Слава, и ныне: Аллилуиа (Трижды).
Священник или диакон: Бог Господь и явися нам, благословен Грядый во имя Господне.
Стих 1: Исповедайтеся Господеви, яко благ, яко в век милость Его.
Стих 2: Обышедше обыдоша мя и именем Господним противляхся им.
Стих 3: Не умру, но жив буду и повем дела Господня.
Стих 4: Камень, егоже небрегоша зиждущии, сей бысть во главу угла, от Господа бысть сей и есть дивен во очесех наших.
Тропарь, глас 3:
Церкве Русския столпе непоколебимый благочестия правило, жития евангельскаго образе, священномучениче Николае, сего ради пострадавый даже до крове, моли усердно Христа Бога, яко Начальника и Совершителя спасения, Русь Святую утвердити в Православии до скончания века. (Дважды)
Слава, и ныне:
Богородичен: Тя, ходатайствовавшую спасение рода нашего, воспеваем, Богородице Дево: плотию бо, от Тебе восприятою, Сын Твой и Бог наш, Крестом восприим страсть, избави нас от тли яко Человеколюбец.
Чтец настоящий псалом: Помилуй мя, Боже, по велицей милости Твоей, и по множеству щедрот Твоих очисти беззаконие мое. Наипаче омый мя от беззакония моего, и от греха моего очисти мя; яко беззаконие мое аз знаю, и грех мой предо мною есть выну. Тебе Единому согреших и лукавое пред Тобою сотворих, яко да оправдишися во словесех Твоих, и победиши внегда судити Ти. Се бо, в беззакониих зачат есмь, и во гресех роди мя мати моя. Се бо, истину возлюбил еси; безвестная и тайная премудрости Твоея явил ми еси. Окропиши мя иссопом, и очищуся; омыеши мя, и паче снега убелюся. Слуху моему даси радость и веселие; возрадуются кости смиренныя. Отврати лице Твое от грех моих и вся беззакония моя очисти. Сердце чисто созижди во мне, Боже, и дух прав обнови во утробе моей. Не отвержи мене от лица Твоего и Духа Твоего Святаго не отыми от мене. Воздаждь ми радость спасения Твоего и Духом Владычним утверди мя. Научу беззаконныя путем Твоим, и нечестивии к Тебе обратятся. Избави мя от кровей, Боже, Боже спасения моего; возрадуется язык мой правде Твоей. Господи, устне мои отверзеши, и уста моя возвестят хвалу Твою. Яко аще бы восхотел еси жертвы, дал бых убо: всесожжения не благоволиши. Жертва Богу дух сокрушен; сердце сокрушенно и смиренно Бог не уничижит. Ублажи, Господи, благоволением Твоим Сиона, и да созиждутся стены Иерусалимския. Тогда благоволиши жертву правды, возношение и всесожегаемая; тогда возложат на oлтарь Твой тельцы.
По окончании псалма абие начинаем пети канон священномученику, глас 4. Поем же его без ирмосов на 4.
Песнь 1
Ирмос: Моря чермную пучину невлажными стопами древний пешешествовав Израиль, крестообразными Моисеовыма рукама Амаликову силу в пустыни победил есть.
Запев: Священномучениче Николае, моли Бога о нас.
Воли Божией послушлив быв, священства дар приял еси, священномучениче Николае, и, за Христа даже до смерти пострадав, верный сын Церкве явился еси.
Изгнание и разлучение с паствою твоею мужественне претерпел еси, священномучениче Николае, но ничтоже возможе разлучити тя от любве Божия.
Слава: Безбоязненно проповедовал еси людем покаяние, священномучениче Николае, да обратят сердца своя к Богу и токмо на Него в скорбех и лишениих упование имут.
И ныне: Богородичен: Мати Божия, Дом Твой, Святая Русь, молит Тя: избави люди Твоя от всякия нужды и вечнаго осуждения.
Песнь 3
Ирмос: Веселится о Тебе Церковь Твоя, Христе, зовущи: Ты моя крепость, Господи, и прибежище, и утверждение.
