Бандяй
Малайкин Толикень велесэ кияк эзь лово паро цёракс. «А лиси эйстэнзэ ломань!» — кортасть сондензэ. Нать, а стяко истя арсесть велень эрицятне. Ушонь лемезэяк аволь мазыйтнедель — Бандяй.
Сонзэ лемезэ седе сеедьстэ марсевсь сестэ, зярдо велесэнть лиснесть берянь тевть: тюремат, саламот… Теке марто Толик кежтемель, эзь вечке манчемат ды киненьгак апаронь арсемат.
Ветеце классос молемс сон лия эйкакштнеде мейсэяк эзь явово: чийнесь, налксесь, тонавтнесь. Мейле ушодовсь! Эрьва чистэ киньгак марто ды тюрезевиль. А вечкиль, бути кияк трокс вал каршонзо ёвтыль. Сельмень тапамос, турвань порксамос пачкодиль. Тонавтыцятне яла пеняцильть кудосотненень. Ансяк тетянзо кшнань карксоськак эзизе полавто обуцянзо.
Котоце классто саезь Толик кармась школасто орголеме. Тонадсь таргамо, кроямо валсо кортамо. Авазо авардсь, тетязо хлыстяесь-аволясь «тонавтомань» кедьёнкссонть — стяко, Толикнень а пси, а якшамо.
Школанть прядома ёнов Толик аламодо оймась. Кармась налксеме футболсо, ды, кода кортась школань физрукось, те лиснесь сонзэ пек вадрясто. Сон натой совавтозель покштнень командас, ды налксесь шабра веленсетнень каршо. Ней Толик эцнесь тюреме ансяк сестэ, зярдо лоштилизь пильге ланга. Сон ливтнезь ливтнесь налксемань паксяванть, кияк мельганзо а кенериль. Те ней сон Бандяй, сестэ ульнесь — Варма. Чачома чистэнзэ тетянзо-аванзо казсть тензэ баян. Тесэ Толикень туртов од эрямо ушодовсь. Кизэнь перть сон ковгак кудосто эзь лисне, яла тонавтнесь налксеме. Ды истя тонадсь, мик кармасть тердтнемензэ клубов седямо. А вайгелезэ кодамоль! Истя морась: конить сельметь, кунсолок сонзэ — ливтязь туят. Велесэнть лоткасть Толикте беряньстэ кортамодо.
Школанть прядомадо мейле сон сыргась механизаторокс тонавтнеме. Ды од таркасонть таго чаракадсть цёранть превензэ, кармась симнеме. Мезть ансяк Толик эзь тейне райцентрасо. Колмоксть понгонесь милицияв. Весть ялганзо марто чавизь велень зоотехникенть, нельгизь ярмаконзо. Эль эзизь озавто тень кис, вадря, тетязо содылизе те ломаненть. Тевенть, кода мерить, лепштизь. Мейле секе ялганть марто тапсизь универмагонь вальматнень. Сонстензэяк Толикнень понгонесь, реанимацияс натой пачколесь — истя равтызь райцентрань клубсонть. Весе тевензэ а ёвтневить.
«А лиси эйстэнзэ ломань!» — таго текень кортасть велень эрицятне. Ансяк истя кортасть седе сыретне, од ломантнень ютксо Толикень ульнесть пек ламо ялганзо.
Мейле Толик рамась гитара, тонадсь эйсэнзэ седямо ды, иредезь, вень перть морыль Цоень моротнень. Сонськак снартнесь морот ладсемс, ансяк нотатнень беряньстэ содылинзе. Стихензэ васня макснилинзе витнемс ловнома кудонь прявтонтень. Сон мик ютавтызе «Сектор газа» пурнавксстонть «Туман» моронть эрзянь кельс:
Ульнесь истя шожда, ульнесь истя вадря,
Ансяк каясть кирьгазон кшнань каркс…
Гитарась лездась Толикнень тейтертнень мартояк. Кияк эзь сода, мень вий сюлмизе мартонзо эсест велень Алёна тейтеренть, кона тонавтнесь университетсэ. Мезе лангскак апак вано, сынь кизэнь перть вастневсть.
— Мекс тон, Толик, истямат? — яла кортась Алёна, цёранть раужо черензэ вадяшазь.
— Кодаман? — Толик вансь видьстэ Алёнань сельмс.
— Аволь лиятнень кондямат, — стакасто лекстиль тейтересь. — А оймат кодаяк, яла таго-мезе вешнят…
Мейле Толикень ды Алёнань кист явовсть. Тейтеренть мелезэ мольсь ченьксэнь чинеденть. Толик тень кувалма таргошка эзь лисне ушов, симсь латопрясо. Зярдо аламодо сась ёжос, кармась анокстамо армияв. Вальмалов стявтсь турник, кардазс понгавтсь сюросо пештязь кескав, косто-бути таргась кавто гирят.
Сёксня Толикень саизь. Сон туема чистэнтькак копордась кода эряви.
«Окойники! — лекстясь велесь. — Паряк, армиясь путсы превс, тонавтсы эрямо!»
Сёрмат цёрась кучнесь чуросто, сетнеяк нурькинельть. Монь, келя, весе вадря, понгинь разведкас. Тов эрьванть а саить. Толикнень лездасть турникесь, гирятне ды футболсо налксемась.
Пельиень ютазь Федеральной ушмотне омбоцеде совасть Чечняв. Толикень авазо пек талнось, а понговоль цёразо тюремань паксяс. «Кодат Чечнят! — сёрмадсь Толик. — Минь Краснодар ало капстат вансттано!»
Толикнень кадовкшнось служамс нилешка ковт, зярдо сонзэ ускизь кудов… кшнинь кандолазсо. Авазо ёжовтомо новольсь тетянзо мештес. Тонатань чамава чудсть сельведть.
Велеванть срадсть кулятне: веенст кортасть, Толик маштовсь тюрема шкасто, омбонст — иредезь Толикень тапизе КАМАЗ, мезть понгсь лабордсть. Кода эно, Бандяй Толикень пельде мезть учнемс?
