Кондак 1
Схиигумену Савве приношение молебное от любящих сердец наших совершаем, яко сей бе воистину муж совершенный в добродетелех и благодати Божией преисполненный, иже не ласкосердыми похвалами руководил еси чад своих, но с высоты лицезрения истины Божией строгостию и любовию наставлял еси их к восхождению духовному, да возмогут достигнути Царствия Небеснаго, с любовию воспевая наставнику духовному:
Радуйся, отче Савво, образ добрый истиннаго к Богу восхождения.
Икос 1
Хотяще достигнути Царствия Небеснаго подражати потщимся наставнику нашему Савве предоброму, яко Силу Божию имеющему провести нас просреде моря волнуящася житейских треволнений, и образ нам представляющий следованию заповедем Христовым. Молчанию поучал еси ны, да умолкнут наши земныя суетныя стремления и чрез сие снискати возможем новое слово, иже к Богу рещи, молитвами схиигумена Саввы, ему же поем:
Радуйся, светом своея любви ко Христу ны недостойныя озаряяй. Радуйся, любовию твоею нам землю перстную в небо претворяяй. Радуйся, смиреннословия противниче. Радуйся, Небесной Пасхи причастниче.
Радуйся, отче Савво, образ добрый истиннаго к Богу восхождения.
Кондак 2
Игуменства труд многопопечительный понесши, упованием на Господа, на небеса прешел еси, идеже зря тебе вознесенна и в небесной славе пребывающа, научаемся преносити укусы злых змиев, яже за пяту стеречь ны поставлены и тщатся запяти следование путем Христовым, ты же помогай нам противу козней врагов наших в главу уязвляти их, да прейдем и мы безпреткновенно в небесные чертози, идеже воспоем Христу Богу нашему: Аллилуия.
Икос 2
Избыточествующе любовию ко всем людям, иже тебе окрест быша, добре отче Савво, яже источником имела еси свет любви Христовой, не частию сердца некоей, но всем помышлением, всею крепостию, всею душею и всем сердцем возлюбил еси и тако благодатию преисполнившись, снискал еси дары Духа Святаго: прозорливость, изцеление недугов, паче же любовь к людям, яже освещала еси, яко светильник пути чад твоих духовных, сего ради любовию к тебе подвизаеми, вопием ти:
Радуйся, во всякой душе человеческой добрая прозреваяй
Радуйся, ниже других, но паче себя исправляти призываяй
Радуйся, своея славы никогдаже искавый.
Радуйся, ничесоже искати себе преизлишшего научавый.
Радуйся, отче Савво, образ добрый истиннаго к Богу восхождения.
Кондак 3
Гордыню имуще цветущу, смирение волчее, а терпение гнилое, предстою сим унылым образом пред величием Божиим и сознаю свое недостоинство, обаче Владыка неба и земли не презирает мя, но подает дары Своя святыя, ибо дождит на всяку тварь и яко Отец любящий, всякаго сына приемлет: и добраго, и злаго. Господи, как милостив Ты к нам грешным! - паче сего не имею что рещи и токмо душа, пред Господом предстоящая, объятая трепетом и слезами радости вопиет: Аллилуиа.
Икос 3
Укорения от своея совести на всяк день имый, аз убогий, чудо велие зрю: яко аз нечистую жизнь ведущий и нечистыя уста имущий, не отриновен еси Богом, но могу, яко подвизает мя Церковь Православная, возносити молитвы о всех и за вся, и о душах святых, яже на небесех пред самим Господом предстоят и имеют силу и дерзновение молити за ны! Благодарю Господа за сие, яко не отринул еси мя грешнаго от милости Своей, да возмогу обращатися к Нему не токмо скверными устами своими, но и чрез заступника, отца нашего Савву, иже чистыми устами вознесет о нас моление свое, мы же вопием ему:
Радуйся, молитвы наши к Богу приношаяй.
Радуйся, уст наших скверну очищаяй.
Радуйся, велие к Богу наше дерзновение.
Радуйся, светлая надеждо нашего спасения.
Радуйся, отче Савво, образ добрый истиннаго к Богу восхождения.
