С Л У Ж Б А
Преподобной матери нашей Софии (Миртидиотиссе) Клисурской.
(6 мая н/ст.)
На велиЦЕЙ вечерни
Б лажен муж: 1-й антифон.
На Г осподи, воззвах: стихиры, глас 4.
В оспоим и возвеличим ныне, вернии, / память преподобной матере нашея Софии, / присно предстательствующия о нас ко Господу / и избавляющия от вражиих нападений // с верою к ней притекающия.
М ати блаженная Софие, / воздержанием многим и частыми молитвами / страстей взыграния до конца потребила еси / и, безстрастия благодать прием, / приятелище явилася еси Божественнаго Духа. / Темже духи отгоняеши всегда лукавыя, // живуще и по смерти, Богоблаженная.
О мати преблаженная Софие, / не забуди всех, с верою припадающих к раце мощей твоих; / поминающе твоя подвиги и труды, тя просим, мати преподобная: / не престай о нас молити Царя Христа, // да не отлучит нас избраннаго Своего стада.
Н ебрегла еси, мати преподобная, о телесней красоте, / тело твое изнуривши постом и долгим стоянием на молитве, / плотское мудрование покорила еси духу, / и, от Бога дара исцелений сподобльшися, / подаеши изобильно милости Божественныя; / веруем же, яко по преставлении сугубую имаши благодать, // молися убо, мати Софие, о нас ко Господу.
П ремудрость Божественную стяжавши, / Христа возлюбив, София святая, / всяко Того Божественным стопам последовала еси, / крест взем и плоть умертвив, / живеши, блаженная, духом, / и ныне моли даровати душам нашим // мир и велию милость.
Слава, глас 8:
И маши, о мати Богоблаженная Софие, / велие дерзновение ко Спасу, / твоей ради превелией любве к Нему. / Его бо ради красная мира и вся плотския утехи презрела еси, / добре и благочестно в мире поживши, / таже во обители Богородицы блаженным житием / ангелы и человецы удивила еси / и, дара чудотворений сподобльшися, / во иночестем чине преставилася еси ко Христу Богу нашему, // Егоже моли о чтущих святую память твою.
И ныне, Праздника или Догматик, глас тойже: Ц арь Небесный:
Вход. Прокимен дне и чтения.
Премудрости Соломоновы чтение (глава 3):
П раведных души в руце Божией, и не прикóснется их мука. Непщевани быша во очесех безумных умрети, и вменися озлобление исход их. И еже от нас шествие сокрушение, они же суть в мире. Ибо пред лицем человеческим аще и муку примут, упование их безсмертия исполнено. И вмале наказании бывше, великими благодетельствовани будут, яко Бог искуси я и обрете их достойны Себе. Яко злато в горниле, искуси их и, яко всеплодие жертвенное, прият я. И во время посещения их возсияют и, яко искры по стеблию потекут. Судят языком и обладают людьми, и воцарится Господь в них во веки. Надеющиися Нань разумеют истину и вернии в любви пребудут Ему, яко благодать и милость в преподобных Его и посещение во избранных Его.
Премудрости Соломоновы чтение (глава 4):
П раведник, аще постигнет скончатися, в покои будет. Старость бо честна не многолетна, ниже в числе лет исчитается. Седина же есть мудрость человеком, и возраст старости, житие нескверное. Благоугоден Богови быв, возлюблен бысть, и живый посреде грешник, преставлен бысть. Восхищен бысть, да не злоба изменит разума его, или лесть прельстит душу его. Рачение злобы помрачает добрая, и парение похоти пременяет ум незлобив. Скончався вмале, исполни лета долга. Угодна бо бе Господеви душа его. Сего ради потщася от среды лукавствия. Людие же видевше и не разумевше, ниже положше в помышлении таковое: яко благодать и милость в преподобных Его, и посещение во избранных Его.
