Кондак 1
Избранный от лет древних быти Предтечею и Крестителем Спасителя мира Христа Бога, Иоанне Богохвальне, прославляя Прославльшаго тя Господа, похвальная восписуем ти яко большему всех рожденных женами, во плоти Ангелу, покаяния проповеднику, Ты же, яко имеяй велие дерзновение ко Господу от всяких бед свобождай и к покаянию воздвизай нас, любовию тебе зовущих: Радуйся, великий Иоанне пророче, Предтече и Крестителю Господень.
Икос 1
Архангел Гавриил, предстояй пред Богом, послан бысть ко иерею Захарии, еегда он, служа по чину чреды своея, вниде покадити в церковь Гоподню: и, представ одесную Алтаря кадильнаго, благовествоваше о твоем рождестве, великий Иоанне, возвещая Захарии радость и веселие, и яко мнози о рождестве твоем возрадуются. Сего ради и мы дивному о тебе Божию благоволению чудящеся и радующеся, со благоволением в похвалу тебе вопием:
Радуйся, совета Божия неизреченнаго таинниче:
Радуйся, дивнаго смотрения Его исполнение.
Радуйся, прежде лет многих пророчеством Исаии проявленный:
Радуйся, вестниче пред лицем Господним древле пророченный.
Радуйся, предназначенный быти великим Пророком Вышняго:
Радуйся, по обетованию Ангела рожденный.
Радуйся, еще во чреве матери твоея Духа Святаго исполненный:
Радуйся, прежде рождества твоего на великое служение освященный.
Радуйся, неплодства родителей разрешение:
Радуйся, иерея Божия радость и веселие.
Радуйся, дщери Аароновой прозябение:
Радуйся, плод молитвы богодарованный.
Радуйся, великий Иоанне Пророче, Предтече и Крестителю Господень.
Кондак 2
Видя Захария явльшагося ему Ангела, смутися, и страх нападе нань, и не верова словесем благовестия его о рождестве твоем: егда же за неверие немотою связан бысть, удивляшеся преславному чудеси, всем сердцем вопия Богу: Аллилуиа.
Икос 2
Разум неразумеваемый разумети ищуще людие, ждущее Захарию, и чудяхуся умедлившу ему в церкви; изшедшу же ему и не могущу глаголати к ним, но токмо помавающу, разумеша вси, яко видение виде в церкви. Мы же, прославляя, дивнаго Творца чудес Бога, вопием тебе таковая:
Радуйся, благий виновниче немотствования отча:
Радуйся, слез матере твоея пременение на радость.
Радуйся, тоя поношения в людех отъятие:
Радуйся, великое рождшим тя утешение.
Радуйся, яко в шестый месяц о зачатии твоем Пресвятая Дева Мариа в Назарете от Ангела известися:
Радуйся, яко о рождестве твоем мнози возвеселишася.
Радуйся, яко имя благодатное от Ангела нареченное получивый:
Радуйся, яко именем твоим немотствование отца твоего Захарии разрешися.
Радуйся, яко имя Божие о тебе отцем твоим благословися:
Радуйся, яко о чуднем рождестве твоем страх и удивление в окрест живущих явися.
Радуйся, яко по всей стране иудейской о дивном рождестве твоем возвестися:
Радуйся, яко тобою спасение многим в мире сем явися.
Радуйся, великий Иоанне Пророче, Предтече и Крестителю Господень.
Кондак 3
Сила Вышняго разреши неплодство заматоревшия во днех своих праведныя Елисаветы: зачат бо тя, славный Предтече Господень, и таяшеся месяц пять, глаголющи: яко тако мне сотвори Господь во дни, в няже призре отъяти поношение мое в человецех. Егда же прия имущую во чреве Христа, исполнися Духа Свята и возопи гласом велиим: откуду мне сие, яко прииде Мати Господа моего ко мне; с неюже радующися взываше Богу: Аллилуиа.
