Песнь 1
Ирмо́с: Пои́м Го́сподеви,/ прове́дшему лю́ди Своя́ сквозе́ Чермно́е мо́ре,/ я́ко Еди́н сла́вно просла́вися.
Па́вла Богоно́снаго, я́ко мона́шествующих удобре́ние,/ ве́рнии, соше́дшеся, пе́сньми по до́лгу почита́ем.
Был еси́ пусты́ни пе́рвый жи́тель, Па́вле сла́вне,/ и Небе́снаго Ца́рствия насле́дник показа́лся еси́ поще́нием.
Всего́ себе́ воздержа́нием очи́стив, всеблаже́нне,/ жили́ще яви́лся еси́ Бо́жие и А́нгелов единосе́льник.
Богоро́дичен: Пречи́стая Богоро́дице,/ яже воплоще́нно Присносущное и Пребожественное Сло́во/ па́че естества́ рождшая, пое́м Тя.
Ин кано́н Иоа́нна, его́же краегране́сие: Ни́ща страсте́й мя покажи́ моли́твами твои́ми, блаже́нне. Ио́сиф. Глас 2.
Песнь 1
Ирмо́с: Во глубине́ постла́ иногда́/ фараони́тское всево́инство преоруже́нная си́ла,/ вопло́щшееся же Сло́во всезло́бный грех потреби́ло есть,/ препросла́вленный Госпо́дь сла́вно бо просла́вися.
Обога́тився Боже́ственными доброде́тельми,/ бога́тство преоби́дел еси́ земно́е и Небе́сное получи́л еси́./ Те́мже мя, обнища́вши, Боже́ственнаго ра́зума обогати́ благода́тию,/ я́ко да твое́ воспою́, о́тче, жи́тельство равноа́нгельное.
Яре́м Госпо́день благи́й, блаже́нне, от ю́ности ты подъе́м,/ по́стническими боре́нии врага́ смири́л еси́,/ смире́нием Христо́вым воору́жся,/ и́мже возвы́сился еси́ на высоту́, Иоа́нне, к Небеси́.
Я́ко ше́ствовав стезе́ю те́сною,/ скорбьми́, и слеза́ми, и стена́ньми, и озлобле́нии, преподо́бне,/ к простра́ннейшей широте́ дости́гл еси́,/ обре́т оби́тель досто́йну боле́зней,/ о́тче Иоа́нне досточу́дне.
|
|
Богоро́дичен: Лю́тыми страсте́й наве́ты, Отрокови́це, обурева́емь и прило́ги грехо́вными преклоне́н,/ ко Твоему́ неусы́пному и непобеди́мому предста́тельству, Всепе́тая, любо́вию прибега́ю,/ уще́дри мя и спаси́, Присноде́во.
Песнь 3
Ирмо́с: Утвержде́й сло́вом Небеса́/ и зе́млю основа́вый на вода́х мно́гих,/ утверди́ мя к пе́нию славосло́вия Твоего́, Го́споди.
К Бо́гу о́ком твоея́ души́ взира́я, о́тче,/ Того́ возлюби́л еси́, возненави́дев земна́я/ и А́нгельскую соверши́в жизнь.
Луча́ми, о́тче, доброде́телей, страсте́й отгна́л еси́ мглу я́ве,/ просвеще́ние Ду́ха во твое́м се́рдцы прие́м.
Небе́сным хле́бом пита́яся, я́ко Илия́ дре́вле вра́ном,/ мы́сленный отбе́гл еси́, о́тче, Иезаве́ли, к покро́ву Христо́ву.
Богоро́дичен: Царь сла́вы и Творе́ц, обагри́в кровьми́, Богороди́тельнице,/ Свою́ багряни́цу омочи́в, таи́нственно очервлени́.
Ин
Ирмо́с: Процвела́ есть пусты́ня, я́ко крин, Го́споди,/ язы́ческая непло́дящая Це́рковь/ прише́ствием Твои́м,/ в не́йже утверди́ся мое́ се́рдце.