Егда прииде испытание веры твоея, священномучениче Николае, страдание за Христа, яко благодатный дар, приял еси и кровию твоею Русскую землю обагрил еси.
Егда прииде гонение от безбожных, столп непоколебим Русския Церкве явился еси, священномучениче Николае, святых, яко ближних сродник, в помощь призывая. С ними же купно ныне прославляешися.
Слава: Аще и умерщвлен был еси телом, священномучениче Николае обаче духом козни диавольския посрамил еси, имея Христа прибежище и утверждение.
И ныне: Богородичен: Тя Предстательницу, Пречистая Дево, молим: преложи нашу печаль на радость и скорби належащия избави, Заступнице наша.
Моли Бога о нас, священномучениче Николае, яко мы усердно к тебе прибегаем, скорому помощнику и молитвеннику о душах наших.
Таже священник, или диакон:
Помилуй нас Боже, по велицей милости Твоей, молим Ти ся, услыши и помилуй.
Лик: Господи помилуй (трижды).
Еще молимся о великом господине и отце нашем святейшем патриархе Кирилле, и о господине нашем высокопреосвященнейшем митрополите Германе.
Еще молимся о всечестном игумене нашем Гаврииле с братией святыя обители сея, зде начальствующих, учаших и учашихся.
Еще молимся о Богохранимей стране нашей, властех и воинстве ея.
Еще молимся о милости, жизни, мире, здравии, спасении, посещении, прощении и благопоспешении рабов Божиих, (имена).
Еще молимся за всю братию, и за вся православныя христианы.
Яко милостив:
Седален, глас 3:
Заветы исповедников и священномучеников Христовых восприем, душу твою за веру Православную положил еси, святе, еюже утверждается земля Русская. Сего ради молися, священномучениче Николае, любовию чтущим тя верными Христу до конца быти.
Песнь 4
Ирмос: Вознесена Тя видевши Церковь на Кресте, Солнце Праведное, ста в чине своем, достойно взывающи: слава силе Твоей, Господи.
Да не дерзают языцы рещи: где есть Бог ваш? Кровь бо новомучеников от земли нашея вопиет: Господи, Господь наш, яко чудно имя Твое по всей Русской земли.
Имже образом желает елень на источники водныя, сице ты, страстотерпче Николае, к живоносным страданием за Христа притекл еси, имиже присно священно обновляется лице земли Русския.
Слава: Вся земная ни во что вменив Христа ради, словом и житием, священномучениче Николае, верных поучал еси: о Бозе сотворим силу, и Той уничижит стужающия нам.
И ныне: Богородичен: Стена необоримая и Покров всемощный Российстим новомучеником явилася еси, Пресвятая Дево, темже Тя величаем.
Песнь 5
Ирмос: Ты, Господи, мой Свет, в мир пришел еси, Свет Святый, обращаяй из мрачна неведения верою воспевающия Тя.
Яко луч Солнца Правды явился еси, священномучениче Николае, и страданьми твоими мглу безбожия над отечеством нашим разсеял еси.
Егда безбожнии тщашася сокрыти тя в темнице, священномучениче Николае, Господь яви тя исповедника Своего всем концем земли Русския.
Слава: Русския Церкве святильниче священный, Николае, кровьми мученическими неугасимо светяй и у Престола Божия предстояй, молися о чтущих тя.
И ныне: Богородичен: Иже от Девы неизреченно рождейся, Господи, сохрани молитвами Ея Церковь Твою, Тебе славящую православными гласы.
Песнь 6
Ирмос: Пожру Ти со гласом хваления, Господи, Церковь вопиет Ти, от бесовския крове очищшися ради милости от ребр Твоих истекшею Кровию.
Восприим меч духовный, иже есть глагол Божий, безбожных козни сокрушил еси, священномучениче Николае, и вся разжженныя стрелы лукаваго угасил еси щитом веры Православныя.
