ФАДЕЕВ
ТИМОФЕЙ ПАВЛОВИЧ
(1937-1992)
КОМИÖН
ГИЖÖМЫС
© Piratical edition ©
PARMA 2006
ПЫТШКÖС
ВИСЬТТЭЗ. 5
ЛОВЬЯ ЦВЕТТЭЗ. 5
МЕДОДЗЗА ПАНТАСЬÖМ... 8
СЕМЬЯЛÖН СУДЬБА.. 12
АСЪЯ ЮГЫТЛÖ ПАНЫТ. 19
СЬЫЛАНКЫВ.. 26
ПРОШИНАЫН ТУЛЫС.. 29
ПОЧКАЭЗ ОССЬÖНЫ... 38
АКАННЕЗ. 44
ТÖДIСЬ. 46
СЮРОМКА ГУСЯЛIСÖ.. 49
МЫВКЫД.. 52
ОЛÖМ ЛУН.. 61
НОРМА ПОНДА (1991) 76
ТУПÖССЕЗ. 86
«ПРИКАШАЙТЧИС». 93
ЛЁХА.. 97
ЛЁКЬЯЙ.. 112
ПОВЕСТТЕЗ. 128
ГАЖА ГРИВА.. 128
ПРОШИНАЫН ТУЛЫС (1987) 157
БИЛА.. 174
АДЗЗИСЬЛЫТÖДЗ, МАРИНА! 239
ЫДЖЫТ ВАЭЗ КОСТА.. 305
РОМАННЭЗ. 362
ТУЙВЕЖЖЕЗ (ЧАСТЬ ПЕРВÖЙ) 362
ЫБШАР. 391
ОРСÖТАННЭЗ. 572
ГОРАДЗУЛЬ. 572
ОРÖМЫС ОЗ ЙИТСЬЫ... 602
«КУРОРТ». 608
ОРССИС.. 615
РЕПЕТИЦИЯ.. 622
РЕЦЕПТ, ИЛИ КОЛÖ ВÖРÖТЧЫНЫ... 629
ПЕРЕСТРОЙКА ЖÖ.. 640
МИРИТЧÖМ... 649
КЫВБУРРЕЗ. 657
МАМÖЛÖ.. 657
* Ме тэнö эг пантавлы *. 659
МЕ ЛЮБИТÖМСЯНЬ ТЭ ОН МУН.. 660
* Кыдз бытьтö тэнат *. 661
* Ась увгис тöв *. 662
* Кытшöм жö тэныт *. 663
* Некин оз тöд *. 664
* Сибöтчас ар *. 665
* Ме кывза *. 666
ЧЕЛЯДЬЛÖ.. 667
ВАШИЛЬ. 667
КЫК КОКА, А ОЗ ОСЬКАВ.. 669
УДЖЫС ВЕСЬКÖТÖ.. 670
РУЧ ДА КÖЧ.. 672
БИЧИРОК.. 674
КЫР. 675
ЁЖ... 676
СЮЗЬ. 677
БЫДЫС АС МЕСТЫН.. 678
БАБЫВКÖТ ТÖВЙÖМ... 680
ВОВАЛÖН СЬÖДКАЙ.. 682
КОЛАНА ГАГ. 684
УРОК.. 686
ВОТ И ЧОЖ! 687
ЛОЛАЛАН ШОР.. 689
МЕ ОЛАНIСЬ. 691
ЛОЛАЛАН ШОР. 704
ЛОВЬЯ ЛЫМ... 708
ÖШАЛАН ВÖР. 710
ДИВО-КЛЮЧ.. 711
ЛЫМ ДА ЦВЕТ. 715
ПЕЛЬКЫТША КРАН.. 718
ГОЖУМ ШÖРНАС.. 719
ЕНÖЖ КАРТИНАЭЗ. 721
СТОЛББЕЗ ОРСÖНЫ... 724
ТУЛЫСЛÖН СЛЕДДЭЗ. 726
ÖМИДЗРÖМА ГОВК.. 727
ШЕР БÖРСЯНЬ. 729
ВЕСÖТЧИСЬ. 733
ЛЯГУШКАЛÖН ТÖВЙÖМ... 735
ПОВТÖМ ДЗÖДЗЫВ.. 737
«СМЕРТЬКÖТ» ПАНТАСЬÖМ... 739
КÖДЗЫВ ТУЙЕЗ. 742
КÖДЗЫВВЕЗ. 744
СЭТÖРЛÖН КÖР. 748
ÖМИДЗ. 753
ГАГПЫЖЬЯН.. 757
СЮРА БАБЫВ.. 760
ВЫНСÖ НЕ ОДЗÖСТНЫ... 762
СЬÖДКАЙ.. 764
ГОГОЛЬ-ШОГОЛЬ. 769
ЧАВКАННЭЗ. 771
ЧÖСМАСИССЕЗ. 773
КОРИСЬ. 774
ЮССЕЗ. 776
КЫТШÖМ МИЯН БАДЬÖГ. 780
МЕНАМ ЫБШАР. 782
ХИЩНИК-КАЙ.. 785
СÖСТÖМ ЧОЧКОМ БОКА.. 787
СЕРА ГОРА КАЙ.. 790
ТÖВСЯ КУПАЙТЧÖМ... 793
ТШАКЬЯЛIСЬ УР. 795
ВÖРМÖССЭЗ. 797
ВÖРПИ.. 800
СIДЗКÖ, ЛОВЬЯ.. 803
ВЕЛЬМÖМ КÖЧ.. 805
ПÖРИСЬ КАНЬ. 808
УРКАНЬ. 816
МЫЛА.. 820
СЬÖДПЕЛЬ. 822
ПИЯНА ОШ... 825
ЯГÖДАЛIСЬ МÖССЭЗ. 828
ВАРЕННЁ КÖР. 831
МЫРТШАККЕЗ. 832
ОЛЬТШАККЕЗ. 834
ГОРТТШАК.. 836
ЧÖСКЫТ ТШАК.. 838
ТШАК-ПУШКА.. 840
КЫДЗТШАК (БИТШАК) 843
ГÖНАГАГ. 845
МЕДЧÖСКЫТ ЯГÖД.. 847
КЫТIСЬ ЛОИС ИРГА?. 849
ВИЛЬ ЯГÖД.. 852
ЛЫСПУ.. 855
ГÖРД ЛЬÖМПУ.. 857
БЕЛЬПУ.. 858
МОНГОЛЬСКÖЙ ГÖСЬ. 860
МАНЬЧЖУРСКÖЙ ОРЕХ.. 861
ЗÖРТУСЬПУ.. 863
ЛЫМЬЯГÖД.. 866
ТУРИГУМ... 869
ЛЬÖМПУ ДА ТАГ. 871
МЫРРЕЗ ГОРОДЫН.. 875
МЕДБАСÖК КЛЁН.. 878
ВИШНЯ.. 881
СТАТЬЯЭЗ. 882
КЫК ПОСТУПОК ЙЫЛIСЬ. 882
«ШАПКА ПОЖУМ» ПОВЕСТЬ ЙЫЛIСЬ. 885
ПИТЮ ÖНЬÖ ДА М. ЛИХАЧЁВ ЙЫЛIСЬ. 890
ÖШМÖССЭЗ: 903
ВИСЬТТЭЗ
ЛОВЬЯ ЦВЕТТЭЗ
(Гора му, 1963)
Миян районын эм вöр посёлок Мурат. Не öтiк год менам оланiсь чулалiс эта гажа посёлокын. Öнi эшö син одзын сiя керкуыс, кöдаын ми олiм ёртöкöт, Серёжакöт. Вот сыкöт и петiс история, кöда йылiсь лöсьöтча ме висьтасьны.