Калмамо пурнавсь весе велесь, кой-кить састь шабра велетнестэяк. Седе ламотне од ломанть. Тесэль Алёнаяк. Сон апак визде авардсь лелянзо мештес нежедезь.
Кандолазтнэнь велев пачтинзе кужонь военкомось. Мартонзо сась цёра, конань чамава таргавсь кувака аржо. Райононь прявт-
тнэяк тесэльть. Весе чарькодсть — те а стяко. Васенцекс валонть саизе военкомось.
— 27 июня 2000-го года, — кевензазь вайгельсэ ушодсь ловномо сон, — разведгруппа, в состав которой входил сержант Анатолий Малайкин, проводила разведовательную операцию в селении N. Войдя в селение, отряд попал в засаду. Один из бойцов был убит. Сержант Малайкин и старший сержант Купцов получили ранения. Командир группы принял решение отходить. Будучи раненым в ногу, сержант Малайкин добровольно вызвался прикрыть отход группы, тем самым дав возможность спастись своим товарищам. Три минуты длилась неравная схватка. Анатолий Малайкин автоматным огнём уничтожил двух боевиков, а когда у него закончились патроны и бандиты окружили его, он взорвал себя гранатой, убив остальных бандитов.
Указом Президента и Верховного Главнокомандующего Вооружённых сил Российской Федерации сержанту Анатолию Степановичу Малайкину присвоено звание Героя России. Посмертно… — комавтызе прянзо военкомось.
Пертьпельксэсь зярыя шка каштмольсь. Марявсь, кода варминеденть либордыть килей лопатне.
— Вана теть Бандяй… — каятотсь та-косто удалдо.
Чипаенть лангс апак вано, тусь сееде пиземе. Кортыть, истямонть мельга туить касомо пангтне. Толик зярдояк эзь вечке пангс якамо. Сон вечксь мазый морот.
Сюпав атя
Тонавтнемадо мейле совинь микшнема кудос. Рамсицят тосо арасельть, ды мон апак капша ушодынь ванкшномо цитниця лавсятнева, арсинь, мезе саемс вачо пекем пештямс. Аламо шкань ютазь совасть кавто ломанть: тюштянь пингень оршамосо кичкерьгадозь атине ды питней кедень курткасо сэрей од цёра. Мон сыргинь микшницянть ёнов. Те шкане мобильникезэнь сась пачтявкс. Таргия телефоном, ловныя сёрмадозенть ды ёвтынь микшницянтень, мезе тень эряви.
Сэнь палясо тейтересь весементь кандызе ды мик пештизе юдмас.
— Сядо ведьгемень ниле целковойть, — ёвтызе питненть.
Мон ёвкстыя кедем зепс, косо ульнесь ветесядонь каштордыця лопась, ды абунгадынь — ярмакось арасель. Эзинь кенере парсте тандадомояк, кода удалдо каятотсь атиненть вайгелезэ:
— Цёрам, некак, тонь ярмакось прась.
Сельмень сеске пезнавтовсть кияксонтень, ансяк тосояк лопась эзь неяво.
— Цёрам, саика пильгеть, — пшкадсь атинесь кедень курткасо од ломанентень.
Тона састо кепедизе керш пильгензэ ды тейсь эскелькс удалов, олякстомтызе пильгалонзо понгозенть. Мон пштистэ варштынь цёранть лангс.
— Вантака, эзия нееяк, чалгия! — пейдезевсь сон ды капшазь лиссь.
Мон чатьмонезь кепедия лопанть ды максыя микшницянтень.
— Сюкпря теть, покштяй! — меринь атянтень.
— А мезень кисэ, цёрам, — мизолдозевсь сон. — Вант, седе тов кургот иляк автне.
— А карман, — алтынь мон ды саинь микшницянть кедьстэ кадовикс ярмактнень. — Сюкпря теть, покштяй.
Атинесь ансяк аволдась прясонзо ды мольсь микшницянть ваксс. Мон арынь удалонзо, эзинь сода, мезе теемс.
— Вана се чиньжарамо оенть зяро питнезэ? — венстизе атясь сорныця кедензэ лавсянтень.
— Сизьгемень целковойть, — мерсь микшницясь.
— Вай, кодамо питней! Некак, ярмакон а сатытькак.
— Покштяй, монь улить, максан, — састо пшкадинь мон.
— Тонь улить, содан, — ёжовсто варштась лангозон атинесь. — Ды кадык тонсетне кадовитькак тонеть. Мон содан, косо оесь аволь истямо питней.
Ды лиссь. Мон мельганзо. Те шкане шабра микшнема кудо-
стонть тыц пешксе юдма марто лиссь цёрась, кона чалгакшнызе ярмаком. Панжизе питней иномарканзо, ёртызе удалце озамо таркантень юдманть, озась ды тусь ардозь.
Мон варштынь апак капша эскелиця атиненть мельга, ды сельменьгак сявадозевсть. Кодамо сон сюпав! А оршави сюпавчизэ рунго лангс ды а кельги сехте покш машинаскак.
Зярдо ожолгады лугась…
Сэрей потолок марто покш икельцькудосонть сынь аштесть колмонест: Женька, лелязо ды сырькаезэ. Вансть вальмава, кода сёксень ковгак а капшиця пиземесь начты ожо лопатнень, кода эрязасто суликатнень ланга чиить нусманя ведьбайгетне.
— Кувать карми валомо… — мерсь Женька.
— Мда-а, сёксь… — лекстясь Миша лелязо.
— Истя вана эрят-эрят, сы кулома чить, ды весе… — апак учо кортазевсь сырькаесь, ды Миша марто Женька сеске варштасть лангозонзо. — Кандолазт ды мода. Тоначив мезеяк а саеви: а кудот, а кардазот, а ярмакот... Мезе Тосо кармат тееме? Ули-арась Тосо мезеяк?
— Мекев кияк эзь сакшно, эзь ёвтне, — мерсь Миша ды таго педявтынзе сельмензэ вальмантень. — Аздатано, мезе мода лангсо тееви, тон кевкстнят, мезе Тосо. Теде кияк а соды.