Кади́ло благово́нно Всеви́дцу, преподо́бне, твоя́ моли́твы прине́сл еси́,/ я́же обоня́в и прие́м, по́стническим лико́м причте́ тя.
|
|
Яви́лся еси́ чу́до велича́йше, сердца́, преподо́бне, благочести́вых ужаса́я:/ ка́ко пред враты́ претерпе́л еси́ роди́телей, нище́тствуя и оскорбля́емь.
Зако́нно в моли́твах и поще́ниях, преподо́бне, претерпева́я,/ в безстра́стие обле́клся еси́,/ пло́ти мудрова́ния смири́в кре́постию Боже́ственнаго Ду́ха.
Богоро́дичен: Я́ко мироуха́нен ши́пок от удо́лий, Пречи́стая, Чи́стый Тя обре́те/ и посреде́ Тебе́ всели́ся,/ благово́ния испо́лнив челове́чество.
Конда́к Па́вла, глас 3. Подо́бен: Де́ва днесь:
Я́ко свети́ло незаходя́щее мы́сленнаго Со́лнца,/ соше́дшеся, днесь восхва́лим в пе́снех:/ возсия́л бо еси́ су́щим во тьме неразу́мия,/ вся возводя́ к Боже́ственней высоте́,/ фиве́ев украше́ние, Па́вле преподо́бне, отце́в и по́стников тве́рдое основа́ние.
Ин конда́к Иоа́нна, глас 2. Подо́бен: Вы́шних ища́:
Вы́шних улучи́ти, прему́дре, жела́я,/ до́лу кра́сных, му́дре, преоби́дел еси́/ и, Христу́ обнища́вшему сообнища́в,/ ра́дуяся, после́довал еси́, Иоа́нне./ К Нему́ же приле́жно не преста́й моля́ся о всех нас.
Ин конда́к Иоа́нна, глас 3:
Уклони́лся еси́ жите́йскаго треволне́ния,/ и к приста́нищу Боже́ственному упра́вил еси́, блаже́нне, ше́ствия своя́,/ и источи́л еси́ исцеле́ния, я́ко струи́,/ ве́рою и любо́вию, Иоа́нне, к тебе́ притека́ющим и вопию́щим:/ предста́ни в День Суда́ восхваля́ющим светоно́сную па́мять твою́, о́тче,/ и страсте́й и мук изба́ви.
|
|
Седа́лен, глас 1. Подо́бен: Гроб Твой, Спа́се:
Ми́ра кра́сная от се́рдца возненави́дев/ и Еди́наго Бо́га от души́ возлюби́в,/ пусты́ню, я́ко во обита́тельный град, Па́вле, пости́гл еси́./ В еди́нех то́кмо виде́ниих упражня́яся,/ яви́лся еси́, я́ко А́нгел, с пло́тию живы́й./ Тем тя почита́ем.
Сла́ва, ин седа́лен Иоа́нна, глас 3. Подо́бен: Красоте́ де́вства:
Бога́тство тле́нное и сла́ву мимотеку́щую оста́вив,/ Небе́сное бога́тство восприя́л еси́ и сла́ву, о́тче,/ и́стинно ве́чнующую, блаже́нне./ Тем блажи́м свято́е твое́ успе́ние/ и, торжеству́юще в нем, вопие́м тебе́:/ помяни́ нас ко Го́споду, я́ко име́я, Иоа́нне, дерзнове́ние.
И ны́не, Богоро́дичен:
Я́ко невозде́ланная, Де́во, лоза́,/ красне́йший Грозд прозябла́ еси́, источа́ющ нам вино́ спаси́тельное,/ всех веселя́щее ду́ши и телеса́./ Те́мже, я́ко вину́ Тя до́брых блажа́ще при́сно,/ со А́нгелом вопие́м Тебе́:/ ра́дуйся, Благода́тная.