Серёжа — неыджыт, веськыт мыгöра, топыт, кыдз шусьö отир коласын, мусянь тальöм, ён пельпона зонка. Сы кузьмöса чужöм вылын медодз позьö казявны горба кодь ныр. Синнэс сэтшöм жö сьöдöсь, кыдз бöрлань сыналöм юрсиыс.
Леспромхозын Серёжа уджалö трактор вылын, и уджалö не умöля. Эта йылiсь вермасö висьтавны не öтiк почётнöй грамота, кöдна öшалiсö сы койка весьтын. И пызан вылын басöк вежкодь рöма будильник — тожö награда. И Серёжалöн бригада, кöда шусьö коммунистическöйöн, тожö баитö бур удж йылiсь.
Олiм ми Серёжакöт öтлаын, вердчим, кыдз баитсьö, öтiк кусöкöн. Миян квартираын вöлi быдöс, мый колiс олöм понда: емсянь и ыджыт, чуть ли не морт сувда зеркалоöдз, кöда сулалiс койкаэз коласын. Но мукöдпырся миянлö кажитчис, что мыйкö оз тырмы, а мый — тöдны эг вермö. Сiдз и кыссис кадыс.
Вот и тулыс сибöтчис. Луншöр пора гажöна югьялiс шондi, сылiс лым. Эта кадö ёртöкöт лоис мыйкö невежöртана: сiя син одзын вежсис. Серёжа вöвлi то гажа, то кымöра. Быд рытö удж бöрын Серёжа босьтлiс койка весьтын öшалан гитара. И орслiс кö мыйкö гажаö, шуам, частушкаэз, — сiдз и тöд: сьöлöм вылас кокнит. А вöлi кö настроеннёыс, кыдз шуöны «лапша», то струнаэс горалiсö-горзiсö, а ачыс Серёжа нюжвыла, джынголосöн мыйкö сьылiс. Эта коста чужöмыс сылöн вöвлi гажтöм, синнэс видзöтiсö öтiк точкаö, а думаэс лэбалiсö кытöнкö ылын-ылын. И вöвлi кö Серёжа мыйсянькö лöг, сiя некöр эз орс не эз сьыв. Тулыснас шогыс да гажыс ёртöлöн пондiс тöдчыны эшö буржыка. Сэтчö жö Серёжа часто сёрöн пондiс вовлыны гортö.
Öтпыр рытнас Серёжа некытчö эз мун. Сiя вельдыр пукалiс öлöдзас гитараöн и орсiс мыйкö сьöлöм вöрзьöтанаö. Сыбöрын гитарасö öшöтiс аслас местаö да сибöтчис ме дынö.
— Кывзы, а мыля миян абу цветтэз? — юалiс сiя.
— Местаыс, натьтö, миян ны понда абу, — шуи ме недыр думайтыштöм бöрын.
— Мыля нö абу? Вон тай кык тумбочка простöн сулалöны. Позьö ны вылö сувтöтны.
— Позьö, — видзи ме ответ.
— Кывзы, а кытiсь позьö ашын кежö адззыны ловья цветтэз? — бöра юалiс ёртö.
Этö вопроссö ме лыдди лишньöйöн и лöгаси:
— Тэ мый, бöбсялiн я мый я? Кытiсь нiйö, кöр лымыс эз на досповна сыв?
Öбидитчыны ме вылö Серёжа эз и думайт. Сiя пуктiс пельпон вылам ён кисö да шуис:
— Тэ любитiн кöркö?
Дак вот мыйын делоыс? Быдöс вежöртана! Меным стыд лоис. И ме кылi, кыдз этасянь пондiсö гöрдöтны рожабаннэзö да пеллезö. Стыд лоис сысянь, что ме некыдз эг вежöрт ассим ёртöс и шуи сiйö бöбсялöмöн.
— Дак любитiн али эн? — мöдпырся юалiс ёртö.
— Любитi учöтсянь... — шуи ме и казялi, кыдз Серёжа барöтiс синнэсö, да вöлись содтi: — кöдзыт йöлöн сёйны рудзöговöй нянь.
— Да но тэнö! Ме былись юала, а сiя ылöтчö...
Да, ме сiйö вежöртi. Сэсся эг ни понды юасьны, мыйлö колiсö ловья цветтэс, и эг думайт, что сiя бöбсялöм. Но кытiсь адззыны ловья цветтэсö? А нiя колiсö, колiсö кыдз рудзöговöй небыт нянь да кöдзыт йöв челядь кад коста. Ныын Серёжа понда вöлi, но, шуам, не быдöс кö олан, то сыись öддьöн уна. И сiйöн ми пуксим пызан сайö да пондiм думайтны. Дыр пукалiм и думайтiм, нельки юр пондiс висьны, а бурсö нем эгö адззö.
