П.И.Сельков
(сиктлы 400 во тыригкежлö)
Чуклöм: вежаинъяс, ловъя нимъяс.— Сыктывкар, 2001, 113 л.б.
Архивно — историческое издание.
Оз вун некор сиктса олöм,
Век син водзын гажа Чуклöм — чужанiнöй...
Ичöт Иван (И.И.Сажин), 1927 во.
ЛЫДДЬЫСЬЫСЬ ДОРÖ КЫВ
Мортлöн чужанiн — Рöдина — йылысь гижöма и гижасны на уна небöг. Литератураын да и йöз костын чужанiнöс öткодялöны мамкöд. И татшöм öткодялöмыс мунö ёна нин важысянь. Чужан му дорйигöн уна йöз пуктылiсны ассьыныс ловсö. Сöмын бöръя ыджыд война босьтiс ловнысö матö куимсё чуклöмсалысь.
Чужан муöс мамкöд йитöмыс эз артмыв кодлöнкö шуöм серти. Танi петкöдчö налöн пыдiсянь артмöм-йитчöмыс. Аслас чужöмсянь морт медводз тöдмалö ассьыс мамсö, кодi сiйöс нёньöдö лун и вой, дöзьöритö-быдтö. Чужöм кага казялö мамсö сёйигöн, сылöн мелi ки серти, сэсся аддзö синъяснас, кылö пельяснас гöлöссö, тöдö мам йöвлысь кöрсö, ныриснас торйöдö дуксö. И, дерт жö, кагалöн радейтöмыс медводз чужö мам дiнö.
Быдмыштöм бöрын ичöт морт кутас тöдны батьöс, чой-воксö, ассьыс узьланiнсö, олан жырсö. А кор кутас котравны керка пытштi и сы гöгöр, вежöрас пондö сöвмыны чужан местаöс радейтöм. Казялö, мый керкаыс сиктын, а сикт гöгöр тыдалö енэжтас. Гожся лунö сiйöс мелiа малыштö югыд шондi... Аскоддьöмкöд ворсiгöн, школаын велöдчигöн, вöр-вакöд тöдмасигöн паськалöны тöдöмлунъяс, кодъяс бара жö йитöны быдмысь мортöс чужан местакöд. Морт казялö, мый мамöс да чужанiнöс радейтöмыс сöвмö öтмоза.
Мамöс радейтöм — мортлöн медводдза и медся тöдчана кылöм. Чужанiнöс радейтöм, мамöс радейтöм бöрся мöд кылöм. И морт сьöлöмö да вежöрö кольö нэм кежлö. Мамкöд öтлаын олiгöн сiйöс радейтöмсö кылöмыс абуджык казялана. Сöмын кор нин торъялан, либö кувсяс, тайö кылöмыс лоö тöдчанаöн, да и мам водзын мынтыны вермытöм уджйöзыс сьöктаммö. Чужан сиктын пыр олiгöн сiйöс радейтöмсö кылöмыс абу жö ёна кылана: морт олö и олö сэнi тыр шудöн, мукöдлаö мунöм йылысь, оз кö олöмыс тшöкты, оз и мöвпыштлы. А кор овмöдчас мöдлаö, радейтöмсö кылöмыс садьмö, ёсьмö, чужанiнлань кыскö мам дорö моз жö.
Кöсъя содтыны. Мыйкö татшöм ногöн жö чужанiнö кыскöмыс мунö и пемöсъяс пöвстын. Вöрса пемöсъяс век олöны-вердчöны чужан места гöгöрын, а лунвылö лэбзьывлысь лэбачьяс бöр локывлöны чужанiнас лöсьöдны пиянöс. Звер-пöткалöн ставыс тайö артмö вежöрттöг, а йöзлöн — ставсö гöгöрвоöмöн.
Чуклöм сиктса йöз матö нёльсё во чöжся асланыс туйвизьын пыр радейтлöмны чужанiнсö. Тайö радейтöмсö кылöмыс отсавлiс налы уджавны, быдтыны челядьöс да тöждысьны водзö олöм йылысь.
Ме, тайö небöгсö гижысьыс, чужлi Чуклöмын жö — Подöдзшор нима пöчинöкын, конi овлi 17 арöсöдз. Сэсся мунлi война дырся öстатки призывöн армияö. Сэнi сизим во служитöм бöрын матö 50 во ола карын. Сöмын чужанiн — Подöдзшор оз вун. Быд во волывла Чуклöмö да чужанiнö, кöть и пöчинöкыс важöн абу.
Чуклöмлы регыд тырö нёльсё во. Татшöм кузь кадколастнас йöз олöмын вöлi уна бурыс и лёкыс, мый йылысь и мöвпыштi висьтавны лыддьысьысьлы, медводз чуклöмсаяслы. И, дерт жö, тайö уджыслöн подулöн вöлi чужан сиктöс радейтöм. Сiйö тшöктiс миянöс (С.Х.Сажинкöд) куим во чöж лукйысьны архивъясын, видлавны чуклöмса йöз йылысь шочиника лöсьöдлöм важся государственнöй гижöдъяс, вичкоясöн нуöдлöм метрическöй (чужöм, венчайтчöм да кулöм йылысь) книгаяс да исповедальнöй (висьтасян) ведомостьяс. Аддзöма и видлалöма уна мукöд документъяс, кодъяс серти лои тэчöма чуклöмса став кореннöй олысьяслысь — Сажинъяслысь, Сельковъяслысь, Лапшинъяслысь, Зиновьевъяслысь, Раевскийяслысь, Полькановъяслысь ордпуяссö.
Мый ставсьыс артмис — донъявны лыддьысьысьлы.
Павел Сельков.