Икос 3
Имея предъити пред Господом духом и силою Иллиною, еще из чрева матере твоея исполнился еси Духа Святаго, от онудуже и Пророк дивный показался еси, егда во утробе матерее твоея сый, взыгрался еси, радощами пришествию Матери
Господней: Бога бо познал еси носима в ложеснах Благодатныя, и Того матерним гласом проповедал еси: подобаше бо Божественных вещей преславным быти началом. Сему убо благоговейно удивляющеся, с радостию тебе вопием:
Радуйся, еще во утробе матерней предпославшаго тя Господа чудным веселием предъявивый:
Радуйся, яко тебе ради и матери твоей Елисавете воплощение Христово открыся.
Радуйся, яко и та исполнися Духа Свята:
Радуйся, яко и она предивна пророчица явися.
Радуйся, яко от нея Пресвятая Дева Мариа блаженною в женах наречеся:
Радуйся, яко тою Она и Материю Господа наименовася.
Радуйся, яко и безсменный плод Тоя благословенным пронаречеся:
Радуйся, премудрости Божественныя предъявление.
Радуйся, святаго супружества благословение:
Радуйся, неплодных ложесн дивное прозябание.
Радуйся, рождением твоим удививый люди:
Радуйся, светлый Слова гласе.
Радуйся, великий Иоанне Пророче, Предтече и Крестителю Господень.
Кондак 4
Бурею сомнения смущенный, иерей Захария не можаше по слвоесу ангельскому проглаголати. Егда же по рождестве твоем, Предтече Господень, написа благодатное имя твое, абие отверзошася уста и язык его, и глаголаше благословя Бога, и пророчества глаголя: благословен Госопдь Израилев, яко посети и сотвори избавление людем Своим, и ты отроча пророк Вышняго наречешися, поя Тому: Аллилуиа.
Икос 4
Слыша окрест живущии людии о преславном и чудном рождестве твоем, со удивелением глаголаху в себе: что убо отроча сие будет? Мы же тя, преславный Предтече Господень, яко больша всех рожденных женами, достойно чтуще, ублажаем сице:
Радуйся, от зачатия твоего благодатных явлений исполненный:
Радуйся, в рождестве твоем Богом прославленный.
Радуйся, во младенчестве твоем от отца твоего Пророком Вышняго нареченный:
Радуйся, во отрочестве твоем Духом Святым просвещенный и укрепленный.
Радуйся, Бога воплотившагося сродник по плоти бывый:
Радуйся, от Бога высокое звание Предтечи и Крестителя приемый.
Радуйся, заре, Свет Новый миру возвестившая:
Радуйся, звездо, путь, ведущий ко Христу, осветившая.
Радуйся, деннице Солнца незаходимаго:
Радуйся, светильниче Света неугасаемаго.
Радуйся, путь грядущему Христу уготовляяй:
Радуйся, Ангела и человека в себе являяй.
Радуйся, великий Иоанне Пророче, Предтече и Крестителю Господень.
Кондак 5
Богопротивное веление беззаконнаго детоубийцы Ирода изгна тя из дому отча в непроходную пустыню, носима материю, Предтече Господень, идеже и пребывал еси до дне явления твоего ко Израилю, ядый акриды и мед дивий, иБогу вопия: Аллилуиа.
Икос 5
Видяще дивное Божие о тебе промышление, Иоанне Богохвальне, яко от младенческих пелен постническаго жития любитель показался еси, от онудуже Вышняго послан был еси проповедати людем грядущее во Христе спасение, сего ради со удивлением и любовию тебе взываем:
Радуйся, яко еще младенец сый, царя Ирода устрашил еси:
Радуйся, от напраснаго убийства того, десницею Вышняго, сохраненный.
Радуйся, пустыни шипок благовонный:
Радуйся, высотою подвигов твоих всех удививый.
Радуйся, праваго пути верный указателю:
Радуйся, чистоты и целомудрия Предивный хранителю.
Радуйся, Евангельскаго самоотвержения образе совершенный:
Радуйся, монашествующих покрове и утверждение.
Радуйся, богословствующих умов просвещение:
Радуйся, грешным милосердия Божия двери отверзаяй.
