Прокимен, глас 4: Возвеселится праведник о Господе/ и уповает на Него.
Стих: Что воздам Господеви о всех, яже воздаде ми?
Всякое дыхание: Евангелие от Матфея, зачало 43.
По 50-м псалме стихира, глас 6:
Иже благодатию Божественного Духа/ собрании днесь празднолюбцы,/ лик составльше, поем песнь нову,/ память сотворяще треблаженного Юстиниана,/ в нюже сошедшеся, Спаса величаем/ и торжества виновнику молебне рцем:/ яко имый дерзновение у Царя Славы,/ моли избавитися вреда всякого/ от души славящим тя.
Канон Богородицы со ирмосом на 6, глас 2, и святаго на 8, глас 4.
Песнь 1.
Ирмос: Отверзу уста моя,/ и наполнятся Духа,/ и слово отрыгну Царице Матери,/ и явлюся, светло торжествуя,/ и воспою, радуяся, Тоя чудеса.
Запев: Праведне царю Юстиниане, моли Бога о нас.
Ликуя со ангельскими соборы присно,/ у Престола Божественного, световидныя зари исполняем,/ омраченую душу мою озарити молися,/ яко да по долгу возмогу воспети память твою, Юстиниане.
Аще и по достоянию восхвалити тя недоумеем, чтуще тя,/ но, елико по силе, песнь плетем славней твоей памяти,/ проповедающе твое житие,/ но якоже любочаден, приими сие, аще и не по достоянию хваление.
Зачало добродетельного твоего жития, страх Господень взял еси от юности, Юстиниане,/ и сей имел еси, наставляющ тя к пути правому,/ имже шествуя, во дворы Господни вшел еси.
Богородичен: Ангельских сил вемы Тя превышшую, людие вернии,/ Спаса и Бога прославляем, Дево Всепетая,/ и, Богородицу Тя от души славяще, молимся:/ от супостатных нашествия поющия Тя избави.
Ин канон святаго, глас 8.
Яко елень желает на источники водныя,/ сице желаше душа твоя, праведне Юстиниане, к Богу,/ Иже и прия тя с любовию и сотвори наследника Царствия Своего.
Праведное жизни твоея имел еси течение,/ и подвигом добрым в законе Божии подвизался еси/ и веру соблюл еси,/ сего ради отложися тебе венец славы безсмертныя.
Егда на стражи твоей стал еси богоданыя ти власти, Юстиниане,/ тогда недреманное око стяжал еси, к соблюдению богоданного ти стада,/ о немже трудился до смерти,/ отнюдуже и мзду приял еси трудов твоих.
Богородичен: Вседерзостную крепость иноплемеников, о Владычице, потреби,/ люди же верныя, Тебе славящия, спаси и укрепи,/ иже Сыну и Богу Твоему песнь воспевающих.
Катавасия по уставу.
Песнь 3.
Ирмос: Твоя песнословцы, Богородице,/ живый и независтный Источниче,/ лик себе совокупльшия, духовно утверди;/ в Божественней Твоей славе/ венцев славы сподоби.
Видев Создавший един сердца человеков, Богомудре Юстиниане,/ сердца твоего, еже к Нему, нрава же кроткое и незлобивое,/ на престоле царствующих посади/ и пастыря тя христокрасных людей устрои.
Аврааму на земли странолюбием подобяся,/ имел еси десницу благоподатну:/ странныя, и больныя, и мимоходящия приемля,/ сподобился еси и Бога прияти в тебе, Юстиниане.
Преиспрещенный и славный дом твой, достоблаженне Юстиниане,/ егоже на землидобродетельными лепотами украсил еси,/ желая вечных благ получити, мудре,/ отнюдуже и Царствия Небесного сподобился еси.
Богородичен: Ангельских сил вемы Тя превышшую, людие вернии,/ Спаса и Бога прославляем, Дево Всепетая,/ и, Богородицу Тя от души славяще, молимся:/ от супостатных нашествия поющия Тя избави.
Ин канон святаго
Истинная лоза винограда Христова был еси, праведне Юстиниане,/ сего ради и в житии твоем мног плод добродетелей израстил еси.
Иже на высоту хулу глаголавый,/ гордым оком видев твоя полезная, Юстиниане,/ лестными ухищренми украсти тя покусися;/ ты же, Мудрость сущую — Христа Бога в дому сердца твоего имый,/ того под нозе твои покорил еси, вопия:/ несть свят, паче Тебе, Господи.