Матiсь вöр сайö саясис ни шондi. Тöдчöмöн пондiс сайкавны ру. Лöньсис машинаэзлöн лунся шум. И только шоррезлöн больгöмыс эз думайт лöньсьыны, а пондiс кывны эшö горöнжык. Ох, кытшöм бур эта кадö руыс, сiдз и кыскö öтöрö! Ми Серёжакöт петiм да пуксим посöдзö. Тасянь бура тыдалiс Коса ю. Сiя медбöрья луннэзö петiс аслас береггезiсь. Видззез кузя, кöдна неважын эшö вöлiсö лым увтын, öнi визывтiс конечтöм ва. Вылынжык местаэзас лым эз ни вöв. Руд пятноэзöн нiя тыдалiсö то öтiклаын, то мöдiклаын. И эна островоккез вылö видзöтiкö юрö пырис колана дума.
— Лымдорчача, лымдорчача! — ыкöстi ме радувья да сэтшöм горöн, что Серёжа нельки повзьыштiс, а говкыс паськалiс, натьтö, омöн посёлокöттяс.
— Былись эд, — шуис Серёжа. — Мунам часöт жö.
Ме пыкси, но ёртö сётаки кыскис менö, и мийö иньдöтчим матiсьжык кушин вылö. Эстöн лымдорчачаэс эзö вöлö. Мунiм мöдiлаö, куимöтлаö — абу. Кытöнкö ылын посёлок дынсянь, может, и эмöсь нiя, но татöн, вöр коласын, сё куйлiс лым.
— А тöдан мый? — шуи сэк ме. — Нiя эмöсь ю сайын, мыс вылас. Но радуйтчыны вöлi одз. Эд юыс омöн вöлi сэтшöм паськыт — синöн он судзöт А пыж миян эз вöв.
— Эта абу беда. Пыжсö адззыны кокнитжык, — шуис Серёжа да содтiс — Мунам узьны. Ашын мыйкö арталамö.
Ох, том олан, том олан! Мыйсö оз кер любитöмыс, кытчö мортсö оз иньды!.
Ашынас удж вывсянь ме сёрöн локтi. Серёжа гортын эз вöв. Пызан вылын куйлiс неыджыт гижöт, сэтöн тэрмасьöмöн вöлiсö кырлалöмöсь кык кыв: «Мунi цветтэзла».
«Адззан я, ваян я тэ нiйö?» — думайтыштi ме гижöтокыс вылö видзöттöн. И неужели эна лымдорчачаэзтöг оз позь овны, оз позь радейтны? Тыдалö, оз позь. А то бы Серёжа эз кошшы нiйö, эз öшты весись кадсö. Ме босьтi книга да пукси пызан сайö. А кöр бергöтi медбöрья лист да дзарнитi часы вылö, вöлi öкмысöт час. Кад ни Серёжалö бертны, а сiя сё абу. Петалi посöдзö видзöтны, но матын некин эз тыдав, только Коса ю шоччисьтöг нöбöтiс ассис васö. Час бöртi ме тэрмасьöмöн мунi ю дорö, Но кытчö мунны? Лэдзчи лажмытiнö, кытöн сьöд видзисö кер бунттэз.
Кытöнкö горöн сьылiсö нывкаэз, орсiс баян. Сьылан горыс паськалiс ю вевдöрöт, саймöтiс лöньсьöм парма шöрсö. Ме ветлöтi джынысви вöтьöм штабеллез дынöт и сё видзöтлi мöд ладорас, ю саяс.
Юыс, кöда гожумнас öддьöн ни эд гажа да басöк, öнi вöлi лöг да страшнöй. Вдруг ва вылын мелькнитiс пыж и бöра саясис медыджыт штабель сайö. И сэк эта штабельыс дзик ловзис да вöрзис местасис. Лэбтiсис сэтшöм гымалöм, что нем эз позь кывны: ва вевдöрöт паськалiс таралан керрезлöн зык, булькайтiс да резсис ва. Ме ур моз гыжьяси-кайи мöд бунт вылас, мед тöдны, эз я сюр буждöм керрес увтö мортыс. Сiя вöлi ловья, тульöтiс-уйис матiсьжык керрезлань. Пыж некытöн эз тыдав. Ме чеччöвтi керрез вывсис и котöртi увланьö, кытöн вакöт пессис мортыс. Но сiя кутчисьöма ни кер бердö и жагвыв сынö кинас береглань. Мöд киас вöлiсö чочком цветтэз, медодзза тулысся цветтэз — лымдорчачаэз.
— Серёжа! — горöтi ме, кöр тöдi ёртöс. — Серёжа! Чапкы нiйö. Чапкы!
Но Серёжа нето эз кыв, нето эз мöд шыасьны, а цветтэсö эз чапкы и сё сiдз жö спокойнöя уйис береглань. И кöр берегöдз кольччис совсем матын, вöлись горöтчис, дзик нем эз и вöв:
— Мыйлö вадiсян?
Сэк вöлись казялi, что менам пырсьöма ваас пидзöсви. Ме сiдз сулалi сэтчöдз, кытчöдз Серёжа эз сибöтчы да эз сувт мекöт ордчöн. Киöттяс ме кыски сiйö кöсiнöдз. Серёжа кайис керöсас, чöвтчис да пондiс пидзравны вамöм паськöмсö. Аслас пиннес эз локтö оча. Недыр мыйись мийö иньдöтчим посёлокö. Эта кадö ме вунöтi и пыж йылiсь, и лымдорчачаэз йылiсь, кöдна кузя петiс эта историяыс и вермис бы аркмыны мыйкö эшö умöльжык. Ме вöлi рад: Серёжа ловья и оськалiс ордчöн.
Ми сибöтчим ни столб дынö, кöда сулалiс неылын миян керку дынсянь и кöда вылын öшалiс электрическöй лампочка, кöр паныт миянлö пемытiнсис петыштiс том ныв, дзик усис вылiсянь, бытьтö чочком бабыв. Пельпоннэз вылас небурика павьялiс шучтыдалана алöй косинка. Синкыммес, кыдз и читкылёка юрсиыс, вöлiсö сьöдöсь и вачкисисö джыдж бордоккез вылö. Синнэс ыджытöсь, а рожабаннэс сiдз и сотчисö-öгралiсö биöн.
— Серёжа! — шуис сiя ёртö одзö локтiкö.
Эта кылыс петiс сэтшöм небыта да ласковöя, что сiя быдöс висьталiс, мыйлö нывка эстöн сулалiс и мыйлö Серёжа ветлiс ва сайись лымдорчачаэзла.
— Вот, — шуис Серёжа и нюжöтiс нывкаыслö лымдорчачаэсö.
— Ой, кытшöм басöкöсь! — горöтчис нывка и сывьялiс Серёжасö ыджыт синнэзнас.
