старцу Сергию Кольчугинскому




АКАФИСТ

(отцу Сергию Емельяновичу Евстигнееву)

 

Кондак 1

Избранниче Царя Сил Господа Иисуса Христа, возсиявый светом дивных чудес во граде Кольчугино и житием праведным ко спасению ны наставивый, всем святым в земли Сибирстей просиявшим сомолитвенниче и лику праведных сопричастниче, не престай молитися за нас грешных, память твою чтущих и тепле из глубины души взывающих:

Радуйся, старче Сергие, // милостивый о нас к Богу предстателю.

 

Икос 1

Ангелам уподобился еси, блаженне, песнь хвалебную благих подателю Богу душею непрестанно воспевая, зане живый на земли, в горняя восход положил еси, преподобне, волю Творца непреложно творя и заповеди Его исполняя. Темже и до ныне молитвою твоею чудодействуеши, помощь подаяй поющим ти:

Радуйся, Богом данный талант бдением, постом и молитвою умноживый; радуйся, Господа выну пред тобою предзревый.

Радуйся, именем Господним вооружився, брань невидимую в душе твоей препобедивый; радуйся, Христу во вся дни живота твоего с благоговением послуживый.

Радуйся, Христов угодниче, примером твоим нас ободряющий; радуйся, рабе Божий, благий и верный.

Радуйся, яко чистому сердцу твоему, Бог богов глагола волю Свою; радуйся, яко Ангели и вся Силы Небесныя о тебе радуются.

Радуйся, старче Сергие, // милостивый о нас к Богу предстателю.

 

Кондак 2

Воспети дерзая недостойными усты славу избранника Божия, Царствие Небесное внутрь себе стяжавшаго, недоумеем кую похвалу воздати Богу, даровавшему нам таковаго угодника, и сего ради смиренномудренно рцем: Аллилуиа.

Икос 2

Разум не постигает постничества дивнаго твоего, еже явил еси с рождения, отче Сергие, в среду и пяток млека от сосцу матерня никакоже вкушая. Летами же возрастая, плоть твою воистину духови покорил еси, пример явив святаго воздержания. Сего ради сподобился еси Божией благодати чудодейственных даров, темже и мы ублажаем тя:

Радуйся, соименнику преподобному Сергию воздержанием уподобивыйся; радуйся, Богу от чрева матерня освятивыйся.

Радуйся, странником и пришельцем в мире сем бывый; радуйся, строгому держанию постов нас научивый.

Радуйся, младенческую простоту души твоея до старости сохранивый; радуйся, к Богу восхождение издетстка в сердце положивый.

Радуйся, Духа Святаго благодатию измлада воспитанный; радуйся, яко Ангели и вся Лики Небесныя о честном житии твоем радуются.

Радуйся, старче Сергие, // милостивый о нас к Богу предстателю.

 

Кондак 3

Силою Вышняго излей, яко преизрядный источниче, свет веры истинной, любви неоскудевающей и надежды несумненной на души наша страждущия, понеже елея благих дел отнюдь не имамы и светильницы наши угасают в мирской суете. Темже, отче Сергие, подаждь нам изцеление благодатное, возведи горе ум наш, омраченный неведением, да с тобою и всеми святыми на небесех предстоя, радостно сретим Господа, поюще: Аллилуиа.

 

Икос 3

Имея велию ревность по Бозе и любовь к трудам земным, ты на поле за каждым класом низко склонялся еси, молитву с поклонами творя. И Господь видя труды твоя тайныя, яве воздаше ти и в житницу избранных Своих пожал есть тя. Помози же и нам подвигом добрым подвизатися и до конца нести крест свой, Богом коемуждо по силе данный, вопия таковая:

Радуйся, Христу Богу смирением и кротостию подражавый; радуйся, добродетели тайно творити нас научавый.

Радуйся, трудами многими ниву сердца твоего возделавый; радуйся, в праздности никогда же пребывый.

Радуйся, цвете добродетелей, богокрасный плод чудес и изцелений принесый; радуйся, класе златый, в житницу Царя Небеснаго собранный.

Радуйся, Божиим светом просвещенный; радуйся, небесное паче земнаго возлюбивый.

Радуйся, старче Сергие, // милостивый о нас к Богу предстателю.

 

Кондак 4

Бурю жития мирскаго оставивый, благоговел еси, отче, к Божественной Литургии, святою благодатию души верных питающей. Темже научен был неким мужем пищу не вкушати, дондеже не окончится Литургии служение. Ты же, быв еще малым отроком, вопроси его: како можно уведати, будучи далече от храма, егда оная имать свершитися. Тогда, вставшу же тебе на стопы неведомого Старца, отверзостася уши твои и ты Песнь Херувимскую услышаше, Небесными Силами Бога Саваофа воспеваемую: Аллилуиа.

