…Кызьы уд дырты бен гуртэ, сюлмад ке возиськод туссэ?» Ф. Васильев
«… Тонэ татын пось шыд возьма ни,
Возьма небыт валесъёсыд…
Атай гуртад, атай юртад кадь
Кытын меда луоз шуныт?..» Я.Майков
Вуиз кема, туж сюлмаськыса возьмам нунал - 10 июнь. Инкуазь но дасяськиз праздниклы - туж шуныт но, туж шулдыр но кариськыны быгатиз. Пичияк, калыкез шумпоттыса, коня ке зорез но усиз,
угось калык зор возьма вал ини. Татын, Чумолё клубын, туж шуныт атай юртын кадь, ортчиз кыдёке но матэ портэм мугъёсын атай юртысьтызы кошкем чыжы-выжыосын шуныт пумиськон ужрад. Ноку вунонтэм кылиз со нунал калыклэн сюлэмаз. Угось коня аръёс ог-огзэс адзылымтэ азьвыл эшъёс, выжыкылын кадь пумиськизы гурт шорысь тодьы кызьпуос улэ интыяськем чебер но чылкыт культура юртын.
Коня аръёс ини клубамы та мында калык оз люкаськылы вал. Праздникмес усьтимы концертэн, кытын чузъяськизы асьме гуртын вордскем выль кырзанъёс но эктонъёс, озьы ик кылбуръёс. Кытысь гинэ но куноос вуиллям ява: Краснодарысь, Свердловскысь, Камбаркаысь, республикаысьтымы но ёросысьтымы портэм сэрегъёсысьтыз... Огкылын вераса, туж трос куноез вал Чумолё гуртлэн.
Таче пумиськон ортчытимы вал 2006-ти арын Ижкарын улись, «ООО КАМ-аз» автоцентрлэн соку дырын директорезлэн В.Г. Ивановлэн чектэмезъя, али дырын со - пенсионер. Со ик кутскон сётиз таче пумиськонъёслы. Бадзым Тау шуиськомы солы. Нош туэ калыкез люканы мылкыд кариз Ижкарысь кылъя но литературая научно-исследовательской институтысь художественной редактор, художник-дизайнер Василий Егорович Романов. Угось вашкала документъёсъя тодмо луиз, Омга выжыысь удмуртъёслэн та пала интыяськемзы дырысен 385 ар тырме, нош лыктэмын, пе, со удмуртъёс Камдор Омга гуртысь (али сямен Киров областьысь Вятскополянской ёросэ пырись Дым-Дым Омга гурт). Омга воршуд сярысь Удмурт дунне газетэ гожтиз вал Чумолёын вордскем но будэм УР-ысь писатель-журналист А.С. Степанов. Озьы соос ваньзы чош городын куспазы кенешыса, гурт калыклы вазиськизы гуртлы юбилей ортчытон пумен.
Чумолё калык туж валаса басьтиськиз ужрад борды. Соин ик, лэся, туж шуныт пумитамы куноосмес. Гурт калыклы туж умой валэктон сётизы но праздникен зечкылазы В.Е. Романов но А.С. Степанов сяна Ижкарысь «ООО КАМ-аз» автоцентрлэн азьвыл директорез, гуртысь вань мойыослы тодмо но гажано начальной школаын кема аръёс чоже ужам дышетисьёслэн Мария Кирилловна но Григорий Иванович Ивановъёслэн пизы Владимир Григорьевич но асьме гуртысь ик потэм йоно воргорон, калыклы юрттэт сётонъя УР азьвыл министрез Анатолий Ермилович Матвеев. Калык шыпак кылзиз сьорлось куноосмес. Озьы ик куномы вал на асьме ёросысь ик Азамат гуртысь ёросын ваньмызлы тодмо ини луись кылбурчимы Людмила Гирбасова. Кыксэ кылбурзэ лыдзиз со сцена вылын гуртсэ но шаерзэ данъяса, озьы ик кык аслэсьтыз кырзанъёссэ быдэстиз ачиз арган шудыса.
Али котькыче гуртъёсын, районъёсын туж данъясько асьсэлэн ансамбльёсынызы. Быдэс Россиысь калыкъёс сямен ик, ми но туж шумпотимы артэ ёросысь быдэс Европалы тодмо луэм Буран гуртысь песянайёс понна. Вань милям но гуртамы кырзаны но эктыны яратись коллективмы, кудизлы ним сётимы «Зангари». Репертуарамы трос гинэ кырзанъёсмы, удмурт эктонъёс но шудонъёс. Нош тужгес но ми яратиськомы но быдэсъяськомы асьме усточиосмылэсь кырзанъёссэс. Ш-Кибья гуртысь трос нылпиё семьяын вордскем но будэм, асьме гуртысь кенмылэсь Людмила Никитиналэсь кырзанъёссэ калыке поттыны тыршиськомы. 20 арлэсь кема ужа ини со Муважи шор ёзо школаын библиотекарь, немец но англи кылъёсъя дышетись луыса. Солэн ог кызё пала ини кырзанъёсыз, но, жаляса верано, калыке поттэмын овол на шуыны луоз. Кырзаськомы гурт калыклы, Татарстан Республикаысь Варзи-Пельга, озьы ик асьме ёросысь Ш-Кибья гуртъёсы поталлямы ини. Коня ке пол пыриськимы ини ёрос конкурсъёсы. 2010-ти арын «Живи родник» нимаськись самодеятельной композиторъёслэн конкурсазы Людмила Никитина «Наша надежда» номинация басьтиз. Туж трос ужъёсы пыриське школаын но. Аслэсьтыз кырзанъёссэ англи но немец кылэ берыктылэ, калык полын мастер-класс ортчытъя. Чебересь выль гуръёсыз кылдо аслаз но портэм авторъёслэн кылбуръёсызъя. Людмила Ивановналэн коня ке кырзанэз чузъяськиз концертын, кудъёсыз сиземын вал вань бертэм куноослы, кызьы ке мойыослы, озьы ик егитъёслы. Туж яраз калыклы культура юртын кема аръёс чоже ини ужась арганчимылэн Александр Ивановлэн Виталий Виноградовлэн кылъёсызъя гожтэм «Чиге сюлмы» нимаськись кырзанэз. Озьы ик кыл сётимы на залысь куноослы но.
