АКАФИСТ СВЯТОМУ МУЧЕНИКУ ЕВГЕНИЮ
(РОДИОНОВУ)
День памяти 23 мая (23.05.1977 - 23.05.1996)
Помяни, Господи во Царствии Твоем приснопоминаемого воина Евгения (Родионова) и ближних его:
деда (по отцу) – Константина, деда (по матери) – Василия / бабушку (по отцу) – Марию, бабушку (по матери) – Марию / отца (о упокоении) – Александра, мать (о здравии) – Любовь / сродников (о упокоении) – Вячеслава, Марию, Марию, Александра, Александру (ж), Андрея / крестную (о упокоении) – Антонину / сродников и близких из фамильного синодика (о здравии) – Александра, воина Игоря, воина Алексия и воина Сергия;
воинов соузников, с ним умученных – воина Александра (Железнова), воина Андрея (Трусова) и воина Игоря (Яковлева) / убиенных воинов – летчика-героя Николая (Майданова), воина Игоря (Родина), воина Василия, воина Алексия, воина Алексия (еще), воина Бориса, воина Владимира; и всех Православных вождей и воинов от нечестивых афган и чечен за Веру и Отечество умученных.
Кондак 1
Возбраннаго воеводу и Господа, жизни Начальника и смерти победителя, Христа Бога нашего, вернии восславим яко избра во свидетели Своя мученика Евгения, воина славнаго. Ты же, святый мучениче, мановением Божиим и промыслом Его непостижимым от поля брани и озлобления во обители райския преселивыйся, не престай молитися о нас на земли оставльшихся звати ти:
Радуйся, мучениче Евгение воине Христов непобедимый.
Икос 1
Ангелов творец и всего видимаго мира Создатель Ангела Хранителя при купели крещения тебе представи, имже наставляем венчал еси житие твое христоподражательно крове твоея пролитием. Сего ради тебе честь и славу знамения крестнаго защитившему пред лицем убийц твоих вопием сице:
|
|
Радуйся, воинства Российскаго честное украшение,
Радуйся, Царствия Божия Славное пополнение;
Радуйся, воевод земных прилежный послушателю;
Радуйся, Воеводы Христа верный служителю;
Радуйся, ветве юная, на древе Российстем прозябшая;
Радуйся, древо новонасажденное в раи Господни;
Радуйся, измлада ко купели крещения устремивыйся;
Радуйся, в летах твоих цветения в саде Едемстем водворивыйся;
Радуйся, мучениче Евгение, воине Христов непобедимый!
Кондак 2
Видя, яко нецыи от соратник твоих страха ради смертнаго веру отец своих предающих во угоду пленивших их мятежником, не преставал еси молитися ко Христу, распятие Егоже знамение на персех твоих неотъемлемо носил еси, яко щит мощный противу всякаго зла и обстояния, и взывал к Нему: Аллилуиа!
Икос 2
Разумом твоим измлада познал еси Бога истиннаго и в сердце твоем светлую обитель Его благодатную устроил еси волею доброю. Мы же дивимся Премудрости Божией, всельшейся во обитель сию, средь терний и волчцов искушений мира сего воздвигнутую, и поем ти тако:
Радуйся, юное обиталище Духа Святаго;
Радуйся, младое вместилище Божественныя благодати;
Радуйся, древа бесплоднаго ветви плодоносящия;
Радуйся, земли ненасеянныя прозябение тучное;
Радуйся, сродником и знаемым твоим сожителю прелюбезный;
Радуйся, Ангелом и всем святым согражданине приятный;
Радуйся, подвигом веры твоея земнородных удививый;
Радуйся, мужеством твоим небожителей обрадовавый;
Радуйся, мучениче Евгение, воине Христов непобедимый!
|
|
Кондак 3
Сила Вышняго, немощная врачующая и оскудевающая восполняющая благодатию неоскудною, проявися в телеси твоем конечнем, еже по образу, вещь бессмертную, в себе содержащем. Сего ради мерность и смертность плоти твоея ни во чо же поставил еси, да душу твою спасеши, во еже вечно радоватися и пети Царю нашему и Богу: Аллилуиа!