Премудрости Соломоновы чтение (глава 5 и 6):
П раведницы во веки живут, и в Господе мзда их, и попечение их у Вышняго. Сего ради примут Царствие благолепия и венец доброты от руки Господни, зане десницею покрыет я и мышцею защитит их. Примет всеоружие рвение свое и вооружит тварь в месть врагом. Облечется в броня правды и возложит шлем суд нелицемерен. Примет щит непобедимый преподобие, поострит же напрасный гнев во оружие, споборет же с ним мир на безумныя. Пойдут праволучныя стрелы молниины и, яко от благокругла лука облаков, на намерение полетят. И от каменометныя ярости исполнь падут грады, вознегодует на них вода морская, реки же потопят я нагло. Сопротив станет им дух силы и, яко вихор, развеет их, и опустошит всю землю беззаконие, и злодейство превратит престолы сильных. Слышите убо, царие, и разумейте, навыкните, судии концев земли, внушите, держащие множества и гордящиися о народех язык, яко дана есть от Господа держава вам и сила от Вышняго.
На стиховне стихиры, глас 1:
Д обре земное житие совершила еси, / преподобная мати Софие, / к Богу любовь велию имущи, / к молитвам во дни и ноши прилежащи, / постом и бдении плоти мудрования смиряющи, / чистотою и целомудрием душу украшающи, / ко всем кротость и смирение являющи, / темже в Небесных обителех ныне водворяешися, // присно молящися о чтущих тя.
Стих: В оззваша праведнии, / и Господь услыша их.
В олн мирскаго мятежа уклонившися / и в пристанище тихое достигши, / во обитель Богородицы вселилася еси / и тамо богоугодно поживши, / преставилася еси к вечным обителем. / Темже, мати преподобная Софие, // Христа Бога моли спастися душам нашим.
Стих: М ноги скорби праведным, / и от всех их избавит я Господь.
Н ыне уже прияла еси венец славы от Царя Христа, / радость и веселие нескончаемое / и наслаждаешися вечным покоем, / молися убо о нас, мати Софие достоблаженная, / Христу Богу нашему, / да всех нас сопричтет избранному Своему стаду // по велицей Своей милости.
Слава, глас 4:
Т руды многими постническими, мати Софие, / покаянием, молитвою и трезвением / поборола еси врагов спасения, / в немощи телесе женскаго и нищете духовней / совершая твой подвиг со страхом и трепетом; / вся сия подъяв Бога ради и в угоду Ему, // восприяла еси благодать Духа Святаго, всечестная.
И ныне, Праздника или Богородичен, глас тойже:
П ризри на моления Твоих раб, Всенепорочная, / утоляющи лютая на ны востания, / всякия скорби нас изменяющи. / Тя бо Едину, твердое и известное имамы, / и Твое предстательство стяжахом, / да не постыдимся, Владычице, Тя призывающии, / потщися на умоление Тебе верно вопиющих: / радуйся, Владычице, всех Помоще, // Радосте и Покрове, и Спасение душ наших.
Тропарь, глас 8:
Б ожественною Премудростию свыше осиянна, / мудрования мирская пренебрегши, / вселилася еси во обитель Богородицы, мати блаженная Софие, / и процвела еси добродетельным житием / и принесла еси Богу плоды иноческих трудов твоих, / сего ради Христос Небесных даров тя исполни, / ихже низпосли и нам, мати преподобная, // и посети нас любовию своею.
НА УТРЕНИ
По 1-м стихословии седален, глас 1:
П оет Богу Церковь и обитель Приснодевы, / днесь ликующи в памяти твоей, / Богоблаженная мати Софие, // и верою славит великия подвиги твоя.
Слава, и ныне, глас тойже:
Е дина истинная христиан Покровительнице, / всяких лютых обстояний, / бед и скорбей нас избави // и молитвами Твоими спаси души наша.
По 2-м стихословии седален, глас 2:
Д облественне Богу работавши, / злокозненнаго врага низложила еси / и в терпении мнозе земное житие препроводила еси, преподобная Софие, / и ныне радостно предстоиши Престолу Господню, // молящися о всех нас.
Слава, и ныне, глас тойже:
У стами и сердцем величаем Тя, / Матерь Божию: / Ты же, рождшая Бога, // не отрини нас от Твоего заступления.
Величание:
У блажаем тя, / преподобная мати Софие, / и чтим святую память твою, / ты бо молиши о нас // Христа Бога нашего.