Юриндалысь
· Лыддьысьысь дорö кыв
· Кыскö дiнас гажаиныд
· Сажин, Сельков да мукöд ов
· Чуклöмса оланiнъяс
· Стрелец, ратник, боец
· Палявтöм шог
· Вöлöсьт да сиктса котыр
· Му-видз вöдитöм
· Выль олöмлань
· Вöвлi танi "Роз" колхоз
· Пармаын коми эз няргыв
· Сиктса стрöйбаяс
· Вöрса ордымсянь мольыд шöр туйöдз
· Вотъяс йылысь
· Мельничаяс да кузьнечаяс
· Паськöм да сёян-юан
· Вичко да дона гуяс
· Висьöмъяс да бурдöдчöм
· Югыд олöмö нуöдö школа
· Оланног да суд
· Нöшта мыйсюрö йылысь
· Кодарлань катовтан, Чуклöм?
· Индöмъяс
· Кысьяс мый босьтöма
· Вöлöсьтувса вузасян — ньöбасян вöвлöм донъяс (шайт, ур).
1. Кыскö дiнас гажаиныд
XV нэм помын став коми му пырлöма нин ыджыд Роч государствоö. 1481 воын государствоöн нуöдöм перепись улö медводдзаысь пыртöма став гырысь и посни юяс, тыяс, кыйсян угоддьöяс, видз–му да йöз оланiнъяс. Учёнöйяс серти, Коми тайö воас и йитчöма Роч государствокöд.
Важ коми йöз овлöмны Кама ю йылын да Вятка пöлöн, сылöн Кобра, Летка да Молома вожъяс кузя. Тасянь Сыктыв ю кузя коми сёрниа йöз вуджöмаöсь и Эжва выло.
Тайö кадъясö коми йöз олöмын мунöмны нин гырысь вежсьöмъяс. Кыйсьöм кежысь олöм кутöма вуджны видз–му вöдитöмлань да скöт видзöмлань. XVIII нэмын звер–пöтка чинöм понда олöмас медшöрöн нин лоöма видз–му вöдитöм, а кыйсьöм — вöралöмыс сöмын отсöгöн.
"Сысоличьяс" (тадзи шулöмны рочöн Сыктыв бердса олысьясöс) пыр кутлöмны Кама да Вятка бердса олысьяскöд топыд йитöдъяс. Тайö бура тыдалö и важся переписнöй гижöдъясысь: "сшол на Вятку", "сшол на Каму" да св. Старö–мöдарö ветлöмыс йöзöс абу падмöдлöма. Выль местаясын олöм абу куслöма. Сьöкыдлунъяс вылö видзöдтöг, сиктъяс век жö паськавлöмны да сöвмылöмны. Ёна ветлöм–мунöмöн артмылöмны и бурмылöмны выль да важ оланiнъяс костса туйяс, кодъяс лоины "столбöвöйöн" (мир туйöн). Тадзи артмылöма Кама йывлань и Вяткалань вожалана мир туй.
Медым бурджыка гöгöрвоны Чуклöм сиктлысь историясö, колö пасйыштны мир туйвывса сиктъяс йылысь, кодъяс артмылöмны ёна водзджык. И.Л.Жеребцовлöн "Где ты живешь" историко—демографическöй справочникысь тыдалö, мый медважöн гижöдъясö веськалöма Волся сикт, кöнi вöвлöма крепость, дорйысян öружиеяс видзанiнöн да йöзöс дзебанiнöн, а 16–öд нэмсянь Волся — сыктывса муяслöн медшöр сикт. Степан Пермскöй лöсьöдлöма сэнi манастыр и стрöитлöма вичко.
1490 воö гижöдъясö веськалöма Ужга сикт, кодi бара жö вöвлöма вöрöгъясысь крепосьтöн и медводдза ыджыд Ужговскöй вöлöсьтлöн шор сиктöн. Тайö вöлöсьтас пыравлöмны Сыктыв да Кама йывъясса олысь коми йöз. Поёл сикт гаравсьылöма 1485 вося гижöдын нин. Сё во мысти погост гöгöрыс вöлöма 20 грезд да 14 пöчинöк. Вöвлöма сэнi и манастыр. Мир туй мöд вожса Чукаыб да Кебра гаравсьылöмаöсь 1586 вося гижöдъясын, а Луза ю пöлöн йöз овлöмны нин IX—X нэмъясын. Визин медводдзаысь гаравсьö бара жö 1586 вося перепись дырйи. Но сэнi сэк вöлöмны нин кык пу вичко, уна деревня. Сiйö жö перепись дырйи гижöдö пырöмны Куниб, Межадор, Ыб, Гарья да Паджга. А Межадорса квайт деревняын вöлöма 25 овмöс да нöшта öти овтöм керка.
Лёк вояс дырйи уналы ковмылöма вöрзьöдчыны олан местаясысь, корсьны кынöмпöт Кама да Вятка бердса олысьяс дiнö ветлöмöн, мунны Сибырö. Унаöн и кувсьылöмны. Та йылысь висьталöны тыртöм овмöсъяс. Татшöм кадö и локтöмны Чуклöмö медводдза олысьяс. Матiгöгöрса йöзлы важöн вöлiны тöдсаöсь Чуклöм гöгöрса вöр–ваыс да кыйсян местаясыс. Сыктылö усьысь Визин ю, Воль, Ёгул, улдор и велдор Лобöсъяс да Лянöс, сэтчö лэччысь уна ёльясöн, мича да вöрзьöдлытöм вöрöн, звер–пöткаöн и чериöн, дерт жö, кыскылiсны ас дорас писькöс коми йöзöс. А кыйсянiнъяс налöн пыр вöлiны юяс да ёльяс пöлöн, вотöса мича ягьясын да нюръяс гöгöр. И Чуклöм гöралöн гажа да озыр местаыс бокö, дерт, эз кольлы. Сiйö вöлi матын, позьö сэтчö воöдчыны трöпаястi и ва кузя.
Позьö стöча шуны, мый Чуклöм нимсö сэтчöс гöраыслы сетлiсны вöралысьяс, йöзлöн сэтчö овмöдчытöдз на. Местаыс ачыс корис татшöм нимсö. Важся коми ЧУК кыв гöгöрвосьö кыдзи гöра йыв. Чукачой да Чукаыб сиктъяслöн нимъясыс артмöмны сiйö жö кывсяньыс и збыль йитчöмны гöраяскöд. Нöшта Поёлын вöвлöма татшöмсяма нима жö пöчинöк Чукил (Чукйыл).
