Служба Святому Патрикию, просветителю Ирландии (написана в РПЦЗ, автор тот же, что написал красивую службу блж. Ксении (она издавалась у нас в "коричневой" минее, к сожалению, в "зелёной" другая служба))
На вечерне:
Стихиры, глас 1:
Дубравы и хо=лми И=рския земли,/ возвесели=теся, / езе=ра и реки, взыграйте, / се бо приближися вам благо-словение / и окропление свыше/ благодатию Божиею,/ грядет бо к вам просветитель ваш/ и отец духовный,/ ко апостольству Богом призв=анный, / и ревнитель веры право-славныя\ Патри=кий, во святителех славный.
Вопиет Патрикий святый/ ко новопросвещенным христианом:/ внемли=те, чада моя духовная, /аз вас родих Евангельским словом, / обручих вас яко невесту/ Христу Богу, / стойте убо в вере / и исповедуйте ю небоя=зненно, / противоборе=ния языческаго не убойтеся, / да Бог вам Помощник великий\ и Покровитель яви=тся.
Велия твоя вера,/ святителю Патри=кие, / се бо отечество твое/ и страны=, Христом просвеще=нныя, оставль,/ в землю, во тьме язычестей пребывающую,/ потекл еси, / благовестие Христово/ принося заблуж-дающим, / и не отступил еси,/ дондеже в веру право-славную/ землю всю обратил еси,\ темже тя достойно восхваляем.
Слава, глас 8
Кто изречет болезни и борения,/ яже претерпел еси, Патри=кие,/ проповедуя слово Божие/ во тьме язычестей седящим;/ кто изочтет капли слезныя,/ яже нощию проливал еси, / в пустынном уединении моля=ся,/ страхования от звере=й ди=виих/ и навождений диавольских не убоялся еси,/ прогоняя тыя/ силою креста Господня,/ егоже над всею землею И=рскою\ победно водрузил еси.
И ныне, глас той же
На стиховне
Слава, гл. 2:
Отечествие Небесное возлюбив / и того достигнути желая, / отечествие земное оставил еси / и в земле чужде=й/ новыя люди духовно породил еси, / отец истинный тем являяся / и Господеви взывая: / се аз и дети,\ яже дал ми еси.
И ныне, глас тойже
Мати Божия и Мати христианом, / на Твоя чада умило-сердися,/ аще бо и согрешаем,/ но в покаянии зовем:/ не остави нас, сирых,/ но руце Твои простри нам,\ изводящи нас на путь спасения.
На утрени:
Тропарь глас 3
Святителю Патрикие,/ равноапостольный чудотворче/ просветителю Ирския страны,/ моли Милостиваго Бога/ оставления прегрешений даровати\ душам нашим.
Ин тропарь, глас 4
Благодать Божию воcприял еси, землю плена своего любовию Христовою просвещая.Евангельскаго света апостол явился еси, чудесами и премудростию Божиею нечестие языческое низлагая. Темже молимтися, святый равноапостольный Патриче Просветителю Ирския земли, моли Христа Бога спастися душам нашим.
КАНОН, Гл. 4,
Егоже краегранесие: «ПЕЧАТЬ ТВОЕГО АПОСТОЛЬСТВА ИРСТИИ ЛЮДИ.»
Песнь 1
Воспою Тебе, Господи Боже мой / яко извел еси люди/ от работы Египетския / и покрыл же еси\ колесницы фараоновы и силу.
Проповедниче равноапостольный, / словом Богодухновенным и житием слово утверждая, / извел еси люди Ирския, якоже Моисей из Египта / от тьмы языческия ко свету веры Христовы.
Ереси Пелагиевой противостав мужественне, / благодатную силу Христову являл еси людем, / просвещая цари и князи и всяк возраст и чин, // приводя же их во ограду церковную.
Что убо речем, Патрикия святаго воспоминающе, / ревность ли его апостольскую восхвалим, / озлоблением ли и прещением, яже претерпел есть, подивимся, / труды ли и подвиги и смиренномудрия глубину воспоем, / таже Христа Бога, силу Свою избранному Своему к совершению всех сих подавшему, прославим.