Менö нiя сразу вунöтiсö, и ме иньдöтчи гортö...
А тулыс шумитiс. Сiя вöлi сэтшöм жö, кытшöм овлö быд годö. Сiдз жö сылiс лым, ю вылын чегласис йы, больгисö шоррез. Кытöнкö быдмисö лымдорчачаэз. Да, тулыс вöлi сэтшöм жö, но не быд понда. И Серёжа понда мöдiк эттшöм тулысыс оз ло, сiя оз вермы повторитчыны. Да и колö я этö?
МЕДОДЗЗА ПАНТАСЬÖМ
(Иньва, 1964)
Удж вывсянь локтöм бöрын Володя нельки сёйны эз понды. Сiя кыскис гардеробись неважын босьтöм чочком йöрнöс да тэрмасьöмöн пондiс гладитны. Вöлi эшö одз, но Володялö кажитчис, что сёрмас. А сьöлöмыс эта коста сiдз тёпкöтiс, сiдз чеччалiс моросас, что, кöбы лэдзны сiйö, лэбзис бы, натьтö, борддэзтöг.
Володя пасьтасис да петiс öтöрö. Эшö öтпыр видзöтiс, эз я коль гортас билеттэсö, боёка иньдöтчис клубланьö.
Сибöтчис тулысся ыркыт да мича рыт. Кокнит вöлi лолавны сöстöм руöн. Ыббез ладорсянь рамыник тöлок вайöтiс уль мулiсь да вöрзьöм почкаэзлiсь чöскыт дук. Кысянькö посад дорсянь локтiсö гармошкалöн шыэз, кытöнкö сьылiсö да гажöна сералiсö том отир.
Тулыс, тулыс! Мымда гажсö да счастьесö вайöтан тэ отирлö!
Чулалiс год сiя кадсянь, кыдз Володя локтiс татчö, стройка вылö.
Нёль километр ылынаын Косай посад дынсянь куйлiс сэк гöртöм ыб. Эз вöв некытшöм примета, кöда бы вермис висьтавны, мый лоас эта местаын год-мöд бöртi.
Эттшöм жö мича лунö, кöр Володя киас черöн кайис эта ыб вылö, автомашинаэз вайисö вöр да тёс. Медодзза чаггез чеччöвтiсö чер увтiсь, дорожка койыштiс сир дука стружка, сьöрсьöн-бöрсьöн, кыдз часовöйез, сувтiсö ыб шöрö медодзза столббез. Сiдз пондöтчис виль стройка вылын удж.
Лунiсь лунö площадка вылын содiс отир: чукöртчисö каменщиккез, плотниккез, шофёррез, трактористтэз. Локтiсö тракторрез, самосваллэз, скреперрез. Чожа пондiс уджавны электрическöй станция. Асывсянь рытöдз гирскисö пилаэз, стукöтiсö черрез, öтмöдöрö ветлiсö машинаэз; отир гарйисö, тшуписö, тэчисö, вевттисö. Неделя бöртi лэбисö сарайез, складдэз...
А öнi то готов ни главнöй корпус, гаражжез, сулалöны ни кынымкö олан керку.
Уджалö Володя öнi не черöн ни: сiйö сувтöтiсö раствор керан агрегат дынö. Эстöн жö, штукатуррез бригадаын, уджалö том ныв — Вера, Сiя неыджыт мыгöра, гöгрöс чужöма, кöда сiдз и сотчö-гöрдöтö. Синнэз Вералöн сöстöмöсь да лöзöсь, кыдз тулысся мича небоыс. Вежкодь читкылёккез сы юр вылын öгралöны шондi югöррез моз. Сэтшöмöн и пырис зонка оланö Вераыс. Мый лоис Володякöт сэксянь, сiя ачыс оз тöд. Кылiс Володя только öтiкö: кыскис сiйö мыйкö, öддьöн кыскис эта мича ныв дынö. Но не етша кад чулалiс, медбы кыдзкö висьтавны эта йылiсь Вералö. А талунсянь эта быдöс кольччö бöрланьö: и онтöм ойес, и сьöкыта кыссян луннэс. Талун нiя мунасö киноö. Думайтны только — Вера пондас пукавны ордчöн Володякöт. Эта ли не счастье!
Кин любитiс аскадö пыма да ёна, кинлö усис счастье видзчисьны медодзза пантасьöм, сiя тöдö, кытшöм кузьöсь эта коста не только чассэз, но и минутаэз, тöдö, кытшöм жагöна кыссьö кад.
Одзöв локтiс Володя клубас: некин эшö абу. Пыралiс ни библиотекаö, кутчисьлiс журналлэз бердö, но юрö нем эз пыр. Юрын вöлi öтiк Вера, и сэсся нем сэтчö эз тöр.
Володя пукалыштiс посöдзись скамейка вылын, ветлöтöв-керис садын и сё видзöтлiс часы вылö. Чожа пондöтчас кино, а Вера сё абу.
Вдруг сiя ладорын, кытчö неважын саясис шондi, Володя казялiс югыта вирдыштöм. Видзöтiс буржыка: вöр сайсянь кайис кымöр. Сiя ыждiс, паськалiс, пемытсялiс. Чожа пондiс кывны лöга мурзьöм.
— Бура, тыдалö, шулялас, — висьталiс кинкö ордчöн. Эта коста сiдз вирдыштiс, что пемдöтiс отирлiсь синнэз. Сыбöрсянь паськалiс пельчанöтан гымалöм. Эта гымалöмыс да мортлöн баитöмыс бытьтö саймöтiсö Володясö кыз онiсь: цементöн ларрез кольччисö вевттьытöг. И ежели зэрас, цементыс тшыксяс. И бöра ковсяс весь овны, тöв чужьявны неделя-мöд: эд öнi туйес тшыксисö, оз вермы локны некытшöм машина.
«Мый керны, мый керны?» — думайтiс Володя, сибöтчан кымöр вылö видзöтiкö. А син одзын эта коста вежлалiсö öтамöдсö кык картина: Веракöт пантасьöм да незьдöм цемент дынын каменщиккезлöн лöга видчöм.