Чуклöм нимсö кодсюрö йитлöмаöсь Костромаысь волöм олысьяскöд, кодъяс быттьöкö сэтысь вайисны Чухлома нимсö (сэнi збыль эм и Чухлома кар, и Чухлöмскöй ты, и Ветлуга ю кузя Чухлома деревняяс). Сэсся быттьöкö сiйö локтысь йöзсяньыс и кутöны ассьыныс рöдвужсö Сельковъяс да Сажинъяс. Но тайö лöсявтöмтор. Сельковъяс да Сажинъяс вöлöмны Чуклöмын коймöд овмöдчысьясöн нин. А сiйö, мый переписьяс дырйи сиктсö пасйылöмны уна ног — Чюхлома, Чухломская, Чухлэм, ставыс тайö роч гижысьяс понда, кодъяс, гашкö, тöдлiсны Костромскöй губернияысь местаяссö. Найö роч ногöн и нимъяссö гижавлiсны.
Чуклöм артмис кык коми кывйысь — ЧУК да ЛÖМ кывъясысь. Сöмын ЛÖМ кывсö оз ков соравны висьöдана лöмкöд, кыдзи сiйöс роч вылö вуджöдöма "паршаöн". Сiйöс колö гöгöрвоны муыслöн кыдз пу йог сяма лöмöн. Гöгöрбоксянь кö гöра вылас видзöдны, да и гöра йывсяньыс казялана, Чуклöм гöраыс дзик муыслöн лöм кодь и эм. Важся йöзлы — кыйсьысьяслы — тайö тыдалiс и ю вывсянь и гöра йывса вöрын кыйсигöн. И сетiсны кыйсянiныслы ЧУКЛÖМ ним. Пыдiсянь да паськыдджыка кö та йылысь мöвпавны, казялан, мый быд гöра (Кавказ, Урал да мукöд) збыль лоöны муыслöн лöмъясöн, кодъяс артмисны уна миллиард вояс сайын му вöрöшитчöм вöсна: кыткö муыс пырис ва улö, а кыткö кыптiс да артмöдiс гöраяс. Чуклöм да миян мукöд посни гöраяс сiдзжö артмисны ёна важöн ледникъяс да ва отсöгöн. И найöс комиöн лöмöн шуöмыс лоö стöчöн. Чуклöмлысь нимсö тайö рöд оз омöльт, сöмын петкöдлö, мый коми йöз кужöмöн пуктылöмаöсь нимъястö.
Медся матын ва кузя и веськыда Чуклöм вöлi Межадорса олысьяслы. Найö Визин ю пöлöн весалiсны видзъяс, да и Воль ю налы эз вöв ылын. Найö жö и сэнi кыйсисны, сэсся и пöчинöксö лöсьöдiсны да овмöдчисны. Чуклöм пöчинöк медся первойысь гаралöма Межадор погостбердса оланiнöн 1608 воын Яренскöй уездса дозорнöй книгаын, кор царнас Россияын вöлi Василий Шуйский. Сэнi пасйöма, мый Визин ю вылын тайö пöчинöкыс Иван Огаревлöн 1586 вося гижöдъяс бöрын лоöма выльöн. Сiдзкö, Чуклöмö йöз овмöдчисны гижöдсянь гижöдö 22 во костын. Сöмын кор сiйö артмис — 1600 воöдз на или регыд сы бöрын, стöча тöдтöм. Гижöдас сюри 1608 воын, и сiйö восö лоö лыддьыны Чуклöм сикт чужан воöн. А мый пöчинöкыс лои таысь водзджык, тыдалö гижöдсьыс: пöчинöкса кык овмöсын олöны Ерофейко Матвеев Федька пиыскöд да Офонька первой. Нывбабаясöс абу пасйöма. Найö вöдитлöмны квайт четь (куим сайö га) му и скöтлы пуктöмны 10 ичöтик зорöд турун. Став тайö уджсö, куш ки помысь овмöсъяс стрöитöмöн и видз–му лöсьöдöмöн, öти воöн он бергöд. Дыр–ö медводдза овмöдчысьясыс асланыс пöчинöкын олiсны, он вермы тöдмавны. 38 во мысти, 1646 вося переписнöй книга серти, Чуклöмын найö абуöсь нин, и налысь пиянсö батьяс сертиыс эз ло казялöма. Тайö вося переписнöй книга серти деревняса нёль овмöсын олöны нин выль йöз. Выль олысьясöн лоöмны: Левко Климентьев Степанко пиыскöд, Климко Гаврилов (прöзвищеыс Малец) Якунька вокыскöд, Федька Аверкиев да Васька Ондреев {прöзвищеыс Баженка) пияныскöд. Бöръяыслöн Васька пиыс ачыс нин вöлöма батьöн. Нёль овмöсын ставыс вöлöма 16 ай лов, нывбабаяс йылысь бара жö нем абу пасйöма. Öти олысь мунöма "безвестно" 1639 воын тшыгъялöмла. Кытысь найö локылiсны, висьтавны бара жö он вермы. Сöмын позьö чайтны, мый локылiсны Межадорысь, конi йöзыс ветлöм — мунöмнас сорласьлöмны жö.
