет: Ве́рую во еди́наго Бо́га: все до конца.
И егда исполнит второе святый Символ, глаголет паки к нему третие:
Сочета́лся ли [или сочета́лася ли] еси́ Христу́?
И отвещает: Сочета́хся.
И паки глаголет: И ве́руеши ли Ему́?
И глаголет: Ве́рую Ему́, я́ко Царю́ и Бо́гу.
И глаголет: Ве́рую во еди́наго Бо́га: все до конца.
И егда исполнит третие святый Символ, вопрошает его паки священник, глаголя:
Сочета́лся ли еси́ Христу́?
И отвещает: Сочета́хся.
Паки вопрошает священник второе:
Сочета́лся ли еси́ Христу́?
И отвещает второе: Сочета́хся.
Паки вопрошает священник третие:
Сочета́лся ли еси́ Христу́?
И отвещает третие: Сочета́хся.
И глаголет священник: И поклони́ся Ему́.
И покланяется, глаголя:
Покланя́юся Отцу́ и Сы́ну и Свято́му Ду́ху, Тро́ице Единосу́щней и неразде́льней.
Таже глаголет священник:
Благослове́н Бог, всем челове́ком хотя́й спасти́ся, и в позна́ние и́стины приити́, ны́не и при́сно и во ве́ки веко́в, ами́нь.
Таже глаголет молитву сию:
Го́споду помо́лимся.
Лик: Го́споди, поми́луй.
Влады́ко Го́споди Бо́же наш, призови́ раба́ Твоего́, [или рабу Твою́] (имярек), ко свято́му Твоему́ Просвеще́нию, и сподо́би его́ вели́кия сея́ благода́ти свята́го Твоего́ Креще́ния. Отреши́ его́ ве́тхость, и обнови́ его́ в живо́т ве́чный, и испо́лни его́ Свята́го Твоего́ Ду́ха си́лы, в соедине́ние Христа́ Твоего́, да не ктому́ ча́до те́ла бу́дет, но ча́до Твоего́ Ца́рствия, благоволе́нием и благода́тию Единоро́днаго Твоего́ Сы́на, с Ни́мже благослове́н еси́ со Пресвяты́м, и Благи́м, и Животворя́щим Твои́м Ду́хом, ны́не и при́сно и во ве́ки веко́в.
Лик: Ами́нь.
ПОСЛЕДОВАНИЕ
СВЯТАГО КРЕЩЕНИЯ
Вжигаемым всем свещам, взем кадильницу, священник отходит к купели, и кадит окрест, и отдав кадильницу, покланяется.
Таже глаголет диакон: Благослови́, Влады́ко.
Священник же возгласно: Благослове́но Ца́рство Отца́ и Сы́на, и Свята́го Ду́ха, ны́не и при́сно и во ве́ки веко́в.
Лик: Ами́нь.
Диакон же абие глаголет ектению:
Ми́ром Го́споду помо́лимся.
Лик: Го́споди, поми́луй.
О свы́шнем ми́ре и спасе́нии душ на́ших, Го́споду помо́лимся.
О ми́ре всего́ мiра, благостоя́нии святы́х Бо́жиих церкве́й и соедине́нии всех, Го́споду помо́лимся.
О святе́м хра́ме сем и с ве́рою, благогове́нием и стра́хом Бо́жиим входя́щих в онь, Го́споду помо́лимся.
О Вели́ком Господи́не и отце́ на́шем, Святе́йшем Патриа́рхе имярек, и о господи́не на́шем преосвяще́ннейшем митрополи́те [или архиепи́скопе, или епи́скопе] (имярек), честне́м пресви́терстве, во Христе́ диа́констве и о всем при́чте и лю́дех, Го́споду помо́лимся.
О Богохрани́мей стране́ на́шей, власте́х и во́инстве ея́, Го́споду помо́лимся.
О е́же освяти́тися воде́ сей, си́лою и де́йствием, и наи́тием Свята́го Ду́ха, Го́споду помо́лимся.
О е́же низпосла́тися ей благода́ти избавле́ния, благослове́нию Иорда́нову, Го́споду помо́лимся.
О е́же приити́ на во́ду сию́ чисти́тельному пресу́щественныя Тро́ицы де́йству, Го́споду помо́лимся.