Миша арсесь пизементь ало од кудодонзо, конань латозо те шкас апак вельтя. Арсесь, зярдо несы тейтерензэ, кона явомадост мейле кадовсь аванзо марто.
— Женька, — пшкадсь сырькаезэ, — кулындерян, лайшесамак?
— Ки соды мезть кортат, сырькай, — апаркстомсь Женька ды велявтсь вальманть ёнов. — Ужо, зярс эзить куло, эряк.
Женька арсесь, мекс Алёнка а сёрмады каршо валт смсканзо каршо. Арсесь, зярдо тетязо макссы тензэ машинанть, ды сон сырги шабра велев.
— Эно мезде тень кортамс? — мизолдозевсь сырькаесь ды варштась вальмава. — Иень оно зяро. Мезть учомс? Ансяк куломанть.
Сон арсесь, мекс вальмало кодаяк а ожолгады лугась. Сась ожоковось, валнынзе ожо тюссо килейтнень, ансяк лугась таго-мекс кадовсь пижекс. Мезеяк, курок ожолгады. Вельтяви ловсо, тунда вельми мекев. Неемс бу, зярдо ды кода…
Таго-зярдо минь содылинек...
Миниатюрат
Таго-зярдо…
Таго-зярдо ульнесь вейке Ине Мода, ды лемезэ ульнесь Гондвана.
Таго-зярдо ломантне ярсасть верек сывельде ды эрясть ансяк ниленьгемень иеть.
Таго-зярдо ломанесь эзь вечке ярмакт ды сюпавчи.
Таго-зярдо стявтсть пирамидат, конатне а стявтовить ней.
Таго-зярдо сёрмадызь васенце валонть.
Таго-зярдо каладсь Римень виевде виев империясь.
Таго-зярдо кшнинь оршамосо рыцартне тюрсть вечкевиксэст кисэ.
Таго-зярдо теизь васенце ружиянть.
Таго-зярдо эрясь Леонардо да Винчи.
Таго-зярдо Колумб панжсь од мастор, ансяк сень эзизь лемде сонзэ лемсэ.
Таго-зярдо виртнеде ульнесть седе ламо, лейтнесэ укшность ламо калт.
Таго-зярдо ломантне вечкилизь тиринь масторост.
Таго-зярдо сынь тюрсть олячист кисэ, содазь — зярдояк а лисить изницякс.
Таго-зярдо вейкесь арсесь саемс весементь, ансяк те киньгак эзь лисе. Эзь лисе Чингисханонь, Македонскоень, Наполеононь… Кадык лиятне теньсэ а лоткавтовить, ялатеке — таго-зярдо те эзь лисе.
Таго-зярдо ломантне максылизь эрямост мирэнь тюрематнесэ, ды содыльть мезень кис. Таго-зярдо Сашка Матросов мештесэнзэ пекстызе пулемётонть. Таго-зярдо тень стувтызь.
Таго-зярдо минек покштятне ульнесть одт, ансяк аволь минек кондят. Таго-зярдо эйкакшонок кармить аволь минек кондят.
Таго-зярдо весемесь ульнесь лия.
Таго-зярдо эзть сода — карматано эрямо минь, пачкодтяно космосов, тейтяно превей компьютерт…
Таго-зярдо эзть сода: шкась — эрямонь азор.
Таго-зярдо ломантне содасть, кода эрямс.
Таго-зярдо… Ансяк аволь ней.
Минь…
Весе минь ломанть. Минь авардтяно ды пейдтяно, кортатано ды чатьмонтяно.
Минь ломанть. Минь кежейть ды седеймарицят, превейть ды алкукс превейть, сэрейть ды алкинеть, виевть ды лавшот.
Минь ломанть. Минь якатано важодема таркав. Минь менеджерт, прявтт ды президентт? Аволь. Минь ломанть. Минь лездатано кажовонтень? Аздан. Минь вечктяно сырне? Вечктяно. Минь ломанть. Мезекс кевкстематне, зярдо ялатеке кияк а панжсы оймензэ.
Минь ломанть. Эйстэнек зярыя миллиардт. Азё ёвтак весень кис. Эрьванть прясо — арсемань тапаркс. Минь вантано, кода ваксканок ютыть ломанть, минсь истя жо ютатано вакска. Минь вантано, ды а нетяно. Ансяк кода иля чаравто, эряви —вейсэ шешктяно моданть, ковгак а туят. Миненек савкшны эрямс вейсэ.
Минь весе вейкеть ды весе а вейкеть. Минь ломанть. Минь а мертяно: берянь эрямс. Минь мертяно: берянь ломантне а максыть эрямс. Ансяк весе минь берянть. Минь ломанть. Вадрятнень масторлангсо а кирдить. Косот эно сынь? Косояк. Сынь миненек а эрявить.
Весемесь човорявсь, ансяк ялатеке содан, мейсэ тевесь: минь ломанть. Эрятано кода машттано. Секс арасть вадря ломанть, видечи ды уцяска. Лиясь — а эрявияк. Минь ломанть.
Ды тонгак ломань. Кепедик прят. Минь весе ломанть. Куш кавтов лазомак — истя карми свал. Минь ломанть. Монгак ломань. Секс манитинь. Улить вадря ломанть, ули видечи ды уцяска! Ансяк вадрятнеяк манчить, видечись эрьванть эсензэ, уцяскась максови уцяскавонтень. Мекс? Тонсь содат… Минь ломанть…
Содылинь…
Содылинь кеветее иестэ саезь важодиця тракторист, кона ловнось Мопассанонь ды Окуджавань.
Содылинь ветес тонавтниця студент, кона эзь сода, мезе сёрмадсь Пушкин.
Содылинь сетнень, кить эзть пеле мездеяк, куломадонть башка, ды сетнень, кить пельсть эрямскак.
Содылинь ломанть, конат симсть ченькстэ ды пижнесть видечиде. Содылинь ломанть, конат эзть симе ды чатьмонсть эсь кажодонть.
Содылинь дальтоник — машинань ветиця.
