Затем поем канон благодарственный Богу, в Троице славимому, давшему сию преславную победу. Глас 1.




Песнь 1

Ирмос: Твоя победительная десница/ боголепно в крепости прославися:/ та бо, Безсмертне,/ яко всемогущая, противныя сотре,/ израильтяном путь глубины новосоделавшая.

Припев: Пресвятая Троице, Боже наш, слава Тебе

Трисветлое Едино Божество, исполни уста наша Всесвятаго Твоего Духа,/ да о сих возможем Тебе воспети песнь благодарственную,/ яже нам, Светодетелю, милостивно соделал еси.

Божественных чинов лики да станут ныне с нами/ и воспоют победительную песнь Богу, дивному и преславному в делех,/ Иже чудесно смири врагов наших вознесенную гордыню.

К похвалению Триипостаснаго Божества стецытеся, земнороднии,/ и аще не по достоянию, то по усердию воспойте неразделимую Троицу,/ толикая благая нам, недостойным, соделавшую.

Богородичен: Вместившая во утробе Девической невместимое Слово, Богородительнице,/ даждь нам слово хваления, да с Небесными силами воспоем Тя,/ предстательство страшное и непобедимое на враги во брани.

 

Ин, глас тойже

Ирмос: Песнь победную поим вси Богу,/ сотворшему дивная чудеса мышцею высокою/ и спасшему Израиля,/ яко прославися.

Терпя потерпех Господа, рцы, Отечество наше, и внят ми, / и услыша молитву мою, и исправи стопы моя, /и вложи во уста моя песнь нову, Богу благодарственную, / и узрят мнози, и убоятся, и уповают на Господа.

Боговещанный Давиде, ныне с доброгласными гусльми стани,/ и созови всех к торжественному православных пению,/ и воспой с нами Богу песнь победительную.

Словесем Твоим, Господи, утвердишася небеса и поведают славу Твою;/ темже словесем утверди уста наша,/ да и тыя возвестят славу Твою, юже нам даровал еси,/ Отче, и Сыне, и Всесвятый Душе.

Богородичен: Приими благодарственную песнь, Ходатаице благодати на Тя надеющимся,/ и мир испроси Церквам, Отечество наше всегда неодоленно сохраняющи,/ емуже победу на враги даровала еси.

 

Песнь 3

Ирмос: Утверди, Господи, Церковь Твою,/юже стяжал еси/ силою Креста Твоего,/ имже врага победил еси/ и просветил еси вселенную.

Жезл силы послал еси нам, Господи, Крест Твой честный,/ и сим оружие вражие притупил еси;/ сему жезлу силы Твоея покланяемся/ и, покланяющеся, Тебе Самаго почитаем.

Моисей, крестообразно распростер длани, побеждаше Амалика;/ мы же, Крест Христов почитающе, победихом сопротивнаго силою на Нем Распятаго,/ Емуже победительная воспеваем.

Светосиянен Креста образ на небеси видев, царь Константин Максентия победи;/ сим же знамением и народ наш германского (готфского, немецкого) Максентия низложив силу,/ Богу победителю благодарение возсылает.

Богородичен: Иудифе новаго Израиля, Богородительнице Марие, / Ты еси похвала, и веселие, и честь наша, / Ты бо укрепила еси сердце наше на разорение новаго Олоферна.

 

Ин, глас 4

Ирмос: Лук сильных изнеможе,/ и немощствующии препоясашася силою,/ сего ради утвердися в Господе сердце мое.

Воистинну Крест Твой, Господи, оружие непобедимое есть:/ сим бо враг наш исказитель образа Креста низложися,/ мы же победители явихомся.

Вознесен змий исцели от змиев угрызеныя;/ вознесен Христос на Крест уврачева от диавола и от змия германского (готфского, немецкого,) угрызеныя, / Тому слава и благодарение со Отцем и Святым Духом.