О е́же просвети́тися нам просвеще́нием ра́зума и благоче́стия, наи́тием Свята́го Ду́ха, Го́споду помо́лимся.
О е́же показа́тися ей отгна́нию вся́каго наве́та ви́димых и неви́димых враго́в, Го́споду помо́лимся.
О е́же досто́йну бы́ти нетле́ннаго Ца́рствия в ней креща́емому, [или креща́емей] Го́споду помо́лимся.
О е́же ны́не приходя́щем [или приходя́щей] ко свя́тому Просвеще́нию, и о спа́сении его́ [или ея́], Го́споду помо́лимся.
О е́же показа́тися ему́ сы́ну [или ей дще́ри] све́та, и насле́днику [или насле́днице] ве́чных благ, Го́споду помо́лимся.
О е́же бы́ти ему́ сра́слену и прича́стнику [или сра́слене и прича́стнице] сме́рти и воскресе́ния Христа́ Бо́га на́шего, Го́споду помо́лимся.
О е́же сохрани́ти ему́ [или ей] оде́жду Креще́ния, и обруче́ние Ду́ха нескве́рно и непоро́чно, в день стра́шный Христа́ Бо́га на́шего, Го́споду помо́лимся.
О е́же бы́ти ему́ [или ей] воде́ сей ба́нею пакибытия́, оставле́нию грехо́в и оде́жди нетле́ния, Го́споду помо́лимся.
О е́же услы́шати Го́споду Бо́гу глас моле́ния на́шего, Го́споду помо́лимся.
О е́же изба́витися ему́ же [или ей же] и нам от вся́кия ско́рби, гне́ва и ну́жды Го́споду помо́лимся.
Заступи́, спаси́, поми́луй и сохрани́ нас, Бо́же, Твое́ю благода́тию.
Пресвяту́ю, Пречи́стую, Преблагослове́нную, Сла́вную Влады́чицу на́шу Богоро́дицу и Присноде́ву Мари́ю со все́ми святы́ми помяну́вше, са́ми себе́, и друг дру́га, и весь живо́т наш Христу́ Бо́гу предади́м.
Лик: Тебе́, Го́споди.
И диакону глаголющу сия, священник глаголет в себе молитву сию, тайно:
Благоутро́бный и ми́лостивый Бо́же, истязу́яй сердца́ и утро́бы, и та́йная челове́ческая ве́дый еди́н, не бо есть вещь неявле́нна пред Тобо́ю, но вся на́га и обнаже́нна пред очи́ма Твои́ма: ве́дый я́же о мне, да не омерзи́ши мя, ниже́ лица́ Твоего́ отврати́ши от мене́, но пре́зри моя́ прегреше́ния в час сей, презира́яй челове́ков грехи́ в покая́ние, и омы́й мою́ скве́рну теле́сную и скве́рну душе́вную, и всего́ мя освяти́ всесоверше́нною си́лою Твое́ю неви́димою и десни́цею духо́вною, да не свобо́ду ины́м возвеща́яй, и сию́ подава́яй ве́рою соверше́нною, Твоего́ неизрече́ннаго человеколю́бия сам, я́ко раб греха́, неиску́сен бу́ду. Ни, Влады́ко, еди́не благи́й и человеколюби́вый, да не возвращу́ся смире́н, но низпосли́ мне си́лу с высоты́, и укрепи́ мя к слу́жбе предлежа́щаго Твоего́ та́инства, вели́каго и пренебе́снаго: и вообрази́ Христа́ Твоего́ в хотя́щем [или в хотя́щей] па́ки роди́тися, мои́м окая́нством: и назида́й его́ на основа́нии Апо́стол и проро́к Твои́х, и да не низложи́ши, но насади́ его́ насажде́ние и́стины, во святе́й Твое́й собо́рней и апо́стольстей Це́ркви, и да не восто́ргнеши: я́ко да преуспева́ющу ему́ во благоче́стии, сла́вится и тем всесвято́е и́мя Твое́, Отца́ и Сы́на и Свята́го Ду́ха, ны́не и при́сно и во ве́ки веко́в, ами́нь.
Подобает ведати, яко не возглашает, но ами́нь в себе глаголет.
Таже глаголет молитву сию велегласно:
Ве́лий еси́, Го́споди, и чу́дна дела́ Твоя́, и ни еди́но же сло́во дово́льно бу́дет к пе́нию чуде́с Твои́х. [Трижды.]