Псалом избранный:
1. Т ерпя потерпех Господа, и внят ми, и услыша молитву мою. 2. Б ог нам Прибежище и Сила, Помощник в скорбех, обретших ны зело. 1. М ноги скорби праведным и от всех их избавит я Господь. 2. П риведутся Царю девы, приведутся в веселии и радовании. 1. Д евы да восхвалят имя Господне. 2. С уди ми, Господи, яко аз незлобою моею ходих. 1. И скуси мя, Господи, и испытай мя, разжи утробы моя, и сердце мое. 2. Д а не погубиши с нечестивыми душу мою. 1. А з же незлобою моею ходих, избави мя, Господи, и помилуй мя. 2. Н ога моя ста на правоте: в церквах благословлю Тя, Господи.
По полиелеи седален, глас 8:
П лоть распяла еси со страстьми и похотьми, / и всем сердцем возлюбила еси Христа Бога, / и все желание к Нему устремила еси, преподобная мати Софие. / Темже прияла еси неоскудный дар исцелений: / от человек бо изгоняеши бесы и здравие в болезнех скоро подаеши, // водворяющися в Небесных селениих.
Слава, и ныне, Богородичен:
П ророцы Тя предвозвестиша, / апостоли проповедаша, / мученицы прославиша, / святителие ублажиша, / темже и мы с ними Богородицу Тя исповедающе, // благочестно в песнех величаем.
Таже степенна, 1-й антифон, глас 4. Прокимен, глас 4: Т ерпя, потерпех Господа, / и внят ми, и услыша молитву мою. Стих: И вложи во уста моя песнь нову, / пение Богу нашему. В сякое дыхание: Евангелие от Марка, зачало 37.
По 50-м псалме стихира самогласна, глас 6:
Т вердое изволение Богу усердно служити имела еси, / преподобная мати Софие. / Темже ни мирскаго жития широта, / ни скорби теснаго пути подвижническаго / отнюд не возмогоша от любве Божия отлучити тя, / но, добрым подвигом подвизавшеся на земли, / славу улучила еси на Небесех, / идеже присно веселящися, // моли Бога о чтущих тя.
Канон святыя, глас 2.
Песнь 1
Ирмос: Г рядите, людие, / поим песнь Христу Богу, / раздельшему море, / и наставльшему люди, яже изведе из работы египетския, / яко прославися.
С пасову заповедь послушала еси от юности, премудрая Софие, и жизнь свою нивочтоже вменивши, и крест Господень носити возжелевши, вся земная презревши, на Небесная взор устремила еси.
Б ожественными сияньми душу твою озаривши, сладострастие плоти попалила еси воздержанием крайним, блаженная мати, воспевающи Христу Богу песнь победную.
У язвившися желанием безсмертныя жизни и красотою Краснейшаго паче сынов человеческих пленивши твое сердце, во след Его потекла еси верно, Софие Богомудрая.
Богородичен: С ветлыми лучами Твоего Сына, Богородице, просвети омраченную мою душу, страстей смущение отжени, Твоими, Чистая, ходатайствы.
Песнь 3
Ирмос: Н а камени мя веры утвердив, / разширил еси уста моя на враги моя. / Возвесели бо ся дух мой, внегда пети: / несть свят, якоже Бог наш, / и несть праведен паче Тебе, Господи.
О ко душевное чисто и здраво имела еси от юности твоей, Софие блаженная, имже всегда зрела еси к Горнему селению, егоже и достигла еси, и ныне Христу воспеваеши: несть свят и несть праведен, паче Тебе, Господи.
Н ичтоже пред Богом вящше есть доброты душевныя. Ты же, преподобная мати, соблюла еси ю непреткновенно, вопиющи ко Христу: несть свят и несть праведен, паче Тебе, Господи.
С о младых ногтей твоих страх Божий имела еси в сердце твоем, премудрая Софие, егоже до конца содержала еси, укрепляема Божественною благодатию, тем и душу твою спасла еси, выну поющи Христу: несть праведен, паче Тебе, Господи.
Богородичен: П рогоняющее оружие грехи и страсти души моея буди, Дево, и покажи мя, якоже другий рай, безнаветен и соблюден Тобою и приносящий цветы Духа.
Седален, глас 2:
Я ко всесветлая звезда, возсиявши светолучными сиянии, / просветила еси чудесы своими, Софие достоблаженная, / Святым Духом наставляема, пришла еси во обитель Божия Матере, / в нейже трудолюбно подвизалася еси, страсти плотския смиряющи, / от земных к Небесному селению ныне преставилася еси, преподобная мати, // молися непрестанно о творящих память твою.