Нянь артмытöмла, а тайö вöвлöма унаысь и дыр кадъясöн, йöз, дерт жö, корсьлiсны кьшöмпöт сиктысь сиктö ветлöмöн. Но тайö тшыгъялöмысь эз мездыв. И.Жеребцовлöн казьтылöм нин справочникысь позьö аддзыны со мый: 1608 воын межадорса деревняясын 28 овмöсысь витыс тыртöм (эновтöма), олысьясыс кувсьöмны или мунöмны Кама вылö. 1646 воын 39 овмöсысь кык тыртöм; Волсяын 1608 воын 46 овмöсысь 5 керка тыртöм, и 1646 воын 57 овмöсысь тыртöмыс 5 керка. 1630–40 воясса тшыгъялана кадö Сибырö татысь мунöмны 11 морт да кыкöн Вятка юлань. Визинын 1608 воын 85 овмöсысь тыртöмыс вöлöма дас, кытысь олысьясыс кувсьöмны либö мунöмны. Тайö висьталö, мый Сыктыв ю пöлöн коми йöз овлöмны вывтi на омöля. Урожайтöм воясö звер–пöткалы абу жö бур, кузя кö оз артмывлы вотöс, налöн лыдыс чинö либö вешйöны вотöс артманiнö. Со и быть лоö овмöс эновтöмöн йöзлы сиктысь вöрзьыны да мунны кынöмпöт корсьны став семьяöн, пöрысьöн и томöн, а висьысьяс да ёна пöрысьяс кулавлiсны. Волiсны–ö бöр тайö ветлысьясыс, некутшöм гижöдъясысь оз тыдав.
Позьö чайтны, мый Чуклöмö медводзöн овмöдчысь йöзлöн судьбаыс вöвлi стöч жö татшöм. Кытысь локтiсны Чуклöмö мöд овмöдчысьясыс, стöча шуны оз позь весиг прöзвищеяс серти. Верман сöмын чайтны: найö локтiсны бара жö Межадорысь либö мукöдлаысь Межадор пыр жö. Малец прöзвищеыс 1720 воын лоöма овöн — Мальцевöн, а Баженкоыс — Бажуковöн. Коми учёнöй Федор Плесовскийлöн "Комиын овъяс" (1997 во) небöг серти, Малец — семьяын ичöт пи (гортса и вичко ним). Татшöм прöзвищеа и ова йöзыс Сыктыв кузя вöвлöмны уналаын: Ыбын, Межадорын, мукöдлаын. Баженов — Баженко прöзвищеа йöз овлöмны зэв жö паськыда: Волсяын, Гриваын, Койгортын, Поёлын, Палаузын, Кебраын и св., но Бажуков формасö босьтöма сöмын Визинын. Вот öнi и тöдмав, кытысь сiйö вермис локны Чуклöмö, и локтiс–ö кыськö ылысь. Плесовский серти Баженкоыс — "колана", "виччысяна", "дона".
Но и Чуклöмö овмöдчылöм тайö йöз пиысь нöшта 32 во бöрын выль перепись дырйи гижöдас Васька Ондреевысь кындзи бара жö некод абу сюрöма. Сiдзкö, и найö выль местаын, Чуклöм деревняын, шудсö абу аддзöмны. 1678 вося Яренскöй уездса писцöвöй книгаысь тыдовтчисны важся олысь Васька Ондреевлöн Евсевейко Андреев пиыс аслас нин Ивашко пикöд. Баженка прöзвищеыс абу кольöма. Бöръяджыкся гижöдъясын налöн овыс лоö Шебынев. Тайö, дерт жö, межадорса Щебеневъяс пиысь. Налöн рöдыс Чуклöмын кутчысьöма матö кыксё во. 1811 воын вöлöмны на Григорий Алексеев Шебыневлöн нёль ая–пиа, а 1834 вося гижöдъясын Чуклöмын на пиысь некод нин оз гаравсьы.
2. Чуклöм: Сажин, Сельков да мукöд ов
1678 вося гижöд серти чуклöмса мукöд олысьясöн, Шебыневъясысь öтдор, вöлöмны выльяс: Ларко Матвеев Фадейко вокыскöд, Дёмка Мартемьянов Климка да Сенька пияныскöд и Климка Мартемьянов Васька пиыскöд. Олöмны нёль овмöсын. Нывбабаяс йылысь век на нем абу пасйöма. 1682 вося Крестоприводнöй книга серти олысьясöн пасйöмны тайö жö йöзсö. А 1707 вося переписнöй книгаö найö веськалöмны нин овъясöн. На пиын крестьянаяс: Иван Оксёнов Шебынев — кык морт, Фотей Мартемъянов сын Селиванов — öти морт, Савелий Ларионов Селиванов — öти морт, бöбыль Максим Дорофеев Черудов да нöшта крестьянаяс: Дементий Марков Сажин — вит морт, Еупл Дементьев Сажин — кык морт, Данило Климентьев Сажин, Микифор Бас Сажин да кык бöбыль — Тимофей Григорьев Мосиев и Иван Мосиев Фёдоров (Мосиевъяс бöрын паныдасьлöны Межадорын).
1720—23 воясся ревизскöй сказкаысь тыдовтчисны Селивановъяс да Черудов пыдди Сельковъяс. Тайö кадсяньыс быд крестьянин и бöбыль Россияын лоины оваöсь. Унджык овсö сетлöмны пöльяслöн ним да важысяньджык кутчысяна прöзвищеяс серти. "Ов — рöдлöн ним, кодöн заводитöны пасйыны котырса быд мортöс да кодi вуджö батьсянь пиянлы, мужиксянь гöтырлы (либö мöдарö)",— гижöма Фёдор Плесовскийлöн "Коми овъяс" небöглöн водзкывйын.
Сельков овлöн гöгöрвоанлуныс и артмöмыс абу кокни: первой пасйылöмны Селивановой да Черудовöн, а бöрынджык Сельковöн. Ф.Плесовскиöй серти, тайö овыс артмöма Селко, Селько нимысь, а вичко нимыс сылöн Селиван (артмöма кыдзи Василийысь — Васько, Михаилысь — Мишко, Селиванкоысь — Селько). Татшöм ногöн жö тайö ов артмöмсö дорйö Борис Унбегаун аслас "Русские фамилии" нима ыджыд научнöй небöгын, кодi петалöма 1972 воын Оксфордскöй университетын, а роч вылö вуджöдöмöн Москваын печатайтöма сöмын 1989 воын. Ф.Плесовский кувсьылöма таöдз воöн водзджык. Сiдзкö, кыкнан авторыс öта–мöдсьыс торйöн гижöны öткодя. А вот Сажин ов артмöм йылысь найö пасйöны оз öткодя: Плесовский гижö, мый сiйö артмис роч сажа — "Са" кывсянь, а Унбегаун — Александр — Саша нимсянь.