Покланяемся подножию Твоему, Господи, яко свято есть,/ сим бо врагов наших подножие ног наших положил еси,/ вознесл же еси главу нашу, юже Тебе приклоняем,/ да будет всегда подножие ног Твоих.

Богородичен: Не уповаша, Владычице, на Тя беззаконнующии,/ но уповаша на язык велеречив,/ на язык человеч,/ темже, Владычице, челюсти их сокрушила еси,/ уповающим на Тя пособствующи.

 

Седален, глас 5:

Трисолнечный свет славословим и просте Троице ныне поклонимся,/ яко просвети нас и помилова/ и воздаде врагом нашим седмерицею в недро их поношение их, имже поносиша нам,/ сохраняющи овцы пажити Своея от похищения ненасытнаго зверя.

Слава, и ныне, Богородичен:

Радуйся, стено твердая почитающим Тя./ Радуйся, падение не покланяющимся Тебе./ Радуйся, возведение православных людей, Богородице,/ воистинну уповающих на Тя,/ молитвами Твоими избавляющи нас от бед всяческих и от прегордых враг.

 

Песнь 4, глас 6

Ирмос: Удивися Твой разум от мене, / услышавшу преславная веления смотрения Твоего, / укрепися же возлюблением Твоего схождения:/ Ты бо моея нищеты не отверглся еси.

Да не будет нам девять прокаженных мужей подражати неблагодарствию,/ но, преславно победивше Господем нашим Иисус Христом,/ с самарянином на ногу Его ниц падаем, хвалу Ему воздающе.

Небеса поведают славу Божию,/ мы же должни Пресвятое Имя Его превыше небес превозносити,/ яко сниде с Небес спасти во брани помазанныя Своя.

Четырех животных, окрест престола Божия стоящих, возгласим песнь сию:/ Свят, Свят, Свят Господь Бог Вседержитель,/ врагов наших победивый.

Богородичен: Руно, орошенное благодатию Божиею, Мария, одоление над германцами (готфами, немцами) содела,/ якоже прежде Гедеону на Мадиама./ Той убо, по Бозе победительная воспевающе, глаголем:/ радуйся, заступление православным христианом, еретиком же и новым язычником низложение.

 

Ин, глас 2

Ирмос: Хранитель твердый/ и незыблемое утверждение Ты еси, Христе,/ надеющияся на Тя неуклонны утверждая нас/ извести, в твердом Твоем основании надежды и веры.

Двадесять и четырем старейшинам подражающее падем пред седящим на Престоле и поклонимся Живущему во веки веков:/ сим бо престол Церкви нашей[2] не подвижеся вражиими наветы.

Кто победи змия германского (готфского, немецкого),/ изшедшаго от нырища своего, ищуща кого поглотити?/ Се победил есть Лев[3], Иже сый от колена Давидова,/ Егоже прославляем непостижимую силу.

Аще и Агнец еси непорочен и смирен сердцем, Христе,/ но Твоею кротостию змий лютый упразднися,/ Тебе убо со старцы припадаем и глаголем,/ спасение седящаго на престоле Бога нашего и Агнца.

Богородичен: Кивот[4] древний, износим в полки, побеждаше иноплеменников,/ позлащенный Духом кивот – Мария, победи врагов наших,/ нас же защити от смертоносныя язвы,/ Юже яко Матерь Божию почитаем.

 

Песнь 5, глас 7

Ирмос: Роса, яже от Тебе, Христе Боже,/ исцеление верным нам явися:/ земли же нечествующих злочестиво падение обещается,/ темже от нощи утренююще,/ песнь Ти приносим.

Ведом Бог во всех делех Своих,/ наипаче же в тяжестех, егда заступает, знаемь есть;/ Егоже и мы в тяжестех познавше заступление, егда разгна враги наша,/ благодарственную песнь Ему приносим.

Отверзоша на ны уста своя, яко лев восхищаяй и рыкаяй;/ Ты же, Господи, не удалил еси помощи Твоея от нас,/ сокрушив членовныя львом.