Радуйся, кающимся грешником от Господа прощение
подаваяй:
Радуйся, плоды достойны покаяния творити помогаяй.
Радуйся, великий Иоанне Пророче, Предтече и Крестителю Господень.
Кондак 6
Проповедник славный ты, Божественный Предтече, показался еси в пустыне Иорданстей во дни явлении Христа Бога миру, Сего бо, Грядущаго к тебе, показал еси людем, глагля: се Агнец Божий, вземляй грехи мира! Его же мы верою познавше поем Ему: Аллилуиа.
Икос 6
Возсиял еси свет истины, Иоанне Богопросвещение, всем являяй славы Отчия сияние, явльшееся плотски нас ради. Вопиял бо еси в пустыни людем: покайтеся, приближи бо ся Царствие небесное, сотворите плоды достойны покаяния. Се бо
грядет по мне, Иже крестит вы водою и Духом. Сего ради похвальная тебе вопием:
Радуйся, пришествия Мессии возвестителю:
Радуйся, путей Господних уготователю.
Радуйся, ветхия и новыя благодати ходатаю:
Радуйся, пророков пределе и начало апостолов.
Радуйся, гласе Слова благознаменитый:
Радуйся, покаяния проповедниче велегласный.
Радуйся, многих сынов Израилевых ко Господу обративый:
Радуйся, люди совершенны Господеви уготовавый.
Радуйся, фарисеев и саддукев дерзновенно обличивый:
Радуйся, плоды достойны покаяния творити научивый.
Радуйся, просвещения духовнаго указателю:
Радуйся, ищущим предстательства твоего неусыпный заступниче.
Радуйся, великий Иоанне Пророче, Предтече и Крестителю Господень.
Кондак 7
Хотящу от тебе креститися Господу Иисусу, Иоанне Богоблаженне, глаголал еси: аз требую Тобою креститися, обаче повинуяся, рекшу Тому: "остави ныне", воздвигл еси десницу твою на главу Его и крестив нетребующаго очищения, вопиял еси: Аллилуиа.
Икос 7
Новую подая благодать креститися изволивый от тебе Господь, сподоби тя Духа пришествие видети и глас Отеческий с небесе свидетельствующь Его Сыновство слышати: от онудуже в триех лицех единому Богу покланятися нас научил еси. Егоже
бренными прославляюще устнами, в похвалу сия тебе приносим:
Радуйся, троическаго Богоявления первый проповедниче:
Радуйся, в триех лицех единаго Бога истинный поклониче.
Радуйся, Духа Святаго в иде голубине яснозрителю:
Радуйся, снисхождения Его от Отца на Сына свидетелю.
Радуйся, гласа с небесе от Бога Отца слышателю:
Радуйся, явления любве Отчи к Сыну созерцателю.
Радуйся, Сына Божия избранный крестителю:
Радуйся, воли Его святыя исполнителю.
Радуйся, славнаго служения спасению рода человеческаго ревностный рачителю:
Радуйся, великаго таинства крещения первый совершителю.
Радуйся, Божественныя радости вестниче:
Радуйся, новаго завета первый учителю.
Радуйся, великий Иоанне Пророче, Предтече и Крестителю Господень.
Кондак 8
Странное и неизреченное смирение воплотившагося Бога Слова видев, Богоблаженне Крестителю, Божественную Свою Главу тебе приклонивша и рабское крещение приемша, ты и сам весь исполнился еси великаго смирения. Испроси убо
Боголюбезную добродетель сию и нам, одержимым гордостию, яко да от сердца смиренна вопием Богу: Аллилуиа.
Икос 8
Весь благодатных дарований исполненный, течение временныя жизни скончавая, Иоанне Богознамените, всех поучал еси исполнением закона и покаянием благоугождати Господеви. Сего ради благодарственное хваление тебе великому учителю истины воспеваем:
Радуйся, закона и оправданий Господних насадителю:
Радуйся, Иродова беззакония обличителю.
Радуйся, о исправлении того рачителю:
Радуйся, правды ради темничное заключение и узы претерпевый.
Радуйся, за истину во главу усеченный:
Радуйся, яко тело твое от учеников твоих честнее погребеся.