Крестобогоро́дичен:
Неискусобра́чная Чи́стая и Ма́ти Твоя́, Христе́,/ ви́дящи Тя ме́ртва ви́сяща на Кресте́, ма́терски пла́чущи, глаго́лаше:/ что Тебе́ воздаде́ евре́йский беззако́нный собо́р и неблагода́рный,/ мно́гих и вели́ких Твои́х, Сы́не Мой, даро́в насладивыйся?/ Пою́ Твое́ Боже́ственное снизхожде́ние.
Песнь 4
Ирмо́с: Та́йно проро́к предзря́ от Де́вы Тя, Сло́ве, воплоща́ема,/ пе́сненно вопия́ше:/ сла́ва си́ле Твое́й, Го́споди.
Насажде́н в до́му Бо́жии, доброде́телей благопло́дие прозя́бл еси́/ и плотска́я увяди́л еси́ воста́ния по́стничеством твои́м.
Огне́м любве́ Бо́жия страсте́й те́рние попали́л еси́/ и тебе́ сама́го Ду́ха, о́тче, жили́ще показа́л еси́.
Жезло́м доброде́тельныя твоея́ жи́зни, я́коже зве́ри, стра́сти отгна́л еси́,/ те́мже и твоя́ смерть зве́ри на погребе́ние твое́ собра́.
Богоро́дичен: Багряни́ца истка́ся та́инственная из чи́стых крове́й Твои́х всех Бо́гу,/ в ню́же оде́явся, Богоро́дице, соедини́ нас Бо́гу и Отцу́.
Ин
Ирмо́с: Прише́л еси́ от Де́вы,/ не хода́тай, ни А́нгел, но Сам, Го́споди, вопло́щся,/ и спасл еси́ все́го мя, челове́ка./ Тем зову́ Ти/ сла́ва си́ле Твое́й, Го́споди.
В ру́бищах убо́гих сокро́вище сокрове́но яви́лся еси́, Богодохнове́нне:/ Боже́ственную бо оде́жду возлюби́л еси́/ и, оде́явся, в черто́г Вы́шний вшел еси́.
Прие́м Небе́сное се́мя, Богодохнове́нне, се́рдца браздо́ю клас красе́н возде́лал еси́,/ умы́ препитава́ющ преподо́бно па́мять твою́ чту́щим.
Претерпе́л еси́ в те́снейшей ку́щи, чу́дне, нищ,/ я́коже други́й Ла́зарь, во́лею быв./ Те́мже почи́л еси́ Авраа́ма ны́не в не́дрех, о́тче преподо́бне.
Богоро́дичен: Упра́ви моея́ души́ движе́ния, Всенепоро́чная,/ к Боже́ственным повеле́нием Возсия́вшаго из чре́ва Твоего́,/ бу́ри избавля́ющи мя жите́йских собла́знов хода́тайством Твои́м.
Песнь 5
Ирмо́с: У́тренююще, вопие́м Ти:/ Го́споди, спаси́ ны,/ Ты бо еси́ Бог наш,/ ра́зве Тебе́, ино́го не ве́мы.
В пе́ниих и поще́ниих, моли́твах же и бде́ниих пожи́в, преподо́бне,/ к Бо́гу всели́лся еси́.
Житие́ твое́ всечестно́е бысть в Го́споде, Па́вле всеблаже́нне,/ и погребе́ние твое́ пресла́вно.
Тече́ние поще́ния, преподо́бне, сконча́в,/ Вы́шним си́лам собесе́дник, о́тче, был еси́.
Богоро́дичен: Де́ву по Рождестве́ пое́м Тя, Богоро́дице,/ Ты бо Бо́га Сло́ва пло́тию ми́ру родила́ еси́.
Ин
Ирмо́с: Просвеще́ние во тьме лежа́щих,/ спасе́ние отча́янных, Христе́ Спа́се мой,/ к Тебе́ у́тренюю, Царю́ ми́ра,/ просвети́ мя сия́нием Твои́м:/ ино́го бо, ра́зве Тебе́, бо́га не зна́ю.