 

Икос 4

Слышаше земля Кузнецкая о житии твоем праведном, отче Сергие, понеже добродетельми твоими облагоухал еси простая сердца. Таже радости велией вся чада твоя исполнишася, егда Божией славы сияние узрели суть на образе твоем, сего ради и мы ублажаем тя:

Радуйся, Божией милости сокровище; радуйся, изцелений благодатных источниче.

Радуйся, яко лик твой еще при жизни сей осиян бе светом небесным; радуйся, яко Бог увенча тя венцем нетленным.

Радуйся, светильниче, от Солнца Правды Иисуса Христа возженный; радуйся, праведниче, в Небесные Врата невозбранно возшедый.

Радуйся, яко Божия благодать на всех приходящих к мощем твоим изливается; радуйся, верне, яко свещу красную благочестия своего уяснивый.

Радуйся, старче Сергие, // милостивый о нас к Богу предстателю.

 

Кондак 5

Боготечней звезде уподобился еси, отче Сергие, зане услышав глас Иоаннов провещающ: Покайтеся, приближися бо Царствие Божие, потщался еси в покаянии и умилении вся дни живота твоего препроводити, уготовляя себе Единому Благому Светодавцу и Жениху душ наших. Тако в ризу спасения нетленную облекшися, возблагодарил еси Господа: Аллилуиа.

 

Икос 5

Видев очима прозорливыма согрешения притекавших к тебе, старче Сергие, некиих ты с кротостию обличал еси, обаче всех к покаянию подвизал еси и о гресех своих попечение имети повелевал еси, тем в Царствие Божие восхождению научая. Сего ради молитвами твоими спасаемии благодарственная восписуем ти:

Радуйся, Христова Евангелия изрядный послушниче; радуйся, чудес предивных источниче.

Радуйся, смирением велиим даже до небес вознесенный; радуйся, добре куплю содеявый.

Радуйся, дух мирный стяжавый; радуйся, сего ради тысящи вокруг тебе спасавый.

Радуйся, Рай Адамом утерянный восприявый; радуйся, постниче, преподобно поживый.

Радуйся, старче Сергие, // милостивый о нас к Богу предстателю.

 

Кондак 6

Проповедуют людие чудеса, тобою содеянныя, яко укрепляемь Христа необоримою силою, ад победившаго и державу вражию низложившаго, ты, отче Сергие, молитвою бесноватую девицу исцелил еси. И ныне чудеса на месте погребения твоего деются: одержимии бесами облегчение получают, недужнии врачуются, сущии в бедах и скорбех утешаются. Мы же радующеся, яко много может молитва праведнаго поспешествуема во благое, поем: Аллилуиа.

 

Икос 6

Возсия в твоем житии Христова проповедания благодать: Приидите ко Мне вси труждающиися и обремененнии и Аз упокою вы. Зане ты, отче Сергие, Христу подражая и любви заповедь исполняя, принимал еси всех в скорбех и болезнех притекавших к тебе, врачуя Божией благодатию душевныя и телесныя раны, темже взываем ти:

Радуйся, в беде сущих скорый помощниче и утешителю; радуйся, недугующих благодатный целителю.

Радуйся, бесов устрашение; радуйся, козней диавольских попрание.

Радуйся, небесныя правды поборниче; радуйся, в делех добрых помощниче.

Радуйся, пред Престолом Святыя Троицы о нас усердный молитвенниче; радуйся, земли Кузнецкия защито и похвало.

Радуйся, старче Сергие, // милостивый о нас к Богу предстателю.

 

Кондак 7

Хотя ко Христу люди привести в годину помрачения, отступничества и злохуления, ты, угодниче Божий, яко светильник духовный явился еси во граде Кольчугино, ко спасению наставляя. И аще сокры земля тело твое святое, обаче чудеса, Богом являемые по молитвам твоим, тя светла верху горы постави сияюща. Не престай же молитися за ны, старче Сергие, радостно славословящих Богу: Аллилуиа.

 

Икос 7

Нова предобра врача и ходатая преизрядна пред Богом обретше тя, старче Сергие, к святым мощем твоим притекаем во всякой скорби и болезни и умиленно просим: помози нам, предивный отче, немощныя укрепи, унывающия ободри, падшия возстави, в нуждах помощь благовременную посли, да с радостию сердца вопием ти:

Радуйся, яко место упокоения твоего многими чудесы прославися; радуйся, яко оное местом псалмопений и молитв сташе.