Радуйся, яко Божиим смотрением глава твоя нетленно соблюдеся:
Радуйся, яко та на утешение, освящение и цельбы христианом дадеся.
Радуйся, яко и деснице твоей, крестившей Господа, вернии благочестне покланяются:
Радуйся, яко от тебе многия чудеса теми доныне совершаются.
Радуйся, яко тобою вернии от страстей бесчестия избавляются:
Радуйся, яко тобою грешнии к покаянию воздвизаются.
Радуйся, великий Иоанне Пророче, Предтече и Крестителю Господень.
Кондак 9
Все естество ангельское удивися высоте служения твоего, и Церковь благоговейно прославляет тя, яко друга Христа Бога, прешедшаго пред Ним духом и силою Иллиною. Ревнуя бо по истине, дерзновенно обличал еси фарисеев и беззаконнаго Ирода, от негоже и мученическую кончину приял еси. Покланяющиеся убо честней главе твоей, молимся ти: избави нас от страстей безчестия, да чистым сердцем и усты поем: Аллилуиа.
Икос 9
Витийство всякое земнородных не довлеет достойно восхвалити тя, Иоанне богохвальне: тебе бо уста Христовы похвалиша, высша пророков и больше всех рожденных женами тя наименоваша. От онудуже достойную похвалу принести тебе недоумевающе, вопием ти сицевая:
Радуйся, Церкве Христовы великая славо:
Радуйся, Ангелов предивное чудо.
Радуйся, праотцев радость и прославление:
Радуйся, Пророков высокая похвало.
Радуйся, Апостолов богосветлый венче:
Радуйся, Святителей велелепая красото.
Радуйся, Мучеников в новой благодати начало:
Радуйся, Преподобных совеершение.
Радуйся, Праведных удобрение:
Радуйся, девственников и постников основание.
Радуйся, всех христиан великое утешение:
Радуйся, яко от всех христианских родов имя твое прославляется.
Радуйся, великий Иоанне Пророче, Предтече и Крестителю Господень.
Кондак 10
Спасти мир пришедшаго во плоти Христа Бога благовестилеси и сущим во аде: якоже бо денница, предходящая солнцу, осветил еси во тме и сени смертней седящих, от отьнуду же вскоре Господом изведен был еси со всеми о твека праведными, поя Ему, яко Избавителю и Победителю смерти: Аллилуиа.
Икос 10
Стена и прибежище спасительное всем, молитвенно к тебе притекающим, Божественный Иоанне: сего ради песньми похвальными ублажаем тя сице:
Радуйся, мощный заступниче наш и верный от бед хранителю:
Радуйся, злостраждущих от духов злобы скорый помщниче и избавителю.
Радуйся, неплодствующим благословение от Бога низпосылаяй:
Радуйся, притекающих к тебе с верою от треволнения страстей избавляяй.
Радуйся, во вражде сущих скоро умиротворяяй:
Радуйся, во всякой нужде и печали усердно притекающим к тебе скорую помощь подаваяй.
Радуйся, благотекущих от самообольщения и прелести изъимаяй:
Радуйся, вручающим себе твоему ходатайству в час смертный помогаяй.
Радуйся, любящих тя от воздушных мытарств предстательством своим свобождаяй:
Радуйся, почитающих славную память твою вечныя жизни молитвами своими сподобляяй.
Радуйся, нищих и вдовиц и сирот заступление:
Радуйся, по Бозе и Богородице христианом прибежище и упование.
Радуйся, великий Иоанне Пророче, Предтече и Крестителю Господень.
Кондак 11
Пение всякое не довлеет по достоянию доблестей твоих восхвалити тя, Крестителю Господень. Но мы, любовию понуждаеми, дерзаем воспевати величия твоя, еже милостивно приими от нас, Первостоятелю у престола Пресвятыя Троице, и моли свободитися нам от всякия скверны греховныя, да чистым сердцем и устнами поем Богу: Аллилуиа.