Стра́нен земны́х сласте́й был еси́,/ стра́нен свои́х, стра́нен роди́телей твои́м изволе́нием,/ и, воздержа́нием себе́ очи́стив,/ усво́ился еси́ Вседержи́телю, о́тче Иоа́нне, обнища́в ду́хом.
Храм себе́ Святы́я Трои́цы соверши́в, претерпе́л еси́, утесня́емь ку́щею,/ Боже́ственными поуче́нии ду́шу очища́я/ и добро́ту Бо́жию неизглаго́ланную, о́тче Иоа́нне, при́сно зря
Зако́на Бо́жия испо́лнитель яви́лся еси́,/ ничто́же предсуди́в па́че Сего́ любве́, Богому́дре о́тче,/ ни бра́тий бо, ни роди́телей тя любо́вь,/ ниже́ бога́тство, ниже́ досто́инство, ниже́ пло́ти сла́дость разсла́биша.
Богоро́дичен: Емману́ила, всех Влады́ку, ражда́еши нетле́нно,/ пребы́вши Де́ва и по рождестве́, Де́во Ма́ти./ Его́же непреста́нно моли́/ искуше́ний вра́жиих изба́вити под кров Твой прибега́ющия.
Песнь 6
Ирмо́с: Ри́зу мне пода́ждь све́тлу,/ одея́йся све́том, я́ко ри́зою,/ Многоми́лостиве Христе́ Бо́же наш.
Ру́ки просте́р к Бо́гу, ду́шу твою́, преподо́бне, Тому́ преложи́л еси́,/ во дни и нощи́ благоугожда́я Ему́.
Просла́виша успе́ние твое́ А́нгелов во́инства,/ проро́ков же чи́ни и святы́х апо́столов, о́тче преподо́бне.
Бу́рю страсте́й пребе́г, ве́трилом, преподо́бне, кра́йняго по́стничества/ в небу́рное приста́нище устреми́лся еси́ Христо́во.
Богоро́дичен: Еди́на сло́вом пло́тию Сло́во Ро́ждшая,/ изба́ви, мо́лимся, сете́й врага́ ду́ши на́ша.
Ин
Ирмо́с: В бе́здне грехо́вней валя́яся,/ неизсле́дную милосе́рдия Твоего́ призыва́ю бе́здну:/ от тли, Бо́же, мя возведи́.
Го́рдаго зми́я низложи́л еси́ смиреному́дрия ору́жии, всеблаже́нне,/ и, возвы́сився ду́хом, во оби́тели присножи́зненныя всели́лся еси́.
Дарова́ний испо́лнился еси́ Ду́ха и лука́вствия покори́л еси́ ду́хи,/ я́ко смы́слен, и прему́др, и Бо́гу весьма́ возложе́н.
Безстра́стия сия́я высо́тами, о́тче Иоа́нне,/ коли́бою50 утесня́емь и напа́стьми облага́емь,/ терпе́л еси́, Боже́ственне укрепля́емь.
Богоро́дичен: Равноде́тельна Ро́ждшему и сопресто́льна Сло́ва/ из утро́бы Твоея́, Чи́стая, воплоти́ла еси́,/ за благоутро́бие неизрече́нное на́ше все́ поне́сшаго.
Конда́к, глас 2. Подо́бен: Вы́шних ищи́:
Возлюби́в, прему́дре, нищету́ неокра́дому,/ роди́телей твои́х бога́тство возненави́дел еси́/ и, Ева́нгелие в рука́х твои́х держа́,/ после́довал еси́ Христу́ Бо́гу, Иоа́нне,/ моля́ся непреста́нно о всех нас.
И́кос:
Кто дово́лен досто́йно воспе́ти твоя́ труды́, и боле́зни,/ и де́лания мно́гая, и сла́ву, и вели́чество?/ Но моли́твами твои́ми к Бо́гу благоприя́тными/ Ду́ха благода́ть мне ны́не пода́ждь,/ я́ко да твоя́ па́че естества́ по́двиги изреку́ ве́рно/ и воспою́, еже́ па́че сло́ва, терпе́ние тво́е и со́вести пожда́ние, всеблаже́нне,/ и́мже льсти́ваго врага́ посрами́л еси́./ Не преста́й моля́ся о всех
Песнь 7
Ирмо́с: В нача́ле зе́млю основа́вый/ и Небеса́ сло́вом утверди́вый,/ благослове́н еси́ во ве́ки, Го́споди Бо́же оте́ц на́ших.