Клубын пондiс тиньöтны звонок. Володя, кыдз школаын велöтчикö, нетшкöвтчис силькан шы вылас, но дзик джöмдiс, сувтчыштiс секунда кежö и уськöтчис котöртны клуб дынсянь. И кöр медодзза воттес усисö Володя чужöм вылö, сiя вунöтiс аслас свиттялан туфлиэз йылiсь, виль костюм да плащ йылiсь и эз ни понды бöрйыны волькытжык туйсö. Син одзас сулалiсö только нёль ларь, тыртöмöсь цементöн. Да и не ларрез нiя, а просто ыджыт ящиккез. Нылöн и вевттэс абу.
Кымöрыс эз сулав öтiк местаын. Сiя каттисис, кыдз кудель, вежлалiс ассис рöмсö да паськалiс. Лэбтiсис вына тöв, кöда пöльтiс веськыта зонка чужöмö, падмöтiс котöртны, но зонка эз сувтчы. Вот и бöрö кольччис посадыс, чулалiс больница. Öнi туйыс мунiс керöс вылö, лоис эшö сьöкытжык котöртны.
«Чожжык, чожжык», — вöрисö шытöг Володялöн тырппес. — «Чожжык, чожжык», — тёпкöтiс моросас сьöлöмыс. И Володя тэрмасис, но сылö мылякö кажитчис, что чеччалö öтiк местаын. Неыджыт посок кузя котöртiкö Володя чужйисис да усис туй шöрас. Усикас веськыт кинас ёна вачкис мыйöкö йылаö да чорытö. Киыс лоис öддьöн зубыт, вамис. Пемытiнас эз позь тöдны, петö я долоньсис вир али нятьöсьмис сiя.
Зубытсянь пиннес пыр видчöмöн, сiя сувтiс коккез вылас, пыркöтiс плащсö да бöра уськöтчис одзлань. А зэр воттес пондiсö киссьыны тшöкжыка ни. Тöв сё вынсялiс. Сьöкыт вöлi видзсьыны кок вылын. То öтöрын, то мöдöрын югьялiс чардби, а öтiк сöтiс телефон столбö и, натьтö, шулялiс сiйö: кылiс гора кажöтöм да потласьöм. Володя падмыштiс: сэтшöм горöна ёркнитiс да гусялiс синнэз. Но сулавны некöр. Колö тэрмасьны, колö котöртны мый вын и одзавны зэрсö.
Володя одзын мыччисис пемытiнас чуть тыдалан ограда. То и сторожлöн керкуок, а сыкöт ордчöн ворота. Сiя пöдана. Керкуокын би абу, ыбöс пöдана. Володя судзöтчис забор йылöдз, кайис сы вылö и берездасис забор саяс да уськöтчис сэтчин, кытöн сулалiсö ларрез.
— Кин локтö? — горöн юалiс сторож. — Ноко сулав!
— Ме, деда, ме отсавны локтi, — шыасис паныт Володя.
— Вот и бур. Нерад ни ме лои: вевття, вевття, а тöлыс сьöрсяням быдöс кульö, — пондiс норасьны дед Ермолин.
Эта коста вачкис медодзза зэр, минутаись минутаö сiя лоис сё тшöкжык и тшöкжык.
— Тольсö, тольсö, деда, вай! Норовитны невна эз вермы, лешак,— видiс Володя зэрсö и кутчис ваявны тёс, плахаэз да тэчны нiйö ларрез вылö. Эта коста сторожыс плахаэсö вевттис тольöн, но тöлыс летiс тольсö киись, нöбöтiс ларрез вылiсь, бöр кушöтiс цементсö. А зэрыс дугдыны эз и думайт. Сiя сё вынсялiс и кисьтiс кыдз ведра понiсь. Зэр ва, кöть и нёльнан ларьыс вöлiсö вевттьöмöсь ни тёсöн да плахаэзöн, йиджис цементö, медбы асылöдз пöртны сiйö изö. А тшыксяс цемент и сэк... сэк...
— Дорны! Дорны кöрттуввезöн! — горöтiс Володя да котöртiс склад ладорö. Минута бöртi, кöрттув ящиксö одзас видзöмöн, Володя тэрмасис ни бöр. Пемытiнас сiя öштiс векнитик туёксö, кежис бокö и татшкисис пидзöснас кытшöмкö кöрт кучаö, уськöтiс кисис ящиксö. Сiя малыштiс, мый вылö кайис: одзас вöлiсö стальнöй швеллеррез. Володя чепöссис кок йылас, но сразу ойнитiс — кыдз обухöн вачкисö пидзöс гöглян кузяс — и бöра сунгисис одзлань да тырпнас инмис кöрттув ящик дорö. Этасянь сэк жö öмас лоис сола, син одзас пемдiс, бергалiс юр. Сы дынö сибöтчис дед Ермолин, юалiс:
— Мый тэкöт лоис?
— То, деда, кöрттуввез. И молотокыс ящикас. Дор тольсö, — висьталiс Володя.
Ермолин босьтiс ящиксö, саясис пемытiнас, и чожа пондiс кывны сылöн дорсьöм.
Володя водiс му вылас, дзебис юрсö плащ пытшкас. Веськыт кокыс вöлi сэтшöм зубыт, что эз позь вöрзьöтчыны. Кöдзыт, нятьöсь ва котöртiс сы увтöт, паськöмыс шучкöп вамис зэрсянь; и зонка пондiс кынмыны да мöдiс чеччыны. Но только вöрзьöтыштiс коксö, а зубытсянь чуть садьыс эз быр. Володя кунис синнэсö, гирчыкнитiс пиннезнас и кольччис местаас. А старик сё дорсис: тук-тук, тук-тук-тук. «Мый сiя сы дырна керö? — аспондас видö стариксö Володя. — Тшыкöтамö вот добросö — стройкаыс сувтас». Но молоток шыыс лöньсис, и зонка весьтö мышкыртчис Ермолин.
— Мый нö, зонö, пондам керны? — юалiс сiя. — Öддьöн, тыдалö, доймин?
Володя кылiс, кыдз сы паськöм вылiсь усялöны гырись ва воттез, а ачыс сiя лолалiс пыдына да сьöкыта.
— Кынтö менö, деда. Шонтiсьыштны бы, да сувтнытö ог вермы.
— Ме кыска тэнö жагöник керкуокас... Ноко кутчись ме бердö. Ермолин отсöтöн Володя лэбтiсис шульга кок вылас. Быдöс вывтырсö поткöтiс сэтшöм зубыт — терпитны эз позь.