Ты бо, хоте́нием от не су́щих во е́же бы́ти приведы́й вся́ческая, Твое́ю держа́вою содержи́ши тварь, и Твои́м про́мыслом стро́иши мiр: Ты от четы́рех стихи́й тварь сочини́вый, четы́рми времены́ круг ле́та венча́л еси́. Тебе́ трепе́щут у́мныя вся си́лы, Тебе́ пое́т со́лнце, Тебе́ сла́вит луна́, Тебе́ прису́тствуют зве́зды, Тебе́ слу́шает свет, Тебе́ трепе́щут бе́здны, Тебе́ рабо́тают исто́чницы. Ты просте́рл еси́ не́бо, я́ко ко́жу, Ты утверди́л еси́ зе́млю на вода́х, Ты огради́л еси́ мо́ре песко́м, Ты ко отдыха́нием возду́х пролия́л еси́. А́нгельския си́лы Тебе́ слу́жат, Арха́нгельстии ли́цы Тебе́ кла́няются, многоочи́тии Херуви́ми и шестокрила́тии Серафи́ми, о́крест стоя́ще и облета́юще, стра́хом непристу́пныя сла́вы Твоея́ покрыва́ются. Ты бо Бог Сый неопи́санный, безнача́льный же и неизглаго́ланный, прише́л еси́ на зе́млю, зрак раба́ прии́м, в подо́бии челове́честем быв, не бо терпе́л еси́, Влады́ко, милосе́рдия ра́ди ми́лости Твоея́, зре́ти от диа́вола му́чима ро́да челове́ча, но прише́л еси́ и спасл еси́ нас. Испове́дуем благода́ть, пропове́дуем ми́лость, не таи́м благодея́ния: естества́ на́шего ро́ды свободи́л еси́, де́вственную освяти́л еси́ утро́бу рождество́м Твои́м. Вся тварь воспева́ет Тя я́вльшагося: Ты бо Бог наш, на земли́ яви́лся еси́, и с челове́ки пожи́л еси́. Ты Иорда́нския струи́ освяти́л еси́, с Небесе́ низпосла́вый Свята́го Твоего́ Ду́ха, и главы́ та́мо гнездя́щихся сокруши́л еси́ змие́в.
Ты у́бо, Человеколю́бче Царю́, прииди́ и ны́не наи́тием Свята́го Твоего́ Ду́ха, и освяти́ во́ду сию́. [Трижды.]
И даждь ей благода́ть избавле́ния, благослове́ние Иорда́ново, сотвори́ ю́ нетле́ния исто́чник, освяще́ния дар, грехо́в разреше́ние, неду́гов исцеле́ние, де́монов всегуби́тельство, сопроти́вным си́лам непристу́пную, А́нгельския кре́пости испо́лнену. Да бежа́т от нея́ наве́тующии созда́нию Твоему́: я́ко и́мя Твое́, Го́споди, призва́х, ди́вное и сла́вное, и стра́шное сопротивным.
И знаменает воду трижды, погружая персты в воде, и дунув на ню, глаголет:
Да сокруша́тся под зна́мением о́браза Креста́ Твоего́ вся сопроти́вныя си́лы. [Трижды.]
Мо́лимся Тебе́, Го́споди, да отсту́пят от нас вся возду́шная и неявле́нная привиде́ния: и да не утаи́тся в воде́ сей де́мон те́мный: ниже́ да сни́дет с креща́ющимся [или со креща́ющеюся] дух лука́вый, помраче́ние помысло́в, и мяте́ж мы́сли наводя́й: но Ты, Влады́ко всех, покажи́ во́ду сию́, во́ду избавле́ния, во́ду освяще́ния, очище́ние пло́ти и ду́ха, осла́бу уз, оставле́ние прегреше́ний, просвеще́ние душ, ба́ню пакибытия́, обновле́ние ду́ха, сыноположе́ния дарова́ние, одея́ние нетле́ния, исто́чник жи́зни. Ты бо рекл еси́, Го́споди: измы́йтеся, и чи́сти бу́дете, отыми́те лука́вства от душ ва́ших. Ты дарова́л еси́ нам свы́ше па́ки рожде́ние водо́ю и Ду́хом. Яви́ся, Го́споди, на воде́ сей, и даждь претвори́тися в ней креща́емому во е́же отложи́ти у́бо ве́тхаго челове́ка, тле́емаго по по́хотем пре́лести, облещи́ся же в но́ваго, обновля́емаго по о́бразу созда́вшаго его́: да бы́в сра́слен подо́бию сме́рти Твоея́ креще́нием, о́бщник и воскресе́ния бу́дет: и сохрани́в дар Свята́го Твоего́ Ду́ха и возрасти́в зало́г благода́ти, прии́мет по́честь го́рняго зва́ния, и сопричте́тся перворожде́нным напи́санным на Небеси́, в Тебе́ Бо́зе и Го́споде на́шем Иису́се Христе́.