Селиванко нима олысьыс Чуклöмын эз тыдовтчыв. Гашкö, татшöм нима мортыс вöлi Чуклöмö локтöдз на и овыс кутчысьлiс нин водзджык. Сажинъяслöн овыс вермис лоны водзджык жö — Чуклöмö локтöдз на. Тайö Сельковъяссянь да Сажинъяссянь и паськалiсны сиктын налöн рöдъясыс, лоины сиктса кореннöй олысьясöн.
Ёна важсянь кыссьысь висьталöм серти, Сельковыс да Сажиныс быттьöкö пышйылöмаöсь воддза оланiнъяссьыс мыж вöчöмысь да овмöдчылöмаöсь Чуклöмö. Сельковыс быттьöкö öшыбкаöн ли кыдзи виöма мортöс, сы бöрын недыр дзебсясьöма горт гöгöрыс, сэсся пышйöма сэтысь. Первой кöсйöма овмöдчыны Паджгаын, но йöзыскöд абу артмöдчöма да вöртi локтöма Визин юдорса Важ Чуклöм местаö да сэтчö и лöсьöдöма овмöс. Сэсся гöтрасьöма межадорса ань вылö, и налöн чужасны пиян. Нянь артмытöмла налы ковмылöма пöчинöксьыс мунлыны, а пияныс сэсся бöр локтасны. Та йылысь матö сё во сайын лöсьöдлöма ичöтик гижöд Никита Фёдорович Сельков (Педöр Митит), кодi Пöёлса кык ступеня школа помалöм бöрын служитлöма Чуклöмын вичкоса дякöнöн, вöлöсьтса правленньöын да исполкомын гижöдъяс нуöдысьöн, велöдлöма Важ Чуклöм деревняын челядьöс.
Чуклöмö медводзöн локтысь Сельковлысь нимсö сiйö абу гаралöма. Эз сюр сiйö и архивса гижöдъясысь. Позьö чайтны, мый Фотейлöн да Ларионлöн Матвей батьыс лоö тайö мортнас. Сылöн вöлöма и коймöд пи — Сидор, кодлöн 1667 воын чужöма Дмитрий Сидоров пи и сылöн рöдыс водзö мунö. Сiдзкö, Чуклöмö бöр локылiсны Матвейлöн куим пи, а ачыс бöрсö эз нин волы.
Сiйö жö висьтасьöмъяс сертиыс, Сельков быттьöкö Сажинöс казялöма сёрöнджык. Кылöма чер шы и локтас видзöдлыны, кодi сэнi керасьö — уджалö. Сажин бара жö вöлöма быттьö оланiнысь пышйысь мортöн, уджйöзö пырöмысь. Овмöдчас Сельковсянь верст сайын öнъя Кырул вевдорö. Овмöдчысьяс öта–мöдыскöд оз ладмыны, дыр чöж вöлöмны зыкынöсь. Тадзи вöлi ли эз, сöмын бöрын ставыс шылясьöма. Но зэв дыр кежлö кольöма вöвлöм мыжъясöн öта–мöдсö кыскалöмыс. Да–й öнi на, пансясны кö татшöм сёрнияс, сиктса йöз тайöс тöдöны.
Губернияяс да уездъяс пыр государство век ёнмöдö ассьыс власьтсö, нуöдö переписьяс, медым выльмöдны и содтыны армия, нуöдны вот чукöртан удж. 1720 вося перепись дырйи йöзсö со кыдзи повзьöдлöмны: "А буде кто в нашей скаске о переписи, что какая мужска полу душа в утайке не отписано явился или кто (в тех) записках не отписан мужска полу людей указал и великий государь учинит нам смертнöй казнью, а в утаенном, что великий государь укажет". Сыктыв бердса и мукöд коми вöлöсьтъяс переписьсö вöчысьяс пасйылöмны "отхожöй" местаясöн. Тайö петкöдлö, мый йöз век на сэтысь корсисны вöля да бурджык олöм. Но олöм танi зумыдöн да бурöн абу вöвлöма. Тайöс петкöдлö чуклöмса йылысь со кутшöм гижöд: "в избенке нищей неподатной (вот мынтытöм) Родион Лукиянов сын Полканов 70 лет, брат его Аверкий 54 лет, у них жены Елена 47 лет, Ирина 40 лет, оба бездетны, пахотнöй земли не имеют. Кормяца черною работою между крестьяны".
1720 воас Сыктыв пöлöнса сиктъясын пасйöма уна тыртöм керка: Волсяын — 9, Поёлын — 19, Межадорын — 6, Визинын — 28 да св., а Чуклöмын — 2: "двöр пуст Данила Климентьева сына Сажиных, он взят в рекруты в 719 году; двöр пуст Федора Шубунева, он взят в рекруты в 715 году". Данила Сажинлöн овмöс бырöма, а сылысь гöтырсö да Игнатий писö ас орданыс босьтöмны рекрутлöн вокъяс.
Сажинъяс, Сельковъяс да Шебыневъяс век зiлисны бурмöдны кажитчана местасö — Чуклöмсö — да артеля уджöн пöткöдны кынöм, быдтыны челядьöс бур уджалысьясöн. И тайö весьшöрö эз вош. Воссис Чуклöм гöралöн кыпыдлуна кушыс, паськалiсны да бурмисны муяс да видзьяс, содiс скöт лыд, мый сайын вöлiны и бурджык урожайяс. Зiль йöз весавлiсны тыла, выль пашняяс, содтiсны угоддьöяссö. Чайтсьö, мый генеральнöй межеваниеöдз (1784—86 вв.) вöр–ваöн да угоддьöяс паськöдöмын крестьянаöс некод на эз падмöд. Государство эз на вермы став бöрсяыс видзöдны. Стрöитчан и пес вöр матын, матынöсь и угоддьö паськöданiнъяс. И кыйсянiн горт гöгöрын жо. Лёк вояс вуджны лои кокниджык дай бокысь кынöмпöт корсьны эз кут ковны. Олöм кутöма ладмыныджык.