Икос 11
Светильника Света неприступнаго, и всесветлых благодатных дарований всего исполнена тя, Иоанне Богопросвещение, ведуще, радостно приносим ти таковая:
Радуйся, самовидче озарившаго тя свыше Божественнаго Света:
Радуйся, свеом добродетелей твоих прославивый Бога.
Радуйся, Пресвятыя Троицы велепную славу явивый:
Радуйся, правый и дивный путь к небеси показавый.
Радуйся, и сущим во аде Бога явльшагося во плоти
благовестителю:
Радуйся, и душ праведных от века в преисподней держимых возвеселителю.
Радуйся, Владыки Христа Бога друже искренний:
Радуйся, явивый миру Свет истинный.
Радуйся, светозарное света евангельскаго сияние:
Радуйся, рода христианскаго прославление.
Радуйся, Совета Божия исполнение:
Радуйся, яко от восток солнца даже до запад хвально имя твое.
Радуйся, великий Иоанне пророче, Предтече и Крестителю Господень.
Кондак 12
Благодати тезоименитый, Крестителю Господень, и тою обогатився, победоносец преславный показался еси: победил бо еси враги и всякую злобу, и великое служение твое мученическим подвигом запечатлел еси. Ныне же, предстоя Престолу Царя царствующих, моли Его даровати Благоверному Императору нашему победы на враги и во всем благопоспешение, всем же верным в добродетелех благодатное укрепление, поющим Ему: Аллилуиа.
Икос 12
Поюще Бога, видно в тебе прославившегося, хвалим тя, Богоблаженне Крестителю, яко искренняго друга Христова, прославляем великия подвиги твоя, ублажаем мученическую кончину твою, и сицевая радостно вопием ти:
Радуйся, вселенский Апостоле и новаго завета первомучениче:
Радуйся, явлением Христа на земли открывшагося Царя Небеснаго первый проповедниче.
Радуйся, языков Божественное призвание предвозвестивый:
Радуйся, безвестная и тайная премудрости Божия миру явивый.
Радуйся, Божественными деянии плодоносен паче иных явивыйся:
Радуйся, яко светом дел твоих прославися Отец Небесный.
Радуйся, яко в памяти твоей Церковь Христу веселиши неизреченно:
Радуйся, яко ныне вечнаго наслаждаешися веселия изобильно.
Радуйся, Божественными лучами Трисолнечнаго Света осияваемый:
Радуйся, яко со безплотными трисвятую песнь Богу немолчно вопиеши.
Радуйся, яко ныне зерцалом разрешшимся, несредственне зриши Святую Троицу.
Радуйся, великий Иоанне Пророче, Предтече и Крестителю Господень.
Кондак 13
О, великий и преславный Предтече и Крестителю Господень Иоанне! приими от нас ныне приносимое тебе моление, и твоими богоприятными к Богу молитвами избави нас от всякаго зла, и вечныя изми муки, и наследники Царствия Небеснаго соделай, да вовеки поем Богу: Аллилуиа.
(Сей Кондак глаголи трижды. А по сем читается Икос 1 и Кондак 1).
Молитва ко Святому Иоанну Предтечи
Крестителю Христов, проповедниче покаяния, кающагося не презри мене, но совокупляяся с вои небесными, молися ко Владыце за мене недостойнаго, унылаго, немощнаго и печальнаго, во многие беды впадшаго, утружденнаго бурными помыслы ума моего. Аз бо есьм вертеп злых дел, отнюдь не имей конца греховному обычаю: пригвожден бо есть ум мой земным вещем, что сотворю не вемам, и к кому прибегну, да спасена будет душа моя? Токмо к тебе, Святый Иоанне, благодати тезоимените, яко тя пред Господем по Богородице веем больша бытии рождена всех: ибо ты сподобилсяеси коснутися верху Царя Христа, вземлющаго грехи мира, Агнца Божия: Егоже моли за грешную мою душу, да поне отныне, в первыйнадесять час, понесу тяготу благую и приму мзду с последними. Ей, Крестителю Христов, честный Предтече, крайний Пророче, первый мучениче, постников и пустынников наставниче, чистоты учителю, и ближний друже Христов, тя молю, к тебе прибегаю, не отрини мене от твоего заступления, но возстави мя пашагося многими грехи; обнови душу моюпокаянием, яко вторым крещением, понеже обоего начальника еси: Крещением омывай прародительский грех, покаянием же очищаяй коегождо дело скверно. Очисти мя, грехами оскверненнаго, и понуди внити, аможе ничтоже скверно входит, в Царствие небесное. Аминь.