Коль праведен и щедр еси, Благоутробный Владыко,/ в мздовоздаянии Твоим праведником!/ Довлеет и един образ:/ како праведника Твоего Юстиниана ущедрил еси.
Богородичен: От утробы матере Себе Богу посвятила еси, Отроковице,/ и усердием Ему служила еси,/ тем Тебе и Бог воздаде по правоте,/ яко Тя вси роди Богородицею ублажают.
Седален, глас 8:
Премудростию и разумом украшен,/ мужеским и твердым сияя смыслом,/ благ же и кроток, и милостив был еси\ и врученную ти паству добре упасл еси\,/ темже и венец праведного приял еси./ Сего ради вопием ти, Юстиниане:/ моли Христа Бога согрешений оставление даровати,/ чтущим любовию святую память твою.
Слава, и ныне, Богородичен:
Яко Всенепорочная Невесто Творца,/ яко Неискусомужная Мати Избавителя,/ приятелище яко сущи Утешителя, Всепетая,/ беззаконию мя суща скверно жилище/ и демонов игралище в разуме бывша,/ потщися от сих злодействия мя избавити/ светло жилище добродетельми соделавши,/ Светодательная и Нетленная,/ разжени облак страстей, и Вышняго причастия сподоби,/ и Света невечерняго молитвами Твоими.
Песнь 4.
Ирмос: Седяй в славе на Престоле Божества,/ во облаце легце,/ прииде Иисус Пребожественный/ Нетленною Дланию и спасе зовущия:/ слава, Христе, силе Твоей.
Храм Божий явился еси по достоянию,/ храм Тому благолепен соделал еси,/ всех приводящ во удивление, обилием кипя всяким, Юстиниане,/ в немже и лики иноческия собрал еси.
Вверенный тебе талант державный, Юстиниане,/ не в земли скрыл еси, яко раб ленивый,/ но делав, яко раб бодрый своего Владыки,/ егоже и многоусугубленна Тому принесл еси.
Даны быша тебе от Господа таланты душевныя и телесныя,/ ихже во благо употребляя,/ в краткое время многое приобретение Ему сотворил еси,/ сего ради и введе тя,яко раба благаго и верного, в радость Свою.
Богородичен: С радостью готова сущи к званию,/ на неже избра Тя Вышний, Дево Марие,/ со смирением Гавриилу рекла еси:/ се раба Господня./ Мы же, Тя сице смирившуюся, Владычицею ныне почитаем.
Ин канон святаго
Слушаяй молитвы праведных Твоих, Господи,/ услыши молитву и праведника Твоего Юстиниана,/ юже приносит Тебе о людех Твоих.
Хваляшеся иногда евангельский юноша пред Господем,/ яко вся заповеди соблюде от юности своея,/ но не послуша Господа, малое сотворити ему повелевающаго,/ и не иде вслед Его,/ ты же, праведне Юстиниане, и, не хваляся, повелений Господних слушал еси/ и Ему с веселием последовал еси.
Авситидийского Иова житию всекрасному подобяся мудростию и разумом,/ просвещен явился еси,/ смирением сердца украшен и высотою жития сияя,/ и паче сих высочайшая исправил еси, Юстиниане.
Богородичен: Благопременна сотвори, Владычице Всепетая, бодрыми Твоими молитвами/ от Твоея утробы явльшегося человеком плотию,/ яко да обрящем, Тебе славящии, грехов оставление/ и наследницы явимся славы Сына и Бога Твоего.
Песнь 5.
Ирмос: Ужасошася всяческая/ о Божественней славе Твоей:/ Ты бо, Неискусобрачная Дево,/ имела еси во утробе над всеми Бога/ и родила еси Безлетнаго Сына,/ всем воспевающим Тя/ мир подавающая.
Твоего ради милования, еже на земли стяжал еси,/ правды ради твоея,/ приобретение стоит тебе нетленно,/ еже и получив, обрел еси трудов твоих возмездие/ и живеши с лики праведник, радуяся.
Во всех днех жития твоего, праведне Юстиниане,/ великих светило явился еси добродетелей,/ имиже Бог благоугождается.
Светлу душу твою хотя представити Богу,/ в праведности ходил еси,/ сего ради по твоем успении вшел еси,/ аможе ничтоже нечисто входит.