Мудрова́ние плотско́е покори́в Ду́ху, преподо́бный вопия́ше:/ благослове́н еси́ во ве́ки, Го́споди Бо́же оте́ц на́ших.
Спасе́н быв от вра́жиих се́тей, преподо́бне, в ра́дости вопия́ше:/ благослове́н еси́ во ве́ки, Го́споди Бо́же оте́ц на́ших.
Страсте́й пла́мень весь попра́в по́стнически, преподо́бный вопия́ше:/ благослове́н еси́ во ве́ки, Го́споди Бо́же оте́ц на́ших.
Богоро́дичен: Не́бо сотвори́вый Де́ву,/ и из Нея́, я́ко со́лнце, возсия́в,/ благослове́н еси́ во ве́ки, Го́споди Бо́же оте́ц на́ших.
Ин
Ирмо́с: Богопроти́вное веле́ние беззако́ннующаго мучи́теля/ высо́к пла́мень вознесло́ есть,/ Христо́с же простре́ Вогочести́вым отроко́м ро́су духо́вную,/ Сый благослове́н и препросла́влен.
Те́сный предпоче́л еси́, не́жели простра́нный, путь, достосла́вне,/ и, ра́дуяся, претерпе́л еси́ пред враты́ роди́телей твои́х,/ укоря́емь и удруча́емь мно́гими боле́зньми, Богоблаже́нне.
Тебе́ сама́го удобри́л еси́ красне́йшими, му́дре, восхожде́нии,/ пло́ти умертви́в мудрова́ние./ Те́мже всели́лся еси́ в Небе́сная,/ лико́м счисля́емь при́сно честны́х отце́в, досточу́дне.
Пути́ ше́ствуя, вводя́щия к Боже́ственному поко́ю,/ уклони́лся еси́ про́пастей де́монских, блаже́нне,/ Боже́ственною покрыва́емь благода́тию, вопия́ше:/ Сый благослове́н и препросла́влен.
Богоро́дичен: Пое́м Рождество́ Твое́, Благослове́нная,/ и́мже изба́вихомся дре́вняго осужде́ния,/ и Тя блажи́м, Богоблаже́нная, Еди́ну, Ю́же возлюби́,/ Сый благослове́н и препросла́влен.
Песнь 8
Ирмо́с: Безнача́льного Царя́ сла́вы,/ Его́же трепе́щут Небе́сныя си́лы,/ по́йте, свяще́нницы,/ лю́дие, превозноси́те во вся ве́ки.
Поревнова́л еси́ Иоа́нну Богому́дрому Предте́чи, в пусты́ни пости́вся,/ с ни́мже и жизнь получи́ти сподо́бился еси́ и́стинно присносу́щную.
Угаси́л еси́ страсте́й пе́щи, о́тче наш, воздержа́ния росо́ю, вопия́ всеблагоче́стно:/ лю́дие, превозноси́те Христа́ во ве́ки.
Рай и́стинно соде́лал еси́ пусты́ню,/ в ней преизя́ществовав во вся́кой доброде́тели,/ те́мже и ра́я сла́дости сподо́бился еси́.
Богоро́дичен: Я́ко иму́щи к Бо́гу дерзнове́ние,/ Всепе́тая Богома́ти Мари́е,/ умоли́ Его́ бед изба́вити ве́рою Тя пою́щия.
Ин
Ирмо́с: В пещь о́гненную ко отроко́м евре́йским снизше́дшаго/ и пла́мень в росу́ прело́жшаго Бо́га,/ по́йте, дела́, я́ко Го́спода,/ и превозноси́те во вся ве́ки.