Содылинь ломань, конань ульнесь сёрмадомань ёрокчизэ ды кона эзь сёрмадо.
Содылинь азор, кона ськамонзо стявтсь кевень кудо, ды ломань, кона ськамонзо яжизе эрямонзо.
Содылия сень, кие кемсь Пазнэнь ды ознома кудосто самодо мейле кшнань каркссо чавсь нинзэ, ды сень, кие апак кемеяк максызе эрямонзо лиянь эйкакшонть кис.
Содылинь тонавтыця, кона кортась: «Илядо кунсоло монь, арседе тынсь», ды тонавтниця, кона мерсь тензэ: «Маштовлинь арсеме, тынк а кунсоловлинь».
Содылинь превтеме ялгат ды превей ятт.
Содылинь микшницят, конат манчесть тиринь сазорост, ды рамсицят, конат пельцелковоень кис ардтнесть ошонь лия пев.
Содылинь шабра, кона салась, ды содылия се шабранть шабранзо, конань салызь.
Содылинь таркат, косо мон ульнинь инже, ды эзинь сода —косо мон азор.
Содылинь тейтерь, кона цёратнень кочкась машинаст питненть лангс ванозь. Содылинь тейтерь, кона кочкимим машинавтомо.
Эзинь сода: сы шка, истя нурькинестэ сёрмадан сынст эйстэ.
Ансяк содан: таго-зярдо минь содылинек… содылинек таго-мезе истямо, мезе а содатано ней…
НУСМАНЯ СЕЛЬМЕТЬ
Коля эри келейстэ. Саи эрямостонть весементь ды мездеяк а пели, кода сонсь яла вечки кортамо эсь прядонзо. Видеяк, Колянь лангс ванозь, аламодо кеман тензэ ды... эсень икеле аламодо чумокс прям марян. Те мезе лисни, мон теинестэ эрян, аволь истя, кода эряви? Арась, тесэ а манясамак, монгак эрямо маштан. Те Коля, келейстэ эрицясь, лыйни, теке лопине, азды, мезе мартонзо карми ванды, — мон кеместэ пильге лангсо аштян. «Арсят, кеместэ аштят — эрямот вадря? — керязь керясамам Коля. — Эх, цёра! А маштат эрямо! Мень те тансть — кеместэ аштемс?»
Сон истямо. Мезе а мерян — каршо моли, а чарькодицякс, поти эйдекс эйсэнь лемди. Мезеяк, шкась юты, вансынек, кинь марто видечись кадови. Вансынек...
Кенжешка те квартирасонть минь омбоце ие эрятано мартонзо вейсэ. Ковонь кис питненть кавонек пандтано. Кавонек тонавтнетяно университетсэ. Коля нилеце курссо, мон — колмоцесэ. Кавонек сынек велестэ. Кавонек эрзянь латякарть, кода корты Коля. Эрятано сэтьместэ. Пек а сёвнотано, ды седейшкаваяк а кортнетяно — вейке-вейкень некшнетяно чуросто. Паро те, берянь — аздан. Колянень, нама, ялатеке — сонзэ ялганзо сатышка. Моньгак, содави, ялган улить, ансяк та-кодамо шкасто саезь вана истямо чеерь кармась удемем пореме: «Мень тон, Колька, ломанесь? Омбоце ие мартот эрян, ды аздан, кодамат тон». Мезе содан педе-пес: сонензэ ялатеке, кодаман мон. Маштовольгак — весе Моданть лангс сельгевель.
Эрямонок ладявсь истя. Чокшне ёнов, зярдо мон сан тонавтнемстэ, спортзалсто, ялгань кедьстэ, ды куш омбомасторсто сан, — Коля ялатеке карми удомо. Вийть ташты цёрабаесь, учи чопода венть. Ансяк озан ловномо, рефератонь-докладонь анокстамо — сон сти. Теке мерят эйкакшпингестэ саезь пувтамонь коезэ истямо. Сти, шумбракстни ды лиси таргамо. Мон а тарган, ды теньсэ, нама, сеедьстэ савтнян Колянь кежензэ.
— Шумбрачинть ванстат? — згилязь кортазеви Коля. — Ну-ну, ванстт. Ялатеке весе кулотано.
— Ансяк мон тонь мельга, — монгак пупаса.
— Ага. Кода эно. Учок уцяска. Мон тондеть колмоксть седе ламо эрян.
«Вансынек», — таго арсян мон. Мезде арси Коля, аздан.
Седе тов вейсэ ярсатано паникудосо. Чопоти. Мон нолдан телевизор — ды ушодови. Коля телефонга карми ветямо дипломатиянзо:
— Шумбрат. Мезть чокшне тейнеме кармат? М-м-м, чарькодеви. Неемазонок.
— Ды эрян аламонь-аламонь. Тонсь кода? Бути тейтерть кармить — сан. Мекс ёжован? Сестэ ськамот симть.
— Кие? Зярдо? Ярмакот улить? Ага, учан, гайневтть…
Ды истя часошка. Коля ладси, кода седе парсте ютавтомс шканть: ков сыргамс, кие марто симемс, кодамо тейтерь манямс. Зярдо-зярдо тень маряви, Коля озныяк венть лангс — истя вечксы чопода-тештев эрямонть. — Адя мартон, — свал терди эйсэнь Коля. — Ёртыть книгинеть ве ёнов. Пиядо корштатано, тейтерь теть муян.
— Монь ули тейтерем, — кортан мон.
— Ды вейкесь — те мезе! Цёрантень эрьва чи эряви од. Чарькодят? Адя!
— А молян.
— Эх, неныла, ёмат... — аволды кедьсэнзэ Коля.
— Тонсь иля ёма, — мизолдозь кортан тензэ.
Монь видеяк ули Катям. Ды, видькстамс, сондензэ башка лия тейтерть мон парсте эзинь содаяк. Минь мартонзо колмо иеть вейсэ. Аздан, улить-арасть вечкемат-мезть масторлангсонть, теде кадык философтне пелькстыть, — минь колмоце ие вейсэ, ды минек весе вадря.
