В 26-й день
И́же во святы́х отца́ на́шего Стефа́на, епи́скопа Пе́рмскаго
На Го́споди, воззва́х: стихи́ры, глас 4. Подо́бен: Зва́нный свы́ше:
Егда́ Боже́ственное раче́ние/ прии́де на тя, прему́дре Стефа́не,/ тогда́ вся, я́же во пло́ти, мудрова́ния оста́вив,/ невозвра́тно Христу́ после́довал еси́,/ и, апо́столом подо́бяся,/ в да́льних страна́х неве́дущим Бо́га пропове́дал еси́,/ и от тьмы тех к свету Богоразу́мия/ вся наста́вил еси́./ Те́мже и венцы́ Небе́сными Христо́с,/ Ему́же порабо́тал еси́, венча́ тя,/ Его́же моли́/ спасти́ и просвети́ти ду́ши на́ша.
Егда́ Боже́ственное жела́ние/ на́йде на тя, святи́телю,/ тогда́ вся преле́стная,/ я́же в ми́ре, мудрова́ния оста́вль,/ и, к Вы́шним жела́я, Вы́шних взыска́л еси́;/ отону́дуже и прему́дрость не от челове́к, ни челове́ком,/ но от Вы́шняго Про́мысла прие́мь/ писа́ния но́вая ко Христо́ву позна́нию изложи́л еси́,/ и неве́дущим лю́дем Бог тобо́ю позна́н бысть./ Его́же моли́, Стефа́не прему́дре,/ спасти́ и просвети́ти ду́ши на́ша.
Егда́ Боже́ственное зва́ние/ прии́де на тя, святи́телю Стефа́не,/ тогда́, Святы́м Ду́хом дви́жим/ прише́л еси́ просвети́ти/ дре́вле во тьме лю́ди неве́рия лежа́щия/ к све́ту Богоразу́мия,/ просвети́в, воздви́гл еси́/ и всех научи́л еси́/ ве́ровати в Тро́ицу Единосу́щную/ во Еди́ном Божестве́./ Ю́же о нас моли́, святи́телю пречу́дне,/ спасти́ и просвети́ти ду́ши на́ша.
Ины стихи́ры, глас 1. Подо́бен: Небесных чино́в:
И́же дре́вле олядене́вшая неве́рных люде́й сердца́,/ уче́нием твои́м, блаже́нне Стефа́не, возде́лал еси́,/ се́мя ве́ры в них насади́в./ Те́мже тя я́ко учи́теля/ и наста́вника благоче́стия/ попремно́гу, вси ве́рнии, ублажа́ем.
Бысть язы́к твой, святи́телю, трость живопи́сца,/ Бо́жия вели́чия всем изъясни́в,/ в позна́ние Бо́жие приве́л еси́/ и зло́бы мудреца́, пансо́тника, смехо́м наруга́ема, яви́л еси́./ Те́мже твое́ успе́ние,/ духо́вне соше́дшеся, почита́ем.
Хра́мы и́дольския, святи́телю прему́дре, низложи́в,/ всеконе́чней поги́бели пре́дал еси́/ и це́ркви во Христо́во позна́ние освяти́л еси./ Те́мже, духо́вная твоя́ ча́да,/ я́ко наста́вника тя благоче́стия/ любо́вию воспева́ем и мо́лимся:/ моли́ спасти́ся душа́м на́шим.
Сла́ва, глас 6:
Прему́дрости твое́й и сло́ву разу́мному,/ вси и́дольстии служи́тели удиви́шася,/ и свою́ су́етную ве́ру я́ко безбо́жну оплева́ша,/ и тобо́ю пропове́даемому Христу́ от души́ ве́роваша:/ Его́же моли́, прему́дре Стефа́не,/ спасти́ся всем, свяще́нное твое́ торжество́ соверша́ющим,/ и ве́рою чту́щим всечестну́ю па́мять твою́.
И ны́не, пра́здника.
Вход. Проки́мен дне, чте́ния три.
При́тчей чте́ние (гла́вы 10, 3 и 8):
Па́мять пра́веднаго с похвала́ми,/ и благослове́ние Госпо́дне на главе́ его́./ Блаже́н челове́к, и́же обре́те прему́дрость,/ и сме́ртен, и́же уве́де ра́зум./ Лу́чше бо сию́ купова́ти,/ не́жели зла́та и сребра́ сокро́вища./ Честне́йшая же есть ка́мений многоце́нных,/ все же честно́е недосто́йно ея́ есть./ Долгота́ бо дней и ле́та живота́ в десни́це ея́,/ в шу́йце же ея́ бога́тство и сла́ва;/ от уст ея́ исхо́дит пра́вда, зако́н же и ми́лость на язы́це но́сит./ Послу́шайте у́бо мене́, о ча́да!/ честна́я бо реку́,/ и блаже́н челове́к, и́же пути́ моя́ сохрани́т,/ исхо́ди бо мои́ – исхо́ди живота́,/ и уготовля́ется хоте́ние от Го́спода./ Сего́ ра́ди молю́ вас/ и предлага́ю мой глас сыново́м челове́ческим,/ я́ко аз, прему́дрость, устро́их сове́т/ и ра́зум и смысл аз призва́х./ Мой сове́т и утвержде́ние,/ мой ра́зум, моя́ же кре́пость./ Аз мене́ лю́бящия люблю́,/ и́щущий же мене́ обря́щут благода́ть./ Разуме́йте у́бо, незло́бивии, кова́рство,/ ненака́заннии же, прилага́йте сердца́./ Послу́шайте мене́ и па́ки, честна́я бо реку́,/ и отве́рзу от усте́н пра́вая,/ я́ко и́стине поучи́тся горта́нь мой,/ ме́рзски же предо мно́ю устны́ лжи́выя./ С пра́вдою в си глаго́лы уст мои́х,/ ничто́же в них стро́потно, ниже́ развраще́нно./ Вся пра́ва суть разумева́ющим,/ и про́ста обрета́ющим ра́зум./ Науча́ю бо вас и́стине,/ да бу́дет о Го́споде наде́жда ва́ша,/ и испо́лнитеся Ду́ха.