Радуйся, яко хромии и язвленнии на могиле твоей изцеление получают; радуйся, яко твои мощи прославишася чудесы.

Радуйся, яко о Бозе Живе сердце твое возрадовася; радуйся, яко боротися со страстьми и прилогами вражиими нам помогаеши.

Радуйся, пред престолом Божиим присно о нас молящийся; радуйся, розго лозы Христовой, во Евангельском житии возрастшая.

Радуйся, старче Сергие, // милостивый о нас к Богу предстателю.

 

Кондак 8

Странник и пришлец был еси в мире сем, отче Сергие, обаче море житейское, волнуемое страстей бурею и нахожденьми искушений вражиих, невредимо преплыл еси на лодии смирения, образ всем являя чистотою жития твоего. Ныне же воздвигни нас немощных, научи во всех обстояниех и скорбех непрестанно благодарити Господа: Аллилуиа.

 

Икос 8

Весь был еси в радость и сладость притекавшим к тебе, отче Сергие. Тако христианину в скорби сущу утешение обещал еси, аще токмо не поропщет, но ко Господу со благодарением воззовет. Таже провозвестил еси, старче, встречу c ним на мосту. Услышанный Господом, той благодарити тя возвратися. Обаче встретив тя на мосту несому хоронити со множеством народа шествующим, прозорливости же твоея удивися зело, темже и мы воспеваем ти:

Радуйся, Христовой нищетою обогативыйся; радуйся, в горния обители в радость вечную отшедый.

Радуйся, образе духовныя кротости; радуйся, словом Божиим души наша врачевавый.

Радуйся, слепыма очима далече зревый, радуйся, под покровом Божией Матери живый.

Радуйся, благочестием и смирением Богу угодивый, радуйся, молитвенниче о нас присный.

Радуйся, старче Сергие, // милостивый о нас к Богу предстателю.

 

Кондак 9

Всяк христианин и мы грешнии хощем подражати тебе житием, отче Сергие, во еже ко Христу, яко ты, в простоте сердца Евангельски восходити, заповеди Его со смирением исполняя и милость о Господе творя. Обаче гордостию и нерадением в разслабление впадохом и тако заживо умирая, вопием ти: умоли Господа о нас недостойных, да по неизреченней Его милости будем спасении и чистым сердцем возблагодарим: Аллилуиа.

 

Икос 9

Ветии многовещаннии аще и мудрости исполненнии, обаче не возмогут изрещи радости праведников во Царствии Божием и величества славы Святыя Троицы, осиявающей светом любве Своея всех верных. Ты же, старче Сергие, наслаждаяся сего неизреченнаго лицезрения, молися за нас, грешных, поющих ти таковая:

Радуйся, вся богатства и блага земная презревый; радуйся, в покаянии глубоцем землю слезами оросивый.

Радуйся, кротостию и смирением доброй овчате уподобивыйся; радуйся, нищетою духовною обогативыйся.

Радуйся, за Христа поношения и лишения приявый; радуйся, веру и мир душевный до конца сохранивый.

Радуйся, лишь Божией правды алкавый и жаждавый; радуйся, многими труды духовными сердце свое очистивый.

Радуйся, старче Сергие, // милостивый о нас к Богу предстателю.

 

Кондак 10

Спасти хотя душу свою, юродством жития твоего буйство мира сего растлеваемаго страстьми и похотьми плотскими обличил еси, светом Евангелия тьму его являя. Мы же Богом и тобою умудреннии, отложим вся земная попечения и горе имея сердца, радостно понесем крест смирения, любве и послушания, воспевая благодарне Всемилостивому Творцу: Аллилуиа.

 

Икос 10

Стена необоримая был еси всему краю Кузнецкому, богомудрый отче Сергие, и будущая, яко близ сущая, сердцем чистым твоим прозирая, предрекл еси обители иночестей во граде Кольчугино быти. Ныне видя словеса твоя сбывающаяся, инокини обители Серафимо-Покровския со всеми верными поклоняются ти во умилении зовуще:

Радуйся, дивный старче, иночествующих во граде Кольчугино начало; радуйся, подвижниче славный, жития равноангельскаго ревнителю.

Радуйся, мирян добрый кормчий и монашествующих наставниче; радуйся, чудес благодатный источниче.

Радуйся, молитвы преподобных в помощь нам призываяй; радуйся, от Бога зрение духовное приявый.

Радуйся, пустыню сердца твоего в сад живоносный превративый; радуйся, яко земная препобедив, сокровища небесныя приобрел еси

Радуйся, старче Сергие, // милостивый о нас к Богу предстателю.