Чуклöмса олысьяслы Межадор первойсяньыс вöвлöма юралан сиктöн, а Межадорса Введенскöй вичко — йöзöс чукöртысьöн, на вылö мöрччысьöн, кöть и ветлыны сэтчöдз вöлi ылын. Праздникъяс дырйи волысьлöмны, сиктын и пöчинöкын лоöны рöдвужъяс.
Межадорса и Чуклöмса йöзлöн XVII—XVIII нэмъясся олöм йылысь архивъясын торъя гижöдъяс абуöсь. Сэки вöлöсьтъясын некутшöм гижöдъяс эз на нуöдны. Губернияса да уездса архивъясысь крестьяналысь олöм сямсö позяс эськö казявны, но республикаса архивын найö абуöсь жö. Кысянь локылiсны Чуклöмö Сельковыс да Сажиныс,
вöлiны–ö найö рочьясöн, öнi тöдмавны он вермы. Межадорса вичколöн сэкся гижöдъяс абуöсь жö.
Миян ног, Сельков да Сажин вöлiны комиясöн да локтiсны сэсянь жö, кысянь мунiс налöн бурджык олöм корсян туйвизьыс — Кама да Вятка юяс бердсянь. Пыравлiсны сиктъясö да корсисны места, кытчö эськö позис поздысьны. Татшöминсö аддзисны Чуклöмысь и сэтчö овмöдчисны. Тадзи чайтöмас вайöдöны со кутшöм вöвлöмторъяс: 1719 воын переписнöй гижöдö веськавлöма Ефрем Архипов Сельков, кодi овмöдчылöма Лоймаса Семеново деревняö. Сiйö жö каднас Поёлö овмöдчылöма 35 арöса Козьма Иванов Сажин, кодлöн рöдыс водзö сэнi абу паськалöма. Кутшöм танi йитöд чуклöмса Сельковъяскöд да Сажинъяскöд? Со кутшöм; Лойма да Поёл Кама да Вятка вывса коми йöзлöн бур оланiн корсян туй вылынöсь и кутшöмкö рöдпомъяс налöн вермисны сэтчö кольччывны. Кад сертиыс тайö лöсялö.
Сельковъяс да Сажинъяс Чуклöмсянь важысянь паськöдчылöмны. Ревизскöй сказка серти, 1816 воын Визинса Еняиб деревняын лоöмны Сельковъяслöн кык овмöс. Öтиыс Василий Семенов. Сылöн батьыс — Семёныс — Фотей Арефалöн пи. Визинас мунöмыс артмö XVIII нэмлöн мöд джынйын. Сiйö жö каднас да сiйö жö деревняас мунлöма нöшта Прокопий Григорьев Сельков. Визинса тайö Сельковыслöн вöлöмны пиян: Федот, Яков, Иван да чурка Афиноген, кодöс 1830 воын казённöй палата вуджöдöма Устьсысольскса мещанскöй сословиеö. Сiйö стрöитлöма карас аслыс керка. Сылöн Пётр нима пи велöдчöма карса писарскöй школаын да писаравлöма Межадорса вöлöстнöй правлениеын 1870 воясö. Дерт, сылы удайтчывлiс волывны пöль чужанiнас — Чуклöмö.
1812 воö Чуклöмысь Межадорö вуджöма Гаврило Иванов Сельков аслас нывъяскöд. Пияныс сылöн абу вöлöмны, овыс абу паськалöма. Сажинъяс Межадорö вуджлöмны унджыкон. Сiйö жö 1812 воас Погостö мунлöма Михаил Михайлов Сажин. Аныбскöй деревняö вуджлöмны Карп Матвеев да Егор Васильев Сажинъяс. Тайö овыслöн лыдыс Межадорын век содö, 1915 воын сэнi нин сизим семья. Чуклöмса том йöз Межадорö и Визинö, дерт жö, вуджлiсны семья лöсьöдöм вöсна: кодкö гöтрасис – пырис невесталöн тыр овмöсö кодöскö сэсь босьтлöм гöтырыс бöр кыскис бать–мам оланiнас. Да и Межадорысь Чуклöмö локтысь – овмöдчысьяс вöвлöмны жö. XVIII нэм помын овмöдчылöма Василий Лапшин. Сылöн Захар пиыс локтöма Межадорысь жö батьыс дорö 1812 воын. 1834 вося ревизскöй сказкаö Чуклöмса олысьясöн веськавлöмны и Межадорса Раевскийяс, сы бöрын волöмны Зиновьевъяс.
3. Чуклöмса оланiнъяс
Кытчöджык лöсьöдлiсны Чуклöм пöчинöксö медводзöн овмöдчысьясыс, стöча пасйыны он вермы, сы вöсна мый та йылысь архивъясын оз гаравсьы. Позьö чайтны, мый тайö вöлi Важ Чуклöм. "Важ" нимаöн сiйö лои и межадорсалы, и пöчинöкö выль овмöдчысьяслы. Пöчинöк йылысь первойя гижöдас гаралöма, мый сэнi кык овмöс, куим сайö гектар муöн да виддзон. Та могысь колi нин кушöдны ыджыдкодь места. Важ Чуклöм грездсянь неылын эм "дарöвöй вылöн" шусяна места. Лöсялö, мый танi вöлiны медводдза олысьяслöн муясыс да колины сёрöнджык овмöдчысьяслы дарöвöй (дармöвöй, дась) муясöн. Татшöм нимсö пуктiсны сы вöсна, мый муыс вöлöма нин.
Мöд, 1646 вося гижöдъясö пасйöма нин пöчинöкын унджык олысь йылысь, налöн вöлöма нёль овмöс. Кöнi вöлiны тайö овмöсъясыс, бара оз тыдав.