Икос 3
Имея выбор между благополучием временным и нестойким и блаженством вечным и несумненным во Царствии Божии, мужественно предстал еси, Евгение, пред мучители твоими, нося на телеси твоем знамение крестное, яко ограждение от злых душе и телу. Сего ради и мы, благоговейно чтуще Всечестный Крест Господень, имже врага побеждаем, вопием ти тако:
Радуйся, Христа, Плоть Свою во спасение наше на убиение отдавшаго, возлюбивый;
Радуйся, Спасителя мира и Бога, Кровь Свою во оставление грехов наших пролившаго, не предавый;
Радуйся, учению Евангелия Христова твердо последовавый;
Радуйся, лжеучению мучителей твоих ум не покоривый;
Радуйся, добродетельми твоими веру истинную утвердивый;
Радуйся, примером твоим живым неверие убийц твоих посрамивый;
Радуйся, яко вера твоя крепкая Христа нам, Бога Сущаго, возвещает;
Радуйся, яко злоба убийц беззаконных и саму веру их, яко суетную, низлагает;
Радуйся, мучениче Евгение, воине Христов непобедимый!
Кондак 4
Слышав, святый Евгение, евангельские словеса Христа Иисуса, призывающия всякаго, иже исповедует Его быти Богом Истинным, живот вечный дарующим, взяти крест свой и за Ним следовати, чистосердечием младенческим и мудростию мужа зрелаго положил еси словеса сии глубоце в сердце твоем, радостно и смиренно хвалу тебе Призвавшему поя: Аллилуиа!
|
|
Икос 4
Безумство мятежных и алчность их слепая, мир и покой в стране нашей пошатнути хотящих, подвигну военачалие наше призвати тя со множеством другов и сверстник твоих во страну южную, да потребятся восстающия на законы и люди наша убивающия, похищающия и в рабство обращающия. Сего ради тебе, живот твой на смерть предавшему за веру христианскую и соотечественники, радостно и благодарственно взываем:
Радуйся, страны Российския гражданине достойнейший;
Радуйся, честь Отечествия твоего пред миром и люди не посрамивый;
Радуйся, благородством, емуже тезоименит еси, правое дело воинства нашего подтвердивый;
Радуйся, советы разрушителей мира во стране Чеченстей, покусившихся на веру православную, расстроивый;
Радуйся, яко тобою истины веры православныя утверждаются;
Радуйся, яко неверие человекоубийц возбесившихся и само существо их, еже есть горее языческаго, обличается;
Радуйся, яко подвигом твоим воинство православное укрепляется;
Радуйся, яко ярость звериная идущих на ны мужеством и стойкостию твоею побеждается;
Радуйся, мучение Евгение, воине Христов непобедимый!
Кондак 5
Боготечное житие и воинское служение твое, богоизбранне Евгение, не укрыся от народа нашего, верно чтущаго подвиги твоего многострадания и твердаго веры исповедания, кровию твоею запечатленнаго, егда отвергл еси безумное веление мучителей твоих окаянных, да отречешися от Христа Бога твоего пророка ради чуждаго, и знамение живота вечнаго от персей твоих отъимеши и оставиши пение хвалебное Владыце и Господу твоему: Аллилуиа!