Кондак 4
Мудраго апостола Петра словам следуя, рекл еси, отче Савво, яко ниже удивлятися, ниже огорчатися следует, аще неправду сретает всяк человек живый на земли, яко же нова небесе и новы земли по обетованию Христову чаем, в нихже правда живет обаче на земли сей не подобает ждати правды и смущений находящих от сего тщетнаго ожидания, но мудростию сретати неправду и ниже возмущатися сия нахождением, но за вся благодарити Бога вопия: Аллилуиа.
Икос 4
Егда на войне враг поразити стремится живых воинов, тако сему подобно и мир нападает на живых духом христиан. Сие, отче Савво, в полной мере претерпел еси, яко многия скорби и нападки во множестве перенесл еси со упованием на Господа, Иже на небеси пренесе тя, идеже в Церкви торжествующей пребывающе, приими от нас, вопиющих ти из Церкви воинствующей:
Радуйся, не от мира сего в житии пребывый.
Радуйся, в огне скорбей все грехи попаливый.
Радуйся, безропотно воле Божией покорявыйся.
Радуйся, никогда же отчаявыйся.
Радуйся, отче Савво, образ добрый истиннаго к Богу восхождения.
Кондак 5
Небесная любовь, юже ты достигл еси, отче Савво, выше земной, иже есть степень восхождения к небесной. Сего ради любовию, яко к отцу земному движими, желаем вслед тебе, небесной любви достигнути, да воспоем с тобою вкупе Отцу Небесному: Аллилуиа.
Икос 5
Учил еси святе Савво, яко велие дело Божие сотворим, ежели утешим печальнаго, ибо печаль духовную смерть производит. Суд бо без милости не сотворшему милости, но милостивых велия радость ожидает на Суде Божием, яко тии помиловани будут. Сего ради речем ти, отче Савво, возгревающему в нас сии слова Божии:
Радуйся, яко милостыня не для принимающаго, но паче подающаго, научавый. Радуйся, терпением свою душу стяжавый.
Радуйся, смиренной покорностию силу вражию одолевый. Радуйся, многия скорби, болезни и печали претерпевый.
Радуйся, отче Савво, образ добрый истиннаго к Богу восхождения.
Кондак 6
Слава Тебе Боже наш! Сотворил еси нас от преизбытка любви Твоей, во образ Свой сотворил и предал еси нам красоту Твою и тварь Твою, да в благоговении сохраним ю, преумножению любви Твоей пособствуем и наполним ею землю. Помози нам хотя бы на малую долю приити в меру Твоего замысла о нас, да носити будем в себе любовь Твою, доброту и красоту, и опричь греха жити будем, вопия Ти: Аллилуиа.
Икос 6
Алчуще правды Божией, радуемся на тя зря, отче Савво, ибо чрез тя Господь благодействует и изливает любовь Свою на всех, приходящих и уповающих на помощь твою и тобою чудеса являет, яко и чернобыльская отрава низлагается и претворяется яко не сущая, болезни неизцельныя излечиваются и сердца человеческия прелагаются от печали на радость, о сем благодарне вопием ти:
Радуйся, яко противу чернобыльской скверны, краткое правило явивый. Радуйся, благодатию Божией вся скорби сего мира победивый. Радуйся, родителей твоих Михаила и Екатерины, чадо благословенное.
Радуйся, яко мы крылами любви твоея покровенные. Радуйся, отче Савво, образ добрый истиннаго к Богу восхождения.
Кондак 7
Внегда узрим внутренняя своя оком Божиим, сим зрением грехов и нечистоты своей внутренней, да отвратитися сего возможем и потщимся новое житие проводити, очищенное греховной скверны. Обаче сие особое зрение духовное не подается простою бездельною жизнию, но токмо трудами и стараниями по благодати Божией, подобно той, яко имел еси отец Савво и щедро делился еси со чадами своими. Сие же внутреннее видение грехов не всякому снести возможно, трудно бо и нестерпимо для тщеславной и себялюбивой души, но помощию Божиею потщимся достигнути, аще невозможно сие человеку, возможно Богу, Ему же поем: Аллилуиа.