— Лэдз, деда, менö, лэдз. Зубыт! — синваэз пыр корис Володя. Но Ермолин жагвыв, шысеттöг мунiс пемытiнас одзлань, кыскис вывтас зонкасö, пыртiс керкуокö, сэсся «кутчис телефон ручка бердö. Дзирк-дзирк, дзирк-дзирк — не тэрмасьöмöн горалiс бергöтлан ручка. Трубка чöлiс, мымда бы старик эз горöтлы. Кажитчис, что некытöн некин ловьяыс абу эта пемыт ойö. Этасянь стариклö лоис гажтöмкодь.
Зэр одззамоз кисьтiс ведра понiсь. Сiя горöна вартiс керкуюр кузя, стенаö да öшын стеклоэзö.
Володя ойзiс, баитiс аслыс. Сылö вöлi сьöкыт. Кадiсь кадö, кöр садясьлiс, корис юны. Ермолин недыр кежö петавлiс öтöрö, сэсся вежлiс зонка кымöс вылiсь, кöда сiдз и сотчис, ва трепич и бöра кутчылiс звонитны. Сыбöрын вежöртiс, что телефон или жугалöм, или кытöнкö пöрис столб да орис проводыс, и сторож дугдiс сэсся звонитны. Но мортыслö кыдзкö колiс отсавны, и старик кыкись лыйис посадланьö: может, кинкö пö кылас да локтас.
Тöла-зэра погоддяö, конечно, лыйсьöмсö некин эз кыв, и Ермолин бöра кольччис öтнас шогалiсьыскöт да пондiс видзчисьны югдöмсö. А кыдз югдас — сё ни кинкö пондас мунны туй кузяс, и сыкöт позяс иньдыны юöр посадö.
Асыв кежас Володялöн жарыс содiс. Сiя норöна ойзiс, ружтiс, мыйкö корис, кинöскö тэрмöтiс да видiс.
Югдандорас зэрны дугдiс, мичамис, но вöлi кöдзыткодь. А кöр мыччисис шондi, ворота одзö сувтiс газик. Сторож радöн уськöтчис керкуокись и ыбöсас пантасис аслас начальниккöт, Николай Васильевичкöт.
— Тшыкöтiмö цементсö, — шуис начальникыс. Этаись эз позь вежöртны, то ли юалiс сiя, то ли висьталiс. — Звонитi тöн, мöдi тшöктыны сайöвтны, да телефоныт оз уджав. И некытшöм машина абу.
— Цементыскöт öддьöнсö нем эз ло. Вежöртамö жö эд, что оз туй вадны сiйö, — висьталiс Ермолин. — Только зонкаыс вот...
— Кытшöм зонка, кытöн? — юалiс Николай Васильевич. Сторож пыртiс сiйö керкуокас, висьталiс:
— Володька, бригадир. Тöн рытнас доймис.
Начальник, кыдз ассис зонöс, жагöника, мед не дойдны, босьтiс киэз вылас Володясö, петкöтiс öтöрö и Ермолин отсöтöн пуксьöтiс машинаö.
* * *
Быдса неделя ни чулалiс сiя кадсянь, кыдз Володяöс вайöтiсö больницаö. Володялö öнi вöлi кокнитжык, только эз на туй перыта бергавны, чеччыны, но койка вылö пуксьыны туйис ни.
Сы дынö вовлiсö часто, кыкись ни пыралiс Николай Васильевич. Гажтöмтчыны эз сетö, но Володялö мыйкö эз тырмы. Вот и талун, кресення асылö, сiя пукалiс койка вылын и видзöтiс öтöрö. Туй кузя талун эз мунö уджалiссез, оз ветлö öтмöдöрö тöдса номерреза машинаэз. И этасянь Володялö лоис гажтöмкодь. Сiя пондылiс лыддьöтны, но мылякö эз лыддьöтсьы. Да и кытшöм лыддьöтöм, кöр осьта öшынö öтлаын шондi югöррезкöт палатаö пырö потöм почкаэзлöн дук, а юрö — берся думаыс!
Сiдз и чулалiс джын луныс, некин сы дынö талун эз лок. Володя водiс, бергöтчис чужöмнас стена ладорö, мед чожжык ланьтны. Эта коста шытöг оссис палатаись ыбöс и жагвыв, кокчуннез вылын, дзик полöмöн, кинкö сибöтчис койка дынö. Зонкалöн мыйсянькö сьöлöмыс шурк-шарк муныштiс. Сiя осьтiс синнэсö, бергöтiс юрсö ыбöсланьö. Да мый эта? Оз веритсьы.
— Вера? — чуть кылана голосöн шуис Володя.
Вера шытöг качыкнитiс читкылякодь юрнас, небыта шынньöвтiс да нюжöтiс сылö гöснеччез.
— Вот ме и локтi, — гусьöник шуис Вера, и аслас чужöмыс рöмсялiс, кыдз жельнöг чача. Сiя полöмöн видзöтыштiс палата ыбöс ладорö и не тэрмасьöмöн пуксис койка дорись стул вылö.
— Локтiн... Ме тэнö видзчиси. Вот и пантасимö. — Володя кутiс Вералiсь кисö да жмитiс аслас чужöм бердö.
СЕМЬЯЛÖН СУДЬБА
Ильино посад... Сулалö сiя керöслöн лунвывся скатын. Керöс увтас, тшöк да кудриа бадь кусттэз коласын, муись петö неыджыт сöстöм ключ, Гожумнас сылöн ваыс сэтшöм кöдзыт, что юикö пиннез поткöтö, а тöвнас, медгырись мороззэз коста, оз и кынмы.
Быд лунö, рытъяв кадö, тöлöн и гожумöн, шор ладорсянь посад пасьта паськалö горöна шовкöтöм. Этö нывкаэз нето инькаэз песлалöны да сöдзöтöны ключ ваын паськöм, вартлöны сiйö кыдзовöй чукыля нöшшезöн.
Гожумся кадö, мича рыттэзö, том пöлöс чукöртчö ключ весьтiсь пос вылö нето лог сайись паськыт, рöма цветтэзöн киськалöм видз вылö. И кöвьясьö сэк посад весьтiсь пемыт-лöз небоын гора сьыланкыв. Öтлаын сьылан горкöт асывся кадöдз дугдывтöг киссьö гармоннялöн сьöлöмгажöтана перебор.
Да мый баитны... Бытшöма овсис посадскöй отирлö колхоззэзö пырöм понсянь. Колхозниккез öтлаын гöрисö, кöдзисö, вундiсö да вартiсö.