Во священницех благочестно пожив и мучения путь терпеливо восприим, сугубую мзду на Небесех обрел еси, священномучениче Николае, идеже евангельски присно радуешися и веселишися.
Слава: Ничтоже возможе разлучити тя, богоприятне, от любве Христовы: ни скорбь, ни гонение, ни смерть, вся бо сия силою Возлюбльшаго тя Господа препобедил еси, священномучениче.
И ныне: Богородичен: Поем Тя, Предстательнице теплая и Заступнице христиан, Богородице Всепетая, яко со всеми святыми земли Русския молиши Сына Твоего и Бога нашего обрести нам велию милость.
Моли Бога о нас, священномучениче Николае, яко мы усердно к тебе прибегаем, скорому помощнику и молитвеннику о душах наших.
Ектения малая.
Священник: Ты бо еси Царь мира и Спас:
Кондак, глас 2:
Восхвалим, вернии, изряднаго во священницех и славнаго в мученицех Николая, Православия поборника и благочестия ревнителя, земли Русския красное прозябение, иже страданием Небесе достиже и тамо тепле молит Христа Бога спастися душам нашим.
Прокимен, глас 4:
Проидохом сквозе огнь и воду, и извел еси ны в покой.
Стих: Разжегл ны еси, яко же разжизается сребро.
Господу помолимся. Господи помилуй.
Яко свят еси;
Всякое дыхание да хвалит Господа. Стих: Хвалите Бога во святых Его, хвалите Его в утвержении силы Его.
Евангелие от Матфея, зачало 36.
Рече Господь Своим учеником: се, Аз посылаю вас яко овцы посреде волков, будите убо мудри яко змия, и цели яко голубие. Внемлите же от человек, предадят бо вы на сонмы, и на соборищах их биют вас. И пред владыки же и цари ведени будете Мене ради, во свидетельство им и языком. Егда же предают вы, не пецытеся, како или что возглаголете. Не вы бо будете глаголющии, но Дух Отца вашего глаголяй в вас. Предаст же брат брата на смерть и отец чадо, и востанут чада на родители и убиют их. И будете ненавидими всеми имени Моего ради, претерпевый же до конца, той спасен будет.
Слава: Молитвами священномученика Николая, Милостиве очисти множество согрешений наших. И ныне: Молитвами Богородицы, Милостиве очисти множество согрешений наших. Таже стих: Помилуй мя, Боже, по велицей милости Твоей, и по множеству щедрот Твоих очисти беззаконие мое.
Стихира, глас 6:
Егда попусти Господь по грехом нашим братоубийство, гонения и веры Христовы поругание, ты, священномучениче Николае, Церкве Российския столп непоколебимый явился еси и, кровь свою за Христа пролияв, паству во единстве соблюл еси. Ныне же, на Небеси предстоя с лики новомучеников, моли спастися душам нашим.
Таже глаголет священник: Спаси, Боже, люди Твоя и благослови достояние Твое, посети мир Твой милостию и щедротами, возвыси рог христиан православных и низпосли на ны милости Твоя богатыя, молитвами всепречистыя Владычицы нашея Богородицы и Приснодевы Марии, силою Честнаго и Животворящаго Креста, предстательствы честных Небесных Сил безплотных, честнаго, славнаго пророка, Предтечи и Крестителя Иоанна, святых славных и всехвальных Апостол, иже во святых отец наших и вселенских великих учителей и святителей, Василия Великаго, Григория Богослова и Иоанна Златоустаго, иже во святых отца нашего Николая, архиепископа Мирликийскаго, чудотворца, святых равноапостольных Мефодия и Кирилла, учителей словенских, святых равноапостольных великаго князя Владимира и великия княгини Ольги, иже во святых отец наших всея России чудотворцев, Михаила, Петра, Алексия, Ионы, Макария, Филиппа, Иова, Ермогена и Тихона, святых, славных и добропобедных мучеников, преподобных и богоносных отец наших, святых и праведных богоотец Иоакима и Анны, святаго священномученика Гермогена, епископа Тобольскаго, святаго священномученика Николая, иже в Верхнем Гнутове, преподобнаго и Богоноснаго отца нашего Сергия, игумена Радонежскаго чудотворца, святаго благовернаго великаго князя Александра Невскаго и всех святых. Молим Тя, многомилостиве Господи, услыши нас, грешных, молящихся Тебе, и помилуй нас.