Я́ко Тебе́ подоба́ет сла́ва, держа́ва, честь и поклоне́ние вку́пе со безнача́льным Твои́м Отце́м, и со Пресвяты́м, и Благи́м, и Животворя́щим Твои́м Ду́хом, ны́не и при́сно и во ве́ки веко́в.
Лик: Ами́нь.
Священник: Мир всем.
Лик: И ду́хови твоему́.
Диакон: Главы́ ва́ша Го́сподеви приклони́те.
Лик: Тебе́, Го́споди.
И вдунет трижды в сосуд елея, и знаменает трижды сей, сиесть елей держимый от диакона, и рекшу ему:
Го́споду помо́лимся.
Священник же глаголет молитву:
Влады́ко Го́споди Бо́же оте́ц на́ших, су́щим в ковче́зе Но́еве голуби́цу посла́вый, суче́ц ма́сличный иму́щую во усте́х, примире́ния зна́мение, спасе́ния же от пото́па и благода́ти та́инство о́ными предобрази́вый, и ма́сличный плод, во исполне́ние святы́х Твои́х та́ин пода́вый: тем и бы́вших в зако́не Ду́ха Свята́го испо́лнивый, и су́щих в благода́ти соверша́яй: Сам благослови́ и сей еле́й, си́лою и де́йством, и наи́тием Свята́го Твоего́ Ду́ха, я́коже бы́ти тому́ пома́занию нетле́ния, ору́жию пра́вды, обновле́нию души́ и те́ла, вся́каго диа́вольскаго де́йства отгна́нию, во измене́ние всех зол, помазу́ющимся ве́рою, или́ вкуша́ющим от него́ в сла́ву Твою́ и единоро́днаго Твоего́ Сы́на, и Пресвята́го, и Блага́го, и Животворя́щаго Твоего́ Ду́ха, ны́не и при́сно и во ве́ки веко́в.
Лик: Ами́нь.
Диакон: Во́нмем.
Священник, поя Аллилу́иа трижды с людьми, творит кресты три елеем в воде.
Таже возглашает: Благослове́н Бог, просвеща́яй и освяща́яй вся́каго челове́ка, гряду́щаго в мiр, ны́не и при́сно и во ве́ки веко́в.
Лик: Ами́нь.
И приносится крещаемый. Священник же вземлет от елея двема персты, и творит креста образ на челе и персех, и на междорамии, глаголя:
Помазу́ется раб Бо́жий [или раба́ Бо́жия] (имярек), еле́ем ра́дования, во и́мя Отца́ и Сы́на и Свята́го Ду́ха, ами́нь.
И назнаменует его перси, и междорамия.
На персех убо глаголя: Во исцеле́ние души́ и те́ла.
На ушесех же: В слы́шание ве́ры.
На руках: Ру́це Твои́ сотвори́сте мя и созда́сте мя.
На ногах: Во е́же ходи́ти ему́ [или ей] по стопа́м за́поведей твои́х.
И егда помажется все тело, крещает его священник, права его держа, и зряща на восток, глаголя:
Креща́ется раб Бо́жий [или раба́ Бо́жия] (имярек), во и́мя Отца́, ами́нь. И Сы́на, ами́нь. И Свята́го Ду́ха, ами́нь.