Колянь телефонсо комсешка номерт, конатнева сон апак кавтолдо гайневти, бути а ков ули теемс цёрань виензэ. Сонзэ тейтертне сынсь правттадызь удома таркас ды пельчишка ковгак а нолдатадызь. Ве чистэнть Коля уды кемготово иесэ тейтерька марто, лия чистэнть сырги инжекс университетэнь колоньгемень иесэ тонавтыцянень. Вана истя сон вечки ават. Зярдо чокшне тень сакшны Катя, сон таго згили лангсон: «Вана те, мон чарькодян, вечкема! Горько! Горько!».
«Ужо, — арсян, — понгат кожвенэв, монгак лангсот пейдян».
Коля орши. Орши ды сими пиядо, конатась свал муеви минек холодильниксэнть (Коля эрьва чи рамси мик кавто-колмо суликат). Сон машты ламо симеме ды кувать а иредеме. Мон вана пек чуросто валакавтан кирьгам якстере винынесэ. Ды те, чарькодеви, тунь а вечкеви Колянень.
— Зярдо теть пачкоди, — таго ушоды андомон гедонизмасо — од шкась максозь аволь кудосо аштемань кисэ. Неть иетнень эйстэ эряви потямс весе вийтнень — одов шкась а велявты. Сельгемеяк а кенерят, варштат перькат — вакссот ни, эйкакшт, валскестэ чокшнес важодема, кудонь тевть ды телевизор. Сестэ а копордат чапамодонть ды авинеяк пек а манят. Весе! Тееват эсь эрямонь урекс!
— Тон, ванса-тейса, эсь эрямонь алкуксонь азор! — кежейгадан монгак. — Симат тетять-авать ярмакост лангс, мезеяк а теят ды мезеяк тееме а бажаткак. Эсь прят а ванстат, арсят ансяк, кода...
— Мезеяк тон а чарькодят, — Коля сезьсынзе валон. —Весе те карми мейле. Ды мезе монень тейнемс? Университетсэ понкст вариявтнемс? Панемс а паньсамизь, дипломом карми. Важодемс? Кенерян, эрямось кувака. Паро тейтерь муемс? Истят арасть. Вана истямо концепциям, цёра.
— Ды мезе ней, эрьва чокшне симемс?
— Мезеяк тон а чарькодят, — таго лексти Коля. — Тон а содат, мезе истямось симемс пелевес, кундсемс истят арсемат-ёжот, конат мейле зярдояк а сыть. Кодамо цёракс марят эсь прят, зярдо удат тейтеренть марто васенцеде вастовомсто. Кода чави седеесь, зярдо сыргат карадо-каршо тюреме...
— Ага, — мерян, — романтика. Симемась, тейтертне ды тюрематне — те мезе, эрямонь смустесь?
— Мекс аволь? Мейсэ эно сестэ смустесь? Пештяк од шкат мейсэ понги, мейле улезэ мезе ледстнемс, — таго тонавты Коля. — Сырелгадат — ансяк ледстнемс кадовияк.
Мейле, раужо чоподанть самонзо учозь, Коля туи ушов. Валске, зярдо мон стян тонавтнеме, сы. Пельсэрий рунгозо тупор-тапор мусы удома тарканть. Чокшне мон таго сан кудов, ды весемесь ушодови одс.
Эрси, те коесь колави: Коля сы ды, вень перть апак удо, сырги мартон университетэв. Аволь сеедьстэ, ды ялатеке эрси. Зярдо-зярдо Коля яки та-ков важодеме. «Шабашка — сядо целковойть, ды бражка!» — мизолды сон тень кувалт. Колянь прязо пештязь пеедькшнемкасо ды згилямкасо. Истятнэнь ломантне, ды васняяк тейтертне, вечксызь — сынст марто шкась ливтязь ливти, а марявияк. Цёратне-ялгатне ловить Колянь паро алюхакс: сон зярдояк а пели тюремадо, машты мокшнасо аволямо. Секс эрсесь, валске ланга сон сакшнось сэньшкадозь сельме, поркснезь мокшна мартояк.
Весе те — мон, Коля, минек авейкетьксчись, — паряк, мезеяк, ансяк, кода кортыть, кинь кунсолат, сень валсо мейле кортаткак. Ды кармась марявомо тень, теке эрямом видеяк юты та-кода чирьстэ... Варштынь Колянь лангс, ды сельменьгак сявадозевсть: машты! Мон мезе, варчинь ансяк вейке тейтерь, симемс-копордамс — а ялган, вестькак парсте эзинь тюрекшнеяк. Алкукскак, мейле ледстямскак а мезе ули. Арсезевинь аламодо, нурькинестэ меремс. «Вестешка Колянь марто лисема, варштама эрямонь лия тюстнэнь лангс», — ладякшныя эсь пачкан. Мейле та-кода стувтовсь те тевесь, нар-
давсь эрьва чинь котьмамосонть, ды весе кармась кода свал. Тень, видькстамс, мон учиньгак — арсемс, кода парсте эри Коля ды теке марто вейсэ сёпомс эсь прянть, тынсь чарькодтядо, тевесь стака. Та-кода валске марто самодонзо мейле Коля апак учо нусманясто пшкадсь тень:
— Тонь эрсесь истя: ванат ломантнень лангс, ды сельметькак сявадыть, кода лиятне эрить? Маряви, теке тон мезе-бути а видестэ теят. А? Эрсесь?
— Аздан, — тандадозь ушодынь манчеме. — Та-кода эзинь арсе теде. Эрян кода маштан. А тон мезе, миллиардертнэнь лангс ванат?
— Ды аволь, — седеяк нусманясто поладсь Коля. — Вана тонь саемс. Эрят, эрьва эскельксэть онкстнят. Тонавтнят вадрясто, стипендият ули. Тейтерь марто вастневат. Течи-ванды урьвакстат. Тетят-ават а мелявтыть кисэть, содыть: берянь тев а теят... Шумбрачить ванстат, а эцят ков а эряви.
— Ну, тон уш... — таго-мезе мериксэлинь мон.
