Полиелейная служба
святому праведному Царю Иустиниану I Великому [1]
Тропарь глас 3:
Красоту возжелев славы Божия,/ в земней Тому благоугодил еси/ и, порученный ти талант добре возделав, усугубил еси,/ о немже и подвизався праведно./ Отонудуже и мзду деяний твоих,/ яко праведник, приял еси от Христа Бога:/ Егоже моли спастися/ поющим тя, Юстиниане.
Кондак, глас 8:
Возбранника благочестия всеизрядна/ и поборника о истине непостыдна,/ честне и по долгу восхваляют тя людие, Богомудре,/ но яко имея дерзновение ко Христу Богу,/ тебе славящим смирение испроси, да зовем ти:/ радуйся, Юстиниане приснопамятне.
На Литургии
Блаженны от канона песни 3-я и 6-я на 8.
Прокимен, глас 7:
Возвеселится праведник о Господе/ и уповает на Него.
Стих: Что воздам Господеви о всех, яже воздаде ми…
Апостол к Галатом, зачало 213.
Аллилуия, глас 4:
Праведник, яко финикс процветет, яко кедр, иже в Ливане, умножится.
Евангелие от Матфея, зачало 11.
Причастен: В память вечную…
На велицей вечерни
Блажен муж: 1-й антифон.
На Господи, воззвах: стихиры на 8, глас 4:
Почитая лики праведных,/ правоверно и благочестно в мире сем скончавшихся,/ величаем в Троице славимого Бога,/ темже и тебе, царю Юстиниане,/ веру и благочестие цело соблюдшаго,/ и деянием твоим Богу угодившаго,/ и во обителех Небесных/ с праведными торжествующаго,// единогласно почитаем.
глас 1: Данный ти талант державный, Богомудре,/ возрастил еси сугубо благодатию,/ о немже и праведно потрудился еси, Юстиниане./ Темже слышиши:/ благий рабе и верный,/ вниди в радость Господа твоего.
Правым подобает похвала,/ якоже царствующий поет пророк./ Тем и, Давиду внимая,/ тебе, верный рабе Господень,/ мзду праведничу приимшаго,/ похвальными песньми ублажаем.
|
|
Род правый благословляй Вышний,/ благослови и тебе благословением Своим благостынным,/ благоверный царю Юстиниане,/ и якоже на земли пред человеки,/ сице на Небеси пред Ангелы и духи праведных/ прославляет тя Своею благодатию.
Слава, глас 2: Приидите, собори верных,/ мудрого почтим Юстиниана в песнех:/ верою бо Богу благоугоди,/ и праведного венца сподобися,/ и со Ангелы селение стяжа./ Емуже любовию вопием:/ прииди и стани с нами, святе,/ и предначинай торжество памяти твоея,/ и моли Христа Бога о душах наших.
И ныне, Богородичен: Радуйся, Марие Богородице, храме неразрушимый,/ паче же святый, якоже вопиет пророк:/ свят храм Твой, дивен в правде.
Вход. Прокимен дне и чтения 3.
Премудрости Соломони чтение: Праведных души в руце Божией…
Премудрости Соломони чтение: Праведницы во веки живyт…
Премудрости Соломони чтение: Праведник, аще постигнет скончатися…
На стиховне стихиры, глас 2:
Киими похвальными песньми/ воспоем Юстиниана,/ иже торжеству виновного./ Славен бо в житии на земли показался еси,/ славнейший же от добрых дел явився,/ заповедем последуя Владыки твоего./ Но аще и недоумеем, хвалити достойне,/ укрепи ны, мудре, поющих тя,/ и проси от Христа велию милость.
Стих: Праведник, яко финикс, процветет,/ яко кедр, иже в Ливане, умножится.
Добродетельми, яко крилами,/ на Небо возлетел еси/ и душу твою яко жертву чисту/ Богу представил еси,/ оставив нам утешением деяния твоя,/ еже благоговейно почитаем.
Стих: Возвеселится праведник о Господе/ и уповает на Него.
|
|
Великих даров сподобил еси, Владыко, царя Юстиниана,/ яко право ходи пред Тобою;/ сподоби тех и нас, молящихся Тебе прилежно,/ и настави нас, да ходим пред Тобою/ выну путем правым.
Слава, глас 4: Днесь Церковь Православная/ тайно ликовствует,/ новою одеявшися одеждею,/ яко порфирою и виссоном, праведного Юстиниана,/ и, сею одеяна, красящися, взывает:/ величит слава моя Господа,/ даровавшего ми моего красителя./ И паки со дерзновением зовем:/ Иже прославивый Твоего праведного, Христе Боже,/ умири мир и спаси души наша.
И ныне, Богородичен: глас тойже: Призри на моления Твоих раб, Всенепорочная…
тропарь святаго, глас 3: Красоту возжелев славы Божия,/ в земней Тому благоугодил еси/ и, порученный ти талант добре возделав, усугубил еси,/ о немже и подвизався праведно./ Отонудуже и мзду деяний твоих,/ яко праведник, приял еси от Христа Бога:/ Егоже моли спастися/ поющим тя, Юстиниане.
На утрени
На Бог Господь: тропарь святаго дважды.
Слава, и ныне, Богородичен воскресный гл. 3
По 1-м стихословии седален, глас 1:
На камени непоколебимыя веры нозе твои утвердил еси, Богомудре,/ никакоже буря тебе треволнения поколеба,/ но немокренно сию прешел еси, к Богу возвысився,/ Емуже и содворяяся, радостно Тому зовеши:/ слава милосердию Твоему, Спасе,/ слава Царствию Твоему,/ слава смотрению Твоему, Едине Человеколюбче.
Слава, и ныне, Богородичен:
Руце Твои Божественнии,/ имиже Содетеля носила еси, Дево Пресвятая, воплощенна Божеством,/ простерши, умоли избавитися нам от искушений, и страстей, и бед,/ восхваляющим Тя любовию и вопиющим Тебе:/ слава Всельшемуся в Тя, слава Прошедшему из Тебе;/ слава Свободившему нас рождеством Твоим.
|
|
По 2-м стихословии седален, глас 6:
Велию красоту творяше Аарону миро,/ сходящее на браду его/ и на ометы одежды его,/ но много паче вящшую красоту творит благодать Божия,/ на праведного царя Юстиниана излиянная,/ подающая деяниям его прославление,/ душе же его славу безсмертную.
Слава, и ныне, Богородичен:
Начало спасения/ Гавриилово провещание к Деве бысть,/ слыша бо, еже радуйся, и не убеже целования,/ не усумнеся, яко Сарра в сени,/ но сице глаголаше:/ се раба Господня,/ буди Мне по глаголу твоему.
По полиелеи седален, глас 8:
Повеленныя ти заповеди приемь,/ разумне страх Божий в себе приял еси первее,/ имже и окормляем, стезю правую не погрешил еси,/ еюже и шествуя, во двери праведническия вшел еси,/ с нимиже проси поющим тя смирение,/ яко да благодарно поем ти, мудре:/ радуйся, Юстиниане пребогате.
Слава, и ныне, Богородичен:
Повеленное тайно прием в разуме,/ в крове Иосифове тщанием преста Бесплотный, глаголя Неискусобрачней:/ Приклонивый снисхождением небеса, вмещается неизменно весь в Тя./ Егоже и видя в ложеснах Твоих, приемша рабий зрак, ужасаюся звати Тебе:/ радуйся, Невесто Неневестная.