Кыдёкысь бертэм куноос синвуосын ик тау каризы таче пумиськон радъямлы. Соос но кырзаса зечкылазы гурткалыкез, нош кырзась коллективмы юрттиськиз соослы.
Концерт бырем бере, вань калык люкаськиз клуб берысь ныпи площадкае, кытын позе вал ини пуртыосын шыд но жук. В.Е. Романов вань калыклы паймымон фотостенд дасям, кудиз интыямын вал клублэн кыр палаз борддор борды. Отысь асьсэлэсь чыжы-выжыоссэс адзыса, синвуосын учко вашкала фотографиосты. Василий Егорович кема аръёс чоже ини ужа гуртлэн историез бордын. Солэн ужъёсыз интыямын культура юртын но. Ми но юрттомы солы, кызьы быгатомы. Чумолё гуртмы сярысь книга азьланяз одно ик потоз шуыса оскиськом.
Ваньмыз кунояськем бере, клубын ужасьёс радъязы шудонъёс но эктонъёс. УдГУ-ысь студент А. Бегешев радъяз пиналъёсын но егитъёсын шудонъёс но эктонъёс, туала валанъя, со мастер-класс возьмаиз. Кытчы гинэ эн учкы - кин мешокен бызьылэ, кин гозы кыскэ, кин эстафетаосын шудэ – уд вала. Песянайёс баскетболэн но шудизы, нош кышноос тыро ведра-карнанэн шапык но вузэ кисьтытэк тапыр-р гинэ экто ява, арганчиос вошъяськыса шудо. Огкылын вераса, туж шуныт пумиськон ортчиз. Азьланяз но мед быгатозы вылэм гурткалыкъёс тазьы ик выжыоссэс огазе люкаса, шулдыресь праздникъёс ортчытъяны. Таче шудлыръяськонъёс трос мед луозы ми дорын сяна, калык гуртъёсын но. Вань калык валче мед улоз. Бен, кулэ вылэм таче пумисьеонъёс котькинлы ик. Гуртын улыса, ог-огенымы пумиськылыса, ум валаське кыдёке кошкем муртлэсь мозмемзэ. Нош ми ум вунэтэ ас выжыосмес. Котьку соосыз яратиськом но возьмаськом. Куке но кин ке но туж мозмыса кырзам, дыр «…Кыдёкын улыса, синмыныды адзытэк, уд валаське милесьтым яратэммес».
Бадзым тау кареммы потэ праздникез дасяны юрттисьёсмылы, така вандисьлы, жук позьтисьёслы, озьы ик спонсоръёслы, гурт калыклы. Котькуд ар Петро нуналэ така вандыса жук позьтиськомы, нош туэ ом возьмалэ, вазьгес люкамы калыкез, угось туж пумиськеммы потиз, уката но куинь ялкарон нунал сётиз правительство.
Нош спонсоръёсмы вал милям: Сергей Константинов - «КФХ Дан», вынъёс-ужбергатисьёс Геннадий но Михаил Ивановъёс, ЛПХ «Совет» - Вячеслав Яковлев, Усо гуртысь муниципал кылдытэт, озьы ик гурткалыкъёс. Выль ар-а, гужем шулдыръяськон-а, гурт калыкмы юрттэ. Сизиськом ваньдылы ужазинсконъёс но тазалык.
Туж шумпотиськомы магазинъёсы пуктэм коробкаосмес адзытэк, буш уд кельтиськелэ шуыса, бадзым тау тиледлы, гурткалыкъёс но вуз карисьёс!
«…Данъяло Чумолёме,
Зеч кылъёс солы шедьто.
Ачиз кадь ик чебересь
Малпанъёсме пычато!» Надя Никитина.
нылкышно ансамбль «Зангари» «Эктиськом ми сэзь, капчи
Золгес шуд ай, арганчи!»
Котькудиз аслэсьтыз чыжы-выжызэ утча. Егитъёслэн асьсэ куспын шудонзы оръяське.
«Ваньды лыктэ дорамы, ваньдэс куно каромы.» УдГУ-ысь студент А.Бегешев мастер-
класс возьматэ дискотекаын.
Воргоронъёс кужымзэс мертало. «Кин золгес милемыз бергатоз?»
Валентина Никифорова, культура юртын ужась.
Туспуктэмъёсыз Инна Константиновалэн.
2012-ти ар.