Богородичен:Ааронов жезл процветый,/ купина несгораемая / прообразоваша Тя, Невесто Неневестная, Дево Бого-родице, / воплощению Слова Предвечнаго послужившую.
Песнь 3
Утверждение на Тя надеющихся, Христе Боже / в вере православней Твоей/ утверди нас \ яко Человеколюбец.
Терпением многим/ добродетели стяжал еси,/ делом слово/ проповеди твоей утверждая \ во славу Божию.
Телесная озлобления/ и искушения многоразличная/ и уничижение претерпевая, / неустанно на ниве Христовой/ трудился еси, Патри=кие, / не отступая, ниже смущаяся,/ но в вере и надежди/ на помощь Божию\ утверждаяся.
Ве=ждем твоим дремания/ и телу упокоения/ не давал еси, святителю / неустанно го=ры/ и до=лы земли Ирския преходя=, / веру истинную насаждая\ и новообраще=нныя люди наставляя.
Богородичен:Отрада и Утешение подвизающихся, / апостольская немолчная уста,/ Ты еси, Владычице, / но даждь нам,/ нищим и убогим,/ Тебе вместо даров достойных \ пение сердечное приносити.
Седален, гл. 7:
Писаний священных рачителю, / в Слове Божием поучался еси неленостно, / душу твою от сего источника Божественнаго напояя / и разум мудростию небесною питая, / темже и преподал еси учеником твоим Богооткро-венную истину, / яже и в писаниих твоих запечатлел еси.
Песнь 4
Твоего на земли явления, Христе Боже / проповедая пророк пришествие / с веселием вопияше // слава силе Твоей, Господи.
Еленю на горах Ароматских подобяся, / горы и холми обтекал еси, церкви созидая и христианы в вере православней наставляя, / в места же пустынная уеди-няяся, непрестанно молился еси, во еже новому стаду твоему спастися.
Грехолюбивый мир от юности твоея оставль, / во обителех монашеских Мартина славнаго и ученик его воспитався, / в послушании же и научении лета многа пождав, / жезл пастырский смиренно приял еси, взывая: / слава силе Твоей, Господи.
Овцы пажити твоея созывал еси гласом евангельским / и во дворы церковныя сия управлял еси, / истинный пастырь тем являяся, /иже душу свою за овцы своя полагает.
Богородичен:Ангельское целование приносим Ти, /Благословенная Богородице, / радуйся, Благодатная, / Господь с Тобою.
Песнь 5
Возсиявый свет и просветивый утро / и показавый день/ слава Тебе, слава Тебе, / Иисусе, Сыне Божий.
Просветил еси, Патрикие, землю Ирскую / светом учения Христова,/ о новоизбранном стаде твоем веселяся/ и Богови славу воздая.
Отверзл еси очи умная, прежде неверием ослепленная,/ иже во тьме невежествия пребывающих/ и тыя подвигл еси / со всеми верными Христа Спаса славити.
Сытости не зная, проповедал еси веру православную, / настоя и научая во времени и безвремении со слезами многими, / Христу Богу, помогающему ти вопия: / слава силе Твоей, Сыне Божий.
Богородичен:Тьму отгнавшая и Солнце Правды миру возсиявшая,/ Богородице Марие, / зловерия нощь от мира отжени.
Песнь 6
Возопи, прообразуя погребение тридневное / пророк Иона в ките моляся / от тли избави мя / Иисусе царю сил.
Обижаем не противоглаголал еси/ и уничижаем смирялся еси,/ образ являя учеником твоим,/ темже и возвеличи тя, Господь,\ Патрикие.
Льстивым кознем диавольским противоборствуя,/ не убоялся еси прещения/ волхвов нечестивых, / Христову веру безбоязненно проповедуя/ и взывая: / от се=тей их избави мя,\ Иисусе, Царю Сил.
Скорбь, и тесноту,/ и горькое рабство/ в юности твоей претерпев,/ егда пленен был еси, Патрикие,/ по гласу же Господню/ свободу улучив, возопил еси: \ слава Тебе, Иисусе, Царю Сил.