Икос 5
Видевше озверевшия мучители твоя, яко посулы благ и угрозы смертию мучительною ничтоже успевают во еже отвратити тя от веры твоея крепкия и, яко нецыи от соузников твоих страха ради смертнаго и боли телесныя, премениша веру нашу и исповедаша чуждую, лютой казни предаша тя, страдальче честный Евгение. Мы же, единовернии твои, ужасаемся жестосердию безбожных мира ненавистников, татей и разбойников, обаче единеми усты и сердцем поем ти торжественне:
Радуйся, на земли веру отцев твоих соблюдый;
Радуйся, на небеси мзду богатую от Христа получивый;
Радуйся, суетность жития земнаго от юности твоея познавый;
Радуйся, блаженство приснаго с Богом пребывания измлада возжелавый;
Радуйся, неверие мрачное богопознанием твоим просветивый;
Радуйся, невежество губительное богоразумием твоим победивый;
Радуйся купелию крещения во Имя Пресвятыя Троицы - Отца, и Сына, и Святаго Духа - грех первородный отрясший;
Радуйся, прилежанием твоим еже ко восхождению духовному грехов обыденных разрешение от Милосердаго Бога приявший;
Радуйся, мучениче Евгение, воине Христов непобедимый!
Кондак 6
Проповедником богоносным явился еси, дивный Евгение, соратником твоим, яко много может вера истинная, истление и смерть вечную побеждающая и приглашающая все воинство Российское и люди с тобою взывати к Богу: Аллилуиа!
Икос 6
Воссиял еси в стране нашей, досточудне воине и угодниче Христов Евгение, звездою яркою, велением Творца Ангелов и человеков на небеси Церкве Христовой возжженною, егда вразумил есть нас Господь моления о упокоении души твоея пременити на молитвословия, к тебе самому обращенныя, яко к новоявленному святому, Богом прославленному, и предстателю о нас несуменному и верному во время, еже есть паче всякаго другаго времени благопотребно. Благодаряще промыслительное о нас Божие смотрение и дар сей многоценный, тебе, другу нечаянному и посему сугубо приятному, поем со умилением тако:
Радуйся, сомном мучеников преславных во страданиих твоих укрепленный;
Радуйся, на подвиг страдальчества примером их дерзновенным вдохновленный;
Радуйся, победу над смертию и адом абие по отшествии твоем из телеси бреннаго вкусивый;
Радуйся, венец бессмертия мученическим подвигом твоим стяжавый;
Радуйся, души, израненныя неверием и сумнениями, исцеляющий;
Радуйся, многих другов твоих по стопам твоим шествовати направляющий;
Радуйся, свидетельство живое веры Христовы спасительное;
Радуйся, доказательство непреложное жертвы Господней искупительныя;
Радуйся, мучениче Евгение, воине Христов непобедимый!
Кондак 7
Хотя Милосердый Господь веру Своих, прещением безбожных ослабленную, укрепити и из рова неверия гибельнаго исхитити, десницу Свою простре над страной нашей и попусти подвергнути народ Свой испытанием во брани внутрь ея: да уразумеем, яко бедствия наша внутрь нас рождаются, и обратим взоры наша внутрь сердец наших, неверием пораженных, и обретем паки, мир дающаго Господа и Спасителя мира, взывая к Нему с сонмом всех святых: Аллилуиа!
Икос 7
Новаго тя светильника вемы, путь освещающаго юности, боговедением не просвещенней, блаженне Евгение: образ бо жития и кончины твоея на земли многомощным средством явися ко вразумлению неверующих и ересьми многоразличными отравленных. Верующих же истинно во Святую Троицу и твое во Христе со святыми вечное пребывание образ злостраданий наших подвизает ны пети тебе похвалы сия:
Радуйся, во плоти тленней на земли рожденный;
Радуйся, в дусе неистребимем на небеса преселенный;
Радуйся, образ Создателя твоего достойно в себе сохранивый;
Радуйся, подобие Искупителя твоего в полноте собою явивый;
Радуйся, живот твой всецело Отцу Небесному поручивый;
Радуйся, дух твой Сыну Божию радостно доверивый;
Радуйся, Духа Божия верностию обету крещения не похуливый;
Радуйся, Святую Троицу жертвенною кончиною твоею торжественне почтый;
Радуйся, мучениче Евгение, воине Христов непобедимый!