Повемы Имя Твое братии нашей и посреде Церкве воспоем Тя,/ яко спасл еси нас от уст львовых,/ вознося, яко единорога, рог православных.

Богородичен: В бедах сущим близ Ты еси, Дево Чистая,/ темже, к Тебе прибегающе, пременение во всех скорбех обретаем, Владычице,/ Тобою и ныне спасохомся от стреляния вражия.

 

Ин, глас 6

Ирмос: Неизреченныя Твоея силы/ и содержительныя всех премудрости Твоея/ устрашаюся, помышляяй,/ и вопию Ти, Блаже:/ на враги да вознесется, Христе, рог мой.

В нощи коварств объяша нас, яко лев, готов на лов,/ но предвари Господь и запя им:/ посла с Небес Сампсона Своего и растерза челюсти львом.

Боящиися Господа, восхвалите Его, яко не уничижи,/ ниже негодова молитвы смиренных, ниже отврати лице Свое от нас,/ и, егда воззвахом к Нему, услыша, нас.

Слава Тебе, Иже во святых живеши, хвало Израилева,/ на Тя уповаша отцы наши, и избавил еси я;/ и мы воззвахом и спасохомся, уповахом и не постыдехомся.

Богородичен: Купиною горящею и несгараемою прообразованная,/ Ты нас посреде огня погибельного неопальных сохранила еси,/ пречудная Мати и Дево Богородительнице,/ того ради от рода в род воспевати Тя не престанем.

 

Песнь 6, глас 5

Ирмос: Обыде мя бездна,/ гроб мне кит бысть,/ аз же возопих к Тебе, Человеколюбцу, / и спасе мя десница Твоя, Господи.

Испытуете, язьщы, откуду нам сила на сильнаго?/ Не слышите ли наперсника Господня, глаголюща:/ сия есть победа – побеждшая мир вера наша.

Иже рече:/ аще имате веру, яко зерно горушно,/ речете горе сей: прейди! и прейдет,/ и ничтоже невозможно будет вам,/ Сей ныне подаде силу во брани воинам нашим ради верующих во Имя Его.

Иже Петру на мори подаде руку,/ Сей и ныне во время ратнаго волнения язык наш ят за руку/ и изведе его от печалей многих.

Богородичен: Девора пророчица, судящая древле Израилеви, изыде на брань/ и победи Ханаана, Сисара же в бегство сотвори./ Сниде и с нами на брань Девора новаго Израиля – Мария и таяжде сотвори,/ да будет прославляема от всех родов.

 

Ин, глас 2

Ирмос: Возопих в скорби моей/ ко Господу Богу моему,/ и посла Спаса мира,/ и избави от тли живот мой.

Возопи Церковь наше в печали своей ко Господу, глаголющи:/ кто возможет крепкаго сего врага победити? / Бог же отвеща и слово делом утверди,/ яко вся возможна суть верующему.

Верою древнии заградиша уста львом, избыша острея меча,/ быша крепцы во бранех, обратиша в бегство полки чуждих;/ ради веры избранных своих и нам ныне подобная сотворити дарова Всесильный Господь, / Тому слава во веки.

Благодарим Тя, Христе Боже наш, яко на камени основал еси Церковь Твою,/ и не падеся ветром и волнениям нашедшим,/ и врата адова еретическия и языческия силы не одолеша ей.

Богорддичен: Благословенна Иаиль в женах Израилевых, яко разби главу Сисара;/ благословенна еси от всех родов, Марие Богородице,/ яко главы хульныя сисаров нынешних пресекла еси,/ сохраняющи стадо Свое невредимо.

Кондак, глас 8 [5].

Подобен: Аще и во Гроб:

Укрепивый Давида на Голиафа,/ укрепил еси и воинство наше,/ ради верных служащих Ти/ и о имени Твоем подвизающихся,/ благодеяния Твоя прославляющих,/ щедроты Твоя сим даровал еси, Христе Боже;/ Ты бо надежда наша, и спасение, и непобедимая победа.