Коймöд (1678 во) гижöдö олысьясöн веськалöмны нин Шебыневъяс, Сельковъяс да Сажинъяс, век на нёль овмöсын. А миянöдз воöм висьтасьöм серти Сажин овмöдчылöма Сельковысь бöрынджык, и торйöн. 1707 вося гижöдъясын пасйöма, мый Селивановъяслöн (Сельковъяслöн) крестьянскöй овмöсъясын уджавлöма (овлöма) öти бöбыль, а Сажинъяслöн овмöсъясын — кык бöбыль. Тайö гижöдыс петкöдлö, мый Чуклöмын йöзлöн кык торъя олан места. Тайöс нöшта вынсьöдö и генеральнöй межеваниелöн планыс (1804 во), конi Чуклöмскöй деревнясö петкöдлöма кыклаын. Чуклöмын Крестовоздвиженскöй вичко восьтöм бöрын йöзлöн оланiнъяс гижöдъясын торъялöны нин. Но та йылысь бöрынджык.
Медводзöн овмöдчысьяс Чуклöмын, дерт жö, заводитiсны овны сьöд вöр шöрын. Сэки öд Чуклöмса кыйсян гöраяс вöлiны важся вöрзьöдлытöм на гырысь вöр улын. Дерт, оланiнсö йöз лöсьöдлöмны мича да гажа местаясö. Предание серти, медводдза Сельков быттьöкö ассьыс овмöссö панлöма Визин юлöн крут да джуджыд берег йылö, пожöма вöрö. Преданиеын гаралöм пожöма вöрыс сiйö берег пöлöныс öнi на эм. Важ йöз тайö вöрсö абу керавлöмаöсь, гашкö, сы вöсна, мый вöр быдман местаыс оз шогмы му лöсьöдöм вылö вывтi крутöйысла. Со и мичмöдö öнöдз Важ Чуклöмöс. Тайö берег йылас пыр чукöртчывлiсны челядь — ворсны, а тулысын видзöдны йи да вöр кывтöм.
Важ Чуклöм — аслыссяма грезд. Сiйö быттьöкö дзебсьöма гора сайö да тыдыштö öтар помнас вичко дорсянь. Мöдар помыс тыдалö Жуöдбок гöра йывсянь. Чуклöм гöраыс танi кык судта. Улыс судтаас овмöдчылöмны—дзебсьылöмны йöз лёк ныра тöвъясысь. Войвывладорас, Понöльмылькйöдз, вöвлöма нюра места, кытi Дав — Жуöдладорсянь Визин юö лэччö Сельков — шор. Öнi сэтi косьтöма, пöртöма муö. Тайö нюрыс водзтi и кынтывлiс, гашкö, кöдзаяс да пуктасъяс. Грездлöн асыв—лунтi вылiсянь лэччö Вадоршор, сiйö торйöдö вöвлöм часовня гöраöс Кöсьта гöракöд, конi бара жö челядьлöн ворсанiн. Кырул грездкöд Важ Чуклöмсö юкöны нöшта на кык шор: Джуджыдшор да Кырулшор. Костыс Кырулсянь Важ Чуклöмöдз öти верст гöгöр. Берег пöлöн, шоръяс вомöныс важ йöз лöсьöдлöмны вöла туй, кодi мунлiс сэсся потшöса уличтi, вичко дорö кайлис шойна дортi да Мартын Ёгор керка бердтi. Уличаыс кутчысьлiс колхозъясöдз, сэсся сiйöс тракторöн гöрлiсны. Но пода туй сэт век на эм. Öнi лöсьöдöма бур асфальтируйтöм туй Важ Чуклöмö Жуöдладор помсянь, кайö важ гумладортi Чукадалшор кузя Чуклöм гöра йылас.
Сажинъяс овмöдчылöмны зэв жö бур местаö — Кырувшорйыв асыв бокö, бара жö лёк тöвъясысь дзебсьöмöн. Öнi на керка местаяссö позьö казявны — чой пöкатсö веськöдлöмны лэптöм муöн.
Йöз лыд содöм тшöктiс олысьясöс лэччыны ю бердса Кырул берег дорö. Природаыс сэтчö дасьтылöма жö лöсьыдiн, кытчö тöрлöма вель уна крестьянскöй овмöс.
Водзö йöз содöм бöрын, Лапшинъяс, Раевскийяс да Зиновьевъяс локтöм бöрын, ковмöма овмöдчыны Чуклöм гора йылас — Грездö, Погостö да Керöсö. Нöшта лэччöмны Гаддьö. Первойя кык оланiнъяссянь йöз век паськöдчисны муясöн, а ю пöлöныс да логъяс кузяыс — видзъясöн. Кыксё воöн лои весалöма вöрысь да пöртöма му–виддзö став Чуклöм гöрасö, уна вожа сёнъяснас. Сöмын вöралан местаяслöн нимъяс колялöмны на. Ягдор грездсянь Важ Чуклöм гöра баныслöн гöрöм муясыс век на шусьывлiсны Чöскан нöрысöн. Сiдзкö, танi быдмывлiс мича вöр.
Öнi Чуклöм гора йывсянь видзöдлан гöгöр да шензян, кыдзи олысьясыс татшöма вермöмны паськöдчыны. И ставсö ки помысь да чер помысь. Уджыс тырмылöма быдöнлы — айуловлы, эньуловлы и челядьлы. Вот и казялан, мый удж и сöмын удж вöлi чуклöмсаöс кок йылö сувтöдысьöн.
Кыдзи лои пасйöма нин, Чуклöм первойсяньыс вöлi Межадор улын. Ас костса йитöдъяс налöн быд боксянь вöвлöмны топыдöсь. И, дерт жö, öта–мöд костса туйтöг йöз эз вермыны овны. Пыр вöвлi ю кузя ва туй, веськыда пода туйяс, сэсся öта—мöдлы воча видзъяс весалöмöн артмылöма берег пöлöныс телегаа туй. Ю вомöныс лöсьöдлöмны вавывса пос. Чуклöмса войтыр 260 во чöж ветлöдласны Межадорса Введенскöй вичкоö. Вичколöн причт да сельскöй община, кытчö пыравлiсны и Чуклöмса крестьяна, пыр налы отсавлiсны. Мöд ногöн йöз эз и вермыны кок йылö сувтны. Öта–мöдлы да сиктъяс костса отсасьöм пыр вöвлöмны коланаöн.