Икос 7
Всякому земнородному Господь подает дар быти подобным Ему, но мы, яко человецы недостойнии отреваем подобие и искажаем образ сей подклонением греху. Аще и не имеем уже в себе действия благодати Божией, но смутно по временам ощущаемое, непщуем благодати сей жити в нас, сие бо есть голос Бога - наша совесть, яже страждет под тяжестию грехов и вмале имеет силу напоминати нам о Небе. Обаче сию благодать, в полной мере действующую, видим на святых Божиих, яже жизнию своею влекут нас к горнему миру, яко отец Савво: на него бо зряще, видим неврежденную красоту Божию, иже всякому даруется, но отражается токмо на святых, сего ради вопием:
Радуйся, Божией благодати сияние. Радуйся, посреди скорбей во истине Божией стояние.
Радуйся, смирением на земли небесным ангелом уподобивыйся. Радуйся, ветхаго человека совлекшийся.
Радуйся, отче Савво, образ добрый истиннаго к Богу восхождения.
Кондак 8
Единомышлении со отцем Саввою, любовию к Тебе, Христе наш, соединяемые, благодарим Тя за безценные благодатные дары, коими Ты помогаеши противостати злу, иже по премногу окружает ны в земной жизни! Помози нам сохранити дуновения Духа Святаго на ны чрез Церковь Твою изливаемые, сие бо есть богатство выше всякого богатства земнаго, ибо грехми обремененные не умеем своими силами подобающе хранити и теряем Его, яко неверные блудные сыны Твои, но, светом Твоим возгреваеми вопием Ти: Аллилуиа.
Икос 8
Простотою небесною, отче Савво, открывал еси премудрости земныя, яко ключ сей открывает всякия двери, наипаче ко вратам Райским, ихже прошел еси вслед Господа дорогой тесной и трудной жития земнаго. Сему научитися от тебе желаем, яко имел еси Господа помощником на пути сем трудном, тако и мы, надеемся имети тя, водителем нашим и предстателем пред Господом, да последуем вслед тебе в мир Горний, от сердец наших воспевая:
Радуйся, до конца тяготы мирския претерпевший. Радуйся, любовию истинною вся преграды преодолевший.
Радуйся, немощами своими силен явивыйся. Радуйся, зде пребыв мира здешняго отрешивыйся.
Радуйся, отче Савво, образ добрый истиннаго к Богу восхождения.
Кондак 9
Рекл еси, отче Савво, яко Псалмы и молитва Иисусова есть вода живая из единаго источника. Яко стены храма поддерживают его кровлю, тако Псалтирь поддерживает молитву Иисусову, посему насадитель ревностный неусыпаемой Псалтири явился еси в монастыре Псково-Печерстем, сии два крыла молитвенных восперяют всяку душу к Богу, да устремляясь горе людие вопиют: Аллилуия.
Икос 9
Истинная жизнь человека, иже на высоте своего призвания пребывает есть та, внегда в душе онаго Бог обитает. Без Бога же жизнь протекаемая есть подобие смерти длящейся и люди ея проводящие яко мертвецы суть пребывающие. Но мы, полагаясь на помощь Отца Небеснаго и его святых, да прейдем покровительством небесным от смерти к жизни истинной, поя отцу Савве, наставнику нашему:
Радуйся, образ добрый поклонения Богу духом и истиною. Радуйся, достигший света бранию мысленной.
Радуйся, яко в душе твоей бе Бог обитаяй. Радуйся, яко в Бозе ныне пребываяй.
Радуйся, отче Савво, образ добрый истиннаго к Богу восхождения.
Кондак 10
Нестроений душевных избегая, да имеет всякий человек мир в душе своей и возможет находитися в чине своем. Сим словам святаго Пимена Великаго следуя, отец Савва научал еси чад своих, ибо человеки есмы и подвержены слабости возношения гордостнаго или смирения ложнаго, но всякий места своего да держится: в церкви ли, в семейном чине или служебном да работает и всею совестию держит свою душу в чистоте и высоте надлежащей, ибо блуждая чина своего да не уклонится опасным хождением в иныя искушения и грехи большие, внегда не возможет пети Богу: Аллилуиа.