Песнь 7, ирмос
Тебе умную, Богородице, пещь, разсмотряем верни: якоже бо отроки спасе три превозносимый, мир обнови, во чреве Твоем всецеле, хвальный отцев Бог, и препрославлен.
Прославляй Господь Того славящыя, нетлением прославленную десницу твою, подаде верным прибежище благонадежно, юже простерши, подаждь нам помощь от Святоаго, и даждь безбедно во благочестии жизнь совершити славящым тя.
Твоими молитвами немощнии врачуются, демони отгоняются, и вся скорби решатся, сего ради тя почитаем, Предтече Господень, России похвало, крепость, и ограждение, и утверждение.
Пригвожден ум к земным вещем имея, что сотворим, и к кому прибегнем имущии помощи? Разве к тебе, Святый Иоанне, благодати тезоимените, не отрини нас от твоего заступления, но возстави и обнови покаянием, и понуди со избранными внити, аможе ничтоже скверно входит, в Царство небесное.
Слава:
Умири мир, Христе, мольбами Предтечи Твоего, низлагая врагов силу под ноги вернаго Императора нашего, и тишину неизглаголанную устрояя Царству Его, во веки сохрани.
И ныне:
Образу Твоему покланяющимся и призывающым Ты по обстоянии лютых, помози, Владычице! Упование и спасение всех человеков, иныя бо предстательницы разве Тебе по Бозе не имамы.
Песнь 8, ирмос
Чуда преестественнаго росодательная изобрази пещь образ: не боя же прият палит юныя, яко ниже огнь Божества, Девы, в нюже вниде утробу, тем воспевающее воспоем: да благословит твар вся Господа, и провозносит во вся веки.
Присносущныя и неизреченныя славы и света невечерняго наслаждаяся, идеже неизглаголанное есть веселие и радость непрестанная, простирающих к тебе моления гласы услыши, Крестителю, и сподоби молитвами твоими причастниками бытии вечныя Божественныя славы.
Духом и силою Илиною предходя Христу, был еси, премудре, не трость противными ветры колеблема, но столп и наше Божественное веры утверждение, и непоколебимое Церкви укрепление, юже твоим ходатайством во единомыслии соблюди непреклонну и недвижиму, утоляя всякия соблазны.
Авраам, яко друг Божий, сподобився духом провидети день Зиждителя своего, радости неизреченныя исполняшеся: ты же, Предтече, не в гаданиих и сенех, но лицеем к лицу зря воплотившагося Господа, и от руки твоея Крещения пиемша, достойно взывал еси6 сия убо радость моя исполнися. Сего ради, яко друга Христова и теплаго о нас предстателя правостию ума чтуще, ублажаем.
Троичен
Троице нераздельную, треми лицы разделяемую, соединяемую же существом и естеством, всеми державно владычествующую и вся соблюдающую, верни благочестне исповедающе, возвеличим.
Богородиче
Прими моления рабов Твоих, Пресвятая Владычице! Яже Тебе приносим: помози и от бед избави покланяющихся образу Твоему: ты бо Спаса рождшая, имаши дерзновение, яко Того Мати сущи, не престай молящи о чтущих Тя, еже спастися нам.
Песнь 9, ирмос
Образ читаго Рождества Твоего огнепалимая купина показа неопальная, и ныне на нас напастей свирепеющую угасити молимся пещь, да Тя, Богородице, непрестанно величаем.
Стал еси посреде закона и благодати премудре, темже взываем к тебе, побеждаемых нас, законом греховным, воюющим противу ума во удех наших, ущедри, Крестителю, и благодати дар испроси, творити Божественная хотения.