Прему́дрости Соломо́новы чте́ние (главы 10, 6, 8, и 9):
Уста́ пра́веднаго ка́плют прему́дрость,/ устне́ же муже́й му́дрых ве́дят благода́ть./ Уста́ му́дрых поуча́тся прему́дрости,/ пра́вда же избавля́ет их от сме́рти./ Сконча́вшуся му́жу пра́ведну, не поги́бнет наде́жда./ Сын бо пра́веден ражда́ется в живо́т/ и во благи́х свои́х плод пра́вды обы́мет./ Свет пра́ведным всегда́/ и от Го́спода обря́щут благода́ть и сла́ву./ Язы́к му́дрых до́брая свесть,/ и в се́рдце их почи́ет му́дрость./ Лю́бит Госпо́дь преподо́бная сердца́,/ прия́тии же Ему́ вси непоро́чнии в пути́./ Му́дрость Госпо́дня просвеща́ет лице́ разу́мнаго./ Постига́ет бо жела́ющия ю,/ пре́жде да́же разуме́ти ю,/ и удо́бь у́зрится от лю́бящих ю./ У́треневавый к ней не утру́дится,/ и бдяй ея́ ра́ди вско́ре без печа́ли бу́дет./ Я́ко досто́йных ея́ сама́ обхо́дит, и́щущи,/ и во стезя́х ея́ явля́ется им благоприе́мне./ Му́дрости никогда́же одоле́ет зло́ба./ Сих ра́ди и рачи́тель бых добро́ты ея́,/ и возлюби́х ю, и поиска́х от ю́ности моея́./ И взыска́х неве́сту привести́ себе́,/ я́ко всех Влады́ка возлюби́ ю,/ таи́бница бо есть Бо́жия хи́трости/ и обрета́тельница дел Его́./ Труды́ ея́ суть доброде́тели,/ целому́дрию же и ра́зуму та учи́т,/ пра́вде и му́жеству,/ и́хже потре́бне ничто́же есть в житии́ челове́ком./ А́ще же и мно́гаго иску́сства жела́ет кто,/ весть дре́вняя и бы́ти хотя́щая разсмо́трит./ Свесть изви́тия слове́с и разреше́ния гада́ний,/ зна́мения и чудеса́ проразуме́ет и сбытия́ време́н и лет,/ и всем сове́тник есть благ,/ яко безсме́ртие есть в ней/ и благосла́вие во обще́нии слове́с ея́./ Сего́ ра́ди бесе́довах ко Го́споду,/ и помоли́хся Ему́,/ и рех от всего́ се́рдца моего́:/ Бо́же отце́в и Го́споди ми́лости,/ сотвори́вый вся сло́вом Твои́м/ и му́дростию Твое́ю устро́ивый челове́ка,/ да владе́ет бы́вшими от Тебе́ тварьми́/ и да управля́ет мир в преподо́бии и пра́вде./ Даждь ми Твои́х престо́лов приседя́щую прему́дрость/ и не отлучи́ мене́ от о́трок Твои́х,/ я́ко аз раб Твой и сын рабы́ни Твоея́./ Посли́ ю с Небе́с от свята́го жили́ща Твоего́/ и от престо́ла сла́вы Твоея́,/ да, су́щи со мно́ю, научат мя,/ что́ благоуго́дно есть пред Тобо́ю./ И наставит мя в ра́зум,/ и сохрани́т мя в сла́ве свое́й./ Помышле́ния бо сме́ртных вся боязли́ва/ и погреши́тельна умышле́ния их.
Прему́дрости Соломо́новы чте́ние (гла́вы 4, 6, 7 и 2):
Похваля́ему пра́веднику возвеселя́тся лю́дие:/ безсме́ртие бо есть па́мять его́,/ я́ко от Го́спода познава́ется и от челове́к,/ и уго́дна Го́сподеви душа́ его́./ Возлюби́те у́бо, о му́жие, му́дрость и поживете́,/ восхощи́те ея́ и нака́зани бу́дете./ Нача́ло бо ея́ любы́ и соблюде́ние зако́на,/ почти́те прему́дрость, да во ве́ки ца́рствуете./ Возве́щу вам и не скры́ю от вас та́ин Бо́жиих,/ я́ко Той му́дрости Наста́вник есть,/ и му́дрых Испра́витель,/ и вся́кому смы́слу и де́лу Хитре́ц./ И всем смы́слом научи́т му́дрость,/ есть бо в ней Дух Разу́мен и Свят,/ и сия́ние Све́та Присносу́щнаго,/ и о́браз бла́гости Бо́жия./ Та дру́ги Бо́жия и проро́ки устроя́ет,/ благоле́пнейши же есть со́лнца/ и па́че вся́каго сотворе́ния звезд,/ све́ту сосужда́ема, обрета́ется пе́рвейши./ Та угожда́ющих ей от боле́зней изба́ви/ и наста́ви на стези́ пра́выя./ Даде́ им ра́зум име́ти свят,/ и сохрани́ я от ловя́щих,/ и по́двиг кре́пок подаде́ им./ Да разуме́ют вси, я́ко си́льнейши всего́ есть благоче́стие,/ и никогда́же премо́жет зло́ба му́дрости,/ ни́же пре́йдет злы́я, облича́ющи суд./ Реко́ша же в себе́, помы́сливше непра́ведно:/ наси́льствуем пра́ведному,/ не пощади́м преподо́бства его́,/ ни усрами́мся седи́н ста́рости многоле́тны./ Бу́дет бо нам кре́пость зако́н,/ и улови́м пра́веднаго,/ я́ко неуго́ден нам есть,/ и проти́вится дело́м на́шим,/ и поно́сит нам отпаде́ние зако́на,/ и облича́ет нам согреше́ния наказа́ния на́шего./ Возвеща́ет нам ра́зум име́ти Бо́жий/ и о́трока Госпо́дня себе́ имену́ет./ Бысть нам на обличе́ние помышле́нием на́шим,/ и тя́жек нам есть,/ и ви́дим, я́ко неподо́бно ины́м житие́ его́/ и измене́ны стези́ его́./ В поруга́ние вмени́хомся ему́,/ и удаля́ется от путе́й на́ших,/ я́ко от нечисто́т, и блажи́т после́дняя пра́ведных./ Ви́дим у́бо, а́ще словеса́ его́ и́стинна суть,/ иску́сим, я́же сбыва́ются ему́./ Руга́нием и му́кою истя́жем его́,/ да разуме́ем кро́тость его́ и иску́сим беззло́бство его́,/ сме́ртию безобра́зною осу́дим его́,/ бу́дет бо посеще́ние от слове́с его́./ Сия́ помы́слиша и прельсти́шася,/ ослепи́ бо я зло́ба их,/ и не разуме́ша та́ин Бо́жиих,/ и не разсуди́ша, я́ко Ты еси́ Бог Еди́н,/ живота́ име́яй и сме́рти власть,/ и спаса́яй во вре́мя ско́рби,/ и избавля́яй от вся́каго зла./ Щедр, и ми́лостив,/ и дая́й преподо́бным Свои́м благода́ть,/ и Свое́ю мы́шцею го́рдым противля́яйся.
На лити́и стихи́ра хра́ма. Сла́ва, глас 2:
Апо́стольски вся научи́л еси́/ ве́ровати в Тро́ицу Единосу́щную во Еди́ном Божестве́./ Те́мже тя вси, я́ко духо́внаго отца́,/ и ревни́теля апо́столом, и святи́телем единокро́вна,/ по до́лгу почита́юще, ублажа́ем и мо́лимся:/ моли́ спасти́ся всем,/ свяще́нную па́мять твою́ почита́ющим.
И ны́не, пра́здника.
На стихо́вне стихи́ры, глас 2. Подо́бен: До́ме Евфра́фов:
Дом и жили́ще/ Ду́ха Пресвята́го,/ прему́дре Стефа́не, был еси́:/ те́мже и нас дом Тому́ соде́лай,/ свяще́нную твою́ па́мять почита́ющих.
Стих: Свяще́нницы Твои́ облеку́тся в пра́вду,/ и преподо́бнии Твои́ возра́дуются.
Житие́ твое́, я́ко со́лнце,/ в сердца́ неве́рных возсия́,/ зарю́ уче́ния испуща́я;/ те́мже и нас све́том невече́рним озари́,/ свяще́нную твою́ па́мять почита́ющих.
Стих: Восхва́лятся преподо́бнии во сла́ве/ и возра́дуются на ло́жах свои́х.
Не преста́й, Стефа́не, моля́ся/ о духо́вных твои́х ча́дех,/ и́хже креще́нием породи́л еси́,/ да вси честно́е твое́/ успе́ние почита́ем.
Сла́ва, глас 4:
Прему́дрости сокро́вище быв, святи́телю Стефа́не,/ сердца́ неве́рных люде́й уче́нием твои́м просвети́л еси́,/ благоче́стия се́мена насади́в./ Те́мже тя вси, я́ко учи́теля прему́дра,/ достодо́лжно по досто́инству ублажа́ем и мо́лимся:/ моли́ся Христу́, Ему́же от ю́ности порабо́тал еси́,/ изба́вити нас наве́т вра́жиих/ и спасти́ся душа́м на́шим.
И ны́не, пра́здника.
Тропа́рь, глас 4:
Божественным жела́нием,/ от ю́наго во́зраста, Стефа́не прему́дре, разже́гся,/ яре́м Христо́в взял еси́/ и люде́й олядене́вшая дре́вле неве́рием сердца́,/ Боже́ственное се́мя в них се́яв,/ ева́нгельски духо́вне породи́л еси́./ Те́мже пресла́вную твою́ па́мять почита́юще, мо́лим тя:/ моли́, Его́же пропове́дал еси́,/ да спасе́т ду́ши на́ша.
Сла́ва, и ны́не, пра́здника.
НА У́ТРЕНИ
На Бог Госпо́дь: тропа́рь то́йже.
По 1-й стихоло́гии седа́лен, глас 1. Подо́бен: Ка́мени запеча́тану:
Я́ко врача́ тя преизря́дна душе́вных страсте́й,/ святи́телю Стефа́не, ве́дуще, мо́лим:/ моли́ся утоли́ти от нас томи́тельныя стра́сти,/ да тебе́ вси, я́ко вину́ всех благи́х обре́тше, возопие́м:/ сла́ва Да́вшему ти прему́дрость,/ сла́ва Венча́вшему тя,/ сла́ва Даю́щему тобо́ю всем просвеще́ние.
Сла́ва, и ны́не, пра́здника.
По 2-й стихоло́гии седа́лен, глас 4. Подо́бен: Вознесы́йся:
От младе́нства доброде́тели прилежа́в,/ сосу́д Духа Свята́го, святи́телю Стефа́не, был еси́,/ от Него́же и прему́дрости навы́к,/ научи́л еси́ челове́ки и́долы преобидети и Христу́ ве́ровати:/ Его́же моли́ спасти́ всех, любо́вию тя почита́ющих.
Сла́ва и ны́не, пра́здника, или Богоро́дичен:
Грехолюби́в сый, молю́ Тя, безгре́шнаго Бо́га ро́ждшую,/ взе́млющаго грехи́ ми́ра, Пречи́стая,/ многогре́шную ду́шу мою́ уще́дрити/ и грехи́ моя́ мно́гия очи́стити:/ гре́шных бо Ты еси́ очище́ние,/ и спасе́ние ве́рных, и заступле́ние.
По полиеле́и седа́лен, глас 8. Подо́бен: Прему́дрости:
Прему́дрости свы́ше науче́н был еси́,/ Бо́гу соедини́вся, ева́нгельски мир оста́вил еси́/ и в да́льних ме́стех, прише́д, креще́нием ко Христо́ву позна́нию всех приве́л еси́./ Те́мже и всем вопия́л еси́:/ позна́йте Бо́га и обря́щете благода́ть./ Святи́телю прему́дре Стефа́не, моли́ Христа́ Бо́га, грехо́в оставле́ние дарова́ти/ почита́ющим любо́вию всечестну́ю па́мять твою́.
Сла́ва, и ны́не, пра́здника, или́ Богоро́дичен:
Я́ко Де́ву и еди́ну в жена́х, Тя, без се́мене ро́ждшую Бо́га пло́тию,/ вси ублажа́ем, ро́ди челове́честии,/ Огнь бо всели́ся в Тя Божества́,/ и я́ко Младе́нца млеко́м пита́еши Зижди́теля и Го́спода./ Тем, А́нгельский и человече́ский род, досто́йно сла́вим пресвято́е рождество́ Твое́/ и согла́сно вопие́м Ти:/ моли́ Христа́ Бо́га согреше́ний оставле́ние дарова́ти/ покланя́ющимся ве́рою пресвято́му рождеству́ Твоему́.
Та́же, степе́нна, 1-й антифо́н 4-го гла́са. Проки́мен: Уста́ моя́ возглаго́лют прему́дрость,/ и поуче́ние се́рдца моего́ ра́зум. Стих: Услы́шите сия́, вси язы́цы, внуши́те, вси, живу́щий по вселе́нней. Вся́кое дыха́ние: Ева́нгелие от Иоа́нна, зача́ло 35 от полу́.
По 50-м псалме́ стихи́ра, глас 6:
Прему́дрости твое́й и сло́ву разу́мному,/ вси и́дольстии служи́тели удиви́шася,/ и свою́ су́етную ве́ру я́ко безбо́жну оплева́ша,/ и тобо́ю пропове́даемому Христу́ от души́ ве́роваша:/ Его́же моли́, прему́дре Стефа́не,/ спасти́ся всем, свяще́нное твое́ торжество́ соверша́ющим,/ и ве́рою чту́щим всечестну́ю па́мять твою́.
Кано́н пра́здника со ирмосо́м на 6, и свята́го два, на 8. Кано́н свята́го, глас 4.
Песнь 1
Ирмо́с: Отве́рзу уста́ моя́,/ и напо́лнятся Ду́ха,/ и сло́во отры́гну Цари́це Ма́тери,/ и явлю́ся, све́тло торжеству́я,/ и воспою́, ра́дуяся, Тоя́ чудеса́.
Свяще́ннаго ты Писа́ния от младе́нства научи́вся, Богоно́се Стефа́не,/ в да́льняя места́ прише́л еси́,/ и неве́дущим Бог тобо́ю позна́ся.
Иде́же пре́лесть почита́ема бя́ше,/ та́мо же ны́не тобо́ю Бог неве́дущим, святи́телю Стефа́не, позна́ся./ Те́мже свяще́нную Твою́ па́мять достодо́лжно ублажа́ем.
Богодохнове́нным твои́м уче́нием научи́л еси́ лю́ди ве́ровати во Христа́/ и от и́дольския пре́лести уклоня́тися./ Сего́ ра́ди тя вси, я́ко единоревни́теля апо́столом, пе́сньми почита́ем.
Богородичен: Ты Еди́наго, Богоневе́сто, в Вы́шних седя́щаго,/ на руку́ носи́ла еси́, плоть бы́вша:/ Ты бо была́ еси́ избра́нна от всех век,/ прия́телище досто́йно Вседержи́теля.
Други́й кано́н, глас 8.
Песнь 1
Ирмос: Во́ду проше́д, я́ко су́шу,/ и еги́петскаго зла избежа́в,/ изра́ильтянин вопия́ше:/ Изба́вителю и Бо́гу на́шему пои́м.
Пермь я́ко дости́гл еси́, святи́телю,/ и та́мо возвы́шенную пре́лесть, прему́дре Стефа́не, смири́л еси́,/ и лю́таго чароде́я прему́дрыми твои́ми уче́нии посрами́л еси́.
Бесо́вская ору́жия кре́пко, святи́телю, притупи́л еси́, и, тех победи́в Бо́жиею си́лою,/ всем Хри́ста, и́стиннаго Бо́га, Того́ испове́дал еси́,/ те́мже и вене́ц от Него́ прия́л еси́, Стефа́не.
Боже́ственною любо́вию, о́тче, распала́емь,/ не убоя́лся еси́ долготы́ пу́тныя, ниже́ та́мо нечести́вых челове́к сопротивле́ния,/ но вся претерпе́л еси́ и всех Бо́гу приве́л еси́.
Богоро́дичен: Из ко́рене ца́рскаго прозябла́ еси́, Царя́ Христа́, Бо́жие Сло́во,/ па́че ума́ и смы́сла родила́ еси́ из чи́стых крове́й Твои́х,/ сугу́ба естество́м явля́ема и еди́нствующа Ипоста́сию.
Катава́сия пра́здника.
Песнь 3
Ирмо́с: Твоя́ песносло́вцы, Богоро́дице,/ живы́й и незави́стный исто́чниче,/ лик себе́ совоку́пльшия, духо́вно утверди́,/ в Боже́ственней Твое́й сла́ве/ венце́в сла́вы сподо́би.
Не убоя́лся еси́, святи́телю, люде́й тогда́ нече́ствующих,/ но тех дерзнове́нно куми́рницу со и́долы огню́ пре́дал еси́/ и всех научи́л еси́ вопи́ти:/ несть свят, па́че Тебе́, Го́споди.
Тезоимени́тым му́жеством и смире́ния нра́вом/ на о́вчу кро́тость уби́йц преложи́л еси́,/ сего́ ра́ди и венцы́ венча́лся еси́, святи́телю Стефа́не.
Богоро́дичен: Тя, заступле́ние небла́зненно, Богома́ти, стяжа́вше/ и упова́ние на Тя возлага́юще, спаса́емся/ и, к Тебе́ прибега́юще, сохраня́емся вси.
Ин Ирмо́с: Небе́снаго кру́га Верхотво́рче, Го́споди,/ и Це́ркве Зижди́телю,/ Ты мене́ утверди́ в любви́ Твое́й,/ жела́ний кра́ю, ве́рных утвержде́ние,/ еди́не Человеколю́бче.
Я́ко мудр и смы́слен споспе́шник,/ душе́вное благоро́дие па́че плотски́х сласте́й предпоче́т,/ я́ко пре́мудрая уче́ния всем явля́еши/ и в Бо́жие позна́ние но́выя лю́ди, о́тче, приве́л еси́.
Очи́стив твой ум от страстна́го треволне́ния,/ Христу́ подо́бяся, взыска́ти заблу́ждших прише́л еси́,/ и́хже обре́т, с ни́ми Тому́ пое́ши:/ несть свят, па́че Тебе́, Го́споди.
Богоглаго́ливый язы́к я́ко стяжа́в, святи́телю,/ та́инством Богосло́вия научи́л еси́ лю́ди ве́ровати в Тро́ицу, Еди́но Божество́,/ Е́йже о нас, Стефа́не, моли́ся.
Богородичен: Жезл, прозя́бший Христа́, цвет нетле́нный,/ злату́ю кади́льницу, вси Тя ве́мы, Чи́стая,/ Боже́ственнаго Существа́ нося́щи на руку́ угль, Богоблаже́нная.
Седа́лен, глас 4. Подо́бен: Ско́ро предвари́:
Ума́ пречу́днаго и бо́дреннаго учи́теля, священноде́йствы Це́рковь украси́вша,/ и му́тным уче́нием волхва́, я́ко возбесне́вша во́лка, от Христо́вых ове́ц словесы́ свои́ми отгна́вша,/ и невре́дно духо́вная своя́ ча́да сохра́нша,/ восхва́лим, ве́рнии, Стефа́на прехва́льнаго, глаго́люще:/ моли́ Христа́ Бо́га спасти́ся душа́м на́шим.
Сла́ва, и ны́не, пра́здника.
Песнь 4
Ирмос: Седя́й в сла́ве на престо́ле Божества́/ во о́блаце ле́гце,/ прии́де Иису́с Пребоже́ственный/ Нетле́нною Дла́нию и спасе́ зову́щия:/ сла́ва, Христе́, си́ле Твое́й.
Я́ко со́лнце, чи́стое житие́ твое́ возсия́, святи́телю,/ тьму идолобе́сия от люде́й твои́х отгна́в, всех научи́л еси́ взыва́ти:/ сла́ва си́ле Твое́й, Го́споди.
Волше́бная буесло́вия, я́ко прему́др, посрами́л еси́,/ и сих от Христо́ва ста́да словесы́ твои́ми, я́ко пра́щею, отгна́л еси́,/ и зва́ти всех научи́л еси́:/ сла́ва си́ле Твое́й, Го́споди.
Я́ко и́стинный святи́тель тих и кро́ток, о́тче, был еси́/ и столп благоче́стия Це́ркве яви́лся еси́,/ лю́ди твоя́ благоче́стию научи́в вопи́ти Христу́:/ сла́ва си́ле Твое́й, Го́споди.
Богоро́дичен: Тя ору́жие на враги́ предлага́ем,/ ско́рби вся́кия лю́тых обстоя́ний отрева́ем,/ и возмуще́ния ерети́ческаго, Ма́ти Бо́жия, избега́ем.
Ин
Ирмо́с: Услы́шах, Го́споди,/ смотре́ния Твоего́ та́инство,/ разуме́х дела́ Твоя́/ и просла́вих Твое́ Божество́.
Спасти́ся моли́ лю́дем,/ и́хже уче́нием твои́м просвети́л еси́ и научи́л еси́ вопи́ти:/ сла́ва си́ле Твое́й, Человеколю́бче.
От Бо́га прие́м свяще́нства избра́ние, Боже́ственною си́лою свы́ше оде́ян,/ апо́стольски лю́ди от тьмы и́дольския просвети́л еси́ и научи́л еси́ вопи́ти:/ си́ле Твое́й сла́ва, Человеколю́бче.
Богоро́дичен: Ковче́г Тя издале́ча прообразова́ прие́мший зако́н Богонапи́санный,/ во чре́ве Сло́во Бо́жие заче́ншую несказа́нно, Всенепоро́чная,/ пита́ющее бога́тно ду́ши вопию́щих:/ сла́ва си́ле Твое́й, Го́споди.
Песнь 5
Ирмо́с: Ужасо́шася вся́ческая/ о Боже́ственней сла́ве Твое́й:/ Ты бо, Неискусобра́чная Де́во,/ име́ла еси́ во утро́бе над все́ми Бо́га/ и родила́ еси́ Безле́тнаго Сы́на,/ всем воспева́ющим Тя/ мир подава́ющая.
Воздви́гл еси́ уче́нием твои́м дре́вле во тьме неве́дения лю́ди лежа́щия,/ ча́да Бо́жия и све́та показа́л еси́ насле́дники,/ отону́дуже тя, святи́телю, вси любому́дренно почита́ем.
Прему́дрость Ду́ха Свята́го благода́тию во устна́х твои́х излия́вшися самотвори́тельно/ и ко Христо́ву позна́нию приведе́ лю́ди, святи́телю.
Све́ту вели́кому я́ко вене́чник ны́не, святи́телю, предстои́ши,/ помина́й изря́дное твое́ достоя́ние, е́же мно́гими труды́, о́тче, стяжа́л еси́,/ да вси тя ублажа́ем.
Богородичен: Возсия́ из Тебе́ мы́сленное Со́лнце/ и све́тлыя лучи́ Своего́ Божества́ всем простре́, Богоро́дице Влады́чице,/ тем Тя вси сла́вим.
Ин Ирмо́с: Просвети́ нас повеле́нии Твои́ми, Го́споди,/ и мы́шцею Твое́ю высо́кою/ Твой мир пода́ждь нам,/ Человеколю́бче.
Боже́ственною ре́вностию, святи́телю, разжиза́емь,/ су́етныя и́долы па́губы коне́чныя огню́ пре́дал еси́/ и, неве́рныя в ве́ру приве́д,/ всех научи́л еси́ в Трех Ли́цех Еди́но Божество́ ве́ровати.
Постыде́ся окая́нный волхв,/ хотя́ Христо́вы лю́ди отврати́ти от ве́ры,/ Бо́гу, тя прославля́ющу, свяще́ннейший Стефа́не прему́дре.
Богородичен: Украси́лася еси́ де́вства добро́тами,/ Е́вин покры́ла еси́ студ злообра́зный, Христа́ ро́ждшая,/ одея́ние безсме́ртия да́рующаго Тебе́ чту́щим.
Песнь 6
Ирмос: Боже́ственное сие́ и всечестно́е/ соверша́юще пра́зднество,/ Богому́дрии, Богома́тере,/ прииди́те, рука́ми воспле́щим,/ от Нея́ ро́ждшагося Бо́га сла́вим.
Ра́лом слове́с твои́х олядене́вшая люде́й сердца́ возде́лал еси́,/ Боже́ственное се́мя в них все́яв,/ плод кра́сный Христу́, святи́телю, приве́л еси́.
Быстрина́ми твои́х уче́ний и́дольская разжже́ния, прему́дре Стефа́не, угаси́в,/ Боже́ственными твои́ми словесы́ ве́рных сердца́ утверди́л еси́.
Во Единосу́щную Тро́ицу ве́ровати лю́ди научи́в, прему́дре Стефа́не,/ от скве́рны и́дольския к Живо́му Бо́гу приве́л еси́.
Богоро́дичен: Расто́ргни мои́х согреше́ний рукописа́ние,/ одержа́щих мы печа́лей и страсте́й разреше́ние да́руя,/ и соблюди́ мя поврежде́нна, Влады́чице.
Ин Ирмо́с: Моли́тву пролию́ ко Го́споду/ и Тому́ возвещу́ печа́ли моя́,/ я́ко зол душа́ моя́ испо́лнися/ и живо́т мой а́ду прибли́жися,/ и молю́ся, я́ко Ио́на:/ от тли, Бо́же, возведи́ мя.
Па́стырский жезл прие́м, святи́телю,/ но́вым лю́дем учи́тель был еси́, пресла́вне Стефа́не,/ по апо́столу, всем всяк быв, да всех ко Христу́ приведе́ши, пресла́вне.
Меч обою́ду остр язы́к твой на лука́ваго волхва́ бысть, святи́телю,/ пресека́я того́ му́тное уче́ние;/ те́мже тя свяще́нными пе́сньми прославля́ем.
Богоро́дичен: На́йде Вседе́тельный Дух на Тя, Всенепоро́чная,/ и Сло́во Бо́жие в Тя всели́ся,/ и плоть бысть неизрече́нно, и пребы́сть неизме́нен.
Конда́к, глас 8. Подо́бен: Взбра́нной:
Самозва́нен не и́щущим тебе́, святи́телю, обре́лся еси́,/ лю́ди, от и́дольския ле́сти свободи́в, ко Христо́ве ве́ре приве́л еси́/ и волхва́ пансо́тника посрами́л еси́,/ те́мже и пе́рвый епи́скоп и учи́тель Пе́рми был еси́./ Сего́ ра́ди духо́вная твоя́ ча́да,/ я́ко тобо́ю изба́вльшся от и́дол, благода́рная тебе́ возопие́м:/ ра́дуйся, Стефа́не, учи́телю прему́дрый.
И́кос:
Вся́каго мирска́го пристра́стия кроме́, о́тче, быв,/ от ю́ности прилежа́л еси́ прему́дрости и де́тельное худо́жество дости́гл еси́ Богосло́вия./ И в да́льние страны́ прише́д,/ иде́же весьма́ Бог не погнава́шеся, но пре́лесть бесо́вская почита́шеся,/ та́мо апо́стольски лю́ди научи́л еси́ ве́ровати во Христа́,/ и́долы сокруши́в и волхва́ посрами́в, святи́тель тем был еси́,/ Те́мже духо́вная твоя́ ча́да,/ я́ко тобо́ю изба́вльшеся от и́дол, благода́рная тебе́ зове́м:/ ра́дуйся, Стефа́не, учи́телю прему́дрый.
Песнь 7
Ирмо́с: Не послужи́ша тва́ри Богому́дрии/ па́че Созда́вшаго,/ но о́гненное преще́ние му́жески попра́вше,/ ра́довахуся, пою́ще:/ препе́тый отце́в Госпо́дь и Бог, благослове́н еси́.
Злочести́вый он чароде́й, и́же на благоче́стие хулу́ глаго́лавый,/ тобо́ю, прему́дре, я́ко беззако́нен, от Христо́ва ста́да но́вых люде́й отгони́м быва́ет./ Мы же Христу́ зове́м:/ благослове́н Бог оте́ц на́ших.
Пресла́вно я́ко преше́д от ми́ра к преми́рным, святи́телю, жили́щем/ и прича́стием Бо́гу прибли́жився, воспева́еши:/ благослове́н Бог оте́ц на́ших.
Богородичен: Изба́вльшеся Тобо́ю пе́рвыя кля́твы, к присносу́щней Жи́зни преше́дще,/ ра́дуйся, зове́м Ти, пресла́вная Влады́чице,/ Я́же Бо́га нам ро́ждшая.
Ин Ирмо́с: От Иуде́и, доше́дше, о́троцы/ в Вавило́не иногда́/ ве́рою Тро́йческою пла́мень пе́щный попра́ша, пою́ще:/ отце́в Бо́же, благослове́н еси́.
Бе́гает у́бо, побежде́н быв тобо́ю, преблаже́нне Стефа́не, злочести́вый волхв,/ его́же мудрова́ния и зло́бы вси избавля́емся, Христу́ вопию́ще:/ благослове́н Бог оте́ц на́ших.
И́же тобо́ю дре́вле просвеще́ннии лю́дие,/ пречу́дне святи́телю Стефа́не, я́ко к жи́ву, глаго́лем:/ не оста́ви нас, твои́х чад, я́коже обеща́лся еси́,/ да вси с тобо́ю Христу́ зове́м:/ благослове́н Бог оте́ц на́ших.
Еле́ем Боже́ственнаго ра́дования я́ко святи́тель пома́зан быв,/ но́выя лю́ди ко Христо́ву позна́нию приве́л еси́/ и всех научи́л еси́ Христу́ взыва́ти:/ благослове́н Бог оте́ц на́ших.
Богоро́дичен: Ны́не вся испо́лнишася све́та Боже́ственнаго Тобо́ю, Пречи́стая,/ Ты бо дверь яви́лася еси́,/ е́юже ми́ру Бог бесе́дова, просвеща́я ве́рою зову́щия:/ благослове́н, Пречи́стая, Плод чре́ва Твоего́.
Песнь 8
Ирмо́с: О́троки благочести́выя в пещи́/ Рождество́ Богоро́дичо спасло́ есть./ Тогда́ у́бо образу́емое,/ ны́не же де́йствуемое,/ вселе́нную всю воздвиза́ет пе́ти Тебе́:/ Го́спода по́йте, дела́,/ и превозноси́те Его́ во вся веки.
Словесы́ твои́ми наставля́ема ча́да твоя́, святи́телю,/ от тьмы и́дольския к све́ту Богоразу́мия преше́дше,/ единогла́сно Христу́ вопие́м:/ благослови́те, вся дела́ Госпо́дня, Го́спода и превозноси́те Его́ во ве́ки.
Свет трисо́лнечныя Тро́ицы, всели́вся в Боже́ственное твое́ се́рдце,/ лю́ди вся просвети́ святы́м креще́нием и научи́ Творцу́ Изба́вителю вопи́ти:/ благослови́те, вся дела́ Госпо́дня, Го́спода и превозноси́те Его́ во ве́ки.
Богоро́дичен: Усты́ и ра́зумом Богоро́дицу Тя му́дрствующе, песносло́вим Тя, Пренепоро́чная:/ родила́ бо еси́, Пречи́стая, пло́тию обложе́на Бо́га и Го́спода./ Тем Тя, Де́во, пое́м и превозно́сим во ве́ки.
Ин Ирмос: Царя́ Небе́снаго,/ Его́же пою́т во́и А́нгельстии,/ хвали́те и превозноси́те во вся ве́ки.
Я́коже не́кий хра́брый воево́да яви́лся еси́, преблаже́нне, и́дольския хра́мы искореня́я,/ и, лю́ди от тех пре́лести изба́вив,/ научи́л еси́ от ду́ши Христу́ вопи́ти: благослови́те, вся дела́, Го́спода и превозноси́те Его́ во ве́ки.
Во глубину́ Ду́ха Свята́го прини́кнув, ра́зум Боже́ственный отту́ду поче́рпл еси́./ Те́мже и Це́рковь правосла́вием обогати́л еси́/ Творцу́ Изба́вителю вопи́ти:/ благослови́те, вся дела́, Го́спода и превозноси́те Его́ во ве́ки.
Во Христо́во посо́бие обо́лкся, лука́выя бе́сы от челове́к отгна́л еси́./ Тем и Небе́сное насле́дие, о́тче, со святи́тели прия́л еси́/ и с ни́ми Христу́ вопие́ши:/ благослови́те, вся дела́, Го́спода и превозноси́те Его́ во ве́ки.