Богородичен:Ты еси обидимых Помощница,/ Ты еси плененных Свобождение,/ Твои бо мольбы, Приснодево Владычице, / приемлет присно Сын Твой/ и Бог наш.
Кондак, глас 4:
Показался еси/ истинный ловец человеков, / мре=жи бо благовестия евангельскаго простер, / уловил еси языки/ во Царствие Христово,/ Крещением просвещая/ во тьме поклонения идольскаго пребывающия / и тех сотворяя чада Живаго Бога; / сего ради молим тя: / предстательствуй, отче Патрикие, \ о чтущих святую память твою.
Ин кондак, глас 8
Яко луч горняго Солнца Правды во Ирстей земли яви тя Святый Дух, крестом Христовым поклонение дольнему солнцу упраздняя, во отоце окияна моря ученьми своими кельтския языки ко благочестию привел еси, темже любовию сошедшеся светло празднуем память твою, Патриче богомудре, просвещай верою призывающия тя и чтущия честную память твою.
Песнь 7
Авраамстии иногда в Вавилоне отроцы/ пещный пламень попраша/ песньми взывающе/ отец наших Боже благословен еси.
Видений Богооткровенных зрителю, / Патрикие святи-телю, / последовал еси призывающему тя Божию Гласу, / иже тя посла люди новыя ко истинней вере обратити.
Ангельский образ от юности твоея восприим, / ревновал еси о насаждении жития монашеского в ново-просвещенной земли, / обители многия повсюду созидая и Господеви поя: / отец наших Боже, благословен еси.
Ирская земля тобою хвалится / и память твою чтит, Патрикие,/ но и мы, от Востока пришедше, усердно тя в молитвах призываем,/ Господа о тебе благодаряще и вопиюще: благословен еси, Боже наш.
Богородичен:Рабов Твоих мольбы приими и ныне, Всенепорочная, / якоже древле моления к Тебе прибегающих слушала еси, / Ты бо вчера и днесь и в веце грядущем / Едина милостивая Заступница являешися.
Песнь 8
Царя Христа, Егоже исповедаша / плененнии отроцы в пещи / глаголюще велиим гласом / вся дела пойте Господа.
Сеятель добрый явился еси, святителю Патрикие, / ниву благоплодную Христови возрастив/ и люди новопро-свещенныя научая вопити: / вся дела пойте Господа.
Твердое веры Христовы основание положив, / созидал еси без числа храмы и обители иноческия, / в нихже труждающихся подвизал еси вопити: / вся дела пойте Господа.
Иереи Божия поставлял еси и по всей земли посылал еси тех на служение,/ яко да утверждают в вере, тобою проповеданной,/ люди новоизбранныя, благодарне зову-щия: / вся дела пойте Господа.
Богородичен:Иноверческая заблуждения и еретическая шатания осуети, / верныя же во истине утверди, / тайно научающи их, Владычице, Бога православно воспевати.
Песнь 9
От земнородных Рождшися / и Творца Рождшая / наша Похвало, Богородице Чистая / Тя яко владычествующую тварьми, величаем.
Летнюю память твою, Патрикие, совершающе / и апостольския труды твоя восхваляюще, / от Востока и Запада сошедшеся, / единодушно тя величаем.
Юность твою Христови в жертву принесл еси / и до старости Тому служил еси, святителю, / апостолом поревновав и преподобным подражая, / темже тя велегласно величаем.
Дубравы и холмы земли Ирския молитвою твоею освятил еси / и слезами многими новонасажденную ниву Христову орошал еси, / да возрастет и сторичный плод принесет, / темже труды твоя и ревность по Богу величаем.
Богородичен:Ирскую землю и всякую страну христианскую попечением Твоим не оставляй, Богородице, / со Патри=-кием святым Сына Твоего Божественнаго умоляющи,/ да вся помилует и спасет / непрестанно Тя величающих.
Светилен, гл. 3
Нощь языческую просветивый светом Христовым, Патри=кие, во свете невечернем ныне пребываеши, на Солнце Правды взирая и моляся непрестанно, да возсияет во всем мире трисолнечный свет Православия.