А öнi нöшта чуклöмса оланiнъяс йылысь. Вичколöн метрическöй книгаясын йöзлысь оланiнъяссö пасъялöма торъя нимъясöн. Артмö, мый вичкосö лöсьöдома ыджыд нин шор сиктö, гижöдъясö сiйöс пасйöма Погост нимöн. 1868—72 воясся вичко гижöдъяс серти Погостын овлöмны Сажинъяс, Лапшинъяс, Зиновьевъяс да Раевскийяс. Танi медуна том йöз, чужлöма медуна кага. Асьныс чуклöмсаяс шöр сиктсö шулöмны Вичкодорöн. 1912 воын сэнi вöлöма 54 овмöс, 1920 воын — 52 овмöс, 1925 воын — 49, олысьыс — 206 морт. Чинöмыс сыын, мый йöзыс кутiсны овмöдчавны мукöдлаö. Танi жö овлiсны вичкоын служитысьяс.
Чуклöм гора йылын — Грезд, мöд ногöн Чоййыв (вичко гижöдъясын Нагорная деревня). 1912 воын танi лыддьысьöма 8 овмöс, 1920 воын — 11 и 1925 воын — 9, олöмны 40 морт. Олысьясыс Сажинъяс, Лапшинъяс, Раевский да öти овмöсын Сельков.
Вичкоса гижöдъясысь тыдовтчис, мый Кырулöн нимтылöм оланiн рочöн кутöма шусьыны Подгорнöй деревняöн. Танi овлöмны Сажинъяс, Лапшинъяс да öти овмосын Зиновьев. 1912 воын вöлöма 15 овмöс, 1920 воын — сымда жö и 1925 воын 81 олыся 21 овмöс.
Ягдорö медводз овмöдчылöмны 1870—71 воясö. Вичко гижöдö Ягдорская деревня первойысь веськалöма 1872 вося тöв шöр (январь) 19 лунö, кор пыртöмаöсь Николай Николаевич да Фекла Доминиановна Сажинъяслысь Василий писö. Татчö жö овмöдчöмны Федул Сельков, Конöлöн пияныс — Василий, Максим да Прохор Сажинъяс, Михаил Емельянов Сажин, Степан Васильев Лапшин. 1912 воын вöлöма нин 20 овмöс, 1920 воын — 19 и 1925 воын 99 олыся 17 овмöс.
Керöс деревня вичко гижöдö веськалöма Митка Керöс нимöн 1903 вося лöддза—номъя (июнь) 23 лунö, кор Андрей Александров да Евгения Карпова Сажинъяслöн чужöма Павел нима пи. Сэтчö жö овмöдчöмны Василий да Петр Михайлов Сажинъяс да мукöд. Деревняыс öдйö паськалöма. Вичкосянь сiйö абу ылын. Коластыс пыр чинiс öтар–мöдарсянь выль овмöсъяс стрöитöмöн, а школа стрöитöм бöрын дзикöдз быри. 1912 воын Керöсын вöлöма 34 овмöс, 1920 воын — 36 и 1925 воын — 41, а олысьыс 195. Овлöмны Сажинъяс да некымын Лапшин семья.
Гадь деревня первойысь веськалöма вичко гижöдö Гадьскöй деревня нимöн 1903 вося йирым (октябрь) 3 лунö. Сэки Андроник Савватиев Сажинлысь пыртöмны Елизавета нывсö. Та кадъясö жö сэнi овмöдчöмны Михаил Степанов да Алексей Вениаминов Сажинъяс, Протасий Алексеев да Семен Трофимов Лапшинъяс. 1912 воын вöлöма 10 овмöс, 1920 воын — 16 и 1925 воын — 17 овмöс, 80 олысьöн. Гадьнас деревнясö нимтылöмны шор сертиыс, кодi аслыссяма: быд тулыс гöра бокъяс сылöм бöрын, кор ваыс уна чöжсяс да пыксяс, шорыс гадь моз пöльтчö–вежöдö, сэсся потö да уськöдчö став чукöрмöм выннас да сöнiк лым сорнас Визин юö. Татшöм шорыслы и сетлöмны Гадь ним.
Понöльмыльк медводдзаысь гаравсьö 1905 воын. Ода- кора (май) 27 лунö вичкоын пыртöма Иван Дмитриев Сажинлысь Павла нима нывсö. Сэкся кадъясö жö овмöдчылöмны Парпоней Миколай, Ёгор Илля да Ёгор Симён (Сельковъяс). 1912 воын вöлöма 5 овмöс, 1920 воын — 7 и 1925 воын 29 олыся 9 овмöс. Öнi кольöма деревнялöн местаыс паськыд гöрöм муöн. Важ Чуклöмсянь нюрсайса тайö мылькйыс вöлöма понöля, сы серти местасö и нимтылöмны. Висьтавлiсны нöшта, мый танi вöвлöма чуд гу.
1904—1905 воясö йöз овмöдчылöмны Жуöдбокын. 1906 вося рака (март) 17 лунö вичкоын пыртöма Алексей Николаевич Сажинлысь Александра нывсö, а 1909 вося рака (март) 30 лунö Петыр Педöрлöн (Сельков) чужöма Иван пи. 1912 воын танi век на 2 овмöс, 1925 воын — 3, олысьыс 12. Öнi ставсö бара жö гöрöма, кольöмны сöмын ошинювса кыдз пуяс.
Тайö кадас жö овмöдчылöмны Жуöдын (дзик Жуöдбок улас). Кык деревня костас эм ключ, кысянь артмылiс шор, сылы и сетлöмны Сельков ним. Жуöдын 1912 воö вöлöма 6 овмöс, 1925 воын 47