Быдöс, мый аркмывлiс межатöм, паськыт ыббез вылын, мый öксьывлiс весöтöм гажа видззез вылын, мый йылiс пода картаэзын — вöлi асланыс, колхознöй.
Бур вöлi эстöн отирлö и сiйöн, что олiс Ильино посадын Митя Созонов. Лым кодь чочком юрсиа, кузькодь чужöма да лöз сина, неыджыт да топыт лысьöра и бытшöм мывкыда морт йылiсь славаыс паськалiс омöн район пасьта. Киэс Митялöн, кыдз баитöны отир коласын, вöлiсö золотöйöсь. Кутчисьлiс ли сiя керны додь нето телега, кöньöс нето пызан, сувтöтны öшын нето ыбöс косяккез, вартны ли виль керкуын кинлöкö гор — быдöс петiс сы киись. А сибöтчö кö вундан кад, Ильино посадö быд ладорсянь кыссис подвода бöрын подвода. Öксьывлiсö нiя Митя керку дынö, кöда сулалiс посад конецас, неылын колхознöй кузница дынсянь. Кузьлун, югдандорсянь пемдандорöдз, чулавлiс сылöн кузницаын: Митя пинялiс чарлаэз. «Счастливöй морт», — баитiсö сы йылiсь. И баитiсö не весь: Митя былись вöлi счастливöй. Эд мый бы эз шогмы сы киын, быдöс вöлi морт понда. А керны бурсö отир понда — оланын медыджыт счастье.
Эз öбижайтчы Митя и аслас олан вылö: удж эм — гажа, сьöлöм сьöртi; нянь, паськöм, ырöш, сёян — тырмö. Бур вöлi сылöн и семья: инь — Дуняша да кык зон. Ыджытжыкыс, Егорка, чожа лöсьöтчис ни мунны школаö. Да и мöдыс, кöть совсем учöт, а айыс кодь жö — немымда весь оз ов, сё мыйкö строитö.
Быдöс вöлi бур, только öтпыр Дуняша пондiс норасьны аслас здоровье вылö.
— Висьö, Митя, менам то эстi, кыдз эд писькöтö, — мороссö киэзнас кутöмöн баитлiс Дуняша.
— Терпитышт невна. Страда эд ныр одзын, уджыс горшви. Мый отирыс думайтасö, водан кö öнi больницаö? Нуöта арнас городöдз, враччез дынö, веськöтасö нiя, — рамыника баитлiс Митя иньыслö.
Но сы моз эз пет. Эта гожумö лэбтiсис лёк, виркисьтан война...
Митя лöсьöтчис туйö недыр. Сёр рытöн вайисö повестка, а ашынас одз асылöн вöлi тэчöма ни котома. «Берта ли?» — петiкас ни думайтыштiс аскежас Митя, зоннэс вылö видзöтöмöн, а горöн содтiс:
— Олö, быдмö, кывзö мамнытö. Од кö вунöтö менö, велöтöмöс менчим, петат морттэзö.
Окалiс Митя кыкнаннысö да пуксьöтiс пызан сайö. Сэсся ниртыштiс ыджыт кулакнас ассис синваэсö да колис гортсö. Дыр кежö я — некин эз вермы висьтавны: не нiя, кöдна мунiсö тшöтш сыкöт, не нiя, кöдна петiсö гортсиныс сёрöнжык, не нiя, кöдна горзытöн кольччисö деревняö.
Год бöртi посадын эз ни кольччы öтiк здоровöй мужик. Гажтöмтчис Ильино посад. Шоча пондiс кывны шор дорын нöшлöн горöна шовкöтöм. Эз чукöртчывлö нывкаэз пос вылын, эз петавлö басöк рöма видз вылö. Некинлö вöлi орсны гармонняöн. И лöньсисö гажа сьыланкыввез да горöна сералöм. Мырддис лёк войнаыс отирлiсь гажсö: гозъяэзлiсь любитчан ойесö, том пöлöслiсь гажа пантасьöммесö да пыма окасьöмсö, челядьлiсь заботатöм, пöта да шоныта быдмöмсö. Эшö год бöртi мича песня туйö частожык пондiс кывны иннезлöн герьясьöм.
Гажтöмтчис ключ дорын сьöлöмгажöтана местаыс. Одззамоз тулысся кадö ва вевдöрын асланыс листок шумитiсö бадь кусттэз, одззамоз сералöмöн цветитiсö видззез, горалiсö кайез. Но и пуэслöн шумитöмыс, и видззеслöн сералöмыс, и кайеслöн горалöмыс эз вермö гажöтны отирлiсь олансö. И усьлiс кö одзза оланыс тöдвылö, сьöлöм вылын вöлi только курыт да сьöкыт.
Сьöкыт олан пондöтчис и Дуняша понда. Колiс уджавны, вердны да пасьтöтны челядьсö, а здоровье эз лöсяв. Дуняша шогавлiс одззамоз. И кыным одзлань, шогöт сё частожык водтöтлiс постеляö. Этасянь етша öксьывлiсö трудоденнез. Кадiсь кадö нем вöлi сёйны.
И куимöт годыс Дуняшалö нем эз вай бурсö: эшö öддьöнжык пондiс шогавны. А больницаö эз мун и бригадирлiсь эз кывзы тшöктöмсö: сэтчин пö, фронт вылас, эшö умöльжык, да сё терпитöны; веськала пö, поди. Эшö тöв шöрнас петiсö быдöс гожумся запассэз. Виль год коста сёйсис медбöрья картошка. Тшыгсянь усис мöс, а поснит подасянь Дуняша орöтчис эшö одзжык. Хозяйствоись вöлi вежöм да вузалöм быдöс, мыйтöг кыдзкö позис кыссьыны. Но и эта эз вермы керны пöта олансö. Югдандорас Егорка тшыг кынöмöн мунö школаö. Вова лунтыр пукалö гор вылын, мамыс бердö жмитчöмöн. Сiя орöттöг, гöрдöтöм синнэсö тiликö, корö:
— Мам, ме бы сё-я-а!
Эта нора корöмсянь Дуняшалöн сьöлöмыс потны готов, но немöн чöлöтны тшыг зоночкасö. Дуняша крепитчö, медбы не горöтны зоночкаыс сьöрö. Эз лысьт сiя горзыны голоснас, медбы отирыс эз кылö, медбы зоныс синвасö эз адззыв сылiсь. Быд мортлöн эта кадö гореыс вöлi не етшажык.