Богородичен: Душу мою озари, омраченную прегрешеньми и ослепленную лютыми похотьми,/ Яже Солнце родшая Праведное, Приснодево:/ елика бо хощеши, можеши.
Ин канон святаго
Да подвижится к твоему похвалению всяк язык,/ яко хвален стаду твоему был еси вождь,/ и яко, сих привед, упасл еси на пажитех животных,/ и яко заступник тем в животе и по смерти явився,/ и яко о нем подвизался честне.
Светящую тя свещу во дни и нощи, Юстиниане,/ твоя честная деяния стяжавши, Церковь веселится,/ просвещаема днесь зарею, юже свыше приял еси Духа Святаго осенением, имиже всякия лести избежавши, тя прославляет.
Ради праведных Твоих, Господи,/ простираеши лучи Твоея милости на грешныя:/ озари убо и нас, недостойных рабов Твоих, лучами Твоего благоутробия/ ради правоверного царя Юстиниана.
Богородичен: Позлащенными добродетелей ризами/ одеянна и преиспещренна была еси на земли, Пренепорочная,/ сего ради и Бог Слово во утробе Твоей/ благоволи облещися в плоть человеческую.
Песнь 6.
Ирмос: Божественное сие и всечестное/ совершающее празднество,/ Богомудрии, Богоматере,/ придите, руками восплещим,/ от Нея рождшагося Бога славим.
О, всекрасныя купли твоея, святе,/ о, чудного твоего изменения:/ маловременную бо славою вечную искупил еси,/ в нейже ныне живеши, о нас молися.
Еже по достоянию чудного твоего жития,/ достойно желаему славу, ты от Христа Бога получил еси,/ идеже ныне предстоиши,/ в ризу светлу от добродетелей облечен, радуяся.
Житию твоему, Юстиниане, кто не удивится,/ собрал бо еси, якоже пчела благоразумная, множество цветовидных добродетелей:/ в нихже, красуяся, нас облагоухаеши.
Богородичен: Мати Приснодево,/ яко Чистую Тя, Слово Чистое возлюби,/ из Тебе воплощся, обнови человека/ и Своего угодника прослави чудесы.
Ин канон святаго
И мягкия носяй одежды, царю Юстиниане,/ сице житием твоим праведным в краткое время угодил еси, яко многим дивитися,/ иже угодиша Ему, долговременно облачающееся во вретище.
Уверен быв, яко и златотканныя ризы общему подлежат тлению,/ потщался еси в животе твоем из добродетелей исткати себе ризу нетления,/ в нейже ныне красуешися.
Совесть имел еси благу,/ и око сердечное взирающее к Богу,/ темже внят молитве твоей, премyдре,/ и со праведными сочетал тя есть.
Богородичен: Страсти плоти моея,/ и ума моего двизания неподобная утоли,/ молю Тя Пречистая Дево, и исправи мя заблyждьшаго умом.
Кондак, глас 8:
Возбранника благочестия всеизрядна/ и поборника о истине непостыдна,/ честне и по долгу восхваляют тя людие, Богомудре,/ но яко имея дерзновение ко Христу Богу,/ тебе славящим смирение испроси, да зовем ти:/ радуйся, Юстиниане приснопамятне.
Икос:
Имать тебе твое отечество яко жива и по смерти:/ дар пречестен и богатство неиждиваемое, заступника велика/ и возбраника крепка, о благолюбезне;/ темже и в день скончания твоего песни достохвальныя приносим ти,/ и, величающе тя, взываем тебе таковая:/ радуйся, столпе Православия непоколебимый./ Радуйся, здателю и красителю святых церквей;/ радуйся, обильное милование нищих./ Радуйся о благочестии потрудивыйся;/ радуйся, яко тобою украсишася православнии./ Радуйся, яко слава о тебе протече по вселенней;/ радуйся, наш заступниче и избавителю./ И сия тебе приносим, святе, яко достойну, и молим тя:/ возмездие славящим тя подаждь/ и всякого озлобления нас избави, да зовем ти:/ радуйся, Юстиниане приснопамятне.
Песнь 7.
Ирмос: Не послужиша твари Богомудрии/ паче Создавшего,/ но, огненное прещение мужески поправше,/ радовахуся, поюще:/ препетый отцев Господь и Бог, благословен еси.