На коемждо приглашении низводя его и возводя. По крещении же умывает священник руце, поя с людьми:
Псалом 31:
Блаже́ни, и́хже оста́вишася беззако́ния и и́хже прикры́шася греси́. Блаже́н муж, eму́же не вмени́т Госпо́дь греха́, ниже́ есть во усте́х eго́ лесть. Я́ко умолча́х, обетша́ша ко́сти моя́, от е́же зва́ти ми весь день. Я́ко день и нощь отяготе́ на мне рука́ Твоя́, возврати́хся на страсть, егда́ унзе́ ми терн. Беззако́ние мое́ позна́х и греха́ моего́ не покры́х, рех: испове́м на мя беззако́ние мое́ Го́сподеви, и Ты оста́вил еси́ нече́стие се́рдца моего́. За то помо́лится к Тебе́ всяк преподо́бный во вре́мя благопотре́бно: оба́че в пото́пе вод мно́гих к нему́ не прибли́жатся. Ты еси́ прибе́жище мое́ от ско́рби обдержа́щия мя: ра́досте моя́, изба́ви мя от обыше́дших мя. Вразумлю́ тя и наста́влю тя на путь сей, во́ньже по́йдеши, утвержу́ на тя о́чи Мои́. Не бу́дите я́ко конь и меск, и́мже несть ра́зума: брозда́ми и уздо́ю че́люсти их востя́гнеши, не приближа́ющихся к тебе́. Мно́ги ра́ны гре́шному, упова́ющаго же на Го́спода ми́лость обы́дет. Весели́теся о Го́споде, и ра́дуйтеся, пра́веднии, и хвали́теся вси пра́вии се́рдцем.
И облачая его во одеяния, глаголет:
Облача́ется раб Бо́жий, [или раба́ Бо́жия] (имярек), в ри́зу пра́вды, во и́мя Отца́ и Сы́на и Свята́го Ду́ха, ами́нь.
И поется тропарь, во глас 8:
Ри́зу мне пода́ждь све́тлу, / одея́йся све́том, я́ко ри́зою, / многоми́лостиве Христе́ Бо́же наш.
ПОСЛЕДОВАНИЕ СВЯТАГО МVРОПОМАЗАНИЯ
И по еже облещи его молится священник, глаголя молитву сию:
Благослове́н еси́ Го́споди Бо́же Вседержи́телю, исто́чниче благи́х, со́лнце пра́вды, возсия́вый су́щим во тьме свет спасе́ния, явле́нием единоро́днаго Твоего́ Сы́на и Бо́га на́шего: и дарова́вый нам недосто́йным блаже́нное очище́ние во святе́й воде́, и боже́ственное освяще́ние в животворя́щем пома́зании: и́же и ны́не благоволи́вый па́ки роди́ти раба́ Твоего́ новопросвеще́ннаго [или рабу́ Твою́ новопросвеще́нную] водо́ю и Ду́хом, и во́льных и нево́льных грехо́в оставле́ние тому́ дарова́вый. Сам Влады́ко, Всецарю́ благоутро́бне, да́руй тому́ и печа́ть да́ра свята́го и всеси́льнаго, и покланя́емаго Твоего́ Ду́ха, и причаще́ние свята́го Те́ла и честны́я Кро́ве Христа́ Твоего́. Сохрани́ его́ в Твое́м освяще́нии, утверди́ в правосла́вной ве́ре, изба́ви от лука́ваго, и всех начина́ний его́: и спаси́тельным Твои́м стра́хом в чистоте́ и пра́вде ду́шу его́ соблюди́, да во вся́ком де́ле и сло́ве благоугожда́яй Тебе́, сын и насле́дник бу́дет Небе́снаго Твоего́ Ца́рствия.
Возгласно: Я́ко Ты еси́ Бог наш, Бог е́же ми́ловати и спаса́ти, и Тебе́ сла́ву возсыла́ем, Отцу́ и Сы́ну и Свято́му Ду́ху, ны́не и при́сно и во ве́ки веко́в.
Лик: Ами́нь.
И по молитве помазует крестившагося святым мvром, творя креста образ:
На челе, и очесех, и ноздрех, и устех, и обоих ушесех, и персех, и руках, и ногах,
и глаголя: Печа́ть да́ра Ду́ха Свята́го. Ами́нь.
Таже творит священник с восприемником и младенцем круга образ.
И поем: Ели́цы во Христа́ крести́стеся, / во Христа́ облеко́стеся, / аллилу́иа. [Трижды.]
Диакон: Во́нмем.
Таже прокимен, глас 3:
Госпо́дь просвеще́ние мое́ и Спаси́тель мой, / кого́ убою́ся? Стих: Госпо́дь защи́титель живота́ моего́, от кого́ устрашу́ся?