Неветша́емый себе́, Иоа́нне, доброде́тельми упещре́нне истка́ хито́н одея́нием нище́тным:/ в ви́де ни́щаго ты оде́ялся еси́, пред враты́ роди́телей претерпева́я.
Непоро́чен, я́коже други́й И́ов, пред враты́ злостра́ждеши,/ я́ко на гно́ищи, терпя́ уко́ры рабо́в твои́х, му́дре, гла́дом же и жа́ждею дручи́мь,/ те́мже насле́довал еси́ Го́рнее Ца́рствие.
После́довал еси́ я́ве, е́же прия́л еси́ рука́ми, Ева́нгелию,/ и обнища́л еси́, блаже́нне, се́туя во всей жи́зни,/ и кро́ток был еси́, и незло́бив, и Ца́рствия Го́рняго насле́дник.
Богоро́дичен: Струю́ приснотеку́щую нам, притека́ющим к Тебе́, Чи́стая, точи́ши:/ ея́же оби́льную благода́ть почерпа́юще,/ Твое́ пое́м Рождество́, Пречи́стая, и превозно́сим во ве́ки.
Песнь 9
Ирмо́с: Неви́димаго зра́ком Боже́ственным прие́мшая,/ Неискусобра́чная Де́во и Ма́ти,/ пе́сньми Рождество́ Твое́ велича́ем.
Я́ко сокро́вище тя мы́сленное сокрове́нно, преподо́бне, откры́ Бог Анто́нию,/ нам же в сла́ву и ра́дование.
В страх Бо́жий себе́ сама́го пригвозди́в, о́тче преподо́бне,/ и сме́рти поуче́нием житие́ соверши́в, жи́зни сподо́бился еси́.
Я́ко дерзнове́ние к Бо́гу стяжа́в,/ моли́ о и́же на земли́ соверша́ющих ве́рою па́мять твою́ сию́,/ Па́вле блаже́нне.
Богородичен: Собезнача́льнаго Отцу́ и Свято́му Ду́ху заче́нши Христа́/ и ро́ждши несказа́нно, Де́во, моли́, е́же спасти́ся нам.
Ин
Ирмо́с: Безнача́льна Роди́теля Сын, Бог и Госпо́дь,/ вопло́щся от Де́вы, нам яви́ся,/ омраче́нная просвети́ти, собра́ти расточе́нная./ Тем Всепе́тую Богоро́дицу велича́ем.
Кре́пость моя́ и пе́ние Госпо́дь, – взыва́л еси́, – предста́теля тьмы в Сем побежда́ю,/ мечта́нных ле́стей, я́же от него́, ника́коже бою́ся,/ еди́ну мечта́я добро́ту Боже́ственную и непристу́пную.
Я́ко земля́ ту́чна, преподо́бне, твое́ се́рдце прия́т Небе́сное се́мя у́мными бразда́ми/ и стори́чествующий клас плодоно́сит,/ пита́юще всех, ве́рно чту́ших тя, ду́ши, Богоблаже́нне.
Освяти́ Госпо́дь из ложе́сн тя, блаже́нне, и к Себе́ ше́ствия твоя́ напра́ви./ Те́мже счи́слился еси́ преподо́бным, благоче́стно пожи́вшим,/ с ни́миже обоже́ния наслажда́ешися, пресла́вне.
Богоро́дичен: Све́та жили́ще утро́ба Твоя́ бысть,/ И́мже свет во тьме седя́щии ви́деша./ Те́мже Тя гла́сы немо́лчными, Ма́ти Бо́жия, при́сно воспева́ем/ и любо́вию почита́ем, я́ко наде́жду душ на́ших.
Свети́лен. Подо́бен: Жены́, услы́шите:
Роди́телей пристра́стие оста́вив и бога́тство теку́щее,/ твой крест взял еси́, о́тче, и Христу́, Иоа́нне, преусе́рдно после́довал еси́:/ по́стнически же умертви́л еси́ стра́сти, к безстра́стию восте́кл еси́/ и мо́лишися о нас, Богоно́се.