 

Кондак 11

Пение всеумиленное от теплоты сердечныя приносимое и благодарение о всех благодеяниях в заступлении, изцелении и помощи благодатней, якоже и моление слезное выну приими, святый отче, о нуждах наших, да возрадовавшися духом воспоем Дивнаго во святых Своих Бога: Аллилуиа.

 

Икос 11

Светозарное светило земли Кузнецкия, предивный Сергие, подвиги и труды твоя кто возможет повесть, ибо сокрыл еси я от славы человеческия. Мы же зрим токмо плоды трудов твоих, яже ты явил еси во мнозем терпении и любве, в благодатней помощи и прозорливости, кои поданы были тебе суть Единым Сердцеведцем, воздающим яве благим тайноделателем. Сего ради любовию понуждаемии, хвалебное пение приносим ти:

Радуйся, цвете райскаго прозябения; радуйся, простоты и любве рачителю.

Радуйся, яко житию твоему честному Ангели покланяются и человецы тя славят; радуйся, яко со святыми успение твое.

Радуйся, от пророков милоть прозорливости восприявый; Радуйся, апостолом крепостию веры уподобивыйся.

Радуйся, с мучениками венец за труды и подвиги твоя приявый; радуйся, преподобных и праведных ликов сопричастниче.

Радуйся, старче Сергие, // милостивый о нас к Богу предстателю.

 

Кондак 12

Благодать и помощь святаго Архистратига Божия Михаила призывати научал еси, отче, дабы не вотще суетою жительствовати, ниже Божиего покрова лишитися граду Кольчугино и людем земли Кузнецкия. И ныне предстательством начальника Сил Небесных и молитвами твоими охраняемии Вышнему Помощнику и Покровителю благодарне поем: Аллилуиа.

 

Икос 12

Поя и хваля подвиги и труды твоя, подъятые во славу Божию, верныя чада твоя горько плакаше, егда виде мудра наставника своего на одре смерти лежаща. Ты же, старче праведный, утешал их, завещавая по смерти твоей приходити на могилу, и, припадая, глаголати, яко живу сущу, вся беды своя, да помощь от тебе получат. Они же, обрадованнии таковою милостию Божиею, чрез угодника своего являемою, умильно глаголаху:

Радуйся, заступниче наш и молитвенниче о нас грешних; радуйся, призывающих тебе милостивый услышателю.

Радуйся, изцеления и врачьбы с верою тебе молящимся подавающий; радуйся, и бесныя молитвою твоею изцеляющий.

Радуйся, помощь небесную и утешение посылающий; радуйся, боговещанными словесы твоими умудряющий.

Радуйся, богоугодным житием твоим вся ны ко спасению наставляющий; радуйся, яко о тебе радуются людие вси и ангели.

Радуйся, старче Сергие, // милостивый о нас к Богу предстателю.

 

Кондак 13

О праведниче Божий и светильниче земли Кузнецкия, старче Сергие! Предстоя ныне Престолу Владычню со всеми святыми, молися усердно ко Всеблагому Богу, да воздвигнет Он Русь Святую, крепкую верою Православною, да ополчится на врагов наших видимых и невидимых и препобедит силу их, да искоренит Он вся ереси и расколы и нас грешных приведет к познанию истины, во еже нам совокупно воспети Ему песнь хвалебную: Аллилуиа, Аллилуиа, Аллилуиа.

 

Тропарь, глас 2:

Явися чудотворче предивный/ земли Кузнецкия,/ иночествующих начало во граде Кольчугино/ и мирян добрый кормчий,/ праведный старче Сергие,/ всем притекающим к тебе скорый помощниче,/ у Престола Всевышнего ныне предстоя,// поминай нас, чтущих святую память твою.

...





Читайте также:
Гражданская лирика А. С. Пушкина: Пушкин начал писать стихи очень рано вскоре после...
Ограждение места работ сигналами на перегонах и станциях: Приступать к работам разрешается только после того, когда...
Романтизм: представители, отличительные черты, литературные формы: Романтизм – направление сложившеесяв конце XVIII...
Роль языка в формировании личности: Это происходит потому, что любой современный язык – это сложное ...

Поиск по сайту

©2015-2022 poisk-ru.ru
Все права принадлежать их авторам. Данный сайт не претендует на авторства, а предоставляет бесплатное использование.
Дата создания страницы: 2017-10-25 Нарушение авторских прав и Нарушение персональных данных


Поиск по сайту:


Мы поможем в написании ваших работ!
Обратная связь
0.025 с.