Слава, и ныне, Богородичен:
С лово Отчее, Христа Бога нашего, / из Тебе воплотившагося, познахом, Богородице Дево, / едина Чистая и Благословенная, // непрестанно Тебе величающе, воспеваем.
Песнь 4
Ирмос: П ришел еси от Девы, / не ходатай, ни Ангел, / но Сам, Господи, воплощся, / и спасл еси всего мя человека. / Тем зову Ти: / слава силе Твоей, Господи.
О, твердое основание веры, о, любы к Богу крепкая! В женстем бо естестве мужески победила еси невидимаго врага и тако угодила еси Христу, вопиющи: слава силе Твоей, Господи.
Х ристов храм была еси, преподобная мати Софие, твоею чистотою и целомудрием и прочими добродетельми, темже вместила еси в себе Святаго Духа, к Немуже и возопила еси: слава силе Твоей, Господи.
Б дении и пощением, будущаго ради воздаяния, люте плоть твою умерщвляла еси, блаженная Софие, и ныне чисте зриши Святую Троицу, нас подвизая вопити: слава силе Твоей, Господи.
Богородичен: В озсия из утробы Твоея, Отроковице Неискусобрачная, Отчее сияние – Христос, и просвети вселенную, распинаемь, и бесовскую тьму потребил есть.
Песнь 5
Ирмос: С вета подателю и веков Творче, Господи, / во свете Твоих повелений настави нас; / разве бо Тебе иного бога не знаем.
Л юбовию Христовою уязвившися, блаженная мати, яко доброплодная лоза в винограде Пречистыя Девы процвела еси благими твоими деянии и победила еси бесовския полки, вопиющи Христу:разве бо Тебе иного бога не знаем.
И стинным светом Христовым осияна была еси, мати святая Софие, насыщающися велия благодати и воспевающи Его:разве бо Тебе иного бога не знаем.
Т ебе вси заступницу имамы, преподобная мати наша Софие: не престай убо о нас молити Господа, да не лишени будем Чертога Его Небеснаго.
Я ко звезда светозарная, показалася еси, мати Софие Богомудрая, блуждающих во мраце путеводящая, во искушениих и вражиих наветех скорая и надежная помощница.
Богородичен: З акона исполнение, высшая Херувим, родила еси Божия Слова воплощена, Сына Единородна, Егоже о рабех Твоих умоли.
Песнь 6
Ирмос: В бездне греховней валяяся, / неизследную милосердия Твоего / призываю бездну: / от тли, Боже, мя возведи.
В оистинну достойна еси похвалы велия, преподобная мати Софие, яко в женстем естестве мужескую крепость имела еси, и победила еси супостата диавола, и воспевала еси ко Владыце Христу: от тли, Боже, мя возведи.
Я ко прах вся красная земная вменивши, облеклася еси в рубище и, мирская мудрования отвергше, ум Христов стяжала еси, Богомудрая мати Софие, темже вопияла еси непрестанно: от тли, Боже, мя возведи.
О преподобная мати Софие, свеще негаснущая, просвети и прослави святую обитель Божия Матере и иже любовию тя в песнех славящих и вопиющих Христу: от тли, Боже, мя возведи.
Богородичен: М илости Твоея, Богородице, сподоби мя, премилостиваго Слова рождшая, своею кровию от тли человеки избавльшаго.
Кондак, глас 8:
В ся красная мира сего, яко суетная, презревши / и тело твое постом и бдением изнуривши, / непрестанными молитвами Богу угодила еси, / достоблаженная мати Софие, / и, дар исцелений от Него прияти сподобльшися, / многим недужным исцеление даровала еси. / Темже радостно взываем, глаголюще: // слава Богу, прославляющему святыя Своя.
Икос:
П омощницу скорую, вси, сущии в бедах, / благочестно воспоем, Софию Богомудрую / и песнь принесем Единому в Троице Богу, радующеся, / сподобльшему нас видети пречистое сокровище честных мощей ея, / источающия многая и различная исцеления. / Яко да молитвами ея к Богу / от всяких находящих зол избавимся, / радостною душею и веселием сердца благодарная воспоем, глаголюще: / слава Богу, прославляющему святыя Своя.