Икос:

Сам, Господи, создал еси премудрость, и видел еси, и исчел ю,/ и излил еси ю на вся дела Твоя со всякою плотию по щедротам Твоим,/ по даянию Твоему даровал еси./ Ты, и верныя люди Твоя от сокровищ Своих умудривый,/ ими воинство наше во бранех премудро наставил еси./ Темже ныне торжественными песньми Твою премудрость воспеваем/ и благодарим Тя, премногия нам даровавшаго победы.

Песнь 7, глас 4

Ирмос: Отец наших Боже, не посрами нас,/ но даруй нам со дерзновением вопити Тебе:/ благословен еси, Боже отец наших.

Якоже древле триех отроков, такожде и нас, посреде огня погибельного стоящих,/ за молитвы верных сохранил еси, врагов же пояде пламень неугасающий./ Темже со отроки Тебе вопием:/ благословен еси, Боже отец наших.

Да о Имени Иисусове всяко колено поклонится, Небесных и земных, и преисподних,/ и всяк язык исповесть, яко Господь Иисус Христос сотвори с нами милость,/ благословен Бог отец наших.

Приидите, возвеличим чудная дела Божия:/ како покаявшихся нас вознесе, како наказуя прослави,/ како победительным венцем увенча и миром огради,/ и радостотворно возопиим:/ Боже отец наших, благословен еси.

Богородичен: Прообразуемо Рождество Твое, Богородице, отроки в пещи спасло есть;/ собывшее же ся ныне врагов наших ратный пламень угаси./ Тому покланяющеея и Тебе, Начальницу нашего спасения, величающе, глаголем:/ благословен Бог отец наших.

Ин, глас 5

Ирмос: Прехвально есть и препрославлено Имя Твое,/ Господи, Боже отец наших, во вся веки,/ и препрославлен, яко праведен еси о всех,/ яже сотворил еси нам.

Образа злата божески не почетше,/ победша гордыню Навуходоносорову преславнии отроцы;/ мы же, смиренно покаянные молитвы Богу слезно возсылающе подобную германскую (готфскую, немецкую) гордыню смирихом:/ благословен Бог отец наших.

Паде Навуходоносор, образ свой, аки Божий, почитати повелевающий;/ падоша и германцы (готфы, немцы), богами себя мнящие./ Мы же, обоих нечестию сопротивоборцы, силою Вышняго победихом:/ благословен Бог отец наших.

Равно сонному видению Навуходоносорову помышляше вождь германский (готфский, немецкий),/ и паде на него камень, и здание умышления его разсыпа, и все мечтание исчезе:/ благословен Бог отец наших, сотворивый тако.

Богородичен: Ты еси гора, от неяже отторжеся Камень/ и разсыпа здание мечтания вражия, Преблагословенная Богородице Марие,/ Тебе убо по Бозе, яко падеся супостат наш,/ благодарение возсылаем, воспевающе:/ благословен Бог отец наших.

 

Песнь 8, глас 1

Ирмос: Премудростию и Словом вся составльшаго Бога,/ от языков и варваров избавльшаго нас, /отроцы, пойте,/ священницы, прославите,/ людие,превозносите во вся веки.

Забы змий естества своего устав, еже на чреве ползати,/ дерзне внити в пределы чуждыя./ Темже и попран есть от Господа,/ о сем Господа прославите во вся веки.

Петр апостол рече:/ супостат наш диавол, яко лев./ Церковь же наша виде супостата льва, яко диавола,/ вниде бо в державы Отечества нашего, но ничтоже, кроме рыкания, сотвори,/ низложен бо и погублен Господем нашим,/ Егоже превозносите во вся веки.

Камо, изгнан, бежиши, супостате?/ До небес вознесохся до ада низведен еси, полки своя в поражение и в плен оставив;/ о сем мы воспоим Господа и превозносим во вся веки.