— Мезекс те весе эряви? — яказевсь кудованть Коля. — Те парс а ветясамам, мон содан. Течи, ванды, вандыде мейле — ялатеке мезеяк лиси. Озавтсамизь, маштсамизь... Истя сеедьстэ эрси, бути монь ладсо эрят, — Коля озась креслас ды комавтызе прянзо. — Содат, авань истямо седеезэ, истя мелявты кисэнь! Пели, а лисевлинь ушов беряньстэ оршазь. Гайневти тень, кевкстни, кода тевень. А монь чамаван исяк пеель ютась. Вадря, аволь пшти ёнксось ульнесь. Мезе мон аванень мерян, мейсэ кецявтса? Весе вадря, кортан, весе вадря. Кинь манчан? Кодат уш тесэ вадрят.
— Сестэ кадыть вень лытамотнень, — тонавтынь мон.
— Ды мон кулан тентеме! Монь а лиси лиякс эрямс, вана мезе. Эрявлинь лиякс, ули мелем, сельмень сявадыть, нильтякадынь эсь прядон, ансяк арась — лиякс а лиси...
Мезеяк эзь полавтово эрямосонок — сон чудсь кода свал. Монь — чить, Колянь — веть. Ансяк кармась тень, аздан мекс, аламодо мельспаро валскень те кортамодонть мейле.
Коля прядызе университетэнть. Кона ёнов мейле чиезь напустясь (састынестэ эскелямс сонзэ зярдояк эзь лисне) —армияв, важодеме, урьвакстсь, — аздан. Катя марто минь курок ды апак учо явинек. Помидортнэ пужсть, улема. Катя мерсь, седе тов минек мезеяк а лиси. Мезе ульнесь неть валтнэнь экшсэ — лядоськак аволь чарькоде. Монськак талакадынь, ансяк кувать эзинь майсе те тевенть кувалт. Лиссь кода лиссь, мезть ней.
Шкась мольсь, мон беряньстэ-парсте прядыя университетэнть, сынь армиясто ды карминь важодеме, ярмашкетнень мельга чийнеме. Чокшне (од ломанян, мезть эно тейнемс) чийнинь тейтертнень мельга. Лиснесь, эринь читькак, ветькак. Оно кода ладявсь! Келейстэ, теинестэ — а чарькодевияк.
Ветешка иень ютазь вастыя Колянь. Сонзэ марто ульнесть мазыйка низэ ды вишка цёрынест. Аштинек кафесэ, кортнинек. Коля мизолдсь. Васня марявсь, эзь полавтовояк, кадовсь текекс. Ансяк аволь: лоткась таргамодо ды симсь, келя, таргозонзо ансяк весть ды ансяк пиинеде. Важодсь та-косо а берянь таркасо.
— Ды кодаткак лия ават тень а эрявить — ним ули. Кемат-арась — вечкса ды киненьгак а максса. Вана истят, ялгай, тевтне! — ракась Коля, зярдо минь кадовинек кавонек. — Ней мон — тунь лия ломань!
Ракась, ансяк сельмензэ ульнесть та-кодат нусманят. А монь? Моньгак ульнесть, кадык аламодо, ды ялатеке аволь истят, кода икеле. Ды бути меремс апак манче, монсетнеяк ульнесть нусманят...
ВЕЛЕНЬ ВАНСТЫЙ
Течи Петра атя стясь мик валскень чипаенть лембензэ апак учне. Ульнесь мелезэ молемс Пулыне леев калонь кундсеме. Исяк сон пель чокшне арсесь, экше-аволь пертьпельксэсь калонь кундсеманть туртов, ды зярдо ледстявсть тензэ иетне, зярдо аволь те шканеяк сон валгонесь леентень кал-
тнэнь манчеме, анокстась кавто ульмат, кардаз удалдо чувнось сукскеть ды паро мельсэ прась удомо. Истямо жо паро мельсэ Петра атя вастызе валскентькак. Стясь калгодо таркастонзо, оршнесь, пурнынзе-сэрнинзе ульманзо ды лиссь ушов.
Кадык маесь лововияк тундонь ковокс, прянзо эсь меельце таргостонзо вети теке кизэнь вадря-паро пелькс. Ушось моразь моры нармунень вайгельсэ, коштось, конатась копачавсь ашо тусто сувсо, теи неть моротнень седеяк мазыекс — истят гайтть марявить ансяк валске ланга, секс мекс сувось максы тенст та-кодамо од, мезеньгак лиятань ёнов а молиця тюс. Петра атя пештизе мештензэ валскень тантей кошттонть — мик прязояк ванськадсь, карсинзе ташто кемензэ ды сыргась леентень, конатась чудсь велиненть пева латко потмакска.
Мольсь Петра атя курованть, конась ульнеськак велесэст вейке, вансь сув потсто эль неявиця раужо кудотнень лангс, конатнеде кадовстькак кеменьшка ды косо умок кияк а эри, ды таго прязонзо эцесть ледстнематне. Таго-зярдо велесэст ульнесть мик сядодо ламо эрицят, ды Петра атя ськамонзо калонь кундсеме зярдояк эзь яка — свал ульнесть кавто-колмо ялгат, конатне лексесть мартонзо валскень сувдонть. Таго-зярдо кудонь панжадо вальматнестэ марявсь эйкакшонь пейдема, паксятнестэ — тракторонь увнома. Ней вальматне чавозь лазсо, паксятнесэ касы ансяк дегель тикше. Советэнь шкатнестэ Лигакс лемдезь велинентень Петра атя ней кадовсь ськамонзо.
Зярдо масторонок совась Нациянь Лигантень, Пулыне лейненть вакссо ульнесь стявтозь васенце кудось, мейле а васоло аштиця велетнестэ аламонь-аламонь кармасть сакшномо лия эрицяткак. Велинесь курок кепететсь ды ульнесь лемдезь историянь покш теевксэнть ледстнемга... Вана истя Лига велинесь ульнесь тешкстазь картантень. Ансяк а шожда иетне ютасть мельга-мельцек, ды вишка велесь эзь цидярдо сынст каршо. Кие тусь эрямо лия таркав, кие кулось. Кадовсь ансяк Петра атя, конань тетязо чапизеяк Лигань васенце кудонть.