О Бозе верою усердною возмогая,/ множество храмов святых обновил еси,/ множайшия же от основания воздвигл еси Господу в славословие,/ ихже ради дом Духа Святаго себе соделал еси, вопия,/ благословен Бог отец наших.
Испещренну лествицу, и до Небес досяжущу, на земли, яко искусный, художник Юстиниане, устроил еси:/ быша во тебе, якоже степени лествичныя, благая дела,/ имиже востек, идеже желал еси, зовый:/ благословен Бог отец наших.
Разума светлости в добродетели жития/ и прежде успения ты, мудре, исполнь был еси,/ краснейший же явился еси по подвизех праведных./ Темже тя яко Божия угодника почитаем, зовуще:/ благословен Бог отец наших.
Богородичен: Адам от тли рождеством Твоим избавися,/ кроме бо тления человеческаго рождши,/ темже тления злаго мя, Отроковице, избави/ мольбами Твоего Юстиниана, Владичице.
Ин канон святаго
С лики ангельськими в светлем пребывании/ и с праведными соборы водворяяся яко праведник, Юстиниане,/ у Престола всех Царя и Бога нашего, ликуя, зовеши:/ благословен Бог отец наших.
Яко чистое добродетелей зерцало был еси на земли, царю Юстиниане,/ сего ради Вышний, восприяв душу твою в чертог Свой Небесный,/ остави нам образ, добродетелей твоих,/ да последуем стопам твоим.
Не стыдимся хвалитися, праведниче Божий,/ яко молитва твоя к Богу много может поспешествовати нам во благое:/ вемы бо, яко молитвы праведных приятны Ему.
Богородичен: Блажим Тя, Богородице Дево,/ и блажити никогда не престаем:/ благословенна бо Ты еси в женах/ и благословен Плод чрева Твоего.
Песнь 8.
Ирмос: Отроки благочестивыя в пещи/ Рождество Богородично спасло есть; тогда убо образуемое,/ ныне же действуемое,/ вселенную всю воздвизает пети Тебе:/ Господа пойте, дела,/ и превозносите Его во вся веки.
Аще и устремляхуся мира сего волны, еже потопити праведное житие твое,/ но ничтоже успеша:/ ковчег бо тебе бысть чистота,/ кормило — Православная вера,/ якорь — твердая на Бога надежда,/ ветрило — любовь к Богу и ближним.
Прославляем Тя, Господи Боже,/ яко, удивляя хотения Твоя во святых Твоих,/ удивил еси хотение Твое и в правоверном императоре Юстиниане.
Услыши мольбы и пения глас людей твоих, святе,/ вонми воздыханию стада твоего, яко отечестволюбец,/ и противися гневне на нас воюющим:/ вемы бо многомощную молитву праведного.
Богородичен: Удивляхуся волсви египетстии силе чудотворного жезла Моисеова,/ мы же удивляемся Тебе, Марие:/ како Невместимого всеми во утробе Твоей вместила еси.
Ин канон святаго
Малого и худаго моления нашего не презри, молим тя,/ жителю Вышняго Царствия Юстиниане,/ но призирай на твое стадо, якоже при животе и по смерти,/ и смирение испроси хвалящим тя.
Во славу и светлость Божественную прешед духом, яко любочаден,/ нас, сирых, не оставил еси,/ но, якоже Илия Елисею милоть во утешение,/ сице плоды деяний твоих нам оставил еси,/ любя и по смерти питомцы твоя, поющия:/ отроцы, благословите, свещенницы, воспойте,/ людие, превозносите Христа во веки.
Да радуется днесь множество Божественное:/ во время жития сияющи досточудными лучами своих исправлений/ и озаряющи верныя, Юстиниане всебогате./ Темже торжествуим, зовуще: благословите, вся дела Господня, Господа/ и превозносите во вся веки.
Богородичен: Паче естества и слова Владыку всех родила еси/ и питаеши от сосцу Твоею всем во благо время готовящаго трапезу./ Егоже прилежно, Пречистая, о нас моли.
Песнь 9.
Ирмос: Всяк земнородный/ да взыграется, Духом просвещаем,/ да торжествует же Бесплотных умов естество,/ почитающее священное торжество Богоматере,/ и да вопиет:/ радуйся, Всеблаженная Богородице,/ Чистая Приснодево.