Богородичен: Предваривши вскоре и предстоящи тепле, Дево Богородице,/ зело одержимых нас лютыми обстоянии от печали свободила еси,/ о сем да поют Тя священницы, людие превозносят во вся веки.

Ин, глас 3

Ирмос: Ангелами немолчно в Вышних славимаго Бога,/ небеса небес, земля, и горы, и холми, и глубина,/ и весь род человеческий,/ песньми Того, яко Создателя и Избавителя, благословите/ и превозносите во вся веки.

Со Ангелы немолчно славословим силу Твою, Господи,/ еюже низложил еси силы вражия,/ и быша яко прах пред лицем ветра, и путь их тьма и ползок,/ и Ангел Господень погоняя их лютым падением.

Ополчишася Ангели Твои, Господи, окрест нас,/ и ничтоже успеша противу нас силы вражия./ Темже, Тебе припадающе и благодаряще, молим:/ огради нас и в будущая времена святыми Ангелы Твоими.

Како быша в запустение?/ Внезапу исчезоша, яко соние востающаго./ Ты, Господи, умножил еси на нас величествие Твое и, обращся, утешил еси нас,/ за льщения их положил еси им злая,/ внегда разгордешася.

Богородичен: В скорбех утешение,/ в напастех и в бедах Предстательницу Тя, Мати Божия, стяжавше,/ печалей наших избавихомся;/ тем Тя по долгу, яко Матерь Божию и Заступницу рода христианскаго, величаем.

Песнь 9, глас 1

Ирмос: Сотвори державу мышцею Своею,/ низложи бо сильныя со престол/ и вознесе смиренныя Бог Израилев,/ в них же посети нас Восток с высоты/ и направил ны есть на путь мира.

Вскую полагаете оружие супостаты?/ На се ли внесосте е в страны наша,/ да якоже Голиаф своим мечем поражен есть,/ тако и вы от своего оружия пострадаете.

Познасте наконец, яко оружие ваше не спасет вас, того ради е повергосте./ Рцыте убо с нами, яко Господь спасает во брани:/ благоволит Господь в смиренных и уповающих на милость Его.

Познахом и мы, Господи, яко не оружием нашим спасохомся,/ но десница Твоя и мышца Твоя,/ еюже врази наши побеждени покоришася.

Богородичен: Нелестно упование и помощь имуще Тя, Богородице, наветов вражиих не убояхомся,/ они же не имуще Твоея помощи, смятошася./ Тако да трепещут вси, не призывающии Тя на помошь,/ раби же Твои ничимже устрашаеми пребудут.

Ин, глас 8

Ирмос: Да умолчат язычников собрания,/ не исповедующих Тя, Богородицу/ ибо свыше Тя пророцы предпроповедаша/ Матерь быти Божию/ и Ходатаицу рода нашего./ Тем Тя, Дево, величаем.

Господь Саваоф вождь бе полков наших, Сей устраши врагов наших,/ яко им, многим числом сущим, оружие трепетным от рук испаде,/ еже приемше, Господа сил величаем.

Нам ли кланяетеся, супостати, ихже уничижисте?/ Не нам, но Имени Господню с нами дадите славу,/ Иже немощныя мира избра, да посрамит крепкая,/ и уничиженная избра и не сущая, да сущая упразднит.

С нами Бог, разумейте, языцы, и покаряйтеся, яко с нами Бог,/ и более безумно не дерзайте:/ аще бо паки возможете, и паки побеждени будете,/ яко с нами Бог.

Богородичен: Не умолчим никогда, Богородице, силы Твоя глаголати, недостойнии:/ аще бо Ты не бы предстояла молящи,/ кто бы нас избавил от толиких бед?/ Ктоже бы сохранил до ныне свободны?/ Не отступим, Владычице, от Тебе,/ Твоя бо рабы спасаеши присно от всяких лютых.