Утробы неплодныя изращения плодовитое сый, неплодие сердец в благоплодие претвори молитвами твоими, и капли покаяния спасительнаго одожди в сердцах поющих тя.
Источая всегда исцеления притекающым к мощем твоим, чудный Претдече, исцели страсти сердечныя, востающия от невнимания, детельною твоих Божественных молитв цельбою.
Слава:
Витийствующих язык не может достойно восхвалити тя, Предтече пришествия Христова: но якоже Христос вдовицы прия два лепта, не возгнушайся, Крестителю, малаго сего приношения: благости же подражанием, прими и песнь, яко достойную и дерзнувшаго от усердия поведати величия твоя.
И ныне:
Взирати на Твою всечестную, Пресвчистая икону, я ко на Тебе Самую, на небесех Сыну соцарствующую, с верою к ней припадаем, благочестно почитаем, и со страхом лобызаем, и славим рождшагося от Тебе Христа Бога нашего, Егоже моли спасти рабы Твоея.
Светилен
Предстоя присно страшному Престолу и светлыми зарями трисолнечнаго Божества осияваем, Светильниче мира, просвети души верою приступающих к Тебе, греховный мрак отгоняя и приводя тыя к Свету незаходимому.
Богородичен
Скорая в бедах Помощнице, готовое обуреваемых Пристанище, неискусобрачная Невесто, родшая плотию Спасителя миру, сохрани нас покланяющихся образу Твоему честному, и сице Тебе взывающих: радуйся, Предстательнице Твоих рабов.
На хвалитех стихиры на 4, глас 1
Память праведнаго с похвалами, хвала бо его сладость верным, блажен воистину, егоже избра и прият Господь, темже и мы днесь веселящееся, почитаем память твою, Предтече, просящее тя, имущаго дерзновение ко Господу, молитися о благополучной державе Благовернаго Императора нашего, о победе на языки противныя, еже низложити неправедно хотящыя брани, даровати же мир мирови, Церквам единомыслие, и душам нашим велию милость.
От запада принесшая благодать исцелений рука твоя, Крестителю, созывает верных к тоя пришествию. Входу ея кротчайший Самодержец множае неже багрянице радуется, священных сословие благоговеет и торжествует светло; собравшееся верных мужество усердно покланяется, веселия духовнаго исполняяся. Ты же, ходатай новаго и ветхаго быв священнейший, обнови обветшание, обновление совершающих новаго явления десницы твоея, моля Человеколюбца, даровати всем спасение и велию милость.
Давиду кроткому и благочестивому уподобляется богоизбранный Царь, радостно преносящий в дом свой, якоже древле в Сионе новый кивот древняго пречестнейший. Там обе сиамна, манну носящая: зде же образ во чреве носившия Христа; тамо жезл: зде же Крест Христов. Вселенныя хранитель; тамо скрижали каменни Ветхаго Завета: зде же рука, предначертающая Новый Завет, возвещающий миру спасение и великю милость.
Боговидец придивный Илия, поверже милоть свою на Елиссея: и абие сей остати волы, имиже делаше землю, идяше в след его и служаше Богу: ты же, Крестителю, не ризу, но руку твою Святую ниспослал еси нам рабом твоим, еюже да излиется на нас благодать Духа Божественнаго, во еже не земным и суетным работати, но Богу живу служити преподобием и правдою вся дни живота нашего, подающему миру велию милость.
Слава, глас 8
Вси совокупльшеся единодушно во Святем храме Спаса нашего, и зрящее в нем светлый Богоматере образ, живоносное древо Креста, и твою, Предтече, пречестную руку, руце и сердца горе воздвигнем к Триипостасному Божеству, радующееся о великих Его дарованиих. И молящееся прилежно, да предстательством Всенепорочныя, силою Честнаго и Животворящего Креста, и твоими, Всеблаженне, молитвами, посетит нас милостию и щедротами всеблагий Бог, подающий миру велию милость.
И ныне, глас 8
Со всеми Пророки, со Апостолы и Мученики, Преподобными, и Праведными, и всех христиан надеждою Богородицею. Моли преблагого Бога, Предтече, даровати совершающим светоносную и Божественную память твою, разрешение грехов, очищение прегрешений и велию милость.