Посем диакон: Прему́дрость.
И чтец: К Ри́мляном посла́ния свята́го Апо́стола Па́вла чте́ние.
И паки диакон: Во́нмем.
Апостол к Римляном [зачало 91, Рим 6: 3-11]:
Бра́тие, ели́цы во Христа́ Иису́са крести́хомся, в смерть Его́ крести́хомся. Спогребо́хомся у́бо Ему́ креще́нием в смерть: да я́коже воста́ Христо́с от ме́ртвых сла́вою О́тчею, та́ко и мы во обновле́нии жи́зни ходи́ти на́чнем. А́ще бо сообра́зни бы́хом подо́бию сме́рти Его́, то и воскресе́нию бу́дем. Сие́ ве́дяще, я́ко ве́тхий наш челове́к с Ним распя́тся, да упраздни́тся те́ло грехо́вное, я́ко ктому́ не рабо́тати нам греху́. Уме́рый бо оправди́ся от греха́. А́ще ли умро́хом со Христо́м, ве́руем, я́ко и жи́ви бу́дем с Ним: Ве́дяще, я́ко Христо́с воста́ от ме́ртвых, ктому́ уже́ не умира́ет, смерть Ему́ ктому́ не облада́ет. Е́же бо у́мре, греху́ у́мре еди́ною, а е́же живе́т, Бо́гови живе́т. Та́кожде и вы помышля́йте себе́, ме́ртвым у́бо бы́ти греху́, живы́м же Бо́гови, о Христе́ Иису́се, Го́споде на́шем.
Иерей: Мир ти.
И чтец: И ду́хови твоему́.
Диакон: Прему́дрость, во́нмем.
Чтец: Аллилу́иа.
Посем диакон: Прему́дрость, про́сти, услы́шим свята́го Ева́нгелиа.
Иерей: Мир всем.
Людие: И ду́хови твоему́.
Иерей: От Матфе́а свята́го Ева́нгелиа чте́ние.
Лик: Сла́ва Тебе́, Го́споди, сла́ва Тебе́.
Диакон: Во́нмем.
Евангелие от Матфеа, зачало 116, [Мф. 28: 16-20]:
Во вре́мя о́но, единиина́десять ученицы́ идо́ша в Галиле́ю, в го́ру, а́може повеле́ им Иису́с: И ви́девше Его́, поклони́шася Ему́: о́ви же усумне́шася. И присту́пль Иису́с рече́ им, глаго́ля: даде́ся Ми вся́ка власть на небеси́ и на земли́. Ше́дше научи́те вся язы́ки, крестя́ще их во и́мя Отца́ и Сы́на и Свята́го Ду́ха, уча́ще их блюсти́ вся, ели́ка запове́дах вам. И се, Аз с ва́ми есмь во вся дни, до сконча́ния ве́ка, ами́нь.
Таже ектения:
Диакон: Поми́луй нас, Бо́же, по вели́цей ми́лости Твое́й, мо́лим Ти ся, услы́ши и поми́луй.
Лик: Го́споди, поми́луй, трижды.
Еще́ мо́лимся о Вели́ком Господи́не и отце́ на́шем Святе́йшем Патриа́рхе имярек, и о господи́не на́шем преосвяще́ннейшем митрополи́те [или архиепи́скопе, или епи́скопе] имярек [егоже есть область], и о всей во Христе́ бра́тии на́шей.
Еще́ мо́лимся о Богохрани́мей стране́ на́шей, власте́х и во́инстве ея́, да ти́хое и безмо́лвное житие́ поживе́м во вся́ком благоче́стии и чистоте́.
Еще́ мо́лимся о ми́лости, жи́зни, ми́ре, здра́вии, спасе́нии и оставле́нии грехо́в раба́ Бо́жия имярек, восприе́мника.
Еще́ мо́лимся о новопросвеще́нном рабе́ Бо́жии [или о новопросвеще́нной рабе́ Бо́жией] имярек. О е́же сохране́ну бы́ти ему́ в ве́ре чи́стаго испове́дания, во вся́ком благоче́стии же и исполне́нии за́поведей Христо́вых, во вся дни живота́ его́.
Священник: Я́ко ми́лостив и человеколю́бец Бог еси́, и Тебе́ сла́ву возсыла́ем, Отцу́ и Сы́ну и Свято́му Ду́ху, ны́не и при́сно и во ве́ки веко́в.