Богоро́дичен:
Сове́та вели́каго А́нгела О́тча родила́ еси́, Христа́, Всепе́тая Отрокови́це, Царя́ сла́вы:/ Его́же Крест преподо́бнии и по́стницы взе́мше, в след Сего́ потеко́ша./ С ни́миже непреста́нно моли́ о нас, Богоро́дице.
На хвали́тех стихи́ры, глас 4. Подо́бен: Я́ко до́бля:
Ты, толсто́ту теле́сную раздра́в, о́тче преподо́бне,/ духо́вную благода́ть откры́л еси́ и свет ея́ показа́,/ и челове́ки просвети́, и наста́ви же я на Христо́ву и́стину,/ Его́же моли́ от тли и бед изба́вити/ ве́рою пою́щия присночестну́ю твою́ па́мять.
Иуде́ов же онеми́51 и е́ллином же связа́ многоглаго́ливы язы́ки,/ изъясни́ же благоче́стия за́поведи,/ Дух бо, преподо́бне, в пусты́нях при́сно совеща́ющ, изноша́ше,/ Его́же моли́ от тли и бед изба́вити/ пою́щия ве́рно присночестну́ю твою́ па́мять.
А́нгелом прича́стие и му́чеником соли́чне,/ иере́ом же, о́тче, состо́льне,/ о любо́вию чту́щих тя Христа́ убо моли́,/ заступа́я нас от скорбе́й/ и умоли́ от тли и бед изба́вити ны,/ ве́рно пою́щия присночестну́ю твою́ па́мять.
Сла́ва, глас 2:
Отве́ргся ми́ра и су́щих в ми́ре, преподо́бне,/ Ева́нгелие взем, ева́нгельски Христу́ после́довал еси́/ и, в ку́ще живы́й, я́ко в раи́, та́йно,/ коне́чным жестокожи́тием пло́ти/ человекоуби́йцу зми́я удави́л еси́./ Те́мже на Небесе́х водворя́яся, Иоа́нне блаже́нне,/ испроси́ нам ве́лию ми́лость.
И ны́не, Богоро́дичен и́ли Крестобогоро́дичен. Подо́бен: Егда́ от Дре́ва Тя:
Егда́ нескве́рная А́гница/ ви́де Своего́ А́гнца,/ на заколе́ние я́ко Челове́ка во́лею влекома,/ пла́чущи, глаго́лаше:/ безча́дствовати Мя ны́не тщи́шися, Христе́, ро́ждшую Тя./ Что сие́ сотвори́л еси́, Избави́телю вся́ческих?/ Оба́че воспева́ю и сла́влю/ Твою́, ю́же па́че ума́ и сло́ва, кра́йнюю бла́гость, Человеколю́бче.
На стихо́вне Окто́иха.
Сла́ва, глас 8:
Мона́хов мно́жества,/ наста́вника тя почита́ем, о́тче наш Па́вле,/ твое́ю бо стезе́ю вои́стинну пра́во ходи́ти позна́хом./ Блаже́н еси́, Христу́ рабо́тав,/ и вра́жию обличи́л еси́ си́лу,/ А́нгелов собесе́дниче, преподо́бных соприча́стниче и пра́ведных,/ с ни́миже моли́ся Го́споду/ поми́ловатися ду́шам на́шим.
И ны́не, Богоро́дичен и́ли Крестобогоро́дичен. Подо́бен: О, пресла́внаго чудесе́!
Что зри́мое виде́ние,/ е́же Мои́ма очи́ма ви́дится,/ о Влады́ко!/ Содержа́й всю тварь, на Дре́во воздви́жен быв,/ и умира́еши, всем Дая́й жизнь, -/ Богоро́дица, пла́чущися, глаго́лаше,/ егда́ узре́ на Кресте́ возноси́ма/ Су́щаго, из Нея́ неизрече́нно возсия́вшаго/ Бо́га и Челове́ка.
На Литурги́и.