Кондак 8
Странно есть видети, богомудре Евгение, како душа твоя, во плоти юной пребывающая, показа мужество и стойкость, старости маститей свойственной и опыту житейскому присущу, егда, представ пред лицем пленителей твоих, врагом рода человеча ослепленных, крепость твою яже в вере не допустил еси быти сломленней. Победу же твою над временем и тлением празднующи, возносим в надвременныя высоты песнь Богови, идеже ты ныне поеши Ему: Аллилуиа!
Икос 8
Весь предался еси воле Божией, смиренномудренный Евгение, страдальче Христов, никакоже твоей человечестей воле доверяяй, егда отвергл еси путь Иуды Искариота, крестное знамение от сердца твоего никакоже отъяти восхотев. Темже, моляще тя быти о нас, духом слабеющих, ходатаем пред Искупителем Распятым, воскресшим и нас совоскресившим, поем ти тако:
Радуйся, от юности твоея Бога возлюбивый;
Радуйся, силою Божиею, яже в тебе, мучителей твоих удививый;
Радуйся, плоть крестным знамением от искушений многоразличных оградивый;
Радуйся, душу твою силою крестною от демонских притязаний защитивый;
Радуйся, яко тобою Господь к земнородным приближися;
Радуйся, яко тебе ради богоубийственный предательства дух из среды верных истребися;
Радуйся, яко Ангели Божии по отшествии твоем от земли лествицу ко Престолу Божества страшнаго тебе соорудиша;
Радуйся, яко святии мученицы тебе, яко соратника своего равноправнаго и равноценнаго, пред Всевидящее Око Неприступнаго представиша;
Радуйся, мучениче Евгение, воине Христов непобедимый!
Кондак 9
Всякия болезни душевныя и телесныя, всякия беды, нужды плоти и духа нашего избави нас, всехвальне Евгение, да веру твою в Подателя жизни вечныя видевше, в вере нашей да укрепимся невозбранно и дерзновенно с тобою пети крепость дающему Богу: Аллилуиа!
Икос 9
Витийство пленителей твоих, увещавших тя прияти веру их суетную, яко вода о камень сокрушися: знал бо, доблий рабе Христов, яко никаяже вера, аще истинна есть, убийству и насильству бывает причастна. Посему, крепости твоей пред лицемерными и гордыми убийцами дивящеся, песньми воспеваем ти тако:
Радуйся, лживость мучителей твоих истиною твоею обличивый;
Радуйся, дела и помышления твоя Суду Божию поручивый;
Радуйся, лицемерие хулящих Бога твоего обличивый;
Радуйся, путь истинный всем, отшедшим от Бога, указавый;
Радуйся, кровию твоею землю Российскую окропивый;
Радуйся, плотию твоею туюжде землю освятивый;
Радуйся, в сердцах и умах земнородных память вечная;
Радуйся, в небожителех упокоение блаженное;
Радуйся, мучениче Евгение, воине Христов непобедимый!
Кондак 10
Спасительна душе смерть плоти твоея, славне Евгение, бысть, егда скончал еси течение живота твоего на земли, исполненней гнева, злобы и всякия неправды. Ныне же предстоиши и впредь будеши присно предстояти Солнцу Правды, милосердному и любвеобильному Христу Богу, хвалебную песнь поя Ему: Алилуиа!
Икос 10
Стена необоримая, на неяже несть оружия, явися вера твоя, святый мучениче и исповедниче Евгение. Оружием бо веры, крестным знамением, на груди тобою носимым, победил еси, по слову Господню, данному иногда благоверному Константину царю, вражеския полки и легионы. Прославляя же Давшего ти крепость и Венчавшего тя венцем мученическим победным, Господа Иисуса Христа, Крестное знамение твое, яко святыню велию, лобызающе, поем тебе похвалы сия:
Радуйся, сквозе житейское море и напастей бурю с честию прошедый;
Радуйся, в тихое пристанище и цветение райское вшедый;
Радуйся, от тли смертныя Победителем смерти Христом возведенный;
Радуйся, венцем славы Царем царей венчанный;
Радуйся, Царицею небесе и земли, Богородицею Пречистою, всыновленный;
Радуйся, всех святых сонмом на небеси радостно сретенный;
Радуйся, от всякия болезни, печали и воздыхания Ангелом Хранителем твоим исхищенный;
Радуйся, всем воинством небесным вечныя жизни Подателю представленный;
Радуйся, мучениче Евгение, воине Христов непобедимый!