Ексапостиларий:

Воздал еси врагом нашим седмерицею в недра их поношение их,/ имже поносиша нам, Господи,/ мы же, людие Твои и овцы пажити Твоея, Тобою сохраненнии и прославленнии,/ исповемыся Тебе, Боже, во век,/ в род и род возвестим хвалу Твою.

Слава, и ныне, тойже,

На хвалйтех стихиры на 4, глас 4:

Где есте врази наши,/ дерзостно на пределы страны нашея нашедшии?/ Где ваше оружие?/ Где воинская знамения?/ Где корысти, от многих земель награбленныя?/ Где толикая суетная слава?/ Ничтоже, кроме безчестия вашего./ Воистинну сбыстся ныне пророческое слово:/ врази Господни, купно прославитися им и вознестися,/ исчезающе, яко дым, исчезоша,/ уповающии же на Господа не постыдятся во веки.

Рцы нам ныне, Богодохновенный Давиде:/ где есть превозносящийся и высящийся?/ Видех бо, глаголеши, нечестиваго, превозносящася и высящася,/ яко кедры ливанския,/ и где ныне есть, рцы нам?/ Исчезе от очес твоих и наших,/ и мимо идох, и се не бе, и не обретеся./ О, суетнаго кичения!/ О, преходящия славы!/ О, великия Твоея, Боже, истины на враги!/ О, неизглаголаннаго к нам милосердия!

С материю Сисаровою призираше Германия, глаголющи:/ вскую умедлиша стопы сынов немецких в дом свой возвратитися?/ Начальствующии отвещаша ей:/ негли разделяют корысть/ или в стране славян воссели на престолех/ и того ради о меньшем своем нерадят./ Господь же сотвори им,/ яко Мадиаму и Сисаре/ и всем, иже реша:/ да наследим себе Отечество чуждее,/ положи я, яко коло,/ яко трость, пред лицем ветра,/ яко огнь, попаляяй дубравы,/ тако погна я бурею Своею / и гневом Своим смяте я.

 

Слава, и ныне, глас 8:

Вознесет руку скверную на Церковь Божию сын погибели антихрист/ и клятся дом Божий разорити,/ Бог же, помощник рабом Своим, клятву его ложну сотворит./ Тако сотвори и супостату нашему,/ простершему руку на Отечество наше/ главныя его тристаты/ и крепкия военачальники предаде в руце наши,/ сам же, победительною ногою надеющийся в стольный наш град внити,/ под ногами воев наших в нырище своем иудову кончину приял/ и места упокоения не обрете./ Тако да погибнут вси врази Твои, Господи,/ любящии же Тя, яко восток солнца, да возсияют.

 

НА ЛИТУРГИИ

Блаженны от канона песни 3-я и 6-я. Прокимен, глас 7: Господь крепость людем Своим даст,/ Господь благословит люди Своя миром. Стих: Крепость моя и пение мое Господь, и бысть мне во спасение. Или: Кто Бог велий, яко Бог наш? Ты еси Бог, творяй чудеса. Апостол к Римляном, зачало 99. Аллилуйя. Стих: Господь сил с нами, заступник наш Бог Иаковль. 2: Бог нам прибежище и сила: Евангелие от Луки, зачало 51 (от полу): Се даю вам власть: Или утреннее. Причастен: Хвалите Господа с Небес:

 


[1] На наш взгляд по ц.-славянски германцев правильней будет именовать «готфы». Наименование «германцы» в русский язык вошло только в XIXв.

[2] Здесь имеется ввиду Престол Патриарха Московского

[3] Лев здесь Христос

[4] Здесь можно иметь ввиду икону Божией Матери, с которой самолет облетал советские войска

[5] Кондак и икос взяты из благодарственной службы 30 августа



Поделиться:




Поиск по сайту

©2015-2024 poisk-ru.ru
Все права принадлежать их авторам. Данный сайт не претендует на авторства, а предоставляет бесплатное использование.
Дата создания страницы: 2017-10-12 Нарушение авторских прав и Нарушение персональных данных


Поиск по сайту: