Служба Успению Божией Матери




 

На Господи воззвах: стихи́ры, гла́с 1:

О ди́вное чу́до! / исто́чник жи́зни во гро́бе полага́ется, / и ле́ствица к Небеси́ гро́б быва́ет: / весели́ся, Гефсима́ние, / Богоро́дичен святы́й до́ме. / Возопие́м, ве́рнии, / Гаврии́ла иму́ще чинонача́льника: / Благода́тная, ра́дуйся, с тобо́ю Госпо́дь, // подая́й ми́рови Тобо́ю ве́лию ми́лость.

Ди́вны твоя́ та́йны, Богоро́дице: / Вы́шняго престо́л яви́лася еси́, Влады́чице, / и от земли́ к Небеси́ преста́вилася еси́ дне́сь. / Сла́ва Твоя́ Боголе́пная, / Богоподо́бными сия́ющи чудесы́. / Де́вы с Ма́терию Царе́вою на высоту́ вознеси́теся. / Благода́тная, ра́дуйся, с Тобо́ю Госпо́дь, // подая́й ми́рови Тобо́ю ве́лию ми́лость.

Твое́ сла́вят успе́ние / вла́сти и престо́ли, нача́ла и Госпо́дьства, / си́лы и херуви́ми и стра́шнии серафи́ми, / ра́дуются земноро́днии, о Боже́ственней Твое́й сла́ве крася́щеся. / Припа́дают людие, со арха́нгелы и а́нгелы, и воспева́ют: / Благода́тная, ра́дуйся, с Тобо́ю Госпо́дь, // подая́й ми́рови Тобо́ю ве́лию ми́лость.

 

Ины стихи́ры, гла́с 1. Подо́бен: Небе́сных чино́в:

 

Безсме́ртному успе́нию Бо́жия Ма́тере / а́нгельский собо́р ра́дуется: / Сия́ же отходя́щи, / во оби́тели ве́чныя вселя́ется, / и к весе́лию Небе́сному преходит, / в Боже́ственную ра́дость // и ве́чное наслажде́ние.

 

Жи́зни вы́шния жела́ющи, / сию́ оста́вила еси́, / Богороди́тельнице Отрокови́це, де́вства цве́те, / Христа́ ро́ждшая, все́х Живота́: / благогове́йно предстоя́ше ангельский собо́р // честно́му Твоему́ погребе́нию, Богоневе́стная.

Твои́м исхо́дным пе́нием и надгро́бным / возду́х у́бо освяти́ся, / восхожде́нием Твои́м, Ма́ти Бо́га Человеколю́бца: / чу́до стра́шное, Богоро́дице неискусому́жная. / Те́мже ве́рно покланя́емтися ве́рнии, // Богоро́дице неискусобра́чная.

 

Сла́ва, и ны́не, гла́с 6:

 

Прииди́те, всеми́рное успе́ние всенепоро́чныя Богоро́дицы пра́зднуем: / дне́сь бо а́нгели торжеству́ют честно́е преставле́ние Бо́жия Ма́тере / и к весе́лию на́с земны́х призыва́ют, / вопи́ти немо́лчным гла́сом: / ра́дуйся, преста́вльшаяся от земли́ и к Небе́сным оби́телем пресе́льшаяся: / ра́дуйся, упова́ние и спасе́ние на́ше: // Тя́ бо Христиа́нский ро́д непреста́нно ублажа́ет.

 

На литии стихира, гла́с 2: Анато́лиево:

 

Яже Небе́с вы́сшая су́щи, / и херуви́м сла́внейшая, / и всея́ тва́ри честне́йшая, / я́же премно́гия ра́ди чистоты́ / присносу́щнаго существа́ прия́телище бы́вши, / в Сыно́вне ру́це дне́сь всесвяту́ю предае́т ду́шу: / Еюже исполня́ется вся́ческая ра́дость, // и на́м да́руется ве́лия ми́лость.

Дави́дскую пе́снь дне́сь лю́дие воспое́м Христу́ Бо́гу: / приведу́тся, рече́, царю́ де́вы в сле́д ея́, / и и́скренняя ея́ приведу́тся в весе́лии и ра́довании. / Ибо от се́мене Дави́дова, / Ея́же ра́ди мы́ обожи́хомся, / в ру́це Своего́ Сы́на и Влады́ки, / сла́вно и па́че сло́ва прелага́ется, / Юже я́ко Ма́терь Бо́жию воспева́юще, вопие́м и глаго́лем: / спаси́ на́с, испове́дающих Тя́ Богоро́дицу, от вся́каго обстоя́ния, // и изба́ви от бе́д ду́ши на́ша.

Всечестно́е Твое́ успе́ние, / пресвята́я Де́во Чи́стая, / а́нгел мно́жество на Небеси́, / и челове́ческий ро́д на земли́ ублажа́ем, / я́ко Ма́ти была́ еси́ Творца́ все́х Христа́ Бо́га: / Того́ моля́щи не преста́й о на́с, мо́лимся, / и́же на Тя́ с Богом упова́ние поло́жших, // Богоро́дице всепе́тая, и неискусобра́чная.

 

Слава и ныне, глас тойже: Иоа́нново:

 

Всенепоро́чная неве́ста и Ма́ти, / благоволе́ние Отчее, / я́же Бо́гу пронарече́нная / во Свое́ Ему́ жили́ще несли́тнаго соедине́ния, / дне́сь пречи́стую ду́шу Творцу́ и Бо́гу предае́т, / ю́же безпло́тных си́лы боголе́пно подъе́млют, / и к животу́ преставля́ется су́щая Ма́ти Живота́, / свеща́ непристу́пнаго све́та, // спасе́ние ве́рных и упова́ние ду́ш на́ших.

 

На стихо́вне стихи́ры, гла́с 6. Подо́бен: Тридне́вен:

 

Глаго́лом Боже́ственнаго Гаврии́ла после́дующе, / ра́дуйся, Тебе́ зове́м, Чи́стая. / Ты́ у́бо, Пресвята́я и Ма́ти Госпо́дня, / к Сему́ преста́вльшися, // помина́й о воспева́ющих Тя́.

 

Сти́х:Воскресни́, Го́споди, в поко́й Тво́й, Ты́, и киво́т святы́ни Твоея́.

Неизме́рная прему́дрость Бо́жия / хра́м Себе́ па́че ума́, Богоро́дице, созда́ / из Тебе́ Ду́хом Святы́м: / и ны́не Тя́ к невеще́ственным селе́нием // преста́ви, Всепе́тая.

Сти́х: Кля́тся Госпо́дь Дави́ду и́стиною, и не отве́ржется ея́.

Се, ны́не прихожду́ к Тебе́, / Ма́тери все́х Бо́га, / от вся́ческих изба́витися напа́стей моля́ся. / Но, о Богороди́тельнице, / ца́рствующи с Сы́ном Твои́м, // христиа́нский ро́д сохраня́й.

Слава и ныне, глас тойже:

 

Прииди́те, воспое́м лю́дие, / пресвяту́ю Де́ву Чи́стую, / из Нея́же неизрече́нно про́йде / вопло́щшееся Сло́во Отчее, / зову́ще и глаго́люще: / бла́гослове́на Ты́ в жена́х, / блаже́нное чре́во, вмести́вшее Христа́. / Того́ святы́м рука́м ду́шу преда́вши, // моли́ся, Пречи́стая, спасти́ся душа́м на́шим.

 

Тропарь, глас 1:

В рождестве́ де́вство сохрани́ла еси́, / во успе́нии ми́ра не оста́вила еси́, Богоро́дице, / преста́вилася еси́ к животу́, Ма́ти су́щи Живота́: // и моли́твами Твои́ми избавля́еши от сме́рти ду́ши на́ша.

 

По 1-й стихоло́гии седа́лен, гла́с 3. Подо́бен: Красоте́ де́вства:

В рождестве́ Твое́м зача́тие безсе́менное, / во успе́нии Твое́м ме́ртвость нетле́нная, / чу́до в чудеси́ сугу́бо стече́тся, Богоро́дице: / ка́ко бо неискусому́жная, младопита́тельница чиста́ су́щи? / ка́ко же Ма́ти Бо́гу мертвоно́сна мироуха́ющи? / Те́мже со а́нгелом вопие́м ти́: // ра́дуйся, Благода́тная.

Сла́ва и ны́не, то́йже.

 

По 2-й стихоло́гии седа́лен, гла́с 3. Подо́бен: Красоте́ де́вства:

 

В Небе́сная мы́сленная Твоя́ душа́, / в ра́й чи́стое Твое́ те́ло преста́вися, / от тли́, Пренепоро́чная, в ме́сто све́тло: /честь бо Тебе подобает, яко Матери всех Бога. // Те́мже вопие́м Ти: ра́дуйся, Благода́тная.

Сла́ва и ны́не, то́йже.

По полиеле́и седа́лен, гла́с 4. Подо́бен: Удиви́ся Ио́сиф:

 

Возопи́й, Дави́де: что́ се́й пра́здник, / его́же воспе́л еси́ дре́вле в кни́зе псало́мстей? / я́ко дще́рь Богоотрокови́цу и Де́ву / преложи́ на о́ны оби́тели Христо́с, / Иже из Нея́ без се́мене ро́ждся. / Сего́ ра́ди ра́дуются ма́тери и дще́ри, и неве́сты Христо́вы, вопию́ще: // ра́дуйся, преста́вившаяся к вы́шнему ца́рствию.

 

Степе́нна, 1-й антифо́н 4-го гла́са.

Проки́мен, гла́с 4: Помяну́ и́мя Твое́ / во вся́ком ро́де и ро́де. Сти́х: Слы́ши, Дщи́, и ви́ждь, и приклони́ у́хо Твое́.

Вся́кое дыха́ние:Ева́нгелие от Луки́, зача́ло 4.

 

 

По Евангелии стихира, глас 6:

 

Дави́дскую пе́снь дне́сь лю́дие воспое́м Христу́ Бо́гу: / приведу́тся, рече́, царю́ де́вы во сле́д ея́, / и и́скренния ея́ приведу́тся в весе́лии и ра́довании. / Ибо от се́мене Дави́дова / Ея́же ра́ди мы́ обожи́хомся / в ру́це Своего́ Сы́на и Влады́ки / сла́вно и па́че сло́ва прелага́ется. / Юже я́ко Ма́терь Бо́жию воспева́юще, / вопие́м и глаго́лем: / спаси́ на́с, испове́дающих Тя́ Богоро́дицу, от вся́каго обстоя́ния, // и изба́ви от бе́д ду́ши на́ша.

 

Пе́снь 1, ирмо́с, гла́с 1:

 

Преукраше́нная Боже́ственною сла́вою, / свяще́нная и сла́вная, Де́во, па́мять твоя́ / вся́ собра́ к весе́лию ве́рныя, / начина́ющей Мариа́ме, / с ли́ки и тимпа́ны, / Твоему́ пою́щия Единоро́дному: // сла́вно я́ко просла́вися.

Да провожда́ют невеще́ственнии чи́нове / небоше́ственное в Сио́н Боже́ственное те́ло Твое́: / с ни́миже, Чи́стая, // Твою́ честну́ю, Де́во, па́мять сла́вим.

Побе́дныя по́чести взяла́ еси́ на естество́, Чи́стая, Бо́га ро́ждши: / оба́че же подо́бящися Творцу́ Твоему́ и Сы́ну, / па́че естества́ повину́ешися есте́ственным зако́ном: / те́мже уме́рши, с Сы́ном востае́ши ве́чнующи.

Слава: Де́вы отрокови́цы с Мариами́ею проро́чицею / пе́снь исхо́дную ны́не воскли́кните: / Де́ва бо и еди́на Богома́ти // ко прия́тию Небе́сному преставля́ется.

И ныне: Досто́йно я́ко одушевле́нное Тя́ Не́бо / прия́ша Небе́сная, Пречи́стая, Боже́ственная селе́ния: / и предста́ све́тло укра́шена, // я́ко Неве́ста всенепоро́чная, Царю́ и Бо́гу.

Катавасия, глас 4:

Отве́рзу уста́ моя́, / и напо́лнятся Ду́ха, / и сло́во отры́гну Цари́це Ма́тери, / и явлю́ся, све́тло торжеству́я, // и воспою́ ра́дуяся Тоя́ успе́ние.

 

Пе́снь 3, ирмо́с:

 

Соде́тельная и содержи́тельная все́х / Бо́жия му́дросте и си́ло, / непрекло́нну, недви́жиму це́рковь утверди́, Христе́: / еди́н бо еси́ свя́т, // во святы́х почива́яй.

Жену́ Тя ме́ртвенну, / но па́че естества́ и Ма́терь Бо́жию ви́дящии, Всенепоро́чная, / Апостол Иоанн и иже с ним / ужа́сно прикаса́хуся рука́ми сла́вою облиста́ющей, // я́ко Богоприя́тное селе́ние ви́дяще.

Взя́шася две́ри Небе́сныя, / и а́нгели воспе́ша, / и прия́т Христо́с де́вства Своея́ Ма́тере сосу́д: / Херуви́ми подъя́ша Тя́ с весе́лием, // Серафи́ми же сла́вят ра́дующеся.

Слава: От ме́ртвых чре́сл произве́дшися, / естество́м подо́бна, Чи́стая, / исхожде́ние разреши́: / ро́ждши же су́щую Жи́знь, // к жи́зни преста́вися Боже́ственней и ипоста́сней.

И ныне: Ангел мно́жества свы́ше к Сио́ну идя́ху, / всеси́льным манове́нием, / достодо́лжно, Влады́чице, // Твоему́ погребе́нию служа́ще.

 

Катавасия:

Твоя́ песносло́вцы, Богоро́дице, / живы́й и незави́стный исто́чниче, / ли́к себе́ совоку́пльшия, духо́вно утверди́, / в Бо́же́ственней па́мяти Твое́й // венце́в сла́вы сподо́би.

 

Ипакои́, гла́с 8:

 

Блажи́м Тя́ вси́ ро́ди, Богоро́дице Де́во, / в Тя́ бо невмести́мый Христо́с Бо́г на́ш вмести́тися благоволи́. / Блаже́ни есмы́ и мы́, предста́тельство Тя́ иму́ще: / де́нь бо и но́щь мо́лишися о на́с. / Те́м воспева́юще вопие́м Ти́: // ра́дуйся, Благода́тная, Госпо́дь с Тобо́ю.

Пе́снь 4, ирмо́с:

 

Ре́чи проро́ков и гада́ния / воплоще́ние прояви́ша от Де́вы Твое́, Христе́: / сия́ние блиста́ния Твоего́ во све́т язы́ков изы́дет, / и возгласи́т Тебе́ бе́здна с весе́лием: // си́ле Твое́й сла́ва, Человеколю́бче.

Ви́дите лю́дие и чуди́теся: / гора́ бо свята́я, и я́вственная Бо́гу, / в Небе́сныя оби́тели превы́шше взе́млется, // Не́бо земно́е в Небе́сное и нетле́нное селе́ние вселя́емо.

Жи́зни присносу́щныя и лу́чшия / сме́рть Твоя́ бы́сть прехожде́ние, Чи́стая, / от привре́менныя к Боже́ственней вои́стинну и непреходи́мей, / преставля́я Тя́, Чи́стая, // в весе́лии Сы́на зре́ти Твоего́ и Го́спода.

Слава: Чу́до бя́ше зре́ти, / Не́бо все́х Царя́ одушевле́нное / недра преходя́щу земна́я, / я́ко чу́дна дела́ Твоя́: // сла́ва си́ле Твое́й, Го́споди.

И ныне: А́ще и непости́жный Сея́ пло́д, / и́мже Небеса́ бы́ша, / погребе́ние прия́т во́лею, я́ко ме́ртв: / ка́ко погребе́ния отве́ржется, // неискусобра́чно ро́ждшая?

Катавасия:

Неизсле́дный Бо́жий сове́т, / е́же от Де́вы воплоще́ния / Тебе́ Вы́шняго,/ проро́к Авваку́м усмотря́я, зовя́ше: // сла́ва си́ле Твое́й, Го́споди.

Пе́снь 5, ирмо́с:

 

Бо́жию и неизрече́нную добро́ту / доброде́телей Твои́х, Христе́, испове́м: / от присносу́щныя бо сла́вы / соприсносу́щное и ипоста́сное возсия́вый сия́ние, / из де́вственныя утро́бы, / су́щим во тме́ и се́ни, вопло́щся, // возсия́л еси́ со́лнце.

Тру́б Богоприя́тнии язы́цы Богосло́вных муже́й / благогла́снейше Богоро́дице вопия́ху, / исхо́дную возглаша́юще пе́снь Ду́хом: / ра́дуйся, нетле́нный исто́чниче // Бо́жия живонача́льнаго и спаси́тельнаго все́м воплоще́ния.

В преставле́нии Твое́м, Ма́ти Бо́жия, / простра́ннейшее те́ло Твое́ и Богоприя́тное, / а́нгельская во́инства свяще́нными кри́лы, // тре́петом и ра́достию покрыва́ху.

Слава: Да возглася́т трубы́ Богосло́вов дне́сь: / язы́к же многовеща́нный челове́ческий ны́не да восхва́лит: / да огласи́т же возду́х, безме́рным сия́я све́том: // а́нгели да пою́т пречи́стыя Де́вы успе́ние.

И ныне: Сосу́д подоба́ше избра́нный, / пе́нием Ти́ ве́сь удивля́емь, Деви́це, исхо́ден, / ве́сь освяще́н Бо́гови, все́м Богоприя́тен, // и се́й и́стинно явля́емый, Богоро́дице всепе́тая.

 

Катавасия:

Ужасо́шася вся́ческая / о честне́м успе́нии Твое́м: / Ты́ бо, неискусобра́чная Де́во, / от земли́ преста́вилася еси́ к ве́чным оби́телем, / и к безконе́чней жи́зни, / все́м воспева́ющим Тя́ // спасе́ние подава́ющая.

 

 

Пе́снь 6, ирмо́с:

 

Морски́й пучиноро́дный ки́тов вну́тренний о́гнь, / тридне́внаго Твоего́ погребе́ния проображе́ние, / его́же Ио́на проро́к показа́ся: / спасе́н бо я́ко и предпосла́ся неврежде́н вопия́ше: // пожру́ Ти со гла́сом хвале́ния, Го́споди.

Дае́т Тебе́, И́же превы́ше естества́, Ца́рь все́х Бо́г: / в рождестве́ бо Де́ву я́коже сохрани́, / та́ко во гро́бе те́ло соблюде́ нетле́нно, / и спросла́ви Боже́ственным преставле́нием, // че́сть Тебе́ я́ко Сы́н Ма́тери да́руя.

Вои́стинну Тя́ я́ко све́тел све́щник невеще́ственнаго све́та, / кади́льницу злату́ю Боже́ственнаго у́гля, / во свята́я святы́х всели́: / ру́чку и же́зл, скрижа́ль Богопи́санную, / ковче́г святы́й, трапе́зу сло́ва жи́зни, // Де́во, Рождество́ Твое́.

Слава: Из Тебе́ жи́знь возсия́, / ключи́ де́вства не руши́вши: / ка́ко у́бо пречи́стое и живонача́льное Твое́ те́ло // искуше́ния сме́рти бы́сть прича́стно?

И ныне: Жи́зни бы́вши хра́м, / жи́знь присносу́щную улучи́ла еси́: сме́ртию бо к животу́ премину́ла еси́, // я́же Жи́знь ро́ждши воипоста́сную.

 

Катавасия:

Боже́ственное сие́ и всечестно́е / соверша́юще пра́зднество, / Богому́дрии, Богома́тере, / прииди́те, рука́ми воспле́щим, // от Нея́ ро́ждшагося Бо́га сла́вим.

 

Конда́к, гла́с 2:

 

В моли́твах неусыпа́ющую Богоро́дицу / и в предста́тельствах непрело́жное упова́ние, / гро́б и умерщвле́ние не удержа́ста: / я́коже бо Живота́ Ма́терь, / к животу́ преста́ви, // во утро́бу Всели́выйся присноде́вственную.

 

Икос:

Огради́ моя́ помышле́ния, Христе́ мо́й, / и́бо сте́ну ми́ра воспе́ти дерза́ю, / чи́стую Ма́терь Твою́; / на столпе́ глаго́л укрепи́ мя, / и в тя́жких мы́слех заступи́ мя: / Ты́ бо взыва́ющим и прося́щим ве́рою / моле́ния исполня́еши. / Ты́ мне́ у́бо да́руй язы́к прино́сен, и по́мысл непосты́ден: / вся́кое бо дая́ние сия́ния от Тебе́ низпосыла́ется, Светопода́телю, // во утро́бу Всели́выйся присноде́вственную.

 

Пе́снь 7, ирмо́с:

Безсту́дней я́рости же и огню́, / Боже́ственное жела́ние сопротивля́яся, / о́гнь у́бо ороша́ше, / я́рости же смея́шеся, / Богодохнове́нною слове́сною преподо́бных тривеща́нною цевни́цею, / противовеща́я мусики́йским орга́ном посреди́ пла́мене: // препросла́вленный отце́в и на́ш Бо́же, благослове́н еси́.