Ней Петра атя — веленть меельце кирдицязо-ванстыцязо. Эйкакштне ускозь ускить эйсэнзэ эстест ошов, сон жо а арсияк ковгак туеме. Ломанесь аволь кев, лия таркав а ёртови, ды бути ёртовияк, ялатеке велявты эсь тиринь ёнксонтень.
Курок кармась неявомо Пулыне лееськак. Ледстнематне прок оргодсть, зярдо Петра атя валгсь леенть вакссо касыця куракштнень ваксс.
Леесь кадык вишкине ды а кувака, ансяк улить эйсэнзэ домка таркаткак, ды пурдтни тей-тов истя сеедьстэ, чудильмастонзо а муят сядо виде эскельксткак. Пек мазыекс сон неяви, бути ваномс лангозонзо Килё пандостонть, кона кепединзе эсь чуваров моданзо веленть лия песэ.
Петра атя ёртынзе ульматнень ды кармась учомо. Ансяк калтнэ (лейсэнть седе сеедьстэ понгонесть нучкот ды ёзть) эзть капша ярсамс тантей сукстнэде. Паряк, видеяк, зярс якшамо, ды ярсамодо икеле калтнэнень эряви эжнемс.
Ютась зярыя шка, ды зярдо чипаесь кепедизе якстере-ожо пекензэ моданть экшстэ, Петра атя чарькодсь: тесэ тейнемс а мезть, эряви молемс кудов. Пурнынзе ульматнень, стакасто кузизе латконть ды таго сыргась чаво, кирмалавсо касозь куринкаванть. Зярдо пачкодсь эсь алкине чиремезь кудынентень, атянть вастызь Дозор ды Байкал кисканзо. Чаразевсть-велязевсть азорост перька, аволясть пулосост, валтомо, сельмесэ таго-мезе вешсть. Петра атя мизолдозевсь ды топавтызе энялдомаст — андынзе пидезь модамарде. Мейле ёртсь саразтнэнень сюро ды ливтизе кардазсто пиже лугадо порнеме Маруська сеянзо. А покшт ульнесть кудоютконь тевтне, ды ялатеке ойменть витсть ды сэтьмелгавтсть.
Чикуншка малав, зярдо Петра атя снартнесь симдемс Маруськань веднеде ды синдтремс тензэ калень тарадкеть, велев ветиця килангонть ёндо, конаванть чуродо-весть шабра веле-
стэ сакшность тикшень ледеме, марявсь машинань моторонь увнома. Курок атясь неизе раужо машинантькак, кона, а сэрей луганть эсензэ алов судрязь, пачкодсь сонзэ видьс.
Кенкштне панжовсть, ды машинастонть лиссть… Петра атянь кавонест цёранзо — Миша ды Коля.
— Шумбрат, тетяй! — кенярдозь рангстась Миша.
— Я! — аламодо талакадсь Петра атя. — Те, некак, цёран састь?
— Эно кить, минденек башка, сыть тей? — мерсь Коля ды лепштизе тетянзо кеденть.
— Машинанк кодамо! — шназь мерсь Петра атя. — Ёномарка, некак. Те кинь?
— Монь, тетяй, — апак покшкавтне путсь каршо вал Миша. — А умок рамия.
— Ды тон, Мишка, теке бояр, — раказевсь Петра атя. — Эрьва ие машинат полавтнят.
— Васня аравтокшнынек монсесэнть самс, — кавто ёнов келемтинзе кедензэ Коля, — мейле чарькодинек — истямо кива а пачкодтяно. Монь эдь видеяк иномарка.
— А те аволь? — Петра атя невтсь сурсо машинанть ёнов.
— Аволь, тетяй, эсенек, — мерсь тензэ Миша.
Аламо шкань ютазь совасть кудос. Эйкакштне, кода свалгак, Петра атянь ташто холодильникензэ тыц пештизь эрьва кодамо ярсамопельде, шлизь кудонзо ды лиссть ушов лисьманть витнеме, конатась, тетяст валонзо коряс, эль лексесь. Сонсь Петра атя яла арсесь, зярдо Миша ды Коля ушодсызь ташто морост — кармить тердемензэ ошов.
Цёратне витнизь-петнизь лисьманть, мейле кундасть кардаз удало чиремезь пирявксонтень. Те тевентькак топавтызь, ды зярдо кармась уш чопотеме, ванськавтызь-ледизь умарьпиренть. Вансь Петра атя эйкакшонзо лангс ды кецнесь: а пелить кодамояк тевде, кода сонськак од шкастонзо.
Кудосонть кирвазтезель тол, ды тетят-цёрат анокстасть ярсамо. Петра атя рестась сывель марто модамарть, эйкакштне керсизь лавкань ярсамопельтнень, кандызь машинасто стувтозь суликанть. Петра атя мусь колмо цяркинеть, ды окойники весе озасть морга экшс. Коля нуртнизе чапамонть. Симизь. Ушодсть ярсамо.
— Кода те шкас толонь кандыця уськетнень эзизь салсе? — колмоце цяркиненть чамдомадо мейле мерсь Коля.
— Ды кие соды. Пазось, паряк, ванстынзе, — кармась кортамо Петра атя, эсензэ пряванть кивчкадсь: «Некак, ушодовсь».
— Кортыть, тетяй, калс течи якить? — эзь капша «ушодомо» Миша.
— Якшамо, — нурькинестэ мерсь Петра атя. — Мезеяк эзинь кунда.
— Тельня седеяк якшамо карми, — варштась тетянзо лангс Коля. — Паряк, молят эрямо миненек, мезть тесэ ськамот кокнат.
— Кода мезть? — мизолдозевсь Петра атя. — Эрян.
— Эрят? — аламодо кепедизе вайгелензэ Коля. — Иеть зяро, тетяй? Малав кавксоньгемень. Тон жо тесэ ськамот — а лездыця, а кортыця. Лавканть видьс — кемень вайгельпеть. Тельня пры лов — мезть кармат тейнеме?