Лик: Господи помилуй (12 раз).
Священник: Милостию и щедротами и человеколюбием Единороднаго Твоего Сына, с Нимиже благословен еси со Всесвятым, и Благим, и Животворящим Твоим Духом, ныне и присно и во веки веков.
Песнь 7
Ирмос: В пещи авраамстии отроцы персидстей, любовию благочестия паче, нежели пламенем, опаляеми, взываху: благословен еси в храме славы Твоея, Господи.
Яко трие отроцы, в пещи вавилонстей пламенем объятии, молитвою не сгораху, тако ты, священномучениче Николае, во огни мучений благодатию веру сохранил еси. Сего ради ныне с новомученики Российскими ликуеши: благословен еси, Боже отцев земли нашея.
Якоже древле отроцы, в пещи неопаляемии, златому истукану не поклонишася, тако же и ты, священномучениче Николае, огнем мучений неопаляемь, безбожие небоязненно обличал еси, взывая с новомученики Российскими: благословен еси, Боже отцев земли нашея.
Слава: Жертву живую и всесожжение Творцу себе самаго принося, священномучениче Николае, с новомученики Российскими воспевал еси: могущии покаряйтеся, яко с нами Бог отцев земли нашея.
И ныне: Богородичен: Яже паче ума и естества Бога рождши, Неискусомужная Марие, чтущия Тя от враг видимых и невидимых избави, Ты бо еси земли отцев наших Держава необоримая.
Песнь 8
Ирмос: Руце распростер, Даниил львов зияния в рове затче; огненную же силу угасиша, добродетелию препоясавшеся, благочестия рачители отроцы, взывающе: благословите, вся дела Господня, Господа.
Землю Русскую, безбожными гонении нещадно жегомую, слезами и кровьми твоими напоил еси, священномучениче Николае, сего ради плоды веры - чада церковная возрастил еси.
Злобы мучителей не убоялся еси, огнем любве Божественныя тыя препобедив, темже благодать молитися о нас стяжал еси, священномучениче Николае, достохвальне.
Благословим Отца и Сына и Святаго Духа, Господа: Благословляя гонителей твоих, блаженне Николае, усердно молился еси за них, да покаются и купно с верными братиями благословят Господа.
И ныне: Богородичен: Христа зрящи умерщвляема, Многопетая Владычице, и, видящи исполнение Симеонова проречения, слезящи, взываше: благословен еси, Боже, во веки.
Песнь 9
Ирмос: Камень нерукосечный от Несекомыя Горы, Тебе, Дево, краеугольный отсечеся, Христос, совокупивый разстоящаяся естества. Тем, веселящеся, Тя, Богородице, величаем.
Руками беззаконных убиен, жертва благоприятная и вольное заколение Богу принеслся еси, святче Божий Николае. Тем благодарне память твою почитаем.
Господь, исполняя смотрение Свое о Церкви Русстей, заступника тя, священномучениче Николае, содела. Темже молися Ему, во благочестии нам пребывати и спастися душам нашим.
Слава: О, бездна благости Божия! Дарова бо Бог возлюбленным Своим веры ради пострадати и тя, священномучениче Николае, яко плод красный спасительнаго сеяния, избра от земли Русския.
И ныне: Богородичен: Разори советы вся, на ны вооруженныя, Мати Бога Вышняго, и радости исполни уповающия на Тя, да усердно вси Твое проповедуем заступление.
И абие лик поет стих сей, глас 8: Владычице, приими молитвы раб Твоих и избави нас от всякия нужды и печали, Ты еси, Богородице, оружие наше и стена, Ты еси Заступница, и к Тебе прибегаем, Тя и ныне на молитву призываем, да избавиши нас от врагов наших. Возвеличим Тя вси, Всенепорочную Матерь Христа Бога, Юже осени Дух Пресвятый.