Славословие великое, и отпуст
На Литургии блаженна: Песнь 4 и 8
Прокимен, глас 7
Возвеселится праведник о Господе:
Апостол к Коринфянам, зач. 106
Алиллуия.
Глас 4
Праведник яко финикс процветет.
Евангелие Матф., зач. 40. Причастен
В память вечную.
На молебне Евангелие, от Марка, зач. 1
На малой вечерни, стихиры на 4, глас 8
Днесьвозсия память твоя. Предтече, яко светило велие, лучи обильныя чудес изливающи, благочестивых сердца озаряющи, и утешение подающи всем с верою приходящым и поклоняющымся, тебе заступнику земли Российския, и теплому Благовернаго Императора нашего поборнику, и молитвеннику о душах наших.
Светлое торжество духовное, устрояет нам рука твоя, Предтече, соводворитися бо с нами почитающими тя усердно пришел еси видимым образом, приносящи дары Божественныя благодати, сего ради к тебе взываем: буди нам помощник, и ходатай, и руководитель на спасения стези наставляющий.
Днесь палата Царствующаго просносветла является, пришествием тебе светильника невечерняго Света. Торжествует град, его же благословляет десница твоя, Крестителю. Светло празднуют благовернии людие, вхождением ея осеняемии, и покланяяся тебе, глаголют: избави молитвами твоими от всякого зла, находящаго за множество прегрешений рабы твоя.
Божественное сокровище и богатство неистощимое даровася Царствующему граду десница твоя, Предтече Господень, и положися честнее в Божественнем храме, и бысть духовнаго веселия вина, тепле любящим тя, Пророков верховнейший! Идеже священно собравшееся, воспеваем тя благодарным сердцем, яко новаго Авраама, пресельника к нам преславна, и молитвенника о душах наших.
Слава, глас 6
Крест Твой, Господи, оружие на враги видимыя и невидимыя нам даровася, да будет убо невидимая сила его, огнь попаляяй лица сопротивных, хотящих брани неправедно.
И ныне, глас тойже
Простерши Божественныя руце твои, имиже Создателя воплотившагося носила еси, умоли Его, всеблагая Владычице! Избавити от искушений, и страстей и бед, любовию чтущих Святую икону Твою. Приснодево.
На стиховне стихиры, глас 2
Идеже осеняет рука твоя, Христов Предтече, тамо струи благодати от Бога тебе данныя изливаются обильно, страхом отбегают демони, различныя человеков исцеляются страсти и недуги: плоды духовных дел процветают, благочестие утверждается, и вси проходящии и прикосающиися ей, зарею Божественнаго света просвещаются, и спасаются молитвами твоими.
Стих:
Благословен Господь Бог Израилев, яко посети и сотвори избавление людем Своим.
Светильник горя и светя, от Богочеловека наречен был еси, Крестителю! Мы же возрадовахомся в день сретения твоего, егда десницею твоею отечество наше озарити восхотел еси, к ней же с любовию притекающее, воспоминаем Божественное учение и Ангельское на земли житие твое, емуже подражати сподоби славящих тя.
Стих
И ты Пророк Вышняго наречешися.
Зрящее телесныма очима Святую твою руку6 умными очесы зрим тебе Ангела, его же посла в мир великаго совета Ангел, пред лицеем Своим уготовати пути Его, Крещением покаяния во оставление грехов, провозвестниче, исправи стези заблуждения молитвами твоими.
Слыва и ныне
Преклонившися свыше Всецарица Мати и Дева, благословеньми венчает воспевающих ю, и сице молящихся: надеждо христиан! Сподоби смиренных нас небеснаго Царствия6 ничтоже бо не возможно ходатайству Твоему.
Полный без исправлений текст Службы печатается по книге
«Служба на пренесение честныя руки Святого Иоанна Предтечи и Крестителя Господня из Мальты в Гатчино 12 октября 1799 года», Санкт-Петербург, 1876.