Кондак 11
Пение торжеству твоему над смертию и погибелию вечной приносим, дивящеся непостижимому Промыслу Божию, даровавшему нам во время неспокойное надежду несумненную на умирение жизни нашея многотрудныя твоими святыми молитвами, свидетелю Христов Евгение, в жертву себе принесшему за ны, вопиющия о тебе благодарне Богу: Аллилуиа!
Икос 11
Светоносным факелом подвиг твой, богопрославленне мучениче Евгение, воссияша во стране Российстей. Мы же, соотечественники твои, на единей земли с тобою рожденныя, едиными усты и единем сердцем Бога благодаряще, тебе поем тако:
Радуйся, человеков с Богом примирение;
Радуйся, Судии Праведнаго о них умоление;
Радуйся, от земли бренныя во юности твоей отъятый;
Радуйся, на руце Божии в вечней юности пребывати приятый;
Радуйся, земли Российстей крепосте и утверждение;
Радуйся, воинству державы нашея на врагов одоление;
Радуйся, нестроений и смут временнаго жития избавленный;
Радуйся, к первозданному благолепию и блаженству безмятежному возвращенный;
Радуйся, мучениче Евгение, воине Христов непобедимый!
Кондак 12
Благодати Божией даров удостоенный при земной жизни твой, славный мучениче Евгение, испроси у Спасителя нашего и нам, грешным, благодати Его причастниками быти неосужденно, да поем Прославльшему тя и веры нашея Истине, Христу Богу: Аллилуиа!
Икос 12
Поюще славу неисследимей пучине Премудрости Божией, в тебе нам открывшейся, святый и славный мучениче и страдальче Евгение, скорби наша по потерям воинов наших на полях брани, юже воздвизает на ны слабости ради духовныя нашея враг рода человеческаго и отец погибели, прелагаем на радость велию. Радостию о Господе, скорбями нас посещающу грех ради наших и дающему нам время на покаяние и обращение к светлостем заповедей Его, да посрамятся вся действа диаволя на ны движимыя, да поем тебе, Богом прославленному крепкому свидетелю Его:
Радуйся, древо райскаго плоде изысканный,
Радуйся, насаждений Едемских цвете благоуханный;
Радуйся, винограда Христова грозде зрелая;
Радуйся, стадо Иисусова агнче упитанный;
Радуйся, Премудрости Божией вместилище пространное;
Радуйся, добродетелей духовных кладезю глубокий;
Радуйся, от сокровищ вечных каменю драгий;
Радуйся, богатств богозданных кладе преизобильный;
Радуйся, мучениче Евгение, воине Христов непобедимый!
Кондак 13
О преславный и предивный согражданине наш, воине и свидетелю Христов, мучениче Евгение! Прием ныне с любовию и благодарением возносимое тебе пение, моли прославльшаго тя Господа Славы мир душам нашим и Отечествию нашему даровати, брань и смуты из жизни нашея истребити, да имуще тя ходатая за ны, грешныя, пред Престолом Божества Великаго, вопием Триипостасному Владыце и Создателю нашему песнь: Аллилуиа, Аллилуиа, Аллилуиа!
Трижды, посем икос 1 и кондак 1
МОЛИТВА СВЯТОМУ МУЧЕНИКУ ЕВГЕНИЮ
О святый и всехвальный мучениче Евгение, во время благопотребное дарованный нам, соотечественником твоим, неизследимым промыслом и непостижимым Разумом Триипостаснаго Бога, Иже посети страну нашу испытанием междоусобныя брани, юже воздвигну на ны древний рода человеча враг и Самаго Искупителя нашего, Господа Иисуса Христа!