Таже, Трисвятое по Отче наш:
Тропарь, глас 1:
Доблий страдальче/ и служителю Таин Божиих,/ священномучениче Николае,/ Церкве Русския похвало и утверждение,/ ныне, молящися пред святыми твоими мощами,/ Богу, прославльшему тя, благодарственно вопием:/ слава Давшему ти крепость во страданиих,/ слава Венчавшему тя,// слава Спасающему нас твоими молитвами.
Слава, и ныне, Богородичен:
Предстательнице теплая и Заступнице усердная, в годину безбожия от конечныя погибели землю Русскую всемощным ходатайством к Сыну Твоему избавльшая. И ныне не остави нас молитвами Твоими, Владычице Богородице.
Священник или диакон глаголет:
Помилуй нас Боже, по велицей милости Твоей, молим ти ся, услыши и помилуй.
Лик: Господи помилуй (трижды).
Еще молимся о великом господине и отце нашем святейшем патриархе Кирилле, и о господине нашем высокопреосвященнейшем митрополите Германе.
Еще молимся о всечестном игумене нашем Гаврииле с братией святыя обители сея, зде начальствующих, учаших и учашихся.
Еще молимся о Богохранимей стране нашей, властех и воинстве ея.
Еще молимся о милости, жизни, мире, здравии, спасении, посещении, прощении и благопоспешении рабов Божиих, (имена).
Еще молимся за всю братию, и за вся православныя христианы.
Возглас: Услыши ны, Боже Спасителю наш, упование всех концев земли, и сущих в мори далече, и милостив, милостив буди, Владыко, о гресех наших, и помилуй ны: милостив бо и человеколюбец Бог еси, и Тебе славу возсылаем, Отцу, и Сыну, и Святому Духу, ныне и присно, и во веки веков.
Священник или диакон: Со умилением сердец, преклоньше колена, ко святому священномученику Николаю, помолимся.
Лик: Священномучениче Николае, моли Бога о нас.
Священник чтет молитву: О избранниче и угодниче Христов, священномучениче Николае, Церкве Русския столпе непоколебимый, земли нашея благое прозябение и красный плод, сродников твоих предстателю и наставниче! Ты во время гонения безбожнаго от сокровищницы души твоея спасительное исповедание Православныя веры изнесл еси, и людем верным пастырь добрый явился еси, душу твою за Христа и Его овцы полагая и лютыя волки далече отгоняя. Ныне убо призри на нас, недостойных чад твоих, умиленною душею и сокрушенным сердцем тя призывающих. Умоли Господа Бога, да простит согрешения наша и избавит от адовых уз и вечнаго мучения. Утверди нас в вере святой, научи нас всегда творити волю Божию и хранити заповеди церковныя. Буди пастырем нашим - правило веры, воином - вождь духовный, болящим - врач изрядный, печальным - утешитель, гонимым - заступник, юным - наставник, святей обители сей и граду сему - помощник и покровитель, всем же благосердый отец и теплый молитвенник, яко да молитвами твоими соблюдется в Православии Святая Русь и непрестанно славится в ней имя Пресвятыя Троицы, Отца и Сына и Святаго Духа во веки веков. Аминь.
И абие поем величание: Величаем тя, священномучениче Николае, и чтим честная страдания твоя, яже за Христа во утверждение на Руси Православия претерпел еси.
Священник: Премудрость. Пресвятая Богородице спаси нас.
Лик: Честнейшую;
Священник: Слава Тебе Христе Боже, упование наше, слава Тебе.
Лик: Слава, и ныне; Господи помилуй (Трижды). Высокопреосвященнейший владыко благослови.
Отпуст: Христос истинный Бог наш, молитвами Пречистыя Своея Матере, святаго священномученика Николая, иже в Верхнем Гнутове, и всех святых, помилует и спасет нас, яко Благ и Человеколюбец. 