Лик: Ами́нь.
Священник: Сла́ва Тебе́, Христе́ Бо́же, упова́ние на́ше, сла́ва Тебе́.
Лик: Сла́ва, и ны́не: Го́споди, поми́луй, трижды. Благослови́.
И священник творит отпуст.
ИЗМОВЕНИЕ ВО ОСМЫЙ ДЕНЬ
И во осмый день паки приносят его в церковь, во еже омыти. И разрешает ему священник пелены и пояс, глаголя молитвы сия:
Диакон: Го́споду помо́лимся.
Лик: Го́споди, поми́луй.
Иерей: Избавле́ние грехо́в святы́м Креще́нием рабу́ Твоему́ [или рабе́ Твое́й] дарова́вый и жизнь па́ки рожде́ния ему́ пода́вый: Сам Влады́ко Го́споди, просвеще́ние лица́ Твоего́ в се́рдце его́ озаря́ти вы́ну благоволи́, щит ве́ры его́ не наве́тован от враго́в соблюди́: нетле́ния оде́жду, е́юже оде́яся, нескве́рну в нем и небла́знену сохрани́, неруши́му в нем духо́вную печа́ть благода́тию Твое́ю соблюда́я, ми́лостив ему́же и нам быва́я, по мно́жеству щедро́т Твои́х.
Я́ко благослови́ся и просла́вися, пречестно́е и великоле́пое и́мя Твое́, Отца́ и Сы́на и Свята́го Ду́ха, ны́не и при́сно и во ве́ки веко́в.
Лик: Ами́нь.
Молитва вторая.
Диакон: Го́споду помо́лимся.
Лик: Го́споди, поми́луй.
Иерей: Влады́ко Го́споди Бо́же наш, купе́лию небе́сное осия́ние креща́емым подава́яй, па́ки роди́вый раба́ Твоего́ новопросвеще́ннаго [или рабу́ Твою́ новопросвеще́нную] водо́ю и Ду́хом, и во́льных и нево́льных грехо́в оставле́ние тому́ дарова́вый, возложи́ на него́ ру́ку Твою́ держа́вную и сохрани́ его́ в си́ле Твоея́ бла́гости, некра́домо обруче́ние сохрани́ и сподо́би его́ в жизнь ве́чную и в Твое́ благоугожде́ние.
Я́ко Ты еси́ освяще́ние на́ше, и Тебе́ сла́ву возсыла́ем, Отцу́ и Сы́ну и Свято́му Ду́ху, ны́не и при́сно и во ве́ки веко́в.
Лик: Ами́нь.
Иерей: Мир всем.
Лик: И ду́хови твоему́.
Диакон: Главы́ ва́ша Го́сподеви приклони́те.
Лик: Тебе́ Го́споди.
Иерей: Оде́явыйся [или оде́явшаяся] в Тя, Христа́ и Бо́га на́шего, Тебе́ подклони́ с на́ми свою́ главу́, его́же сохрани́ непобеди́ма подви́жника пребы́ти на всу́е вражду́ нося́щих на него́ и на ны, Твои́м же нетле́нным венце́м да́же до конца́ победи́тели вся покажи́.
Я́ко Твое́ есть, е́же ми́ловати и спаса́ти, и Тебе́ сла́ву возсыла́ем со безнача́льным Твои́м Отце́м, и Пресвяты́м, и Благи́м, и Животворя́щим Твои́м Ду́хом, ны́не и при́сно и во ве́ки веко́в.
Лик: Ами́нь.
И разрешает пояс отрочате, и пелены, и соединив края их, омочает водою чистою я, и кропит отроча, глаголя:
Оправда́лся еси́ [или оправда́лася еси́]. Просвети́лся еси́. Освяти́лся еси́. Омы́лся еси́ и́менем Го́спода на́шего Иису́са Христа́ и Ду́хом Бо́га на́шего.
И взем губу новую напоенную водою, отирает лице его с главою, и перси, и прочая, глаголя:
Крести́лся еси́ [или крести́лася еси́]. Просвети́лся еси́. Мvропома́зался еси́. Освяти́лся еси́. Омы́лся еси́: во и́мя Отца́ и Сы́на и Свята́го Ду́ха, ами́нь.