Вемы, яко врагу сему, всельшемуся в умом помраченных мятежников, растлителей умов, убийц старцев и юных, жен и детей, послан бысть ты военачалием нашим во страну Чеченскую, да бы истребилися, подобно праху на ветру, беззаконники внутрь страны нашея, якоже древле истребляхся всяк враг наш благословением Божиим и доблестию воинов наших.
Вемы, яко грехов ради наших попусти Господь испытание таковое нам, всякаго добра опустошенных; обаче Создатель и Отец наш Милосердный не оставил есть нас во отчаянии и смятении, избрав тя, воине славный, да кровию твоею брань нашу на врагов освятиши, веру людей и воинства нашего укрепиши и примером твоим научиши, во еже прилеплятися к миру и добру, Богом заповеданным нам, и отвращатися от зла, имже полна есть жизнь и деяния наша во времена сия неспокойныя. Показал бо ся житием твоим и блаженною кончиною, яко вершина всех достоинств и добродетелей есть житие на земли с Богом. От юности твоея Крест Животворящий возлюбив, даже до казни лютыя за крепкое исповедание веры твоея и правоты пострадавый, сопричтен был еси великим древним мучеником и свидетелем Славы Божия во младенствующей Церкве Христовой, подвизавшимся добрым подвигом мученичества. Ты такожде, славный Евгение, не отвергл еси знамения крестнаго, на телеси твоем носимаго, и предпочел еси смерть лютую и неправедную за честь и славу Бога твоего, неже жити ти с совестию уязвленною и окаянною.
Ныне же, радостне торжествующе прославление твое, веруем, яко вся силы небесныя сорадуются нам и лобызают тя, о древо младое и новонасажденное рая Иисусова!
Наипаче же веруем, яко обрел еси любовь и Самой матери Господа нашего Иисуса Христа, Пресвятыя Владычицы нашея Богородицы и Приснодевы Марии и слышиши от Нея: «Сей есть от рода нашего!»
К тебе, яко снискавшему дерзновение ко Господу за мужество подвига твоего, крестное знамение твое, яко великую святыню, лобызающе, взываем ныне и молим: да просветит Господь молитвами твоими помраченныя злом и грехом сердца наша и души - грехи бо наша суть брань противу воли Творца нашего, и никтоже постоит, аще узрит Господь беззакония людей Своих; да оставит Господь грехи и прегрешения наша; якоже приял пролитие крови твоея, да приимет покаяние коегождо приносимое; да не лишит нас Господь времени в многотрудней жизни нашей, времени на покаяние искреннее и на устройство в сердцах наших достойнаго обиталища снизшедшаго к нам Спасителя Христа; да не убежит от нас, жестокосердых и черствых, Ангел Хранитель наш, оставляя нас на насильство от диавола.
Испроси, святый мучениче и исповедниче, вечный покой во блаженном успении для всех спострадавших ти воинов наших и утоли святым твоим ходатайством и мольбами страдания и печали родителей и сродников их; приведи к Милосердому Богу, Владыце живота и смерти, всех, живот положивших на полях брани и во пленении от врагов умученных; да вселит их Господь в вечность бытия Своего со всеми святыми, от века угодившими Ему; нам же, оставльшимся на земли, испроси у Господа прочее время живота нашего в мире скончати и по отшествии нашем достойно предстати со всеми святыми Престолу Судии нашего, воздающего коемуждо по заслугам, и умилостивленнаго дерзновенными молитвами твоими и всех угодников Его, ниже да низведены будем по грехом нашим на место мучения, но да вселены будем в сияние светоносное Отца, и Сына, и Святаго Духа Господа на веки вечныя! Аминь.
Составил протоиерей Валентин Сидоров.