Благословен еси Господи Боже наш,/ яко веси пути непорочных,/ и достояние их во веки пребывает,/ егоже причастником быти сподобил еси/ и праведного царя Юстиниана.
Радущися во всепразднственный день твоего скончания,/ Церковь верных днесь, со всеми окрестными совокупльшися, празднует,/ хранителя и заступника бодра стяжавши:/ юже ограждай твоим предстательством, яко да тя величаем.
Украсив душу твою Божественными лепотами,/ красному Слову славен предстоиши во дерзновении мнозе./ Сего ради молим тя:/ свыше нас, певцы твоя, назирай милостивно,/ стране нашей победительная на супостаты испроси,/ яко да тя ублажаем.
Богородичен: Призираяй на смиренныя рабы Своя Вышний/ призре и на Твое смирение, Пречистая Дево,/ и превознесе Тя паче всех дщерей сынов человеческих.
Ин канон святаго
Иже празднолюбных собори,/ иже в торжество ныне хвалимого Юстиниана собравшеся,/ насладимся торжства спасенного,/ зряще пророческих днесь сбывшихся словес:/ еже праведницы во веки живут и от Господа сим прославление,/ Егоже величаем.
Тебе молим, святе, прилежно:/ о Церкви верней помолися,/ о ней же и праведно потрудился еси,/ Православней же вере крепость на ереси врагов испроси,/ смирение же чтущим тя, Юстиниане.
В праздник святыя твоея памяти, Юстиниане, сошедшеся, лицы веселятся,/ с нимиже и мы песньми тя почитаем./ Прииди же и ты, святе, и предначинай торжественная,/ озлобления же нас всякаго избави,/ яко твое есмы стадо.
Богородичен: О Всепетая Царице,/ Яже Безначальнаго рождши Царя Славы,/ поющим Тя согрешений прощение и житию устроение благоприбытно подаждь/ Твоего Юстиниана мольбами.
Светилен, глас 8:
Прекрасный добродетелей храм на земли быв, правоверный царю Юстиниане/ остави нам по своем успении дела твои праведнии,/ душею же вниде в храм нерукотворенный.
Слава, и ныне, Богородичен:
Великим благодарением должни мы Тебе, Владычице:/ едина бо Ты от земнородных явилася еси/ достойна прияти во утробу Твою Сына Божия,/ Егоже Отец посла на землю разрушити законную клятву/ и подати вечное всем благословение.
На хвалитех стихиры на 4, глас 6:
Приникая в бездну судеб Божиих,/ удивляемся чудному Его о праведных Своих смотрению:/ очи бо Его выну на них/ и уши Его выну в молитву их,/ и прославляет их временно и вечно,/ якоже видим смотрение Его и о тебе,/ правоверный царю Юстиниане,/ темже тя ублажаем.
Яже красная суть мира сего,/ вся сия быша в руку твоею,/ егда на земли сей обитал еси;/ егда же и от мира сего исшел еси,/ вся паки восприял еси благая, праведным уготованная,/ вшел бо еси в землю обетованную,/ яже не медом и млеком течет,/ но есть Царство Небесное;/ сего ради тя ублажаем.
глас 4:
Добляго исполнителя заповедей Божиих,/ сошедшеся, восхвалим по достоянию праведного Юстиниана,/ славного в житии земного владычиствия,/ краснейшаго же в добродетелех показавшася,/ иже всякою добродетелию обильного,/ и со Ангелы Христу предстоящаго,/ и о иже память Его с любовию поющих молящагося.
Добляго и мужественнаго во бранех/ и адаманта твердейшаго,/ поборника всеистинна о Православии,/ благочестия столпа непоколебимаго,/ чуднаго Юстиниана ублажим,/ ревнителя и подражателя Авраама онаго,/ иже о истине праведна явльшагося,/ у Христа предстоящаго,/ о нас молящагося.
Слава, глас 6:
Ради кроткого раба Твоего Давида,/ по заповедем Твоим пред Тобою ходившаго,/ многия роду израильскому являл еси благодеяния, Боже наш,/ благодетелен убо буди и нам,/ ради правоверного раба Твоего Юстиниана,/ течение жизни своея/ по заповедем Твоим совершившаго.
И ныне, Богородичен:
Чистая Дево, Слова врата,/ Бога нашего Мати,/ моли спастися нам.