Блаже́нны, Па́вла от кано́на, песнь 3-я и Иоа́нна, песнь 6-я. Проки́мен, глас 8: Восхвалятся преподобнии во славе, / и возрадуются на ложах своих. Стих: Воспойте Господеви песнь нову, хваление Его в церкви преподобных. Апо́стол к Гала́том, зача́ло 213. Аллилу́ия, глас 6: Блажен муж, бояйся Господа, в заповедех Его восхощет зело. Стих: Сильно на земли будет семя его. Ева́нгелие от Матфе́я, зача́ло 43. Прича́стен: В па́мять ве́чную бу́дет пра́ведник, от слуха зла не убоится.
Ве́домо буди́, я́ко по отда́нии пра́здника Богоявле́ний, января́ 15-го числа́ в неде́ли и во дни святы́х пра́зднуемых, катава́сию пое́м: Су́шу глубороди́тельную зе́млю: И до отда́ния пра́здника Сре́тения Госпо́дня.
Преподобный Павел Фивейский
Родился в Египте, в городе Фиваиде, около 228 года. Родители воспитали его в христианской вере. После их кончины он претерпел много скорби от корыстолюбивого родственника, который, желая присвоить наследственное имущество Павла, вознамерился предать его на мучения при гонителе христиан императоре Декии (249 – 251). Узнав об этом, Павел покинул отчий дом и удалился вглубь пустыни, где долгие годы подвизался в совершенном одиночестве, пребывая в непрестанной молитве. Питался он плодами финиковой пальмы и хлебом, который ему приносил прилетавший ворон.
Господь открыл местопребывание Своего угодника преподобному Антонию Великому (†356; память 17 января), также подвизавшемуся в Фиваидской пустыне. У преподобного Антония возник помысл, что нет в Фиваидской пустыне другого человека, который больше чем он подвизался бы в трудах и молитвах к Богу. Тогда он услышал глас: «Антоний, есть раб Божий, который совершеннее тебя и прежде тебя поселился здесь в пустыне. Иди в глубину ее и найдешь его»
Господь вразумил святого, открыв ему существование в пустыне еще другого великого подвижника – преподобного Павла Фивейского. Преподобный Антоний немедленно отправился в путь. Совершив трудное путешествие по знойной пустыне, он, при помощи Божией, достиг пещеры, где жил преподобный Павел. Встретившись, оба старца назвали друг друга по имени, облобызались и долго беседовали. Прилетевший ворон принес им обоим хлеб, преломив который, они насытились. Преподобный Павел рассказал о своей жизни в пустыне; он открыл своему собеседнику, что настало время его кончины, и завещал похоронить его.
Преподобный Антоний спешно отправился обратно, взял в своей келлии мантию для погребения святого Павла и, нисколько не отдохнув, повторил тот же путь. Подходя к пещере святого Павла, он увидел, как святая душа его с сонмом ангелов возносится на Небо.
Преподобный Павел скончался во время коленопреклоненной молитвы с простертыми к небу руками в 341 году, в возрасте 113 лет, проведя в пустыне 91 год в полном уединении.
Два льва, пришедшие из пустыни, вырыли могилу для почившего. Преподобный Антоний обвил его мощи мантией, со слезами простился с ним и совершил погребальный обряд. Львы не отходили от могилы до тех пор, пока преподобный Антоний не повелел им уйти в пустыню.
Одежду святого Павла, изготовленную из пальмовых листьев, преподобный Антоний взял себе и хранил как великую святыню, надевая ее только в праздники Воскресения Христова и Пятидесятницы.
Тело преподобного Павла Фивейского, по воле императора Мануила Комнина (1146 – 1180), было перенесено в Константинополь и положено в монастыре Перивлепты, во имя Пресвятой Богородицы. В 1240 году святые мощи преподобного Павла были перенесены в Венецию, а затем – в Венгрию, в город Офен. Честная глава святого Павла хранится в Риме. Преподобный Павел, первый отшельник Верхней Фиваиды, считается отцом православного монашества.