Икос 10
От малых ступеней к высоким восходити, поучал еси, отче Савво, чад своих не надеянием на людей и на силы своя, но повергая себе пред величием Божиим, полагатися токмо на Христа и на Матерь Божию, яко сим надеянием возможно есть избавитися от всякаго греха, наипаче же трусости и боязливости, яже вынуждают человека криводушию подклонену быти и вести жизнь ложную, двоящуюся, сего ради не может душа боязливая вознестися ко Господу, но страхом колеблема мимоидет достояния своего, отчего да избавимся молитвами отца нашего Саввы, вопия ему:
Радуйся, на князи и сыны человеческия не надеявыйся. Радуйся, князю мира сего не подклонивыйся.
Радуйся, мужеством по Богу преуспевый. Радуйся, до самоотвержения верность Христу показавый.
Радуйся, отче Савво, образ добрый истиннаго к Богу восхождения.
Кондак 11
Шествовати желая по суетной лествице земных устремлений, по обыкновению человеческому, яко чем выше человек восходит, обретая богатства земныя, тем с меньшию любовию относится оставшимся низу. Какое разительное отличие от Бога, Коего несть выше в бытии, Иже не гнушается самого низкаго и нищаго человека, но входит во всякое сердце человеческое вечеряти с ним, отчего душа не имать иных помышлений опричь же Божественных и токмо речет: Аллилуиа.
Икос 11
Египетскою тьмою одержимии, ко солнцу правды Христу вопием от сердец наших, да возможет избавити ны от плена сего. Всяк же по достоянию своему вопити может гласом духовным ко Господу, иного песни подобны соловьиному гласу, а иного свинии хряканию (карканию нощнаго врана на нырищи), обаче всемилостивый Господь всякую песнь приемлет, аще от сокровеннаго сердца, хотя и нечистыми устами реченную. Мы же надежду имамы не токмо своими гласы приносити песнь ко Господу, но и вкупе со отцем Саввою, иже на небесех предстоя, чистым гласом вознесет за ны слово свое, мы же зде на земли от недостойных устен речем молитвеннику нашему:
Радуйся, честная от недостойнаго изводящий.
Радуйся, яко в тебе всяк помощь духовную обрящет.
Радуйся, силою духовною бессильныя укрепляяй.
Радуйся, просящим тя о милости помогаяй.
Радуйся, отче Савво, образ добрый истиннаго к Богу восхождения.
Кондак 12
Нужнейше есть человеку любовь Твоя, Боже, сия бо наполняет жизнь человеческую высоким смыслом и радостию, ибо даже малейшия искорки любви Твоея, внегда приходят и вселяяся в сердце человека, преображают его и делает подобным Тебе. Сию радость душа человеческая легко отличает от всякой радости земной, яко несть подобна ей, но превосходит неизмеримо душевным светом и теплотою сердечною, словно зрит Тя, Самого Бога, ибо несть возможно зрети Бога очами плотскими, но возможно есть сердцем возвышенным, наполненным Духом Твоим, посему и вопиет Ти: Аллилуиа.
Икос 12
Излишняго попечения и приобретения вещнаго, яко вся излиха желаемое есть погибель для души, огребатися призывал еси, отче Савво, боятися роскоши, подражания скоропреходящей моде, накопления денег, но вся излишнее раздавати нуждающимся. Собирание бо сие: "на черный день" рекомое обличают быти сему делом сатанинским. Человек бо, имеющий любовь к деньгам и вещем, есть яко голубь с двумя крилами связанный, не имеющий силы возлетети молитвою ко Господу. Не искати ничесоже на сей земли грешной подобает, ибо нет у нас зде постояннаго дома - странники и пришельцы мы есте на земли: не имамы бо зде пребывающаго града, но грядущаго взыскуем. Сего ради ти речем, Савво отче:
Радуйся, двумя крилами на небо возлетевый. Радуйся, нищетою земною славу Божию узревый.
Радуйся, задняя забываяй в предняя же простиравыйся. Радуйся, от Господа в печалех препитавыйся.
Радуйся, отче Савво, образ добрый истиннаго к Богу восхождения.
Кондак 13
Единому Богу жизнь свою посвятивый отечества небеснаго достигл еси, предивный и пречудный заступниче наш и ходатаю, преподобне отче Савво. Нынешнее сие моление от душ и сердец наших тебе приносимое приемлюще, умоли у престола Царя Славы прощение согрешений нам даровати и Царствия Небеснаго сподобитися, идеже с тобою вкупе воспоем: Аллилуиа.