Песнь 7
Ирмос: Д а преславное рождество Твое, Христе, / еже от Девы прообразиши яве, / неопалимы в пещи отроки сохранил еси, / песньми поющыя Тебе: / отцев, Боже, благословен еси.
Е вангельским словесем внемлющи, крест свой на рамена твоя восприяла еси и Христу последовала еси, преподобная Софие, Тому непрестанно взывающи: отцев, Боже, благословен еси.
Д оброты тлеющия, Софие всечестная, небрегла еси, будущаго чающи воздаяния, и прияла еси славу нестареющую Небеснаго блаженства и веселия вечнаго, Спасителю нашему взывающи: отцев, Боже, благословен еси.
И стинно велие чудо явися в Клисуре, обретение честных мощей твоих, мати преподобная Софие, на исцеление всем, приходящим с верою и вопиющим: отцев, Боже, благословен еси.
Богородичен: Т ьмою лютою жития объят быв, соскорбящаго и сболезнующаго не обретох: Твоею, Дево, светлостию разреши тьму прегрешений и озари пети Тебе, Благословенная, Яже Бога плотию рождшая.
Песнь 8
Ирмос: П ещь иногда огненная в Вавилоне действа разделяше, / Божиим велением халдеи опаляющая, / верныя же орошающая, поющия: / благословите, вся дела Господня, Господа.
Н ичтоже есть дражайше пред Богом добродетельныя души, еяже весь мир недостоин. Темже и ты, преподобная мати Софие, паче всего прилежала еси о сицевей безсмертней вещи, поющи: благословите, вся дела Господня, Господа.
Я ко свещу светлу, уготовала еси кроткую душу твою, Софие преблаженная, темже по смерти твоей многа исцеления недужным излияшася от честных мощей твоих. Сего ради мы вопием: благословите, вся дела Господня, Господа.
К ротостию ко всем землю кротких наследовала еси, чистотою сердца и целомудрием Бога зрети сподобилася еси, Емуже со всеми святыми поеши: благословите, вся дела Господня, Господа.
У м твой к Богу часто возводящи и доброту вечнаго покоя смотряющи, плотския страсти духу покорила еси и, иноческим образом украсившися, мати Софие всечестная, вечное блаженство улучила еси, поющи Христа во веки.
Богородичен: С лавы Отчую зарю рождши, Богородице, безславием прегрешений сетующее сердце мое уясни, и славы присносущныя покажи мя причастника, яко да верою славлю Тя.
Песнь 9
Ирмос: Б езначальна Родителя Сын, Бог и Господь, / воплощься от Девы нам явися, / омраченная просветити, / собрати расточенная: / тем всепетую Богородицу величаем.
Н ыне с лики Ангельскими на Небесех предстоиши Владыце всех, преподобная мати Софие, молящи об Отечестве твоем и о чтущих верою святую память твою, недугующим же подающи исцеление от честных мощей твоих. Тем тя поем и величаем.
Т воих подвигов прияла еси венцы и ныне с преподобных лики на Небесех присно радуешися, поминай убо и нас, Богоблаженная мати Софие, да молитвами твоими сподобимся улучити Небеснаго Царствия.
Л икует обитель Приснодевы Богородицы, имущи драгое сокровище твоя чудотворящия мощи, мати Софие славная, от нихже, яко от неистощимаго источника, верным точиши исцеления, темже тя песньми хвалебными любовию ублажаем.
Троичен: Е дино Естество Триипостасное, трисиянное Существо и неразлучная Сило, Отче, Сыне и Святый Душе, Едино Божество, спасай верою Тя Единаго величающия, Бога в Триех Лицех.
Богородичен: Н ам, поющим Тя и верою славящим, и божественному Твоему покрову присно притекающим, подаждь с Небесе разрешение лютых и мучащих страстей, Богоневесто, и муки и суда избави.
Светилен:
В озсиявши, яко солнце, богосиянными лучами, преподобная Софие, струи изливавши исцелений всем, похваляющим твоя постническия труды и дивныя подвиги.
Слава, и ныне, Богородичен:
С вета Превечнаго родила еси нам, Христа, Бога нашего, Пречистая Дево, избавльшаго весь мир от лести диавола. Темже молим Тя: не престай молящи, да подаст нам милость Свою в День Судный.