Пондöтчис февраль. Бырсис и зöровöй пизьыс, кöдаись пипуовöй пильнöйчаг сорöн инька пöжавлiс шочыника кöвдöммез. Кытшöм нiя курытöсь вöлiсö да эшö дубöсь, но тожö сёйсисö. Сэсся пöжавны вöлi нем.
Куш пильнöйчагись оз позь. Мöдöтлiс мамыс Егоркаöс правленнёö пизёкла — нем эз вай, норовитны тшöктöмась невна.
Сьöкыта чулалiс Дуняшалöн тöвся ойлун. Юрö пырисö быдкодь гажтöм думаэз. Сьöлöмнас кылiс, что сибöтчö мыйкö сьöкыт да страшнöй, кöдö оз туй не ордйыны, не падмöтны. Этасянь сё частожык усьлiсö тöдвылас Митялöн медбöрья кыввес: «Кыскы, быд вынiсь кыскы челядьсö. Ны вылö быдöс надея, ныын миян быдöс олан». И кыскис Дуняша, кыскис, кыдз чайтчис, мымда вермис. Öтiк кусöкöн — чöскыт сiя вöлi нето курыт — эз ордйы челядьсö. А медбöрья кадö и ассис кусöксö удiс-вердiс нылö. Быдöс вын пуктiс челядьсö кыскöмö. Но локтiс кад, что нем лоис пуктыны. Мый эшö кольччис мамлöн ны понда, дак эта радейтöм. Но кытшöм бы ыджыт сiя эз вöв мам сьöлöмын — эта не нянь кусöк. Сiйö оз туй торйöтны да удны, медбы чöлöтны тшыг челядьсö.
Öтiк асылö, кöр эшö деревня узис, Дуняша öзтiс сартас да пондiс пыркöтны дозмуксö *. Неыджыт симöтовöй чуманокись казялiс содз мымда чуж пизь. Кисьтiс чуж пизьсö сельничаö да сорлалiс сiйö ваöн. Петiсö куим кöвдöмок. Зоннэс, дульнысö горша ньылалöмöн, сулалiсö ни горби одзын, видзчисисö, кöр пöжасяс эта чöскыт няньыс. Эз ешты мамныс и сайкöтны нiйö — сiдз и ньылыштiсö öтiкöн пыммесö. Сэк Дуняша висьталiс:
— Мунö, дитяэз, Крутикö. Нöбöтат айнытлiсь медбöрья выввежöт. Вежат картошка вылö, — и сибöтчис зелёнöй сундук дынö да кыскис сыись дрöжитан киэзнас чим сьöд виль костюм. Егорка казялiс, кыдз мышкыртчис сы весьтын мамыс да кыдз пондiсö зэгавны сылöн кöс пельпоннэс. Синваэс, гырисьöсь да сьöкытöсь, усялiсö веськыта костюмыс вылö.
Югдандорас вöралан лямпаэз вылын зоночкаэз петiсö туйö. Мунны вöлi не матын — двадцать километр ылына. Туйыс шуч кыссис волокöт, только шочыника пантасьлiсö неыджыт кушиннэз — колхознöй вильсаэз. Кöр кольччис бöрö медбöрья колхознöй ыб, Егорка кыскис писис горби одзын пöжалöм кöвдöмоксö, торйöтiс сiйö шöри да сетiс джынсö воныслö...
Вöлöна туй лоис умöльжык, нежык юж, но челядь эз чинтö öднысö — кöдзытыс тэрмöтiс. То и шондi пондiс мыччасьны пуэс коласöт, но сiя немымда эз шонт и эз гажöт челядьсö.
— Киэзö кынмöны, — норасис Вова.
— А тэ ёнжыка вöрöтчы, — баитiс Егорка. — Сэк оз пондö кынмыны. Но мунны перытжыка Вова эз ни вермы. Сiя ёна ни мыдзис эта кузь да сьöкыт туйын, öдва вöрöтiс коккесö. Стрась охота вöлi сёйны. Не öтпырись ни усьлiсö тöдвылö чуж пизёвöй кöвдöмоккез. Эта коста Вовалöн нельки дульыс лэдзчис, а син одзас сiдз и сулалiсö унася-уна чöскыт кöвдöммез.
— Чожа ни, Егорка, Крутикыс?
— Чожа, чожа, вот чукыльсö только чулалам, — быдпырись öтмоз отвечайтiс Егорка воныслö. Но чукыль чулавлiс, а Крутик сё эз вöв. Сэк Вова лэдзчисьлiс лым вылö и баитiс горзöмöн:
— Ог сэсся мун. Ог вермы. Кынöм сималö.
— Шоччисьышт нö невна. Чожа локтам, — воныслiсь синваэсö чышкикö чöлöтiс Егорка.
И только пемытсорнас ни челядь сибöтчисö деревня дынö. Вова пезьдалiс, джöмдалiс, и Егорка кыскис сiйö кипöлöттяс.
Деревня дорас челядьöс панталiс лёк пон. Вувтöмыс вылö петiс чочком да няньзыр ота тоша старик. Сiя кытсалiс понсö, сибöтчис челядь дынö.
— Деда, сет мыйкö сёйны. Стрась эд кынöм сималö, — старик синнэзö веськыта видзöтöмöн корис Егорка.
— Кысь тiянöс быдöнсö вердан, — горöтчис паныт старик да пыдына ловзисьöмöн содтiс: — Эх, война, война! Мый тэ отирыскöт керан, кыдз тэ только, проклятöй, ны вылын он издевайтчы, — и кутiс Вовасö кипöлöттяс да иньдöтчис посöдз ладорö.
Керкуокыс вöлi неыджыт, важ да пемыт. Стена вылын, пызан весьтын öшалiс ночник. Сылöн гöрд биокыс умöлика югдöтiс енджаджын сулалан еннэз да учöтик, ёна ни тшыкöм зеркало. Сыкöт ордчöн крöмликайтiс важ, уна кадсянь сьöдöтöм ни часы.
Кöсыник, кыдз сартас, оттöмик чужöма инька чöвтiс Вова вылiсь зипунсö да пондiс юасьны, кысь нiя, кинлöн да кыдз татчö шедiсö. Челядьлö тшыгувья эз вöв охота баитны. Нiя, дульнысö горöн ньылалöмöн, кадiсь кадö видзöтыштлiсö жарöн лон