Богоро́дичен: Е́ва у́бо дре́ва живо́тнаго изгна́на бысть, возбраня́ема причаще́ния;/ Ты же, Де́во Богоро́дице, Живо́т ве́чный источи́ла еси́ ми́ру,/ живоно́сное де́йство да́рующий ве́рным.
Песнь 9
Ирмо́с: Всяк земноро́дный/ да взыгра́ется, Ду́хом просвеща́емь,/ да торжеству́ет же Безпло́тных умо́в естество́,/ почита́ющее свяще́нное торжество́ Богома́тере,/ и да вопие́т:/ ра́дуйся, Всеблаже́нная Богоро́дице,/ Чи́стая Присноде́во.
Твои́ми труды́, святи́телю, я́же на земли́, Небе́сный поко́й прия́т,/ иде́же святы́х ли́кове и пра́ведных всесве́тлое торжество́./ Отону́дуже и нас помина́й, па́мять твою́ при́сно сла́вящих.
Ве́чных и нетле́нных улучи́ти жела́я, святи́телю,/ и я́же в ми́ре мня́щихся сла́дких оста́вив, Христу́ после́довал еси́./ Те́мже и ли́ку архиере́йскому сочета́лся еси́, пресла́вне.
Догма́том благоче́стия научи́вася, прему́дре святи́телю,/ апо́столом ревни́тель был еси́ и и́дольскую пре́лесть низложи́л еси́./ Те́мже твою́ па́мять досто́йно ублажа́ем.
Богоро́дичен: Плоть прия́ти восхоте́в, в Тя всели́ся,/ еди́ну святе́йшу всех обре́т Богоро́дицу, вои́стинну яви́ Ма́терь Де́ву.
Ин Ирмо́с: Вои́стинну Богоро́дицу,/ Тя испове́дуем,/ спасе́ннии Тобо́ю, Де́во Чи́стая,/ с Безпло́тными ли́ки Тя велича́юще.
Боже́ственным жела́нием всегда́ подвиза́емь,/ му́дрости и ра́зума извы́к, по апо́столу, люде́й от пре́лести отврати́л еси́,/ и Бо́гу Жи́ву ве́ровати научи́л еси́, святи́телю прехва́льне.
Всем благи́м о́браз дово́лен был еси́,/ к Вы́шнему житию́ веду́щ, смире́нием и кро́тостию./ Те́мже отсю́ду Христо́с па́стыря тя люде́й Свои́х устроя́ет,/ Его́же моли́ спасти́ всех, пою́щих тя.
И́же к Бо́гу жела́нием страсте́й успи́л еси́ воста́ние,/ всено́щным стоя́нием дарова́ния восприя́л еси́/ ви́дети су́щия та́мо неизрече́нныя добро́ты, Стефа́не.
Богоро́дичен: Яви́лася еси́, Де́во, Ма́ти Бо́жия, па́че естества́ ро́ждшая Бо́жие Сло́во,/ Его́же Оте́ц отры́гну пре́жде всех век, я́ко Благ;/ Его́же ны́не и теле́с вы́шше разумева́ем,/ а́ще и в те́ло оде́яся.
Свети́лен свята́го:
Ни челове́ком, ни от челове́к, но от Бо́га избра́ние святи́тельства прии́м,/ и́же пре́жде тьмы сы́ны, ны́не же ча́да и насле́дники Све́та,/ твои́м уче́нием сотвори́л еси́, прему́дре Стефа́не.
Сла́ва, и ны́не, пра́здника.
На хвали́тех стихи́ры, глас 1. Подо́бен: Небе́сных чино́в:
Лю́таго и зла́го пансо́тника су́етное буесло́вие,/ я́ко прему́др, отрази́л еси́,/ и того́, я́ко во́лка, от Христо́ва ста́да отгна́л еси́,/ и лю́ди Бо́жия апо́стольски научи́л еси́./ Те́мже днесь, любому́дренно соше́дшеся,/ честну́ю па́мять твою́ пресла́вно почита́ем, святи́телю.
И́же свы́ше дарова́нным твои́м ра́зумом/ до́бре разсуди́в настоя́щих,/ и к Бо́гу веду́щих жела́ние прие́м,/ и, я́ко еле́нь, на и́сточники водны́я поте́кл еси́:/ и́же дре́вле неве́рием во тьме лежа́щия лю́ди/ креще́нием сы́ны Све́та и насле́дники сотвори́л еси́,/ о ни́хже ны́не, Стефа́не, непреста́нно моли́ся.
Ни сла́вы, ни бога́тства, святи́телю, возжела́в,/ но духо́вное худо́жество взыска́л еси́/ жела́нием, е́же мно́гих собо́ю испра́вити и ко Христу́ привести́,/ е́же и получи́л еси́./ Те́мже до конца́, не оскудева́я, моли́ся Христу́ Бо́гу,/ спасти́ всех, честну́ю па́мять твою́ почита́ющих.
Сла́ва, глас 2:
Прииди́те, ны́не благоче́стно соше́дшеся,/ новопросвеще́ннии свяще́нных собо́ри,/ псалмы́ и хвала́ми досто́йную честь/ я́ко отцу́ и благоде́телю воздаю́ще,/ духо́вне нас креще́нием в пакибытие́ породи́вшему/ и от тьмы на свет произве́дшему,/ возопие́м, глаго́люще:/ Го́споди, моли́твами Твоего́ уго́дника Стефа́на/ спаси́ и уще́дри всех,/ благоче́стно от души́ пою́щих Тя.
И ны́не, пра́здника.
Славосло́вие вели́кое. И час 1-й. И отпу́ст.
НА ЛИТУРГИ́И
Блаже́нны 1-го кано́на песнь 3-я, на 4, и 2-го кано́на песнь 6-я, на 4. Проки́мен, глас 1: Уста́ моя