— Кода свал, — апак талакадо мерсь Петра атя, — сокс-
тнэнь тонгсынь ды паксява кинть керяса.
— Керясак… — згилязь кортазевсь Коля. — Бути толось ёми? Мезть седе тов? Тунь пе сы.
— Мон тонеть, Колька, истя мерян… — Петра атя стясь таркастонзо ды мокшнасо кармась вачкоеме мештес. — Тесэ мон чачинь, тесэ кулангак. Кадык модаськак кавтов лазови — ковгак тестэ а туян, калмазырьсэ покштянь-тетянь вакссо улян.
«Ушодовсь..» — арсезевсь Коля эсь пачканзо.
Петра атя озась мекев эзементень.
— Видеяк, тетяй, — снартнесь лездамс лелянстэнь Миша, — сыречинть берянь ськамочисэ ютавтомс. Адя миненек эрямо. Тосо нуцькат, лембе нупаль, тантей прякат. Мезекс тонеть тесэ майсемс?
— Маныть Филиповкасто тонавтыця тень сакшнось, — прок цёранзо валтнэнь апак маря, прянь комавтозь ушодсь Петра атя. — Сон, теня, яла кевкстнесь Лигадо: кие тесэ эрясь, сюпавт-аволь кудазортнэ ульнесть, кода латкотне дыпандотне лемдевить. Весементь сонензэ ёвтния. Зярдо жо ильтемензэ лисинь, мерсь тень: тон, келя, Петра атя, ансяк кирдяткак Лиганть картасонть, бути туят, веленть нардасызь лангстонзо. Чарькодиде? — кепединзе сельмензэ Петра атя. — Зярс мон тесан, велеськак эри, ды кияк сонзэ картасто а ёртсы, секс мекс ули сон — Лига велесь.
— Те весе, тетяй, чарькодеви, — мерсь Коля. — Монгак тесэ чачинь, моньгак седеем ризны тиринь веленть кисэ, ансяк эрямонь койтнень каршо а молеват. Сёксня-тельня эряк минек кедьсэ, кизна эно теске озяк. Эрямо таркат закононь коряс карми Лигась, ды кияк веленть картасто а нардасы.
— Те лиянь ды эсь прянь манчема, — аволдась кедьсэнзэ Петра. — Мон валом ёвтыя — ковгак тестэ а сырган.
— Тонсь а сыргат — вийсэ сайтядызь, — кеждясь Коля. — А кадтадызь чаво кудос куломо!
— Виенк а сатыть! — сорнозевсь Петра атя.
Кудопотмось а куватьс копачавсь каштмолемасо.
— Марят, Колька, адя таргатано, — Миша путызе кедензэ Колянь лавтовонзо лангс.
Тона чатьмонезь стясь.
Петра атя морга экшс кадовсь ськамонзо. Кундызе прянзо коське кедьсэнзэ ды арсезевсь.
— Мезть карматано тейнеме? — кевкстизе лелянзо Коля. — А саеви сон тестэ ковгак.
— А саеви… — лекстясь Миша ды валгсь кузтемаванть. — Течи чатьмонть, валске одов ушодтано, паряк, мезеяк лиси.
— Паряк, лиси… — Коляяк валгсь Миша ваксс. — Бути а лиси — кода мериньгак, вийсэ сайса, а максса рунгонзо чеертненень порнемс. Тонсь арсек, бути карми тетянень берянь, кие тензэ лезды? Монсь мейле прям карман корямо, мекс эзинь лезда.
— Ды кода лездат? — поладынзе валонзо Миша. — Сон — Лигасо, минь — Саранскойсэ. Тесэ а телефонт, а мезть… Паряк, мобильник тензэ макстано ды тонавтсынек гайневтеме?
— Тестэ а гайневтеват, а кунды, — мерсь Коля. — Тесэ мезеяк арась.
— Тесэ менелесь мазый! — апак учо кепедизе прянзо Миша. — Ды коштось ванькс.
Цёратне чатьмонезевсть. Сынь кунсолость, лексесть, вансть. Пек вадря истя аштемс чокшне, зярдо сэтьмечинтень эцить ансяк тештетнень валдось ды эсеть арсематне.
Зярдо лелят-ялакст совасть кудос, тетяст уш удось. Коля ды Миша мадсть каштлангс — ледстявсть эйкакшпингень шкатне.
Валске васенцекс стясь Петра атя. Чулгсесь пачалгонтень алт ды пувтынзе цёранзо. Сынь шлясть-нардасть ды тетяст марто чатьмонезь озасть ярсамо.
— Мон вана тесэ арсинь… — ушодсь кортамо Петра атя, ды цёранзо сеске варштасть сонзэ лангс. — Видеяк, теле лангс эряви тонеть, Мишка, молемс эрямо. Мейле, тундонь шкасто, — мекев.
— Умок истя эряволь, тетяй! — кенярдозевсь Миша. — А печтяви теть тесэ телесь.
— Бути ули мелеть, монь кедьсэяк эряк, — мерсь Коля. — Настя ним пек тантейстэ пиди-пани.
— Прякасо а маняван, — мизолдозевсь Петра. — Инжекс эно карман сакшномо.
Аламо шкань ютазь Коля ды Миша кармасть пурнамо — течи тенст лисема важодеме. Кузтемпрясо таргасть вейке-вейкень цигарка ды мольсть машинантень. Петра атя лиссь ильтемест.
— Марятадо, цёрат, мезть кортан? — мерсь сон. — Кизэ лангс тынсь теске лиядовлиде.
— Ды мезть тесэ карматано тейнеме? — кевкстсь Коля. — Маруськань потявтомо?
— Мекс сеске потявтомо? Мекшкеть кирдеме кармавлинек. Те неень шкасто пек ярмаков тев, кода содан.
— Арась, тетяй, минь ней ошонь эрицят, — окойники прядызе машинань икельце вальманть нардтнеманзо Миша. — Тосо минсь теке мекшть важодтяно ды лия таркав ковгак а ливтятано — цецятне пек т