Всесвяще́нное преставле́ние / Боже́ственныя Твоея́ и нетле́нныя Ма́тере, / преми́рныя вы́шних си́л совокупи́ чи́ны, / весели́тися с су́щими на земли́, Тебе́ пою́щими: // препросла́вленный отце́в и на́ш Бо́же, бла́гослове́н еси́.

В кимва́лех усты́ чи́стыми, / мусики́йски же се́рдцем све́тлым, / доброгла́сною трубо́ю, высо́кою мы́слию, / Де́вы и Чи́стыя в наро́читый избра́нный де́нь преставле́ния, / де́тельными пле́щуще рука́ми, вопие́м: // препросла́вленный отце́в и на́ш Бо́же, бла́гослове́н еси́.

Слава: Богому́дрии собери́теся лю́дие: / Бо́жия бо сла́вы селе́ние / от Сио́на преставля́ется к Небе́сному жили́щу, / иде́же гла́с чи́ст пра́зднующих, / гла́с несказа́ннаго ра́дования, / в весе́лии вопию́щих Христу́: // препросла́вленный отце́в и на́ш Бо́же, бла́гослове́н еси́.

И ныне: Ю́ноши и де́вы, / Де́выя же и Богома́тере па́мять чту́ще, / ста́рцы и мона́си, / ца́рие и судии́, по́йте: // оте́ц на́ших Го́споди и Бо́же, бла́гослове́н еси́.

Катавасия:

Не послужи́ша тва́ри Богому́дрии / па́че Созда́вшаго, / но о́гненное преще́ние му́жески попра́вше, / ра́довахуся пою́ще: // препе́тый отце́в Госпо́дь и Бо́г, благослове́н еси́.

Пе́снь 8, ирмо́с:

 

Пла́мень ороша́ющь преподо́бныя, / злочести́выя же попаля́ющь, / а́нгел Бо́жий всемо́щный, показа́ отроко́м, / живонача́льный же исто́чник соде́ла Богоро́дицу, / тлю́ сме́рти, и живо́т точа́щу пою́щим: / Соде́теля еди́наго пои́м избавле́нии, // и превозно́сим во вся́ ве́ки.

Якоже возде́вши ру́це, / исхо́диши, Всенепоро́чная, / ру́це, и́миже Бо́га носи́ла еси́ пло́тию, / со дерзнове́нием я́ко Ма́ти рекла́ еси́ к Рожде́нному: / я́же Ми́ да́л еси́, во ве́ки сохрани́, вопию́щия Тебе́: // Соде́теля еди́наго пое́м изба́вленнии и превозно́сим во вся́ ве́ки.

Па́мять Твою́, чи́стая Де́во, / нача́ла же и вла́сти и си́лы, / а́нгели, арха́нгели, престо́ли, Госпо́дьства, / херуви́ми сла́вят, и стра́шнии серафи́ми: // челове́ческий же ро́д пое́м и превозно́сим во вся́ ве́ки.

Благословим: И́же стра́нно Всели́выйся, Богоро́дице, в чи́стое чре́во Твое́ воплоща́емь, / всесвяще́нный ду́х Тво́й прие́м, у Себе́ упоко́и, я́ко должни́к Сы́н. // Те́мже Тя́ пое́м, Де́во, и превозно́сим во вся́ ве́ки.

И ныне: О вы́ше ума́ чуде́с Присноде́вы же и Богома́тере! / во гро́б бо все́льшися, показа́ ра́й, / ему́же предстоя́ще дне́сь, ра́дующеся пое́м: // Го́спода по́йте дела́, и превозноси́те Его́ во вся́ ве́ки.

 

Катавасия:

...





Читайте также:
Новые русские слова в современном русском языке и их значения: Менсплейнинг – это когда мужчина что-то объясняет...
Зачем изучать экономику?: Большинство людей работают, чтобы заработать себе на жизнь...
ТЕМА: Оборудование профилактического кабинета: При создании кабинетов профилактики в организованных...
Образование Киргизкой (Казахской) АССР: Предметом изучения Современной истории Казахстана являются ...

Поиск по сайту

©2015-2022 poisk-ru.ru
Все права принадлежать их авторам. Данный сайт не претендует на авторства, а предоставляет бесплатное использование.
Дата создания страницы: 2019-09-09 Нарушение авторских прав и Нарушение персональных данных


Поиск по сайту:


Мы поможем в написании ваших работ!
Обратная связь
0.039 с.